1. Jesu naabuleziñi ka za bufumu bwa kwa lihalimu?

HAKI limpo kaufela zelukona kubona. Mane limpo zende hahulu ki zesabonahali. Mwa ngambolo yahae ya fa lilundu, Jesu naabulezi kuli bufumu bwa kwa lihalimu, ili bufumu bobusa bonahali ki bobunde hahulu kufita bufumu bufi kamba bufi bwa fa lifasi. Naaekelize kubulela kuli: “Kokuinzi bufumu bwahao, ki kona koiinzi ni pilu yahao.” (Mat. 6:19-21) Haiba luunga nto yeñwi kuba ya butokwa hahulu, lukaeza molukonela kaufela kuli luifumane. Lukona ‘kuikubukanyeza bufumu kwa lihalimu,’ ka kuikezeza libizo lelinde ni Mulimu ni kuba ni silikani sesinde ni yena. Jesu naabulezi kuli bufumu bobucwalo habukoni kusinyiwa kamba kuuzwiwa.

2. (a) Ka kuya ka liñolo la 2 Makorinte 4:17, 18, Paulusi ulususueza kuezañi? (b) Lukanyakisisañi mwa taba ye?

² Muapositola Paulusi ulususueza ‘kulibisa meeto aluna . . . ku zesabonahali.’ (Mubale 2 Makorinte 4:17, 18.) Lika zesabonahali likopanyeleza limbuyoti zeluka ikola mwa lifasi lelinca la Mulimu. Mwa taba ye, lukanyakisisa limpo zeene zesabonahali zeluikola cwale, ili silikani saluna ni Mulimu, tapelo, moya wa Mulimu okenile, ni tuso yelufiwa yezwelela kwa lihalimu haluli mwa bukombwa. Hape lukanyakisisa molukona kuboniseza kuli lwaitebuha limpo zesabonahali zeo.

3. Ki ifi mpo yende hahulu ka kufitisisa yesabonahali, mi ikonahaliswa kiñi?

³ Mpo yende hahulu ka kufitisisa yesabonahali ki silikani saluna ni Jehova Mulimu. (Samu 25:14) Mulimu ukona kuba cwañi  mulikanaa batu babasika petahala, hailifo yena ki yakenile? Wakona kuba mulikanaa luna bakeñisa kuli sitabelo sa Jesu sa tiululo ‘sizwisa sibi sa lifasi.’ (Joa. 1:29) Mane pili Jesu asika shwa kale, Jehova naaziba kuli Jesu naakazwelapili kusepahala kuisa lifu kuli aliulule batu. Ki lona libaka Mulimu hanaakona kuba mulikanaa batu bane bapilile pili Kreste asika shwa kale.—Maro. 3:25.

4. Mufe mitala ya batu bane bali balikani ba Mulimu pili Jesu asika taha kale fa lifasi.

⁴ Halunyakisiseñi mitala ya baana bane bali balikani ba Mulimu pili Jesu asika taha kale fa lifasi. Abrahama neli muuna yanaanani tumelo yetiile. Mane hamulaho wa lilimo zefitelela 1,000 kuzwa fashwela Abrahama, Jehova naamubizize kuli “mulikanaaka.” (Isa. 41:8) Taba yeo ibonisa kuli Jehova uzwelangapili kuhupula balikani bahae babatuna, mane niha sebashwile. Jehova usahupula Abrahama mi ku yena kuswana feela inge kuli usapila. (Luka 20:37, 38) Mutu yomuñwi yanaabile mulikanaa Mulimu ki Jobo. Mangeloi kaufela hanaakopani hamoho kwa lihalimu, Jehova naabulezi ka nzila yenebonisa kuli naasepile Jobo. Jehova naabulezi kuli Jobo naali “muuna yanani niti ni yasepahala, yasaba Mulimu ni kuikambusa kwa bumaswe.” (Jobo 1:6-8) Mi Jehova naaikutwile cwañi ka za Daniele yanaa musebelelize ka busepahali ka lilimo zebato eza 80 mwa naha mone kupila batu bane basalapeli Mulimu? Halaalu, mangeloi naabulelezi muuna wa musupali yo kuli naali mutu “yakateleha hahulu” ku Mulimu. (Dan. 9:23; 10:11, 19) Lwakona kukolwa kuli Jehova unyolezwi kuzusa balikani bahae kaufela babashwile.—Jobo 14:15.

5. Ki lika mañi zeluswanela kueza kuli luikole silikani sesinde ni Jehova?

⁵ Kacenu, batu babañata-ñata babasika petahala banani silikani sesinde ni Jehova. Luziba cwalo bakeñisa kuli baana, basali, ni banana babañata-ñata mwa lifasi kaufela babonisa ka likezo zabona kuli ki balikani ba Mulimu. Jehova “uitama bulikani bobutuna ni babalukile.” (Liprov. 3:32) Batu bakona kuba balikani ba Mulimu haiba babonisa tumelo mwa sitabelo sa tiululo sa Jesu. Bakeñisa sitabelo sa Jesu, lwakona kuneela bupilo bwaluna ku Jehova ni kukolobezwa. Haiba luunga mihato ya butokwa yeo, lukaba yomuñwi wa Bakreste babañata-ñata babaineezi ni kukolobezwa, ili babaikola “bulikani bobutuna” ni Yamaata ka Kufitisisa!

6. Lukona kubonisa cwañi kuli luunga silikani saluna ni Mulimu kuba sa butokwa?

⁶ Lukona kubonisa cwañi kuli luunga silikani saluna ni Mulimu kuba sa butokwa? Ka kuswana ni Abrahama ni Jobo bane bazwezipili kusepahala ku Jehova ka lilimo zefitelela 100, ni luna luswanela kuzwelapili kusepahala ku yena kusina taba kuli selu musebelelize ka nako yekuma kai mwa lifasi lakale le. Sina Daniele, luswanela kuunga silikani saluna ni Mulimu kuba sa butokwa hahulu kufita bupilo bwaluna. (Dan. 6:7, 10, 16, 22) Jehova wakona kulutusa kutiyela miinelo yetaata kaufela yelukona kukopana ni yona, ilikuli silikani saluna ni yena sizwelepili kutiya.—Mafil. 4:13.

7. (a) Ka kuya ka liñolo la Liproverbia 15:8, Jehova uikutwa cwañi ka za litapelo zaluna? (b) Jehova ualabanga cwañi litapelo zaluna?

⁷ Mpo yeñwi yelufilwe yesabonahali ki tapelo. Batu babali balikani babatuna balukuluhanga kutalusa mihupulo ni maikuto abona. Ki mona mosiswanela kubela silikani saluna ni Jehova cwalo. Jehova uambola ku luna ka kuitusisa Linzwi lahae, mi mwateñi ulupatululezi mihupulo ni maikuto ahae. Luambola ku yena ka tapelo, mi lwakona kumutaluseza zelunahana kaufela ni moluikutwela  luli. Jehova watabela kuteeleza kwa litapelo zaluna. (Mubale Liproverbia 15:8.) Ka kuba Mulikanaa luna yalilato, Jehova hateelezangi feela kwa litapelo zaluna kono hape walialabanga. Fokuñwi, ualabanga litapelo zaluna kapili-pili. Kono fokuñwi lukana lwatokwa kukuta-kutela kulapela ka za taba yeñwi. Niteñi, lwakona kukolwa kuli Jehova ukaalaba tapelo yaluna ka nako yeswanela ni ka nzila yende. Mulimu ukona kualaba tapelo yaluna ka nzila yelusika libelela. Ka mutala, fokuñwi haana kufelisa muliko olutalimana ni ona kono ukona kulufa butali ni maata a “kuutiyela.”—1 Makor. 10:13.

8. Lukona kubonisa cwañi kuli lwaitebuha mpo yelufilwe ya tapelo?

⁸ Lukona kubonisa cwañi kuli lwaitebuha mpo yende ya tapelo? Lubonisa buitumelo bwaluna ka kuutwa kelezo yalufile Mulimu ya kuli ‘lulapele ka nako kaufela.’ (1 Mates. 5:17) Jehova haaluhapelezangi kulapela ku yena. Kono ulufile tukuluho ya kuiketela za kueza, mi ulususueza kuli ‘lutundamene kulapela.’ (Maro. 12:12) Kacwalo, lubonisa buitumelo bwaluna ka kulapelanga hañata-ñata zazi ni zazi. Niteñi, halulapela, luswanela kuhupulanga kuitumela ku Jehova ni kumulumbeka.—Samu 145:2, 3.

9. Muzwale yomuñwi uikutwa cwañi ka za tapelo, mi mina muikutwa cwañi?

⁹ Halunze lusebeleza Jehova ni kubona mwaalabela litapelo zaluna mwa linzila zeshutana-shutana, lukaitebuha hahulu mpo ya tapelo. Halunyakisiseñi mutala wa Muzwale Chris yasaabile mwa sebelezo ya nako kaufela ka lilimo ze 47. Utalusa kuli: “Zazi ni zazi kakusasana, nizuhanga kuli nilapele ku Jehova. Naikolanga kulapela ku Jehova isali kakusasana inze kukuzize, mi kwatabisa kubona lizazi halipazula ni kutahisa kuli lika kaufela libonahale hande! Taba yeo initusanga kuitebuha limpo kaufela zanifile Mulimu, kukopanyeleza cwalo ni mpo ya tapelo. Manzibwana, nalapelanga hape mi nibanga ni kozo ya mwa munahano haniyo lobala.”

10. Ki kabakalañi haluswanela kuitebuha mpo ya moya wa Mulimu?

¹⁰ Mpo yeñwi yesabonahali yalufile Mulimu yeluswanela kuitebuha ki moya okenile. Jesu naalususuelize kuzwelapili kukupa moya okenile. (Luka 11:9, 13) Jehova uitusisa moya wahae okenile kuli ulutuse kuba ni “maata afita a butu.” (2 Makor. 4:7; Lik. 1:8) Ka tuso ya moya wa Mulimu, lwakona kutiyela muliko ufi kamba ufi olukona kukopana ni ona.

11. Moya okenile ukona kulutusa cwañi?

¹¹ Moya okenile wakona kulutusa kueza hande misebezi yelufiwa mwa kopano ya Mulimu. Moya wa Mulimu hape wakona kulutusa kuekeza kwa buikoneli bwaluna. Luswanela kulemuha kuli lika zende kaufela zelupetile mwa sebelezo yaluna ku Mulimu likonahalile feela ka tuso ya moya wahae.

12. Ka kuya ka liñolo la Samu 139:23, 24, luswanela kukupanga kuli moya okenile ulutuse kuezañi?

¹² Nzila yeñwi yelukona kubonisa ka yona kuli lwaitebuha mpo ya moya okenile ki ka kulapela kuli moya wo ulutuse kuziba haiba lunani mihupulo kamba litakazo zemaswe mwa lipilu zaluna. (Mubale Samu 139:23, 24.) Haiba lueza cwalo, Jehova ka kuitusisa moya wahae, uka lutusa kuziba haiba lunani mihupulo kamba litakazo zemaswe. Mi haiba lulemuha kuli lunani mihupulo kamba litakazo zemaswe, luswanela kukupa kuli moya wa Mulimu ulutuse kuba ni maata a kuhanyeza mihupulo kamba litakazo zemaswe zeo. Haiba lueza cwalo, lukabonisa kuli halutabeli kueza nto ifi kamba ifi yekatahisa kuli Jehova asike alufa moya wahae okenile kuli ulutuse.—Maef. 4:30.

13. Ki lika mañi zeka lutusa kuitebuha hahulu mpo yelufilwe ya moya okenile?

¹³ Kunahanisisa mousweli kulutuseza moya okenile kacenu kuka lutusa kuitebuha hahulu mpo yelufilwe yeo. Jesu asika kutela kale kwa lihalimu, naabulelezi balutiwa bahae kuli: “Mukaamuhela maata moya okenile hauka taha ku mina, mi mukaba lipaki zaka . . . kuyo fita kwa libaka za kwahule hahulu za lifasi.” (Lik. 1:8) Manzwi ao asweli atalelezwa kacenu. Ka tuso ya moya okenile,  batu babafitelela 8.6 milioni mwa lifasi kaufela sebali batanga ba Jehova. Hape luikola paradaisi ya kwa moya bakeñisa kuli moya wa Mulimu ulutusa kuba ni tulemeno totunde totucwale ka lilato, tabo, kozo, pilu-telele, sishemo, bunde, tumelo, bunolo, ni buiswalo. Tulemeno to kaufela ki kalulo ya “muselo wa moya.” (Magal. 5:22, 23) Kaniti luli, moya okenile ki mpo yende hahulu!

14. Ki tuso mañi yesabonahali yelufiwa haluli mwa bukombwa?

¹⁴ Mpo yeñwi yesabonahali yelufilwe ki ya ‘kusebeza hamoho’ ni Jehova ni kalulo ya kopano yahae ya kwa lihalimu. (2 Makor. 6:1) Lusebeza hamoho ni bona nako kaufela haluli mwa bukombwa. Paulusi naabulezi cwana ka za hae ni banaakutaza ni bona: “Lusebeza hamoho ni Mulimu.” (1 Makor. 3:9) Hape haluli mwa bukombwa, lusebeza hamoho ni Jesu. Muhupule kuli Jesu hasaafile balateleli bahae taelo ya kuli ‘balute batu ba macaba kaufela kuba balutiwa,’ naabulezi kuli: “Niinzi ni mina.” (Mat. 28:19, 20) Kono kucwañi ka za mangeloi? Lunani tohonolo yetuna kuetelelwa ki mangeloi halunze lushaela “taba yende yesafeli . . . ku babayahile mwa lifasi”!—Sin. 14:6.

15. Mufe mutala wa mwa Bibele obonisa musebezi omutuna wapeta Jehova haluli mwa bukombwa.

¹⁵ Tuso yelufiwa kuzwelela kwa lihalimu ilutusa kupetañi? Halunze lucala peu ya Mubuso, lipeu zeñwi liwelanga fa mubu omunde ni kuhula. (Mat. 13:18, 23) Ki mañi yatahisanga kuli lipeu zeo lihule ni kubeya miselo? Jesu naabulezi kuli hakuna mutu yakona kuba mulateleli wahae konji haiba “Ndate . . . amuhoha.” (Joa. 6:44) Bibele ilutaluseza za mutu yomuñwi yanaahohilwe ki Mulimu. Nako yeñwi Paulusi naasweli kukutaza kwa sikwata sa basali bane bali kwande a muleneñi wa Filipi. Mulemuhe zeibulela Bibele ka za yomuñwi wa basali bao yabizwa Lidia, ibulela kuli: “Jehova akwalula pilu yahae kuli autwe litaba zanaabulela Paulusi.” (Lik. 16:13-15) Sina feela Lidia, Jehova uhohezi batu babañata-ñata ku yena.

16. Ki mañi yaswanela kufiwa tumbo bakeñisa lika zende zelupeta mwa bukombwa?

¹⁶ Ki mañi yaswanela kufiwa tumbo bakeñisa lika zende zelupeta mwa bukombwa? Paulusi ulutusa kuziba kalabo ya puzo yeo mwa litaba zanaañolezi puteho ya Korinte, naaize: “Na nenicezi, Apolosi naaselaezi, kono Mulimu ki yena yanaahulisa, kuli yacala asike aba sesiñwi kamba yaselaela, kono ibe Mulimu yahulisa.” (1 Makor. 3:6, 7) Sina Paulusi, kamita lufange Jehova tumbo kabakala lika zende kaufela zelupeta mwa bukombwa.

17. Lukona kubonisa cwañi kuli lwaitebuha tohonolo yelunani yona ya ‘kusebeza hamoho’ ni Mulimu, Kreste, ni mangeloi?

¹⁷ Lukona kubonisa cwañi kuli lwaitebuha tohonolo yelunani yona ya ‘kusebeza hamoho’ ni Mulimu, Kreste, ni mangeloi? Lukona kueza cwalo ka kulika molukonela kaufela kukutaza taba yende ku babañwi. Kunani linzila zeñata zelukona kukutaza ka zona, inge cwalo kukutaza “fapilaa nyangela ni fa ndu ni ndu.” (Lik. 20:20) Mizwale ni likaizeli babañata hape baikolanga kukutaza ka kutandalelwa. Habakopana ni mutu yebasa zibi, babonisanga silikani ka kumulumelisa ni kukala kuikambota ni yena. Haiba mutu yo abonisa kuli watabela kuambola, bakalanga kukutaza ku yena taba yende ya Mubuso ka maseme.

18-19. (a) Lukona kuselaela cwañi peu ya Mubuso? (b) Mufe mutala wa muituti wa Bibele yanaatusizwe ki Jehova kueza licinceho mwa bupilo bwahae.

¹⁸ Halunze ‘lusebeza hamoho ni Mulimu,’  luswanela kucala peu ya Mubuso ni kuiselaela. Halufumana mutu yatabela, luswanela kueza molukonela kaufela kuli lukutele ku yena kamba kulukisa kuli mutu yomuñwi amupotele ka mulelo wa kukalisa tuto ya Bibele ni yena. Mutu yeluituta ni yena hanzaa eza zwelopili, lubanga ni tabo kubona mo Jehova atuseza muituti waluna kueza licinceho mwa bupilo bwahae.

¹⁹ Halunyakisiseñi mutala wa muzwale yapila kwa South Africa yabizwa Raphalalani, ili yanaabanga ñaka. Naatabela litaba zanaaituta mwa Bibele. Kono neku mubezi taata kulumela zelibulela Linzwi la Mulimu ka za kuambola ni batu babashwile. (Deut. 18:10-12) Kono hanyinyani-hanyinyani, atuhelela Mulimu kucinca mubonelo wahae. Mi hamulaho wa nako, atuhela kuba ñaka nihaike kuli naaipilisanga ka kulaula. Bo Raphalalani base banani lilimo ze 60 cwale, babulela kuli: “Niitumela hahulu kwa Lipaki za Jehova kakuli banitusize mwa linzila zeñata inge cwalo kunitusa kufumana musebezi. Kono sihulu niitumela ku Jehova kakuli unitusize kueza licinceho mwa bupilo bwaka, ilikuli nikone kukutaza taba yende sina yomuñwi wa batanga bahae babakolobelizwe.”

20. Muikatulezi kuezañi?

²⁰ Mwa taba ye, lunyakisisize limpo zeene zelufilwe zesabonahali. Mpo yende ka kufitisisa yelunani yona ki tohonolo ya kuba balikani ba Jehova babatuna. Haiba luba balikani ba Mulimu, lukatusiwa ki limpo zeñwi zesabonahali zecwale ka tapelo, moya wahae okenile, ni tuso yelufiwa yezwelela kwa lihalimu haluli mwa bukombwa. Haike luikatulele kuitebuha hahulu limpo zelufilwe zesabonahali zeo. Mi haike luzweleñipili kuitumela ku Jehova kabakala kuli ki Mulikanaa luna yomunde.