1. Yesu mwabugha athiki okwa bindu by’obughuli eby’elhubulha?

SI BUGHA indi eby’obughuli ebyosi bikalhangirawa. Nibya ibbwa, ebihembo by’obughuli bunene, by’ebithelhangirawa. Yesu, omw’Ikangirirya ly’Okwa Kithwa, mwakania okwa bindu by’obughuli eby’elhubulha ebilengire kutsibu ebindu by’ekimubiri. Neryo mwongerako athi: “Ahali ebindu byawu, ho muthima wawu asyabya nibya.” (Mt. 6:19-21) Thwamalhangira ekindu mwa ky’obughuli, omuthima wethu iniakendi thusukuma erikisondya nuku thukithunge. Thukayibikira “ebindu elhubulha” omw’ibya n’erina eryuwene, kutse emimanire eyuwene embere sya Nyamuhanga. Ebindu ng’ebyo, ngoku Yesu anabugha sibyanga heribwa kutse eryibwa.

2. (a) Ngoku kiri omwa 2 Abanya Korinto 4:17, 18, Paulo athi thuhire obwenge bw’okuki? (b) Thukendi kania okuki omo mwatsi ono?

² Omukwenda Paulo akathubwira athi ‘thukwame emyatsi eyithelholhawako.’ (Soma 2 Abanya Korinto 4:17, 18.) Emyatsi eyithelholhawako eyi mwamuli ebibuya byosi ebyo thukendi syabana omwa kihugho kihya kya Nyamuhanga. Omo mwatsi ono, thukendikania okwa by’obughuli bbini ebyo thuthelhangira ebyanga thughasira na lino​—eribya banywani ba Nyamuhanga, olhusunzo lhw’omusabe, obuwathikya bw’omulimu abuyirire, n’obuwathikya bw’elhubulha obw’erikolha omubiiri wethu w’Obwami. Kandi thukendi lhangira ngoku thwanga kangania ku thukasima Yehova busana n’eby’obughuli ebithelhangirawa ebi.

3. Ni kihembo kyahi kikulhu ekithelhangirawa, kandi kikathokekana kithi ithwe eribanakyo?

³ Ekihembo kikulhu ekithelhangirawa bw’obunywani na Yehova Nyamuhanga. (Esy. 25:14) Kikathokekana kithi Nyamuhanga oyubuyirire erinywana abandu abathahikene? Ekyo kikathokekana busana n’ekihongo ky’endongolya ya Yesu “oyukalhusaya ebibi by’ekihugho” eby’abandu. (Yn. 1:29) Nibya Yesu isyali aholha, Yehova abya inianasi ngoku Yesu akendisyabya muthaleghulha erihika okwa lhuholho nuku angalhamya abandu. Ky’ekyaleka Nyamuhanga iniabya iniangana nywana abandu ababyaho Kristo athali aholha.​—Abar. 3:25.

4. Iha eby’erileberyako by’abandu ababyaho Yesu athali asa ababya banywani ba Nyamuhanga.

⁴ Thalengekania okwa balhume balebe ababya banywani ba Nyamuhanga Kristo athali asa. Abrahamu abya mulhume w’erikirirya erighumire. Ihamabirilhaba emyaka eyilhabire oku 1,000 aliholire, Yehova mwamwahulhamo “omwira waghe.” (Isa. 41:8) Munywani wa Yehova nomwangaholha akabya iniakine munywani wiwe. Oku Yehova, Abrahamu ali ng’oyuliho. (Lk. 20:37, 38) N’owundi ni Yobu. Yehova mwamukaniako ndeke embere sy’abamalaika abosi. Mwamwahulhamo “omundu oyuhikene n’oyuthunganene, oyukakenga Nyamuhanga n’erihuthathira ebibi.” (Yobu 1:6-8) Kandi Yehova mwalhangira athi Danieli, oyuwamukolera buthaleghulha habw’emyaka nga 80 omwa kihugho ekirimo abathe muramaya? Ngendo isathu abamalaika mubakakasya Danieli ngoku ni mundu ‘oyukasimawa kutsibu’ na Nyamuhanga. (Dan. 9:23; 10:11, 19) Thwangana yikethera ngoku Yehova akakandira kutsibu erilhubukya banywani biwe ababiriholha.​—Yobu 14:15.

5. Ni byahi ebikayithaghisibawa eribya munywani kundu wa Yehova?

⁵ Munabwire abandu abathahikene kandi ini banywani ba Yehova ni bangahi? Bahikire omwa syomiliyoni. Thukaminya eki kundi abandu banene​—abalhume, abakali, n’abaana omwa kihugho kyosi​—banemukangania omwa mikolere ngoku banzire eribya banywani ba Nyamuhanga. “Obwira bwiwe [obwa Yehova] buli haghuma n’abathunganene.” (Emi. 3:32) Obunywani obu bukathokekana busana n’erikirirya lyabu omwa kihongwa kya Yesu eky’endongolya. Busana n’ekihongwa ekyo, Yehova akathulighira eriyihayo okw’iyo n’eribatizibwa. Thukabya thukakwama ebiika ebi, thukayiyunga okwa syomiliyoni sy’Abakristayo ababiriyihayo n’eribatizibwa abali banywani kundu b’Omundu mukulhu kutsibu omwa buhangwa bwosi!

6. Thwanga kangania thuthi ku thukasima obunywani bwethu na Nyamuhanga?

⁶ Thwanga kangania thuthi ku thukalhangira obunywani bwethu na Nyamuhanga mwa bw’obughuli? Nethu nga Abrahamu na Yobu, ababya bathaleghulha oku Nyamuhanga ahabw’emyaka eyilhabire omu kikumi, thutholere ithwabya ithune bathaleghulha​—mbulha ni buthuku bungahi obwa thwamathaghunza thukakolera Yehova omwa mughulhu mubi ono. Nethu nga Danieli, thutholere ithwalhangira obunywani bwethu na Nyamuhanga mwa bw’obughuli kwilhaba engebe. (Dan. 6:7, 10, 16, 22) Busana n’obuwathikya bwa Yehova, thwangana ghumira ebitsibu ebyathukabana n’eribya ithune banywani biwe.​—Fil. 4:13, NW.

7. (a) Ngoku kiri omwa Emisyo 15:8, Yehova akayowa athi thukamusaba? (b) Yehova akasubiraya athi emisabe yethu?

⁷ Ekindi kihembo eky’obughuli ekithelhangirawa w’omusabe. Abanywani bakabya ibanemubwirana amalengekania n’eriyowa lyabu. Mbwino obunywani bwethu na Yehova ku bune buthya? Ee! Yehova akakanaya nethu erilhabira omwa Kinywe kiwe, kandi akakikolesaya erithubwira amalengekania n’eriyowa liwe. Thukakanaya nayu thukamusaba, kandi thwangana  mubwira amalengekania n’ebiri omwa muthima. Yehova akatsema akahulikirira emisabe yethu. (Soma Emisyo 15:8.) Yehova, ng’Omunywani wethu w’olhwanzo akahulikirira emisabe n’erisubiryayo. Hakanayira iniasubirya lhuba. N’ahandi ithwayithagha erihathikana erisaba. Nomwabine, thukabya ithunayikethere ngoku akendi thusubirya okwa buthuku obutholere kandi omwa nzira eyuwene. Aliwe, Nyamuhanga anganasubirya ngoku thuthalhue thukalengekania. Ng’eky’erileberyako, omwakanya k’erighunzaho ekitsibu, anganathuha amenge n’amaaka “w’eriyiyinia.”​—1 Kor. 10:13.

8. Thwanga kangania thuthi ku thukasima ekihembo ky’obughuli bunene eky’omusabe?

⁸ Thwanga kangania thuthi ku thukasima ekihembo ky’obughuli eky’omusabe? Enzira nguma ly’erighendera okw’ihano ly’erisaba “butsira eriumbya.” (1 Tes. 5:17) Yehova syalithukaka erisaba. Iyo akasikaya obughabe bwethu bw’eriyithwiramu kandi akathubwira athi ‘thuyitsingirire omw’isaba.’ (Abar. 12:12) Neryo thwangana kangania erisima lyethu omw’isaba ngendo nyingyi obuli kiro. Aliwe, thutholere ithwahira omwa misabe yethu mw’ebinywe by’erisima n’eripipa Yehova.​—Esy. 145:2, 3.

9. Mughalha wethu mughuma akayowa athi busana n’omusabe, nawu wukayowa wuthi busana n’omusabe?

⁹ Obuthuku obwa thwamabirighunza ithunemukolera Yehova n’eriyilhangirira esyonzira esyo akasubirayamo emisabe yethu, kikaleka ithwongera erisima ekihembo ky’omusabe. Eky’erileberyako, ni mughalha wethu Chris oyuwamabirighunza myaka 47 omwa mubiiri w’omughulhu wosi. Akabugha athi, “Kikanyitsemesaya erisaba omwa ngyakya-ngyakya. Ngayowa ndeke erikania na Yehova eryuba likahulhuka n’erileka ekime ekiri okwa bithi ikyakangabasania! Eki kikaleka ingamusima busana n’ebihembo biwe byosi, imwamune n’olhusunzo lhw’omusabe. Neryo kandi ngabya nabirisaba omwa kiro, kikatsemesaya erikesya inganawithe obunya muthima-thima obuhenirye.”

10. Busana naki ithwalhangira omulimu abuyirire wa Nyamuhanga mwa kihembo ky’obughuli?

¹⁰ Omulimu abuyirire wa Nyamuhanga ni  kindi kihembo ekithelhangirawa ekyo thutholere ithwalhangira mwa ky’obughuli. Yesu mwabugha athi thulhole embere erisaba erihebwa omulimu abuyirire. (Lk. 11:9, 13) Erilhabira omwa mulimu wiwe, Yehova akathuha amaaka​—nibya ‘n’obuthoki bunene.’ (2 Kor. 4:7; Emib. 1:8) Busana n’obuwathikya bw’omulimu wa Nyamuhanga, thwangana ghumira ekitsibu kyosi-kyosi ekyo thwangabana.

11. Omulimu abuyirire angana thuwathikya omu nziraki?

¹¹ Omulimu abuyirire anganuwania amaaka awathuwithe nuku thwangathoka erikolha emibiiri eyo Nyamuhanga akathuha. Omulimu wa Nyamuhanga akaleka ithwathoka esyongwamirwa syethu sy’Ekikristayo. Thunasi ngoku ebibuya ebyo thukabana omwa mubiiri wa Nyamuhanga bikathokekana busana n’obuwathikya bw’omulimu wiwe.

12. Ngoku kiri omwa Esyonyimbo 139:23, 24, thwangana saba omulimu abuyirire erithuwathikya erikolhaki?

¹² Eyindi nzira ey’erikanganiryamu ku thukalhangira omulimu abuyirire mwa w’obughuli ly’erisaba thuthi athuwathikaye eriminya amalengekania n’esyongumbu nyibi ebiri omwa muthima wethu. (Soma Esyonyimbo 139:23, 24.) Thwamasaba thuthya, Yehova iniangana thuwathikya erilhabira omwa mulimu wiwe, ithwaminya amalengekania n’esyongumbu nyibi. Neryo thwamayilhangira mw’amalengekania mabi ayo, thutholere ithwasaba omulimu wa Nyamuhanga athuwathikaye erirwanisya amalengekania kutse esyongumbu esyo. Thwamakolha ekyo, ithukendi kangania ku thwabirithwamu erithendi kolha ekyangaleka Yehova iniathathuwathikya omwa mulimu wiwe abuyirire.​—Efe. 4:30.

13. Thwang’ongera thuthi erisima omulimu abuyirire?

¹³ Thwangan’ongera erisima omulimu abuyirire omw’ighanirya okwa by’abirikolha omwa biro byethu bino. Yesu isyali aghenda elhubulha, mwabwira abigha biwe athi: “Mwasyabana obuthoki omughulhu omulimu abuyirire asyabahikako. Kandi mwasyabya bathuli b’omwatsi waghe . . . erihika okwa nduli-nduli sy’ekihugho.” (Emib. 1:8) Ebinywe ebi binemubererera munabwire. Busana n’obuwathikya bw’omulimu abuyirire, abaramya ba Yehova nga miliyoni munani n’embindi babirihindanibwa  erilhua omwa kihugho kyosi. Eryongera okw’ekyo, thuli omwa paradiso y’obunyakirimu kundi omulimu wa Nyamuhanga akathuwathikaya eribya n’emibere mibuyanga ng’olhwanzo, obutseme, obuholho, eriyibombeka, obwenge, obubuya, erithendi leghulha, omuthima mwolho, n’eriyitheya. Emibere eyi ‘y’emikolere eyikalhua okwa mulimu.’ (Gal. 5:22, 23) Omulimu abuyirire ni kihembo kibuyanga!

14. Ni buwathikya bwahi obuthelhangirawa obwa thukabana thukasangira omw’ithulira?

¹⁴ Thuwithe ekihembo ky’obughuli ekithelhangirawa eky’erikolha haghuma na Yehova, Yesu, n’abamalaika. (2 Kor. 6:1) Thukakolha ekyo omughulhu thukasangira omwa mubiiri w’eriyira abigha. Paulo mwayikaniako n’okw’abo abakasangira omwa mubiiri oyu athi: “Nyamuhanga yo thukakolha haghuma nayu.” (1 Kor. 3:9) Thukabya thukasangira omwa mubiiri w’Ekikristayo, thukabya ithwamakolha haghuma na Yesu. Wibuke ngoku Yesu abere abiribwira abigha biwe athi “muyire abigha oko bihanda byosi,” mwabugha athi: “Indi haghuma nenyu.” (Mt. 28:19, 20) Kandi ibbwa thukakolha thuthi n’abamalaika? Ni mughisa munene abamalaika erithusondolha thukathulhughania “engulhu yuwene y’erikotha . . . oko bandu ab’ikere omo kihugho.”!​—Erib. 14:6.

15. Iha eky’erileberyako kye Biblia ekikakanganaya omubiiri mukulhu ogho Yehova akakolha omw’ithulira lyethu.

¹⁵ Ni byahi ebyo thukakolha busana n’obuwathikya obukalhua elhubulha? Thukabya thukabiba embutho y’omwatsi w’Obwami, eyindi mbutho yikathoghera omwa mithima eyuwene neryo iyalhasa. (Mt. 13:18, 23) Oyukaleka embutho eyo iyalhasa kandi iyahethya nindi? Yesu akasoborera ngoku sihali oyuwangabya mwigha wiwe “Thatha . . . athalyamuletha.” (Yn. 6:44) E Biblia yikaha eky’erileberyako okw’eki. Ibuka omughulhu Paulo athulira egurupu y’abakali eyihya w’etawuni ye Filipi. Lhangira ekya Biblia yikabugha okwa mughuma w’okwa bakali abo, ya Ludia: “Omukama mwamwibukya omo muthima wiwe eriowa emyatsi eyo Paulo abugha.” (Emib. 16:13-15) Nga Ludia, Yehova abiriletha abandi abahikire omwa syomiliyoni.

16. Nindi oyutholere erisimwa thwamabana ebibuya omwa mubiiri w’erithulira?

¹⁶ Nindi oyutholere erisimwa thwamabana ebibuya omwa mubiiri w’erithulira? Paulo mwasubirya ekibulyo ekyo akahandikira ekithunga kye Korinto ky’ebinywe bino: “Ingye nahera embutho, Apolo muthulira kuyo kw’amaghetse, nikwa Nyamuhanga yo waleka embutho iyalhasa. Neryo omuheri w’embutho, n’oyukuthulira kuyo kw’amaghetse sibeghasaki. Ni Nyamuhanga yukalhasayayo.” (1 Kor. 3:6, 7) Nethu nga Paulo, thutholere ithwapipa Yehova busana n’ebibuya byosi-byosi ebyo thwanga bana omwa mubiiri w’erithulira.

17. Thwanga kangania thuthi ku thukasima ‘erikolha haghuma’ na Nyamuhanga, Kristo, n’abamalaika?

¹⁷ Thwanga kangania thuthi ku thukasima olhusunzo ‘lhw’erikolha haghuma’ na Nyamuhanga, Kristo, n’abamalaika? Thwangana kolha ekyo omw’ikolha ekyosi-kyosi eribwira bandi okwa ngulhu yuwene. Hali nzira nyingyi esy’erikoleramu eki, erithulira ahali bandu bangyi kandi n’omo “yindi nyumba n’omwa yindi nyumba.” (Emib. 20:20) Abangyi bakathulira kitsumbukirania. Bakabya bakabana abo bathasi, bakabaramukaya ibanatsangire n’erilengaho eritsuka omukania nabu. Omundu amakania nabu ndeke, omwa menge bakamubwira oko mwatsi w’Obwami.

18-19. (a) Thukuthangirira thuthi embutho y’ekwenene? (b) Iha eky’erileberyako ekikakanganaya ngoku Yehova awathikaya omwigha mulebe we Biblia.

¹⁸ Ithwe ng’abakakolha haghuma na Nyamuhanga, sithutholere thukasubulira okw’ihera  embutho y’ekwenene lisa, aliwe kandi thutholere ithuthangirirayo. Omundu amakangania erianzisibwa, thutholere ithwakolha ekyosi-kyosi erisubayo kutse erisondya oyuwanga musubako busana n’eritsuka erigha nayu e Biblia. Erigha likabya linemulholha embere, thukatsema thukalhangira ngoku Yehova akawathikaya omwigha we Biblia erihindulha amalengekania n’eriyowa liwe.

¹⁹ Lengekanaya okwa ky’erileberyako kya Raphalalani, oyuwabya muthahwa w’ekibindi e South Africa. Mwanza ebyo aby’ak’igha omwa Biblia. Aliwe mukyamukalira eriligha ebya Kinywe kya Nyamuhanga kikabugha okw’ikanirania n’ababiriholha. (Ebi. 18:10-12) Lyolho-lyolho, mwalighira Nyamuhanga abumbe-bumbe amalengekania wiwe. Endambi muyahika, amaleka eby’obuthahwa, nomwakine indi w’owabya mubiiri wiwe. Raphalalani, oyo lino awithe myaka 60 akabugha athi: “Ngasima kutsibu Abema ba Yehova busana n’erinyiwathikya omwa nzira nyingyi, ng’erinyiwathikya eribana omubiiri. Ekikulhu kutsibu, ngasima Yehova busana n’erinyiwathikya erikolha esyombinduka omwa ngebe yaghe, nuku ngathoke lino erisangira omwa mubiiri w’erithulira ng’Omwema wiwe oyubatizibirwe.”

20. Wukendi thwamu erikolhaki?

²⁰ Omo mwatsi ono, thwamabirikania okwa bihembo bbini eby’obughuli ebithelhangirawa. Ekikulhu okwa byosi lhw’olhusunzo lhw’eriyira Yehova mwa munywani wethu. Ekyo kikaleka ithwaghasirwa omwa bindi bihembo by’obughuli ebithelhangirawa​—erikania nayu omw’isaba, eriyilhangirira obuwathikya bw’omulimu wiwe abuyirire, n’eribana obuwathikya bw’elhubulha omw’ithulira lyethu. Thuthwemu eryongera erisima ebihembo by’obughuli ebithelhangirawa ebi. Kandi ambi ithwalholha embere erisima Yehova busana n’eribya Munywani mubuya.