1. Isua’n vân lam ro chûngchângah eng nge a sawi?

RO HLU zawng zawng hi hmuh theih a ni vek lo va. Dik tak chuan, ro hlu ber berte chu hmuh theih a ni lo. Tlâng Chunga Thusawiah, Isua’n khawvêl ro sumte aia nasa taka hlu zâwk vân lam ro chungchâng a sawi a. Chumi hnuah he thu dik hi a sawi a ni: “I ro awmna apiangah i rilru pawh a awm ang,” tih hi. (Mt. 6:19-21) Kan thinlung chuan kan thil roh tak, a nih loh leh ngaihhlut takte ûm tûrin min chêttîr ang. Pathian hmaa hming ṭha, a nih loh leh dinhmun ṭha neihna hmangin ‘vânah rote’ kan khâwlkhâwm a ni. Isua sawi angin chûng ro hlute chu tihchhiat emaw, rûk bo theih emaw a ni lo.

2. (a) Korinth thawn hnih 4:17, 18-a sawi angin, Paula’n eng nge ngaihven tlat tûra min fuih? (b) He thuziakah hian eng nge kan sawiho vang?

² Tirhkoh Paula chuan ‘thil hmuh theih lohte en’ tûrin min fuih a. (2 Korinth 4:17, 18 chhiar rawh.) Chûng hmuh theih loh ro hlute zîngah chuan Pathian khawvêl thara kan dawn tûr malsâwmnate pawh a tel a ni. He thuziakah hian, tûn aṭanga kan hlâwkpui theih ro hlu pali—Pathian Jehova nêna inṭhianna te, ṭawngṭai theihna thilpêk te, Pathian thlarau thianghlim ṭanpuina te, leh rawngbâwlnaa kan dawn vân lam ṭanpuinate sawiho a ni ang a. Chûng hmuh theih loh ro hlute avânga kan lâwmzia kan lantîr theih dân pawh kan sawiho bawk ang.

3. Hmuh theih loh ro hlu ber chu eng nge ni a, chu chu engtin nge kan neih theih?

³ Hmuh theih loh ro hlu ber chu Pathian Jehova nêna inṭhianna  hi a ni. (Jak. 2:23) Pathian tân sual fa mihringte nên inṭhianna siam a, thianghlim taka awm reng chu engtin nge a nih theih? Chutiang a nih theih chhan chu Isua tlanna inthâwinain ‘khawvêl sual a kalpui’ vâng a ni. (Joh. 1:29) Jehova chuan mihringte tâna Chhandamtu pe tûra a thiltum chu a hlawhchham lo vang tih a hre lâwk a. Chuvângin, Pathian chuan Krista thih hmaa nung mihringte chu ṭhianah a siam thei a ni.—Rom 3:25.

4. Kristian hun hmaa Pathian ṭhian ṭhenkhatte entawn tûr siam chu sawi rawh.

⁴ Kristian hun hmaa Pathian ṭhian lo ni tawhte kha han ngaihtuah teh. Abrahama chu rinna nghet tak lantîrtu a ni a. Abrahama a thih aṭanga kum 1,000 a liam hnuah, Jehova chuan ani chu “ka ṭhian,” tiin a ko va. (Is. 41:8) Chuvângin, thihna meuh pawhin Jehova chu a ṭhiante lakah a ṭhen hrang thei lo. Abrahama chu Jehova hriatrengnaah a nung a ni. (Lk. 20:37, 38) Entîrna dang leh chu Joba a ni a. Vâna vântirhkoh kal khâwmte hmaah, Jehova chuan Joba chungchâng chu chhuang takin a sawi a. Ani chu mi ṭha “famkim, mi ngîl, Pathian ṭih mi, thil ṭha lo laka insûm thei mi,” tiin a sawi a ni. (Job. 1:6-8) A nih leh, Jehova chuan milem pathiante biakna rama kum 80 vêl rinawm taka a rawngbâwltu Daniela chu engtin nge a thlîr? Vântirhkohte chuan chu kum upa tak hnênah chuan Pathian tâna “mi duhawm tak” a ni tih ṭum thum lai an hrilh a. (Dan. 9:23; 10:11, 19) Chuvângin, Jehova chuan a ṭhian duh tak thi tawhte kaihthawh chu a châk hle ang tih kan chiang thei a ni.—Job. 14:15.

5. Jehova nêna inṭhianna hnai tak nei tûrin eng nge kan tih ngai?

⁵ Tûn laiah ṭha famkim lo mi eng zâtin nge Jehova nêna inṭhianna hnai tak nei? Maktaduai tam takin an nei a ni. Chutianga kan hriat chhan chu, khawvêl puma a hmei a pa leh naupang tam takte’n Pathian ṭhian nih an duhzia an nungchanga an lantîr vâng a ni. Jehova chuan ‘mi ṭha famkim chu ṭhianah’ a siam a. (Thuf. 3:32) Chu inṭhianna chu Isua tlanna inthawina rinna avânga neih theih a ni. Chumi ṭanchhanin, Jehova chuan a hnêna inpumpêk a, baptisma chan theihna chanvo hlu min pe a. Chu rahbi pawimawh tak kan rah chuan, lei leh vâna Mi ropui ber nêna ‘inṭhianna hnai tak’ neitu inpumpek a, baptisma chang tawh Kristian maktaduai tam tak zînga mi kan ni ang!

6. Pathian nêna inṭhianna kan neih avânga kan lâwmzia engtin nge kan lantîr theih?

⁶ Pathian nêna inṭhianna chu kan ngaihlu tih engtin nge kan lantîr theih? Kum za tam tak chhûng Pathian laka rinawm tlattu Abrahama leh Joba te angin, keini pawh, he khawvêl hluiah hian kum rei tak chhûng Jehova rawng lo bâwl tawh mah ila, kan rinawm reng a ngai a. Daniela angin, Pathian nêna kan inṭhian ṭhatna chu kan nun aiin kan ngaihlu tûr a ni. (Dan. 6:7, 10, 16, 22) Jehova ṭanpuinain, kan hmachhawn eng fiahna pawh kan tuarchhuak theiin, amah nêna kan inṭhianna chu kan tinghet thei a ni.—Phil. 4:13.

7. (a) Thufingte 15:8-a sawi angin, Jehova’n kan ṭawngṭainate chu engtin nge a ngaih? (b) Engtin nge Jehova’n kan ṭawngṭaina chu a chhân?

⁷ Hmuh theih loh ro hlu dang leh chu ṭawngṭaina hi a ni a. Ṭhian ṭhate chu an ngaihtuahnate leh an rilru vei zâwngte an inhrilh tawn ṭhîn a ni. Jehova nêna kan inṭhiannaah chutiang chu a ni ve em? Aw, ni e! Jehova chuan a Thu, Bible hmangin min bia a, chutah chuan a ngaihtuahnate leh a rilru vei zâwngte a târ lang a. Keini chuan ṭawngṭaina hmangin amah kan bia a, chhûngrila kan ngaihtuahnate leh rilru vei zâwngte chu kan hrilh thei a ni. Ani chuan kan ṭawngṭainate chu  ngaihthlâk a duh a. (Thufingte 15:8 chhiar rawh.) Hmangaihna nei tak Ṭhian ṭha angin, Jehova chuan kan ṭawngṭainate chu a ngaithla mai ni lovin, a chhâng a ni. A châng chuan min chhâng nghâl a. Mahse, a châng chuan thil engemaw chungchânga kan dîl zawm zêl pawh a ngai thei a ni. Engpawh chu ni se, a hun takah leh a ṭha thei ang berin min chhâng ang tih kan ring tlat thei a ni. Ni e, Pathian chuan kan beisei angin min chhâng lo pawh a ni mai thei. Entîr nân, fiahna kan tawhte min lâk bosak aiin, chhel taka kan “tuar theihna tûrin” finna leh chakna min pe thei a ni.—1 Kor. 10:13.

8. Ṭawngṭai theihna thilpêk avânga kan lâwmzia engtin nge kan lantîr theih?

⁸ He ṭawngṭaina thilpêk hlu tak avânga kan lâwmzia engtin nge kan lantîr theih? Kan lantîr theih dân kawng khat chu, “bâng lovin ṭawngṭai ula,” tia Pathian fuihna kan zawmna hmangin a ni. (1 Thes. 5:17) Jehova chuan ṭawngṭai tûrin min tilui lo. Chu aiin, ani chuan zalên taka duhthlan theihna kan neih chu a hlut a, “ṭawngṭai fan fan” tûrin min fuih zâwk a ni. (Rom 12:12) Chuvângin, ni khatah vawi engemaw zât ṭawngṭaiin, chu thilpêk avânga kan lâwmzia kan lantîr thei a. Chu bâkah, kan ṭawngṭainaahte chuan Jehova chunga kan lâwmziate leh amah chawimawi kan duhziate kan telh thei a ni.—Sâm 145:2, 3.

9. Engtin nge unaupa pakhatin ṭawngṭaina chu a ngaih a, engtin nge i ngaih ve?

⁹ Jehova rawng kan bâwl rei poh leh kan ṭawngṭainate min chhân dân kan hmu tam lehzual ang a, ṭawngṭaina hlutzia kan hre thiam lehzual ang. Entîr nân, hunbi kima kum 47 rawng lo bâwl tawh unau Chris-a hi han ngaihtuah teh. “Zîng taka tho va, Jehova hnêna ṭawngṭai hi nuam tak a ni. Ni chhuak êng mawi tak hnuaia thil engkim mawi taka a lan huna Jehova hnêna ṭawngṭai chu a va hahdamthlâk tak êm! Chu chuan ṭawngṭaina pawh tiamin, a thilpêk zawng zawng avânga lâwm thu sawi tûrin min chêttîr a. Chu bâkah, zân mut dâwna ṭawngṭai a, chumi hnua rilru hahdam taka mut chu nuam tak a ni,” tiin a sawi.

10. Engvângin nge Pathian thlarau thianghlim chu kan ngaihhlut ang?

¹⁰ Kan ngaihhlut tûr hmuh theih loh thilpêk dang leh chu Pathian thlarau thianghlim hi a ni a. Isua chuan thlarau thianghlim dîla ṭawngṭai zawm zêl tûrin min fuih a ni. (Lk. 11:9, 13) A thlarau thianghlim hmangin Jehova chuan ‘thiltihtheihna nasa tak’ min pe a. (2 Kor. 4:7; Tirh.1:8) Pathian thlarau thianghlim ṭanpuinain, kan hmachhawn harsatna eng pawh kan tuar chhuak thei a ni.

11. Eng kawngtein nge thlarau thianghlim chuan min ṭanpui theih?

¹¹ Thlarau thianghlim chuan Pathian rawngbâwlnaa kan chanvo dawnte hlen thei tûrin min ṭanpui thei a. Kan theihnate leh thiamnate pawh a tipung thei a ni. Chu bâkah, kan Kristian mawhphurhnate hlen thei tûrin min ṭanpui thei a. Pathian rawngbâwlnaa kan hlawhtlinnate chu keimahni vâng ni lovin, thlarau thianghlim ṭanpuina avâng chauhva nei thei kan ni tih kan hria a ni.

12. Sâm 139:23, 24-a sawi angin, eng ti tûra min ṭanpui tûrin nge thlarau thianghlim dîla kan ṭawngṭai theih?

¹² Pathian thlarau thianghlim kan ngaihhlutzia lantîr theih dân kawng dang leh chu kan thinlunga ngaihtuahna ṭha lote leh châkna sualte paih bo tûra ṭawngṭaia a ṭanpuina dîl hi a ni. (Sâm 139:23, 24 chhiar rawh.) Chutianga kan dîl chuan, Jehova’n a thlarau thianghlim hmangin kan ngaihtuahna ṭha lote hre tûrin min ṭanpui ang. Ngaihtuahna ṭha lo emaw, châkna sual emaw kan nei tih kan inhriat chuan, chûngte do thei tûra kan mamawh chakna min pe tûrin Pathian thlarau thianghlim dîlin kan ṭawngṭai tûr a ni. Chutianga kan tih chuan, a thlarau thianghlim hmanga Jehova min ṭanpuina dang thei eng thil mah tih loh kan tum tlat tih kan lantîr a ni ang.—Eph. 4:30.

13. Engtin nge thlarau thianghlim avânga kan lâwmzia kan lantîr lehzual theih?

¹³ Thlarau thianghlim avânga kan lâwmzia kan lantîr lehzual theih dân chu, tûn laia thlarau thianghlim ṭanpuina avânga thil hlen chhuahte ngaihtuahna hmangin a ni. Vâna a lâwn chhoh hmain, Isua chuan a zirtîrte  hnênah: “Thlarau thianghlim chu in chunga a lo thlen hunah thiltihtheihna in la nei ang; tichuan, . . . kâwlkil thleng pawhin ka thuhretute in ni ang,” tiin a hrilh a. (Tirh. 1:8) Chûng thute chu mak danglam takin a thleng famkim mêk a ni. Thlarau thianghlim ṭanpuina avângin, khawvêl hmun tin aṭangin Jehova Thuhretu mi maktaduai riat leh a chanve aia tamte chu lâk khâwm an ni a. Chu bâkah, Pathian thlarau thianghlimin hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, leh insûmtheihnate ang chi mize duhawm takte nei tûra min ṭanpui avângin, thlarau lam paradis-ah kan chêng a ni. (Gal. 5:22, 23) Thlarau thianghlim chu thilpêk hlu tak a va ni êm!

14. Rawngbâwlnaa kan tel hian hmuh theih loh eng ṭanpuina nge kan dawn?

¹⁴ Hmuh theih loh ro hlu dang leh chu Jehova leh a vân lam inawpna pâwl ‘thawhpui’ theihna hi a ni a. (2 Kor. 6:1) Zirtîr siam rawngbâwlnaa kan tel apiangin chutiang chuan kan thawhpui a ni. Paula chuan amah leh rawngbâwlnaa telte chungchângah: “Keini zawng Pathian hnathawhpuite kan ni,” tiin a sawi a. (1 Kor. 3:9) Kristian rawngbâwlnaa kan tel hian Isua hnathawhpuite kan ni bawk. A hnungzuitute hnêna “hnam tina mi zirtîrahte siam” tûra a hrilh hnuah, “In hnênah ka awm zêl ang,” tia Isua sawi hi hre reng ang che. (Mt. 28:19, 20) A nih leh, vântirhkohte chungchâng hi eng nge ni ve? ‘Leia awmte hnêna chatuana chanchin ṭha’ kan tlângaupui laia vântirhkohte kaihhruaina kan dawng chu malsâwmna ropui tak a va ni êm!—Thup. 14:6.

15. Kan rawngbâwlnaa Jehova a tel dân târ langtu Bible-a thiltawn pakhat sawi rawh.

¹⁵ Chûng vân lam ṭanpuina avângin eng thilte nge hlen chhuah a nih? Lalram thuchah chi kan theh hian ṭhenkhat chu thinlung ṭha pu mite chunga a tlâk avângin a ṭhang chho a ni. (Mt. 13:18, 23) A nih leh, chûng thutak chite chu tuin nge ṭhan chhohtîr a, rah chhuahtîr? Isua chuan, ‘Pain a hîp loh chuan’ tu mah a hnungzuitu an ni thei lo tih a sawi a. (Joh. 6:44) Bible chuan chumi chungchângah entîrna langsâr tak a târ lang a. Paula’n Philippi khaw pâwna hmeichhe ṭhenkhat hnêna thu a hrilh lai kha han ngaihtuah lêt teh. An zînga pakhat Ludi chungchângah Bible-in: “Paula thusawi zâwm tûrin Lalpa chuan a thinlung a tivâr ta a,” tia a sawi hi chhinchhiah ang che. (Tirh. 16:13-15) Ludi angin, mi maktaduai tam tak chu Jehova hîpin an awm a ni.

16. Rawngbâwlnaa kan hlawhtlinnate avângin tuin nge chawimawina dawng ang?

¹⁶ Rawngbâwlnaa kan hlawhtlinnate avângin tuin nge chawimawina dawng ang? Paula chuan Korinth kohhran hnêna a lehkha thawnah: “Keiin ka phun a, Apollovan tuiin a châwm a; nimahsela, Pathianin a ṭhantîr a ni. Chutichuan, a ṭhantîrtu Pathian chauh lo chu, a phuntu chu engmah a ni lo va, tuia châwmtu pawh chu engmah a ni hek lo,” tia ziakin, chu zawhna chu a chhâng a. (1 Kor. 3:6, 7) Paula angin, keini pawh rawngbâwlnaa kan hlawhtlinnate avângin Jehova kan chawimawi reng tûr a ni.

17. Pathian, Krista, leh vântirhkohte ‘thawhpui’ theihna chanvo hlu kan neih avânga kan lâwmzia engtin nge kan lantîr theih?

¹⁷ Pathian, Krista, leh vântirhkohte ‘thawhpui’ theihna chanvo hlu kan neih avânga kan lâwmzia engtin nge kan lantîr theih? Mite hnêna ṭhahnemngai taka chanchin ṭha hrilhna hmangin kan lantîr thei a. “Vântlâng zîngah te, in tinah te” kala thu hrilhnate pawh tiamin, tih theih dân kawng tam tak a awm a ni. (Tirh. 20:20) Mi tam tak chuan tawnchawpa thu hrilh chu nuam an ti a. An hriat ngai loh  tuemaw an hmuh hian nêlawm taka biain, tîtîna an neihpui ṭhîn a. Ṭha taka a chhân lêt chuan, Lalram thuchah chu remhre takin an hrilh ṭhîn a ni.

18-19. (a) Engtin nge thutak chi chu tui kan leih? (b) Jehova’n Bible zirlai pakhat a ṭanpui dân târ langtu thiltawn sawi rawh.

¹⁸ “Pathian hnathawhpuite” kan nih angin, thutak chi chu kan theh mai ni lovin, tui pawh kan leih bawk tûr a ni. Tuemawin tuina a lantîr hunah, a rang thei ang bera tlawhkîr, a nih loh leh unau tuemawin Bible a zirpui theih nâna ruahmanna siamsak chu kan duh a. Bible zirnain hma a sâwn chhoh zêl ruala Jehova’n zirtîr ni thei tûr thinlung leh rilrua hna a thawh dân kan hmuh hian kan hlim a ni.

¹⁹ South Africa rama dawithiam pakhat Raphalalani-a thiltawn hi han ngaihtuah teh. Bible aṭanga a thu zirte chu a duh hle a. Mahse, thlahtu thi tawhte nêna inbiakpawhna chungchânga Bible sawi a han hriat chuan harsatna lian tak a hmachhawn a ni. (Deut. 18:10-12) Zâwi zâwin a ngaihtuahna chu Pathian a thununtîr a. A tâwpah, a eizawnna ber dawithiamna chu a bânsan ta a ni. Tûna kum 60-a upa Raphalalani-a chuan: “Jehova Thuhretute hian hna hmu tûra ṭanpuina pawh tiamin, kawng tam taka min ṭanpui avângin an chungah ka lâwm hle a. A bîk takin, ka nun dân tithianghlim a, baptisma chang tawh Thuhretu nia rawngbâwlnaa tel thei tûra min ṭanpui avângin Jehova chungah ka lâwm tak zet a ni,” tiin a sawi.

20. Eng tih nge i tum tlat?

²⁰ He thuziakah hian hmuh theih loh ro hlu pali chungchâng kan sawiho va. Chûng zînga hlu ber chu Ṭhian ṭha ber anga Jehova kan nei thei hi a ni. Chu chuan ṭawngṭaia amah pan theihna te, a thlarau thianghlim ṭanpuina dawn theihna te, leh kan rawngbâwlnaa vân lam ṭanpuinate ang chi hmuh theih loh ro hlu dangte hlâwkpui thei tûrin min ṭanpui a. Chuvângin, chûng hmuh theih loh ro hlute avânga lâwmna lantîr lehzual chu i tum tlat ang u. Chu bâkah, Jehova chu Ṭhian ṭha ber anga kan neih theih avânga kan lâwmzia lantîr lehzual chu i tum tlat bawk ang u.