1. Yexus hais li cas txog qhov uas khaws nyiaj txiag thiab qhov txhia chaw cia rau saum ntuj?

YOG peb pom yam twg muaj nqis rau peb ces peb yeej yuav ua kom tau yam ntawd. Tiamsis tsis yog txhua yam uas muaj nqis rau peb, peb qhov muag yuav pom. Thaum Yexus cev nws zaj lus qhuab qhia saum roob nws hais tias muaj tej yam peb qhov muag tsis pom uas muaj nqis tshaj nyiaj txiag. Nws hais ntxiv tias: “Nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd.” (Mathais 6:19-21) Thaum peb ua haum Vajtswv siab ces zoo li peb ‘khaws nyiaj txiag thiab qhov txhia chaw cia rau saum ntuj.’ Yexus hais tias yog peb ua li ntawd ces yuav tsis muaj tub sab nyiag tau.

2. (1) Raws li 2 Kauleethaus 4:17, 18, Paulus txhawb kom peb ua dabtsi? (2) Hauv zaj no peb yuav kawm txog dabtsi?

² Tus tubtxib Paulus txhawb kom peb “muab siab npuab tej uas peb qhovmuag tsis pom.” (Nyeem 2 Kauleethaus 4:17, 18.) Tej ntawd yog tej uas Vajtswv pub rau peb nimno thiab yav tom hauv ntej hauv Vajtswv lub qab ntuj tshiab. Hauv zaj no peb yuav kawm txog 4 yam uas Vajtswv pub rau peb nimno uas peb qhov muag tsis pom. Peb yuav kawm txog (1) kev sib raug zoo nrog Vajtswv, (2) kev thov Vajtswv, (3) Vajtswv lub hwj huam dawb huv, thiab (4) Yehauvas, Yexus, thiab cov tubtxib saum ntuj pab peb mus tshaj tawm li cas. Thiab peb yuav ris Vajtswv txiaj ntsig rau tej ntawd li cas.

3. (1) Yam muaj nqis tshaj plaws uas peb qhov muag tsis pom yog dabtsi? (2) Vim li cas Vajtswv thiaj ua tau phoojywg nrog peb?

³ Kev sib raug zoo nrog Vajtswv Yehauvas yog yam muaj nqis tshaj plaws uas peb qhov muag tsis pom. (Phau Ntawv Nkauj 25:14) Vajtswv Yehauvas yog ib tug Vajtswv uas dawb huv, ua cas nws ho ua tau phoojywg nrog neeg txhaum? Nws ua tau li ntawd rau qhov Yexus tus nqi txhiv twb “ris neeg ntiajteb lub txim” txhaum lawm. (Yauhas 1:29) Yehauvas twb paub ua ntej lawm tias Yexus yuav muab siab npuab nws mus txog thaum Yexus tuag thiab cawm noob neej dim kev ploj kev tuag. Twb yog li ntawd, Vajtswv thiaj ua phoojywg nrog cov uas nyob ua ntej Khetos tuag theej neeg lub txhoj.​—Loos 3:25.

4. Piav txog ob peb tug uas ua phoojywg nrog Vajtswv ua ntej Yexus los hauv ntiajteb no.

⁴ Cia peb tham txog ob peb tug uas ua phoojywg nrog Vajtswv ua ntej Yexus los hauv ntiajteb no. Anplahas yog ib tug uas muaj kev ntseeg ruaj heev. Txawm nws twb tas sim neej ntev tshaj 1,000 xyoo lawm los Yehauvas tseem hais tias Anplahas yog nws “tus phoojywg.” (Yaxayas 41:8) Rau Yehauvas, Anplahas tseem muaj sia nyob. (Lukas 20:37, 38) Txawm kev tuag kiag los cais tsis tau Yehauvas ntawm nws cov phoojywg zoo. Yauj yog Yehauvas ib tug phoojywg zoo thiab. Thaum tag nrho cov tubtxib saum ntuj tuaj cuag Yehauvas, Yehauvas qhuas txog Yauj tias, “Tsis muaj ib tug ua zoo thiab muab siab npuab kuv li nws. Nws hwm kuv thiab tsis ua kev phem kev qias li.” (Yauj 1:6-8) Daniyees nrog cov neeg uas tsis teev tiam Yehauvas nyob tau li 80 lub xyoos. Yehauvas xav li cas txog Daniyees xwb? Thaum Daniyees laus lawm, muaj tubtxib saum ntuj los hais rau nws 3 zaug tias: “Vajtswv hlub koj heev.” (Daniyees 9:23; 10:11, 19) Peb tso siab tau tias Yehauvas yeej tos tsis hnyoo txog hnub uas nws yuav tsa cov phoojywg uas nws hlub sawv rov los.​—Yauj 14:15.

5. Yuav ua li cas peb thiaj ua tau Yehauvas ib tug phoojywg?

⁵ Yehauvas tsuas “nrog cov neeg uas hwm nws ua phoojywg” xwb. (Phau Ntawv Nkauj 25:14) Niaj hnub nimno muaj tsheej plhom leej pojniam txivneej thiab menyuam coj lawv lub neej kom haum Vajtswv siab thiab ua phoojywg nrog nws. Vim muaj tus nqi txhiv lawv thiaj ua tau Yehauvas ib tug phoojywg thiab muab lawv tus kheej cob rau nws thiab ua kevcai raus dej. Yog peb muab peb tus kheej cob rau Yehauvas thiab ua kevcai raus dej ces peb yuav yog Yehauvas tus phoojywg ib yam li lawv thiab. Yehauvas yog tus phoojywg uas zoo tshaj plaws tsis muaj leejtwg piv tau.

6. Yog peb saib peb txojkev sib raug zoo nrog Vajtswv muaj nqis ces peb yuav ua li cas?

⁶ Anplahas thiab Yauj nkawd teev tiam Yehauvas ntev tshaj 100 xyoo. Txawm yog peb twb teev tiam Yehauvas ntev heev lawm los, yog peb saib peb txojkev sib raug zoo nrog Vajtswv muaj nqis ces peb yuav tsum muab siab npuab rawv Vajtswv ib yam li Anplahas thiab Yauj nkawd. Thiab zoo ib yam li Daniyees peb yuav tsum saib peb txojkev sib raug zoo nrog Vajtswv muaj nqis dua peb txojsia. (Daniyees 6:7, 10, 16, 22) Yehauvas yeej yuav pab peb thev peb tej kev sim siab thiab pab kom peb muaj kev sib raug zoo nrog nws.​—Yaxayas 12:2.

7. (1) Raws li Pajlug 15:8, Yehauvas xav li cas xwb thaum peb thov nws? (2) Yehauvas teb peb tej lus thov li cas?

⁷ Ib qho ntxiv uas Vajtswv pub rau peb uas peb qhov muag tsis pom yog kev thov  Vajtswv. Peb txojkev sib raug zoo nrog Yehauvas zoo ib yam li ob tug phoojywg zoo sib qhia siab. Thaum peb nyeem Vajtswv Txojlus, Yehauvas qhia peb txog nws tej kev xav. Thaum peb thov Vajtswv, peb qhia nws txog tej peb xav tob tob hauv peb lub siab. Yehauvas yog peb tus phoojywg zoo, nws yeej zoo siab mloog thiab teb peb tej lus thov. (Nyeem Pajlug 15:8.) Muaj tej thaud nws teb peb sai. Tiamsis muaj tej thaud peb yuav tsum thov nws tsis tseg. Txawm li cas los peb tso siab tias nws yeej yuav teb peb. Tej zaum nws yuav teb tsis zoo li peb lub siab xav. Xws li thaum peb raug ib qho kev sim siab tej zaum nws yuav tsis muab tshem kiag tawm tiamsis nws yuav pub tswvyim thiab dag zog kom peb “ua taus lub siab ntev” thev.​—1 Kauleethaus 10:13.

8. Peb yuav ua li cas yog peb ris Yehauvas txiaj ntsig rau qhov uas nws cia peb thov nws?

⁸ Yehauvas tsis yuam kom peb thov nws. Tiamsis yog peb ris Yehauvas txiaj ntsig ces peb yuav “thov Vajtswv tsis tseg tsis tu” li nws hais kom peb ua. (1 Thexalaunikes 5:17; Loos 12:12) Thaum peb thov Vajtswv peb yuav tsum nco ntsoov ua nws tsaug thiab qhuas nws.​—Phau Ntawv Nkauj 145:2, 3.

9. (1) Kwvtij Khwlij xav li cas txog kev thov Vajtswv? (2) Koj xav li cas txog kev thov Vajtswv?

⁹ Thaum peb teev tiam Yehauvas ntev thiab pom tias nws teb peb tej lus thov li cas ces peb yuav hajyam saib kev thov Vajtswv muaj nqis. Ib tug kwvtij hu ua Khwlij (Chris) ua haujlwm puv ntoob rau Yehauvas tau 47 xyoo hais tias: “Kuv kaj siab thov Vajtswv dua thaum hnub nyuam qhuav tawm tuaj ua cov lwg dej ci zoo nkauj. Kuv thiaj nyiam sawv ntxhov ntxhov los thov Yehauvas. Kuv ua nws tsaug rau txhua yam nws pub rau kuv. Kuv kuj ua nws tsaug rau qhov uas nws cia peb thov nws. Thaum kuv thov Vajtswv ua ntej kuv mus pw los ua rau kuv kaj siab dua thiab.”

10. Vim li cas peb yuav tsum saib Yehauvas lub hwj huam dawb huv muaj nqis?

¹⁰ Peb yuav tsum saib Yehauvas lub hwj  huam dawb huv muaj nqis. Yexus thiaj txhawb kom peb rau siab ntso thov Vajtswv pub nws lub hwj huam dawb huv rau peb. (Lukas 11:9, 13) Thaum peb thov Vajtswv, nws yuav pub “lub hwjchim uas loj kawg nkaus” uas yog los ntawm lub hwj huam dawb huv los rau peb. (2 Kauleethaus 4:7; Tes Haujlwm 1:8) Yog peb muaj Vajtswv lub hwj huam dawb huv ces txawm peb raug dabtsi los peb yuav thev taus.

11. Lub hwj huam dawb huv pab peb li cas?

¹¹ Lub hwj huam dawb huv yuav pab peb ua tau peb tes haujlwm rau Vajtswv. Yog peb twb txawj ib yam dabtsi lawm, Vajtswv lub hwj huam dawb huv yuav pab kom peb hajyam txawj ntxiv. Peb ua tau peb tes haujlwm rau Vajtswv los twb yog vim muaj Vajtswv lub hwj huam dawb huv pab.

12. Raws li Phau Ntawv Nkauj 139:23, 24, peb yuav tau thov Vajtswv pub nws lub hwj huam dawb huv pab peb ua dabtsi?

¹² Yog peb saib Yehauvas lub hwj huam dawb huv muaj nqis ces peb yuav thov kom Yehauvas tshuaj peb lub siab seb puas muaj tej yam tsis zoo uas peb ntshaw. (Nyeem Phau Ntawv Nkauj 139:23, 24.) Thaum peb paub lawd ces peb yuav tau thov Vajtswv kom nws lub hwj huam dawb huv pab peb tswj peb lub siab. Yog peb ua li no Yehauvas yuav pom tias peb tsis xav ua ib yam dabtsi uas yuav ua rau nws tsis pub nws lub hwj huam dawb huv rau peb.​—Efexus 4:30.

13. Peb yuav ua li cas peb thiaj hajyam saib lub hwj huam dawb huv muaj nqis?

¹³ Thaum peb xav txog tej uas Vajtswv lub hwj huam dawb huv pab peb ces peb yuav hajyam saib lub hwj huam dawb huv muaj nqis. Ua ntej Yexus rov mus saum ntuj, nws hais rau nws cov thwjtim tias Vajtswv yuav pub lub hwj huam dawb huv rau lawv thiab lawv yuav ua timkhawv qhia txog Yexus mus thoob qab ntuj. (Tes Haujlwm 1:8) Yeej muaj li Yexus hais tiag. Nimno thoob plaws qab ntuj, muaj li 8.5 plhom tus neeg los teev tiam Yehauvas los twb yog muaj Vajtswv lub hwj huam dawb huv pab. Tsis tas li ntawd xwb, peb ua tau ib cuab kwvtij teev tiam Vajtswv ua ke los twb yog  muaj Vajtswv lub hwj huam dawb huv pab peb txawj sib hlub, muaj kev zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khav theeb, thiab paub tswj lub siab. (Kalatias 5:22, 23) Peb zoo siab kawg li uas Vajtswv pub nws lub hwj huam dawb huv rau peb!

14. Thaum peb mus tshaj tawm peb ua haujlwm nrog leejtwg?

¹⁴ Peb zoo siab heev uas peb tau nrog Yehauvas, Yexus, thiab cov tubtxib saum ntuj ua haujlwm ua ke. (2 Kauleethaus 6:1, TT) Peb nrog lawv ua haujlwm ua ke thaum peb mus tshaj tawm. Paulus hais li no txog nws thiab cov uas ua tes haujlwm no nrog nws tias: “Peb koom nrog Vajtswv ua haujlwm.” (1 Kauleethaus 3:9, TT) Thaum Yexus sam hwm kom nws cov thwjtim ‘cia li mus qhia txhua haivneeg kom lawv los ua kuv cov thwjtim,’ Yexus hais ntxiv tias: “Kuv yuav nrog nraim nej.” (Mathais 28:19, 20) Cov tubtxib saum ntuj los kuj coj peb kev thaum peb mus qhia ‘Txojmoo Zoo uas nyob mus ibtxhis rau tej neeg uas nyob thoob plaws hauv lub qab ntuj no.’​—Tshwmsim 14:6.

15. Piav ib tug qauv hauv phau Vajlugkub uas qhia tias Yehauvas pab peb mus tshaj tawm.

¹⁵ Yehauvas, Yexus, thiab cov tubtxib saum ntuj pab peb li cas? Thaum peb mus tshaj tawm txoj xov zoo yuav raug ib txhia siab thiab lawv yuav xav paub ntxiv. (Mathais 13:18, 23) Tiamsis leejtwg yog tus pab kom lawv txojkev ntseeg loj hlob? Yexus hais tias: “Tsuas yog Leej Txiv tus uas txib kuv los, nws coj leejtwg los tus ntawd thiaj tau los cuag kuv xwb.” (Yauhas 6:44) Thaum tus tubtxib Paulus tawm ntawm lub nroog Filipis, nws mus tshaj tawm rau ib co pojniam. Phau Vajlugkub hais li no txog tus pojniam hu ua Lidias: “Tus Tswv [“Yehauvas,” NWT ] qhib nws lub siab, ua rau nws totaub tej lus uas Paulus qhia.” (Tes Haujlwm 16:13-15) Ib yam li Lidias, Vajtswv kuj rub tau tsheej plhom leej los rau nws thiab.

16. Tsim nyog leejtwg tau koob meej thaum peb mus tshaj tawm es muaj neeg xav paub xav kawm?

¹⁶ Leejtwg thiaj yog tus uas coj tau tibneeg los ntseeg? Paulus teb lo lus nug no thaum nws hais txog lub koom txoos hauv Kauleethaus tias: “Kuv yog tus cog, Apaulaus yog tus ywg dej, tiamsis tus uas ua kom loj hlob yog Vajtswv. Tus uas cog thiab tus uas ywg dej yeej tsis tseemceeb dabtsi, tiamsis Vajtswv yog tus uas tseemceeb, rau qhov nws yog tus uas ua kom loj hlob.” (1 Kauleethaus 3:6, 7) Zoo ib yam li Paulus, thaum twg peb mus tshaj tawm es muaj neeg xav paub xav kawm los twb yog muaj Yehauvas pab peb xwb ces yeej tsim nyog nws tau koob meej.

17. Yog peb saib qhov uas peb ua haujlwm ua ke nrog Yehauvas, Yexus, thiab cov tubtxib saum ntuj muaj nqis ces peb yuav ua li cas?

¹⁷ Yog peb saib qhov uas peb ua haujlwm ua ke nrog Yehauvas, Yexus, thiab cov tubtxib saum ntuj muaj nqis ces peb yuav ua li peb ua tau mus tshaj tawm txoj xov zoo rau txhua leej txhua tus. Peb yuav ua li ntawd li cas? Peb ua li ntawd thaum peb mus tshaj tawm ib lub tsev rau ib lub tsev lossis rau tej qho chaw uas muaj neeg coob dua kev. (Tes Haujlwm 20:20) Thaum peb mus ub mus no es ntsib neeg los peb kuj nrog lawv tham thiab sib zeem. Yog zoo tham ces nrog lawv tham txog txoj xov zoo txog lub Nceeg Vaj.

18, 19. (1) Tsis yog tias peb mus tshaj tawm xwb tiamsis peb yuav tsum ua dabtsi ntxiv? (2) Piav seb Yehauvas tau pab ib tug uas kawm Vajlugkub li cas.

¹⁸ Thaum peb “nrog Vajtswv ua haujlwm,”  tsis yog hais tias peb mus tshaj tawm xwb tiamsis peb yuav tsum rov mus xyuas cov peb ntsib. Yog muaj ib tug xav paub ntxiv txog phau Vajlugkub peb yuav tsum nco ntsoov rov qab mus nrog nws tham lossis nrhiav ib tug mus nrog nws tham ntxiv seb tus ntawd puas xav kawm Vajlugkub. Peb xyiv fab kawg li thaum peb pom Yehauvas pab tus kawm Vajlugkub hloov nws lub neej raws li tej uas nws tau kawm.

¹⁹ Muaj ib tug txiv neeb hauv Afika Qab Teb hu ua Lapalalani (Raphalalani) uas kawm Vajlugkub. Nws nyiam tej nws kawm heev tiamsis nyuaj rau nws ua li Vajtswv Txojlus hais kom tsis txhob nrog cov tuag tham. (2 Kevcai 18:10-12) Ntev mus ntev tuaj nws kuj cia Vajtswv pab hloov nws txojkev xav. Txawm tias ua neeb ua yaig yog kev khwv noj khwv haus rau nws los nws ua ib siab muab tso tseg. Nimno Lapalalani muaj 60 xyoo lawm. Nws hais tias: “Ua Yehauvas Cov Timkhawv tsaug uas lawv pab kuv ntau yam xws li pab kuv nrhiav tau haujlwm ua. Tiamsis kuv ua Yehauvas tsaug tshaj plaws uas nws pab kuv hloov kuv lub neej los ua kevcai raus dej ua nws ib tug Timkhawv thiab mus tshaj tawm rau lwm tus.”

20. Raws li peb kawm no, koj npaj siab yuav ua li cas xwb?

²⁰ Hauv zaj kawm no peb kawm txog 4 yam muaj nqis heev uas peb qhov muag tsis pom. Ntawm 4 yam no kev sib raug zoo nrog Vajtswv Yehauvas yog yam uas muaj nqis tshaj plaws. Thaum peb ua Yehauvas tus phoojywg ces peb yuav thov tau nws, peb yuav pom nws lub hwj huam dawb huv pab peb, thiab tau kev pab ntawm Yehauvas, Yexus, thiab cov tubtxib saum ntuj thaum peb mus tshaj tawm. Peb yuav tsum saib tej no muaj nqis. Thiab peb yuav tsum nco ntsoov ua Yehauvas tsaug uas nws yog ib tug Phoojywg zoo heev rau peb.