1. Yisinke ga uyungire Jesus kuhamena emona lyemeguru?

MAUHWI gamwe kapi aga moneka. Mauhwi gomulyo aga twa kara nago, kapi atu vhuru kugamona. Apa Jesus ga geve Eudiso lyopoNdundu, age kwa tente asi pwa kara mauhwi aga ga pitakana emona. Ntani age kwa tente asi: “Oku aku kara emona lyoge, yiko kooko aku kara mutjima goge.” (Mat. 6:19-21) Apa atu dimburura asi sininke songandi mulyo kwetu, ayo kututumangeda tu si kondjere nokusigwana. Ose ‘kulipongaikira emona meguru’ pokutulisa po edina lyewa naKarunga. Jesus kwa tente asi emona lyangoso, kapi ngava livaka vawidi ndi va lizonagure po.

2. (a) Kuliza no-2 Vakolinte 4:17, 18, yisinke ga tu korangedere Paurusa natu rugana? (b)Yisinke natu ka zogera mosirongwa esi?

² Mupositoli Paurusa kwa tu korangedere tu nwike meho getu ‘koyininke eyi ayi . . . dili kumoneka.’ (Resa 2 Vakolinte 4:17, 18.) Yininke oyo, kwa kwatera mo matungiko aga nga tu kahafera mouzuni woupe. Mosirongwa esi natu ka lironga mauhwi gane aga twa kara nago ngesi aga aga dili kumoneka. Ago kuna kara, elikwatakano lyetu naKarunga, ekanderero, mpepo zokupongoka, ntani evatero eli atu gwana kwaJehova naJesus ntani novaengeli. Ntani natu kazogera hena omu natu likida rupandu rwetu koyininke eyi ayi dili kumoneka.

3. Uhwi musinke wounene twa kara nawo ntani ngapi omu twa genda tu u gwane?

³ Uhwi wounene ou atu dili kumona kuna kara elikwatakano lyetu naJehova. (Epis. 25:14) Nampili ngomu twa dira  kusikilira mo, Karunga kutulisa po ukaume kumwe nose. Age kuyirugana oyo morwa nzambo zaJesus zosizoweseso kwa “gusa po nonzo douzuni”. (Joh. 1:29) Jehova ga yi divire asi Jesus nga limburukwa dogoro konomfa, yipo nga zowore vantu. Eyi yiyo Karunga ga tulisilire po ukaume novantu ava va parukire komeho Jesus a fe.—Rom. 3:25.

4. Vagara musinke va kere vakaume vaKarunga komeho Jesus a wize pevhu?

⁴ Koneka vagara vamwe ava va kere vakaume vaKarunga. Gumwe gwawo kuna kara Abirahamu ogu ga kere nepuro lyokupama. Nampili konyima zapa da pitire po nomvhura 1 000, kutunda apa ga dogorokere Abirahamu, Jehova simpe kwa mu tumbwire asi “mukwetu.” (Jes. 41:8) Eyi kutanta asi apa ava dogoroka vantu, Jehova simpe ku va tara asi vakaume vendi. Jehova simpe kutara Abirahamu ngwendi kapi ga dogoroka. (Ruk. 20:37, 38) Mugara gumwe hena kuna kara Joba. Apa Jehova ga kere nepongo novaengeli meguru, age kwa uyungire yininke yoyiwa kuhamena Joba. Age kwa tente asi: “pevhu patupu nampili gumwe ga limburukwa age ga hungama ngwendi yige. Age kukerera nge, ga nyenga kurugana udona nkenye ou.” (Joba 1:6-8) Ngapi omu Jehova ga lizuvhire kuhamena Ndaniyera ogu ga mu karerere mosirongo sovapagani nomvhura 80? Kupitira momuengeli, Jehova kwa tanterere Ndaniyera yikando yitatu asi age ‘ga mu hara.’ (Ndan. 9:23; 10:11, 19) Eyi kutupa ehuguvaro asi Jehova kuna kundindira nononkondo a ka vhumbure vakaume vendi ava va dogoroka.—Joba 14:15.

5. Yisinke twa hepa kurugana nsene twa hara kutulisa po ukaume naJehova?

⁵ Vantu vangapi wokudira kusikilira mo va kara nelikwatakano naJehova? Vakaume vaJehova kwa sika komamiliyona. Sinzi sovagara novakadi novanona mouzuni mudima, kuna kuyilikida asi awo vakaume vaKarunga kupitira moyirugana yawo. Bibeli kutanta asi Jehova kutulisa po ukaume novantu ‘wovahungami’ ndi kuvatura mougami. (Yis. 3:32) Sizoweseso kuninkisa vantu va tulise po ukaume naJehova, nokuligava kwendi ntani va gwane ekuho. Nsene tu ligava kwaJehova nokugwana ekuho, ose ngatu hama kombunga zoVakriste mamiliyona ava va tulisa po ukaume nomuntu gomulyo po mouzuni.

6. Ngapi omu natu likida rupandu kelikwatakano eli twa kara nalyo naJehova?

⁶ Ngapi omu natu likida rupandu kelikwatakano eli twa kara nalyo naJehova? Abirahamu naJoba, kwa twikilire kukarera Jehova noulimburukwi nomvhura dokupitakana 100. Nose twa hepa kutwikira kukarera Jehova noulimburukwi, yi kare asi nare twa tameka kumukarera ndi hawe. Ntani ngwendi Ndaniyera, nose twa hepa kutara elikwatakano lyetu naJehova asi mulyo unene kupitakana eparu lyetu. (Ndan. 6:7, 10, 16, 22) Nevatero lyaJehova, ose ngatu lididimikira nkenye udigu ou ngatu ligwanekera nawo nokunkondopeka ukaume wetu kumwe nendi.—Fil. 4:13.

7. (a) Kuliza noYisewe 15:8, ngapi a lizuvhu Jehova apa atu kanderere kwendi? (b) Ngapi omu Jehova a limburura makanderero getu?

⁷ Uhwi umwe ou atu dili kumona, kuna kara ekanderero. Vakaume wovawa, kulitantera omu vana kulizuvha ntani neyi vana kugazara. Eyi ya lifana noukaume wetu naJehova. Age kuuyunga nose kupitira moBibeli. Age kututantera magazaro gendi ntani nomalizuvho gendi. Ose kuuyunga naJehova kupitira mekanderero ntani kuvhura tu mu tantere eyi tuna kugazara ntani nomalizuvho getu aga atu dili kutantera wopeke. Jehova kuhafa apa atu kanderere  kwendi. (Resa Yisewe 15:8.) Mokumona asi Jehova kaume gomuwa, age kapi tupu a purakene komakanderero getu, nye age hena kugalimburura. Poyiruwo yimwe, age kulimburura makanderero getu usimbu. Nye poyiruwo yimwe, age kapi a limburura makanderero getu usimbu. Nye twa kara nehuguvaro asi age nga limburura makanderero getu monkedi zongwa ntani posiruwo sokuwapera. Nye poyiruwo yimwe, Jehova kuvhura kulimburura makanderero getu monkedi ezi tuna dili kundindira. Pasihonena, mevango lyokugusa po udigu, age kuvhura a tu pe nonkondo ntani nounongo yipo tu lididimikire udigu owo.—1 Kol. 10:13.

8. Ngapi natu likida rupandu kouhwi wekanderero?

⁸ Ngapi natu likida rupandu kouhwi wekanderero? Nkedi zimwe kuna kara pokukanderera nkenye apa ngwendi moomu azi tu korangeda Bibeli. (1 Tes. 5:17) Jehova kapi a tu sininike tu kanderere kwendi. Nye age kulikida efumadeko koumanguruki ou ga tu pa ntani age kutukorangeda tu “kanderere narunye.” (Rom. 12:12) Yipo nye, kuvhura tu likide rupandu kouhwi wekanderero pokukanderera yikando yoyinzi mezuva. Ntani momakanderero getu, twa hepa kupandura nokuhamberera Jehova.—Epis. 145:2, 3.

9. Ngapi munazinyetu gumwe a lizuvhu kuhamena uhwi wekanderero ntani ove ngapi o lizuvhu?

⁹ Ngomu tuna kukarera Jehova siruwo sosire noku dimburura omu Jehova ana kulimburura makanderero getu, ayo ngayi tu ninkisa tu kare norupandu kouhwi wekanderero. Pasihonena, tu tareni eyi ga uyunga ko munazinyetu gomugara gedina Chris, ogu ga rugana sirugana sosiruwo nasinye nomvhura 47 da ka pita. Age kwa tanta asi: “Ayo kuhafesa nge apa ani pinduka ngurangura zonene ni kanderere kwaJehova. Ame kuhafera kuuyunga naJehova ngomu ezuva lina kupuma nokuninkisa eme limoneke nawa. Ayo kuninkisa nge ni pandure Jehova komauhwi aga ga tu pa, kukwatera mo uhwi wekanderero. Ntani apa ani kanderere kongurova, ayo kuninkisa nge ni lizuvhe ruhafo ntani nokurara nezwi lyewa lyokomutjima.”

10. Morwasinke natu karera norupandu kouhwi wompepo zokupongoka?

¹⁰ Mpepo zokupongoka kuna kara uhwi umwe womulyo ou atu dili kumona. Jesus kwa tu korangedere tu hundire mpepo zokupongoka kupitira mekanderero. (Ruk. 11:9, 13) Jehova kutupa “nonkondo dononene,” kupitira mompepo zokupongoka. (2 Kol. 4:7; Yirug. 1:8) Mpepo zokupongoka kutuvatera tu lididimikire nkenye udigu tuna ku ligwanekera nawo.

11. Ngapi omu mpepo zokupongoka azi tu vatere?

¹¹ Mpepo zokupongoka kuvhura kutuvatera tu sikise mo yitumbukira eyi twa kara nayo mombunga zaJehova. Mpepo zokupongoka kuvhura kugwederera kounongo ou twa kara nawo. Nayinye eyi atu tompora mombunga zaJehova, kututompoka tupu nevatero lyompepo zokupongoka.

12. Kuliza nEpisarome 139:23, 24, ngapi omu mpepo zokupongoka ngazi tu vatera?

¹² Nkedi zimwe omu natu likida rupandu kouhwi wompepo zokupongoka, kuna kara pokuzihundira kupitira mekanderero yipo tu dimburure magazaro nomadowo gomadona. (Resa Episarome 139:23, 24.) Nsene tu kanderera kwaJehova, age nga tu vatera tu dimburure magazaro nomadowo gomadona aga twa kara nago. Konyima zokudimburura magazaro nomadowo gomadona, kuvhura tu hundire Jehova a tu pe mpepo zendi zokupongoka yipo zi tu pe nonkondo tu ga nyokere po. Nsene tu yi rugana, ose ngatu likida asi kapi tuna hara kurugana nkenye eyi nayi ninkisa Jehova a dire kutupa mpepo zendi zokupongoka.—Efe. 4:30.

13. Ngapi natu likida rupandu kouhwi wompepo zokupongoka?

¹³ Kuvhura tu kare norupandu kouhwi wompepo zokupongoka nsene tu gazadara ko eyi zina kusikisa mo momazuva getu. Komeho Jesus a ze meguru, age kwa tanterere varongwa vendi asi: “Nye one ngava mu zwida nonkondo, apa ngazi wiza Mpepo zoKupongoka pweni, makura ngomu kare nombangi dange . . . dogoro nokooku wa ka twa uzuni.” (Yirug. 1:8) Eyi yiyo yina kuhoroka neina. Nevatero lyompepo zokupongoka, vantu wokusika po-8 500 000 kuna  kukarera Jehova mouzuni mudima. Neina, vantu vaJehova kuna kuhafera uumwe morwa mpepo zokupongoka kutuvatera tu tunge po yikara yoyiwa ngwendi eharo, ehafo, mbili, edidimiko, nkenda, uwa, epuro, ugomoki ntani nelipangero. Yikara eyi kuna kara “yiyimwa yompepo” zokupongoka. (Gar. 5:22, 23) Yosili mpepo zokupongoka, kuna kara uhwi wouwa.

14. Uhwi musinke wokudira kumoneka ou atu gwana apa atu lihameke moyirugana yokuzuvhisa?

¹⁴ Uhwi umwe ou twa kara nawo ou atu dili kumona, kuna kara wokuruganena kumwe naJehova naJesus ntani novaengeli. (2 Kol. 6:1) Nkenye apa atu lihameke moyirugana yokuzuvhisa, ose kuruganena kumwe nawo. Paurusa kwa tente asi: navenye ava ava lihameke mosirugana oso, “varugani kumwe naKarunga.” (1 Kol. 3:9) Nkenye apa atu lihameke moyirugana yokuzuvhisa, ose kurugana kumwe hena naJesus. Diworoka asi apa Jesus ga tanterere varongwa vendi va ka ‘ninke varongwa, konomuhoko nadinye,’ age kwa va tanterere asi: “Ame neni ngani kara.” (Mat. 28:19, 20) Ngapi atu ruganene kumwe novaengeli? Vaengeli kutupitisira apa atu twara “Mbudi zoNgwa zanarunye” kovantu navenye vepevhu!—Ehor. 14:6.

15. Gava sihonena somoBibeli esi sina kulikida omu Jehova a tu vatere apa atu lihameke moyirugana yokuzuvhisa.

¹⁵ Mokumona asi Jehova naJesus novaengeli kutuvatera, yisinke atu sikisa mo? Ngomu atu kunu mbuto zoUhompa, mbuto zimwe kugwira ponomutjima donongwa nokukura. (Mat. 13:18, 23) Yilye ogu a ninkisa mbuto ozo zi kure nokuyima? Jesus kwa tente asi kwato muntu gokuvhura kukara murongwa gwendi, va hana kumukoka oGuhwe. (Joh. 6:44) MoBibeli mwa kara sihonena simwe. Koneka eyi za uyunga Bibeli kuhamena Lidiya, gumwe govakadi ava ga zuvhisilire Paurusa ponze zositata saFilipi. Azo kwa tanta asi: “Hompa makura ta zegurura mutjima gwendi, a kwate egano lyeyi ana kuuyunga Paurusa.” (Yirug. 16:13-15) Ngwendi Lidiya, Jehova kwa koka mamiliyona govantu.

16. Yilye twa hepa kupandura koyitundwa mo yoyiwa eyi atu gwana moyirugana yokuzuvhisa?

¹⁶ Yilye twa hepa kupandura koyitundwamo yoyiwa eyi atu gwana moyirugana yokuzuvhisa? Paurusa kwa geve elimbururo kepuro olyo, apa ga tjangerere mbungakriste zomoKolinte. Age kwa tente asi: “Ame nyame na tapeka, Aporo gokutekera, ano Karunga yige a kulisa yimeno, Mutapeki nomutekeli nayimwe si, mwene-mwene po Karunga ogu ayi kulisa.” (1 Kol. 3:6, 7) Ngwendi Paurusa, nose twa hepa kupandura Jehova koyitundwamo yoyiwa eyi atu hafere moyirugana yokuzuvhisa.

17. Ngapi natu likida rupandu kositumbukira esi twa kara naso sokuruganena kumwe naKarunga naJesus ntani novaengeli?

¹⁷ Ngapi natu likida rupandu rwetu kositumbukira esi twa kara naso sokuruganena kumwe naKarunga naJesus ntani novaengeli? Pokupapara nompito yipo tu lihameke mo unene moyirugana yokuzuvhisa. Nonkedi nonzi omu natu vhura kuyirugana. Dimwe kuna kara pokuzuvhisa moyitarameho ntani tunda embo zende embo. (Yirug. 20:20) Ano vamwe kuzuvhisa nampili kapisi moyirugana yokuzuvhisa vana kara. Apa ava gwana muntu, awo kumumorora monkedi zongwa ntani nokutameka kuzogera nage. Nsene muntu ogu vana kuzogera nage a likida elituromo, awo kumuzuvhisira mbudi zongwa.

18-19. (a) Ngapi omu atu tekere mbuto zousili? (b) Gava sihonena esi sina kulikida omu Jehova ga vatera mulirongi gumwe goBibeli?

¹⁸ ‘Ngovarugani kumwe naKarunga,’ kapisi  tu kune tupu mbuto zousili, nye twa hepa hena kuzitekera. Nsene gumwe kuna kulikida elituromo, twa hepa kukatengwira ko noku ya zogera kumwe nage ndi tu ture po mawapaiko a lironge nagumwe. Ose kuhafa apa atu mono omu Jehova ana kuvatera murongwa goBibeli yipo a rundurure malizuvho nomagazaro gendi.

¹⁹ Tu konakoneni sihonena saRaphalalani, gomoAfrika Mbindakano ogu ga kere simbanda. Age kwa haferere eyi ga lirongere moBibeli. Apa ga ya dimbwilire eyi za uyunga Bibeli kuhamena kuuyunga novadimu, age kwa mu karerere udigu kuyitambura. (Deut. 18:10-12) Nye age kwa pulisilire Jehova a rundurure magazaro gendi. Konyima, age kwa ya hagekere kukara simbanda nampili ngomu ya kere asi yiso selike sirugana ga divire. Raphalalani, ogu ana kara ngesi nonomvhura 60 kwa tanta asi: “Ame kupandura unene Nombangi daJehova kweyi va vatera nge mononkedi dokulisiga-siga, kukwatera mo kuvatera nge ni gwane yirugana yapeke. Ame kuna kupandura hena unene Jehova kweyi ga vatera nge ni rundurure eparu lyange yipo ni kare gumwe goNombangi dendi.”

20. Yisinke ono tokomene kurugana?

²⁰ Mosirongwa esi, tuna lirongo mo mauhwi gamwe aga atu dili kumona. Uhwi wounene po, kuna kara elikwatakano lyetu eli twa kara nalyo naJehova. Awo kutuninkisa tu mu hedere kupitira mekanderero, nokulimonena evatero lyompepo zokupongoka ntani awo kutupulisira tu rugane kumwe nage naJesus ntani novaengeli. Tu tokomeneni kulikida rupandu kwaJehova komauhwi aga ga tu pa gokudira kumoneka. Ngano tu twikireni kupandura Jehova kweyi ga kara kaume gomuwa.