1. Yesu wahosheli nindidi hamaheta amwiwulu?

BAYI neyi yuma yejima yalema yamwekanañaku. Kafwampi, yuma yabadika kulema yamwekanaña wanyi. Yesu wahosheli muMpanji yindi yahaMpidi hamaheta amwiwulu abadika chikupu maheta akumujimba. Dichi wabombelelihu nindi: “Kudi maheta eyi, dikukwikala nimuchima weyi nawa.” (Mat. 6:19-21) Neyi tumonaña yuma netu yalema chikupu, tukutachika kuyifwila. Twadilumbikilaña “maheta mwiwulu” neyi twikala nejina dadiwahi hela ñimenu yayiwahi naNzambi. Yesu walumbulwili nindi, awa maheta hiyanateli kuyikisa hela kuyiyaku.

2. (a) Kwesekeja na 2 Akorinda 4:17, 18, Pawulu watukonkomwena kusha muchima hachumanyi? (b) Yumanyi yitukudiza muchinu chibaaba?

² Kapostolu Pawulu watukonkomwenaña kushinshika “mesu etu . . . hayuma yabulaña kumwekana.” (Tañenu 2 Akorinda 4:17, 18.) Iyi yuma yabulaña kumwekana munabombeli nkisu yitwakatambwila mwituña daNzambi dadiha. Muchinu chibaaba, tukudiza hayuma yiwana yabulaña kumwekana yitukweti chayinu mpinji, wubwambu wetu naNzambi, kulomba, chatukwashaña spiritu yaNzambi yajila, nichatukwashañawu kudi Yehova, Yesu niañelu mumudimu wakushimwina. Tukudiza cheñi chitunateli kumwekesha netu twasakililaña haniyi yuma yalema yabulaña kumwekana.

3. Chumanyi chabadika kulema hayuma yabulaña kumwekana, nawa chinekali ñahi chaswayi?

³ Chuma chabadika kulema hayuma yejima yabulaña kumwekana hiwubwambu wetu naYehova Nzambi. (Mas. 25:14) Chinateli  kwikala ñahi chaswayi kudi Nzambi kwikala ibwambu dawantu abula kuwanina nikutwalekahu kwikala wajila? Chinekali chaswayi muloña mulambu wefutu danyiloña waheniyi Yesu “wafumishaña nshidi yakaayi” yawantu ejima. (Yow. 1:29) Henohu Yesu kanda yafwi, Yehova welukili nindi Yesu wakekala washinshika kushika nikukufwa kulonda yakamwini antu ejima. Dimuloña waweni Nzambi chekaliliyi ibwambu dawantu adiñaku henohu Yesu kanda yafwi.—Rom. 3:25.

4. Hanenu yakutalilahu yawantu akunyima ekalili amabwambu jaNzambi.

⁴ Shinshikenu hadi antu amakwawu akunyima ekalili amabwambu jaNzambi. Abarahama wadiña nachikuhwelelu chakola. Chimwahitili yaaka kubadika ha 1,000 nahafwiliyi Abarahama, Yehova wamuteneni nindi ‘ibwambu dami.’ (Isa. 41:8) Dichi hela kufwa hikunateli kumanisha wubwambu waYehova nawantuku. Yehova wuchidi kumwanuka Abarahama. (Luka 20:37, 38) Muntu mukwawu hiYoba. Yehova wamuhamekeli Yoba hampinji yapompeli añelu ejima mwiwulu. Yehova wamuteneni nindi “iyala walala woloka, muntu waakama Nzambi, waambuka kuyuma yatama.” (Yoba 1:6-8) Indi Yehova wamumweneña ñahi Danyeli, wamukalakeleli Nzambi nakashinshi mwituña dawasenji hadi yaaka yakushika ku 80? Mapampa asatu Añelu amulejeli iwu kashinakaji nawu wadiña “wasweja kukeñewa” kudi Nzambi. (Dan. 9:23; 10:11, 19) Twatela kukuhwelela chikupu netu Yehova wafwilaña kusañula amabwambu jindi afwa dehi.—Yoba 14:15.

5. Yumanyi yitwatela kwila hakwila twikali amabwambu jaYehova?

⁵ Antu añahi akweti wubwambu naYehova makonu? Mamiliyoni awantu. Tuneluki chumichi muloña amayala, ambanda nianyana anyanya mukaayi kejima anakumwekesha muyilwilu yawu nawu hiyamabwambu jaNzambi. Yehova “wayaña hampuña nawakwakwoloka.” (Yish. 3:32) Anekali naniwu wubwambu muloña wakukuhwelela mumulambu wefutu danyiloña daYesu. Muloña wefutu danyiloña, tunateli kudihana kudi Yehova nikupapatishewa. Neyi twila yumiyi, twadibombaña namamiliyoni awantu adihana, akwakristu apapatishewa adi “hampuña” naMuntu wasweja kulema mukuleña kwejima.

6. Tunateli kumwekesha ñahi kusakilila hawubwambu wetu naNzambi?

⁶ Tunateli kumwekesha ñahi netu twalemesha wubwambu wetu naYehova? Kufwana Abarahama niYoba atwalekelihu kwikala ashinshika kudi Nzambi kubadika hayaaka 100, twatela kutwalekahu kwikala ashinshika kudi Yehova hichidi namuloña nayaaka yitunamukalakeliku. Kufwana Danyeli twatela kulemesha wubwambu wetu naYehova kubadika wumi wetu. (Dan. 6:7, 10, 16, 22) Nawukwashu waYehova tunateli kuumika kukala kudi kwejima kutunateli kumona nikutwalekahu kwikala nawubwambu nayena.—Fwi. 4:13.

7. (a) Kwesekeja naYishimu 15:8, Yehova watiyaña ñahi nakulomba kwetu? (b) Yehova wakulaña ñahi kulomba kwetu?

⁷ Kulomba hichuma chikwawu chalema chabulaña kumwekana. Ebwambu namuntu adilejaña yuma yejima. Komana dichekala niwubwambu wetu naYehova? Eña. Yehova wahanjekaña nanetu kuhitila Mwizu dindi, dimu mwatulejelañayi yitoñojoka yindi nichatiyañayi. Twahoshaña nindi mukulomba nawa tunateli kumuleja yitoñojoka yetu nichitunakutiya. Yehova watiyaña kuwaha kutiyilila kukulomba kwetu. (Tañenu Yishimu 15:8.) Chineli hibwambu detu watukeña, Yehova watiyaña kulomba kwetu nawa watwakulaña.  Mpinji yikwawu watwakulaña swayi. Ilaña mpinji yikwawu twatela kutwalekahu kulomba hakukala kokumu. Dichi, twatela kukuhwelela netu wukakula kulomba kwetu hampinji yatelela. Hela chochu, Nzambi nateli kwakula kulomba kwetu munjila yambukaku nachitunakukuhwelela. Chakutalilahu, chatela yamanishi kukala, nateli kutwinka maana niñovu “yakuumikilamu oku kweseka.”—1 Kor. 10:13.

8. Tunateli kumwekesha ñahi kusakilila hachawaana chakulomba?

⁸ Tunateli kumwekesha ñahi kusakilila hanichi chawaana chalema chakulomba? Njila yimu hikwovwahila iku kufumba kwalema kwakwila nawu “lombenuña mpinji yejima.” (1 Tes. 5:17) Yehova hatukanjikijaña kulombaku. Ilaña walemesha wuswa wetu wakudifuukwila nawa watukonkomwenaña nindi “lombenuña chakadi kuzeya.” (Rom. 12:12) Dichi tunateli kumwekesha kusakilila kuhitila mukulomba mafuku ejima. Kafwampi, twatela kumusakilila nikumuhameka Yehova mukulomba kwetu.—Mas. 145:2, 3.

9. Kulomba kwamutiyishaña ñahi manakwetu wumu, indi enu mwatiyaña ñahi nakulomba?

⁹ Neyi tumukalakela Yehova hadi mpinji yayilehi nawa tumona chinakwakulayi kulomba kwetu, tukumusakililaña chikupu. Talenu manakwetu Chris, wunazati mumudimu wampinji yejima hadi yaaka 47 yinahitihu. Wahosheli nindi, “Mpinji yejima nantetemena nahindukaña nakulomba kudi Yehova. Chanzañaleshaña kuhosha naYehova hakusela kwetena henohu yuma yejima yinakumwekana lubanji. Chumichi chansañumunaña kumusakilila hayawaana yindi yejima, kushilahu nichawaana chakulomba. Nawa hanyima yakulomba hampinji yakukama, nekalaña nachileji chamuchima chitooka.”

10. Muloñadi chitwatela kulemeshela spiritu yaNzambi yajila?

¹⁰ Spiritu yaNzambi yajila hichuma chikwawu chalema chabulaña kumwekana chitwatela kulemesha. Yesu watukonkomweneni kutwalekahu kulomba spiritu yajila. (Luka 11:9, 13)  Yehova watwinkaña ñovu, kuhitila muspiritu yindi, dikwila nawu “ñovu yabadika hañovu jawantu.” (2 Kor. 4:7; Yilw. 1:8) Nawukwashu waspiritu yaNzambi, tunateli kuumika kweseka kwejima kutunateli kumona.

11. Munjilanyi mwatukwashilaña spiritu yajila?

¹¹ Spiritu yajila yinateli kutukwasha kuzata nyidimu mukuloñesha kwaNzambi. Spiritu yaNzambi yatukwashaña kuzatisha chiwahi wuswa niyawaana yitukweti. Tuneluki chikupu netu nyidimu yejima yitwazataña mumudimu waNzambi twayizataña nawukwashu waspiritu yindi.

12. Kwesekeja naMasamu 139:23, 24, muloñadi chitwatela kulombela spiritu yajila?

¹² Njila yikwawu mutwamwekeshelaña netu twalemesha spiritu yajila yaNzambi hikulomba netu yitukwashi kwiluka neyi tudi nayitoñojoka yatama hela kufwila kwatama mumuchima. (Tañenu Masamu 139:23, 24.) Neyi tulomba muniyi njila, Yehova wukutukwasha naspiritu yindi kwiluka yitoñojoka hela kufwila kwatama. Nawa neyi twiluka netu tudi nayitoñojoka hela kufwila kwatama, twatela kulomba spiritu yaNzambi yitwinki ñovu yakushinda iyi yitoñojoka hela kufwila kwatama. Muniyi njila tukumwekesha netu tunakufwila kutondolwela kwila yuma yejima yinateli kuletesha Yehova kuleka kutwinka spiritu yajila.—Efwe. 4:30.

13. Tunateli kumwekesha ñahi kusakilila hakwikala naspiritu yajila?

¹³ Tunateli kumwekesha kusakilila chikupu haspiritu yajila neyi tutoñojoka hamudimu wuyinakuzata makonu. Henohu Yesu kanda yayi mwiwulu, wayilejeli atumbanji twindi nindi: “Mwakatambula ñovu neyi spiritu yajila yinenzi hadi enu, nawa mwakekala ayinsahu jami . . . nikwakumina iseki dejima.” (Yilw. 1:8) Chumichi dichinakumwekana makonu. Nawukwashu waspiritu yajila, akwakudifukula aYehova akushika ku 8 miliyoni nachikunku anayipompeshi kufuma kutubadi twejima tweseki. Cheñi twadiluñishaña paradisa yakuspiritu muloña spiritu yaNzambi yatukwashaña kwikala nayilwilu yayiwahi yidi neyi kukeña,  muzañalu, kuwunda, kudiwunjika, luwi, kuwaha, chikuhwelelu, kwovwaha nikudihemba. Iyi yilwilu diyi yatuña “nyikabu yaspiritu.” (Ñal. 5:22, 23) Spiritu yajila hichawaana chalema.

14. Tukweti wukwashu wamuchidinyi wabulaña kumwekana neyi tunakushimwina?

¹⁴ Tukweti chawaana chabulaña kumwekana chakwikala “akwakukalakala” hamu naYehova nikuloñesha kwindi kwamwiwulu. (2 Kor. 6:1) Twazatilaña nawu hamu mpinji yejima yitwazataña mudimu wakwilisha atumbanji. Pawulu waditeneni yomweni niejima azataña mudimu wakushimwina nindi: “Etu tudi akwakukalakala hamu naNzambi.” (1 Kor. 3:9) Neyi tuzataku mudimu wakushimwina, twekalaña cheñi akwakukalakala hamu naYesu. Anukenu nenu hanyima yakuyileja atumbanji twindi nindi yenu “mwakelishi antu akunyuza yejima ekali atumbanji,” wahosheli nindi: “Ami nukwikalaña nanenu.” (Mat. 28:19, 20) Indi añelu? Twakooleka chikupu kuzatila hamu nawañelu hakushimwina “[nsañu] yayiwahi . . . kudi antu ashakama hamaseki.”—Chim. 14:6.

15. Shimunenu chakutalilahu chinakumwekesha mudimu walema wazatañayi Yehova mumudimu wetu wakushimwina.

¹⁵ Iwu wukwashu wafumaña mwiwulu watukwashaña kwiladi? Chitwakuwaña nsañu yaWanta, mbutu yikwawu yaholokelaña hanyichima yayiwahi nawa yakulaña. (Mat. 13:18, 23) Hinyi wakulishaña iyi mbutu nakusoña nyikabu? Yesu walumbulwili nindi kwosi muntu wunateli kwikala kambanji kindi chiña “amukoka kudi Tata” yindi. (Yow. 6:44) Bayibolu yamwekeshaña chumichi. Anukenu chamwekeni mpinji yashimwininiyi Pawulu kudi izanvu dawambanda hanji yamusumba waFwilipi. Shinshikenu Bayibolu chiyahosha hadi mumbanda wejina daLidiya wadiña hakachi kanawa ambanda nayu: “Yehova wenzunwini muchima windi chikupu kulonda yatiyi yuma yahosheleñayi Pawulu.” (Yilw. 16:13-15) Kufwana Lidiya, mamiliyoni awantu amakwawu anayikoki kudi Yehova.

16. Hinyi watela kutambwila kalemesha hayuma yejima yayiwahi yafumaña mumudimu wakushimwina?

¹⁶ Hinyi watela kutambwila kalemesha hayuma yayiwahi yafumaña mumudimu wakushimwina? Pawulu wakwili ilu lwihu mumazu asonekeleliyi chipompelu chamuKorinda nindi: “Ami natumbili, Apolosi watukumwinini, ilaña Nzambi diyi wayikulishileña, dichi muntu watumbaña hela watukumwinaña, hiyatela kumulemeshaku, chiña hohu Nzambi wayikulishaña.” (1 Kor. 3:6, 7) Kufwana Pawulu, twatela kumulemeshaña Yehova hayuma yejima yafumaña mumudimu wakushimwina.

17. Tunateli kumwekesha ñahi kusakilila hakwikala “akwakukalakala hamu” naNzambi, Yesu niañelu?

¹⁷ Tunateli kumwekesha ñahi kusakilila hakukooleka kutukweti kwakwikala “akwakukalakala hamu” naNzambi, Yesu niañelu? Tunateli kwila mwenimu neyi tuzataña neyena mumudimu wakushimwina. Kudi njila yayivulu mutunateli kwilila mwenimu, chidi neyi kushimwina “hamesu awantu nikwitala [nikwitala].” (Yilw. 20:20) Amavulu ashimwinaña wunsahu wamumpanji. Dichi neyi awana muntu wabula kwilukawu, amwimushaña namuzañalu nawa atachikaña kuhanjeka nindi. Neyi muntu yeteja, atachikaña kuhanjeka nindi nsañu yaWanta mukubabala.

18-19. (a) Twatukumwinaña ñahi mbutu yachalala? (b) Hanenu chakutalilahu chinakumwekesha Yehova chakwashiliyi kadizi wumu waBayibolu.

¹⁸ Chineli tudi “akwakukalakala hamu naNzambi,” hitwatela kukumina dakutumba hohu mbutuku ilaña nikuyitukumwina. Neyi muntu yamwekesha mpwila, twatela kufuntilañaku nankeñelu yakutachika kudiza nindi  Bayibolu hela kumukeñela muntu watela kutachika kudiza nindi. Hampinji yitunakudiza naniwu kadizi, twazañalalaña hakumona Yehova chinakumukwashayi kuhimpa yilwilu yindi.

¹⁹ Shinshikenu chakutalilahu chaRaphalalani wakuSouth Africa wadiña katepa. Wakeñeli yuma yadizileñayi muBayibolu. Ilaña chamukalilili chelili yatañi chahosha Bayibolu kutalisha hakuhanjeka nawafu. (Kuhit. 18:10-12) Mukuhita kwampinji, wetejeli Nzambi kumuhimpa yitoñojoka yindi. Nkumininaku, walekeli mudimu windi wawukatepa hela chakwila dimwadiña nakuhandilayi. Chayinu mpinji Raphalalani wudi nayaaka 60 wahoshaña nindi: “Nayisakililaña aYinsahu jaYehova hakunkwasha munjila yayivulu, chidi neyi kuwana mudimu. Chuma chasweja kulema, namusakililaña Yehova hakunkwasha kuhimpa yilwilu yami hakwila nitweshi chayinu mpinji kuzataku mudimu wakushimwina chineli nidi Chinsahu wapapatishewa.

20. Munakufwila kwiladi?

²⁰ Muchinu chibaaba, tunahanjeki hayuma yiwaana yalema yabulaña kumwekana. Chuma chabadika hayuma yejimiyi, hiwubwambu wutukweti naYehova. Chumichi chatuleteshaña kudiluñisha nayawaana yikwawu yabulaña kumwekana, kukundama kwakwihi nayena mukulomba, chatukwashaña spiritu yindi yajila nichatukwashañawu kudi Yehova, Yesu niañelu mumudimu wakushimwina. Tunakufwila kusakilila chikupu haniyi yuma yalema yabulaña kumwekana. Nawa tutwalekihu kumusakilila Yehova hakwikala Ibwambu detu wamuwahi.