1. Etẹwẹ Jesu dọ gando adọkunnu olọn mẹ tọn lẹ go?

E MA yin nuhọakuẹ lẹpo wẹ sọgan yin mimọ. Na nugbo tọn, adọkunnu he họakuẹ hugan lẹ ma nọ yin mimọ. To Yẹwhehodidọ Osó ji tọn lọ whenu, Jesu donù adọkunnu olọn mẹ tọn he họakuẹ taun hú nutindo agbasa tọn lẹ go. Enẹgodo, e yí nugbo ehe dogọ dọmọ: “Fie adọkunnu towe te, finẹ wẹ ahun towe na te ga.” (Mat. 6:19-21) Ahun mítọn na whàn mí nado doafọna nuhe họakuẹ to nukun mítọn mẹ taun de, kavi adọkunnu de. Mí nọ bẹ ‘adọkunnu lẹ pli do olọn mẹ’ gbọn yinkọ kavi teninọ dagbe de tintindo to Jiwheyẹwhe dè dali. Jesu dọ dọ, adọkunnu mọnkọ lẹ ma na gble kavi yin finfin gbede.

2. (a) Sọgbe hẹ 2 Kọlintinu lẹ 4:17, 18, etẹ ji wẹ Paulu dotuhomẹna mí nado nọ ze nukun do? (b) Etẹ ji wẹ mí na dọhodo to hosọ ehe mẹ?

² Apọsteli Paulu dotuhomẹna mí nado nọ “ze nukun mítọn lẹ . . . do nuhe ma nọ yin mimọ lẹ ji.” (Hia 2 Kọlintinu lẹ 4:17, 18.) Nuhe ma nọ yin mimọ enẹlẹ yin adọkunnu lẹ, ehe bẹ dona he mí na duvivi etọn to aihọn yọyọ Jiwheyẹwhe tọn mẹ lẹ hẹn. To hosọ ehe mẹ, mí na gbadopọnna nuhọakuẹ he ma nọ yin mimọ ẹnẹ delẹ, he mí sọgan duvivi yetọn bẹsọn din, yèdọ haṣinṣan de tintindo hẹ Jiwheyẹwhe, nunina odẹ̀ tọn, alọgọ gbigbọ wiwe Jiwheyẹwhe tọn, gọna godonọnamẹ sọn olọn mẹ wá he mí nọ mọyi to lizọnyizọn mítọn mẹ. Mí nasọ gbadopọnna lehe mí sọgan dohia dọ mí yọ́n pinpẹn adọkunnu he ma nọ yin mimọ enẹlẹ tọn do.

3. Etẹwẹ yin nuhọakuẹ daho hugan he ma nọ yin mimọ lọ, podọ etẹwẹ hẹn ẹn yọnbasi na mí nado tindo e?

³ Họntọnjiji hẹ Jehovah Jiwheyẹwhe wẹ yin nuhọakuẹ daho hugan he ma nọ yin mimọ lọ. (Salm. 25:14) Nawẹ e yọnbasi dọ Jiwheyẹwhe ni jihọntọn hẹ gbẹtọvi ylandonọ lẹ, ṣogan bo gbẹ́ yin wiwe-ṣeke gbọn? Ewọ sọgan wàmọ, na avọ́sinsan ofligọ Jesu tọn “ze ylando aihọn tọn yì” wutu. (Joh. 1:29) Jehovah yọnẹn jẹnukọn dọ lẹndai emitọn nado wleawu Whlẹngántọ de tọn na gbẹtọvi lẹ ma na gblá. Enẹwutu wẹ gbẹtọvi he nọgbẹ̀ jẹnukọnna okú Klisti tọn lẹ sọgan yin họntọn Jiwheyẹwhe tọn lẹ.—Lom. 3:25.

4. Na apajlẹ sunnu he nọgbẹ̀ jẹnukọnna ojlẹ Klistiani tọn bo lẹzun họntọn Jiwheyẹwhe tọn delẹ tọn.

⁴ Lẹnnupọndo sunnu he nọgbẹ̀ jẹnukọnna ojlẹ Klistiani tọn bo lẹzun họntọn Jiwheyẹwhe tọn delẹ ji. Ablaham yin dawe de he do yise ayidego tọn hia. Owhe 1 000 linlán to okú Ablaham tọn godo, Jehovah ylọ ẹ dọ “họntọn ṣie.” (Isa. 41:8) Enẹwutu, etlẹ yin okú ma sọgan klan Jehovah sọn họntọn vivẹ́ etọn lẹ go. Ablaham gbẹ́ to ogbẹ̀ to oflin Jehovah tọn mẹ. (Luku 20:37, 38) Apajlẹ devo wẹ Jobu. Jehovah dọho po nujikudo po gando Jobu go to pipli angẹli lẹ tọn de nukọn to olọn mẹ. Jehovah ylọ ẹ dọ “dawe nugbonọ podọ tenọglinọ de . . ., he nọ dibusi Jiwheyẹwhe bo nọ họ̀nna oylan.” (Jobu 1:6-8) Podọ numọtolanmẹ tẹwẹ Jehovah tindo gando Daniẹli go, yèdọ mẹhe sẹ̀n Jiwheyẹwhe po nugbonọ-yinyin po, to otò kosi tọn de mẹ na nudi owhe 80? Whla atọ̀n wẹ angẹli lẹ na jidide dawe yọnhonọ enẹ dọ ewọ yin “omẹ họakuẹ tlala” de na Jiwheyẹwhe. (Dan. 9:23; 10:11, 19) Mí sọgan deji dọ Jehovah tindo ojlo vẹkuvẹku lọ nado mọ azán he gbè ewọ na fọ́n họntọn vivẹ́ etọn he kú lẹ.—Jobu 14:15.

5. Etẹwẹ mí dona wà nado duvivi họntọnjiji pẹkipẹki de tọn hẹ Jehovah?

⁵ To egbehe, gbẹtọvi mapenọ nẹmu wẹ to vivi haṣinṣan pẹkipẹki de tọn dù hẹ Jehovah? Yé yì livi susu lẹ. Mí yọ́n ehe, na sunnu, yọnnu gọna ovi susu lẹ lẹdo aihọn pé wẹ to didohia gbọn walọyizan yetọn lẹ dali dọ yé jlo na yin họntọn Jiwheyẹwhe tọn. “Nugbonọ lẹ wẹ nọ jihọntọn pẹkipẹki hẹ” Jehovah. (Howh. 3:32) Yise yetọn to avọ́sinsan ofligọ Jesu tọn mẹ wẹ hẹn ẹn yọnbasi na yé nado yin họntọn etọn lẹ. To dodonu enẹ ji, Jehovah gbọn homẹdagbe dali hùn dotẹnmẹ dote na mí nado klan míde do wiwe hlan ewọ bo yí baptẹm. Whenue mí ze afọdide nujọnu tọn enẹlẹ, mí nọ wá hopódona Klistiani livi susu he ko basi klandowiwe bo yí baptẹm, bosọ to vivi ‘họntọnjiji pẹkipẹki’ de tọn dù hẹ Mẹlọ he klohugan to wẹkẹ lọ mẹ lẹ!

6. Nawẹ mí sọgan dohia dọ mí yọ́n pinpẹn họntọnjiji hẹ Jiwheyẹwhe tọn gbọn?

⁶ Nawẹ mí sọgan dohia dọ họntọnjiji mítọn hẹ Jiwheyẹwhe họakuẹ to nukun mítọn mẹ gbọn? Taidi Ablaham po Jobu po he hẹn nugbonọ-yinyin yetọn na Jiwheyẹwhe go na owhe kanweko linlán, mí dona gbọṣi nugbonọ-yinyin mẹ—mahopọnna whenue gbọ́n mí ko to Jehovah sẹ̀n to aihọn ylankan ehe mẹ. Taidi Daniẹli, họntọnjiji mítọn hẹ Jiwheyẹwhe dona họakuẹ to nukun mítọn mẹ hugan ogbẹ̀ mítọn. (Dan. 6:7, 10, 16, 22) Po alọgọ Jehovah tọn po, mí sọgan doakọnna whlepọn depope he mí pehẹ bo gbọnmọ dali hẹn haṣinṣan pẹkipẹki mítọn hẹ ẹ dote.—Flp. 4:13.

7. (a) Sọgbe hẹ Howhinwhẹn lẹ 15:8, numọtolanmẹ tẹwẹ Jehovah nọ tindo gando odẹ̀ mítọn lẹ go? (b) Nawẹ Jehovah nọ na gblọndo na odẹ̀ mítọn lẹ gbọn?

⁷ Nuhọakuẹ he ma nọ yin mimọ devo wẹ odẹ̀. Họntọn vivẹ́ lẹ nọ yiwanna nado nọ dọ linlẹn po numọtolanmẹ yetọn lẹ po na ode awetọ. Be nudopolọ wẹ e yin gando họntọnjiji mítọn hẹ Jehovah go ya? Gbau! Gbọn Ohó etọn gblamẹ, Jehovah nọ dọhona mí bo nọ hẹn linlẹn po numọtolanmẹ etọn lẹ po zun yinyọnẹn na mí. Mí nọ dọho hẹ ẹ gbọn dẹ̀hiho dali, podọ mí sọgan  dọ linlẹn po numọtolanmẹ sisosiso mítọn lẹ po na ẹn. Homẹ nọ hùn Jehovah nado dotoaina odẹ̀ mítọn lẹ. (Hia Howhinwhẹn lẹ 15:8.) Taidi Họntọn owanyinọ de, Jehovah ma nọ dotó odẹ̀ mítọn lẹ poun gba, ṣigba e sọ nọ na gblọndo yetọn. To whedelẹnu, mí nọ yawu mọ gblọndo lọ. To ojlẹ devo lẹ mẹ, e sọgan biọ dọ mí ni hodẹ̀ whlasusu gando whẹho de go. Etomọṣo, mí sọgan deji dọ gblọndo lọ na wá to ojlẹ sisọ̀ mẹ, podọ to aliho dagbe hugan lọ mẹ. Na nugbo tọn, gblọndo Jiwheyẹwhe tọn sọgan gbọnvona nuhe mí donukun. Di apajlẹ, kakati nado de whlepọn de sẹ̀, ewọ sọgan na mí nuyọnẹn gọna huhlọn he mí “nado doakọnna ẹn.”—1 Kọl. 10:13.

8. Nawẹ mí gán dohia dọ mí yọ́n pinpẹn nunina dẹ̀hiho tọn gbọn?

⁸ Nawẹ mí sọgan dohia dọ mí yọ́n pinpẹn nunina họakuẹ he dẹ̀hiho yin tọn gbọn? Aliho dopo wẹ nado hodo ayinamẹ gbọdo lọ nado nọ “hodẹ̀ to whepoponu.” (1 Tẹs. 5:17) Jehovah ma nọ hẹn mí po huhlọn po nado hodẹ̀. Kakatimọ, e nọ jo dotẹnmẹ do na mí nado zan mẹdekannujẹ nudide bibasi tọn mítọn, bosọ dotuhomẹna mí nado nọ “sinyẹnlin to odẹ̀ mẹ.” (Lom. 12:12) Enẹwutu, mí sọgan do pinpẹn-nutọn-yinyọnẹn mítọn hia gbọn dẹ̀hiho whẹwhẹ to azán dopodopo ji dali. Na nugbo tọn, odẹ̀ mítọn lẹ dona nọ gọ́ na hogbe pinpẹn-nutọn-yinyọnẹn po pẹdido po tọn lẹ hlan Jehovah.—Salm. 145:2, 3.

9. Etẹwẹ yin numọtolanmẹ mẹmẹsunnu de tọn gando dẹ̀hiho go, podọ etẹwẹ nọ yin numọtolanmẹ hiẹ lọsu tọn?

⁹ Lehe e na dẹnsọ bọ mí na to Jehovah sẹ̀n bo to mimọ aliho he mẹ e nọ na gblọndo obiọ mítọn lẹ tọn te, mọ wẹ pinpẹn-nutọn-yinyọnẹn mítọn na odẹ̀ na siso dogọ do niyẹn. Lẹnnupọndo apajlẹ Chris tọn ji, yèdọ mẹmẹsunnu de he ko to sinsẹ̀nzọn whenu-gigọ́ tọn mẹ na owhe 47. E dọmọ: “Awuvivinu wẹ e nọ yin nado yí whenu kleun de zan to afọnnu fuu lẹ nado dọhodopọ hẹ Jehovah to odẹ̀ mẹ. Lehe e nọ miọnhomẹnamẹ do sọ nado dọhona Jehovah to ojlẹ mọnkọ mẹ dile whẹkàn sisẹ́ owhè tọn hẹn ahun he ja do ogbè ji lẹ nado to sisẹ́! Ehe nọ whàn mi nado dopẹna ẹn na nuhe e na mi lẹpo, he bẹ nunina dẹ̀hiho tọn hẹn. Enẹgodo, to whenue n’hodẹ̀ to vivọnu azán lọ tọn, awuvivinu wẹ e nọ yin na mi nado yì damlọn po ayihadawhẹnamẹnu wiwe de po.”

10. Naegbọn mí dona yọ́n pinpẹn gbigbọ wiwe Jiwheyẹwhe tọn?

¹⁰ Huhlọn-yido-wazọ́n Jiwheyẹwhe tọn yin nunina devo he ma nọ yin mimọ, ehe mí dona yọ́n pinpẹn etọn. Jesu dotuhomẹna mí nado nọ to gbigbọ wiwe biọ zọnmii to odẹ̀ mẹ. (Luku 11:9, 13) Gbọn gbigbọ wiwe etọn gblamẹ, Jehovah nọ na mí huhlọn—etlẹ yin “huhlọn he hú jọwamọ tọn.” (2 Kọl. 4:7; Owalọ 1:8) Po alọgọ gbigbọ wiwe etọn tọn po, mí sọgan doakọnna whlepọn depope he mí pehẹ.

11. Aliho tẹlẹ mẹ wẹ gbigbọ wiwe sọgan gọalọna mí te?

¹¹ Gbigbọ wiwe sọgan gọalọna mí nado hẹn azọ́ndenamẹ mítọn lẹ di to sinsẹ̀nzọn Jiwheyẹwhe tọn mẹ. Gbigbọ Jiwheyẹwhe tọn nọ hẹn nugopipe po azọ́nyinyọnẹn mítọn lẹ po pọnte dogọ. E nọ gọalọna mí nado penukundo azọngban Klistiani tọn mítọn lẹ go. Nado dọ hójọhó, mí yọnẹn dọ gbigbọ Jiwheyẹwhe tọn wẹ nọ hẹn vivẹnudido mítọn lẹ tindo kọdetọn dagbe, e ma yin huhlọn mítọn titi.

12. Sọgbe hẹ Salmu lẹ 139:23, 24, etẹwẹ mí sọgan hodẹ̀ dọ gbigbọ wiwe ni gọalọna mí nado wà?

¹² Aliho devo nado dohia dọ mí yọ́n pinpẹn gbigbọ wiwe Jiwheyẹwhe tọn wẹ nado nọ hodẹ̀ dọ gbigbọ etọn ni gọalọna mí, nado doayi linlẹn kavi ojlo ylankan depope he to ahun mítọn mẹ lẹ go. (Hia Salmu lẹ 139:23, 24.) Eyin mí basi obiọ mọnkọ, Jehovah sọgan yí gbigbọ etọn zan nado hẹn linlẹn kavi ojlo ylankan lẹ zun yinyọnẹn na mí. Podọ eyin mí wá doayi linlẹn kavi ojlo ylankan de go, mí dona hodẹ̀ dọ gbigbọ wiwe Jiwheyẹwhe tọn ni na mí huhlọn he mí nado nọavùnte sọta ẹ. Gbọnmọ dali, mí na dohia dọ mí magbe nado dapana nudepope he na zọ́n bọ Jehovah ma nasọ yí gbigbọ wiwe etọn do gọalọna mí ba.—Efe. 4:30.

13. Nawẹ mí sọgan hẹn pinpẹn-nutọn-yinyọnẹn mítọn na gbigbọ wiwe jideji gbọn?

¹³ Mí sọgan hẹn pinpẹn-nutọn-yinyọnẹn mítọn na gbigbọ wiwe jideji, eyin mí nọ lẹnnupọndo nuhe gbigbọ enẹ ko wadotana to azán mítọn gbè lẹ ji. Whẹpo Jesu do hẹji yì olọn mẹ, e dọna devi etọn lẹ dọmọ: “Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie . . . kaka yì awà he dẹn hugan aigba tọn lẹ ji.” (Owalọ 1:8) Hogbe enẹlẹ to hẹndi mọ to aliho ayidego tọn  de mẹ. Po alọgọ gbigbọ wiwe tọn po, sinsẹ̀n-basitọ Jehovah tọn nudi livi ṣinatọ̀n daa wẹ ko yin bibẹplidopọ sọn awà aigba tọn lẹpo ji. Humọ, mí to vivi paladisi gbigbọmẹ tọn de tọn dù, na gbigbọ Jiwheyẹwhe tọn nọ gọalọna mí nado wleawuna jẹhẹnu dagbe delẹ taidi, owanyi, ayajẹ, jijọho, homẹfa, homẹdagbe, dagbewà, yise, walọmimiọn po mawazẹjlẹgo po wutu. Jẹhẹnu he “sinsẹ́n gbigbọ tọn” bẹhẹn lẹ niyẹn. (Gal. 5:22, 23) Lehe gbigbọ wiwe yin nunina họakuẹ de do sọ!

14. Godonọnamẹ mayinukundomọ tẹwẹ mí nọ mọyi to whenue mí to mahẹ tindo to lizọnyizọn lọ mẹ?

¹⁴ Mí tindo nuhọakuẹ he ma nọ yin mimọ devo, enẹ wẹ nado “to azọ́nwa dopọ” hẹ Jehovah po adà olọn mẹ tọn titobasinanu etọn tọn po. (2 Kọl. 6:1) Mí nọ wàmọ to whedepopenu he mí doalọ to azọ́n gbẹtọ lẹ hinhẹn zun devi tọn lọ mẹ. Paulu dọ gando ede po mẹhe nọ tindo mahẹ to azọ́n ehe mẹ lẹ po go dọmọ: “Azọ́nwatọ hatọ Jiwheyẹwhe tọn lẹ wẹ mí yin.” (1 Kọl. 3:9) Eyin mí tindo mahẹ to lizọnyizọn Klistiani tọn mẹ, mí sọ yin azọ́nwatọ hatọ Jesu tọn lẹ. Flindọ to whenue Jesu degbena hodotọ etọn lẹ nado “hẹn gbẹtọ lẹ sọn akọta lẹpo mẹ zun devi lẹ” godo, e yidogọ dọmọ: “Yẹn tin po mì po.” (Mat. 28:19, 20) Podọ etẹwẹ dogbọn angẹli lẹ dali? Mí nọ yọ́n pinpẹn etọn taun dọ angẹli lẹ nọ deanana mí dile mí to “wẹndagbe madopodo . . . lá na mẹhe nọ nọ̀ aigba ji lẹ.”—Osọ. 14:6.

15. Na apajlẹ Biblu tọn de he do adà titengbe he Jehovah nọ yiwà to lizọnyizọn mítọn mẹ hia.

¹⁵ Etẹwẹ ko yin wiwadotana po godonọnamẹ Jehovah, Jesu gọna angẹli lẹ tọn po? Dile mí to okún owẹ̀n Ahọluduta lọ tọn do, delẹ nọ flẹ jẹ ahun dagbe lẹ mẹ bo nọ whẹ́n. (Mat. 13:18, 23) Mẹnu wẹ nọ hẹn okún nugbo lọ tọn enẹlẹ nado whẹ́n bo de sinsẹ́n tọ́n? Jesu dọ dọ mẹdepope ma sọgan lẹzun hodotọ emitọn adavo “Otọ́ . . . dọ̀n ẹn.” (Joh. 6:44) Biblu na apajlẹ ehe tọn de. Flin ojlẹ he mẹ Paulu dekunnuna pipli yọnnu lẹ tọn de to gbonu tòdaho Filipi tọn. Doayi nuhe Biblu dọ gando dopo to yọnnu enẹlẹ mẹ he nọ yin Lidia go dọmọ: “Jehovah sọ hùn ahun etọn nado na ayidonugo nuhe dọ Paulu te lẹ.” (Owalọ 16:13-15) Taidi Lidia, Jehovah ko dọ̀n gbẹtọ livi susu devo lẹ.

16. Mẹnu wẹ mí dona nọ na pipà na kọdetọn dagbe depope he mí tindo to lizọnyizọn lọ mẹ?

¹⁶ Na nugbo tọn, mẹnu wẹ mí dona nọ na pipà na kọdetọn dagbe depope he mí tindo to lizọnyizọn lọ mẹ? Paulu na gblọndo kanbiọ enẹ tọn to whenue e wlan hogbe he bọdego lẹ hlan agun Kọlinti tọn dọmọ: “Yẹn do, bọ Apolo húsinna, ṣigba Jiwheyẹwhe wẹ to hinhẹn ẹn whẹ́n, sọmọ bọ mẹhe do ma yin nude, kavi mẹhe húsinna, adavo Jiwheyẹwhe he to hinhẹn ẹn whẹ́n.” (1 Kọl. 3:6, 7) Taidi Paulu, Jehovah wẹ mí dona nọ na pipà to whelẹponu, na kọdetọn dagbe depope he mí tindo to lizọnyizọn lọ mẹ.

17. Nawẹ mí sọgan dohia gbọn dọ mí yọ́n pinpẹn lẹblanulọkẹyi he mí tindo nado “to azọ́nwa dopọ” hẹ Jiwheyẹwhe, Klisti po angẹli lẹ po tọn?

¹⁷ Nawẹ mí sọgan dohia gbọn dọ mí yọ́n pinpẹn lẹblanulọkẹyi he mí tindo nado “to azọ́nwa dopọ” hẹ Jiwheyẹwhe, Klisti po angẹli lẹ po tọn? Mí sọgan wàmọ eyin mí nọ yí zohunhun do dín dotẹnmẹ hundote lẹ nado nọ lá wẹndagbe lọ na mẹdevo lẹ. Aliho susu mẹ wẹ mí sọgan wà ehe te, taidi kunnudide “to gbangba podọ sọn whédegbè jẹ whédegbè.” (Owalọ 20:20) Mẹsusu sọ nọ yiwanna kunnudide mayin aṣa tọn. Eyin yé dukosọna jonọ de, yé nọ dọnudo e to aliho he jọmẹ mẹ bo nọ tẹnpọn nado bẹ hodọdopọ de jẹeji. Eyin e tindo ojlo, yé nọ yí zinzin do ze owẹ̀n Ahọluduta lọ tọn donukọnna ẹn.

18, 19. (a) Nawẹ mí nọ húsinna okún nugbo lọ tọn lẹ gbọn? (b) Na apajlẹ de he do lehe Jehovah gọalọna Biblu plọntọ de do hia.

¹⁸ Taidi “azọ́nwatọ hatọ Jiwheyẹwhe tọn lẹ,” mí ma dona nọ do okún nugbo lọ tọn lẹ poun  gba, ṣigba mí sọ dona nọ húsinna yé. Whenue mẹde do ojlo hia, mí nọ jlo na wà nulẹpo nado doafọna ojlo lọ kavi basi tito na mẹde nido dla mẹlọ pọ́n po yanwle lọ po nado bẹ plọnmẹ Biblu de jẹeji. Dile oplọn lọ to nukọnyi, homẹ mítọn nọ hùn eyin mí mọ lehe Jehovah to nuyiwa do ahun po ayiha devi sọgodo tọn de tọn po ji do.

¹⁹ Lẹnnupọndo apajlẹ Raphalalani, he yin amanuwatọ de to Afrique du Sud tọn ji. E yiwanna nuhe e plọn sọn Biblu mẹ lẹ. Ṣigba, e pannukọn avùnnukundiọsọmẹnu daho de to whenue e hia nuhe Biblu dọ gando hodọdopọ hẹ tọgbó he kú lẹ go. (Deut. 18:10-12) Vudevude, e na dotẹnmẹ Jiwheyẹwhe nado diọ pọndohlan etọn. Podọ to nukọn mẹ, e jo amanuwiwà do, mahopọnna dọ azọ́n dopo enẹ wẹ nọ hẹn akuẹ wá na ẹn. Raphalalani he ko do owhe 60 todin dọmọ: “N’dọnudo Kunnudetọ Jehovah tọn lẹ taun, na yé nọgodona mi to aliho susu mẹ, bo tlẹ gọalọna mi nado mọ agbasazọ́n de. Hú popolẹpo, n’dopẹna Jehovah dọ e gọalọna mi nado basi diọdo lẹ to gbẹzan ṣie mẹ, ehe zọ́n bọ todin n’gán nọ tindo mahẹ to lizọnyizọn lọ mẹ taidi dopo to Kunnudetọ etọn he ko yí baptẹm lẹ mẹ.”

20. Etẹwẹ a magbe nado wà?

²⁰ To hosọ ehe mẹ, mí ko gbadopọnna nuhọakuẹ ẹnẹ delẹ he ma nọ yin mimọ. Dehe họakuẹ hugan to yemẹpo mẹ wẹ lẹblanulọkẹyi he mí tindo dọ Jehovah yin Họntọn vivẹ́ mítọn. Ehe nọ hùn dotẹnmẹ dote na mí nado mọaleyi sọn nuhọakuẹ he ma nọ yin mimọ devo lẹ mẹ, enẹ wẹ nado nọ dọnsẹpọ ẹ to odẹ̀ mẹ, nọ duvivi alọgọ gbigbọ wiwe etọn tọn, podọ nado nọ mọ godonọnamẹ he wá sọn olọn mẹ yí to lizọnyizọn mítọn mẹ. Mì gbọ mí ni magbe nado hẹn pinpẹn-nutọn-yinyọnẹn mítọn na nuhọakuẹ he ma nọ yin mimọ enẹlẹ jideji. Podọ, mì gbọ mí ni zindonukọn nado to pẹdona Jehovah zọnmii, na Họntọn dagbe hugan he ewọ yin na mí wutu.