1. Anni i kinagi ni Jesus meyannung ta nelangitan ira nga minas?

I KAPIANAN ira nga minas ay ari masingan. Ta Sermon ni Jesus ta Vukig, kinagina i meyannung ta nelangitan ira nga minas nga kuruga mas mangina anne ta material ira nga pakkukua. Niyammunna paga yaw nga kinakurug: “Nu sitaw i dian na kukuam ira, tari gapa i dian na nono mu.” (Mat. 6:19-21) Maruddu nga agga-nono tam i gannug ira nga tagibalorattam. Yatutta, makkaraga ittam nga apan danatun. Makonnug ittam tu ‘kukua ira nga masserbi ta langi’ gukaban na kapeggan tu makasta nga ngagan onu sinaddag ta Dios. Danatun nga minas ay ari vuluvuga madaral onu makoko kagitta na kinagi ni Jesus.

2. (a) Segun ta kinagi ni Pablo ta 2 Corinto 4:17, 18, sitaw ittam nakuan nakafokus? (b) Anni i gigiammuattam taw nga artikulo?

² Pagaramman ittam ni apostol Pablo nga ‘kanayun nga pakataddayattam nga nonopan i gannug ira nga ari masingan.’ (Bibbigan i 2 Corinto 4:17, 18.) Mebilang nga minas danaw nga ari nga masingan nga gannug. Nelagum taw i bendision ira nga maekspiriensa tam noka ta napabagu nga mundo na Dios. Taw nga artikulo, gigiammuattam i appa nga ari masingan nga minas nga pakabenefisiowattam ta maddaggun​—i pakikkofun ta Dios, regalu nga pakimallo, uffun na masanto nga espiritu na Dios, anna i suporta nga malawa tam kani Jehova, kani Jesus, anna ta anghel ira ta ministerio tam. Ikonsidera tam paga nu kunnasi tam mepasingan i appresasiottam taw ira nga ari masingan nga minas.

3. Ta appa nga ari masingan nga minas, anni i kapianan, anna kunnasi nga posible nga mala tam yatun?

³ Ta appa nga ari masingan nga minas, i pakikkofun kani  Jehova nga Dios i kapianan. (Sal. 25:14) Posible kari nga makikkofun i masanto nga Dios ta minattagaruli nga totolay? Wan. Megafu yatun ta sakrifisio nga tavvu ni Jesus nga “mamakoma ta katagarulian na mundo.” (Juan 1:29) Nige paga natay ni Jesus, ammu ngana ni Jehova nga mattalupaddian nga matalo si Jesus adde ta patena tapenu mapaliagna i totolay. Yatutta posible gafu nga mabbalin tu kokkofun na Dios danuri nattolay nige nga natay i Cristo.​—Roma 3:25.

4. Mangiyawa tu angngarigan na lallaki nga nattolay nige ni Jesus nga nabbalin tu kokkofun na Dios.

⁴ Egga ira i lallaki nga nattolay nige ni Jesus nga nabbalin tu kokkofun na Dios. Angngariganna, nangipasingan si Abraham tu matuyag nga pangurug. Maturu tu marivu dagun kabalin na patena, inagalan yayya ni Jehova nga “i kofukku.” (Isa. 41:8) Kayà gafu kagian naw nga maski nu matay i totolay, imammatan lagapa ira ni Jehova nga madukko nga kofunna. Matolay ta pagimamma ni Jehova si Abraham. (Luc. 20:37, 38) Si Job paga i tadday tatun. Turi ta naggarammammung i ngamin nga anghel ta langi, makasta i kinagi ni Jehova meyannung kani Job. Inagalan yayya ni Jehova nga ‘matunung nga tolay, maganassing ta Dios anna arayyuanna i marake.’ (Job 1:6-8) Anni gapa i matageno ni Jehova meyannung kani Daniel nga matalo nga nasserbi ta Dios ta ma-80 dagun ta nasion nu sitaw awan tu maddayaw kani Jehova? Egga ira i anghel nga namittallu nga nakkagi taw nga lakay nga “nabala-balor” yayya ta Dios. (Dan. 9:23; 10:11, 19) Makasiguradu ittam gafu nga iinnaggan ni Jehova i tiempo sonu paginnolayanna i meddu nga kokkofunna nga natay.​—Job 14:15.

5. Anni i kawagan tapenu mapeggan tu madukko nga pakikkofun kani Jehova?

⁵ Ta maddaggun, minillion nga totolay i madukko nga kokkofun ni Jehova. Ammu tam yaw megafu ta aru nga lallaki, babbay, anna abbarabbing ta interu mundo i mamakurug gukaban na konduktada nga kayàda i mabbalin tu kokkofun ni Jehova. Segun ta Proverbio 3:32, ‘madukko i pakikkofun ni Jehova ta matunung ira.’ Posible yaw nga pakikkofun megafu ta mangurug ira ta sakrifisio nga tavvu ni Jesus. Megafu ta tavvu, awayya tam mabbalin tu kokkofun ni Jehova anna mededika tam i inango tam nisa anna mabawtisowan. Nu kuattam danaw nga importante ira nga dakkua, melagum ittam ta minillion nga dedikadu anna bawtisadu nga Cristiano nga egga i ‘madukko nga pakikkofudda’ ta kadakallan nga Persona ta interu uniberso!

6. Kunnasi tam mepasingan i appresasiottam ta pakikkofun ta Dios?

⁶ Kunnasi tam gafu mepasingan nga appresiattam i pakikkofun ta Dios? Kagitta da Abraham anni Job nga nattalupaddian nga matalo ta Dios ta maturu magatu nga dagun, mawag tu mattalupaddian ittam gapa nga matalo maski nu kunnasi ittam ngana kabayag nga massesserbi kani Jehova. Kagitta ni Daniel, mawag tu mas nga tagibalorattam i pakikkofuttam ta Dios anne ta inango tam. (Dan. 6:7, 10, 16, 22) Gukaban na uffun ni Jehova, maattammattam i maski anni nga kapurueba nga meparubang ta nittam yayya nga kanayun ittam nga mabbalin tu kofun ni Jehova.​—Fil. 4:13.

7. (a) Segun ta Proverbio 15:8, anni i matageno ni Jehova ta pakimallo tam ira? (b) Kunnasi nga tabbagan ni Jehova i pakimallo tam ira?

⁷ I tadday paga nga ari nga masingan nga minas ay pakimallo. Kakayà na madukko nga makkorofun nga ikagi i nononopan anna mataga-tagenoda ta kataggi-tadday. Kunnatun kari gapa i pakikkofuttam kani Jehova? Wan! Ikagi ni Jehova nittam i nononopan anna  mataga-tagenona gukaban na Uvovugna. Mekagi tam gapa i nononopan anna mataga-tageno tam ta nisa gukaban na pakimallo. Kakayà ni Jehova nga ginnan i pakimallo tam ira. (Bibbigan i Proverbio 15:8.) Si Jehova ay meddu nga Kofuttam yatutta ari na laman nga gigginnan i pakimallo tam, nu ari, tabbaganna paga. Nu mittan, insigida nga tabbaganna i pakimallo tam. Nu mittan gapa, mawag tu itulu-tuloy tam paga nga ipakimallo i tadday nga gannug. Ngem makasiguradu ittam nga duttal i tabbag ta mepangngo nga tiempo anna ta kapianan. Siempre, baka neruma ta ekspektattam i tabbag na Dios. Angngariganna, imbes nga alsanna i tadday nga kapurueba, baka iddanna laman ittam tu sirib anna sikan tapenu ‘makapagattam.’​—1 Cor. 10:13.

8. Kunnasi tam mepasingan i appresasiottam ta regalu nga pakimallo?

⁸ Kunnasi tam mepasingan nga appresiattam yaw nga nabala-balor nga regalu nga pakimallo? Tadday ay gukaban na panuttul ta kagian ni Jehova nga ‘maddasal ittam ta ngamin nga tiempo.’ (1 Tes. 5:17) Ari ittam fuersan ni Jehova nga makimallo. Irespetona lallagu i lallaguretam anna pagarammanna ittam nga ‘maddasal kanayun.’ (Roma 12:12, NW ) Yatutta mepasingattam i appresasiottam gukaban na pappakimallo ta maski anni nga oras ta interu nga aggaw. Siempre nu makimallo ittam kani Jehova, ariattam kattaman nga mappabalo anna idayaw yayya.​—Sal. 145:2, 3.

9. Anni i kinagi na tadday nga brother meyannung ta pakimallo, anna anni gapa i makagim tatun?

⁹ Durante nga mas mabayag nga masserbi ittam kani Jehova anna masingan nu kunnasi nga tattabbaganna i pakimallo tam ira, mas maponag nakuan i appresasiottam ta pakimallo. Kunnaw i ekspiriensa na wagi nga si Chris nga 47 dagun ngana ta ngamin-tiempo nga serbisiu. “Kakayà ku i malukag ta kada umma tapenu makimallo kani Jehova,” kunna. “Anni na kastana nga makibbida kani Jehova ta pallattuag paga laman na bilag anna kakkasta i pallevu! Megafu tatun, mapaguyu ngà nga mappabalo ta ngamin nga regaluna, nelavu ngana i pribilehio nga pakimallo. Ta gabi kabalikku nga makimallo, memammo ngà nga makkatrug megafu ta marenu i konsensià.”

10. Ngatta tagibalorattam nakuan i masanto nga espiritu na Dios?

¹⁰ I tadday paga nga ari masingan nga regalu nga mawag tu tagibalorattam ay i masanto nga espiritu na Dios. Pagaramman ittam ni Jesus nga ariattam immangan nga makkiddaw tu masanto nga espiritu. (Luc. 11:9, 13) Gukaban na espiritu ni Jehova, iddanna ittam tu “ari nga maguku-gukug nga pakapangngua.” (2 Cor. 4:7; King. 1:8) Ta uffun na espiritu na Dios, maattammattam i maski anni nga kapurueba nga ara-arubangattam.

11. Anni ira i meyuffun na masanto nga espiritu nittam?

¹¹ Mapakasta na espiritu na Dios i talento anna abilidad tam ira tapenu metuppal i annungattam ira ta passerbi ta Dios. Megafu paga tatun, metuppal tam i responsibilidad tam ira bilang Cristiano. Ammu tam nga posible laman nga makasta i resulta ira na passerbi tam ta Dios megafu ta uuffunan ittam na espirituna.

12. Segun ta Salmo 139:23, 24, anni i makua tam nu ipakimallo tam i uffun na masanto nga espiritu?

¹² Mepasingattam gapa nga tagibalorattam i masanto nga espiritu na Dios nu ipakimallo tam nga uffunan ittam natun nga masingan i anni laman nga marake nga appana-panono onu pakkaraga ta futu tam. (Bibbigan i Salmo 139:23, 24.) Nu ipakimallo tam yatun, usan ni Jehova i espirituna tapenu makannammuattam i marake nga appana-panono onu pakkaraga. Oras tu mammuattam yatun, mawag tu ipakimallo tam nga iddan ittam na espiritu na Dios tu sikan tapenu labanan danatun nga appana-panono onu pakkaraga. Nu kuattam yatun, mepasingattam nga determinadu ittam nga ibita i maski anni nga mamagimmang kani Jehova nga uffunan ittam gukaban na masanto nga espirituna.​—Efe. 4:30.

13. Kunnasi nga mas dumakal i appresasiottam ta masanto nga espiritu?

¹³ Mas dumakal i appresasiottam ta masanto nga espiritu nu nononopattam nu anni i ituttuppal natun ta kaggawattam. Nige nga nappalangi si Jesus, kinagina ta disipulosna: “Sangaw nu umay nikamu i Espiritu Santo, mapannuak-kamu ta pakapangngua. Ay sikamu i mamakurug niakan . . . adde ta ngamin nga tuppu-tuppag na davvun.” (King. 1:8) Yatun mismu i mesissimmu ta maddaggun. Ta  uffun na masanto nga espiritu, maturu tu 8.6 million ngana i maddayarayaw kani Jehova nga naggafu ta interu mundo. Memammo gapa i pattaraddetam bilang mawwaragi megafu ta uuffunan ittam na espiritu na Dios nga makultiba i makkarasta ira nga kualidad gitta na aya, pagayayya, imammo, pappasensia, kinasippo, kinapia, pangurug, kinalumamo, anna pangifugag ta baggi. Danaw nga kualidad i mabbuu ta “vunga na Espiritu.” (Gal. 5:22, 23) Kuruga nabala-balor nga regalu i masanto nga espiritu!

14. Anni i ari masingan nga suporta nga egga nittam kada mallayyagayya ittam?

¹⁴ Tadday paga ta ari masingan nga minas tam ay i ‘makkaravvulu nga pakipattrabahu’ kani Jehova, kani Jesus, anna ta anghel ira. (2 Cor. 6:1) Makipattrabahu ittam nira kada egga ittam ta ministerio. Kunnaw i kagian ni Pablo meyannung ta baggina kunne na gapa turi ira ta kavuluna taw nga trabahu: “Katrabahu ittam na Dios.” (1 Cor. 3:9, NW ) Nu makipartisipa ittam ta ministerio, katrabahu ittam gapa ni Jesus. Daddamman nga kabalin nga nibilin ni Jesus ta taga-tuttulna ira nga ‘mangngua ira tu disipulos maggafu ta totolay na ngamin nga nasion,’ kinagina gapa: “Kanayuddà noka nga kavulu.” (Mat. 28:19, 20, NW ) Kunnasi gapa i anghel ira? Talaga mappabalo ittam nga igiggiyada ittam kada ikagi tam i “mannanayun nga evanghelio . . . ta ngamin nga totolay ta utun na davvun”!​—Nep. 14:6.

15. Mangistoria tu angngarigan ta Biblia nga mangipasingan ta importante nga papel ni Jehova ta ministerio tam.

¹⁵ Anni i metuttuppal megafu ta suporta ni Jehova, ni Jesus, anna na anghel ira? Durante nga imula tam i mensahe na Pappatulan, egga ira i vukal nga manavu ta mapia ira nga davvun. (Mat. 13:18, 23) Sinni i mamattalovu anna mamavvunga tatun ira nga vukal na kinakurug? Ipakanawag ni Jesus nga awan tu tolay nga mabbalin tu disipulona “nu ari nga ipamavulun na Yama.” (Juan 6:44) Mabibbig ta Biblia i espesipiko nga angngarigan naw. Daddamman turi ta nilayyagayyan ni Pablo i tadday nga grupo na babbay ta lawan na siudad na Filipos. Kunnaw i kagian na Biblia meyannung ta tadday nira nga si Lydia: “Sinuluan na Yafu i nono na nga mangalippawa ta inuvovug ni Pablo.” (King. 16:13-15) Kagitta ni Lydia, minillion paga i iyaranni ni Jehova.

16. Nu makasta i resulta ira na ministerio tam, sinni nakuan i medayaw?

¹⁶ Nu makasta ira i resulta na ministerio tam, sinni nakuan i medayaw? Sinabbag ni Pablo yatun nga pakkiavu turi ta niturana yaw ta kongregasion ta Corinto: “Sakan i nammula, si Apolos i nabbaya, ngem i Dios i mamadakal ta mula. Ari tu i mammula onu i mabbaya i importante nu ari i Dios nga mamadakal ta mula.” (1 Cor. 3:6, 7) Kagitta ni Pablo, kanayun nakuan nga iyawa tam kani Jehova i dayaw megafu ta makasta ira nga resulta na ministerio tam.

17. Kunnasi tam mepasingan nga appresiattam i ‘makkaravvulu nga pakipattrabahu’ ta Dios, kani Cristo, anna ta anghel ira?

¹⁷ Kunnasi tam mepasingan nga appresiattam i pribilehio nga ‘makkaravvulu nga pakipattrabahu’ ta Dios, kani Cristo, anna ta anghel ira? Makua tam yatun nu matalikarag tam nga alegan i oportunidad ira nga ilayyagayya i mapia nga dumug ta tanakuan. Aru i makua tam tapenu metuppal yaw gitta na pallayyagayya ta publiko anna ta babalay. (King. 20:20) Aru gapa i magayayya ta informal nga pallayyagayya. Nu egga i masimmuadda, masippo nga maddios ira nisa anna puruebadda nga igafu i paguvovug. Nu kayà na tolay i makiyuvovug,  mataktika nga italludda i mensahe na Pappatulan.

18-19. (a) Kunnasi tam bayatan i vukal ira na kinakurug? (b) Mangistoria tu ekspiriensa nga mangipasingan nu kunnasi inuffunan ni Jehova i tadday nga maggigiammu tu Biblia.

¹⁸ “Katrabahu ittam na Dios” yatutta ari ittam laman nakuan nga mangimula tu vukal ira na kinakurug, nu ari, bayatattam gapa danatun. Nu interesadu i tadday nga tolay, kuattam nakuan i adde na mawayya tam tapenu massinoli onu iyunnug nga egga i tanakuan nga mabbisita tatun nga tolay tapenu igafu i paggigiammu tu Biblia. Magayayya ittam durante nga masingi-singattam nga uuffunan ni Jehova i estudiante ta Biblia tapenu ulian i appana-panono anna mataga-tagenona.

¹⁹ Egga i tadday nga albulariu nga taga-South Africa nga mangngagan tu Raphalalani. Kakayàna i magigiammuna ta Biblia. Ngem narigatan yayya nga akseptan i kagian na Biblia meyannung ta pakikomunika ta natay ira nga ginafuan. (Deut. 18:10-12) Sisinu nga nipamavulunna nga moldeyan na Dios i appana-panonona adde ta niyemmanna ngana i pabbalin tu albulariu maski nu yatun laman i pagaleganna. Kunnaw i kagian ni Raphalalani nga 60-anios ngana: “Daka-dakal i appabalo ku ta Saksi ira ni Jehova gafu ta napakaru i neyuffudda nio, gitta na panguffudda niakan nga magaleg tu trabahu. Mas dakal gapa i appabalo ku kani Jehova gafu ta inuffunannà nga ulian i pattolè. Sangawe, makipartisipa ngà ngana ta ministerio bilang tadday ta bawtisadu nga Saksina.”

20. Anni i determinasiommu?

²⁰ Taw nga artikulo, ginigiammu tam i appa nga ari masingan nga minas. I kapianan ta ngamin ay i pribilehio tam nga mabbalin tu kadukkotan nga Kofun si Jehova. Megafu tatun, mabbenefisio ittam ta tanakuan paga ira nga ari masingan nga minas​—i pakimallo, uffun na masanto nga espirituna, anna i nelangitan nga suporta ta ministerio tam. Determinadu ittam nakuan nga ponaggan i appresasiottam taw ira nga ari masingan nga minas anna ariattam vuluvuga magimmang nga mappabalo kani Jehova megafu ta yayya i kapianan nga Kofuttam.