1. Ki Zezi ti dir konsernan bann trezor dan lesyel?

PA TOU trezor ki nou kapab vwar. Anfet, nou pa kapab vwar bann trezor pli presye. Dan Sermon lo Montanny, Zezi ti koz lo bann trezor dan lesyel ki bokou pli enportan ki bann keksoz materyel tel parey larzan. Apre i ti dir: “Kot ou trezor i ete, ou leker pou la osi.” (Mat. 6:19-21) Ler en keksoz i presye pour nou, nou pou fer tou pour ganny li. Nou anmas “trezor dan lesyel” ler nou annan en bon non oubyen repitasyon devan Bondye. Zezi ti eksplike ki sa bann trezor pa kapab ganny detrir, ni ganny vole.

2. (a) Dapre 2 Korentyen 4:17, 18, ki Pol i ankouraz nou pour fikse nou regar lo la? (b) Ki nou pou diskite dan sa lartik?

² Zapot Pol ti ankouraz nou pour “fikse nou regar . . . lo sa ki nou pa vwar.” (Lir 2 Korentyen 4:17, 18.) Bann keksoz ki nou pa vwar i enkli tou bann bon keksoz ki nou pou gannyen dan nouvo lemonn ki Bondye in promet. Dan sa lartik, nou pou diskit lo kat trezor ki nou pa vwar me ki nou kapab annan depi la konmela. Sa i en lanmitye avek Bondye, sa privilez pour fer lapriyer, led ki nou gannyen avek lespri sen Bondye e led ki nou gannyen dan predikasyon avek Zeova, Zezi ek bann lanz. Nou pou osi vwar ki mannyer nou kapab demontre nou lapresyasyon pour sa bann trezor ki nou pa vwar.

3. Lekel sa trezor pli presye ki nou pa vwar e kwa ki fer li posib pour nou ganny li?

³ Sa trezor pli presye ki nou annan e ki nou pa vwar i lanmitye avek Zeova. (Ps. 25:14, NWT) Me ki mannyer  Bondye i kapab zanmi avek bann imen enparfe e an menm tan reste konpletman sen? I kapab fer sa parski sa sakrifis ki Zezi in fer i “tir pese lemonn.” (Zan 1:29) Menm avan Zezi ti mor, Zeova ti konnen ki Zezi ti pou reste fidel ziska son lanmor pour li kapab sov bann imen. I pour sa rezon ki Bondye ti kapab vin zanmi avek bann dimoun ki ti viv avan Kris ti mor.​—Rom. 3:25.

4. Donn serten legzanp bann zonm ki ti viv avan Zezi ki ti zanmi Bondye.

⁴ Annou vwar legzanp bann zonm ki ti viv avan Zezi e ki ti zanmi Bondye. Abraam ti en zonm ki ti annan en lafwa vreman for. Plis ki 1,000 an apre ki Abraam ti’n mor, Zeova ti apel li “mon zanmi.” (Iza. 41:8) Sa i montre ki menm si en dimoun i mor, Zeova i ankor vwar li konman son bon zanmi. Abraam i ankor vivan dan memwar Zeova. (Lik 20:37, 38) En lot legzanp i Zob. Ler tou bann lanz ti rasanble ansanm dan lesyel, Zeova ti koz lo Zob. Zeova ti montre ki i ti annan konfyans dan Zob, ler i ti dir ki Zob ti en “zonm zis e drwat ki annan bokou respe pour Bondye, e ki evite fer sa ki mal.” (Zob 1:6-8) Ki nou pou dir lo Danyel? Ki mannyer Zeova ti santi anver Danyel, en zonm ki ti servi Li pour apepre 80 an dan en pei kot dimoun pa ti ador Bondye? Trwa fwa bann lanz ti reasir Danyel ki i ti “vreman presye” pour Bondye. (Dan. 9:23; 10:11, 19, NWT) Nou kapab asire ki Zeova i vreman anvi resisit son bann bon zanmi ki’n mor.​—Zob 14:15.

5. Ki nou bezwen fer pour nou kapab vin bon zanmi avek Zeova?

⁵ Ozordi, konbyen dimoun ki annan en bon lanmitye avek Zeova? I annan plizyer milye dimoun ki zanmi avek Zeova. Plizyer zonm, madanm ek zanfan partou dan lemonn pe montre par zot aksyon ki zot vreman bann zanmi Bondye. Zeova i “bon zanmi avek dimoun ki drwat.” (Prov. 3:32, NWT) Zot kapab zanmi Bondye parski zot annan lafwa dan sakrifis Zezi. Sa sakrifis i fer li posib pour nou zanmi Zeova, dedye nou lavi avek li e batize. Ler nou fer sa bann keksoz enportan, nou zwenn ansanm avek sa plizyer milye Kretyen ki’n osi dedye zot lavi, batize e ki aprezan zot “bon zanmi” avek sa pli gran Personnaz dan liniver!

6. Ki mannyer nou kapab montre ki nou apresye nou lanmitye avek Bondye?

⁶ Ki mannyer nou kapab montre ki nou lanmitye avek Bondye i vreman presye? Abraam ek Zob ti reste fidel avek Bondye pour plis ki san-t-an. Nou osi nou bezwen reste fidel nenport ki kantite letan ki nou’n servi Zeova. Parey Danyel, nou lanmitye avek Bondye i devret pli enportan ki nou lavi. (Dan. 6:7, 10, 16, 22) Avek led Zeova, nou kapab fer fas avek nenport difikilte pour nou reste zanmi avek li.​—Fili. 4:13.

7. (a) Dapre Proverb 15:8, ki mannyer Zeova i santi konsernan nou lapriyer? (b) Ki mannyer Zeova i reponn nou lapriyer?

⁷ En lot trezor presye ki nou annan, i sa privilez pour fer lapriyer. Bann bon zanmi i kontan koz lo zot bann panse ek santiman avek kanmarad. Sa i osi parey dan nou lanmitye avek Zeova. Zeova i koz avek nou atraver son Parol, Labib e dan Labib i dir nou sa ki i panse e sa ki i santi. Nou koz avek Zeova dan lapriyer e nou kapab dir li nou bann panse e santiman pli profon. Zeova i vreman kontan pour ekout nou lapriyer.  (Lir Proverb 15:8.) Zeova i nou Zanmi ki kontan nou e i pa zis ekout nou lapriyer me i reponn. Parfwa nou kapab ganny larepons vitman. Me i annan letan nou bezwen kontinyen priy konsernan menm keksoz. Kantmenm sa, nou kapab asire ki nou pou ganny larepons dan sa bon moman e dan sa pli bon fason. Byensir, i kapab ki larepons Bondye i pa sa ki nou ti pe ekspekte. Par egzanp, dan plas retir en difikilte, i kapab donn nou lasazes ek lafors pour nou “andire.”​—1 Kor. 10:13.

8. Ki mannyer nou kapab demontre nou lapresyasyon pour sa privilez pour fer lapriyer?

⁸ Ki mannyer nou kapab demontre nou lapresyasyon pour sa privilez pour fer lapriyer? En fason nou kapab fer sa, i ler nou obei konsey Zeova pour “toultan priye.” (1 Tesa. 5:17) Zeova pa fors nou pour priye. O kontrer, i respekte nou liberte pour swazir e i ankouraz nou pour “persevere dan lapriyer.” (Rom. 12:12) Alor, nou kapab demontre nou lapresyasyon ler nou priy souvan pandan lazournen. Byensir, nou pa devret oubliye pour remersye e loue Zeova dan nou lapriyer.​—Ps. 145:2, 3.

9. Ki mannyer en frer i santi konsernan lapriyer e ki mannyer ou, ou santi?

⁹ Pli lontan nou servi Zeova e nou vwar lafason i reponn nou lapriyer, pli nou devret apresye sa privilez pour fer lapriyer. Annou vwar legzanp en frer ki apel Chris, ki’n servi Zeova a plen tan pour sa dernyen 47 an. Chris i dir: “Toulezour mon kontan lev granmaten pour mwan priy Zeova. Mon kontan koz avek Zeova anmezir ki soley i leve e tou keksoz i zoli! Sa i fer mwan remersye li pour tou son bann kado, enkli sa privilez pour priye. Apre ki mon’n priye a lafen en lazournen, mon kapab dormi avek en konsyans kler.”

10. Akoz nou devret apresye led lespri sen Bondye?

¹⁰ En lot kado ki nou pa kapab vwar me  ki vreman presye, i led lespri sen Bondye. Zezi ti ankouraz nou pour kontinyen priye pour ganny lespri sen. (Lik 11:9, 13) Zeova i servi son lespri sen pour donn nou “lafors . . . ki pli pwisan ki nou prop lafors.” (2 Kor. 4:7; Akt 1:8) Avek led lespri sen Bondye, nou kapab fer fas avek nenport problenm ki nou annan.

11. Dan ki fason lespri sen i kapab ed nou?

¹¹ Lespri sen i kapab ed nou pour desarz bann responsabilite ki nou annan dan servis Bondye. Lespri sen i kapab amelyor bann abilite ki nou deza annan. Nou konnen ki sa bann bon rezilta ki nou gannyen dan servis Bondye i posib zis akoz Bondye i servi son lespri sen pour ed nou.

12. Dapre Psonm 139:23, 24, pour ki rezon nou kapab demann led lespri sen Bondye?

¹² En lot fason nou kapab montre ki nou apresye led lespri sen Bondye, i ler nou demann Zeova pour ed nou pour vwar si nou annan okenn move panse oubyen dezir dan nou leker. (Lir Psonm 139:23, 24.) Si nou demann Zeova sa dan lapriyer, Zeova i kapab servi son lespri sen pour ed nou vwar si nou annan bann move panse oubyen dezir. Si nou annan en move panse oubyen dezir, nou devret priye pour ganny led lespri sen pour nou kapab annan lafors pour reziste sa panse oubyen dezir. Si nou fer sa bann keksoz, Zeova pou vwar ki nou pa anvi fer nanryen ki pou fer li aret donn nou son lespri sen.​—Efe. 4:30.

13. Ki mannyer nou kapab devlop plis lapresyasyon pour lespri sen Bondye?

¹³ Pour nou kapab devlop plis lapresyasyon pour lespri sen, nou kapab mazin lo tou sa ki lespri sen in ed nou akonpli dan nou letan. Avan ki Zezi ti mont dan lesyel, i ti dir son bann disip: “Zot pou ganny pwisans ler lespri sen pou desann lo zot. Zot pou vin mon bann temwen . . . ziska dan bann landrwa pli elwannyen lo later.” (Akt 1:8) Sanmenm sa ki  pe arive ozordi. Avek led lespri sen Bondye, apepre 8.5 milyon dimoun partou dan lemonn in vin bann serviter Zeova. Osi, konman pep Bondye nou ini dan en paradi spirityel parski lespri sen Bondye i ed nou devlop bann zoli kalite, tel parey lanmour, lazwa, lape, pasyans, labonte, fer sa ki byen, lafwa, ladouser e kontrol lo nou lekor. Sa bann kalite i form parti “fri lespri sen.” (Gal. 5:22, 23) Lespri sen i en kado vreman presye!

14. Ki sipor nou annan ki nou pa vwar ler nou partisip dan sa travay predikasyon?

¹⁴ En lot kado presye ki nou annan me ki nou pa vwar, i sa privilez pour “travay ansanm” avek Zeova, Zezi ek bann lanz. (2 Kor. 6:1) Nou travay ansanm avek zot sak fwa ki nou partisip dan sa travay predikasyon. Pol ti dir ki li ansanm avek lezot dimoun ki partisip dan sa travay, i “travay ansanm avek Bondye.” (1 Kor. 3:9) Ler nou partisip dan sa travay predikasyon, nou osi pe travay ansanm avek Zezi. Rapel sa ki Zezi ti dir son bann disip apre ki i ti’n donn zot lord pour fer disip, Zezi ti dir zot: “Mon avek zot.” (Mat. 28:19, 20) Me ki nou pou dir lo bann lanz? Nou vreman apresye ki bann lanz i gid nou ler nou pe anons sa “bon nouvel eternel . . . avek tou bann ki reste lo later”!​—Rev. 14:6.

15. Donn en legzanp dan Labib pour montre sa keksoz enportan ki Zeova i fer dan nou travay predikasyon?

¹⁵ Ki sa sipor ki sorti dan lesyel i kapab ed nou fer? Anmezir ki nou senm lagrenn laverite, serten sa bann lagrenn ki tonm dan bann bon leker i konmans raport fri. (Mat. 13:18, 23) Lekel ki fer sa bann lagrenn pouse e raport fri? Zezi i dir ki personn pa kapab vin enn son disip si son “Papa . . . pa atir li.” (Zan 6:44) Labib i donn en legzanp. Rapel ki i ti arive en fwa ler Pol ti anons sa bon nouvel avek en group madanm an deor lavil Filip. Enn sa bann madanm ti apel Lidi. Labib i dir sa lo li: “Zeova ti ouver gran son leker pour li aksepte sa ki Pol ti pe dir.” (Akt 16:13-15) Parey Lidi, Zeova in atir plizyer milye dimoun.

16. Lekel ki devret ganny loner si nou ganny bann bon rezilta dan predikasyon?

¹⁶ Lekel ki devret ganny onore si nou ganny bann bon rezilta dan predikasyon? Pol ti reponn sa kestyon. I ti dir sa konsernan kongregasyon Korent: “Mwan mon’n plante, Apolos in aroze, me Bondye ki’n kontinyen fer pouse. Alor, se pa sa enn ki plante ouswa sa enn ki aroze ki enportan, me se Bondye ki fer pouse ki enportan.” (1 Kor. 3:6, 7) Parey Pol, nou devret toultan donn loner Zeova pour tou bon rezilta ki nou gannyen dan predikasyon.

17. Ki mannyer nou kapab demontre nou lapresyasyon pour sa privilez ki nou annan pour “travay ansanm” avek Bondye, Kris ek bann lanz?

¹⁷ Ki mannyer nou kapab demontre nou lapresyasyon pour sa privilez ki nou annan pour “travay ansanm” avek Bondye, Kris ek bann lanz? Nou kapab fer sa ler nou fer tou sa ki nou kapab pour anons sa bon nouvel avek lezot. I annan plizyer fason nou kapab fer sa, tel parey temwannyaz “an piblik e kaz an kaz.” (Akt 20:20) I osi annan bokou proklanmater ki kontan fer temwannyaz enformel. Ler zot zwenn en dimoun ki zot pa konnen, zot dir bonzour dan en fason zantiy e  esey konmans en konversasyon. Si sa dimoun i anvi koze, zot esey koz avek li lo sa bon nouvel Rwayonm.

18-19. (a) Ki mannyer nou aroz lagrenn laverite? (b) Donn en legzanp ki montre ki mannyer Zeova in ed en etidyan Labib.

¹⁸ Vi ki nou pe “travay ansanm avek Bondye,” nou pa devret zis plant lagrenn laverite me nou devret osi aroz zot. Ler en dimoun i demontre lentere, nou anvi fer nou mye pour retourn kot sa dimoun pour koz avek li oubyen nou fer laranzman pour en lot dimoun vizit li pour esey konmans en letid Labib. Anmezir ki sa letid i progrese, nou kontan ler nou vwar Zeova pe ed sa etidyan pour sanz son fason panse ek son santiman.

¹⁹ Annou vwar legzanp Raphalalani, ki ti en bonnonm dibwa, Sidafrik. I ti kontan sa ki i ti aprann dan son letid Labib. Me i ti vreman difisil pour li aksepte sa ki Parol Bondye i dir konsernan koz avek bann zanset. (Det. 18:10-12) Avek letan, i ti les Bondye sanz son fason panse e pli tar, i ti arete en bonnonm dibwa menm si sa ti vedir ki i ti nepli annan en travay. Raphalalani, ki annan 60 an aprezan, i dir: “Mon vreman rekonesan ki bann Temwen Zeova ti ed mwan dan plizyer fason, tel parey ed mwan trouv en travay. Pli enportan ki tou, mon rekonesan anver Zeova ki’n ed mwan fer bann sanzman dan mon lavi, pour mwan kapab partisip dan sa travay predikasyon konman enn son bann serviter ki’n batize.”

20. Ki ou determinen pour fer?

²⁰ Dan sa lartik, nou’n vwar kat trezor ki nou pa vwar. Sa enn pli presye dan tou, i sa privilez pour annan Zeova konman nou pli bon Zanmi. Ler nou vin bon zanmi avek Zeova, nou kapab ganny lezot trezor ki nou pa vwar, setadir sa privilez pour fer lapriyer, pour ganny led lespri sen Bondye e pour travay ansanm avek Li ek son lorganizasyon ki dan lesyel. Annou determinen pour devlop plis lapresyasyon pour sa bann trezor ki nou pa vwar. Nou osi anvi toultan remersye Zeova parski i vreman en bon Zanmi.