1. Jesus wa tja vi ohunga noutumbe womeyuru?

KAVIYANDJEWA avihe mbi munika. Kunao, oviyandjewa ovihuzehuze kavi munika. Omahongero wokombanda yondundu, Jesus wa tja outumbe womeyuru ouwa okukapita ovimariva. Nu wa weza kutja, “pu pe noutumbe weṋu aruhe opu mape kara omitima vyeṋu wina.” (Mat. 6:19-21) Indu tji matu zeri oviṋa mbi matu vanga eṱe tu kondja okuvimuna. Eṱe tu sokupwika “outumbe meyuru” mokukara noupanga ouwa kuna Mukuru. Jesus wa ṋunisa kutja ovihuze mbyo kamaavi nyonwa poo okuvakwa.

2. (a) Otja 2 Ovakorinte 4:17, 18, Paulus wa tja matu sokutjita vi? (b) Morupa ndwi matu ka hungirira kuye?

² Omuapostele Paulus wa tja, matu ‘sokutara ku imbi mbi ha munika.’ (Lesa 2 Ovakorinte 4:17, 18.) Oviṋa mbi ha munika mbi vi kamburira mo ozondaya nḓu matu kamuna mouye oupe wa Mukuru. Morupa ndwi matu ke rihonga oviṋa vine mbi ha munika mu tu muna mo ouwa nai, oupanga ouwa kuna Mukuru, otjiyandjewa tjokukumba, ombatero yombepo ondjapuke, nombatero ndji tu muna okuza ku Jehova, Jesus novaengeli motjiungura tjokuzuvarisa. Wina matu ke rihonga kutja matu sokuraisa vi ondangi koviṋa mbi ha munika.

3. Otjikeṋa otjinanḓengu tji tji ha munika, nu otjikwaye tji tjita kutja tu kare notjiṋa ho?

³ Otjiṋa otjinanḓengu tji tji ha munika okukara noupanga ouwa kuna Jehova. (Eps. 25:14) Hapo mape ya vi Mukuru ma kare noupanga ku novandu mbe he ri ohomonena na rire omuyapuke?  Eye u yenena okutjita nao mena rokutja otjisuta tjonguturiro tja Jesus tji “isa ko ozondjo zouye” zovandu. (Joh. 1:29) Jehova aa tjiwa rukuru kutja ondando ye yokuhinda omundu ngu meeku yama ovandu mai yenenisiwa. Mena rotjiṋa ho Mukuru aa yenene okurira epanga rovandu mba hupire komurungu wonḓiro ya Kristus.—Rom. 3:25.

4. Yandja ovihorera tjiva vyovandu mbe ha ri ovakongorere va Kristus nu mba ri omapanga wa Mukuru.

⁴ Tara kovarumendu tjiva mbe ha ri ovakongorere va Kristus nu mba ri omapanga wa Mukuru. Abraham wa ri omurumendu ngwa ri nongamburiro yomasa. Ozombura 1 000 kombunda yonḓiro ya Abraham, Jehova we mu isana kutja ‘epanga re.’ (Jes. 41:8) Kunao nandarire onḓiro kamaai haṋa omapanga wopopezu wa Jehova kuna ye. Mourizemburuka wa Jehova Abraham ngunda u nomuinyo. (Luk. 20:37, 38) Otjihorera tjarwe o tja Job. Indu ovaengeli tji va woronganene pamwe meyuru, Jehova wa hungira oviṋa oviwa ohunga na Job. Jehova we mu isana kutja, “omuṱakame nomusemba . . . u ritjaera kutja a ha tjiti ouvi ngamwa auhe.” (Job 1:6-8) Nu hapo Jehova wa ri noumune uṋe ohunga na Daniel, ngwee rikotamene ku Mukuru mehi ovandu mbe hi na aave rikotamene ku Jehova oure wozombura ape 80? Povikando vitatu ovaengeli ve mu raera kutja Mukuru “we ku suvera.” (Dan. 9:23; 10:11, 19) Matu yenene okukara nongamburiro kutja Jehova u undja nonḓero okupendura omapanga we omasuverwa nga ṱa.—Job 14:15.

5. Otjikwaye tji matu sokutjita kutja tu kare noupanga ouwa kuna Jehova?

⁵ Ovandu vengapi mbe he ri ohomonena ndino mbe yorokera oupanga wopopezu kuna Jehova? Omangete omengi. Matu tjiwa otjiṋa hi mena rokutja ovarumendu ovengi, ovakazendu, novanatje mouye auhe ve raisa movitjitwa vyawo kutja ve vanga kurira omapanga wa Mukuru. Jehova “u yakura ovasemba nouṱakame.” (Omiano 3:32) Indu tji tu nongamburiro motjisuta tjonguturiro tja Jesus matu yenene okurira omapanga wa Jehova. Mena ranao, Jehova u tu yandjera kutja tu riyandje kuye nokupapitisiwa. Indu tji twa toora omikambo ominanḓengu mbi, tu rikuta ku novandu omangete omengi mbe riyandja ku Jehova nokupapitisiwa otjOvakriste nokuyorokera oupanga ouwa pu nOmundu omunenenene mevaverwa.

6. Matu raisa vi ondangi koupanga wetu kuna Mukuru?

⁶ Matu raisa vi kutja tu nondangi koupanga wetu na Mukuru? Tjimuna Abraham na Job, mba panḓera pouṱakame ku Mukuru oure wozombura ozengi, eṱe wina matu sokukara nouṱakame kainatja kutja twa karera Jehova oure woruveze orure mouye mbwi. Tjimuna Daniel, matu sokuvara oupanga wetu kuna Mukuru okukapita omuinyo wetu. (Dan. 6:7, 10, 16, 22) Nombatero ya Jehova matu yenene okutuurunga omauzeu ngamwa aehe ngu tu muna nu iho tji tjita kutja oupanga wetu kuna ye u kurire ko.—Fil. 4:13.

7. (a) Otja kOmiano 15:8, Jehova u noumune uṋe ohunga nozongumbiro zetu? (b) Jehova u zira vi ozongumbiro zetu?

⁷ Otjiṋa tjarwe tji tji hamunika ongumbiro. Omapanga ye suvera okuraerasana oumune wawo. Hapo pe kara nao noupanga wetu na Jehova? Ii. Jehova u hungira kuna eṱe okupitira mEmbo re, nu muro eye wetu raera ouripura noumune we. Eṱe tu hungira kuna Jehova okupitira mongumbiro, nu tu mu raera omeripura wetu omakoto noumune wetu. Jehova u nonḓero okupuratena kozongumbiro zetu. (Lesa Omiano 15:8.) Otja epanga rorusuvero Jehova ka puratene kozongumbiro zetu uriri, nungwari wina u ze zira.  Povikando tjiva u zira tjimanga. Nu oruveze rumwe mape ya kutja matu sokukayenda komurungu okukumba ohunga notjiṋa kaaṋi ho. Nu nandarire nao, eṱe matu yenene okukara nongamburiro kutja eziriro ri ya moruveze nu momuano omusemba. Otjiperi kutja, omuano Mukuru me zira ozongumbiro zetu mape ya za panguka ku imbi mbi matu undjire ko. Otjotjihorera, pendje nokuisapo ouzeu, eye u tupa ounongo nomasa “okupirukira omarorero nga.”—1 Kor. 10:13.

8. Matu raisa vi ondangi kotjiyandjewa tjongumbiro?

⁸ Hapo matu raisa vi ondangi kotjiyandjewa tjongumbiro? Omuano umwe mu tu tjita nao ‘okukumba nokuhaisa ko.’ (1 Tes. 5:17) Jehova ke tu ṋiṋikiza kutja tu kumbe. Nungwari eye u nondengero kouyara wetu wokuritoororera oveni nu u tu ningira kutja tu “panḓere pokukumba.” (Rom. 12:12) Kunao matu yenene okuraisa ondangi yetu mokukumba eyuva arihe. Otjiperi kutja matu sokutja okuhepa nokuhivirika Jehova mozongumbiro zetu.—Eps. 145:2, 3.

9. Omurumendu omukambure umwe u noumune uṋe ohunga nongumbiro, nu ove u noumune uṋe ohunga nongumbiro?

⁹ Oruveze orure ndu twa karera Jehova tu muna omuano Jehova me zira ozongumbiro zetu nu iho tji tjita kutja tu raise ondangi. Tara kotjihorera tja Chris, omurumendu omukambure ngwaa ungurire Jehova oruveze aruhe oure wozombura 47 nḓa ka pita. Eye wa tja: “Ami ee tjaterwa okupenduka rukuru muhuka omunene kutja mbi kumbe ku Jehova. Otjiṋa otjiwa okuhungira kuna Jehova otja eyuva tji ma ripiti oviṋa avihe amavi munika nawa. Ihi tje ndji hinga kutja mbi raise ondangi koviyandjewa avihe nu wina otjiyandjewa tjongumbiro. Nu komaandero weyuva tji mbazu nokukumba, mbi yenena okukarara nomeritjiviro omawa womomutima.”

10. Ongwaye tji matu sokuraisa ondangi kotjiyandjewa tjombepo ondjapuke?

¹⁰ Ombepo ondjapuke otjiyandjewa tjarwe tji tji ha munika nu ku matu sokuraisa ko ondangi. Jesus wa tja matu sokukumba okuningira  ombepo ondjapuke. (Luk. 11:9, 13) Okupitira mombepo ye, Jehova u tupa “omasa nge kapita avihe.” (2 Kor. 4:7; Oviung. 1:8) Nombatero yombepo ondjapuke eṱe matu yenene okutuurunga omauzeu aehe ngu matu munu.

11. Omomuano uṋe ombepo ondjapuke mu i tu vatera?

¹¹ Ombepo ondjapuke i tu vatera kutja tu yenenise oviungura mbi tu ungurira Mukuru. Ombepo ondjapuke i kurisa ondjiviro nounongo wetu. Matu tjiwa kutja ondoṋeno ndji tu muna motjiungura tja Mukuru ka mena rongondjero yetu oveni, nungwari omena rombatero yombepo ondjapuke.

12. Otja kEpsalme 139:23, 24, matu yenene okuningira ombepo ondjapuke kutja i tu vatere okutjita ye?

¹² Omuano warwe mu matu raisa ondangi kombepo ondjapuke omokukumba ku Jehova kutja metu vatere okukonḓonona omeripura poo ozonḓuma ozombi nḓe ri momitima vyetu. (Lesa Epsalme 139:23, 24.) Indu tji matu tjiti nao, okupitira mombepo ye ondjapuke Jehova u tjita kutja tu mune omeripura wetu omavi ngo poo ozonḓuma ozombi nḓo. Nu indu tji twa tjiwa kutja tu nomeripura omavi poo ozonḓuma ozombi matu sokukumba kutja ombepo ondjapuke i tupe omasa okupirukira omeripura ngo poo ozonḓuma nḓo. Kunao, matu raisa kutja ka tu nokuvanga okutjita otjiṋa tji ma tji tjiti kutja Jehova ma ise okutuvatera nombepo ye ondjapuke.—Ef. 4:30.

13. Matu raisa vi ondangi kombepo ondjapuke?

¹³ Tu raisira ko ondangi indu tji matu ripurire ku imbi oviṋa ombepo ondjapuke mbi i yenenisa ndino. Ngunda e hiya ronda keyuru, Jesus wa tja: “Ombepo Ondjapuke tji ye ya kombanda yeṋu, eṋe mamu hara omasa nu amu rire ovendjihongonone . . . nga komaandero wehi.” (Oviung. 1:8) Omambo nga ye yenenisiwa momuano omuhimise ndino. Nombatero yombepo ondjapuke ovandu ape omangete hambondatu nohinga ve rikotamena ku Jehova mouparanga wouye auhe. Wina otjovakarere va Mukuru eṱe tu yorokera ombwaneno nohange mena rokutja ombepo ondjapuke i tu vatera okukara novikaṋena oviwa tjimuna  orusuvero, enyando, ohange, omuretima, oupore, omutima omuwa, ouṱakame, omerisusuparisiro nomeritjaerero. Ovikaṋena mbi vi isanewa “ovihape vyOmbepo.” (Gal. 5:22, 23) Ombepo ondjapuke tjiri otjiyandjewa otjiwa.

14. Hapo ombatero iṋe ndji tu hamunu ndji tu pewa tji matu zuvarisa?

¹⁴ Eṱe tu notjiyandjewa otjiwa tji tji hamunika okurira “ovaungure vapamwe” na Jehova, Jesus novaengeli. (2 Kor. 6:1) Tu yenena okuungura pamwe nawo indu tji tu ri motjiungura tjokuzuvarisa. Paulus wa tja: “oweṱe ovaungure vapamwe va Ndjambi”, indu tjaa hungire ku ye omuini na imba mbe norupa motjiungura ho. (1 Kor. 3:9) Indu tji tu norupa motjiungura tjokuzuvarisa, oweṱe ovaungure vapamwe na Jesus wina. Zemburuka indu tja za nokurakiza ovahongewa ve ‘okukaisa po ovandu ovahongewa,’ Jesus wa tja: “Ami mbi ri puna eṋe.” (Mat. 28:19, 20) Nu nambano tjike novaengeli? Tu nondangi kutja ovaengeli ve tu hongorera po indu tji matu zuvarisa ‘ombuze ombwa yaaruhe . . . kovature avehe vokombanda yehi.’—Omavan. 14:6.

15. Yandja otjihorera okuza mOmbeibela tji ma tji raisa kutja Jehova u norupa rwaye orunanḓengu motjiungura tjokuzuvarisa.

¹⁵ Ombatero ndji tu pewa okuza keyuru i tu vatera okuyenenisa tjike? Otja tji matu zuvarisa ombuze yOuhona, ozondwi tjiva ze wira momitima omiwa nu ze hapa. (Mat. 13:18, 23) Ouṋe ngu tjita kutja ozondwi zouatjiri nḓa ze hape nokutwako ovihape? Jesus wa tja: kape nomundu ngu ma rire omukongorere wandje indu “tje ha nanenwe i Tate.” (Joh. 6:44) Ombeibela i yandja otjihorera otjikahu ohunga notjiṋa hi. Zemburuka otjikando tjimwe Paulus tja zuvarisa kotjimbumba tjovakazendu pendje notjihuro tja Filipi. Tara kutja Ombeibela i tja vi ohunga na umwe wawo, omukazendu wena Lidia: “Muhona wa yezururire omutima we kutja a puratene nombakatwi komambo Paulus nguya hungire.” (Oviung. 16:13-15) Tjimuna Lidia, ovandu varwe omangete omengi va nanwa i Jehova.

16. Ouṋe ngu ma sokupewa ohiviro kondoṋeno ngamwa ndji matu munu motjiungura tjokuzuvarisa?

¹⁶ Ouṋe ngu ma sokutangwa indu tji twa munu ondoṋeno motjiungura tjokuzuvarisa? Paulus wa zira epuriro ndo indu tja tjanga omambo nga ohunga nombongo yOvakorinte: “Ami vari mba kuna, nu Apolos a tjatja, nungwari Ndjambi ongwa hapisa. Ingwi ngu ma kunu, na ingwi ngu ma tjatja owo kaviṋa, nungwari Ndjambi ongu ri omunanḓengu tjinga e ri ngu ma hapisa.” (1 Kor. 3:6, 7) Tjimuna Paulus, eṱe aruhe matu sokutanga Jehova kondoṋeno aihe ndji matu munu motjiungura tjokuzuvarisa.

17. Matu raisa vi ondangi okurira “ovaungure vapamwe” na Mukuru, Kristus, novaengeli?

¹⁷ Hapo matu raisa vi ondangi kondjingonekero ‘yokuungura pamwe’ na Mukuru, Kristus novaengeli? Matu yenene okutjita nao, indu tji matu kondjo okukara noruveze aruhe okuzuvarisa ombuze ombwa ku varwe. Pe nomiano omingi mbi matu yenene okutjita tjimuna okuzuvarisira “ovandu motupanda na mozondjuwo.” (Oviung. 20:20) Nu ovengi ve yorokera okuzuvarisa kovandu ngunda ave heri motjiungura tjokuzuvarisa. Indu tji va hakaene nomundu ngu ve hi nokutjiwa ve mu korisa nawa na ve utu okuhungira kuna ye. Nu tja raisa onḓero ve hungira nongengezero kombuze ombwa yOuhona.

18-19. (a) Hapo tu tjatja vi ozondwi zouatjiri? (b) Yandja otjihorera tjomuano Jehova ma vatera omuhongwa umwe wOmbeibela.

¹⁸ Otja “ovaungure vapamwe vaNdjambi,” eṱe ka tu sokukuna ozondwi zouatjiri uriri nungwari matu sokuzetjatja wina. Indu omundu  tja raisa ombango, eṱe matu vanga okukondja okuyaruka kuye poo okuraera omukambure warwe okukauta omakonḓononeno wOmbeibela kuna ye. Tu kara nondjoroka indu tji matu munu omuano Jehova mu ma vatere omuhongwa wOmbeibela okurundurura ongaro noumune we.

¹⁹ Tara kotjihorera tja Raphalalani ngwa ri onganga yomiti moSouth Africa. Eye wa suverere imbi mbyee rihongo okuza komakonḓononeno we wOmbeibela. Posi yokutja ya ri ouzeu kuye okuyakura imbi Ombeibela mbi i honga ohunga nokuhungira ku novaṱi. (Deut. 18:10-12) Kouṱiṱiṱiṱi eye wa yandjera Mukuru okurundurura omeripura we. Korusenina, eye wa isa okurira onganga yomiti nandarire kutja iho tja ri otjiungura tjaa ungura atji erike. Raphalalani nai ngu nozombura 60 wa tja: “Ami tjiri mbi nondangi kOvahongonone va Jehova mbe ndji vatera moviṋa ovingi na wina okundjivatera okumuna oviungura. Nu tjinenenene ami mbi nondangi ku Jehova ngwe ndji vatera okukohorora ehupo randje, kunao ami mbi yenena okukara norupa motjiungura tjokuzuvarisa otja umwe wOvahongonone va Jehova.”

20. Ove we rimanene okutjita tjike?

²⁰ Morupa ndwi twe rihongo oviyandjewa vine mbi tu hamunu. Nu ihi otjinenenene poviyandjewa avihe mbi okukara noupanga ouwa kuna Jehova. Iho tji tjita kutja tu mune ouwa okuza koviyandjewa vyarwe mbi, okukumba ku Jehova, ombatero yombepo ondjapuke nokumuna ombatero keyuru motjiungura tjetu tjokuzuvarisa. Ngatu kayende komurungu okuraisa ondangi yetu koviyandjewa avihe mbi. Nu atu isa okutja okuhepa ku Jehova okurira epanga roposengo.