1. San Yesesi taki fu gudu di de a hemel?

WI Á poi si ala den kado di Gadu gi u. Fu taki en kiin, wi á poi si den moo gaan kado di Gadu gi u. Wan leisi di Yesesi be e holi wan lezing a wan mongo, a be taki den gudu di de a hemel, bun moo tyaipi moni. Baka dati a taki: „Pe i gudu de, na ape yu ati o de” (Mat. 6:19-21). Te u lobi wan sani, wi e meke moiti fu fende en. Wi e ’kibii gudu a hemel’, te wi e meke moiti fu du sani di o meke Gadu lobi u. Yesesi taki nawan sama o poi fufuu efuso poli den gudu di u kibii a hemel.

2. (a) Sowtu taanga-sikin Pawlesi gi wi a 2 Korentesama 4:17, 18? (b) San wi o luku aini a artikel ya?

² Pawlesi gi u taanga-sikin fu „poti pakisei a den sani di wi á poi si”. (Leisi 2 Korentesama 4:17, 18.) Wan fu den sani di wi á poi si, a den sani di Gadu o du gi wi aini a nyun goontapu. Aini a artikel ya, wi o luku fo kado di Gadu gi u di e tyai wini gi u nownow. Den kado ya na a toon di wi anga Gadu poi toon mati, a gaandi di wi abi fu begi, anga a yeepi di Yehofa, Yesesi anga den engel e yeepi wi aini a peleikiwooko. Wi o luku fa u sa soi taki wi e teke den kado ya fu bigi, winsi fa wi á poi si den.

3. San na a moo gaan kado di Gadu gi u di wi á poi si? Saide Gadu be poi gi wi a kado ya?

³ A moo gaan kado di Yehofa gi u, na a toon di wi anga en poi toon mati (Ps. 25:14). Fa wan Gadu di santa sa  toon mati anga sondu libisama? A di a meke Yesesi kon dede gi u, meke wi anga en poi toon mati. Di Yesesi dede gi u, a „puu sondu a goontapu” gi libisama (Yoh. 1:29). Fosi Yesesi dede, Yehofa be sabi taki Yesesi be o holidoo te enke a dede fu pai fu sondu gi libisama. Neen meke den sama di be de a goontapu fosi Kelestesi dede be man toon Gadu mati.​—Rom. 3:25.

4. Taki fu wantu man di be toon Gadu mati fosi Yesesi be kon a goontapu.

⁴ Pakisei wantu sama di be toon Gadu mati fosi Kelestesi be kon a goontapu. Abalaham a wan man di be soi taki ai biibi Gadu anga en hii ati. Moo enke wan dunsu yali baka di Abalaham dede, Yehofa kai en „mi mati” (Yes. 41:8). A sani ya e soi taki winsi wan mati fu Yehofa dede, en anga en e tan mati ete. Gi Yehofa, a leti enke Abalaham de a libi ete (Luk. 20:37, 38). Wan fu den taa mati fu Yehofa a be Yopu. Di ala den engel be kon makandaa a hemel, Yehofa gafa Yopu. Yehofa taki Yopu a „wan bun man. Ai libi a wan letifasi. Ai lesipeki Gadu. A nai du ogii” (Yopu 1:6-8). Fa Yehofa be e si Daniyeli, di dini en anga en hii ati wan sani fu 80 yali langa aini wan kondee di be lai falisi gadu? Di Daniyeli be kon gaandi, a dii leisi wan engel taigi en taki Gadu ’lobi en tuutuu’ (Dan. 9:23; 10:11, 19). Wi e biibi taki Yehofa e angii fu a dei di a o weki den bun mati fi en ya baka.​—Yopu 14:15.

5. San u mu du efu u wani wi anga Yehofa toon mati?

⁵ Aini a ten ya a omen miliyun sama toon Yehofa mati. A omen mannengee, umansama, anga pikinnengee e soi taki den a Gadu mati fu di den e libi enke fa a wani. Yehofa „anga den sama di e du sani anga wan kiin ati, a mati” (Odo 3:32). A di a meke Yesesi kon dede gi u meke wi anga en poi toon mati. Na a sani ya meke u poi paamisi Yehofa taki wi o dini en da u dopu. Te u du den sani ya, wi e kon aini a kulu fu miliyunmiliyun dopu Kelesten di toon mati anga a moo pelensipali Sama a hemel anga goontapu.

6. Fa u sa soi taki ai bigi gi u taki wi anga Gadu a mati?

⁶ Fa u sa soi taki ai bigi gi u taki wi anga Gadu a mati? Leti enke Abalaham anga Yopu, u mu tan dini Yehofa solanga u de a libi. A moo enke wan ondoo yali den man ya dini Yehofa winsi san be e miti den. Leti enke Daniyeli, a de di wi anga Yehofa a mati mu pelensipali gi u moo u libi seefi (Dan. 6:7, 10, 16, 22). Yehofa o yeepi u fu pasa iniiwan tesi di e miti u. A o yeepi u tu fu wi anga en á poli.​—Filip. 4:13.

7. (a) Enke fa Odo 15:8 e soi, da fa Yehofa e fii te wi e begi en? (b) Fa Yehofa e piki den begi fu u?

⁷ Begi a wan fu den taa kado di wi á poi si. Mati lobi taigi denseefi fa den e fii. Wi anga Yehofa e taigi useefi fa wi e fii tu. Yehofa e taki anga u te wi e leisi en Wowtu Beibel. Ai taigi u fa ai fii anga fa ai denki. Wi e taki anga Yehofa te wi e begi en. Wi e taigi en fa wi e fii anga fa wi e pakisei fu sani. Yehofa e piisii te wi e begi en. (Leisi Odo 15:8.) Yehofa lobi u, neen meke a ná aliki wawan ai aliki den begi fu u, ma ai piki den tu. Son leisi a gawgaw ai piki den begi fu u.  Ma son leisi wi abi fu begi omen leisi fu aseefi sani fosi Yehofa piki a begi fu u. Tokuso u sa biibi taki a o piki den begi fu u na a moo bun fasi anga a moo bun yuu. Son leisi Yehofa nai piki den begi fu wi enke fa u be denki. Efu u begi Yehofa fu puu wan tesi gi u, kande a á puu a tesi, ma a o gi wi a kaakiti anga a koni fu man ’holidoo’.​—1 Kor. 10:13.

8. Fa u sa soi taki ai bigi gi u taki Yehofa gi wi a gaandi fu begi en?

⁸ Fa u sa soi taki ai bigi gi u taki Yehofa gi wi a gaandi fu begi en? Wan fasi fa u sa du a sani ya, a te wi e „begi naamo” enke fa Yehofa taki (1 Tes. 5:17). Winsi fa Yehofa nai dwengi u fu begi en, toku ai gi u taanga-sikin fu „begi naamo” (Rom. 12:12). Te wi e begi omen leisi aini wan dei, wi e soi taki wi e teke a kado ya fu bigi. Ma te wi e begi wi á mu e feegete fu gafa Yehofa, anga fu gi en daa fu den somen sani di ai du gi u.​—Ps. 145:2, 3.

9. Fa wan baala e si a gaandi di a abi fu begi Yehofa? Fa yu e si a gaandi di yu abi fu begi Yehofa?

⁹ O moo wi e si fa Yehofa e piki den begi fu u, o moo wi o teke a gaandi di wi abi fu begi en fu bigi. Luku a toli fu wan baala den e kai Chris. A 47 yali kaba a baala ya e du a fuuten diniwooko. A taki: „Mi lobi weki fuuku mamanten fu begi Yehofa. Mi e fii bun te mi e taki anga Yehofa te a san e opo. A yuu de peesi e koo ete. Te mi luku den moin sani di Yehofa meke mi e gi en daa fu den sani ya. Mi e gi en daa tu taki mi poi begi en. Te mi e begi baka na a kaba fu wan dei, mi e fii bun bika mi e go didon anga wan kiin kosensi.”

10. Saide u mu teke en fu bigi taki Gadu gi wi en santa yeye?

¹⁰ Wan fu den taa kado di wi á poi si, na a kaakiti fu Gadu. Yesesi be taki u mu e begi Gadu naamo fu a gi wi en santa yeye (Luk. 11:9, 13). A santa yeye fu  Yehofa e gi u „kaakiti di bigi pasa maiki” (2 Kor. 4:7; Toli 1:8). A yeye fu Gadu sa yeepi u fu holidoo winsi sowtu tesi e miti u.

11. Fa a santa yeye e yeepi u?

¹¹ A santa yeye e yeepi u fu du den wooko di a olikanisâsi fu Gadu gi u. Te u sabi du wan sani kaba, da a santa yeye e yeepi u fu sabi du en moo bun. Na a santa yeye e yeepi u fu du ala den sani di u mu du aini a olikanisâsi fu Yehofa.

12. Enke fa Psalm 139:23, 24 e soi, da san u sa akisi Yehofa te wi e begi en?

¹² Wan taa fasi fa u sa soi taki wi e teke en fu bigi taki Yehofa gi wi en santa yeye, a te wi e akisi en fu yeepi u fu puu takuu pakisei aini wi ati. (Leisi Psalm 139:23, 24.) Te wi e akisi Yehofa a sani ya, a o gi wi en santa yeye di o yeepi u fu sabi san bun anga san á bun. Te wi e pakisei fu du wan sani di á bun, da u mu begi Yehofa fu a gi wi en santa yeye fu pakisei bun sani. Te wi e du a sani ya, wi e soi Yehofa taki wi á wani du nawan sani di o meke a á gi wi en santa yeye moo.​—Efe. 4:30.

13. San o yeepi u fu moo teke en fu bigi taki Yehofa gi wi en santa yeye?

¹³ Te wi e poti pakisei a den sani di a santa yeye e du aini a ten ya, wi o moo teke en fu bigi taki Yehofa e gi wi a yeye fi en. Fosi Yesesi go a hemel a taigi den disipel fi en taki: „Wi o fende a santa yeye, a o gi u kaakiti, da wi o de mi kotoigi . . . te doo den moo faawe peesi a goontapu” (Toli 1:8). Wi e si fa a sani ya e pasa aini a ten ya. Nownow a moo enke aitin anga afu miliyun sama e dini Yehofa a hii goontapu. U poi dini Yehofa makandaa anga taa baala anga sisa fu di a santa yeye e yeepi u fu kon abi bun manii enke, lobi, piisii, freide, pasensi, switifasi, bunfasi, biibi, anga safu-ati. Ai yeepi u fu dwengi useefi tu. A den manii ya „a yeye e meke sama  abi” (Gal. 5:22, 23). A santa yeye a wan kado di Yehofa gi u.

14. Sama e yeepi u te u de aini a peleikiwooko?

¹⁴ A wan gaandi wi abi fu „wooko makandaa” anga Yehofa, Yesesi anga den engel (2 Kor. 6:1). Te u de aini a peleikiwooko wi e wooko makandaa anga den. Pawlesi be taki: „Wi a sama di e wooko makandii anga Gadu” (1 Kor. 3:9). Te wi e go peleiki, wi e soi taki wi e wooko makandaa anga Yesesi tu. Di Yesesi be taigi den disipel fi en taki den „mu go a sama fu ala kondee,” a be taigi den taki: „Mi o de anga u” (Mat. 28:19, 20). Wi abi a gaandi fu wooko makandaa anga den engel tu. Ai bigi gi u taki den engel de anga wi aini a peleikiwooko fu „paati teego bun nyunsu . . . gi den sama di e tan a goontapu”.​—Openb. 14:6.

15. Gi wan toli aini Beibel di e soi fa Yehofa e holibaka gi wi aini a peleikiwooko.

¹⁵ Sowtu wini wi e fende fu di Yehofa e yeepi u fu du a peleikiwooko? Te wi e paati a Kownukondee nyunsu, son sii e kai a wan bun doti da ai bigin goo (Mat. 13:18, 23). Sama e meke den sii ya goo? Yesesi taki nawan sama poi toon en bakaman efi en Dda „á hali en” (Yoh. 6:44). Luku wan toli aini Beibel di e soi taki a sani ya a tuu. Wan leisi Pawlesi peleiki gi wantu uman a doose fu a foto Filipi. Wan fu den uman di a peleiki gi, a be Lidiya. Beibel taki: „Yehofa opo a uman ya ati, neen meke a be poti pakisei a den sani di Pawlesi be e taki” (Toli 16:13-15). Leti enke Lidiya, a so Yehofa hali miliyunmiliyun taa sama kon neen.

16. Sama u mu gafa te sani e go bun aini a peleikiwooko?

¹⁶ Sama u mu gafa te wi e fende wini aini a peleikiwooko? Pawlesi piki a akisi ya aini a biifi di a sikiifi gi a kemeente fu Korente. A taki: „Mi paandi, Apolos nati, ma a Gadu meke a goo. Neen meke a ná a sama di e paandi efuso a sama di e nati pelensipali, ma a Gadu, bika neen e meke sani goo” (1 Kor. 3:6, 7). Leti enke Pawlesi, a Yehofa u mu e gafa ala yuu te sani e go bun aini a peleikiwooko.

17. Fa u sa soi taki ai bigi gi u fu wooko makandaa anga Gadu, Kelestesi, anga den engel?

¹⁷ Fa u sa soi taki ai bigi gi u fu wooko makandaa anga Gadu, Kelestesi, anga den engel? U sa du a sani ya te wi e du ala san u man fu peleiki gi ala sama di wi e miti. Wantu fasi fa u sa du a sani ya, a te wi e paati a bun nyunsu „osu fu osu”, anga peesi pe tyaipi sama de (Toli 20:20). A omen baala anga sisa e paati a bun nyunsu a taa okasi di den fende. Te den miti sama di den á sabi, den e gi den odi, da den e meke moiti fu gi toli anga den. Efu a sama wani taki anga den, da den e suku wan fasi fu peleiki gi en.

18-19. (a) Fa u sa nati den sii di u paandi? (b) Gi wan ondoofenitoli di e soi fa Yehofa yeepi wan Beibelsutudi.

¹⁸ Enke sama di e wooko makandii anga Gadu, wi á mu paandi a Kownukondee sii namo, ma u mu e nati en tu. Dati wani taki te u miti wan sama di wani sabi moo, u mu meke moiti fu go neen baka. Efu useefi á poi go, u sa sende  wan taa peleikiman go neen, bika u wani a sama bigin sutudeli Beibel. Wi e piisii te wi e si fa Yehofa e yeepi a sutudi fu kengi a fasi fa ai denki, anga a fasi fa ai tyai enseefi.

¹⁹ Luku a toli fu wan baala di be e du bonu-wooko fosi. A baala ya e tan a Zuid-Afiikan. A be lobi den sani di a be e leli aini Beibel. Ma a á be makiliki gi en di a kon fusutan san Gadu Wowtu e taki fu a taki di sama e taki anga den afo fu den di dede kaba (Deit. 18:10-12). Pikinpikin a gi Gadu a okasi fu kengi a fasi fa a be e denki. Bakaten, a fika a bonuman wooko, winsi fa na a wooko ya a be e du fu solugu enseefi. Nownow a baala ya abi 60 yali. A taki: „Ai bigi gi mi taki den Yehofa Kotoigi yeepi mi a omen fasi. A den yeepi mi fu fende wan taa wooko. Ma a sani di e bigi gi mi moo ala, na a yeepi di Yehofa yeepi mi fu kengi mi libi. Fu di mi kengi mi libi meke mi poi paati a bun nyunsu gi taawan enke wan dopu Kotoigi.”

20. San i de kabakaba fu du?

²⁰ Aini a artikel ya, u luku fo kado di Gadu gi u di wi á poi si anga wi ain. A moo gaan kado di Yehofa gi u, na a okasi di a gi u fu toon en mati. Te wi anga Yehofa a mati, da a pasi e opo gi u fu fende den taa kado. U sa begi en ala dei, u sa akisi en fu a gi wi a santa yeye fi en tu. Boiti dati, Yehofa, Yesesi anga den engel e yeepi wi aini a peleikiwooko. Meke u du ala san u poi fu soi taki wi e teke den kado ya fu bigi. U wani e gi Yehofa daa ala yuu, bika neen na a moo bun Mati di u sa abi.