1. Jesu ooigire atĩa igũrũ rĩgiĩ mĩthithũ ya kũrĩa igũrũ?

TI IHEO ciothe cionekaga na maitho. Ũrĩa kũrĩ nĩ atĩ, iheo iria cia bata mũno itionekaga na maitho. Thĩinĩ wa Mahunjio ma Jesu ma Kĩrĩma-inĩ nĩ aagwetire atĩ mĩthithũ ya kũrĩa igũrũ nĩ ya bata mũno gũkĩra ũtonga. Aacokire akiuga ũũ: “Harĩa mũthithũ waku ũrĩ, hau nĩho ngoro yaku o nayo ĩrĩkoragwo.” (Mat. 6:​19-21) Ngoro citũ itũtindĩkaga gũthingata maũndũ marĩa tuonaga marĩ ma bata. Twĩigagĩra “mĩthithũ kũrĩa igũrũ” na njĩra ya kwĩgĩĩra rĩĩtwa rĩega kana mũrũgamo mwega hamwe na Ngai. Jesu aataarĩirie atĩ mĩthithũ ta ĩyo ndĩngĩanangwo kana ĩiywo.

2. (a) Kũringana na 2 Akorintho 4:​17, 18, Paulo atwĩkĩraga ngoro tũige meciria harĩ maũndũ marĩkũ? (b) Tũkwarĩrĩria maũndũ marĩkũ gĩcunjĩ-inĩ gĩkĩ?

² Mũtũmwo Paulo atwĩkĩraga ngoro ‘tũige maitho maitũ harĩ maũndũ marĩa matonekaga.’ (Thoma 2 Akorintho 4:​17, 18.) Maũndũ macio matonekaga na maitho nĩ hamwe na irathimo iria tũgakenera thĩinĩ wa thĩ njerũ ya Ngai. Gĩcunjĩ-inĩ gĩkĩ tũgũthuthuria maũndũ mana matonekaga na maitho tũgunĩkaga namo mahinda-inĩ maya, nĩmo ũrata hamwe na Ngai, kĩheo kĩa mahoya, ũteithio wa roho mũtheru wa Ngai, na ũteithio ũrĩa twamũkagĩra kuuma igũrũ tũrĩ ũtungata-inĩ. Ningĩ nĩ tũkuona ũrĩa tũngĩonania ngatho citũ nĩ ũndũ wa iheo icio itonekaga na maitho.

3. Nĩ kĩheo kĩrĩkũ kĩnene makĩria gĩtonekaga na maitho? Na nĩ kĩĩ gĩtũhotithagia gũkorũo na kĩheo kĩu?

³ Kĩheo kĩrĩa kĩnene makĩria gĩtonekaga na maitho nĩ ũrata hamwe na Jehova Ngai. (Thab. 25:14) Kũngĩhoteka atĩa Ngai  agĩe ũrata na andũ ehia na athiĩ na mbere gũkorũo arĩ mũtheru? No kũhoteke tondũ igongona rĩa ũkũũri rĩa Jesu nĩ ‘rĩeheragia mehia ma kĩrĩndĩ gĩa gũkũ thĩ.’ (Joh. 1:29) Jehova nĩ aamenyaga kuuma o mbere atĩ muoroto wake wa kũheana Mũhonokia wa gũkũũra andũ nĩ ũngĩahingire. Na nĩkĩo Ngai nĩ aahotaga kũgĩa na ũrata na andũ arĩa maatũũraga mbere ya Kristo gũkua.​—⁠Rom. 3:25.

4. Heana ngerekano cia andũ amwe maatuĩkire arata a Ngai arĩa maatũũraga mbere ya Kristo.

⁴ Ta wĩcirie andũ amwe maatuĩkire arata a Ngai arĩa maatũũraga mbere ya Kristo. Iburahimu nĩ oonanirie wĩtĩkio mũnene. Makĩria ma mĩaka 1,000 thutha wa Iburahimu gũkua, Jehova aamwĩtire “mũrata wakwa.” (Isa. 41:⁠8) Kwoguo, o na gĩkuũ gĩtingĩtigithũkania Jehova na arata ake a hakuhĩ. Kwoguo maitho-inĩ ma Jehova Iburahimu arĩ o muoyo. (Luk. 20:​37, 38) Ngerekano ĩngĩ nĩ ya Ayubu. Rĩrĩa araika othe maagomanĩte kũrĩa igũrũ, Jehova nĩ aaririe arĩ na ũũma igũrũ rĩgiĩ Ayubu. Jehova ooigire aarĩ “mũrũngĩrĩru na mwĩkindĩru, mũndũ wĩtigĩrĩte Ngai na wĩthemaga maũndũ marĩa moru.” (Ayub. 1:​6-8) Ningĩ Jehova aaiguaga atĩa igũrũ rĩgiĩ Danieli ũrĩa wamũtungatĩire kĩndũ mĩaka 80 arĩ mwĩhokeku bũrũri-inĩ wa andũ mataathathayagia Jehova? Araika meerire mũthuri ũcio mũkũrũ maita matatũ atĩ aarĩ “mũndũ wendetwo mũno” nĩ Ngai. (Dan. 9:23; 10:​11, 19) No tũkorũo na ma atĩ Jehova nĩ eriragĩria mũno mũthenya ũrĩa akaariũkia arata ake arĩa makuĩte.​—⁠Ayub. 14:15.

5. Nĩ ũndũ ũrĩkũ ũbataranagia nĩguo mũndũ akorũo na ũrata wa hakuhĩ hamwe na Jehova?

⁵ Nĩ andũ aigana matarĩ akinyanĩru mahinda-inĩ maya makoragwo na ũrata wa hakuhĩ hamwe na Jehova? Nĩ andũ milioni nyingĩ. Tũmenyaga ũguo tondũ athuri, atumia, na ciana nyingĩ thĩinĩ wa thĩ yothe nĩ maronania kũgerera mĩthiĩre yao atĩ nĩ marenda gũtuĩka arata a Ngai. Jehova “agĩaga ũrata wa hakuhĩ na arĩa arũngĩrĩru.” (Thim. 3:32) Mahotaga gũkorũo na ũrata ta ũcio tondũ nĩ makoragwo na wĩtĩkio harĩ igongona rĩa ũkũũri rĩa Jesu. Nĩ ũndũ wa igongona rĩu, Jehova nĩ atwĩtĩkagĩria tũmwĩyamũrĩre na tũbatithio. Rĩrĩa tuoya makinya macio ma bata, nĩ tũingĩraga gĩkundi-inĩ kĩa Akristiano milioni nyingĩ meyamũrĩire Jehova na makabatithio, arĩa makenagĩra “ũrata wa hakuhĩ” hamwe na Jehova, Mũnene wa igũrũ na thĩ!

6. Tũngĩonania atĩa ngatho nĩ ũndũ wa ũrata witũ hamwe na Ngai?

⁶ Tũngĩonania atĩa atĩ nĩ tuonaga ũrata witũ hamwe na Ngai ũrĩ kĩndũ kĩa bata? O ta Iburahimu na Ayubu, arĩa maatũũrire marĩ ehokeku harĩ Ngai makĩria ma mĩaka igana rĩmwe, o na ithuĩ no mũhaka tũtũũre tũrĩ ehokeku o na angĩkorũo tũtungatĩire Jehova ihinda rĩigana atĩa thĩinĩ wa mũtabarĩre ũyũ mũũru. O ta Danieli, no mũhaka tuonage ũrata witũ hamwe na Ngai ũrĩ kĩndũ kĩa bata gũkĩra muoyo witũ. (Dan. 6:​7, 10, 16, 22) Tũgĩteithio nĩ Jehova, no tũhote gũkirĩrĩria igerio o rĩothe tũngĩcemania narĩo na tũhote gũtũũria ũrata wa hakuhĩ hamwe nake.​—⁠Afil. 4:13.

7. (a) Kũringana na Thimo 15:​8, Jehova aiguaga atĩa igũrũ rĩgiĩ mahoya maitũ? (b) Jehova acokagia mahoya maitũ atĩa?

⁷ Kĩheo kĩngĩ gĩtonekaga na maitho nĩ kĩa mahoya. Arata a hakuhĩ nĩ makenaga kwaria maũndũ marĩa mareciria na ũrĩa maraigua. Hihi ũguo nĩguo kũrĩ harĩ ũrata witũ hamwe na Jehova? Ĩĩ! Jehova aragia na ithuĩ kũgerera Kiugo gĩake, na thĩinĩ wakĩo nĩ atwĩrĩte ũhoro wĩgiĩ meciria make na ũrĩa aiguaga. Na ithuĩ twaragia nake kũgerera mahoya, na no tũmwĩre meciria maitũ ma thĩinĩ biũ na ũrĩa tũiguaga ngoro-inĩ. Jehova nĩ akenaga gũthikĩrĩria mahoya maitũ. (Thoma Thimo 15:⁠8.) Arĩ Mũrata  witũ ũtwendete, Jehova to gũthikĩrĩria athikagĩrĩria mahoya maitũ no nginya nĩ acokagia. Rĩmwe na rĩmwe no acokie mahoya maitũ o na ihenya. Na mahinda mangĩ no tũbatare kũhoya maita maigana ũna nĩ ũndũ wa ũndũ mũna. Ĩndĩ no tũkorũo na ma atĩ nĩ arĩcokagia ihinda rĩrĩa rĩagĩrĩire na njĩra ĩrĩa njega biũ. Ũrĩa kũrĩ nĩ atĩ, Jehova no acokie mahoya maitũ na njĩra ĩrĩa tũtarerĩgagĩrĩra. Kwa ngerekano, no age gũtwehereria igerio, ĩndĩ atũhe ũũgĩ na hinya wa “kũrĩkirĩrĩria.”​—⁠1 Kor. 10:⁠13.

8. Tũngĩonania ngatho citũ atĩa nĩ ũndũ wa kĩheo kĩa mahoya?

⁸ Tũngĩonania ngatho citũ atĩa nĩ ũndũ wa kĩheo kĩu kĩa bata kĩa mahoya? Njĩra ĩmwe nĩ gwathĩkĩra ũtaaro wa Jehova wa ‘kũhoyaga hingo ciothe.’ (1 Thes. 5:17) Jehova ndatũtindĩkagĩrĩria tũmũhoe. Handũ ha ũguo, nĩ atĩĩte wĩyathi witũ wa gwĩthuurĩra na atwĩkĩraga ngoro ‘tũhoyage tũtegũtigithĩria.’ (Rom. 12:12) Kwoguo no tuonanie ngatho citũ na njĩra ya kũhoyaga kaingĩ o mũthenya. Ningĩ nĩ twagĩrĩirũo kũririkanaga gũcokia ngatho na kũgooca Jehova mahoya-inĩ maitũ.​—⁠Thab. 145:​2, 3.

9. Mũrũ wa Ithe witũ ũmwe aiguaga atĩa igũrũ rĩgiĩ mahoya? Na hihi wee ũiguaga atĩa nĩ ũndũ wamo?

⁹ O ũrĩa tũgũthiĩ na mbere gũtungatĩra Jehova na tuone agĩcokia mahoya maitũ, noguo ngatho citũ nĩ ũndũ wa mahoya ciagĩrĩirũo kuongerereka. Kwa ngerekano, ta wĩcirie ũhoro wa mũrũ wa Ithe witũ ũmwe wĩtagwo Chris ũrĩa ũkoretwo ũtungata-inĩ wa mahinda mothe mĩaka 47. Ooigire ũũ: “Nĩ ngenaga mũno gũkĩra rũcinĩ tene nĩguo hoe Jehova. Nĩ ũndũ wa gũcanjamũra kwaria na Jehova rĩrĩa riũa rĩraratha rĩgatũma kũndũ guothe gũkenge! Ũndũ ũcio nĩ ũtũmaga ndĩmũcokerie ngatho nĩ ũndũ wa iheo iria ciothe aheete, nginya mweke wa mahoya. Na rĩrĩa ndamũhoya ngĩthiĩ toro, nĩ ngenaga gũkoma ndĩ na thamiri theru.”

10. Twagĩrĩirũo kuona roho mũtheru wa Ngai ũrĩ kĩheo gĩa bata nĩkĩ?

¹⁰ Roho mũtheru wa Ngai nĩ kĩheo kĩngĩ gĩtonekaga na maitho twagĩrĩirũo kuona kĩrĩ gĩa bata. Jesu aatwĩkĩrire ngoro tũthiĩ na mbere kũhoya tũheo roho mũtheru. (Luk. 11:​9, 13)  Kũgerera roho wake mũtheru, Jehova nĩ atũheaga “hinya ũrĩa ũkĩrĩte wa ndũire.” (2 Kor. 4:7; Atũm. 1:⁠8) Tũgĩteithio nĩ roho mũtheru wa Ngai, no tũhote gũkirĩrĩria igerio o rĩothe tũngĩcemania narĩo.

11. Roho mũtheru ũtũteithagia na njĩra ĩrĩkũ?

¹¹ Roho mũtheru no ũtũteithie kũhingia maũndũ marĩa twĩhokeirũo ũtungata-inĩ wa Jehova. Roho mũtheru no ũtũteithie kwagagĩria ũhoti ũrĩa tũrĩ naguo. Nĩ ũtũteithagia kũhingia maũndũ marĩa Mũkristiano akoragwo ehokeirũo. Nĩ tũĩ atĩ moimĩrĩro mega marĩa tũgĩaga namo ũtungata-inĩ wa Jehova, mahotekaga tu nĩ ũndũ wa ũteithio wa roho mũtheru wa Ngai.

12. Kũringana na Thaburi 139:​23, 24, tũngĩhoya roho mũtheru ũtũteithie gwĩka atĩa?

¹² Njĩra ĩngĩ tũngĩonania nayo atĩ nĩ tuonaga roho mũtheru ũrĩ kĩndũ kĩa bata nĩ kũhoya Jehova atũhe roho ũcio nĩguo ũtũteithie kũmenya kana tũrĩ na meciria kana merirĩria matarĩ mega ngoro-inĩ citũ. (Thoma Thaburi 139:​23, 24.) Tũngĩhoya Jehova atũteithie na njĩra ĩyo, no atũteithie kũgerera roho wake kũmenya mwĩcirĩrie kana mĩerekera mĩũru tũngĩkorũo nayo. Na twamenya mwĩcirĩrie kana merirĩria moru marĩa tũrĩ namo, twagĩrĩirũo kũhoya tũheo roho mũtheru ũtũhe hinya wa kũregana na maũndũ macio. Tũngĩka ũguo, no tuonanie atĩ nĩ tũtuĩte itua rĩa gwĩthema ũndũ o wothe ũngĩtũma Jehova age gũtũhe roho wake mũtheru.​—⁠Ef. 4:⁠30.

13. Tũngĩongerera atĩa ngatho citũ nĩ ũndũ wa roho mũtheru?

¹³ No tuongerere ngatho citũ nĩ ũndũ wa roho mũtheru na njĩra ya gwĩcũrania maũndũ marĩa roho ũcio ũhingĩtie mahinda-inĩ maya. Jesu atanathiĩ igũrũ eerire arutwo ake ũũ: “Nĩ mũkaamũkĩra hinya rĩrĩa roho mũtheru ũgooka igũrũ rĩanyu, na nĩ mũgaatuĩka aira akwa . . . o nginya ituri ciothe cia thĩ.” (Atũm. 1:⁠8) Ciugo icio nĩ irahinga na njĩra ya magegania. Kũgerera ũteithio wa roho mũtheru, nĩ kũgĩte na athathaiya a Jehova ta milioni inyanya na nuthu thĩinĩ wa thĩ yothe. Ningĩ nĩ tũkenagĩra gũkorũo na paradiso ya kĩĩroho tondũ roho mũtheru wa Ngai nĩ ũtũteithagia gũkũria ngumo njega ta wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria.  Ngumo icio ikoragwo irĩ “maciaro ma roho.” (Gal. 5:​22, 23) Hatarĩ nganja, roho mũtheru nĩ kĩheo gĩa bata mũno!

14. Nĩ ũteithio ũrĩkũ ũtonekaga na maitho twamũkagĩra rĩrĩa tũrĩ ũtungata-inĩ?

¹⁴ Nĩ tũkoragwo na kĩheo gĩtonekaga na maitho gĩa ‘kũrutithania wĩra’ hamwe na Jehova na gĩcunjĩ gĩa kũrĩa igũrũ gĩa ithondeka rĩake. (2 Kor. 6:⁠1) Twĩkaga ũguo rĩrĩa rĩothe twanyitanĩra wĩra-inĩ wa gũtua andũ arutwo. Paulo ooigire ũũ igũrũ rĩgiĩ we mwene na arĩa marutaga wĩra ũcio: “Tũrĩ arutithania wĩra hamwe na Ngai.” (1 Kor. 3:9) Rĩrĩa twathiĩ ũtungata-inĩ, ningĩ nĩ tũkoragwo tũrĩ arutithania wĩra hamwe na Jesu. Ririkana atĩ thutha wa Jesu kũhe arũmĩrĩri ake rĩathani rĩa ‘gũtua andũ arutwo kuuma ndũrĩrĩ-inĩ ciothe,’ aamerire ũũ: “Nĩ ndĩkoragwo hamwe na inyuĩ.” (Mat. 28:​19, 20) Ĩ nao araika? Na githĩ ti kĩrathimo kĩnene gũtongorio nĩ araika rĩrĩa tũrahunjia “ũhoro mwega wa tene na tene [kũrĩ] andũ arĩa maikaraga thĩinĩ wa thĩ”?​—⁠Kũg. 14:6.

15. Heana ngerekano ya Bibilia ĩronania itemi rĩa bata rĩrĩa Jehova ahingagia ũtungata-inĩ witũ.

¹⁵ Ũteithio ũcio twamũkagĩra kuuma igũrũ ũtũteithagia kũhingia maũndũ marĩkũ? Rĩrĩa tũrahura mbeũ cia ndũmĩrĩri ya Ũthamaki, imwe nĩ igũaga ngoro-inĩ njega na igakũra. (Mat. 13:​18, 23) Nũũ ũtũmaga mbeũ icio cia ũhoro wa ma ikũre na igĩe na maciaro? Jesu ooigire atĩ gũtirĩ mũndũ ũngĩtuĩka mũrũmĩrĩri wake “atagucĩrĩirio nĩ Awa.” (Joh. 6:44) Bibilia nĩ ĩheanĩte ngerekano njega ĩgiĩ ũndũ ũcio. Ta ririkana hĩndĩ ĩrĩa Paulo aahunjĩirie gĩkundi gĩa atumia nja wa itũũra rĩa Filipi. Ta rora ũrĩa Bibilia yugĩte igũrũ rĩgiĩ mũtumia ũmwe wa acio wetagwo Lidia: “Jehova akĩhingũra ngoro yake biũ nĩguo athikĩrĩrie wega maũndũ marĩa Paulo ooigaga.” (Atũm. 16:​13-15) O ta Lidia, andũ milioni nyingĩ nĩ magucĩrĩirio nĩ Jehova.

16. Nũũ wagĩrĩirũo kũheo rũgooco nĩ ũndũ wa moimĩrĩro mega marĩa tũgĩaga namo ũtungata-inĩ?

¹⁶ Nũũ wagĩrĩirũo kwamũkĩra rũgooco nĩ ũndũ wa moimĩrĩro mega marĩa tũgĩaga namo ũtungata-inĩ? Paulo nĩ aacokirie kĩũria kĩu rĩrĩa aandĩkĩire kĩũngano gĩa Korintho ciugo ici: “Niĩ nĩ kũhanda ndahandire, Apolo agĩitĩrĩria maĩ, no Ngai nĩwe wakũragia, kwoguo-rĩ, ũrĩa ũhandaga tiwe wa bata, o na kana ũrĩa ũitagĩrĩria maĩ, no Ngai, ũrĩa ũkũragia nĩwe wa bata.” (1 Kor. 3:​6, 7) O ta Paulo, hĩndĩ ciothe twagĩrĩirũo kũhe Jehova rũgooco nĩ ũndũ wa moimĩrĩro mega marĩa tũgĩaga namo ũtungata-inĩ.

17. Tũngĩonania ngatho atĩa nĩ ũndũ wa mweke ũrĩa tũheetwo wa ‘kũrutithania wĩra’ hamwe na Ngai, Kristo, na araika?

¹⁷ Tũngĩonania ngatho atĩa nĩ ũndũ wa mweke ũrĩa tũheetwo wa ‘kũrutithania wĩra’ hamwe na Ngai, Kristo, na araika? Tũngĩka ũguo na njĩra ya kwĩrutanĩria ũrĩa wothe tũngĩhota gũcaria mĩeke ya kũhunjĩria andũ arĩa angĩ ũhoro ũrĩa mwega. Tũrĩ na njĩra nyingĩ cia gwĩka ũguo, ta kũhunjia “mũingĩ-inĩ na nyũmba kwa nyũmba.” (Atũm. 20:20) Ningĩ andũ aingĩ nĩ makenagĩra kũhunjia rĩrĩa marĩ maũndũ-inĩ mao ma o mũthenya. Rĩrĩa macemania na mũndũ nĩ mamũgeithagia na njĩra ya ũrata na makageria kwambĩrĩria ndeereti nake. Mũndũ ũcio angĩtĩkĩra kwaria nao, nĩ mahũthagĩra ũũgĩ kũmũhunjĩria ndũmĩrĩri ya Ũthamaki.

18-19. (a) Tũitagĩrĩria maĩ mbeũ cia ũhoro ũrĩa wa ma na njĩra ĩrĩkũ? (b) Taarĩria ũndũ wonetwo ũronania ũrĩa Jehova aateithirie mũrutwo ũmwe wa Bibilia.

¹⁸ Tondũ tũrĩ “arutithania wĩra hamwe na Ngai,” nĩ twagĩrĩirũo kũhanda mbeũ cia ũhoro wa ma na tũcitĩrĩrie maĩ. Rĩrĩa mũndũ onania nĩ arakenio nĩ ũhoro, nĩ twagĩrĩirũo kwĩrutanĩria kũmũcokera kana tũbange mũndũ ũngĩ amũcokere, nĩguo twambĩrĩrie kwĩruta Bibilia nake. O ũrĩa tũreruta nake Bibilia, nĩ tũkenaga kuona ũrĩa Jehova aramũteithia kũgarũrĩra mwĩcirĩrie wake.

 ¹⁹ Ta wĩcirie ngerekano ya Raphalalani, ũrĩa warĩ mũndũ mũgo bũrũri-inĩ wa South Africa. Nĩ eendire mũno maũndũ marĩa eerutaga Bibilia-inĩ. No nĩ aaritũhĩirũo mũno rĩrĩa aathomire ũrĩa Kiugo kĩa Ngai kiugĩte igũrũ rĩgiĩ kwaranĩria na andũ arĩa makuĩte. (Gũcok. 18:​10-12) O kahora nĩ eetĩkĩririe Ngai athondeke mwĩcirĩrie wake. Thutha wa ihinda nĩ aahotire gũtiga gũtuĩka mũndũ mũgo, o na gũtuĩka ũcio nĩguo wĩra ũrĩa wamũheaga mabataro. Raphalalani ũrĩa rĩu ũrĩ na mĩaka 60 ooigire ũũ: “Nĩ njokagĩria Aira a Jehova ngatho mũno nĩ ũndũ wa kũndeithia na njĩra nyingĩ, ta kũndeithia kuona wĩra. Makĩria ma ũndũ ũngĩ o wothe, nĩ njokagĩria Jehova ngatho nĩ kũndeithia kũgarũrĩra ũtũũro wakwa, nĩguo hote kũhunjĩria andũ arĩa angĩ ndĩ Mũira wake mũbatithie.”

20. Ũtuĩte itua rĩa gwĩka atĩa?

²⁰ Gĩcunjĩ-inĩ gĩkĩ nĩ twarĩrĩria iheo inya itonekaga na maitho. Na kĩrĩa kĩnene makĩria harĩ icio, nĩ Jehova gũkorũo arĩ Mũrata witũ wa hakuhĩ. Ũndũ ũcio nĩ ũtũteithagia kũgunĩka na iheo icio ingĩ ta mweke wa mahoya, gũteithio nĩ roho wake mũtheru, na kwamũkĩra ũteithio kuuma igũrũ tũrĩ ũtungata-inĩ. Rekei tũtue itua rĩa kuongerera ngatho citũ nĩ ũndũ wa iheo icio itonekaga na maitho. Na hĩndĩ ciothe tũgacokagĩria Jehova ngatho nĩ ũndũ wa gũkorũo arĩ Mũrata witũ wa hakuhĩ.