1. Ebɛnadze na Jesus kãe faa ɔsor akoradze ho?

NNYƐ akoradze nyina na yɛdze hɛn enyi hu. Nokwasɛm nye dɛ, akoradze a ɔsom bo papaapa no, yɛmmfa hɛn enyi nnhu. Wɔ Jesus ne Bepɔw Do Asɛnka mu no, ɔkãa dɛ akoradze bi wɔ sor a ɔsom bo koraa kyɛn ahonyadze. Afei ɔdze dɛm nokwasɛm yi kaa ho: “Mbrɛ w’akoradze wɔ no, hɔ na w’akoma so wɔ.” (Matt. 6:19-21) Sɛ yebu biribi dɛ ɔsom bo paara a, ɔbɛhyɛ hɛn nkuran ma yaabɔ mbɔdzen dɛ hɛn nsa bɛka dɛm adze no. Ɔsɛ dɛ yenya dzin pa anaa gyinabew pa wɔ Nyankopɔn enyim dze kyerɛ dɛ yɛrehyehyɛ hɛn ‘akoradze egu sor.’ Jesus kãa dɛ akoradze a ɔtse dɛm no, obiara runntum nnsɛɛ no anaa onnwia.

2. (a) Dɛ mbrɛ 2 Corinthfo 4:17, 18 kyerɛ no, ebɛnadze na Paul hyɛɛ hɛn nkuran dɛ yɛmfa hɛn enyi nsi do? (b) Ebɛnadze na yebosusu ho wɔ adzesua yi mu?

² Ɔsomafo Paul hyɛɛ hɛn nkuran dɛ, ‘Yɛnhwɛ ndzɛmba a wonnhu no.’ (Kenkan 2 Corinthfo 4:17, 18.) Dɛm ndzɛmba a yɛmmfa hɛn enyi nnhu no, ibi nye nhyira a yebenya wɔ Nyankopɔn no wiadze fofor no mu no. Adzesua yi mu no, yebosusu akoradze anan a yɛmmfa hɛn enyi nnhu naaso yenya do mfaso ndɛ ho. Dɛm akoradze yi nye: Anyɛnkofa a yɛnye Nyankopɔn benya, ho kwan a yeenya dze bɔ mpaa, mboa a Nyankopɔn no sunsum krɔnkrɔn dze boa hɛn, nye mboa a yenya fi Jehovah, Jesus nye abɔfo no hɔ ber a yɛreyɛ asɛnka edwuma no. Afei so, yɛbɔhwɛ mbrɛ yebesi akyerɛ dɛ hɛn enyi sɔ dɛm akoradze a yɛmmfa hɛn enyi nnhu yi.

3. Akoradze a yɛmmfa hɛn enyi nnhu no, dza ɔyɛ kɛse wɔ mu nye dɛn, na ebɛnadze na ɔbɛma iyi ayɛ yie?

³ Akoradze a yɛmmfa hɛn enyi nnhu no, dza ɔyɛ kɛse paara wɔ  mu nye anyɛnkofa a yɛnye Jehovah Nyankopɔn benya. (Ndw. 25:14) Obesi dɛn ayɛ yie dɛ Nyankopɔn a ɔyɛ krɔnkrɔn nye nyimpa ndzebɔnyɛfo benya anyɛnkofa? Iyi botum ayɛ yie, osiandɛ Jesus no werdam afɔrbɔ no ‘yi wiadze bɔn kɔ.’ (John 1:29) Nna Jehovah nyim dadaada dɛ ne tsirmpɔw a ɔnye dɛ ɔnam Christ do bɛgye adasamba nkwa no, ɔkwan biara do ɔbɛba mu. Iyi ntsi, nna Nyankopɔn botum nye nyimpa a wɔtsenaa ase ana Christ ruwu no mpo enya anyɛnkofa.​—Rom. 3:25.

4. Mbarimba a wɔtsenaa ase ansaana Christ reba a wɔbɛyɛɛ Nyankopɔn n’anyɛnkofo no, kã hɔn mu bi ho asɛm.

⁴ Mbarimba a wɔtsenaa ase ansaana Christ reba a wɔbɛyɛɛ Nyankopɔn n’anyɛnkofo no, ma yensusu binom ho nhwɛ. Nna Abraham yɛ ɔbarimba a ɔwɔ gyedzi kɛse. Bɔbor mfe 1,000 wɔ Abraham no wu ekyir no, Jehovah frɛɛ Abraham dɛ, “me nyɛnko.” (Isa. 41:8) Ntsi, owu mpo runntum nntsetsew anyɛnkofa a ɔda Jehovah nye n’anyɛnkofo a ɔdɔ hɔn no ntamu. Wɔ Jehovah n’adwen mu no, ɔtse dɛ mbrɛ Abraham da ho ara tse ase. (Luke 20:37, 38) Nyimpa fofor a yebotum akã noho asɛm nye Job. Aber a abɔfo nyinara hyiaa mu wɔ sor no, Jehovah fi ahotodo mu kãa Job ho asɛm pa. Jehovah kãa noho asɛm dɛ ɔyɛ “ɔbarimba a odzi mu na ɔtsen, obi a osuro Nyankopɔn na okyir bɔn a.” (Job 1:6-8) Na Daniel so ɛ? Ɔdze nokwardzi soom Nyankopɔn bɛyɛ mfe 80 wɔ kurow a wɔsom abosom wɔ mu. Jehovah tsee nka dɛn wɔ noho? Mpɛn ebiasa na abɔfo maa dɛm akɔkora yi awerɛhyɛmu dɛ Nyankopɔn ‘dɔ no kɛse.’ (Dan. 9:23; 10:11, 19) Yebotum enya awerɛhyɛmu dɛ Jehovah n’enyi gyina dɛ ber bɔsõ ma oeenyan n’anyɛnkofo a ɔdɔ hɔn a woewuwu no nyina.​—Job 14:15.

5. Sɛ yɛnye Jehovah benya anyɛnkofa a no mu yɛ dzen a, ebɛnadze na ɔsɛ dɛ yɛyɛ?

⁵ Ndɛ, nyimpa a wonndzi mũ dodow ahen na wɔnye Jehovah wɔ anyɛnkofa? Wɔyɛ nyimpa ɔpepem pii. Iyi yɛ nokwar osiandɛ, wɔ wiadze nyina no, mbarimba, mbaa na mbofra piinara na wɔdze hɔn ndzeyɛɛ reda no edzi dɛ wɔpɛ dɛ wɔyɛ Nyankopɔn n’anyɛnkofo. Jehovah nye “atseneneefo dzi etsirmsɛm.” (Mbɛ. 3:32) Gyedzi a woenya wɔ Jesus no werdam afɔrbɔ mu no, na ebue kwan ma wɔnye Nyankopɔn enya dɛm anyɛnkofa no. Osian Jesus no werdam afɔrbɔ no ntsi, Jehovah ma hɛn ho kwan ma yehyira hɛn nkwa do ma no, na afei yɛbɔ esu. Sɛ yɛyɛ dɛm ndzɛmba a no ho hia yi a, yɛbɛba abɛka Christianfo ɔpepem pii a woehyira hɔnho do abɔ esu, na wɔnye Nyia ɔkyɛn obiara wɔ amansan yi mu no “dzi etsirmsɛm” no ho!

6. Anyɛnkofa a yɛnye Nyankopɔn wɔ no, yebesi dɛn akyerɛ ho enyisɔ?

⁶ Yebesi dɛn akyerɛ dɛ anyɛnkofa a yɛnye Nyankopɔn wɔ no som hɛn bo? Dɛ mbrɛ Abraham na Job kɔr do dzii Nyankopɔn nokwar bɔbor mfe ɔha no, ɔsɛ dɛ hɛn so yɛkɔ do dzi nokwar ɔmmfa ho mfe dodow a yɛdze asom Jehovah wɔ dɛm wiadze bɔn yi mu. Ɔsɛ dɛ yɛma anyɛnkofa a yɛnye Nyankopɔn wɔ no som hɛn bo kyɛn hɛnankasa hɛn nkwa dɛ mbrɛ Daniel yɛe no. (Dan. 6:7, 10, 16, 22) Ɔnam Jehovah no mboa do no, nsɔhwɛ biara a yebehyia no yebotum egyina ano, na yaakɔ do ekura anyɛnkofa a no mu yɛ dzen a yɛnye no wɔ no mu.​—Phil. 4:13.

7. (a) Dɛ mbrɛ Mbɛbusɛm 15:8 kyerɛ no, Jehovah tse nka dɛn wɔ hɛn mpaabɔ ho? (b) Jehovah si dɛn bua hɛn mpaabɔ?

⁷ Akoradze a yɛmmfa hɛn enyi nnhu no, no mu kor so nye mpaabɔ. Anyɛnkofo a wɔbɛn hɔnho papaapa no taa kã hɔn nsusui nye mbrɛ wɔtse nka ho asɛm kyerɛ hɔnho. Ana dɛm pɛpɛɛpɛr na ɔtse wɔ yɛnye Jehovah anyɛnkofa no mu? Nyew! Jehovah nam n’Asɛm no do kasa kyerɛ hɛn, na sɛ yɛhwɛ n’Asɛm no mu so a, yehu no nsusui nye mbrɛ osi tse nka. Yɛnye no dzi nkitaho wɔ mpaabɔ mu, ntsi yebotum akã hɛn tsirmu nsɛm nye mbrɛ yɛtse nka wɔ hɛn  akoma mu no akyerɛ no. Jehovah n’enyi gye ho dɛ obetsie hɛn mpaabɔ. (Kenkan Mbɛbusɛm 15:8.) Jehovah yɛ hɛn Nyɛnko a ɔdɔ hɛn, ntsi nnyɛ hɛn mpaabɔ kɛkɛ na otsie na mbom ɔma ho mbuae so. Ɔtɔ mber bi a, hɛn mpaabɔ ho mbuae no ba ntsɛm. Ɔtɔfabi so a, bi a no ho behia dɛ yɛbɔ biribi ho mpaa mpɛn pii ana yeenya ho mbuae. Naaso ne nyina mu no, yebotum enya ahotodo dɛ, wɔ ber pa mu no, yebenya hɛn mpaabɔ no ho mbuae wɔ kwan a ɔfata do. Naaso, bi a mbuae a Nyankopɔn dze bɛma hɛn no, nnyɛ ɔno na yɛrohwɛ kwan. Dɛ nhwɛdo no, dɛ nkyɛ Nyankopɔn beyi nsɔhwɛ a yerihyia no efi hɔ no, bi a ɔbɛma hɛn nyansa na ahoɔdzen mbom ama ‘yeetum asɔw.’​—1 Cor. 10:13.

8. Yebesi dɛn akyerɛ akyɛdze a ɔnye mpaabɔ ho enyisɔ?

⁸ Mpaabɔ yɛ akyɛdze a ɔsom bo, yebesi dɛn akyerɛ ho enyisɔ? Kwan kor a yebotum afa do ayɛ dɛm nye dɛ, yebedzi afotu a ofi Jehovah hɔ a ɔse ‘yemfua asɔryɛ mu’ no do. (1 Thess. 5:17) Jehovah nnhyɛ hɛn dɛ yɛmbɔ mpaa. Mbom no, ho kwan a yɛwɔ dɛ yefi hɛn pɛ mu yɛ adze no, ɔgye to mu, ntsi ɔhyɛ hɛn nkuran dɛ ‘yenkura asɔryɛ mu.’ (Rom. 12:12) Dɛm ntsi yebotum abɔ mpaa mpɛn pii da biara dze akyerɛ dɛ hɛn enyi sɔ dɛm akyɛdze yi. Naaso, ɔnnsɛ dɛ hɛn werɛ fir da dɛ yɛbɛda Jehovah ase na yeeyi no ayɛw wɔ hɛn mpaabɔ mu.​—Ndw. 145:2, 3.

9. Ebɛn adwen na hɛn nua kor bi wɔ wɔ mpaabɔ ho, na woara so etse nka dɛn wɔ mpaabɔ ho?

⁹ Sɛ yɛkɔ do som Jehovah na yehu akwan a ɔfa do bua hɛn mpaabɔ a, ɔsɛ dɛ enyisɔ a yɛwɔ ma mpaabɔ no yɛ kɛse. Ma yɛmfa hɛn nua Chris dɛ nhwɛdo. Ɔdze mfe 47 ayɛ ber nyina som edwuma no. Ɔkãa dɛ: “Sɛ esoɛr anapaatu na ehyɛ da ara gye ber bɔ Jehovah mpaa a, ɔyɛ dɛw dɛ! Sɛ ewia no rupue ma biribiara ayɛ fɛfɛɛfɛw, na sɛ enye Jehovah rekasa a, ɔyɛ ahomka ara yie. Iyi ka me ma meda no ase wɔ n’akyɛdze ahorow a ɔdze ama hɛn no nyina ho. Dɛm akyɛdze yi mu bi nye ho kwan a yɛwɔ dɛ yɛbɔ mpaa. Afei, sɛ adze sã na mesan bɔ mpaa a, ɔma m’enyi gye na medze tsibowa pa da.”

10. Ebɛnadze ntsi na ɔsɛ dɛ yɛma Nyankopɔn no sunsum krɔnkrɔn no som bo ma hɛn?

¹⁰ Nyankopɔn no sunsum krɔnkrɔn no yɛ akoradze  fofor a yɛmmfa hɛn enyiwa nnhu a ɔsɛ dɛ ɔsom hɛn bo. Jesus hyɛɛ hɛn nkuran dɛ yɛnkɔ do mbɔ mpaa nserɛ sunsum krɔnkrɔn. (Luke 11:9, 13) Jehovah dze no sunsum no boa hɛn ma yenya “tum no ne kɛseyɛ a ɔtra do no.” (2 Cor. 4:7; Andw. 1:8) Nyankopɔn no sunsum no bɔboa hɛn ma yeegyina ɔhaw biara a yehyia ano.

11. Ebɛn kwan do na sunsum krɔnkrɔn tum boa hɛn?

¹¹ Sunsum krɔnkrɔn botum aboa hɛn ma yaayɛ edwuma biara a ɔhyɛ hɛn nsa wɔ Nyankopɔn no som mu no. Afei, Nyankopɔn no sunsum krɔnkrɔn no botum aboa hɛn ma yɛdze hɛn adomakyɛdze edzi dwuma yie, na yeetu mpon wɔ dza yetum yɛ mu. Obotum so aboa hɛn ma yeedzi hɛn Christianfo asodzi biara ho dwuma. Ntsi yetum kã dɛ nkɔenyim nyinara a yeenya wɔ Nyankopɔn no som mu no, ɔnnyɛ hɛnankasa hɛn ahoɔdzen, na mbom Nyankopɔn no sunsum no na ɔboaa hɛn.

12. Dɛ mbrɛ Ndwom 139:23, 24 kyerɛ no, yebotum aserɛ Nyankopɔn no sunsum krɔnkrɔn no ma ɔaaboa hɛn ma yaayɛ ebɛnadze?

¹² Ebɛnadze na yɛyɛ dze kyerɛ dɛ hɛn enyiwa sɔ Nyankopɔn no sunsum krɔnkrɔn no? Kwan kor nye dɛ, yɛbɔbɔ mpaa aserɛ Nyankopɔn dɛ ɔmfa sunsum krɔnkrɔn no mboa hɛn ma yenhu nsusui bɔn anaa akɔndɔ bɔn biara a woesuma wɔ hɛn akoma mu. (Kenkan Ndwom 139:23, 24.) Ntsi sɛ yɛbɔ iyi ho mpaa a, Jehovah so nam no sunsum no do bɔboa hɛn ma yeehu nsusui bɔn anaa akɔndɔ bɔn biara a woesuma wɔ hɛn akoma mu no. Ber a yeehu dɛm nsusui bɔn anaa akɔndɔ bɔn no, ɔsɛ dɛ yɛbɔ mpaa serɛ Nyankopɔn no sunsum krɔnkrɔn no ama yeenya ahoɔdzen dze akõ etsia dɛm nsusui anaa akɔndɔ no. Sɛ yɛyɛ dɛm a, ɔno bɛkyerɛ dɛ yeesi hɛn bo dɛ yɛrennyɛ biribiara a ɔbɛma Jehovah egyaa dɛ ɔdze no sunsum krɔnkrɔn bɔboa hɛn.​—Eph. 4:30.

13. Ebɛnadze na ɔbɔboa hɛn ma yaakyerɛ sunsum krɔnkrɔn no ho enyisɔ kɛse?

¹³ Sɛ yɛdwendwen dza Jehovah nam no sunsum krɔnkrɔn no do ayɛ wɔ hɛn aber yi do ho a, ɔbɛma yɛakyerɛ sunsum krɔnkrɔn no ho enyisɔ kɛse. Ansaana Jesus rokɔ sor no, ɔkãa kyerɛɛ n’esuafo no dɛ: “Sunsum krɔnkrɔn no nya ba hom do a, hom benya ahoɔdzen; na hom bɛyɛ  m’adasefo . . . dze ekodu asaase ano noho.” (Andw. 1:8) Dɛm asɛm yi rinya mbamu a ɔyɛ nwanwa wɔ hɛn aber yi do. Nyimpa bɔbor ɔpepem awɔtwe nye mpem ahaenum na sunsum krɔnkrɔn aboa ma wɔaboaboa hɔn ano efi wiadze n’afã ahorow nyinara ma wɔrosom Jehovah. Bio so, dɛ Nyankopɔn n’asomfo no yɛwɔ enuayɛkuw bi a koryɛ na asomdwee wɔ mu, osiandɛ Nyankopɔn no sunsum no boa hɛn ma yenya suban pa ahorow bi tse dɛ ɔdɔ, dɛw, asomdwee, penkyɛr, ayamuyie, papayɛ, gyedzi, ɔdwe nye ahohyɛdo. Dɛm su ahorow yi na wɔbɔ mu yɛ “sunsum no aba” no. (Gal. 5:22, 23) Sunsum krɔnkrɔn yɛ akyɛdze a ɔsom bo ampa!

14. Sɛ yɛreyɛ asɛnka edwuma no a ebɛn mboa na yenya a yɛmmfa hɛn enyi nnhu?

¹⁴ Akyɛdze fofor a ɔsom bo a yɛwɔ nye dɛ yɛnye Jehovah, Jesus nye abɔfo “bɔ mu yɛ edwuma.” (2 Cor. 6:1) Yɛnye hɔn bɔ mu yɛ edwuma aber a yɛdze hɛnho ahyɛ esuafoyɛ edwuma no mu no. Paul rekã ɔno na hɔn a wɔdze hɔnho hyɛ asɛnka edwuma mu no hɔnho asɛm no, ɔkãa dɛ, “Yɛyɛ Nyankopɔn edwumaboafo.” (1 Cor. 3:9) Sɛ yɛdze hɛnho hyɛ asɛnka edwuma no mu a, ɔkyerɛ dɛ yɛyɛ Jesus n’edwumaboafo. Kaa dɛ aber a Jesus kãa kyerɛɛ n’ekyirdzifo dɛ, “Hom nkɔ nkɛyɛ amanaman nyina m’esuafo” no, ɔdze kaa ho dɛ “menye hom wɔ hɔ.” (Matt. 28:19, 20) Na abɔfo no so ɛ? Hwɛ nhyira ara a ɔyɛ dɛ abɔfo no kyerɛ hɛn kwan aber a yɛrekã “onnyiewiei asɛmpa . . . akyerɛ hɔn a wɔtsetse asaase do” no!​—Nyi. 14:6.

15. Ma Bible mu nhwɛdo bi a ɔma yehu dwuma tsitsir a Jehovah dzi wɔ hɛn asɛnka edwuma no mu.

¹⁵ Dɛm mboa a yenya fi sor yi, ebɛnadze na ɔboa hɛn ma yetum yɛ? Ahendzi no ho asɛmpa a yɛkã no tse dɛ yerudua aba; aba no bi kogu akoma pa mu na onyin. (Matt. 13:18, 23) Woana na ɔma nokwar aba no nyin na ɔsow? Jesus kãa dɛ nyimpa biara runntum mmbedzi n’ekyir gyedɛ “Egya no . . . twe no.” (John 6:44) Bible no ma iyi ho nhwɛdo pɔtsee bi. Kaa dza osii aber a Paul dzii mbaa bi dase wɔ Philippi kurow no n’ekyir beebi no. Nna wɔfrɛ mbaa no mu kor Lydia. Hyɛ dza Bible no kã fa noho no nsew. Ɔkã dɛ: ‘Jehovah buee n’akoma mu dɛ ontsie dza Paul kãe no.’ (Andw. 16:13-15) Nyimpa ɔpepem pii na Jehovah atwe hɔn aba ne nkyɛn dɛ Lydia.

16. Sɛ hɛn asɛnka edwuma no sow aba pii a, woana na ɔsɛ dɛ yɛdze no ho ayɛyi no ma no?

¹⁶ Sɛ hɛn asɛnka edwuma a yɛreyɛ no sow aba pa biara a, woana na ɔsɛ dɛ yɛdze no ho ayɛyi no ma no? Paul buaa dɛm asɛmbisa yi aber a ɔkyerɛɛw dɛm asɛm yi faa Corinth asafo no ho no. Ɔkyerɛɛw dɛ: “Emi na muduae, Apollos na oguguu do nsu na Nyankopɔn na ɔmaa ndɔbaa no. Dɛm ntsi nnyɛ nyia odua na ɔyɛ biribi, eso nnyɛ nyia ogugu do nsu a, na Nyankopɔn a ɔma ndɔbaa no a.” (1 Cor. 3:6, 7) Dɛ mbrɛ Paul yɛe no, sɛ hɛn asɛnka edwuma no sow aba a, ɔsɛ dɛ yɛdze ho enyimnyam no ma Jehovah aber nyina.

17. Ho kwan a yɛwɔ dɛ yɛnye Nyankopɔn, Christ nye abɔfo “bɔ mu yɛ edwuma” no, yebesi dɛn akyerɛ ho enyisɔ?

¹⁷ Ho kwan a yeenya dɛ yɛnye Nyankopɔn, Christ nye abɔfo “bɔ mu yɛ edwuma” no, yebesi dɛn akyerɛ ho enyisɔ? Sɛ yɛdze nsi hwehwɛ ho kwan biara a ɔbɛma yeetum akã asɛmpa no akyerɛ nyimpa afofor a, ɔno bɛkyerɛ dɛ hɛn enyi sɔ dɛm ho kwan yi. Yebotum afa akwan pii do ayɛ dɛm. Akwan no bi nye dɛ yebedzi dase wɔ “guado nye efiefi” mu. (Andw. 20:20) Nyimpa pii so dze ho kwan a wobenya biara dzi dase. Sɛ wohyia hɔho a, wɔnam anyɛnkofa kwan do kyia no na wɔbɔ mbɔdzen dɛ wɔnye no bɔbɔ nkɔmbɔ. Sɛ nyimpa no enyi gye nkɔmbɔ no ho a, wɔnam enyifir kwan do dan nkɔmbɔ no kɔ Ahendzi asɛm no do.

18-19. (a) Yebesi dɛn egugu nokwar aba no do nsu? (b) Ma nhwɛdo a ɔkyerɛ mbrɛ Jehovah sii boaa Bible suanyi bi.

 ¹⁸ Yɛyɛ “Nyankopɔn edwumaboafo,” ntsi ɔnnsɛ dɛ yedua nokwar aba no nko na mbom ɔsɛ dɛ yegugu do nsu so. Sɛ nyimpa bi kyerɛ asɛm no ho enyigye a yɛyɛ dza yebotum biara dɛ yɛbɛsan akɔ ne nkyɛn anaa yɛyɛ nhyehyɛɛ mbrɛ ɔbɛyɛ a obi bɔkɔ akɛsera no na ɔnye no eesũa Bible no. Sɛ yehu dɛ Jehovah roboa Bible suanyi no ma ɔreyɛ nsesa wɔ no nsusui nye ne ndzeyɛɛ mu a, ɔma hɛn enyi gye.

¹⁹ Ma yɛmfa Raphalalani dɛ nhwɛdo. Nna ɔyɛ onunsinnyi wɔ South Africa. N’enyi bɛgyee dza osũae fii Bible mu no ho. Naaso dza Nyankopɔn n’Asɛm no kã fa nananom a woewuwu a wɔnye hɔn dzi nkitaho ho no, nna ɔyɛ dzen ma no dɛ ɔbɛgye ato mu. (Deut. 18:10-12) Ber kɔr do no, ɔpeen do dɛ ɔbɛma no nsusui nye Nyankopɔn n’Asɛm ehyia. Nna edwuma a ɔyɛ dze hwɛ noho ara nye onunsinnyi edwuma no, naaso, ekyir yi ogyaa edwuma no yɛ osian esumansɛm a ɔbata ho no ntsi. Raphalalani a oedzi mfe 60 kãa dɛ: “Meda Jehovah Adasefo ase papaapa dɛ wɔaboa me wɔ akwan pii do. Mboa no bi nye dɛ wɔama menya edwuma a meyɛ. Ndaase kɛse kɔ ma Jehovah dɛ ɔaboa me ma mayɛ nsesa wɔ m’asetsena mu. Iyi ntsi mutum dze moho hyɛ asɛnka edwuma no mu dɛ Ɔdasefo a ɔabɔ esu.”

20. Ebɛnadze na esi wo bo dɛ ebɛyɛ?

²⁰ Adzesua yi mu no, akyɛdze a ɔsom bo a yɛmmfa hɛn enyiwa nnhu no, yeesusu no mu anan ho. Dza ɔyɛ kɛse wɔ akyɛdze ahorow yi mu nye ho kwan a yɛwɔ dɛ yɛnye Jehovah wɔ anyɛnkofa a no mu yɛ dzen. Siantsir no nye dɛ, sɛ yɛnye Jehovah nya anyɛnkofa a no mu yɛ dzen a, yebotum enya akyɛdze ahorow a aka a yɛmmfa hɛn enyi nnhu no do mfaso. Dɛm akyɛdze ahorow no nye ho kwan a yɛdze kɔ n’enyim wɔ mpaabɔ mu, mboa a sunsum krɔnkrɔn no dze boa hɛn, nye mboa a yenya fi Jehovah, Jesus nye abɔfo no hɔ wɔ hɛn som edwuma no mu. Hom mma yensi hɛn bo dɛ yɛbɛma enyisɔ a yɛwɔ ma akoradze a yɛmmfa hɛn enyi nnhu no ayɛ kɛse. Afei, ɔmbra dɛ yɛbɔkɔ do ada Jehovah ase aber nyina dɛ ɔyɛ hɛn Nyɛnko a ɔda nsew.