1. Ino Yesu wakaamba nshi pamakani abuboni bwakwiculu?

TESHI buboni boonse buboneka. Alimwi buboni bucite mpindu abuumbi tabuboneki. Mulikani Yesu ndyakaamba kaali paKalundu, wakaamba pabuboni bwakwiculu ubo bucite mpindu kwiinda maali na shintu shimwi muntu nsheenga wabaasho. Lyalo wakeelikawo akwaamba ayi: “Myoyo yanu ilaba kweenka uko kuli bubile bwanu.” (Mate. 6:19-21) Moyo wesu ngoopa kwaamba ayi tutalike kulangoola shintu nshetubona ayi shilayandika abuumbi. Inga twalibikila “buboni kwiculu” kwiinda mukuba ampuwo ibotu kuli Lesa. Yesu wakaamba ayi buboni bwa mushobo uyu, inga tabunyonyooki nabi kwiipwa.

2. (a) Kweelana a 2 Bene Kolinto 4:17, 18, ino Paulo wakatuyuminisha kucita nshi? (b) Ino tutokwiiya nshi mumutwi uyu?

² Mutumwi Paulo wakatuyuminisha ayi tulyeelete ‘kubika myoyo yesu pashintu shitaboneki.’ (Amubelenge 2 Bene Kolinto 4:17, 18.) Buboni ubu buleelikaawo ashintu shibotu shoonse nsheshi tukacane mucishi cipya. Mumutwi uyu tutokwiiya pabuboni butaboneki bone mbotucite pacecino ciindi mbuli; bushicibusa bwesu a Lesa, coolwe cakubandika a Lesa mumupailo, lucafwo lwa mushimu usalashi, alimwi a Yehova, Yesu abaanjelo mbobatucafwa muncito yakushimikila. Tutokwiiya ambweenga twatondesha ayi tulalumba pabuboni ubu butaboneki.

3. Ino ncipo nshi ciyandika abuumbi citaboneki, alimwi ino nciinshi cakapa kwaamba ayi cikonsheke?

³ Bushicibusa bwesu a Yehova, ncipo citaboneki ciinditeewo abuumbi. (Kulu. 25:14) Ano sa Yehova inga waba abushicibusa  abantu batamaninite akutolelela kuba usalalite cakumaninina? Ee inga waba, mukwiinga cilubula ca mulambu wakwe Yesu ‘cakakusha shibiibi sha bantu ba mucishi coonse capanshi.’ (Joni 1:29) Nabi Yesu kaatana kufwa, Yehova wakalinga kucishi ayi Yesu alaakutolelela kushomeka kushikila kulufu kwaamba ayi akapulushe bantu boonse. Ici ncecakapa kwaamba ayi bantu bakalingaako Klistu kaatana kufwa, bacikoonshe kuba abushicibusa a Lesa.​—Loma. 3:25.

4. Ino mbaani bakalinga beshicibusa bakwe Lesa, Klistu kaatana kusa pacishi capanshi?

⁴ Amuyeeye pabantu bakalinga beshicibusa bakwe Yehova, Yesu kaatana kusa pacishi capanshi. Abulaamu wakalinga kucite lushomo luyumu muli Yehova. Nabi ndipakeenda myaaka iindilila 1,000 kuswa ciindi Abulaamu ndyaakafwa, Yehova wakamwiita ayi “shicibusa wangu.” (Isa. 41:8) Aboobo ici cilatondesha patuba kwaamba ayi na muntu ngwaakalinga kubona ayi ngushicibusa wakwe wafwa, Yehova alatolelela kumubona ayi ngushicibusa. Yehova teshi akamulubewo Abulaamu. (Luka 20:37, 38) Cakubonenaako cimwi ncakwe Jobo. Baanjelo boonse ndyebakabungana pomwi kwiculu, Yehova wakaamba shibotu pali Jobo. Wakaamba ayi Jobo ‘Ngumuntu utacite kampenda, ululeme, undemeka akutalamuka cibiibi.’ (Jobo 1:6-8) Ino Yehova wakalinyumfwa buyani pali Danyelo, uyo wakamusebensela cakushomeka kwa myaaka mpashi 80 nabi ndyaakalinga kukala kucishi nkobatakalinga kupaila Lesa? Baanjelo bakalwiita Danyelo mankanda otatwe ayi wakalinga muntu “usunikwi abuumbi” kuli Lesa. (Danye. 9:23; 10:11, 19) Inga twashoma cakutatoonsha kwaamba ayi Yehova atolangila ciindi ndyeshi akabushe beshicibusa bakwe bakafwa.​—Jobo 14:15.

5. Ino nshiinshi nshotweelete kucita kwaamba ayi tube abushicibusa buyumu a Yehova?

⁵ Ino mbantu bongaye batamaninite bacite bushicibusa bubotu a Yehova? Mbaanji abuumbi. Twaamba boobo mukwiinga bantu baanji pacishi coonse, basankwa, banakashi, alimwi abaana baniini balacita shitondesha kwaamba ayi mbeshicibusa bakwe Lesa. “Baluleme mbobacite bushicibusa buyumu anguwe.” (Tus. 3:32) Bushicibusa ubu bulakonsheka mukwiinga balashoma mucilubula cakwe Yesu. Inga twaba abushicibusa a Yehova akulyaaba kuli nguwe akubombekwa ceebo ca cilubula. Kucita sheeshi kulatupa coolwe cakuba lubasu lwa Beneklistu baanji bakalyaaba akubombekwa alimwi batosangalala paceebo cakuba “abushicibusa buyumu” a Lesa wiinditewo mububumbo boonse!

6. Ino inga twatondesha buyani ayi tulalumba pa bushicibusa bwesu a Yehova?

⁶ Ino inga twatondesha buyani ayi bushicibusa bwesu a Yehova bulicindeme? Bweenka mbuli Abulaamu alimwi a Jobo mbobakatolelela kushomeka kuli Lesa kwa myaaka iinji, aswebo tulyeelete kutolelela kusebensela Yehova cakushomeka nabi twamusebensela kwa myaaka iinji. Alimwi bweenka mbuli Danyelo, tulyeelete kulemeka bushicibusa bwesu a Yehova kwiinda buumi bwesu. (Danye. 6:7, 10, 16, 22) Kwiinda mulucafwo lwakwe Yehova, inga twacikonsha kuliyumya mumapensho oonse akutolelela kuba abushicibusa buyumu anguwe.​—Fili. 4:13.

7. (a) Kweelana a Tusimpi 15:8, ino Yehova alanyumfwa buyani na katupaila kuli nguwe? (b) Ino Yehova alakumbula buyani mipailo yesu?

⁷ Cipo cimwi citaboneki Lesa ncaakatupa, ncoolwe cakubandikaakwe mumupailo. Beshicibusa balabandikishanya pamakani ambobalinyumfwa alimwi ambobatooyeeya. Ubu mbocibete abushicibusa bwesu a Yehova. Alabandika andiswe kwiinda mu Maswi akwe. Alimwi kwiinda mu Maswi akwe, Yehova alatulwiita mbwaabona shintu alimwi ambwaalinyumfwa. Aswebo tulabandika anguwe kwiinda mumupailo umo motumulwiita nshetutoyeeya alimwi ambotutolinyumfwa. Yehova alakondwa kukutika kumipailo  yesu. (Amubelenge Tusimpi 15:8.) Mukwiinga ngushicibusa wesu utusuni abuumbi, alakutika akukumbula mipailo yesu. Cimwi ciindi inga wafwambaana kukumbula mipailo yesu. Ano cimwi ciindi inga watola ciindi kwaamba ayi atukumbule, nacibi boobo, tulyeelete kutolelela kupaila akushoma ayi alaakukumbula paciindi ceelete alimwi munshila ibotu kwiindaawo. Cimwi ncakwaamba ayi Lesa inga wakumbula mupailo wesu munshila ipusene ansheenga katulangila. Kucakubonenaako, muciindi cakukushawo lipenshi, inga watupa busongo ankusu kwaamba ayi tucikoonshe “kuliyumya.”​—1 Koli. 10:13.

8. Ino inga twatondesha buyani ayi tulalumba pacipo cakubandika a Lesa mumupailo?

⁸ Ino inga twatondesha buyani ayi tulalumba pacipo ici cilibetele? Nshila yomwi nkwiinda mukukonkela nshaatulwiita ayi “amupaile cakutacileka.” (1 Tesa. 5:17) Yehova taatukakatishi ayi tunoopaila. Sombi alalemeka nkusu shesu shakulisalila akutuyuminisha ayi “munoopaila lyoonse.” (Loma. 12:12) Aboobo inga twatondesha ayi tulalumba kwiinda mukupaila mankanda aanji bushiku abushiku. Alimwi ndyetutopaila tulyeelete kwiibaluka kulumba akulumbaisha Yehova.​—Kulu. 145:2, 3.

9. Ino mukwesu umwi alalinyumfwa buyani pamakani amupailo, alimwi ino mwebo mulalinyumfwa buyani?

⁹ Kusebensela Yehova kwaciindi cilaamfu akubona mbwaakumbula mipailo yesu, kulyeelete kutupa kulumba abuumbi pacipo cakubandika anguwe mumupailo. Mukwesu Chris uyo wasebensa muncito yaciindi coonse kwa myaaka 47, wakaamba ayi: “Ndanyumfwa kabotu kubandika a Yehova mumupailo macuunsa cuunsa na ndabuuka. Cilanyumfwika kabotu abuumbi kubandika a Yehova ndyentoobona lisuba mbolipa shintu shoonse kuboneka kabotu! Ici cilampa kumulumba abuumbi pashipo shoonse, kwiilikaawo acipo cakubandikaakwe mumupailo. Alimwi lyoonse pesule lyakupaila ndyentooya mukoona, ndalinyumfwa kabotu abuumbi akoona anjeelacaamba isalalite.”

10. Ino nceebonshi tulyeelete kulumba pa mushimu usalashi Lesa ngwaakatupa?

¹⁰ Mushimu usalashi awalo ncipo citaboneki Lesa ncaakatupa ncotweelete kubona kuyandika.  Yesu wakaamba ayi tulyeelete kutolelela kusenga mushimu usalashi. (Luka 11:9, 13) Yehova alatupa “nkusu shiindaawo nshetucite” kwiinda mu mushimu wakwe. (2 Koli. 4:7; Milimo 1:8) Aboobo inga twacikonsha kuliyumya mumapensho ali woonse ceebo cakucafwikwa amushimu wakwe Lesa.

11. Ino mushimu usalashi ulatucafwa buyani?

¹¹ Mushimu usalashi inga watucafwa kukumanisha ncito njetwapekwa muncito yakwe Lesa. Alimwi inga watucafwa kuya panembo muncito njetushi kabotu. Alimwi tulicishi kwaamba ayi tulacikonsha kusebensa kabotu muncito yakwe Lesa ceebo ca lucafwo lwa mushimu usalashi.

12. Kweelana a Kulumbaisha 139:23, 24, ino inga twapaila ayi mushimu usalashi utucaafwe kucita nshi?

¹² Nshila imwi mbweenga twatondesha ayi tulalumba palucafwo lwa mushimu usalashi, nkwiinda mukusenga Yehova kwaamba ayi atucaafwe kushiba na miyeeyo anshetusuni kucita shilibo kabotu. (Amubelenge Kulumbaisha 139:23, 24.) Na twacita boobo, Yehova inga wasebensesha mushimu wakwe kutucafwa kushiba na miyeeyo yesu alimwi anshetusuni kucita shilibo kabotu. Alimwi na twashiiba ayi nshetutoyeeya na nshetusuni kucita tashibete kabotu, tulyeelete kupaila kwaamba ayi Lesa atucaafwe kuleya miyeeyo na lunkumbwa lutabete kabotu. Na twacita boobo, Yehova alaakubona ayi tulishinishite kutacita cintu cili coonse ceenga capa kwaamba ayi acileeke kutucafwa kwiinda mumushimu wakwe.​—Efe. 4:30.

13. Ino inga twacita buyani kwaamba ayi tunoolumba abuumbi pacipo ca mushimu usalashi?

¹³ Inga twatondesha kulumba abuumbi pacipo ca mushimu usalashi na katuyeeya mbootosebensa munshiku shino. Yesu kaatana kuya kwiculu, wakalwiita bashikwiiya bakwe ayi: “Mulaakutambula nkusu na mushimu usalashi ukese pali ndimwe, alimwi mulaakuba bakamboni bangu . . . kushikila amucishi coonse capanshi.” (Milimo 1:8) Ishi nsheshitoocitika munshiku shino. Kwiinda mulucafwo lwa mushimu usalashi, bantu beendilila 8.5 miliyoni nsengwe yoonse bakaba basebenshi bakwe Yehova. Alimwi mbuli bantu bakwe Lesa, tulicatene abuumbi mbuli mukwashi womwi, mukwiinga mushimu usalashi ulatucafwa kutondesha “shisepo  shakumushimu” mbuli lusuno, lusangalalo, luumuno, kukakalika moyo, kubota moyo, bubotu, lushomo, kulibombya, alimwi akulitibuka. (Gala. 5:22, 23) Ncakwiila mushimu usalashi ncipo cilibetele abuumbi!

14. Ino mbaani bataboneki batucafwa ndyetuli muncito yakushimikila?

¹⁴ Cipo acimwi cilibetele citaboneki, ‘nkusebensela pomwi’ a Yehova alimwi alibunga lyakwe lyakwiculu. (2 Koli. 6:1) Tulacita boobo kwiinda mukwaabanamo lubasu muncito yakucafwa bantu kuba bashikwiiya. Ndyaakalinga kwaamba pancito njaakalinga kusebensa abaabo baabanamo lubasu, Paulo wakaamba ayi: “Tuli basebenshinyina bakwe Lesa.” (1 Koli. 3:9) Alimwi tulasebensela pomwi a Yesu ndyetuli muncito yakushimikila. Mutaluubi kwaamba ayi pesule lyakupa mulawo bashikwiiya bakwe ayi “kamuya mukanokwiisha bantu bamishobo yoonse,” Yesu wakaamba ayi: “Ndi andimwe.” (Mate. 28:19, 20) Ano ino mbuyani baanjelo? Tulalumba abuumbi mukwiinga baanjelo balatutanjilila ndyetutokwaambilisha “makani abotu atamaani . . . kubantu ba mucishi capanshi”!​—Ciyu. 14:6.

15. Amwaambe cakubonenaako camu Baibo citondesha Yehova mbwaatucafwa muncito yakushimikila.

¹⁵ Ino nshiinshi nshetucikonsha kukumanisha ceebo ca lucafwo luswa kwiiculu? Ndyetutooya bushanga mbuto sha Bwaami, shimwi shilalokela pabaabo bacite myoyo ibotu akukula. (Mate. 13:18, 23) Ino ngani upa kwaamba ayi imbuto ishi shikule akucata shisepo? Yesu wakaamba ayi taaku muntu weenga waba shikwiiya wakwe ‘kwakubula Baishi kumusenya kuli nguwe.’ (Joni 6:44) Baibo yakaambawo pamuntu womwi Lesa ngwaakasenya. Sa mutokwiibaluka paciindi cimwi Paulo ndyakashimikila likoto lya banakashi bakalinga kushiite pansengwe lya ndabala ya Filipi? Amubone Baibo nshoyaamba pa mwanakashi womwi pabaabo, waliina lya Lidiya. Baibo ilaamba ayi: “Yehova wakacalula moyo wakwe cakumaninina kwaamba ayi abikile maano kushintu nshaakalinga kwaamba Paulo.” (Milimo 16:13-15) Bweenka mbuli Lidiya, Yehova wasenya bantu baanji kuli nguwe.

16. Ino ngani weelete kulumbaishikwa na twasebensa kabotu muncito yakushimikila?

¹⁶ Ino ngani weelete kulumbaishikwa na twasebensa kabotu muncito yakushimikila? Paulo wakakumbula mwiipusho uyu ndyakalemba nkalata kulibungano lyaku bene Kolinto amaswi akwaamba ayi: “Nebo ndi anga ngumuntu wakashanga mbuto, alakwe Apolosi wakashitilila, sombi nguLesa ulengesha ayi shikule, aboobo uyo ushanga autilila taaku mbobabete, sombi Lesa ulengesha ayi shikule.” (1 Koli. 3:6, 7) Bweenka mbuli Paulo, aswebo tulyeelete kulumba Yehova na twasebensa kabotu muncito yakushimikila.

17. Ino inga twatondesha buyani ayi tulalumba pacoolwe ‘cakusebensela pomwi’ a Lesa, Klistu, alimwi abaanjelo?

¹⁷ Ino inga twatondesha buyani ayi tulalumba pacoolwe ‘cakusebensela pomwi’ a Lesa, Klistu, alimwi abaanjelo? Inga twacita boobo kwiinda mukucita shoonse nsheenga twacikonsha kwaamba ayi twaabanemo lubasu mukushimikila bamwi makani abotu. Kuli nshila shiinji mbweenga twacita boobo, kucakubonenaako mbuli kushimikila “kubantu baanji alimwi akuŋanda aŋanda.” (Milimo 20:20) Bantu baanji balanyumfwa kabotu kwaabanamo lubasu mukushimikila munshila yakubandikabo. Na bakumanya muntu ngobateshiwo, balamwaansha munshila ya buneshi akweelesha kubandikaakwe. Na watondesha ayi alisuni kubandika, munshila yakucenjela balatalika kushimikila makani abotu a Bwaami.

18-19. (a) Ino imbuto sha Bwaami tulashitilila buyani? (b) Amwaambe cakacitika citondesha Yehova mbwaakacafwa shikwiiya Baibo umwi.

¹⁸ Mbuli “basebenshinyina bakwe Lesa,” tatweelete kweelabo pakushanga mbuto sha cancine, sombi tulyeelete kushitilila. Na muntu watondesha ayi alisuni kwiiya, tulyeelete kucita  nsheenga twacikonsha kwaamba ayi tukabooleleeko, na kusenga umwi kwaamba ayi akayeeko aluyaando lwa kutalika ciiyo ca Baibo amuntu uyo. Tulasangalala na twabona Yehova mbwatoocafwa shikwiiya Baibo kwaalula mbwayeeya alimwi ambwalinyumfwa.

¹⁹ Amuyeeye cakubonenaako caba Raphalalani, baku South Africa abo bakalinga ba ŋanga kabatana kwiiya cancine. Bakakondwa abuumbi anshobakalinga kwiiya kuswa mu Baibo. Nacibi boobo, cakalinga ciyumu kwaamba ayi basumine Baibo nshoiisha pamakani akubandika abafu. (Duto. 18:10-12) Ano mukuya kwaciindi, bakasuminisha Yehova kwaalula mbobakalinga kuyeeya. Lyalo bakacileka ncito ya buŋanga, nabi kwaamba ayi njencito yakalinga kubacafwilisha. Pacecino ciindi ba Raphalalani balicite myaaka 60, bakaamba ayi: “Ndalumba abuumbi ceebo cakwaamba ayi Bakamboni Bakwe Yehova balancafwa abuumbi munshila shipusenepusene, kwiilikaawo akuncafwa kucana ncito imwi. Alimwi ciinditeewo, ndalumba Yehova ceebo ca kuncafwa kwaalula buumi bwangu, cakwaamba ayi pacecino ciindi ndi Kamboni wakabombekwa alimwi ndaabanamo lubasu muncito yakushimikila makani abotu.”

20. Ino nciinshi ncomushinishite kucita?

²⁰ Mumutwi uyu, twabandika pashipo shone shitaboneki. Cipo ciinditeewo pa shoonse, ncoolwe cakuba abushicibusa buyumu a Yehova. Ici ncecipa kwaamba ayi tufubileemo amu shipo shimwi shitaboneki mbuli coolwe cakubandika a Yehova mumupailo, lucafwo lwa mushimu usalashi, alimwi akucafwikwa alibunga lyakwiculu muncito yesu yakushimikila. Aboobo atube bashinishite kunoocita nsheenga twacikonsha kwaamba ayi tutondeshe kulumba pashipo shitaboneki Lesa nshaakatupa. Alimwi atutolelele kulumba Yehova ceebo cakuba Shicibusa wesu uli kabotu abuumbi.