1. Yezu ye mun lo fɔ sankolo nafolow koo la?

FƐƐN nafamanw bɛɛ tɛ ye ɲɛɛ na, sanko fɛɛn minw nafa ka bon kosɔbɛ. Tuma min na Yezu tun be mɔgɔw kalanna kulu kan, a kumana sankolo nafolow koo la, o minw nafa ka bon kosɔbɛ ka tɛmɛ wari kan. O kɔ, a ko: “I ka nafolo be yɔrɔ min na, i ka miiriya be o yɔrɔ la fana.” (Mat. 6:19-21). Fɛɛn minw nafa ka bon an fɛ, an dusukun b’an lasun k’olu lo ɲini. An be ‘nafolo caaman lajɛn an yɛrɛ ye sankolo la,’ an kɛtɔ k’a ɲini ka kɛ ni tɔgɔ ɲuman ye Ala ɲɛɛ kɔrɔ. Yezu k’o nafolow tɛ se ka tiɲɛ wala ka sonya abada.

2. a) 2 Korɛntikaw 4:17, 18 kɔnɔ, ciden Pol y’an jija ko an k’an ɲɛɛ lɔnin to mun lo kan? b) An bena mun lo lajɛ barokun nin na?

² Ciden Pol y’an jija ko an k’an ɲɛɛ lɔnin to “fɛɛn yebaliw” kan (2 Korɛntikaw 4:17, 18 kalan). An bena duga minw sɔrɔ Ala ka duniɲa kura kɔnɔ, olu y’o fɛɛn yebali dɔw ye. Barokun nin na, an bena kuma u naani koo lo, an be se ka minw sɔrɔ kabi sisan. O fɛɛnw ye nunu ye: Ala ka teriya, delili, hakili senu ani an be dɛmɛ min sɔrɔ ka bɔ Jehova, Yezu ani mɛlɛkɛw fɛ waajuli baara la. An bena a ye fana cogo min na an be se k’a yira ko an be Jehova waleɲuman lɔn o nilifɛnw kosɔn.

3. Fɛɛn yebaliw bɛɛ la nafaman ye mun lo ye? An be se k’o sɔrɔ mun lo sababu la?

³ Fɛɛn yebaliw bɛɛ la nafaman ye Jehova Ala ka teriya  lo ye (Zaki 2:23). Ala be se ka teriya kɛ ni mɔgɔ dafabaliw ye cogo di ani foyi tɛ bɔ a ka senumanya la? A be se k’o kɛ sabu Yezu ka kunmabɔ saraka be “mɔgɔw ka hakɛw ban.” (Zan 1:29). Jehova tun b’a lɔn ko Yezu tun bena to kantigiya la fɔɔ ka taga se a saya ma. A tun bena o kɛ walisa ka adamadenw kisi. O lo kama Ala ye teriya kɛ ni adamadenw ye, hali ka kɔn Yezu ka saya ɲɛ.—Ɔrɔm. 3:25.

4. Cɛɛ minw kɛra Ala teriw ye ka kɔn Krista tile ɲɛ, u dɔw kofɔ.

⁴ Cɛɛ dɔw kɛra Ala teriw ye ka kɔn Krista tile ɲɛ. An k’u dɔw ka koo lajɛ. Ibrayima ka limaniya barika tun ka bon kosɔbɛ. Saan 1 000 ni kɔ a sanin kɔ, Jehova bele y’a weele ko a “tericɛ” (Ezayi 41:8). O la, hali saya tɛ se ka Jehova faran ka bɔ a teri sɔbɛw la. Jehova fɛ, a be komi Ibrayima bele be niin na (Luka 20:37, 38). Ɲɛyirali wɛrɛ ye Zɔbu ye. Tuma min na mɛlɛkɛw lajɛnna sankolo la, Jehova ye Zɔbu tɔgɔ ɲuman fɔ. A ko: “Mɔgɔɲuman lo, a tilennin be. A be siran ne Ala ɲa, a te sɔn kojugu ma.” (Zɔbu 1:6-8). Jehova tun be mun lo miiri Daniyɛli koo la? A ye Jehova sago kɛ kantigiya la saan 80 ɲɔgɔn, yɔrɔ min na mɔgɔw tun tɛ Jehova bato. Mɛlɛkɛw y’a fɔ cɛkɔrɔba Daniyɛli ye siɲɛ saba ko a koo ka di Ala ye (Dan. 9:23; 10:11, 19). Jehova bena a teri sɔbɛw suu kunu loon min na, an ka la a la ko a kɔrɔtɔnin lo o loon ka se.—Zɔbu 14:15.

5. An ka ɲi ka mun lo kɛ walisa ka teriya sɔbɛ kɛ ni Jehova ye?

⁵ Bi, mɔgɔ miliyɔn caaman be teriya sɔbɛ kɛra ni Jehova ye. An b’o lɔn sabu duniɲa kuru bɛɛ kɔnɔ, cɛɛw, musow ani denmisɛn caaman b’a yirala u ka kɛwalew fɛ k’u b’a fɛ ka kɛ Ala teriw ye. Jehova be “mɔgɔɲumanw kɛ a teriw ye.” (Talenw 3:32). U be se ka teriya kɛ n’a ye sabu u limaniyanin lo Yezu ka kunmabɔsara koo la. Kunmabɔsara sababu la, an be se ka kɛ Jehova teriw ye ani k’an yɛrɛkun di a ma ka batize. N’an y’o koo kɔrɔtaninw kɛ, an be fara kerecɛn miliyɔn caaman kan minw y’u yɛrɛkun di Jehova ma ani ka batize. Olu be teriya sɔbɛ kɛra ni duniɲa kuru bɛɛ Masaba ye!

6. An be se k’a yira cogo di ko an be Ala ka teriya jati fɛɛn nafamanba ye?

⁶ An b’a yira cogo di ko an be Ala ka teriya jati fɛɛn nafamanba ye? Ibrayima ani Zɔbu ye kantigiya kɛ Ala ye saan kɛmɛ ni kɔ kɔnɔ. K’an to duniɲa juguman nin kɔnɔ, an be Jehova sago kɛra a mɛɛnna cogo o cogo, an fana ka ɲi ka to kantigiya la. I ko Daniyɛli, an be teriya min kɛra ni Ala ye, an ka ɲi k’o jati fɛɛn nafamanba ye ka tɛmɛ an niin yɛrɛ kan (Dan. 6:8, 11, 17, 23). * Masaba Jehova barika la, an be se ka gwɛlɛya sifa bɛɛ muɲu ani ka to ka teriya kɛ n’a ye.—Zab. 121:1, 2.

7. a) Ka kɛɲɛ ni Talenw 15:8 ye, Jehova b’an ka deliliw jati cogo di? b) A b’an ka deliliw jaabi cogo di?

⁷ Delili ye fɛɛn yebali nafaman wɛrɛ ye. A ka di teri sɔbɛw ye k’u ka miiriyaw n’u dusukunnakow fɔ ɲɔgɔn ye. An ni Jehova ka teriya fana b’o cogo lo la. Jehova be kuma n’an ye Bibulu sababu fɛ ani a b’a ka miiriyaw n’a dusukunnakow fɔ an ye Bibulu kɔnɔ. An fana be kuma a fɛ delili la ani an b’an ka  miiriya dogoninw n’an dusukunnakow fɔ a ye. A ka di a ye k’an ka deliliw lamɛn (Talenw 15:8 kalan). Nka a tɛ dan o ma. A b’an ka deliliw jaabi fana sabu an teri lo ani an koo ka di a ye. Tuma dɔw la, n’an y’a deli fɛɛn dɔ koo la, a be sin k’an jaabi. Nka tuma wɛrɛw la, fɔɔ an k’a deli siɲɛ caaman. A mana kɛ min o min ye, an ka la a la ko a bena an jaabi wagati bɛnnin ani cogo fisaman na. An b’a fɛ a k’an jaabi cogo min na, n’a sɔrɔ a tɛna an jaabi o cogo la. Ɲɛyirali fɛ, sanni a ka daan sigi an ka kɔrɔbɔli la, a be se ka hakilitigiya ni fanga di an ma walisa an “ka se k’o muɲu.”—1 Kor. 10:13.

8. An be se k’a yira cogo di ko an be Ala waleɲuman lɔn delili kosɔn?

⁸ Delili ye nilifɛn nafamanba ye. An be se k’a yira cogo di ko an be Ala waleɲuman lɔn o kosɔn? An b’o yira an kɛtɔ ka Ala ka ladili nin sira tagama: “Aw kana Aladali dabila.” (1 Tes. 5:17). Jehova t’an waajibiya an k’ale deli. Nka, see min dira an ma ka koow latigɛ an yɛrɛ ma, a b’a janto o la ani a b’a fɔ an ye ko an k’an “jija ka Ala daali.” (Ɔrɔm. 12:12). O la, an b’a yira ko an b’a waleɲuman lɔn, n’an b’a deli siɲɛ caaman tile kɔnɔ. An man ɲi ka ɲinɛ fana ka Ala fo ani k’a tando an ka deliliw la.—Zab. 145:2, 3.

9. Balimacɛ dɔ be mun lo miiri delili koo la? Ele be mun lo miiri delili koo la?

⁹ N’a sɔrɔ an be Jehova sago kɛra kabi wagatijan ani an y’a ye a y’an ka deliliw jaabi cogo minw na. O ka ɲi k’an lasun k’a waleɲuman lɔn kosɔbɛ delili koo la. An ka balimacɛ Chris ka koo lajɛ. Ale be kudayi cidenya baara la a saan 47 ye nin ye. A ko: “A ka di n’ ye ka wuli sɔgɔma joona ka Jehova deli. Tile bɔtɔ, yɔrɔ filɛ ka di. Ninsɔndiyaba lo ne fɛ ka kuma Jehova fɛ o wagati la! O be n’ lasun k’a waleɲuman lɔn delili n’a ka nilifɛn tɔɔw bɛɛ kosɔn. Delili kɛnin kɔ sufɛ, n’ be se ka sinɔgɔ ani n’ dusukun tɛ n’ kɛlɛ.”

10. Mun na an ka ɲi ka Ala ka hakili senu jati fɛɛn nafamanba ye?

¹⁰ Ala ka hakili senu ye fɛɛn yebali nafaman wɛrɛ ye. Yezu y’an jija ko an ka to ka hakili senu deli Ala fɛ (Luka 11:9, 13). Jehova be “sebagaya kabakoman” di an ma hakili senu barika la (2 Kor. 4:7; Kɛw. 1:8). A ka hakili senu barika la, an be se ka kɔrɔbɔli sifaw bɛɛ muɲu.

11. Hakili senu b’an dɛmɛ cogo di?

¹¹ Hakili senu b’an dɛmɛ ka Ala ka baara kɛ. A be se ka dɔ fara an ka setigiya kan fana. An be baara minw kɛra Jehova ye, nafa minw be sɔrɔ o la, an b’a lɔn k’o ye hakili senu lo sababu ye.

12. Ka kɛɲɛ ni Zaburuw 139:23, 24 ye, an be se ka Ala deli walisa hakili senu k’an dɛmɛ ka mun lo kɛ?

¹² An k’a yira ko an be Ala ka hakili senu jati fɛɛn nafamanba ye. An b’o kɛ n’an be delili kɛ walisa hakili senu k’an dɛmɛ an k’a lɔn miiriya ni nege jugu minw b’an kɔnɔ (Zaburuw 139:23, 24 kalan). N’an b’o kɛ, Jehova bena an dɛmɛ hakili senu barika la an k’an ka miiriyaw n’an ka nege juguw lɔn. N’an y’u lɔn, an ka ɲi ka Ala deli janko a ka hakili senu ka fanga di an ma walisa an ka see sɔrɔ u kan. O la, Jehova bena a ye ko an t’a fɛ ka koo si kɛ min bena a to a be ban ka hakili senu di an ma.—Efɛz. 4:30.

13. An be se ka Ala waleɲuman lɔn kosɔbɛ cogo di hakili senu koo la?

¹³ Koo minw be kɛra bi hakili senu barika la, an ka miiri o la. O bena an lasun ka Ala waleɲuman lɔn kosɔbɛ hakili senu koo la. Sanni Yezu ka taga sankolo la, a y’a fɔ a ka kalandenw ye ko: “Ni Nii Senuman jigira aw kan tuma min na, aw bena fanga sɔrɔ ka se ka n ka koow fɔ . . . fɔɔ ka taga se diɲɛ faan bɛɛ la.” (Kɛw. 1:8). O kumaw be dafara bi cogo kabakoman na. Duniɲa kuru bɛɛ kɔnɔ, mɔgɔ miliyɔn seegi ni tilan ɲɔgɔn kɛra Jehova sagokɛlaw ye hakili senu barika la. Hakili senu b’an dɛmɛ ka kɛ ni jogo  ɲumanw ye i n’a fɔ kanuya, ninsɔndiya, hɛɛrɛ, muɲuli, ɲumanya, hinɛ, limaniya, dususuman ani yɛrɛminɛ. O b’a to an kaan bɛnnin lo denbaya hɛɛrɛman kɔnɔ. O jogow bɛɛ ye hakili senu deen ye (Gal. 5:22, 23). Hakili senu ye nilifɛn nafamanba yɛrɛ lo ye!

14. N’an be waajuli kɛra, an be dɛmɛ jumanw lo sɔrɔ an ɲɛɛ tɛ minw na?

¹⁴ Ka ‘baara kɛ’ ni Jehova, Yezu ani mɛlɛkɛw ye, o fana ye nilifɛn yebali nafaman dɔ ye (2 Kor. 6:1). An be baara kɛ n’u ye tuma o tuma n’an be waajuli kɛra. Mɔgɔ minw b’o baara kɛ, Pol y’a fɔ olu n’ale yɛrɛ koo la ko: “An ni Ala ye baarakɛɲɔgɔnw ye.” (1 Kor. 3:9, Bible senuma). N’an be waajuli kɛra, an ye Yezu fana baarakɛɲɔgɔnw ye. Yezu ye cii di a ka kalandenw ma ko: “Aw ye taga siyaw bɛɛ kɛ ne ka kalandenw ye.” An k’a to an hakili la k’o kɔ, a y’a fɔ ko: “Ne kɔni bena to n’aw ye.” (Mat. 28:19, 20). Nka mɛlɛkɛw b’an dɛmɛ cogo di? “Kibaru diman min ye waati bɛɛ ta ye,” n’an b’o fɔra “diɲɛ mɔgɔw” ye, mɛlɛkɛw b’an ɲɛminɛ. An be Ala waleɲuman lɔn kosɔbɛ o kosɔn!—Yir. 14:6.

15. Bibulu ka ɲɛyirali dɔ fɔ min b’a yira Jehova be dɛmɛba min donna waajuli baara la.

¹⁵ N’an be Masaya kisɛw danna, dɔw be ben dugukolo ɲumanw kan ani u be falen (Mat. 13:18, 23). Jɔn lo b’a kɛ u be falen ani ka den? Yezu ko mɔgɔ si tɛ se ka kɛ ale ka kalanden ye n’ale “Faa sababu tɛ.” (Zan 6:44). Ɲɛyirali tigitigi dɔ be sɔrɔ Bibulu kɔnɔ o koo la. Tuma min na Pol tun be muso dɔw waajura Filipi dugu gɛrɛfɛ, i hakili b’a la min kɛra wa? A filɛ Bibulu be min fɔ o musow dɔ koo la min tɔgɔ ko Lidi: “Matigi barika la, a y’a tulo malɔ Pɔli ka kuma na ka ɲa.” (Kɛw. 16:13-15). I ko Lidi, mɔgɔ miliyɔn caaman kɛra Yezu ka kalandenw ye Jehova barika la.

16. An be sera ka baara ɲuman minw kɛ waajuli la, an ka ɲi ka nɔɔrɔ la jɔn lo kan o kosɔn?

¹⁶ Jɔn lo ka kan ni tandoli ye n’an be sera ka baara ɲuman kɛ waajuli la? Pol y’o ɲiningali jaabi a ka lɛtɛrɛ kɔnɔ, a ye min ci Korɛnti kafo ma. A ko: “Ne ye tutuli kɛ, Apolɔsi y’o sɔn jii la, Ala le kɛra sababu ye u boɲana. A kɛra ten, mɔgɔ min ye tutuli kɛ, ale te foyi ye, ani min b’u sɔn jii la, ale fana te foyi ye. Ala kelenpe le be kɛ sababu ye u be boɲa. Ale lo be jati.” (1 Kor. 3:6, 7). I ko Pol, an be sera ka baara ɲuman minw kɛ waajuli la, an ka ɲi ka nɔɔrɔ la Jehova lo kan.

17. Nɛɛma min dira an ma ka ‘baara kɛ’ ni Ala, Krista ani mɛlɛkɛw ye, an be se ka Ala waleɲuman lɔn cogo di o kosɔn?

¹⁷ Nɛɛma lo an fɛ ka ‘baara kɛ’ ni Ala, Krista ani mɛlɛkɛw ye. An be se ka Ala waleɲuman lɔn cogo di o kosɔn? An be se k’o kɛ n’an b’an seko bɛɛ kɛ ka kibaro diiman fɔ mɔgɔw ye. An be se k’o kɛ cogo caaman na i n’a fɔ ka waajuli kɛ “forobayɔrɔw la, ani [mɔgɔw] ka soow kɔnɔ.” (Kɛw. 20:20). A ka di mɔgɔ caaman ye fana ka seereya kɛ sababu dɔw sen fɛ. N’u ye mɔgɔ dɔ kunbɛn, u b’a fo teriya la ani u b’a ɲini ka baro daminɛ n’a ye. N’a tigi sɔnna ka kuma, u be kibaro diiman fɔ a ye nɛmɛnɛmɛ.

18-19. a) An be tiɲɛn kisɛw sɔn jii la cogo di? b) Ɲɛyirali dɔ fɔ min b’a yira Jehova ye Bibulu kalanden dɔ dɛmɛ cogo min na.

¹⁸ “An ni Ala ye baarakɛɲɔgɔnw ye” minkɛ, an man ɲi ka tiɲɛn kisɛw dan dɔrɔn, an ka ɲi k’u sɔn jii la fana. Ni dɔ  y’a mako don, an b’a fɛ k’an seko kɛ ka segi ka taga bɔ a ye. Wala an be se ka labɛn kɛ janko mɔgɔ wɛrɛ ka kaan bɔ a ma walisa ka bibulukalan daminɛ n’a ye. Ni bibulukalan be tagara ɲɛ, an ninsɔn ka di k’a ye Jehova be kalanden dɛmɛna cogo min na walisa a k’a miiricogo n’a dusukunnakow yɛlɛma.

¹⁹ An ka balimacɛ dɔ ka koo lajɛ min tun ye lagwɛrikɛla ye Afirikidisidi. A ye min faamu a ka bibulukalan na, o diyara a ye kosɔbɛ. Nka, a tun ka gwɛlɛ a ma ka sɔn Bibulu ka kalan dɔ ma, o min ye ko an man ɲi ka kumaɲɔgɔnya kɛ ni sukɔrɔw ye (Deter. 18:10-12). A y’a to Ala y’a dɛmɛ a y’a ka miiriya yɛlɛma dɔɔni dɔɔni. Kɔfɛ, a ye lagwɛri dabila hali k’a sɔrɔ a tun be balo o dɔrɔn lo sababu la. Sisan, a be ni saan 60 ye ani a ko: “N’ be Jehova Seerew waleɲuman lɔn kosɔbɛ sabu u ye n’ dɛmɛ cogo caaman na. Ɲɛyirali fɛ, u ye n’ dɛmɛ ka baara sɔrɔ. N’ be Jehova yɛrɛ lo waleɲuman lɔn ka tɛmɛ sabu ale barika la, n’ ye n’ ka ɲɛnamaya kɛcogo yɛlɛma. O y’a to sisan, n’ be se ka waajuli kɛ ani n’ batizera.”

20. I jijanin lo ka mun lo kɛ?

²⁰ Barokun nin na, an kumana fɛɛn yebali nafaman naani koo la. Nɛɛma min dira an ma ka teriya sɔbɛ kɛ ni Jehova ye, o y’o fɛɛnw bɛɛ la nafaman ye. N’an kɛra Jehova teriw ye, an be se ka fɛɛn yebali nafaman wɛrɛw diyabɔ. U dɔw ye nunu ye: delili, hakili senu ka dɛmɛ ani ka baara kɛ ni Jehova, Yezu ani mɛlɛkɛw ye waajuli la. An k’an jija ka to ka Jehova waleɲuman lɔn kosɔbɛ o fɛɛn yebali nafamanw kosɔn. An ka to ka Jehova waleɲuman lɔn tuma o tuma fana sabu a ka teriya ɲɔgɔn tɛ yen.