1. Yika Yesu ambile hakutwala ku upite wa mu malilu?

YAWANA yeswe kutushi kuhasa kuyimona. Yawana yilemu chinji yili yize kuyishi kumoneka. Muze Yesu te analongesa ha Mulundu, kambile ngwenyi, upite wa mu malilu uli ulemu chinji kuhiana wa hano hashi. Yamba nawa ngwenyi: “Kweswako kwatwama upite, kuzekwene nawa mukupwa mbunge ye.” (Mateu 6:19-21) Muze twakumona chuma chilemu chinji, twakusa tachi hanga tupwe nacho. Twakutulika “upite mwilu” hakupwa ni jina lipema hanji yitanga yipema ku meso ja Zambi. Yesu kambile ngwenyi, upite uze akutulika mwilu keshi kuwiya, chipwe kuunongesa.

2. (a) Kulita ni 2 A-Korindu 4:17, 18, ha yika Paulu atutowezele hanga tulihulikile?(b) Yika mutulilongesa ha mutwe uno?

² Postolo Paulu katutowezele hanga tuhulikile meso jetu ‘ha yuma yize kuyishi kumoneka.’ (Tanga 2 A-Korindu 4:17, 18.) Upite uze kuushi kumoneka, uli yiwape yize Zambi analakenya kutwaha kulutwe lia matangwa. Ha mutwe uno, mutulilongesa yawana yize kuyishi kumoneka yiwana. Yawana yacho yili, usepa ni Zambi, kulemba, spiritu yisandu ya Zambi, ni ukwaso uze Yehova, Yesu ni angelo akutwaha mu mulimo wa kwambujola. Mutulilongesa nawa yize twatamba kulinga hanga tusolole ngwetu, twakusakwilila Yehova ha upite uze kuushi kumoneka.

3. Chawana chilemu chize kuchishi kumoneka yika, nawa yika yakupwisa chashi hanga tupwe ni chawana chacho?

³ Upite ulemu uze kuushi kumoneka uli usepa wetu ni Yehova Zambi. (Samu 25:14) Shina Zambi musandu mahasa kupwa  sepa lia atu yihenge? Ewa mahasa, mumu chitapo cha ukuule wa Yesu ‘chachijile shili ya atu.’ (Yoa. 1:29) Yehova te kananyingika ngwenyi, upale wenyi wa kulamwina atu kupalikila muli Yesu muumanunuka. Kashika alingile usepa ni atu ku mashimbu a kunyima, muze Yesu te kanda achisemuka.—Roma 3:25.

4. Hana yimwe yilweza ya atu waze apwile masepa ja Zambi shimbu Yesu te kanda achisemuka?

⁴ Tulilongesenu hakutwala kuli amwe malunga waze apwile masepa ja Zambi shimbu Yesu te kanda achisemuka. Apalahama kapwile ni kufuliela chinji muli Zambi. Ha kanunu ka miaka kunyima, muze Apalahama te hafwa kulu, Yehova yamuvuluka ngwenyi, “kasendo kami.” (Iza. 41:8) Chino chinalumbunuka ngwo, chipwe ngwe mutu hafwa, nihindu kuli Yehova kali sepa lienyi. Kuli Yehova, Apalahama kali ni mwono. (Luka 20:37, 38) Chilweza chikwo chili cha Yombi. Muze Yehova te analikungulula mu malilu ni angelo, yahanjika ni shindakenyo yeswe hali Yombi. Yehova yavuluka Yombi ngwenyi, “keshi kapalia; mukwa ululi; mukwa kuvwila woma Zambi; keshi kutala ku chuma chipi.” (Yombi 1:6-8) Kuchi Yehova evwile hali Daniele, yoze wanungine ni kushishika kuli Iye ha miaka 80 mu chifuchi chize te atu keshi kuwayila Zambi wamwenemwene? Ha yisuho yitatu mungelo yalweza Daniele ngwenyi, Zambi “kanakuzange chikolo.” (Danie. 9:23; 10:11, 19) Mutuhasa kupwa ni shindakenyo ngwetu, Yehova kanazange chinji kuhindwisa masepa jenyi waze hanafu.—Yombi 14:15.

5. Yika twatamba kulinga mba tupwe ni usepa upema ni Yehova?

⁵ Atu angahi anawahilila musono ha kupwa masepa ja Yehova? Anji. Musono, atu anji hano hashi, malunga, mapwo ni twanuke kanasolola ngwo kali masepa amwenemwene ja Zambi. Yehova ‘kakulikata ni akwa ululi.’ (Yishi. 3:32) Chitapo cha ukuule wa Yesu, che chapwishile chashi hanga tupwe masepa ja Zambi. Ha mukunda wa chitapo cha ukuule, Yehova kakutayiza hanga tulihane kuli iye ni kutupapachisa. Muze twakulinga yino, twakulinunga ni akwa-Kristu a kupapachisa a hashi heswe, waze akuwahilila ha kupwa ni usepa upema ni Yehova!

6. Kuchi mutuhasa kusolola ngwetu twakulemesa usepa wetu ni Zambi?

⁶ Kuchi mutuhasa kusolola ngwetu, twakulemesa usepa wetu ni Yehova? Ngwe chize Apalahama ni Yombi ashishikile kuli Zambi ha miaka yinji, ni yetu twatamba kununga ni kushishika kuli Yehova, chipwe ngwe twakumulingila ha miaka yinji. Chizechene ngwe Daniele, twatamba kulemesa chinji usepa wetu ni Yehova kuhiana mwono wetu. (Danie. 6:7, 10, 16, 22) Yehova matukwasa hanga tuhase kunyongonona mu yeseko yeswayo mutupwa nayo ni kununga ni usepa wetu ni iye.—Fwili. 4:13.

7. (a) Kulita ni Yishima 15:8, kuchi Yehova akwivwa ha kukumbula yilemba yetu?(b) Kuchi Yehova a kukumbulula yilemba yetu?

⁷ Chawana chikwo chilemu chize kuchishi kusoloka, chili kulemba. Masepa apema kakuhanjika mashimbu eswe umwe ni mukwo. Shina Yehova kali sepa lietu wamwenemwene? Ewa! Yehova kakuhanjika ni yetu kupalikila mu Mbimbiliya ni kutusolwela yize akunyonga. Yetu twakuhanjika nenyi mu yilemba, nawa mutuhasa kumulweza yize twakunyonga ni chize twakwivwa. Yehova kakuwahilila chinji ha kupanjika yilemba yetu. (Tanga Yishima 15:8.) Yehova kali sepa lietu wa zango, iye keshi kupanjika wika yilemba yetu, alioze, nawa kakuyikumbulula. Ha mashimbu amwe, kakukumbulula yilemba yetu  kawashi-washi. Ha mashimbu akwo, twatamba kununga ni kulemba ha chimwe chikuma mba Yehova akumbulule yilemba yetu. Chipwe chocho, mutuhasa kufuliela ngwetu, iye makumbulula yilemba yetu ha mashimbu alita ni mu jila yalita. Alioze, Zambi mahasa kukumbulula yilemba yetu mu mutapu weka ni weka. Chakutalilaho, ha mashimbu amwe Yehova keshi kuhwisa yeseko yetu, alioze, mahasa kutwaha mana ni tachi hanga ‘tunyongonone’ ha yeseko yacho.—1 Kori. 10:13.

8. Kuchi mutuhasa kusolola ngwetu twakulemesa chawana cha kulemba?

⁸ Kuchi mutuhasa kusolola ngwetu, twakulemesa chinji chawana chino, kulemba? Jila yimwe, yili kukaula chiyulo cha kulemba mashimbu eswe. (1 Tesa. 5:17) Yehova keshi kutushinjila hanga tulembe. Alioze, kakuvumbika utuswilo wetu ni kutukolweza hanga ‘tunyongonone mu kulemba chetu.’ (Roma 12:12) Kashika, mutuhasa kusolola ngwetu, twakulemesa chawana chino ha kulemba matangwa eswe. Chikwo nawa, nyi tunalembe twatamba kusakwilila Yehova.—Samu 145:2, 3.

9. Kuchi umwe ndumbu akusolola ngwo kakulemesa chawana cha kulemba, nawa kuchi yena wakwivwa hakutwala ku yilemba?

⁹ Muze mutununga ni kulingila Yehova ni kumona chize a kukumbulula yilemba yetu, mutusakwilila chinji ha chawana chino, kulemba. Tutalenu chilweza cha ndumbu Criz, yoze walingile miaka 47 mu mulimo wa shimbu-lieswe. Yamba ngwenyi: “Nakuhinduka chimenemene hanga ngulembe, nakuwahilila chinji muze nakuhanjika ni Yehova ha chimenemene. Chino chakungukwasa hanga ngusakwilile ha yawana yeswe yize akutwaha. Hachino, ufuku muze nakulemba, nakupomba ni mbunge yitoma.”

10. Mumu liaka twatamba kulemesa spiritu yisandu ya Zambi?

¹⁰ Spiritu yisandu ya Zambi yili chawana chikwo chize kuchishi kumoneka twatamba kulemesa. Yesu katukolwezele hanga twite spiritu yisandu mu yilemba. (Luka 11:9, 13) Yehova kakutwaha ‘tachi jahiana’ kupalikila mu spiritu yenyi yisandu. (2 Kori. 4:7; Yili. 1:8) Spiritu  yisandu ya Zambi, muyihasa kutukwasa hanga tunyongonone mu yeseko yeswe yize tunapalika.

11. Kuchi spiritu yisandu muyihasa kutukwasa?

¹¹ Spiritu yisandu muyihasa kutukwasa hanga tulinge mulimo weswawo matwaha mu ululikiso wa Yehova. Spiritu ya Zambi muyihasa kutukwasa hanga tukalakale kanawa ni utotombo wetu ni kulinga kanawa mulimo wa kwambujola. Twatamba kuchichimieka Yehova ha mulimo weswawo mutulinga mu ululikiso wenyi ha mukunda wa ukwaso uze akutwaha kupalikila mu spiritu yenyi yisandu.

12. Kulita ni Samu 139:23, 24, twatamba kwita spiritu yisandu yitukwase kulinga yika?

¹² Jila yikwo yize twakusolwelamo ngwetu, twakulemesa chinji spiritu yisandu ya Zambi, yili kuyita mu yilemba hanga yitukwase kuchiza manyonga api ni usolo upi mu mbunge yetu. (Tanga Samu 139:23, 24.) Nyi twalinga chino, Yehova matukwasa kupalikila mu spiritu yenyi yisandu hanga twehuke manyonga api. Nyi twamona ngwetu manyonga jacho api kananungu mu mbunge yetu, twatamba kwita kuli Zambi spiritu yisandu hanga yitwehe tachi ja kwehuka manyonga jacho. Nyi twalinga chino, Yehova mamona ngwo, tunase tachi hanga twehuke yuma yize muyihasa kukinda ukwaso wa spiritu yisandu ku mwono wetu.—Efwe. 4:30.

13. Kuchi mutusolola ngwetu twakulemesa chinji spiritu yisandu?

¹³ Mutuhasa kusolola ngwetu, twakulemesa spiritu yisandu, ha kupukuna ha yuma yize yinalingiwa musono ni ukwaso wa spiritu yacho. Shimbu Yesu te kanda achiya mu malilu yalweza tumbaji twenyi ngwenyi: ‘Kumunukatambula tachi, muze spiritu yisandu muyiza hali yenu: kumunukapwa yela jami, . . . ndo ku masongo a hashi.’ (Yili. 1:8) Maliji wano, kanamanunuka musono. Spiritu yisandu, yinakwase atu anji kuhiana tununu a tununu nake, hashi heswe hanga anunge ni kulingila Yehova. Chikwo nawa, tunawahilila ha kulinunga ni mandumbu jetu, mumu spiritu yisandu ya Zambi yinatukwase kupwa ni yitanga yipema ngwe, zango, uwahililo, sambukila, kulihumikiza, utu, upeme, ushishiko, kushimbika ni kusuula. Yitanga yeswe ayi yili, “mihuko ya  spiritu” yisandu. (Ngala. 5:22, 23) Spiritu yisandu yili chawana chilemu chinji!

14. Ukwaso uka kuushi kumoneka twakupwa nawo muze tunambujola?

¹⁴ Chawana chikwo chilemu chize kuchishi kumoneka tuli nacho, chili kukalakala ni Yehova, Yesu ni angelo. (2 Kori. 6:1) Twakukalakala no hamuwika mu mulimo wa kwambujola. Paulu kambile hali iye mwene ni hali waze te akalakala no ngwenyi: “Tuli akwa milimo-ni-akwo a Zambi.” (1 Kori. 3:9) Muze twakwambujola twakukalakala hamuwika ni Yesu. Iwuluka ngwe, muze Yesu ahanyine shimbi ya ‘kutayisa tumbaji a ku mavungu eswe,’ kambile ngwenyi: “Yami hamuwika ni yenu nguli matangwa eswe.” (Mateu 28:19, 20) Mba yika mutwamba hali angelo? Twakuwahilila chinji ha kunyingika ngwo, angelo kakutusongwela muze tunambujola “Sango Lipema lia mutolo . . . kuli akwa hashi”!—Uso. 14:6.

15. Hana chilweza cha mu Mbimbiliya chinasolola chize Yehova akutukwasa mu mulimo wa kwambujola.

¹⁵ Angelo kakutukwasa kulinga yika? Muze twakwambujola sango ja Wanangana, mbuto jimwe jakuholokela mu mbunge jipema ni kwima mihuko. (Mateu 13:18, 23) Iya wakukwasa hanga mbuto jino jikole mu mbunge ja atu? Yesu kambile ngwenyi, mutu niumwe mahasa kupwa kambaji kenyi nyi Tato kamukokele kuli iye. (Yoa. 6:44) Mu Mbimbiliya muli chilweza chinatale ha chikuma chino. Ewuluka mashimbu waze postolu Paulo ambulwile kuli mapwo waze apwile haze lia limbo lia Fwilipu. Tala yize Mbimbiliya yinambe hali umwe pwo yoze wapwileho avuluka ngwo, Lidia. Yinambe ngwo: ‘[Yehova] yazulula mbunge yenyi hanga apanjike ku yuma yize ahanjikile Paulu.’ (Yili. 16:13-15) Yehova kakukoka atu ngwe chize akokele Lidia.

16. Iya twatamba kuchichimieka ha yiwape yize twakupwa nayo mu mulimo wa kwambujola?

¹⁶ Iya twatamba kuchichimieka ha yiwape yize twakupwa nayo mu mulimo wa kwambujola? Paulu kakumbulwile chihula chino muze asonekenene chikungulwila cha A-Korindu ngwenyi: “Ami natumbile, Apolu wahinjilile; alioze Zambi watatwishile. Chocho, chipwe mukwa kutumba hi chimwe ko, chipwe mukwa kuhinjila, ka; alioze Zambi iye mwene mukwa kutatwisa.” (1 Kori. 3:6, 7) Ngwe Paulu, ni yetu twatamba kuchichimieka Yehova ha yiwape yize twakupwa nayo mu mulimo wa kwambujola.

17. Kuchi mutuhasa kusolola ngwetu twakulemesa kukalakala hamuwika ni Zambi, Kristu ni angelo?

¹⁷ Kuchi mutuhasa kusolola ngwetu, tunalemesa chiwape cha kukalakala ni Zambi, Kristu ni angelo? Mutuhasa kuchilinga ha kusa tachi hanga twambujole sango lipema kuli akwetu. Kuli mutapu unji wa kwambulwilamo sango lipema, ngwe kwambujola “hakachi ka mbunga ya atu, ni ku zuwo ni zuwo.” (Yili. 20:20) Mandumbu anji kakuwahilila ha kwambujola cha susumuku. Muze akulitakana ni mutu yoze kanyingikine, kakumuneka ni zango ni kuhanjika nenyi. Nyi mutu makumbulula kanawa, kakumwambulwila sango ja Wanangana.

18-19. (a) Kuchi twakuhinjila meya ha mbuto jamwenemwene? (b) Tongola chilweza chinasolola chize Yehova akwashile umwe longi wa Mbimbiliya.

¹⁸ Amu ‘twakukalakala hamuwika ni Zambi,’ kutwatambile wika kutumba mbuto. Alioze, twatamba nawa kujihinjila meya hanga jikole. Nyi mutu mazanga kulilongesa Mbimbiliya, twatamba kusa tachi hanga tumufupe hanji kuhanjika ni ndumbu mweka hanga alilongese nenyi Mbimbiliya. Muze longi yetu anase tachi hanga asenye kulutwe, twakuwahilila chinji kumona chize Yehova anamukwasa hanga alumune yitanga yenyi.

¹⁹ Tutalenu chilweza cha Lapalangane, yoze  wapwile chimbanda ku Africa do Sul. Yazanga chinji yuma yize alilongesele mu Mbimbiliya. Alioze, chapwile chikalu kutayiza yize Mbimbiliya yakwamba hakutwala ku kuhanjika ni afu. (Shimbi 18:10-12) Hakehe-hakehe, Zambi yamukwasa kwalumuna nyonga lienyi. Chipwe ngwe mulimo wacho we te wakumukwasa kupwa ni mbongo jakulikwasa najo, nihindu yecha kupwa chimbanda. Lapalangane, yoze haliapwila uli miaka 60 yamba ngwenyi: “Ngunawahilila chinji ha chize Yela ja Yehova angukwashile mu mulali unji, ngwe kungukwasa kuwana mulimo weka.” Kuhiana yeswe ai, ngunasakwilila chinji Yehova ha kungukwasa hanga ngwalumune mwono wami, haliapwila hanangupapachisa, nawa nakwambujola sango lipema kuli akwetu.

20. Yika yena unazange kununga ni kulinga?

²⁰ Ha mutwe uno, twalilongesa yawana yilemu yiwana yize kuyishi kumoneka. Chawana chilemu chahiana yeswe chili chiwape cha kupwa ni usepa ukolo ni Yehova. Usepa ukolo ni Yehova wakutukwasa kupwa ni yiwape yikwo yize kuyishi kumoneka. Yiwape yacho yili yino: kukundama kuli Yehova mu yilemba, kupwa ni ukwaso wa spiritu yenyi yisandu ni ukwaso ukwo wa mu malilu muze tuli mu mulimo wa kwambujola. Tunazange kununga ni kusakwilila chinji ha yawana yino yilemu ya Yehova yize kuyishi kumoneka. Nawa kanda tulitwamina kununga ni kusakwilila Yehova ha kupwa Sepa lietu mupema.