1. ¿Jondron ütiäte kä kwinbiti yebätä Jesukwe dre niebare?

JONDRON ütiäte tärä keta kabre, akwa meden bäri ütiäte ye ñaka raba tuin nie. Jesús kukwe kädriebare ngudrebiti ngwane, jondron kä kwinbiti ye bäri ütiäte jondron kä nebätä ye kräke niebare kwe. Aune jondron ütiäte tä medente nikwe yekänti ni brukwä tädi arato niebare kwe (Mat. 6:19-21). Jondron meden ütiäte ni kräke ye jiebiti ni brukwä ni töi mikai. Jondron ütiäte ükadrekrö kä kwinbiti ye abokän ja ngwandre kwin Ngöbö okwäkänti aune mikadre täte ne kwe ni kadre ngäbiti kwe. Jesús niebare erere, ni ñokwä aune jondron ñokwä ñaka raba jondron ütiäte ye juen ngwarbe nikän.

2. a) ¿2 Corintios 4:17, 18 yete Pablo tä ni töi mike dre nuainne? b) ¿Drebätä ja tötikai kukwe ja tötikara nekänti?

² “Jändrän kuin Ngöbökwe tuen ñakare” yebätä ja okwä mikadre niebare Pablokwe (ñäkädre 2 Corintios 4:17, 18 yebätä). Jondron ütiäte tuin ñakare nie ye ruäre Ngöbökwe biandi nie kä bä nuäre yete. Akwa kukwe ja tötikara nekänti jondron ketabokä ütiäte tä nikwe nengwane yebätä nibike ja tötike, ye abokän ja keta Jehovabe, orasion, üai deme aune Jehová, Jesús aune angeletre tä ni dimike kukwe driere. Aune nita debe bien jondron ütiäte yebätä ye ni raba bämike ño ye rabai gare nie arato.

3. ¿Jondron meden bäri ütiäte tuin ñakare raba nemen nikwe aune dre köböire raba nemen nikwe?

³ Ja ketadre Jehovabe ye jondron bäri ütiäte tuin ñakare  raba nemen nikwe (Sal. 25:14). ¿Akwa ñokänti Ngöbö deme raba ja kete ni ngite yebe? Jesús ja nire biani ye tä ngite denkä nibätä aune ye köböire ni raba ja kete Ngöböbe (Juan 1:29). Jesús murie ketadre ye känenkri, ja ngwain metre kwe nememe mrä aune ni kä tibienbätä mikai kwäre kwe ye nämänena gare Jehovai. Yebätä Jehovakwe ja ketabare nitre ruäre nünanbare Jesús murie ketadre ye känenkri yebe (Rom. 3:25).

4. ¿Nire nire namani ja ketamuko kwin Jehovakwe Jesús ja nire biandre ye känenkri?

⁴ Ja ketamuko ruäre Ngöbökwe nünanbare Jesús ja nire biani ye känenkri yebätä ani blite mada. Abrahankwe tödekabare krubäte. Niara krütani ye käi nikani 1,000 ta ngwane Jehovakwe kädekani “ja ketamuko kwe” (Is. 41:8). Ne tä mike gare gata ñaka raba ja ketamuko kwin Ngöbökwe ye denkä kän. Ye medenbätä, Jehová kräke Abrahán täbe nire (Luc. 20:37, 38). Job ye namani ja ketamuko kwin Jehovakwe arato. Bati angeletre jökrä nämäne ja ükaninkrö kä kwinbiti ngwane, Jehová nämäne tö ngwen Job ie mikani gare kwe. Kukwe ne niebare kwe: “[Job] ye ni kukwe kwin nuainkä aune ja ngwen metre, Ngöbö mike täte metre bätä ñaka kukwe käme kain ngäbiti” (Job 1:6-8). ¿Aune Jehová Daniel mikani tuin ño jai? Juta ñaka nämäne Ngöbö mike täte ye ngätäite Daniel ja ngwani metre Jehovai kä 80 te. Daniel namanina umbre ngwane “niara ütiäte krubäte Jehová kräke” ye angeletre mikani gare bämä jire ie (Dan. 9:23; 10:11, 19). Gare metre nie Jehová tö ja ketamukotre kwin kwe ye gaikröta (Job 14:15).

5. ¿Dre nuaindre ja ketakäre kwin Jehovabe?

⁵ Ni ngite akwa yebiti ta ni kwati tä ja kete kwin Jehovabe kä nengwane. Nitre brare, merire, monsotre kia kä jökräbiti tibien tä ja ngwen ño yebiti tä bämike tö ja ketabätä Jehovabe. Nitre ja ngwanka metre yebe Jehovata ja kete kwin nieta Bibliakwe (Prov. 3:32). Nitre ja ngwanka metre ye raba ja kete kwin Jehovabe ñobätä ñan aune Jesús ja nire biani yei tätre tödeke. Ye köböire ni raba ja denkä mento, ja ngökö ñöte rabakäre ja ketamuko kwin Jehovakwe. Nikwe kukwe ketebu ütiäte ye nuaindi ngwane, nitre kwati ja dianinanka mento aune ja ngökanina ñöte tä ja kete kwin Jehovabe ye ngätäite ni rabai siba arato.

6. ¿Ja keta Jehovabe ye ütiäte ni kräke ye ni raba bämike ño?

⁶ ¿Ja keta Jehovabe ye ütiäte ni kräke ye ni raba bämike ño? Nikwe ja ngwandre Abrahán aune Job erere. Niaratre ja ngwani metre Jehovai kä 100 biti bäri te. Nita mekerabe o krire kukwebätä, akwa nikwe ja ngwandre metre Jehovai niaratre erere. Arato nikwe ja ngwandre Daniel erere. Niara kräke ja keta Jehovabe ye namani bäri ütiäte ja nire kwe ye kräke (Dan. 6:7, 10, 16-22). Jehová die köböire kukwe meden ben nikwe ja tuai yebätä nikwe kä ngwain nüke jai aune nikwe ja ketai jankunu ben (Filip. 4:13).

7. a) Proverbios 15:8 tä niere erere, ¿nita orare Jehovai ye tä nemen ño kräke? b) ¿Nita kukwe ribere Jehovai orasionte ngwane tä dre nuainne?

⁷ Orasion ye jondron mada ütiäte tuin ñakare nie. Ja ketamukotre kwin töita ño aune ja ruin ño ietre ye töta nemen niei jai kwärikwäri. Nita ja kete Jehovabe ngwane ye erere tä nemen bare. Niarata blite nibe Bibliabiti, tärä yebätä niara tä töbike ño aune ja ruin ño ie ye tä mike gare nie. Aune orasionbiti nita blite ben. Nita orare ie ngwane ni töita ño aune ja ruin ño nie ye ni raba mike gare ie. Nita orare ngwane Jehovata ni  kukwe nuin kä jutobiti (ñäkädre Proverbios 15:8 yebätä). * Ni tare krubäte Jehovakwe, yebätä ñaka tä ni kukwe nuin jerekäbe, ñakare aune nita dre ribere ie ye tä nuainne ni kräke. Kukwe ruäre ye Jehovata nuainne bengwairebe ni kräke. Akwa mada ye nuaindre kwe ni kräke yekäre nikwe oradre jankunu. Nuaindre ño kwe, akwa kä debe näre te ni dimikai kwe aune nuaindi kwin kwe ye tädre gare metre nie. Akwa nikwe ne ngwandre törö jai, Jehová ñaka tä kukwe ja erebe nuainne batire batire ni dimikakäre. Ñodre, kukwe ben nita ja tuin ye ruäre ngwane ñaka tä denkä, ñakare aune tä ni mike töbätä aune tä ja di bien nie ja tuakäre kukwe yebe (1 Cor. 10:13).

8. ¿Orasion ye ütiäte ni kräke ye ni raba bämike ño?

⁸ ¿Orasion ye ütiäte ni kräke ye ni raba bämike ño? Ye bämikakäre kukwe Bibliabätä ne mikadre täte: “Käre munkwe blita Ngöböbe” (1 Tes. 5:17). Jehová tä ni tuenmetre kukwe den akwle jai, yebätä ñaka tä ni mike ja tibiti orare jai, ñakare aune tä kukwe ne niere nie: “Munkwe blitadre janknu Ngöböbe” (Rom. 12:12). Aisete orasion ye ütiäte ni kräke ye bämikakäre nikwe oradre Jehovai bä kabre köbö kwatire kwatire te. Nikwe debe biandre Jehovai aune käikitadrekä orasionte ye ñaka käi kwitadrekä jabiti (Sal. 145:2, 3).

9. a) ¿Orasion ye tuin ño Chris ie? b) ¿Orasion ye mätä mike tuin ño jai?

⁹ Kä niena kwati krubäte nibiti Jehová mike täte aune niarata ni kukwe nuin tuin nie, yekwe ni mikadre orasion ye mike bäri ütiäte jai. Ñodre Chris, ni testiko tä sribire köbö täte kä 47 te Jehová kräke tä niere: “Tita nüke dekä krö orakäre töi jämebiti Jehovai ye kwin ti kräke. Ñänä träta kite mate kena mikä tibobätä ngwane blitadre ben ye kwin krubäte. Tita ye erere nuainne ngwane, ti töita nemen debe bianbätä Jehovai jondron kwin jökräbätä aune orasion ye ütiäte ye ti ñaka tä käi kwitekä jabiti. Aune mrä dere, tita orare ye  bitikäre tita niken kübien töi jämebiti ye kwin ti kräke”.

10. ¿Ñobätä üai deme Ngöbökwe rabadre ütiäte ni kräke?

¹⁰ Jondron mada ütiäte tuin ñakare ye abokän üai deme Ngöbökwe. Nikwe üai deme kärädre jankunu niebare Jesukwe (Luc. 11:9, 13). Jehovata ja di kri bien nie ye abokän üai deme (2 Cor. 4:7; Hech. 1:8). Jehová die ye köböire kukwe ben nikwe ja tuai yebätä nikwe kä ngwain nüke jai.

11. ¿Üai deme raba ni dimike ño?

¹¹ Üai deme tä ni dimike sribi Jehovakwe ye nuainkäre kwin. Arato dre nuain gare nie ye üai deme raba ni dimike nuainne bäri kwin. Sribi Jehovakwe ye tä nemen bare kwin nie üai deme kwe yebiti aune ñaka ja di jeñebiti ye gare metre nie.

12. Salmo 139:23, 24 tä niere erere, ¿ni raba dre kärere Jehovai orasionte?

¹² Kukwe blo tä ni brukwäte abokän ni ñaka gain jabätä ye Jehovakwe ni dimikadre mike gare jai ye nikwe ribedre ie. Ye erere nita nuainne ngwane üai deme ye ütiäte ni kräke nita bämike arato (ñäkädre Salmo 139:23, 24 yebätä). * Kukwe ye erere nita ribere orasionte Jehovai ngwane, kukwe medenbätä nikwe ja töi ükadrete ye Jehová raba mike gare nie üai deme yebiti. Kukwe ye erere rabadre gare nie ngwane, nikwe üai deme kärädre Jehovai ja töi ükatekäre kukwe yebätä. Ye erere nikwe nuaindi ngwane Jehová ni dimikadre jankunu ie ni tö ye nikwe bämikai (Efes. 4:30).

13. ¿Üai deme rabadre bäri ütiäte ni kräke yekäre nikwe dre nuaindre?

¹³ Üai deme köböire dre tä nemen bare kä nengwane yebätä nikwe töbikaitari ngwane rabai bäri ütiäte ni kräke. Jesús rikadreta kä kwinbiti ye känenkri, kukwe ne niebare kwe nitre ja tötikaka kwe yei: “Ngöbö Üai Deme rükadi nüne munbtä, käkwe ja di biandi  munye angwane, mun rabadi dite, kä näin kukwe kuin tibtä ye niere [...] kä jökräbti temen” (Hech. 1:8). Ye erere tä nemen bare kä nengwane. Üai deme ye köböire nitre 8 millón biti bäri kä jökräbiti tibien tä Jehová mike täte. Ne madakäre, juta Jehovakwe yete nita ja kete jäme ja mräkätre jökrä ben ñobätä ñan aune üai deme tä ni töi mike ja tarere, nüne kä jutobiti, nüne jäme, ni mada ngübare bätärekä, ni mada kain ngäbiti kwin, ja töi mike kwin, tödeke, ja töi mike jäme aune ja töi gobraine (Gál. 5:22, 23). Erametre üai deme Ngöbökwe ye ütiäte krubäte.

14. ¿Nire nire ñaka tuin nie tä dimike kukwe driere?

¹⁴ Jondron mada ütiäte tuin ñakare nie ye abokän nita sribire Jehová Jesús aune angeletre yebe (2 Cor. 6:1). Nita kukwe driere batire batire ngwane nita sribire gwairebe bentre ye nita bämike. “Nun abko sribikä jen Ngöbökwe” niebare Pablokwe jabätä aune nitre kukwe driekä mada yebätä (1 Cor. 3:9). Jesukwe nitre ja tötikaka kwe ye juani nitre mada mike ja tötikaka aune ‘ti täi munbe’ niebare kwe ietre ye nikwe ngwandre törö jai, ye medenbätä nita kukwe driere ngwane nita sribire Jesube (Mat. 28:19, 20). ¿Aune angeletre tä ni dimike ño? Nita kukwe kwin driere nitre jökrä ie ngwane angeletre tä ni jie ngwen yebätä nita debe bien krubäte (Apoc. 14:6).

15. ¿Kukwe meden Bibliabätä tä mike gare Jehovata ni dimike kukwe driebätä?

¹⁵ ¿Jehová Jesús aune angeletre tä ni dimike ye köböire dre kwin tä nemen bare? Nita kukwe kwin mike gare ye ruäre tä mate nitre brukwä kwinbätä aune ta nirien (Mat. 13:18, 23). ¿Nire tä kukwe metre ye mike nirien aune kukwe kwin mike nemen bare? Jehová ñaka jatadre ni ngwena ja kokwäre akräke ni ñaka rabadre ja tötikaka jakwe niebare Jesukwe (Juan 6:44). Kukwe ye erere keteiti mikata gare Bibliabätä. Bati, Pablokwe kukwe driebare meritre nämäne juta Filipo bäre ie. Meritre ie kukwe driebare iti kädeka nämäne Lidia yebätä Biblia tä dre niere ye ani mike gare jai. Pablo nämäne blite Jesubätä ngwane Ngöbökwe Lidia töi mikani tödeke Jesubiti (Hech. 16:13-15). Jehovakwe Lidia dimikani ño ye erere nitre kwati dimikanina kwe nemen juta kwe yete.

16. ¿Kukwe kwin tä nemen bare kukwe drieta ngwane nire käikitadrekä?

¹⁶ ¿Kukwe kwin tä nemen bare kukwe driebätä ngwane nire käikitadrekä? Pablo tärä tikani konkrekasion Corinto ie ngwane kukwe ye mikani gare krörö kwe: “Tikwe nökani; Apolokwe ñö kekanibiti, akwa Ngöbökwe mikani nirien. Ne kwrere ni nökaka aune ni ñö kekakabiti nebrä ngwarbe, akwa Ngöbö abrä näin mike nirien” (1 Cor. 3:6, 7, NGT). Pablokwe nuainbare erere, kukwe kwin tä nemen bare ni kräke kukwe driebätä ngwane, käre nikwe Jehová käikitadrekä.

17. ¿Nita sribire Jehovabe, Kristobe aune angeletre ben ye ütiäte ni kräke ye ni raba bämike ño?

¹⁷ ¿Nita sribire Jehovabe, Kristobe aune angeletre ben ye ütiäte ni kräke ye ni raba bämike ño? Ni tädre juto biare kukwe driekäre nitre jökrä ie. Medente erere känti, ñodre, nitre jökrä ngwärekri aune ju ju te (Hech. 20:20). Kukwe driedre ye tuin kwin ja mräkätre kwati ie. Ni ñaka gare ietre ben tätre ja tuin ngwane, tätre köbö kwin niere ie töi jämebiti aune tätre ja di ngwen blita kömike ben. Nitre töta nemen blitai tuin ietre ngwane, tätre kukwe driere ietre.

18, 19. a) ¿Nita kukwe metre mike nemen nitre brukwäte akwa nita dimike ño jankunu? b) ¿Jehovakwe Raphalalani dimikani ño?

¹⁸ Ni sribikä Jehovakwe ñaka rabadre kukwe  kwin ye mike nitre brukwäte jerekäbe, ñakare aune rabadre tötike arato. Nitre töita kukwe mikabätä gare jai tä kwen nie ngwane, ni töta nemen tuinbiti ne kwe kukwe rabadre gare bäri ie. Ni ñaka raba nemen ngwane nita ni mada känene niara tötikakäre. Ni ja tötikaka iti Bibliabätä tä kite nirien kukwe ja üairebiti aune Jehovata dimike ja töi kwite ye tä tuin nie ngwane ye tä kä mike juto nibätä.

¹⁹ Raphalalani ni sukia käi Sudáfrica yebätä dre namani bare ani mike gare jai. Dre drebätä nämäne ja tötike Bibliabätä ye nämäne nemen tuin kwin ie. Akwa blitadre nitre krütanina ben yebätä Biblia tä dre niere ye ñaka namani nuäre kräke ka ngäbitikäre (Deut. 18:10-12). Akwa Jehová tuanimetre kwe ja töi kwite bätärekä bätärekä. Niara nämäne sribire sukiare ngwian ganainkäre jai, akwa ja känenkäre sribi ye tuanimetre kwe. Nengwane kä niena 60 biti aune niara tä niere: “Nitre testiko ti dimikani krubäte, ñodre sribi känene jai, yebätä tita debe bien krubäte ietre. Akwa tita debe bien bäri Jehovai ñobätä ñan aune ti dimikani kwe ja töi kwite aune nengwane tita kukwe driere ni testiko Jehovakwe erere”.

20. ¿Ni töita kwatibe dre nuainbätä?

²⁰ Jondron ütiäte ketabokä tuin ñakare yebätä nikwe ja tötiri kukwe ja tötikara nekänti. Akwa ja ketadre Jehovabe ye bäri ütiäte mada mada ye kräke. Ja ketabätä Jehovabe ye köböire jondron mada ütiäte raba nemen nikwe, ñodre, ni raba orare ie, üai deme kwe ye raba ni dimike aune niara, Jesús aune angeletre raba ni dimike kukwe driere. Ni töita kwatibe jondron ütiäte tuin ñakare nie ye mikabätä ütiäte jai. Aune Jehová ja ketamuko bäri kwin nikwe yebätä nikwe debe biain käre ie.