1. Iesu ese guba ena dava bada kohu be edena bamona ia herevalaia?

DAVA bada gaudia ibounai ita itaia diba lasi. Momokani, dava bada gaudia momo be taunimanima ese idia itaia diba lasi. Ororo Harorona ai, Iesu ese guba ena dava bada gaudia ia herevalaia, bona unai gaudia ese taga bona moni idia hereaia. Bena ma ia gwau: “Emu dava bada kohu ia noho gabuna dekenai, emu kudouna danu be unuseniai do ia noho.” (Mat. 6:19-21) Bema gau ta ita laloa bada, do ita gaukara goada unai gauna ita abia totona. Ita gaukara goada bona Dirava ita hamoalea neganai ita be “guba dekenai . . . dava bada kohu” ita haboua noho. Iesu ia gwau, unai dava bada kohu be idia hadikaia eiava henaoa diba lasi.

2. (a) Korinto Iharuana 4:17, 18 ena hereva bamona, Paulo ese ita ia hagoadaia dahaka ita karaia totona? (b) Inai atikol ai dahaka do ita herevalaia?

² Aposetolo Paulo ese ita ia hagoadaia “iseda matana dekenai . . . ita itaia lasi gaudia ita raraia noho.” (2 Korinto 4:17, 18 duahia.) Ita itaia lasi dava bada gaudia be Dirava ena tanobada matamatana ai do ita moalelaia hahenamo idauidau. Inai atikol ai, dava bada gaudia foa amo hari inai negai heduru ita abia dalana do ita herevalaia​—iseda hetura karana Dirava ida, guriguri, Dirava ena lauma helaga ena heduru, bona iseda hesiai gaukara ai Iehova, Iesu, bona aneru edia heduru. Danu, do ita itaia edena dala ai ita hahedinaraia ita itaia diba lasi dava bada gaudia ita laloa bada.

3. Ita itaia diba lasi dava bada gauna hereadaena be dahaka, bona edena dala ai unai ita abia diba?

³ Ita itaia diba lasi dava bada gauna hereadaena be iseda hetura  karana Iehova ida. (Sal. 25:14) Edena dala ai helaga Diravana be goevadae lasi taudia ia tura henidia diba? Unai bamona ia karaia diba badina Iesu ena mauri davalaia boubouna amo “tanobada taudia edia kara dika” ia kokia. (Ioa. 1:29) Iehova be Hamauria Tauna ta ia henia ena taunimanima ia hamauria totona, bona ia diba iena ura do ia guguru. Unai amo Keriso ia do mase lasi neganai idia noho taudia be Dirava ena turana ai idia lao diba.​—Roma 3:25.

4. Idaunegai Dirava ena turana ai idia lao Keristani taudia haida mani oi herevalaia.

⁴ Idaunegai Dirava ena turana ai idia lao Keristani taudia haida mani ita laloa. Aberahamo be abidadama goada tauna. Aberahamo ia mase bena lagani 1,000 mai kahana murinai Iehova ese ia gwauraia “lauegu turana.” (Isa. 41:8) Unai dainai ita gwau diba mase ese Iehova ena hetura karana ena turadia ida ia hadikaia diba lasi. Iehova ese Aberahamo ia laloatao noho. (Luka 20:37, 38) Haheitalai ma ta be Iobu. Aneru ibounai be guba dekenai idia haboua neganai, Iehova ese Iobu ena kara namo ia herevalaia. Ia gwau: “Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani.” (Iobu 1:6-8) Bona Daniela be mai abidadama ida lagani 80 bamona Dirava idia tomadiho henia lasi tanona ta ai Dirava ia hesiai henia. Iehova ese ia be edena bamona ia laloa? Aneru ese nega toi unai buruka tauna ia hadibaia Dirava ese “ia lalokau henia bada.” (Dan. 9:23; 10:11, 19) Ita abia dae Iehova ia ura dikadika vaira negai iena turadia, idia mase vadaeni taudia do ia hatorea isi lou.​—Iobu 14:15.

5. Iehova ena turana ai oi lao totona dahaka oi karaia be namo?

⁵ Hari inai negai goevadae lasi taudia hida, be Iehova ena turana ai idia lao diba? Taunimanima milioni momo. Unai ita diba badina tanobada ibounai lalonai tatau, hahine, bona natudia momo herea be edia kara amo idia hahedinaraia idia ura Dirava ena turana ai idia lao. Iehova be “kara maoromaoro taudia” ia tura henidia noho. (Aon. 3:32) Unai hetura karana namona idia moalelaia diba badina Iesu ena mauri davalaia boubouna idia abidadama henia. Danu, unai mauri davalaia boubouna dainai, Iehova dekenai iseda mauri ita gwauhamatalaia bona bapatiso ita abia. Unai mai anina bada dala ta ta ita badinaia neganai, ita bona edia mauri idia gwauhamatalaia bona bapatiso idia abia Keristani taudia be iunives lalonai ia noho Tau hereadaena ida hetura karana namona do ita moalelaia!

6. Edena dala ai ita hahedinaraia iseda hetura karana Dirava ida ita laloa bada?

⁶ Edena dala ai ita hahedinaraia iseda hetura karana Dirava ida ita laloa bada? Aberahamo bona Iobu be lagani 100 mai kahana Dirava idia abidadama henia, unai hegeregerena ena be inai nega oromana ai lagani momo Iehova ita hesiai henia, to Dirava ita abidadama henia noho be namo. Daniela bamona, namona be iseda hetura karana Dirava ida ita laloa bada, to iseda mauri lasi. (Dan. 6:7, 10, 16, 22) Iehova ena heduru amo, ita davaria hahetoho idauidau ita haheaukalaia diba bona iena turana ai do ita lao.​—Fili. 4:13.

7. (a) Aonega Herevadia 15:8 ena hereva bamona, Iehova ese iseda guriguri be edena bamona ia laloa? (b) Iehova be edena dala ai iseda guriguri ia haerelaia?

⁷ Ita itaia lasi dava bada gauna ma ta be guriguri karana. Tura namodia be ta ta dekenai idia laloa gaudia bona edia hemami idia herevalaia. Iseda hetura karana Iehova ida be unai bamona. Iehova be Baibel amo ita ia hereva henia, bona Baibel lalonai iena lalohadai bona iena hemami ita dibaia. Guriguri amo ia ita hereva henia, bona ia dekenai iseda lalohekwarahi bona hemami ita gwauraia diba. Iehova be mai  moale ida iseda guriguri ia kamonai henia. (Aonega Herevadia 15:8 duahia.) Ia be iseda lalokau turana dainai, iseda guriguri ia kamonai henia sibona lasi to ia haerelaia danu. Nega haida haere ita abia haraga. To nega haida iseda lalohekwarahi gauna ta dainai ita guriguri loulou. Herevana unai ia vara, to ita daradara lasi badina ita diba momokani nega korikori ai iseda guriguri ena haere do ita abia. Momokani, Dirava ese iseda guriguri ia haerelaia dalana be iseda laloa dalana amo ia idau. Hegeregere, ita davaria hahetoho do ia kokia lasi, to reana aonega bona goada do ia henia unai ita “haheaukalaia” totona.​—1 Kor. 10:13.

8. Edena dala ai inai harihari gauna, guriguri karana ita laloa bada?

⁸ Edena dala ai inai harihari gauna, guriguri karana ita laloa bada? Dala ta be ‘nega ibounai do ita guriguri’ ena hakaua herevana ita badinaia. (1 Tes. 5:17) Iehova be ita ia doria lasi ia ita guriguri henia totona. To, iseda abia hidi ia matauraia bona ita ia hagoadaia ‘guriguri ita hadokoa lasi’ totona. (Roma 12:12) Unai dainai dina ta ta ai ita guriguri be namo, unai amo ita hahedinaraia guriguri karana ita laloa bada. Oibe, iseda guriguri lalonai Iehova ita tanikiu henia bona hanamoa be namo.​—Sal. 145:2, 3.

9. Tadikaka ta ese guriguri karana be edena bamona ia laloa, bona edena bamona unai oi laloa?

⁹ Bema Iehova ita hesiai henia bona ia ese iseda guriguri ia haerelaia dalana ita dibaia noho, unai ese ita do ia durua guriguri karana ita laloa bada totona. Mani lagani 47 lalonai ful-taim hesiai gaukara ia karaia tadikaka Chris, ena haheitalai ita laloa. Ia gwau, “Daba momokani ai lau noga bona Iehova lau guriguri henia karana lau moalelaia. Dina ia daekau matamaia bona gabu ena toana ia namo herea, unai nega ai Iehova lau guriguri henia be moale gauna! Unai ese lau ia durua ia henia harihari gaudia ibounai bona guriguri karana dainai ia lau tanikiu henia totona. Bena hanuaboi ai lau guriguri murinai mai lalomamina goevana ida lau mahuta diba.”

10. Dahaka dainai Dirava ena lauma helaga ita laloa bada be namo?

¹⁰ Ita itaia diba lasi harihari gauna ma ta be, Dirava ena lauma helaga, unai ita laloa bada be  namo. Iesu ese ita ia hagoadaia lauma helaga totona ita noinoi. (Luka 11:9, 13) Iehova be iena lauma helaga amo ita dekenai “taunimanima edia siahu ia hereaia gauna” ia henia. (2 Kor. 4:7; Kara 1:8) Dirava ena lauma helaga ena heduru dainai hahetoho idauidau ita haheaukalaia diba.

11. Edena dala ai lauma helaga ese ita ia durua?

¹¹ Lauma helaga ese ita do ia durua Dirava ena hesiai gaukara ai ita abia asainmen ita karaia namonamo totona. Dirava ena lauma helaga ese iseda diba bona laloparara karana ia hanamoa diba. Danu, ita ia durua iseda Keristani maduna idauidau ita huaia totona. Ita diba Dirava ena hesiai gaukara ai ena lauma helaga ena heduru dainai anina namona ia vara.

12. Salamo 139:23, 24 ena hereva bamona, Dirava ena lauma helaga ita noia ita ia durua dahaka ita karaia totona?

¹² Dirava ena lauma helaga ita laloa bada dalana ma ta be, ia ita noia iena lauma helaga amo ita ia durua iseda kudouna ai idia noho lalohadai eiava ura dikadia ia tahua totona. (Salamo 139:23, 24 duahia.) Unai bamona ita noinoi neganai, Iehova ese ena lauma helaga amo ita do ia durua lalohadai kereredia eiava ura dikadia ita lalopararalaia totona. Bona, unai gaudia ita lalopararalaia neganai, Dirava ena lauma helaga totona ita noinoi, unai amo ita dekenai goada ia henia unai lalohadai eiava ura dikadia ita dadaraia totona. Unai dala amo do ita hahedinaraia ita ura lasi gau ta ese ita ia koua Iehova ena lauma helaga ena heduru ita abia totona.​—Efe. 4:30.

13. Edena dala ai ita hahedinaraia lauma helaga ena heduru ita laloa bada?

¹³ Dirava ena lauma helaga ena gaukara do ita laloa bada bema hari inai negai lauma helaga ena heduru amo idia guguru gaudia ita laloa. Iesu be guba dekenai ia do daekau lasi neganai, iena hahediba taudia ia hamaoroa, ia gwau: “Lauma helaga be umui latanai ia diho neganai, siahu do umui abia, bona . . . tanobada ena daudau momokani gabudia dekenai, lau do umui gwauraia hedinarai.” (Kara 1:8) Unai hereva be hari inai negai idia guguru noho. Lauma helaga ena heduru dainai tanobada ibounai lalonai taunimanima 8 milioni mai kahana be Iehova idia tomadiho henia noho. Danu, tadikaka oreana lalonai maino ai ita noho diba,  badina Dirava ena lauma helaga ese ita ia durua kara namodia ita hahedinaraia totona, hegeregere lalokau, moale, maino, boga-auka, hebogahisi, kara namo, abidadama, manau, bona sibona biagua karana. Unai kara ta ta be “lauma helaga ena huahua.” (Gal. 5:22, 23) Oibe, lauma helaga be harihari gauna hereadaena!

14. Haroro gaukara ita karaia neganai, edena dala ai ita itaia diba lasi heduru ita abia?

¹⁴ Iehova, Iesu, bona aneru ida ita “gaukara hebou” karana be ita itaia diba lasi dava bada gauna ta. (2 Kor. 6:1) Haroro gaukara ita karaia neganai ita be idia ida ita gaukara hebou. Paulo be ia sibona bona haroro gaukara idia karaia noho taudia ia gwauraia: “Ai be Dirava ida ai gaukara hebou taudia.” (1 Kor. 3:9) Haroro gaukara ita karaia neganai, ita be Iesu ida ita gaukara hebou taudia. Mani oi laloa Iesu be ena hahediba taudia ia hagania “bese ibounai taudia be hahediba taudia ai umui halaoa,” unai murinai ia gwau lau be “umui ida do lau noho.” (Mat. 28:19, 20) Bona aneru be edena bamona? Ita moale badina aneru ese ita idia durua, “noho hanaihanai sivarai namona be tanobada ai idia noho taudia” ibounai dekenai ita gwauraia totona!​—Apok. 14:6.

15. Baibel ai ia noho haheitalai ta amo Iehova ese iseda haroro gaukara ai ita ia durua dalana oi hahedinaraia.

¹⁵ Guba amo ita abia heduru ese dahaka namo ia havaraia? Basileia sivaraina ena uhe ita hadoa neganai, unai sivarai be kudou maoro taudia ese idia kamonai bona abia dae. (Mat. 13:18, 23) Daika ena heduru dainai unai hereva momokani ena uhe idia tubu bona huahua idia atoa? Iesu ia gwau, tau ta be lau dekenai ia mai diba lasi, bema “Tamana . . . ese ia veria mai lasi.” (Ioa. 6:44) Baibel ena haheitalai ta ese unai ia hahedinaraia. Paulo ese Filipi siti ena murimuri ai hahine haida ia haroro henia ena sivarai mani oi laloa. Baibel ese idia ta ia herevalaia, iena ladana be Lidia: “Iehova ese ena lalona ia kehoa bona Paulo ia gwauraia herevadia ia abia dae.” (Kara 16:13-15) Lidia bamona, Iehova ese taunimanima milioni momo be ia kahirakahira ia veria mai.

16. Daika ita hanamoa be namo bema haroro gaukara ai anina namona ia vara?

¹⁶ Daika ita hanamoa be namo bema haroro gaukara ai anina namona ita abia? Paulo ese Korinto kongrigeisen ia tore henia neganai unai henanadai ia haerelaia, ia gwau: “Lau ese uhe lau hadoa, Apolo ese ia dairia, to Dirava ese ia hatubua noho. Unai dainai hadoa tauna bona dairia tauna ita hanamoa lasi, to uhe ia hatubua Diravana ita hanamoa.” (1 Kor. 3:6, 7) Paulo bamona, iseda haroro gaukara ese anina namona ia havaraia neganai, nega ibounai Iehova ita hanamoa be namo.

17. Edena dala ai Dirava, Keriso, bona aneru ida ita “gaukara hebou” karana ita laloa bada?

¹⁷ Edena dala ai ita hahedinaraia diba Dirava, Keriso bona Aneru ida ita “gaukara hebou” ena hahenamo ita laloa bada? Unai ita hahedinaraia dalana be, dala ita tahua ma haida dekenai sivarai namona ita harorolaia totona. Dala idauidau ai unai ita karaia diba, hegeregere “taunimanima vairanai bona ruma ta ruma ta ai” ita haroro. (Kara 20:20) Momo be nega bona gabu idauidau ai haroro karana idia moalelaia. Bema idia diba lasi tauna ta idia davaria, hanamoa hereva idia gwauraia bena idia haroro henia. Bema unai tauna ia ura kamonai, mai aonega ida Basileia ena sivarai namona idia herevalaia.

18-19. (a) Edena dala ai hereva momokani ena uhe ita dairia diba? (b) Iehova ese Baibel stiuden ta ia durua dalana ena haheitalai ta oi gwauraia.

¹⁸ Ita be ‘Dirava ida ita gaukara hebou dainai,’ hereva momokani ena uhe ita hadoa sibona lasi to ranu ita henia danu. Bema kamonai  tauna ta ita davaria, namona be ita hekwarahi ita lou henia eiava ma ta ita hadibaia unai tauna ia vadivadi henia, unai amo Baibel stadi ia hamatamaia. Stadi tauna ia goada ia lao neganai, ita moale bada badina Iehova ese unai Baibel stadi tauna ia durua ena kara bona laloa dalana ia haidaua totona.

¹⁹ South Africa ai ia noho babalau tauna Raphalalani, ena sivarai mani ita laloa. Iena Baibel stadi amo ia dibaia gaudia ia moalelaia. To Baibel amo Dirava ena lalohadai mase taudia edia lauma hereva henia karana dekenai ia duahia neganai, ia lalohekwarahi bada. (Deu. 18:10-12) Metairametaira, Dirava ese ia durua bena ena laloa dalana ia haidaua. Gabeai, babalau karadia ia rakatania ena be unai dala amo moni ia davaria. Hari Raphalalani ena mauri lagani be 60, bona ia gwau: “Iehova ena Witnes taudia lau tanikiu henia badina dala idauidau ai lau idia durua, hegeregere lau idia durua moni gaukara ta lau davaria totona. Danu, Iehova lau tanikiu henia bada badina lau ia durua egu mauri lau haidaua totona, bona hari lau be bapatiso Witnes ta bona haroro gaukara lau karaia diba.”

20. Emu lalona oi hadaia dahaka oi karaia totona?

²⁰ Inai atikol ai, ita itaia diba lasi dava bada gaudia foa ita herevalaia. Unai gaudia ibounai amo Iehova be iseda Turana ai ia lao karana be hahenamo badana. Unai ese ita ia durua ita itaia diba lasi dava bada gaudia ma haida amo namo ita abia, hegeregere guriguri karana, lauma helaga ena heduru, bona iseda haroro gaukara ai guba amo heduru ita abia. Namona be iseda lalona ita hadaia unai dava bada gaudia dekenai iseda tanikiu karana ita hahedinaraia totona. Bona nega ibounai iseda Tura namona Iehova ita tanikiu henia.