1. Yinki Yesu zonzá na yina me tadila bimvwama ya mazulu?

BIMVWAMA nyonso ve ke talaná na meso. Na yawu, beto zaba mpe ti bimvwama yina me lutila kitoko, ke talaná ve. Na Diskur ya zulu ya mongo, Yesu zonzilá, bimvwama mingi ya mazulu, yina me lutila kitoko mpe bunene na bimvwama ya ntoto. Mpe yandi bwelá: “Ya tsyeleka, kisika yina ke bimvwama ya nge, ni kisika yina mpe ke vanda ntima ya nge.” (Mat. 6:19-21) Ntima ya beto ke natá beto na kulanda kaka bima yina ke vandá ntalu mingi na meso ya beto. Beto ke “landá bimvwama ya mazulu” ntangu beto ke vandá na ndyatulu ya mbote na meso ya Nzambi, mpe ntangu beto ke landá nzila ya yandi. Yesu zonzá ti, bimvwama yayi, ata muntu lenda laba yawu mpe ata kima lenda bebisa yawu.

2. a) Na 2 Bakorinto 4:17, 18, Paul me lomba beto na kutula meso na yinki? b) Mpe yinki beto ke zonzila na artikle yayi?

² Apotre Paul pesá beto konseye yayi, “beto tula meso ya beto [. . .] na bima yina ke talaná ve.” (Tanga 2 Bakorinto 4:17, 18.) Na kati ya bima yina ke talaná ve, beto lenda zonzilá bima nyonso ya kitoko yina beto lenda kuzwa na paradis. Na artikle yayi, beto ke zonzila bimvwama yina ke talaná ve, yina beto lenda kuzwa deja bubu yayi: kindiku na Nzambi, lusambu, mpeve ya Nzambi, mpe bantu yina ke sadisá beto na predikasion: Yehova, Yesu mpe ba-ange. Beto ke longoka mpe faso ya kuvutula matondo na Yehova, Tata yina pesá beto bimvwama yina ke talaná ve.

3. Wapi kimvwama yina me lutila bunene na bimvwama nyonso yina ke talaná ve, mpe yinki lenda sadisa beto na kuzwa yawu?

³ Kimvwama yina me lutila bunene na bimvwama nyonso yina ke  talaná ve, ni kindiku na Yehova Nzambi. (Nku. 25:14) Wa’ faso Nzambi lenda vanda kaka santu, ata yandi tunga kindiku na bantu ya masumu? Yandi lenda sala yawu, samu ti munkayulu yina Yesu futá, “lenda katula masumu” ya bantu. (Yoa. 1:29) Avant Yesu pesa nzutu ya yandi, Yehova zabá ti, Yesu ke vanda ya kukangama na yandi tii na lufwa, samu na kuvuukisa bantu. Ni na yawu, Nzambi kumá deja ndiku ya bantu yina zingá na ntoto avant Yesu kufwa.—Rom. 3:25.

4. Pesa bifwani ya bantu yina kumá bandiku ya Nzambi avant Yesu kwiza na ntoto.

⁴ Beto tala bifwani ya bantu yina kumá bandiku ya Nzambi avant Yesu kwiza na ntoto. Abraham vandá muntu ya kiminu ya ngolo. Ata bamvula 1 000 me luta na manima ya lufwa ya Abraham, Yehova ke kaka na bokilak’ yandi “ndiku ya munu.” (Iza. 41:8) Na yawu, ata lufwa ke ve na ngolo ya kukabula Yehova na bandiku ya yandi ya ntima. Na meso ya Yehova, Abraham ke ntete moyo. (Luke 20:37, 38) Kifwani ya nkaka ni Yobi. Na lukutakanu mosi ya nene yina Yehova salá na ba-ange nyonso na zulu, Yehova zonzilá faso ya mbote yina yandi ke tadilá Yobi. Yehova bokilak’ yandi “muntu ya mbote mpe ya kukangama, yina ke talá boma ya Nzambi, mpe yina ke kimá mambu ya yimbi.” (Yobi 1:6-8) Mpe wa’ faso Yehova vandá tadilá Danyele, yina vandá kaka ya kukangama na Nzambi bamvula kuluta 80, na bwala yina bantu vandá sambilá ve Yehova? Bambala tatu, ba-ange zabisak’ yandi ti, yandi vandá “muntu ya mbote mingi” na meso ya Yehova. (Dan. 9:23; 10:11, 19) Ya tsyeleka, Yehova ke na nsatu ya kuvutula na luzingu bandiku ya yandi ya ntima yina fwaka.—Yobi 14:15.

5. Yinki beto ke sala samu beto kuma bandiku ya Yehova ya ntima?

⁵ Yinki ke na salá ti bubu yayi, bantu ya masumu tunga kindiku ya ngolo na Yehova? Na yinza nyonso, bantu mingi ke bandiku ya Yehova. Ya vanda babakala, bakento to bana ya fioti, bawu nyonso ke na lakisá na ndyatulu ya bawu ya mbote ti ba ke bandiku ya Yehova ya ntima. Yehova “ke tungá kindiku ya ngolo na bantu ya mbote.” (Bin. 3:32) Ni munkayulu ya Yesu me pesa beto bweso ya kutunga kindiku ya ngolo na Yehova. Mpe ya me fungudila beto nzila ya kupesa luzingu ya beto na Yehova, samu na kukuma bandiku ya yandi. Ntangu beto ke baká desizion yayi, beto ke kotá na dikanda ya bamilion ya bakristo yina me pesa luzingu ya bawu na Yehova mpe kuzwá bateme, samu na kutunga “kindiku ya ngolo” na Muntu yina me lutila nene na yinza nyonso!

6. Wa’ faso beto lenda lakisa ti beto ke pesá valere na kindiku ya beto na Yehova?

⁶ Wa’ faso beto lenda lakisa ti kindiku ya beto na Yehova ke ntalu mingi na meso ya beto? Faso Abraham na Yobi, yina lutisá bamvula kuluta 100 kaka ya kukangama na Nzambi, beto mpe me lunga na kulanda kifwani ya bawu, ata beto me lutisa bamvula mingi na kusadila Yehova na yinza ya masumu yayi. Faso Danyele, beto mpe me lunga na kupesa valere na kindiku ya beto na Yehova, kulutila luzingu ya beto. (Dan. 6:7, 10, 16, 22) Yehova ke sadisa beto na kuvanda na ngolo ya kulemba ve mpe ya kubwa ve na mantwala ya bampasi yina beto ke kutaná na yawu, mpe na kuvanda kaka na kindiku ya ngolo na yandi.—Flp. 4:13.

7. a) Faso me zonza Bingana 15:8, wa’ faso Yehova ke tadilá lusambu ya beto? b)Wa’ faso Yehova ke pesá mvutu na balusambu ya beto?

⁷ Kimvwama ya nkaka yina beto ke talá ve, ni lusambu. Bandiku ke zonzilá ntangu nyonso mambu yina ke na bawu na ntima. Ya ke kwandi faso yina na kindiku ya beto na Yehova? Ee, ya ke faso yina! Yehova ke sadilá Biblia na kuzonzila beto, mpe na kati ya yawu, yandi ke zonzilá beto makanisi ya yandi. Beto ke zonzá na yandi, ntangu beto ke sambilá, mpe beto lenda zonzila yandi basekre ya beto, mpe mambu nyonso ya fioti yina beto ke na yawu. Yehova ke talá  kilengi na kuwa lusambu ya beto. (Tanga Bingana 15:8.) Faso ndiku ya mbote, Yehova ke suká ve kaka na kuwa lusambu ya beto, kasi yandi ke pesá mpe mvutu na yawu. Ntangu ya nkaka, bamvutu ke kwizá na mbangu. Ntangu ya nkaka mpe, ya ke lombá beto sambila bambala mingi na mambu to kima mosi. Kasi beto lenda ndima na ntima nyonso ti mvutu ke kwiza na ntangu mpe na faso yina me lunga. Na yawu, ntangu ya nkaka, mvutu ya Nzambi ke vandá ve faso mosi na yina beto ke vingilá. Na kifwani, beto lenda sambila Yehova na kukatula mambu ya mpasi yina ke na kwamisá beto, kasi yandi lenda sola na kupesa beto mayela mpe ngolo ya kulemba ve.”—1 Ko. 10:13.

8. Wa’ faso beto lenda lakisa ti lusambu ke dikabu ya ntalu na meso ya beto?

⁸ Wa’ faso beto lenda lakisa ti lusambu ke dikabu ya ntalu na meso ya beto? Faso ya ntete ya kulakisa yawu, ni ya “kusambilá ntangu nyonso.” (1 Tes. 5:17) Yehova ke natá ve bantu na ngolo na kusambila yandi. Kasi, yandi ke zitisá liberte ya beto ya kusola, mpe yandi me lomba na beto na “kukangama na lusambu.” (Rom. 12:12) Mpe beto lenda lakisa ti lusambu ke dikabu ya ntalu na meso ya beto, si beto ke na kifu ya kusambilá bambala mingi na kilumbu. Kasi, na kati ya lusambu ya beto, beto zimbana ve na kuvutulá matondo na Yehova mpe na kupesa yandi nkembo.—Nku. 145:2, 3.

9. Yinki dikabu ya lusambu ke salá na mpangi mosi, mpe yinki ya ke salá nge na ntima?

⁹ Si beto lutisa ntangu mingi na kusadila Yehova, beto ke tala mpe ke zaba bafaso mingi yina Yehova ke pesá bamvutu na lusambu, kilengi ya beto ya kusambila ke lutila. Beto baka kifwani ya Chris, yina me lutisa bamvula 47 na kisalu ya predikasion ya ntangu nyonso. Yandi me zonza: “Ya ke salá munu kilengi na kuvumbuka na suka-suka, samu na kuzonza na Yehova na lusambu. Ya ke kitoko na kusambila Yehova na suka, ntangu bwisi ke na kwendá kutsya, mpe ntangu bima nyonso ke na talaná kitoko. Ya ke pesá munu okazion ya kuvutula matondo na Yehova samu na bima nyonso yina yandi pesá beto, mpe bweso ya kusambila yandi na dikabu ya lusambu. Mpe na nkokila, tala kilengi yina ya ke salá munu na kulala na ntima ya kuzuna.”

10. Samu na yinki mpeve ya santu ke kima ya ntalu na meso ya beto?

¹⁰ Mpeve ya santu ke dikabu ya nkaka yina ke talaná ve. Yesu zonzá na beto na kulomba mpeve ya santu ntangu nyonso. (Luke 11:9, 13) Yehova ke sadilá mpeve ya santu na kupesa beto “ngolo yina me lutila [ngolo] ya bantu.” (2 Ko. 4:7; Bis. 1:8) Na mantwala ya bampasi, Yehova ke sadilá mpeve ya santu, samu ya sadisa beto na kulemba ve mpe na kubwa ve.

11. Wa’ faso mpeve ya santu lenda sadisa beto?

¹¹ Mpeve ya santu ke sadisá beto na kulenda na kulungisa bisalu ya beto ya kimpeve. Ya lenda kulisa mayela ya beto mpe ngolo yina beto ke deja na yawu, na kulungisa baresponsabilite ya beto. Ya tsyeleka, beto ke kuzwa bambuma ya mbote na kisalu ya Yehova, na ngolo ya beto mosi ve, kasi kaka ntangu mpeve ya santu ke sadisá beto.

12. Faso me zonza Nkunga 139:23, 24, beto lenda lomba mpeve ya santu na kusadisa beto na yinki?

¹² Faso ya nkaka yina mpeve ya santu ke talaná kima ya ntalu, ni ntangu beto ke sambilá samu ya sadisa beto na kuzaba to na kubasisa makanisi to bansatu yina ke na kati ya ntima ya beto. (Tanga Nkunga 139:23, 24.) Si beto me sambila samu na yawu, Yehova ke sadila mpeve ya santu na kulakisa beto makanisi mpe bansatu ya fioti-fioti ya yimbi yina ke na kati ya beto. Mpe si beto me zaba makanisi yango, beto lomba mpeve ya santu ya Nzambi samu ya pesa beto ngolo ya kubwa ve na makanisi mpe bansatu yina. Si beto sala faso yina, beto ke lakisa na Yehova ti beto ke ve na nsatu ya kusala mambu yina lenda kanga yandi nzila ya kusadila mpeve ya santu, samu na kusadisa beto.—Ef. 4:30.

13. Wa’ faso beto lenda lakisa ti mpeve ya santu ke dikabu ya ntalu na meso ya beto?

¹³ Beto ke vutulá matondo samu na mpeve ya santu, si beto baka ntangu ya kukanisa na mambu yina ya ke na sadisá beto na kusala bubu yayi. Avant yandi vutuka na zulu, Yesu zonzá na bilandi ya yandi: “Kasi, beno ke kuzwa ngolo ntangu mpeve ya santu ke kwiza na zulu ya beno, mpe beno ke kuma batemwe ya munu [. . .] tii na kisika yina ntoto me suka.” (Bis. 1:8) Mambu yango ke na lunganá na faso ya ngitukulu bubu yayi. Yehova ke na sadilá mpeve santu na  kuvukisa bantu kuluta 8,5 milion yina ke na katuká na bayinsi nyonso samu na kusadila yandi. Mpe beto ke na paradis ya kimpeve, samu mpeve ya santu ke sadisá beto na kuvanda na bifu ya mbote mutindu: Luzolo, kilengi, kizunu, lembami (kuvanda ya kulembama), mpe kuzaba kukutika nzutu. Ni bifu nyonso yayi ke salá “mbuma ya kimpeve.” (Gal. 5:22, 23) Mpeve ya santu ke dikabu ya ntalu mingi!

14. Ba nani beto ke talá ve yina ke twadisá beto na kisalu ya predikasion?

¹⁴ “Kusala kintwadi” na Yehova, Yesu na kimvuka ya ba-ange, ke kimvwama yina beto ke talá ve. (2 Ko. 6:1) Beto ke salá na bawu, ntangu beto ke vandá na kisalu ya predikasion. Paul zonzá samu na yandi mosi, mpe samu na ba yina ke salá kisalu yayi: “beto ke salá kintwadi na Nzambi.” (1 Ko. 3:9) Ntangu beto ke salá kisalu ya predikasion, beto ke kumá bampangi ya kisalu ya Yesu. Ntangu yandi zonzá na bilandi ya yandi na “kukumisa bantu ya yinza nyonso bilandi ya yandi,” Yesu zonzá dyaka ti: “Mu ke na beno.” (Mat. 28:19, 20) Kasi, wa’ faso beto ke salá kintwadi na ba-ange? Beto ke na kilengi mingi na yina ba-ange ke twadisá beto “na kuzonzila nsangu ya mbote [. . .] na bantu yina ke zingá na ntoto”!—Luz. 14:6.

15. Zonzila bifwani ya Biblia yina ke na lakisá ti Yehova ke vandá na beto na kisalu ya predikasion.

¹⁵ Ntangu Yehova, Yesu, mpe ba-ange ke twadisá beto, yinki beto ke lendá na kusala? Ntangu beto ke kundá mbutu ya nsangu ya mbote ya Kimfumu ya Nzambi, bantima yina ke ya kubonga ke yambak’ yawu mpe ke kulá na kimpeve. (Mat. 13:18, 23) Nani ke kulisá bambutu yango mpe nani ke salá ti ya buta bambuma? Yesu lakisá ti, ata muntu lenda kuma kilandi ya yandi si “Tata [. . .] me benda ve yandi.” (Yoa. 6:44) Biblia me pesa kifwani yina ke na kwelaná na yawu. Kanisa na ntangu yina, Paul zonzilá nsangu ya mbote na grupe ya bakento yina vandá na ngaanda ya bwala ya filipe. Kuzimbana ve mambu yina Bilbia ke zonzá samu na mosi na kati ya bawu, Lydie: “Yehova fungulá ntima ya yandi samu yandi ndima mpe kwikila mambu yina Paul vandá zonza.” (Bis. 16:13-15) Faso Lydie, Yehova ke na bendá bamilion ya bantu ya nkaka na kimvuka ya yandi.

16. Na nani beto zolá pesa nkembo si beto me kuzwa bambuma ya mbote na kisalu ya predikasion?

¹⁶ Si beto me kuzwa bambuma ya mbote na kisalu ya predikasion, nani me bonga na kuzwa nkembo? Paul pesá mvutu na kyuvu yayi ntangu yandi soniká na kimvuka ya Korinte mambu yayi: “Mu me kunda mbuma, mpe Apolos me tula maza, kasi ni Nzambi ke na kulisak’ yawu. Na yina muntu yina ke kundá mbuma na muntu yina ke tulá maza ke ve mfunu, kasi ni Nzambi yina ke kulisak’ yawu ke mfunu.” (1 Ko. 3:6, 7) Faso Paul, beto mpe zolá pesa nkembo na Yehova samu na bambuma ya mbote yina beto ke kuzwá na kisalu ya predikasion.

17. Wa’ faso beto lenda lakisa ti beto ke tondá “kusala kintwadi” na Yehova, Yesu, mpe ba-ange?

¹⁷ Wa’ faso beto lenda lakisa ti beto ke tondá samu na bweso ya “kusala kintwadi” na Nzambi, Yesu, mpe ba-ange? Beto ke salak’ yawu ntangu beto ke sadilá ntangu nyonso yina me talana, na kuzonzila na tiya nyonso, nsangu ya mbote na bantu ya nkaka. Ya ke na bafaso mingi ya kusala yawu. Ya lenda vanda, kupesa nsangu ya mbote na “meso ya bantu nyonso, to na [predikasion ya] yinzo na yinzo.” (Bin. 20:20) Bantu mingi mpe ke zolá predikasion na banzila. Ntangu ba ke kutaná na bantu yina ba me talana mbala ya ntete, ba ke pesá bawu mbote nete ba ndiku yina me zabana ntama, mpe na manima, ba me banda kusolola. Si muntu me ndima kusolola na bawu, na buzitu nyonso, ba ke natá malembe-malembe disolo ya bawu na kuzonzila nsangu ya mbote ya Kimfumu ya Nzambi.

18-19. a) Wa’ faso beto ke losá maza na mbuma ya matsyeleka yina beto ke kundaka? b) Zonzila kifwani ya muntu vandá longoka Biblia mpe yina Yehova sadisá.

¹⁸ Faso “bampangi ya kisalu ya Nzambi,” beto  zolá suka ve kaka na kukundá bambuma ya matsyeleka, kasi beto zolá tula mpe maza na yawu. Si muntu me zola mambu yina beto me longa yandi, beto zolá sala ngolo na kuvutuka kusolola na yandi, to beto lenda lomba na mpangi mosi na kwenda banda kulongoka na yandi. Ya ke salá beto kilengi na kutala faso Yehova ke na sadisá muntu yina ke longoká na beto na kuchange ndyatulu mpe makanisi ya yandi, samu na kukuma kilandi ya Yesu.

¹⁹ Beto zonzila ntete kifwani ya Raphalalani, yina vandá nganga ya nene na bwala ya Afrique du Sud. Yandi vandá zola mambu yina yandi vandá longoka na kati ya Biblia. Kasi ya vandá mpasi na yandi na kundima malongi ya Biblia yina ke niminá kusolola na bantu ya kufwa. (Kul. 18:10-12) Malembe-malembe, yandi biká Nzambi twadisa makanisi ya yandi. Mpe na manima, yandi biká kusala bunganga, yina zola zonza, kusala dyaka ve kisalu kaka mosi yina vandá pesa yandi kima ya kudya. Bubu yayi, Raphalalani me kuma na bamvula 60, mpe yandi me zonza: “Mu ke na vutulá matondo na batemwe ya Yehova yina sadisá munu na bafaso mingi. Na kifwani, ba sadisá munu na kuzwa kisalu. Na nyonso, mu ke na vutulá matondo na Yehova yina me sadisa munu na kuchange luzingu ya munu, samu bubu yayi, mu me kuzwa bateme, mpe mu me kuma mosi ya batemwe ya Yehova yina lenda sala kisalu ya predikasion.”

20. Yinki nge ke lemba ve na kusala?

²⁰ Na artikle yayi, beto me zonzila bimvwama yiya (4) yina ke talaná ve na meso. Kima yina me lutila nene, ni bweso yina beto ke na yawu ya kutunga kindiku ya ngolo na Yehova. Kindiku ya ngolo na Yehova lenda nata beto na kuzwa bimvwama ya nkaka yina ke talaná ve na meso: kusambila yandi, mpeve ya santu yina ke sadisá beto, mpe ba yina ke na zulu ke sadisá beto na kisalu ya predikasion. Beto ke lemba ve na kuvutula matondo samu na bimvwama yina ke talaná ve. Mpe beto ke bika ve na kuvutula ntangu nyonso matondo na Yehova samu yandi ke ndiku ya beto ya mbote.