1. Иса дәрһәԛа хьзна әʹзмани чь гот?

ӘМ Нә һʹәму хьзна дькарьн бьвиньн. Бь рʹасти хьзнәкә һәрә ԛимәт найе дитьне. Иса чахе сәр чʹийе мәрьв һин дькьрьн, әԝи бәʹса хьзнед әʹзмани кьр, кӧ һьмбәри һәбука мәрьва, лапә ԛимәт ьн. Паше Иса гот: «Хьзна тә кʹидәре бә, дьле тә жи ԝе ль ԝе дәре бә» (Мәт. 6:19-21). Дьле мә ԝе мә бәрбь ван тьшта бькʹьшинә, кʹижан кӧ бона мә гәләк ԛимәт ьн. Әм хԝәрʹа «хьзне . . . ль әʹзмен» тʹоп дькьн, чахе бәр Хԝәде навәки баш ԛазанщ дькьн. Чаԝа кӧ Иса шьровәкьр, әв хьзнә тʹӧ щар нькарә хьраб бә у тʹӧ кәс нькарә бьдьзә.

2. а) Ль гора 2 Корьнтʹи 4:17, 18, Паԝлос мә бәрбь чь һелан дькә? б) Әме ве готареда дәрһәԛа чь шеԝьр кьн?

² Паԝлосе шанди һелане дьдә мә, ԝәки чʹәʹве хԝә сәр «тьштед . . . кӧ найен дитьн» хԝәй кьн. (Бьхунә 2 Корьнтʹи 4:17, 18.) Нава ԝан хьзнада йед кӧ найенә дитьне, әԝ кʹәрәм ьн жи, кʹижан кӧ әме дьнйа тʹәзәда бьстиньн. Ве готареда, әме шеԝьр кьн чар пʹешкʹеша, йед кӧ найенә дитьне ле әм ида ирода кʹаре ле дьстиньн. Әԝ пʹешкʹеш һәнә достийа тʹәви Хԝәде, дӧакьрьн, аликʹарийа рʹӧһʹе пироз, у пьштгьрийа Йаһоԝа, Иса у мәләка хьзмәтийа мәда. Әме ӧса жи пебьһʹәсьн кӧ ча рʹазибуна хԝә бона ван пʹешкʹеша бьдьнә кʹьфше.

3. Кʹижан ә пʹешкʹеша лапә ԛимәт кӧ найе дитьн, у әм ча дькарьн әве пʹешкʹеше бьстиньн?

³ Пʹешкʹеша лапә ԛимәт кӧ найе дитьне, әԝ һәйә достийа тʹәви Йаһоԝа Хԝәде (Зәб. 25:14). Ча Хԝәде дькарә бьбә достед мәрьвед гӧнәкʹар, ле йәкә бь тʹәмами пироз  бьминә? Йаһоԝа дькарә бьбә досте мәрьва, чьмки ԛӧрбана Иса «гӧнед дьнйайе һьлдьдә», демәк гӧнед инсанәте (Йуһʹн. 1:29). Йаһоԝа пешда заньбу кӧ ԛьрара ԝи дәрһәԛа Хьлазкʹаре инсанәте ԝе бе сери. Ләма жи Хԝәде һәла һе пешийа мьрьна Мәсиһ жи, дькарьбу бьбуйа досте мәрьва (Рʹом. 3:25).

4. Чәнд мәсәлед ԝан мәрьва биньн, йед кӧ пешийа Мәсиһ дьжитьн у достед Хԝәде бун.

⁴ Дина хԝә бьдьнә сәрһатийа ԝан мәрьва, йед кӧ пешийа һатьна Мәсиһ, достед Хԝәде бун. Бьраһим мәрьвәки бь баԝәрийа гәләк ԛәԝи бу. Һәла һе 1 000 сала зедәтьр паши мьрьна Бьраһим жи, Йаһоԝа сәр ԝи гот «досте мьн» (Иша. 41:9). Демәк, һәла һе мьрьн жи тʹӧ щар нькарә достед Йаһоԝайи незик жь ԝи бьԛәтинә. Ләма жи Бьраһим бира Йаһоԝада сах ә (Луԛа 20:37, 38). Мәсәләкә майин әԝ һәйә Ибо. Йаһоԝа һʹәму мәләкарʹа кӧ тʹәвайи бәр ԝи тʹоп бьбун, да кʹьфше кӧ әԝ Ибода баԝәр ә. Йаһоԝа гот кӧ әԝ мәрьвәки «рʹаст у кʹамьл ә», «жь Хԝәде дьтьрсә у жь хьрабийе хԝә вәдькʹшинә» (Иб. 1:6-8). Данийел ԝәкә 80 сала ԝәлате пʹутпʹарьстада бь амьни Хԝәдерʹа хьзмәт дькьр. Ле Йаһоԝа һьндава ԝида ча бу? Калбуна ԝида мәләка се щара жерʹа готьн, кӧ әԝ бәр чʹәʹве Хԝәде гәләк ԛимәт ә (Дан. 9:23; 10:11, 19). Әм гәрәке дӧдьли нәбьн, кӧ Йаһоԝа гәләк һивийа ве рʹоже йә, чахе достед хԝәйи дәлал жь мьрьне рʹакә (Иб. 14:15).

5. Сәва әм бьбьнә достед Йаһоԝа, әм гәрәке чь бькьн?

⁵ Ле гәло иро чьԛас мәрьвед гӧнәкʹар достед Йаһоԝа нә? Иро бь милйона мәрьв достед ԝи нә у жь ве йәке шабуне дьстиньн. Әм ве йәке дьвиньн, чьмки гәләк мер, жьн, зарʹ нав тʹәмамийа дьнйайе пе кьред хԝә у рʹабун-рʹуньштьна хԝә нишан дькьн, кӧ әԝана достед Хԝәде нә. Бәле, Йаһоԝа «һәвале сьтԛе дьле рʹаст ә» (Мәтʹлк. 3:32). Әԝ мәрьв бунә достед Хԝәде, чьмки баԝәрийа хԝә ԛӧрбана Иса анинә. Сәр һʹиме ве ԛӧрбане, Йаһоԝа жь һʹьзкьрьне мәщал да мә, сәва әм хԝә тʹәсмили ԝи кьн у бенә ньхӧмандьне. Чахе әм ван гава давежьн, әм дьбьнә йәк тʹәви бь милйона Мәсиһийед ньхӧманди, йед кӧ бәхтәԝар ьн кӧ достед Кәсе Һьмзор ьн!

6. Әм ча дькарьн нишан кьн, кӧ әм достийа тʹәви Хԝәде ԛимәт дькьн?

⁶ Ле әм ча дькарьн нишан кьн, кӧ достийа тʹәви Хԝәде ԛимәт дькьн? Мина Бьраһим у Ибо, йед кӧ сәд сала зедәтьр Хԝәдерʹа амьн ман, әм жи гәрәке ԝирʹа амьн бьминьн, фьрԛи тʹӧнә ве дьнйайеда әме чьԛас ԝәхт жерʹа хьзмәт кьн. Мина Данийел, әм гәрәке достийа хԝә тʹәви Хԝәде жь әʹмьре хԝә зедәтьр ԛимәт кьн (Дан. 6:7, 10, 16, 22). Пе аликʹарийа Йаһоԝа, әм дькарьн һәр щерʹьбандьнәкеда амьн бьминьн, сәва достийа хԝә тʹәви ԝи ӧнда нәкьн (Фили. 4:13).

7. а) Ль гора Мәтʹәлок 15:8, Йаһоԝа һьндава дӧайед мәда ча нә? б) Йаһоԝа ча щаба дӧайед мә дьдә?

⁷ Диса һәйә пʹешкʹешәкә ԛимәт кӧ найе дитьн, әԝ һәйә дӧа. Һәвалед незик һʹьз дькьн дәрһәԛа фькьр у һәстед хԝә тʹәви һәв хәбәр дьн. Дәрһәԛа достийа тʹәви Йаһоԝа жи әм дькарьн ӧса бежьн. Йаһоԝа пе Кʹьтеба Пироз мәрʹа хәбәр дьдә, у ве кʹьтебеда Әԝ фькьр у һәстед хԝә мәрʹа әʹйан дькә. Ле әм пе дӧа тʹәви ԝи хәбәр дьдьн у дькарьн жерʹа фькьред хԝә гьли кьн у дьле хԝә вәкьн. Дӧайед мә ль бәр дьле Йаһоԝада ширьн ьн. (Бьхунә Мәтʹәлок 15:8.) Ча Досте һʹьзкьри, Йаһоԝа нә тʹәне дӧайед мә дьбьһе, ле ӧса жи щаба дӧайед мә дьдә. Щара әԝ зу щабе дьдә, ле щара мәрʹа лазьм ә һе зедә дӧа бькьн һʹәта щабе бьстиньн. Чь жи  һәбә, йәкә әм гәрәке дӧдьли нәбьн, ԝәки әме щаба дӧайед хԝә һьн әʹсә ԝәʹдәда бьстиньн, һьн жи ӧса кӧ бона мә ԝе лапә баш бә. Ле щара Хԝәде ӧса щаба мә надә, ча әм һивийе нә. Мәсәлә, дәԝса кӧ мә жь щерʹьбандьнәке хьлаз кә, әԝ биланийе у ԛәԝате дьдә мә, сәва әм бькарьбьн «тәйах кьн» (1 Корн. 10:13).

8. Әм ча дькарьн Хԝәдерʹа нишан кьн, ԝәки пʹешкʹеша дӧа дьшекьриньн?

⁸ Ча әм дькарьн нишан кьн, ԝәки әм рʹази нә бона пʹешкʹеша гәләк ԛимәт, демәк дӧа? Әме ве йәке бьдьнә кʹьфше, һәрге ширәта Йаһоԝа ԛәбул кьн, кӧ «һәр гав дӧа бькьн» (1 Тʹеслн. 5:17). Йаһоԝа зоре мә накә әм жерʹа дӧа бькьн. Дәԝсе, әԝ азайа бьжартьне дьдә мә. Һәрге әм һәр рʹож тʹьме дӧа дькьн, әм нишан дькьн кӧ әве пʹешкʹеше дьшекьриньн. Ӧса жи әм дӧада гәрәке бир нәкьн рʹазибуна хԝә жерʹа бьдьнә кʹьфше у шькьрийе бьдьнә ԝи (Зәб. 145:2, 3).

9. Бьраки мә ча дьньһерʹә сәр дӧа? Ле һун ча дьньһерʹьн сәр дӧа?

⁹ Һәрге гәләк ԝәхт ә кӧ әм Йаһоԝарʹа хьзмәт дькьн у дьвиньн ча әԝ щаба дӧайед мә дьдә, әм гәрәке һе зедә дӧа ԛимәт кьн. Дина хԝә бьдьнә мәсәла Бьраки мә Крис, кӧ 47 сала хьзмәткʹаре һәртʹьм бу. Әԝ дьбежә: «Әз гәләк һʹьз дькьм шәбәԛа һʹьшйар бьм, у Йаһоԝарʹа дӧа бькьм. Чьԛас хԝәш ә тʹәви Йаһоԝа хәбәр дьм, чахе рʹо тʹәзә дәрте у шәԝԛа ԝе давежә сәр авийе у дьчʹурьсинә! Һьнге әз дьхԝазьм Йаһоԝарʹа бежьм кӧ әз бона һʹәму пʹешкʹешед ԝи, у бона дӧа жи, гәләк жь ԝи рʹази мә. Дьле мьн рʹьһʹәт дьбә чахе әз хьлазийа рʹоже дӧа дькьм у пе исафа тʹәмьз дьчьм рʹазем».

10. Чьрʹа әм гәрәке рʹӧһʹе Хԝәдейи пироз ԛимәт кьн?

¹⁰ Рʹӧһʹе Хԝәдейи пироз жи пʹешкʹешәкә гәләк ԛимәт ә, йа кӧ найе дитьне. Иса ширәт да, ԝәки һәр гав Хԝәдерʹа дӧа бькьн, сәва рʹӧһʹе хԝәйи пироз бьдә мә (Луԛа 11:9, 13). Йаһоԝа бь сайа рʹӧһʹе хԝә нә тʹәне ԛәԝате дьдә мә, ле һәла һе «зорайийа ԛәԝате» жи (2 Корн. 4:7; Кʹар. Шанд. 1:8). Пе аликʹарийа рʹӧһʹе Йаһоԝайи  пироз, әм дькарьн бәр һәр тәнгасике тәйах кьн.

11. Рʹӧһʹе пироз чьда дькарә али мә бькә?

¹¹ Рʹӧһʹе пироз дькарә али мә бькә, кӧ хьзмәтийа хԝә биньн сери. Әԝ дькарә талантед мә у фәрәсәтед мә баш кә. Әԝ рʹӧһʹ али мә дькә, ԝәки щьватеда щабдарийед хԝә биньн сери. Әм гәрәке бир нәкьн, ԝәки хьзмәтийеда һәр тьшт чь кӧ бал мә рʹьнд те стандьне, әва нә кӧ пе ԛәԝата мә йә, ле пе аликʹарийа рʹӧһʹе Хԝәдейи пироз ә.

12. Ль гора Зәбур 139:23, 24, әм дькарьн диса бона чь дӧа бькьн?

¹² Әм ӧса жи һьнге нишан дькьн кӧ рʹӧһʹе пироз ԛимәт дькьн, гава дӧа дькьн, ԝәки Хԝәде али мә бькә сәва әм нав хԝәда фькьр у хԝәстьнед нәрʹаст тедәрхьн. (Бьхунә Зәбур 139:23, 24.) Һәрге әм бона ве йәке дӧа бькьн, Йаһоԝа ԝе бь сайа рʹӧһʹе хԝәйи пироз мәрʹа әʹйан кә, кӧ нав хԝәда ньһерʹандьн у хԝәстьнед хԝәйә нәрʹаст бьвиньн. У гава әм тедәрдьхьн кӧ чьда әм гәрәке бенә гӧһастьне, әм гәрәке дӧа бькьн, ԝәки рʹӧһʹе пироз ԛәԝате бьдә мә, сәва ван тьштед нәрʹаст бьтʹәрькиньн. Ԝи щурʹәйи, әме избат кьн, ԝәки әм нахԝазьн тьштед ӧса бькьн, кʹижан кӧ бьбьнә мәʹни ԝәки Йаһоԝа пе рʹӧһʹе хԝәйи пироз али мә нәкә (Әфәс. 4:30).

13. Әм ча дькарьн һе зедә рʹази бьн бона рʹӧһʹе пироз?

¹³ Әм дькарьн рʹазибуна хԝә бона рʹӧһʹе пироз һе зедә кьн, һәрге бьфькьрьн кӧ рʹожа иройин рʹӧһʹе пироз чь дькә. Биньн бира хԝә, Иса пешийа кӧ бьчуйа ль әʹзмен, готә шагьртед хԝә: «Гава рʹӧһʹе пироз бе сәр ԝә, һуне ԛәԝате бьстиньн у . . . һʹәта сәре дьне жи бьбьнә шәʹдед мьн» (Кʹар. Шанд. 1:8). Иро әм дьвиньн әԝ гьли ча тенә сери. Пе аликʹарийа рʹӧһʹе пироз, жь һәр чар ԛӧлбед дьнйайе ԝәкә 8 милйон нив мәрьв бунә хьзмәткʹаред Йаһоԝа. Әм ӧса жи шабуне дьстиньн кӧ щьнәта рʹӧһʹанида ньн, чьмки рʹӧһʹе Хԝәдейи пироз али мә дькә әм һʹӧнӧред бәдәԝ нав хԝәда пешда  биньн, әԝ һәнә һʹьзкьрьн, шабун, әʹдьлайи, сәбьр, ԛәнщи, ширьнайи, баԝәри, мьлукти у хԝәгьртьн. Әв һʹӧнӧр жь бәре рʹӧһʹе пироз ьн (Галт. 5:22, 23). Рʹасти жи рʹӧһʹе пироз пʹешкʹешәкә чьԛас ԛимәт ә!

14. Ԝәʹде хьзмәтийе әм кʹижан аликʹарийа кӧ найе дитьне, дьстиньн?

¹⁴ Диса пʹешкʹешәкә ԛимәт кӧ найе дитьне әԝ ә, кӧ әм «һәвал-хәбатед» Йаһоԝа, Иса у мәләка нә (2 Корн. 6:1). Әм һьнге тʹәви ԝан һәвкʹарийе дькьн, чахе мьзгинийе бәла дькьн. Паԝлос дәрһәԛа хԝә у йед кӧ тʹәви ԝи хьзмәт дькьрьн, гот: «Әм тʹәвайи бона Хԝәде дьхәбьтьн» (1 Корн. 3:9). Чахе әм хьзмәт дькьн, әм тʹәви Иса жи һәвкʹарийе дькьн. Биньн бира хԝә, чахе Иса тʹәми да шагьртед хԝә, кӧ «һәрʹьн һʹәму мьләта һин кьн», әԝи ԝанрʹа гот: «Әз . . . тʹәви ԝә мә!» (Мәт. 28:19, 20) Ле тʹәви мәләка әм ча һәвкʹарийе дькьн? Мәләк рʹебәрийе мә дькьн, ԝәки әм «мьзгинийа . . . һʹәта-һʹәтайе», бьдьнә «йед рʹубари дьне». Әԝ йәк рʹасти жи кʹәрәм ә бона мә! (Әʹйан. 14:6)

15. Мәсәләке жь Кʹьтеба Пироз биньн, кʹижан кӧ дьдә кʹьфше ԝәки Йаһоԝа хьзмәтийа мәда шьхӧләки сәрәкә дькә.

¹⁵ Пе аликʹарийа жь әʹзмана, иро чь те кьрьне? Әм чахе тʹохьме мьзгинийа Пʹадшатийе дьрʹәшиньн, һьнә тʹохьм дькʹәвьнә дьлед ԛәнщ у шин дьбьн (Мәт. 13:18, 23). Ле кʹе ӧса дькә, ԝәки әв тʹохьмед рʹастийе дьлда шин бьн у бәр бьдьн? Иса шьровәкьр кӧ тʹӧ кәс нькарә бьбә шагьрте Иса, һʹәта кӧ Бав бәрбь хԝә нәкʹьшинә (Йуһʹн. 6:44). Кʹьтеба Пирозда мәсәла ве йәке һәйә. Биньн бира хԝә чахе Паԝлос незики шәһәре Филипйайе, шәʹдәти да кʹомәкә жьна. Дина хԝә бьдьне Кʹьтеба Пироз дәрһәԛа жьнькәкә бь наве Лидйа чь дьбежә: «Хӧдан дьле ԝе вәкьр кӧ гӧһ бьдә готьнед Паԝлос» (Кʹар. Шанд. 16:13-15). Иро жи Йаһоԝа бь милйона мәрьв бәрбь хԝә кʹьшандийә.

16. Һәрге әм хьзмәтийеда бәред баш дьстиньн, кʹе һежайи пʹайа йә?

¹⁶ Ле кʹе һежайи пʹайа йә, һәрге хьзмәтийеда әм бәред баш дьстиньн? Паԝлос щаба ве пьрсе да чахе щьвата Корьнтʹирʹа ԝан гьлийа ньвиси: «Мьн дачʹьканд, Аполо авда, ле Хԝәде гиһанд. Аԝа нә йе дачʹьканд тьштәк ә, нә жи йе авда, ле йе гиһанд, кӧ Хԝәде йә» (1 Корн. 3:6, 7). Мина Паԝлос, әм гәрәке тʹьме шькьрийе бьдьнә Йаһоԝа бона һәр пешдачуйинәкә хьзмәтийеда.

17. Әм ча дькарьн рʹазибуна хԝә нишан кьн бона ве йәке, кӧ әм «һәвал-хәбатед» Хԝәде, Иса у мәләка нә?

¹⁷ Әм ча дькарьн рʹазибуна хԝә нишан кьн бона ве йәке, кӧ әм «һәвал-хәбатед» Хԝәде, Иса у мәләка нә? Әм ве йәке дькьн, чахе әм мәщала дьгәрʹьн сәва мәрьварʹа мьзгинийе гьли кьн. Әм бь гәләк щурʹа дькарьн ве йәке нишан кьн, чахе һʹәму мәрьварʹа у «мал бь мал» шәʹдәтийе дьдьн (Кʹар. Шанд. 20:20). Гәләк хушк-бьра ӧса жи һʹьз дькьн нәформал шәʹдәтийе бьдьн. Чахе әԝана рʹасти мәрьвәки нәнас тен, бь бәшәра хԝәш сьлаве дьдьнә ԝи у тʹәви ԝи дькʹәвьнә хәбәрдане. Һәрге әԝ мәрьв жи дькʹәвә хәбәрдане, әԝана һеди-һеди дәрбази мьзгинийе дьбьн.

18-19. а) Әм ча тʹохьмед рʹастийе ав дьдьн? б) Мәсәле гьли кьн кӧ дьдә кʹьфше, ча Йаһоԝа али мәрьвәки кьр, йе кӧ Кʹьтеба Пироз һин дьбу.

¹⁸ Чаԝа һәвал-хәбатед Хԝәде, әм гәрәке нә кӧ тʹәне рʹастийе бьчиньн, ле ӧса жи ав дьн. Чахе кәсәкирʹа һʹәԝас ә дәрһәԛа мьзгинийе хәбәр дә, әм алийе хԝәда һәр тьшти дькьн ԝәки һʹәԝаса ԝи һе пешда биньн. Йан жи әм хушк йан  бьракирʹа дьбежьн кӧ тʹәви ԝи мәрьви текли бьн, ԝәки тʹәви ԝи һинбуна Кʹьтеба Пироз дәстпекьн. Мәрьве кӧ Кʹьтеба Пироз һин дьбә, чахе пешда дьчә, әм ша дьбьн чьмки дьвиньн, ԝәки Йаһоԝа ча һʹьш у дьле ԝи дьгӧһезә.

¹⁹ Дина хԝә бьдьнә мәсәла бьраки мә Рафалалани жь Африкайа Башуре, йе кӧ бәре кʹочәк бу. Әԝ чь кӧ жь Кʹьтеба Пироз педьһʹәсийа, бәгәм кьр. Ле әԝ рʹасти чәтьнайики һат, чахе пеһʹәсийа кӧ Хәбәра Хԝәде чь дьбежә дәрһәԛа хәбәрдана тʹәви мьрийа (Ԛан. Дщр. 18:10-12). Һеди-һеди әԝи хԝәст, ԝәки Хԝәде ньһерʹандьна ԝи сәр ве йәке бьгӧһезә. Рʹаст ә кʹочʹәкти хәбата ԝийә тʹәк бу, ле ԝәʹдә шунда әԝи тʹәрка ве йәке да. Рафалалани, ньһа ида 60 сали йә, әԝ дьбежә: «Әз гәләк жь Шәʹдед Йаһоԝа рʹази мә бона аликʹарийа ԝанә мәзьн, мәсәлә ԝана али мьн кьр хәбате бьвиньм. Ле дьһа зедә әз жь Йаһоԝа рʹази мә, чьмки әԝи али мьн кьр, кӧ әʹмьре хԝә бьгӧһезьм, у ньһа әз ча Шәʹде ԝийи ньхӧманди дькарьм хьзмәт бькьм».

20. Һун дьхԝазьн чь нете бьдьнә пешийа хԝә?

²⁰ Ве готареда мә шеԝьр кьр дәрһәԛа чар пʹешкʹешед кӧ найенә дитьне. Пʹешкʹеша лапә ԛимәт әԝ ә, кӧ әм дькарьн бьбьнә достед Йаһоԝайи незик. Бь сайа ве йәке, әм пʹешкʹешед майин кӧ найенә дитьне дьстиньн, әԝ һәнә дӧа, аликʹарийа рʹӧһʹе пироз, у аликʹарийа Йаһоԝа, Иса у мәләка. Ԝәрә әм хԝәрʹа нете дайньн, ԝәки һе зедә бьшекьриньн хьзнед кӧ әм навиньн. Ԝәрә әм тʹӧ щар нәсәкьньн шькьрийе бьдьнә Йаһоԝа, кӧ әԝ Достәки ӧса ԛәнщ ә!