1. Mɛni Yesu wie yɛ jwetrii ni wɔkɛtoɔ wɔhãa wɔhe yɛ ŋwɛi lɛ ahe?

NIBII ni jara wa hã wɔ lɛ ekomɛi yɛ ni wɔnaaa kɛ wɔhiŋmɛi. Anɔkwa, nibii ni jara wa hã wɔ fe fɛɛ yɛ shihilɛ mli lɛ jeee nibii ni wɔnaa. Yɛ Yesu Gɔŋ Nɔ Shiɛmɔ lɛ mli lɛ, ewie akɛ jwetrii ni wɔkɛtoɔ wɔhãa wɔhe yɛ ŋwɛi lɛ ajara wa kwraa fe jwetrii ni wɔyɔɔ yɛ shikpɔŋ lɛ nɔ. Kɛkɛ ni ekɛshi sɛɛ akɛ: “He ni ojwetri yɔɔ lɛ, jɛmɛ otsui hu baahi.” (Mat. 6:19-21) Kɛ́ nɔ ko kã wɔtsui nɔ waa ni wɔbuɔ lɛ akɛ ejara wa lɛ, wɔkɛ hiɛdɔɔ baatao sɛɛ gbɛ. Kɛ́ wɔfee nibii ni baahã wɔná gbɛ́i kpakpa yɛ Nyɔŋmɔ hiɛ lɛ, belɛ wɔmiibua ‘jwetrii anaa yɛ ŋwɛi.’ Yesu kɛɛ kɛ́ wɔbua jwetrii anaa yɛ jɛmɛ lɛ, julɔi nyɛŋ abaju ni efiteŋ hu kɔkɔɔkɔ.

2. (a) Tamɔ bɔ ni wɔnaa yɛ 2 Korintobii 4:17, 18 lɛ, mɛni Paulo wo wɔ hewalɛ ni wɔkɛ wɔhiŋmɛi ama nɔ? (b) Mɛni he wɔbaasusu yɛ nikasemɔ nɛɛ mli?

² Bɔfo Paulo wo Kristofoi ŋaa akɛ ‘amɛkɛ amɛhiŋmɛii ama nibii ni anaaa lɛ anɔ.’ (Kanemɔ 2 Korintobii 4:17, 18.) Nibii ni anaaa nɛɛ ekomɛi ji jɔɔmɔi ni wɔbaaná yɛ Nyɔŋmɔ jeŋ hee lɛ mli. Shi yɛ nikasemɔ nɛɛ mli lɛ, wɔbaasusu nibii ni anaaa nɛɛ ateŋ ejwɛ komɛi ni wɔnáa he sɛɛ amrɔ nɛɛ lɛ ahe. Nomɛi ji, wɔ kɛ Nyɔŋmɔ teŋ naanyobɔɔ lɛ, sɔlemɔ, mumɔ krɔŋkrɔŋ lɛ, kɛ bɔ ni Yehowa, Yesu, kɛ ŋwɛibɔfoi lɛ yeɔ amɛbuaa wɔ yɛ shiɛmɔ nitsumɔ lɛ mli lɛ. Agbɛnɛ hu, wɔbaakwɛ nɔ ni wɔbaanyɛ wɔfee kɛtsɔɔ akɛ wɔhiɛ sɔɔ nibii ni jara wa ni anaaa nɛɛ.

3. Mɛni ji jwetrii ni wɔyɔɔ ni wɔnaaa kɛ wɔhiŋmɛi lɛ ateŋ nɔ ni fe fɛɛ? Ni te feɔ tɛŋŋ wɔnine shɛɔ nɔ?

³ Jwetrii ni wɔyɔɔ ni wɔnaaa kɛ wɔhiŋmɛi lɛ ateŋ nɔ ni fe fɛɛ ji, wɔ kɛ Yehowa Nyɔŋmɔ teŋ naanyobɔɔ lɛ. (Lala 25:14) Wɔle akɛ Nyɔŋmɔ yɛ krɔŋkrɔŋ kɛmɔ shi. No hewɔ lɛ, te feɔ tɛŋŋ ni  enyɛɔ ekɛ adesai ni yeee emuu lɛ bɔɔ naanyo? Yesu kpɔmɔ afɔleshaa lɛ hewɔ enyɛɔ efeɔ nakai, ejaakɛ kpɔmɔnɔ lɛ “wóɔ je lɛ he esha lɛ kɛyaa.” (Yoh. 1:29) Dani Yesu baaba shikpɔŋ lɛ nɔ po lɛ, Yehowa le akɛ Yesu baaye lɛ anɔkwa kɛya gbele mli ni ekɛkpɔ̃ adesai. Enɛ hewɔ Nyɔŋmɔ nyɛ ekɛ mɛi ni hi shi dani Kristo ba lɛ po bɔ naanyo lɛ.​—Rom. 3:25.

4. Tsĩi Nyɔŋmɔ nanemɛi komɛi ni hi shi dani Kristo ba lɛ atã.

⁴ Mɛi ni hi shi dani Kristo ba lɛ ateŋ mɔ kome ni batsɔ Nyɔŋmɔ naanyo ji Abraham. No mli lɛ, Abraham yɛ hemɔkɛyeli waa diɛŋtsɛ. Egbele sɛɛ nɔ ni fa fe afii 1,000 lɛ, Yehowa tsɛ lɛ akɛ “minaanyo.” (Yes. 41:8) Ni tsɔɔ akɛ, gbele po nyɛŋ atse Yehowa kɛ enanemɛi ni esumɔɔ amɛsane waa lɛ ateŋ. Yɛ Yehowa hiɛ lɛ, Abraham hiɛ kã lolo. (Luka 20:37, 38) Mɔ kroko ni kɛ Nyɔŋmɔ bɔ naanyo ji Hiob. Be ko lɛ, Yehowa wie Hiob he ekpakpa yɛ ŋwɛibɔfoi lɛ fɛɛ ahiɛ. Ewie yɛ ehe akɛ “eji nuu ni ja ni yeɔ anɔkwa; esheɔ Nyɔŋmɔ gbeyei, ni etsiɔ ehe kɛjeɔ nɔ fɔŋ he.” (Hiob 1:6-8) Daniel hu kɛ aaafee afii 80 hi maŋ ko ni emli bii lɛ jáaa Yehowa lɛ mli, ni kɛ̃lɛ, eye Yehowa anɔkwa. Te Yehowa nu he ehã tɛŋŋ yɛ ehe? Ŋwɛibɔfoi kɛɛ nuumo Daniel shii etɛ sɔŋŋ akɛ, Nyɔŋmɔ ‘shwɛɛɛ ehe kwraa.’ (Dan. 9:23; 10:11, 19) Wɔbaanyɛ wɔwie kɛ nɔmimaa akɛ, Yehowa miishwe waa ni etee enanemɛi ni esumɔɔ amɛ waa ni egboi lɛ ashi.​—Hiob 14:15.

5. Kɛ́ wɔmiitao wɔkɛ Yehowa abɔ naanyo lɛ, mɛni esa akɛ wɔfee?

⁵ Ani ole mɛi ni yɔɔ ŋmɛnɛ ni kɛ Yehowa ebɔ naanyo waa yɛ emuu ni amɛyeee lɛ fɛɛ sɛɛ lɛ ayifalɛ? Amɛyi akpekpei abɔ. Nɔ hewɔ ni wɔkɛɔ nakai ji akɛ, ŋmɛnɛ lɛ, hii, yei, kɛ gbekɛbii babaoo yɛ je lɛŋ hei srɔtoi ni miiba amɛjeŋ jogbaŋŋ. Enɛ hãa wɔnaa akɛ Nyɔŋmɔ nanemɛi ji amɛ, ejaakɛ Yehowa lɛ, ‘mɛi ni ja ekɛbɔɔ naanyo.’ (Abɛi 3:32) Mɛi akpekpei abɔ nɛɛ fɛɛ heɔ amɛyeɔ akɛ, Yesu kɛ ewala bashã afɔle akɛ kpɔmɔnɔ ehã amɛ, ni enɛ hewɔ amɛnyɛɔ amɛkɛ Nyɔŋmɔ bɔɔ naanyo lɛ. Kpɔmɔnɔ lɛ hewɔ lɛ, wɔbaanyɛ wɔjɔɔ wɔwala nɔ wɔhã Yehowa ni wɔhã abaptisi wɔ koni wɔbatsɔmɔ enanemɛi. Ni kɛ́ wɔfee nibii enyɔ ni he hiaa nɛɛ, ni ji, wɔjɔɔ wɔhe nɔ ni wɔhã abaptisi wɔ lɛ, wɔbaabafata Kristofoi akpekpei abɔ ni amɛ hu amɛjɔɔ amɛhe nɔ ni abaptisi amɛ lɛ ahe, ni wɔ fɛɛ wɔbaahi shi akɛ mɔ ni nɔ kwɔ fe fɛɛ yɛ ŋwɛi kɛ shikpɔŋ lɛ nɔ lɛ nanemɛi!

6. Mɛni kɛ́ wɔfee lɛ, no baatsɔɔ akɛ eŋɔɔ wɔnaa waa akɛ wɔkɛ Yehowa ebɔ naanyo?

⁶ Mɛni kɛ́ wɔfee lɛ, no baatsɔɔ akɛ eŋɔɔ wɔnaa waa akɛ wɔkɛ Yehowa ebɔ naanyo? Abraham kɛ Hiob ye Nyɔŋmɔ anɔkwa nɔ ni fa fe afii oha. Esa akɛ wɔ hu wɔtswa wɔfai shi akɛ, wɔbaaya nɔ wɔye Yehowa anɔkwa ekɔɔɔ he eko afii abɔ ni wɔkɛsɔmɔ lɛ yɛ jeŋ fɔŋ nɛɛ mli. Daniel hã naanyobɔɔ ni yɔɔ ekɛ Nyɔŋmɔ teŋ lɛ he hia lɛ fe ewala tete, ni esa akɛ wɔkase lɛ. (Dan. 6:7, 10, 16, 22) Yehowa baaye ebua wɔ ni wɔfi shi yɛ naagbai fɛɛ ni wɔkɛbaakpe lɛ amli koni naanyobɔɔ ni yɔɔ wɔ kɛ lɛ teŋ lɛ akafite.​—Fip. 4:13.

7. (a) Yɛ nɔ ni awie yɛ Abɛi 15:8 lɛ naa lɛ, te Yehowa nuɔ he ehãa tɛŋŋ kɛ́ wɔsɔle? (b) Mɛni wɔle yɛ bɔ ni Yehowa hãa wɔsɔlemɔi hetoo ehãa lɛ he?

⁷ Jwetri kroko ni wɔyɔɔ shi wɔnaaa kɛ wɔhiŋmɛi ji sɔlemɔ. Kɛ́ oyɛ naanyo ko ni osumɔɔ esane waa lɛ, obaagba lɛ otsuiŋ saji kɛ osusumɔi, ni lɛ hu ebaagba bo enɔ. Ani nakai eji yɛ wɔ kɛ Yehowa hu teŋ? Hɛɛ! Yehowa kɛ wɔ wieɔ kɛtsɔ e-Wiemɔ lɛ, ni ji Biblia lɛ nɔ. Biblia lɛ hãa wɔleɔ Yehowa susumɔi kɛ bɔ ni enuɔ he ehãa yɛ saji ahe. Wɔ hu wɔkɛ lɛ gbaa sane kɛtsɔ sɔlemɔ nɔ. Wɔbaanyɛ wɔgba lɛ wɔtsuiŋ saji kɛ wɔsusumɔi fɛɛ. Kɛ́ ebo wɔsɔlemɔi toi lɛ, enáa miishɛɛ. (Kanemɔ Abɛi 15:8.) Jeee akɛ Yehowa boɔ wɔsɔlemɔi lɛ toi kɛkɛ, shi ehãa hetoo hu,  ejaakɛ esumɔɔ wɔsane. Bei komɛi lɛ, hetoo lɛ baa oya. Shi bei komɛi hu lɛ, wɔbaasɔle yɛ sane kome too lɛ he shii abɔ. Kɛ́ eba lɛ nakai po lɛ, esa akɛ wɔhe wɔye akɛ Yehowa baahã wɔsɔlemɔ lɛ hetoo yɛ be ni sa mli, ni hetoo lɛ baafee nɔ ni hi fe fɛɛ. Kɛ̃lɛ, jeee be fɛɛ be Nyɔŋmɔ hãa wɔsɔlemɔi hetoo yɛ gbɛ ni wɔkpaa gbɛ lɛ nɔ. Akɛ nɔkwɛmɔnɔ lɛ, yɛ nɔ najiaŋ ni ebaajie naagba ko ni wɔkɛkpeɔ lɛ kɛje jɛmɛ lɛ, ekolɛ ebaadro wɔ hiɛshikamɔ kɛ hewalɛ moŋ koni ‘wɔnyɛ naa wɔdamɔ.’​—1 Kor. 10:13.

8. Mɛni wɔbaanyɛ wɔfee kɛtsɔɔ akɛ wɔhiɛ sɔɔ hegbɛ ni Yehowa ehã wɔ akɛ wɔsɔle lɛ?

⁸ Hegbɛ ni Yehowa ehã wɔ akɛ wɔsɔle lɛ ji hegbɛ ni nɔ bɛ. Mɛni wɔbaanyɛ wɔfee kɛtsɔɔ akɛ wɔhiɛ sɔɔ? Nɔ kome ni wɔbaanyɛ wɔfee ji, ni wɔbaabo ŋaa ni ewo wɔ akɛ, ‘wɔsɔle daa ni wɔkakpa’ lɛ toi. (1 Tes. 5:17) Yehowa enyɛɛɛ wɔnɔ akɛ wɔsɔle. Moŋ lɛ, eesumɔ ni wɔ diɛŋtsɛ wɔjɛ wɔtsuiŋ wɔfee nakai. Ekɛɛ ‘wɔhiɛ sɔlemɔ mli daa.’ (Rom. 12:12) Kɛ́ wɔsɔle shii abɔ daa gbi lɛ, no tsɔɔ akɛ wɔhiɛ sɔɔ hegbɛ ni nɔ bɛ nɛɛ. Agbɛnɛ hu, kɛ́ wɔmiisɔle lɛ, esa akɛ wɔda Yehowa shi ni wɔjie eyi.​—Lala 145:2, 3.

9. Mɛni nyɛmi nuu ko wie yɛ sɔlemɔ he? Ni te bo hu onaa sɔlemɔ ohãa tɛŋŋ?

⁹ Kɛ́ wɔkɛ afii pii esɔmɔ Yehowa lɛ, belɛ ekã shi faŋŋ akɛ, wɔna bɔ ni ehã wɔsɔlemɔi hetoo, ni esa akɛ enɛ ahã wɔhiɛ asɔ hegbɛ ni wɔná akɛ wɔbaasɔle lɛ waa. Nyɛmi nuu ko ni atsɛɔ lɛ Chris, ni kɛ afii 47 esɔmɔ akɛ be fɛɛ sɔɔlɔ lɛ wie akɛ: “Kɛ́ mite shi leebi mra ni miisɔle miihã Yehowa lɛ, mináa miishɛɛ waa. Leebi kɛ́ hulu lɛ miite shi lɛ, bɔ́ ni eshwie baji lɛ anɔ lɛ kpɛlɛɔ, ni kɛ́ mikɛ Yehowa gba sane nakai beiaŋ lɛ, mitsui nyɔɔ mimli waa. Nibii ni minaa lɛ taa mitsuiŋ ni midaa Yehowa shi yɛ hegbɛ ni ehã mi akɛ misɔle lɛ kɛ nibii krokomɛi fɛɛ ni ekɛdro mi lɛ ahewɔ. Kɛ́ gbi lɛ ba naagbee lɛ, misɔleɔ, ni no hãa miyawɔɔ kɛ henilee ni he tse.”

10. Mɛni hewɔ esa akɛ eŋɔɔ wɔnaa waa akɛ Yehowa hãa wɔ emumɔ krɔŋkrɔŋ lɛ?

¹⁰ Jwetri kroko ni Nyɔŋmɔ ehã wɔ ni no hu wɔnaaa kɛ wɔhiŋmɛi ji, mumɔ krɔŋkrɔŋ lɛ. Yesu kɛɛ wɔsɔle wɔbi mumɔ krɔŋkrɔŋ lɛ daa. (Luka 11:9, 13) Yehowa tsɔɔ emumɔ krɔŋkrɔŋ  lɛ nɔ ehãa wɔnáa “hewalɛ ni fa kɛteke nɔ.” (2 Kor. 4:7; Bɔf. 1:8) Nyɔŋmɔ mumɔ lɛ baanyɛ aye abua wɔ ni wɔdamɔ kaa fɛɛ kaa ni wɔkɛbaakpe lɛ naa.

11. Mɛɛ gbɛ nɔ mumɔ krɔŋkrɔŋ lɛ baanyɛ aye abua wɔ?

¹¹ Mumɔ krɔŋkrɔŋ lɛ baanyɛ aye abua wɔ ni wɔtsu nitsumɔi ni akɛwo wɔdɛŋ kɛ sɔ̃i ni jwere wɔnɔ yɛ Yehowa asafo lɛ mli lɛ ahe nii. Nyɔŋmɔ mumɔ lɛ baanyɛ ehã wɔhe asa waa kɛ nɔ ko tsumɔ. No hewɔ lɛ, kɛ́ wɔnyɛ wɔtsu nɔ ko he nii jogbaŋŋ yɛ Yehowa sɔɔmɔ lɛ mli lɛ, wɔle yɛ wɔtsuiŋ tɔ̃ɔ akɛ jeee wɔ diɛŋtsɛ wɔhewalɛ naa wɔnyɛ wɔtsu, shi moŋ, Nyɔŋmɔ mumɔ lɛ ni ye ebua wɔ.

12. Yɛ nɔ ni aŋma yɛ Lala 139:23, 24 lɛ naa lɛ, mɛni wɔbaanyɛ wɔkpa Yehowa fai ni ekɛ mumɔ krɔŋkrɔŋ lɛ aye abua wɔ ni wɔfee?

¹² Mɛni wɔbaanyɛ wɔfee kɛtsɔɔ akɛ eŋɔɔ wɔnaa akɛ Yehowa kɛ emumɔ lɛ yeɔ ebuaa wɔ? Nɔ kome ni wɔbaanyɛ wɔfee ji, ni wɔbaasɔle ni Nyɔŋmɔ kɛ emumɔ lɛ aye abua wɔ ni wɔna kɛji susumɔ ko ni wɔhiɛ loo nɔ ko ni wɔshweɔ yɛ wɔtsui mli lɛ ehiii. (Kanemɔ Lala 139:23, 24.) Kɛ́ wɔsɔle nakai lɛ, Yehowa baatsɔ emumɔ lɛ nɔ ehã wɔna susumɔi komɛi ni wɔhiɛ loo nibii komɛi ni miiba wɔtsine shi esaaa ehiɛ lɛ. Ni kɛ́ wɔna akɛ susumɔ ko ni wɔhiɛ loo nɔ ko ni baa wɔtsine lɛ esaaa Nyɔŋmɔ hiɛ lɛ, esa akɛ wɔsɔle wɔbi lɛ ni ekɛ emumɔ lɛ awaje wɔ ni wɔwu wɔshi. Kɛ́ wɔfee nakai lɛ, no baatsɔɔ akɛ wɔtswa wɔfai shi akɛ, wɔfeŋ nɔ ko ni baahã Yehowa ajie emumɔ krɔŋkrɔŋ lɛ kɛje wɔnɔ.​—Efe. 4:30.

13. Mɛni kɛ́ wɔfee lɛ, no baahã wɔhiɛ asɔ Yehowa waa yɛ mumɔ krɔŋkrɔŋ lɛ ni ekɛdroɔ wɔ lɛ hewɔ?

¹³ Kɛ́ wɔjwɛŋ nibii abɔ ni Yehowa kɛ emumɔ lɛ etsu yɛ wɔbei nɛɛ amli lɛ he lɛ, wɔhiɛ baasɔ Yehowa yɛ mumɔ krɔŋkrɔŋ ni ekɛdroɔ wɔ lɛ hewɔ. Dani Yesu baaya ŋwɛi lɛ, ekɛɛ ekaselɔi lɛ akɛ ‘kɛ́ mumɔ krɔŋkrɔŋ lɛ ba amɛnɔ lɛ, amɛbaaná hewalɛ, ni amɛbaatsɔmɔ edasefoi ni amɛshiɛ kɛyashi shikpɔŋ lɛ nɔ hei ni jekɛ waa lɛ.’ (Bɔf. 1:8) Ŋmɛnɛ lɛ, nɔ ni Yesu wie nɛɛ eba mli. Yɛ Yehowa mumɔ krɔŋkrɔŋ lɛ yelikɛbuamɔ naa lɛ, mɛi aaafee 8,600,000 ni jɛ je lɛŋ hei srɔtoisrɔtoi ebatsɔmɔ Yehowa tsuji. Agbɛnɛ hu, Nyɔŋmɔ mumɔ lɛ yeɔ ebuaa wɔ ni  wɔjieɔ sui kpakpai tamɔ suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, kɛ henɔyeli kpo. Sui nɛɛ ji nɔ ni Biblia lɛ tsɛɔ lɛ “yibii ni mumɔ lɛ woɔ lɛ,” ni akɛni wɔjieɔ sui nɛɛ kpo hewɔ lɛ, wɔ kɛ wɔnyɛmimɛi lɛ efee ekome, ni toiŋjɔlɛ yɛ wɔteŋ. (Gal. 5:22, 23) Ekã shi faŋŋ akɛ, mumɔ krɔŋkrɔŋ ji nikeenii ni nɔ bɛ!

14. Namɛi yeɔ amɛbuaa wɔ yɛ shiɛmɔ nitsumɔ lɛ mli shi wɔnaaa amɛ kɛ wɔhiŋmɛi?

¹⁴ Wɔkɛ Yehowa kɛ egbɛjianɔtoo lɛ fã ni yɔɔ ŋwɛi lɛ “efee ekome kɛmiitsu nii,” ni enɛ ji jwetri kroko ni Nyɔŋmɔ ehã wɔ ni wɔnaaa kɛ wɔhiŋmɛi. (2 Kor. 6:1) Te wɔfeɔ tɛŋŋ wɔkɛ amɛ tsuɔ nii lɛ? Wɔfeɔ nakai kɛ́ wɔtee shiɛmɔ. Paulo wie yɛ lɛ kɛ mɛi krokomɛi ni tsuɔ shiɛmɔ nitsumɔ lɛ ahe akɛ: “Nyɔŋmɔ nanemɛi nitsulɔi ji wɔ.” (1 Kor. 3:9) Kɛ́ wɔtee shiɛmɔ lɛ, wɔbatsɔmɔɔ Yesu nanemɛi nitsulɔi hu. Kɛ́ obaakai lɛ, be ni efã esɛɛnyiɛlɔi lɛ akɛ amɛyafee mɛi ni jɛ jeŋmaji lɛ fɛɛ amli lɛ kaselɔi lɛ, ewie kɛfata he akɛ: “Mikɛ nyɛ yɛ.” (Mat. 28:19, 20) Ni ŋwɛibɔfoi lɛ hu? Ŋwɛibɔfoi lɛ tsɔɔ wɔ gbɛ be ni wɔshiɛɔ “naanɔ sane kpakpa” lɛ wɔtsɔɔ “mɛi ni yɔɔ shikpɔŋ lɛ nɔ lɛ.” (Kpo. 14:6) Ani enɛ jeee hegbɛ kpele?

15. Gbaa Biblia mli nɔkwɛmɔnɔ ko ni hãa wɔnaa nitsumɔ ni he hiaa ni Yehowa tsuɔ ehãa wɔ yɛ shiɛmɔ nitsumɔ lɛ mli.

¹⁵ Bei komɛi lɛ, wɔnáa mɛi ni yɔɔ tsui kpakpa, ni wɔshiɛɔ Maŋtsɛyeli lɛ he sane lɛ ni tamɔ dumɔwui lɛ wɔtsɔɔ amɛ. (Mat. 13:18, 23) Namɔ hãa dumɔwui nɛɛ kwɛ̃ɔ ni ewoɔ yibii yɛ mɛi nɛɛ atsui mli? Nɔ ko ni Yesu wie lɛ hãa wɔnaa mɔ ni ji. Ewie akɛ: “Mɔ ko mɔ ko nyɛŋ aba miŋɔɔ, akɛ ja Tsɛ lɛ . . . gbala lɛ dã.” (Yoh. 6:44) Wɔnaa enɛ he nɔkwɛmɔnɔ yɛ Biblia lɛ mli. Be ko lɛ, Paulo yashiɛ etsɔɔ yei komɛi ni ebua amɛhe naa yɛ Filipi maŋ lɛ agbó lɛ naa. Biblia lɛ wie yɛ amɛteŋ mɔ kome ni atsɛɔ lɛ Lidia lɛ he akɛ: “Yehowa gbele etsui naa koni ebo nibii ni Paulo wieɔ lɛ toi jogbaŋŋ.” (Bɔf. 16:13-15) Ŋmɛnɛ lɛ, Yehowa egbele mɛi akpekpei abɔ atsui naa, tamɔ bɔ ni egbele Lidia tsui naa lɛ.

16. Kɛ́ wɔshiɛmɔ nitsumɔ lɛ wo yibii kpakpai lɛ, namɔ esa akɛ wɔkɛ yijiemɔ lɛ ahã?

¹⁶ Kɛ́ wɔshiɛmɔ nitsumɔ lɛ wo yibii kpakpai lɛ, namɔ esa akɛ wɔkɛ yijiemɔ lɛ ahã? Wɔnaa sanebimɔ nɛɛ hetoo yɛ sane ko ni Paulo ŋma eyahã nyɛmimɛi ni yɔɔ Korinto asafo lɛ mli lɛ mli. Ekɛɛ amɛ akɛ: “Mi lɛ, midu, Apolo shwie nɔ nu, shi Nyɔŋmɔ ji mɔ ni hãa eyaa nɔ edaa, no hewɔ lɛ, jeee mɔ ni du lɛ ni fee nɔ ko, ni jeee mɔ ni shwie nɔ nu lɛ hu, shi moŋ mɔ ni hãa edaa, ni ji Nyɔŋmɔ lɛ.” (1 Kor. 3:6, 7) Esa akɛ wɔkase Paulo ni wɔ hu wɔkɛ nibii kpakpai ni wɔnyɛɔ wɔtsuɔ yɛ shiɛmɔ nitsumɔ lɛ mli lɛ he yijiemɔ lɛ fɛɛ ahã Yehowa.

17. Mɛni wɔbaanyɛ wɔfee kɛtsɔɔ akɛ eŋɔɔ wɔnaa waa akɛ wɔkɛ Nyɔŋmɔ, Kristo, kɛ ŋwɛibɔfoi lɛ “efee ekome kɛmiitsu nii”?

¹⁷ Mɛni wɔbaanyɛ wɔfee kɛtsɔɔ akɛ eŋɔɔ wɔnaa waa akɛ wɔkɛ Nyɔŋmɔ, Kristo, kɛ ŋwɛibɔfoi lɛ “efee ekome kɛmiitsu nii”? Nɔ kome ni wɔbaanyɛ wɔfee ji, ni wɔbaatsɔ gbɛ fɛɛ gbɛ ni wɔbaanyɛ lɛ nɔ wɔshiɛ sane kpakpa lɛ wɔtsɔɔ mɛi. Gbɛi pii yɛ ni wɔbaanyɛ wɔtsɔ nɔ wɔshiɛ wɔhã mɛi. Ekomɛi ji, maŋ odaseyeli kɛ shĩa fɛɛ shĩa shiɛmɔ nitsumɔ lɛ. (Bɔf. 20:20) Mɛi pii hu yeɔ mɛi odase be ni amɛnyiɛɛɛ shiɛmɔ nɔ. Kɛ́ amɛkɛ mɔ ko kpe lɛ, amɛfeɔ amɛhiɛ ŋmɔlɔŋmɔlɔ, amɛŋaa lɛ, ni amɛbɔɔ mɔdɛŋ akɛ amɛkɛ lɛ baagba sane. Kɛ́ mɔ lɛ nya sanegbaa lɛ he lɛ, amɛkɛ hiɛshikamɔ tsuɔ nii ni amɛwieɔ Maŋtsɛyeli lɛ he.

18-19. (a) Mɛɛ gbɛ nɔ wɔshwieɔ anɔkwale lɛ ni wɔdu yɛ mɛi atsui mli lɛ nɔ nu? (b) Gbaa niiashikpamɔ ko ni tsɔɔ bɔ ni Yehowa ye ebua Biblia mli nikaselɔ ko.

¹⁸ Kɛ́ wɔshiɛ wɔhã mɔ ko, loo wɔdu anɔkwale  lɛ yɛ mɔ lɛ tsui mli lɛ, esa akɛ wɔshwie nɔ nu. Yɛ mɛɛ gbɛ nɔ? Kɛ́ mɔ lɛ ná wiemɔ lɛ he miishɛɛ lɛ, esa akɛ wɔbɔ mɔdɛŋ ni wɔya eŋɔɔ ekoŋŋ loo wɔto gbɛjianɔ ni mɔ ko aya eŋɔɔ koni anyɛ akɛ lɛ aje Biblia mli nikasemɔ shishi. Kɛ́ wɔkɛ mɔ lɛ bɔi nikasemɔ ni wɔna bɔ ni Yehowa miiye eebua lɛ koni etsake esusumɔi kɛ ejeŋba lɛ, wɔnáa miishɛɛ.

¹⁹ Susumɔ nuu ko ni yɔɔ South Africa, ni atsɛɔ lɛ Raphalalani lɛ niiashikpamɔ lɛ he okwɛ. Be ni akɛ lɛ bɔi Biblia lɛ kasemɔ lɛ, enya nibii ni ekaseɔ lɛ ahe waa. Shi ekɛ naagba wulu ko kpe. No mli lɛ, tsofatsɛ ji lɛ, ni no nɔŋŋ ji nitsumɔ ni etsuɔ kɛkwɛɔ ehe. Shi ebana yɛ Nyɔŋmɔ Wiemɔ lɛ mli akɛ, esaaa akɛ ebiɔ mɛi ni egboi lɛ nii. (5 Mo. 18:10-12) Nyɔŋmɔ yelikɛbuamɔ naa lɛ, fiofio lɛ, Raphalalani banu nibii ashishi ni etsuuu nii akɛ tsofatsɛ dɔŋŋ. Amrɔ nɛɛ, eye afii 60, ni ewie akɛ: “Yehowa Odasefoi ye amɛbua mi yɛ gbɛi srɔtoi anɔ, ni midaa amɛ shi waa. Akɛ nɔkwɛmɔnɔ lɛ, amɛye amɛbua mi ni miná nitsumɔ. Nɔ ni fe fɛɛ lɛ, midaa Yehowa shi akɛ eye ebua mi ni mitsake kwraa. Ŋmɛnɛ lɛ, abaptisi mi, ni mibafata e-Dasefoi lɛ ahe kɛmiishiɛ.”

20. Mɛni otswa ofai shi akɛ obaafee?

²⁰ Yɛ nikasemɔ nɛɛ mli lɛ, wɔgba jwetrii ejwɛ ni wɔnaaa kɛ wɔhiŋmɛi lɛ ahe sane. Jwetrii nɛɛ ateŋ nɔ ni fe fɛɛ ji hegbɛ ni wɔná akɛ wɔkɛ Yehowa baabɔ naanyo waa lɛ. Naanyobɔɔ nɛɛ ni hãa wɔnáa jwetrii krokomɛi ni wɔwie he lɛ ahe sɛɛ. Jwetrii krokomɛi nɛɛ ji, hegbɛ ni wɔná akɛ wɔbaasɔle lɛ, bɔ ni Nyɔŋmɔ kɛ mumɔ krɔŋkrɔŋ lɛ yeɔ ebuaa wɔ lɛ, kɛ hegbɛ ni wɔná akɛ Yehowa, Yesu, kɛ ŋwɛibɔfoi lɛ miiye amɛmiibua wɔ yɛ shiɛmɔ nitsumɔ lɛ mli lɛ. Nyɛhãa wɔtswaa wɔfai shi akɛ, wɔbaafee nibii ni baahã wɔhiɛ asɔ jwetrii ni wɔnaaa nɛɛ waa fe tsutsu lɛ po, ni wɔya nɔ wɔda Yehowa shi daa, ejaakɛ eji Naanyo kpakpa diɛŋtsɛ.