1. ¿Tiʼ tqʼama Jesús tiʼjju tuʼn tten qqʼinumabʼil toj kyaʼj?

NYA kykyaqil oyaj qʼanchaʼl qe. Ex mas nim kyoklen oyaj nya qʼanchaʼl. Toj chikʼbʼabʼil ex tqʼoʼn Jesús twi jun witz, tqʼama qa mas nim toklen tuʼn tten qqʼinumabʼil toj kyaʼj twitzju tuʼn tten qqʼinumabʼil twitz txʼotxʼ. Tqʼama jlu: «Jatum taʼ kyqʼinumabʼle, atzun tok kyanmiye tiʼj» (Mat. 6:19-21). Aj tel qnikʼ tiʼj alkyeqe tiʼchaq mas nim kyoklen, in nok tilil quʼn tuʼn kykanet. In ten qqʼinumabʼil toj kyaʼj aj tten jun tbʼanel qbʼi twitz Dios ex aj ttzalaj tanmi quʼn. Ik tzeʼn tqʼama Jesús, ni jun jaku tzʼel qʼinte oyaj lu qe ex ni jun jaku tzʼel elqʼante.

2. a) ¿Tiʼ tqʼama apóstol Pablo tuʼn tbʼant quʼn toj 2 Corintios 4:17 ex 18? b) ¿Tiʼ kʼelel qnikʼ tiʼj toj xnaqʼtzbʼil lu?

² Tqʼama apóstol Pablo tuʼn tok qqʼoʼn qwitz kyiʼj tiʼchaq nya qʼanchaʼl (kjawil uʼjit 2 Corintios 4:17, 18). Kyxol qeju oyaj nya qʼanchaʼl, ateʼ qeju tbʼanel tiʼchaq tzul tqʼoʼn Dios qe toj akʼaj twitz Txʼotxʼ. Toj xnaqʼtzbʼil lu, qo yolil tiʼj kyaje oyaj in tzaj qkʼamoʼn toj ambʼil jaʼlo: aju qamiwbʼil tukʼil Jehová, aju naʼj Dios, aju onbʼil in tzaj tqʼoʼn xewbʼaj xjan qe ex aju onbʼil in tzaj tqʼoʼn Jehová, Jesús ex qe anjel qe toj pakbʼabʼil. Ax ikx, kʼelel qnikʼ tiʼj tzeʼn jaku txi qqʼoʼn chjonte te Jehová kyiʼj oyaj lu.

3. ¿Alkye oyaj nya qʼanchaʼl mas nim toklen, ex tiquʼn jaku ten oyaj lu qe?

³ Jun kyxol qe oyaj nya qʼanchaʼl mas nim toklen, at aju  qamiwbʼil tukʼil Jehová (Sal. 25:14). Noqtzun tuʼnj, ¿alkye tten jaku tzʼok Dios te kyamiw xjal aj il ex tuʼn kukx tok te xjan? Tuʼnju in nel qʼiʼn kyil xjal tuʼn chojbʼil bʼant tuʼn Jesús (Juan 1:29). Ex tej naʼmxtoq tkyim Jesús, bʼiʼntoq tuʼn Jehová qa kukx kʼajbʼel Tkʼwal te ajxi tkyim tuʼn kyklet xjal. Tuʼntzunju, ok Jehová te kyamiw xjal e anqʼin tej naʼmxtoq tkyim Jesús (Rom. 3:25).

4. Qʼamantza alkye junjun xjal e ok te tamiw Dios tej naʼmxtoq tkyim Jesús.

⁴ Qo yolin kyiʼj junjun tamiw Dios e ten tej naʼmxtoq tkyim Jesús. Ten nim qʼuqbʼil tkʼuʼj Abrahán. Tej otoqxi tzikʼ mas te mil abʼqʼi tkyimlen, ok tqʼoʼn Jehová tbʼi te «wamiwoye» (Is. 41:8). Tuʼn jlu in nel qnikʼ tiʼj qa axpe ikx qa ma kyim jun xjal, mintiʼ in naj tamiwbʼil tukʼil Jehová. Ex kukx at tbʼi Abrahán toj t-ximbʼetz Jehová (Luc. 20:37, 38). Ax ikx te Job ok te tamiw Jehová. Tej tok kychmon kyibʼ anjel toj kyaʼj, tqʼama Jehová qa ok qeʼ tkʼuʼj tiʼj Job. Tqʼama jlu tiʼj: «In anqʼin tuj tumelxix ex tzʼaqlxix, bʼaʼn niman weye, ex tpaʼn tibʼ tiʼj mya bʼaʼn» (Job 1:6-8). Ex ¿tiʼ t-ximbʼetz Jehová ten tiʼj Daniel, aju ajbʼen te tojlo 80 abʼqʼi toj jun tnam jatumel mintiʼ e ajbʼen xjal te? Tej otoq tijin Daniel, oxe maj xi kyqʼamaʼn anjel te qa «kʼujlaʼnxix tuʼn Dios» (Dan. 9:23; 10:11, 19). Qʼuqli qkʼuʼj tiʼj qa in nayon Jehová tuʼn tpon qʼij tuʼn kyjaw anqʼin qe tamiw kʼujlaʼn qe tuʼn (Job 14:15).

5. ¿Tiʼ tuʼn tbʼant quʼn tuʼn tten jun tbʼanel qamiwbʼil tukʼil Jehová?

⁵ Toj ambʼil jaʼlo, o che ok nim millón xjal te tamiw Jehová maske aj il qe. Nim xinaq, xuʼj ex kʼwal twitz tkyaqil Txʼotxʼ in kubʼ kyyekʼin tukʼil kymod qa kyaj tuʼn kyok te tamiw Dios. In tzaj tqʼamaʼn Xjan Uʼj qa «at tmojbʼabʼl tibʼ [Jehová] kyukʼil» qeju in che bʼet tzʼaqli twitz (Prov. 3:32). Jaku ten tbʼanel kyamiwbʼil tukʼil Jehová tuʼnju in nok qeʼ kykʼuʼj tiʼj chojbʼil bʼant tuʼn Jesús. Noq tuʼn chojbʼil, in tzaj tqʼoʼn Jehová ambʼil qe tuʼn t-xi qqʼamaʼn te tuʼn qajbʼen te ex tuʼn tjaw aʼ qwiʼ. Aj tbʼant jlu quʼn, in nok qmojbʼan qibʼ kyukʼil nim millón erman o txi kyqʼamaʼn te Jehová tuʼn kyajbʼen te ex o jaw aʼ kywiʼ, aʼyeju in che tzalaj tuʼn tten jun tbʼanel kyamiwbʼil tukʼil xjal mas nim toklen twitz alkyexku juntl.

6. ¿Tzeʼn jaku kubʼ qyekʼin qa in nok qqʼoʼn toklen qamiwbʼil at tukʼil Jehová?

⁶ ¿Tzeʼn jaku kubʼ qyekʼin qa in nok qqʼoʼn toklen qamiwbʼil at tukʼil Jehová? Jaku kubʼ qyekʼin aj tel qkanoʼn tiʼj Abrahán ex tiʼj Job. Kukx e ajbʼen te Jehová toj mas te 100 abʼqʼi. Ax jlu jaku bʼant quʼn jaʼlo, noq jteʼxku ambʼil qʼiʼn quʼn toj qajbʼebʼil te Jehová. Ax ikx, nim toklen tuʼn tel qkanoʼn tiʼj Daniel ex tuʼn tok qqʼoʼn mas toklen qamiwbʼil tukʼil Jehová twitzju qchwinqlal (Dan. 6:7, 10, 16, 22). Tuʼn onbʼil in tzaj tqʼoʼn Jehová qe, jaku tzikʼx alkyexku nya bʼaʼn quʼn ex kukx jaku ten qamiwbʼil tukʼil (Filip. 4:13, TNM).

7. a) Ik tzeʼn in tzaj tqʼamaʼn Proverbios 15:8, ¿tzeʼn in che ela qnaʼj Dios toj twitz Jehová? b) ¿Alkye tten in che tzaj ttzaqʼweʼn?

⁷ Aju naʼj Dios, atzun juntl oyaj nya qʼanchaʼl. Kygan kabʼe xjal kyamiw kyibʼ tuʼn kyyolin kyxolx ex tuʼn t-xi kyqʼamaʼn aju in kubʼ kynaʼn. Ax jlu in bʼaj tiʼj qamiwbʼil at tukʼil Jehová. In najbʼen Xjan Uʼj tuʼn tuʼn tyolin qukʼil, ex atz toj in tzaj tqʼamaʼn t-ximbʼetz qe ex aju in kubʼ tnaʼn. Atzun qe, in qox yolin tukʼil toj naʼj Dios. Aj tbʼant jlu quʼn,  jaku t-xi qqʼamaʼn qximbʼetz te Jehová ex aju in kubʼ qnaʼn. Tgan Jehová tuʼn tbʼin kyiʼj qnaʼj Dios (kjawil uʼjit Proverbios 15:8). In nok Jehová te jun tbʼanel qamiw, tuʼntzunju nya oʼkx in che tzaj tbʼiʼn qnaʼj Dios, sino ax ikx in che tzaj ttzaqʼweʼn. At maj jun rat in che tzaj ttzaqʼweʼn qnaʼj Dios, atzun junjuntl maj, il tiʼj tuʼn kukx qnaʼn Dios. Noq alkyexku in bʼaj, jaku tzʼok qeʼ qkʼuʼj tiʼj qa tzul ttzaqʼweʼn Jehová qnaʼj Dios toj ambʼil mas bʼaʼn toj twitz. Noqtzun tuʼnj, bʼalo junxitl tzaqʼwebʼil jaku tzaj tqʼoʼn qe twitzju in qo ayon tiʼj. Jun techel, bʼalo mlay tzʼel tiʼn jun nya bʼaʼn in tzaj qiʼj, sino oʼkx jaku tzaj tqʼoʼn qnabʼil ex qipumal tuʼn tikʼx quʼn (1 Cor. 10:13).

8. ¿Tzeʼn jaku kubʼ qyekʼin qa in xi qqʼoʼn chjonte tiʼj qoklen tuʼn qnaʼn Dios?

⁸ ¿Tzeʼn jaku kubʼ qyekʼin qa in xi qqʼoʼn chjonte tiʼj qoklen tuʼn qnaʼn Dios? Jun tumel, aju qa ma txi qbʼiʼn nabʼil lu: «Miʼn che qʼajene tuʼn kynaʼne Dios» (1 Tes. 5:17). Mintiʼ in qo ok t-obligarin Jehová tuʼn qnaʼn Dios te. Sino in tzaj tqʼoʼn ambʼil qe tuʼn tkubʼ qximen tuʼn tbʼant quʼn ex in tzaj tqʼamaʼn qe tuʼn kukx qnaʼn Dios (Rom. 12:12). Tuʼn jlu in nel qnikʼ tiʼj qa jaku tzʼok qqʼoʼn toklen naʼj Dios aj tbʼant quʼn nimku maj toj jun qʼij. Noqtzun tuʼnj, aj qnaʼn Dios, qqʼonx chjonte te Jehová ex bʼaʼn tuʼn tjaw qnimsaʼn (Sal. 145:2, 3).

9. a) ¿Alkye t-ximbʼetz ermano Chris at tiʼj naʼj Dios? b) ¿Tiʼ teya t-xim at tiʼj naʼj Dios?

⁹ Qa mas ambʼil in qo ajbʼen te Jehová ex in nok qqʼoʼn qwitz tiʼj tzeʼn in che tzaj ttzaqʼweʼn qnaʼj Dios, mas kʼokel qqʼoʼn toklen naʼj Dios. Qqʼonk qwiʼ tiʼjju tzaj tqʼamaʼn ermano Chris, aju o tzʼajbʼen 47 abʼqʼi te Jehová toj tkyaqil ambʼil: «Ngane tuʼn njaw weʼye te prim ex tuʼn nyoline tukʼil Jehová. Tbʼanelxix aj qyolin tukʼil akux in netz tqan Qʼij ex in kubʼ taʼl cheʼw. Aj in bʼant jlu wuʼne, in kubʼ nnaʼne qa waje tuʼn t-xi nqʼoʼne chjonte te tiʼj tkyaqilju oyaj in tzaj tqʼoʼn weye, ik tzeʼn naʼj Dios. Ajtzun tkubʼaj qʼij, in bʼant jun naʼj  Dios wuʼne naʼmxtoq in xiʼye jtal, iktzun tten in chin jtane toj txubʼtxaj».

10. ¿Tiquʼn bʼaʼn tuʼn tok qqʼoʼn toklen xewbʼaj xjan?

¹⁰ Aju xewbʼaj xjan, atzun juntl oyaj nya qʼanchaʼl ex bʼaʼn tuʼn tok qqʼoʼn toklen. Tqʼama Jesús tuʼn kukx txi qqanin xewbʼaj xjan te Jehová (Luc. 11:9, 13). In najbʼen xewbʼaj xjan tuʼn Jehová tuʼn ttzaj tqʼoʼn «nimxix qipumal» (2 Cor. 4:7; Hech. 1:8). Jaku tzikʼx alkyexku joybʼil quʼn tuʼn tonbʼil xewbʼaj xjan.

11. ¿Tzeʼn jaku tzʼonin xewbʼaj xjan qiʼj?

¹¹ In nonin xewbʼaj xjan qiʼj tuʼn kyjapun qoklen in che tzaj qʼoʼn toj qajbʼebʼil te Jehová. Ojtzqiʼn quʼn qa oʼkx in bʼant tbʼanel aqʼuntl quʼn toj ttnam Jehová noq tuʼn tonbʼil xewbʼaj xjan ex nya tuʼnju at qnabʼil.

12. Ik tzeʼn in tzaj tqʼamaʼn Salmo 139:23 ex 24, ¿tiʼ jaku txi qqanin toj qnaʼj Dios?

¹² Juntl tumel tuʼn tkubʼ qyekʼin qa in nok qqʼoʼn toklen xewbʼaj xjan, aju qa ma txi qqanin te Jehová tuʼn tonin qiʼj tuʼn tel qnikʼ tiʼj qa at jun nya bʼaʼn qximbʼetz moqa at jun nya bʼaʼn achbʼil toj qanmi (kjawil uʼjit Salmo 139:23, 24). Jaku tzaj ttzaqʼweʼn Jehová qnaʼj Dios aj tajbʼen xewbʼaj xjan tuʼn tuʼntzun tel qnikʼ tiʼj qa at jun tiʼ il tiʼj tuʼn tkubʼ qchʼixpuʼn. Qa ma bʼaj jlu, qqaninx te tuʼn ttzaj tqʼoʼn xewbʼaj xjan qe tuʼn tten qipumal tuʼn tok tilil quʼn tuʼn tkubʼ tiʼj nya bʼaʼn qximbʼetz. Iktzun tten kbʼel qyekʼin te Jehová qa nya qaj tuʼn tkubʼ qbʼinchaʼn jun tiʼ nya toj tumel tuʼntzun kukx ttzaj tqʼoʼn xewbʼaj xjan qe (Efes. 4:30).

13. ¿Tiʼ jaku bʼant quʼn tuʼntzun t-xi qqʼoʼn chjonte tiʼj xewbʼaj xjan?

¹³ Mas jaku txi qqʼoʼn chjonte tiʼj xewbʼaj xjan qa ma qo ximen tiʼj tkyaqilju in bʼant tuʼn toj ambʼil jaʼlo. Tej naʼmxtoq taj Jesús toj kyaʼj, tqʼama jlu kye t-xnaqʼtzbʼen: «Ok tul Xewbʼaj Xjan kyukʼile, ok kykʼmaʼye kyipumale, ex che okele testiw wiʼje tuj [...] tkyaqil twitz txʼotxʼ» (Hech. 1:8). O japun kywi yol toj  jun tbʼanel tten. Tuʼn tonbʼil xewbʼaj xjan, o che ok mas te 8 millón xjal twitz tkyaqil Txʼotxʼ te tmajen Jehová. Ax ikx, at mujbʼabʼil qxol tuʼnju in nonin xewbʼaj xjan qiʼj tuʼn kyten tbʼanel qmod, ik tzeʼn qkʼujlabʼil, tzalajbʼil, mujbʼabʼil, qpasens, tuʼn qbʼinchan xtalbʼil, tuʼn tten qʼuqbʼil qkʼuʼj, tuʼn qok te mans ex tuʼn qjakʼunte qibʼ (Gál. 5:22, 23). Tuʼn jlu in nel qnikʼ tiʼj qa jun tbʼanelxix oyaj xewbʼaj xjan.

14. ¿Alkyeqe in che onin qiʼj aj qpakbʼan?

¹⁴ Ax ikx o tzaj qʼoʼn juntl oyaj mintiʼ qʼanchaʼl qe: aju tuʼn qonin tiʼj Jehová ex kyiʼj tmajen ateʼ toj kyaʼj (2 Cor. 6:1). In nonin Jehová qiʼj aj qonin kyiʼj xjal tuʼn kyok te t-xnaqʼtzbʼen Jesús. Tej tyolin apóstol Pablo tiʼjx ex kyiʼj junjuntl okslal e pakbʼan, xi tqʼama jlu kye: «Junx in qo aqʼnane, in qo ajbʼene te Dios» (1 Cor. 3:9). Ax ikx in qo onin tiʼj Jesús aj qex pakbʼal. Bʼaʼn tuʼn ttzaj qnaʼn qa tej otoqxi txi tqʼamaʼn Jesús kye qeju e ok lepeʼ tiʼj tuʼn t-xi kyqʼamaʼn kye xjal tuʼn kyok te t-xnaqʼtzbʼen, ax ikx tqʼama jlu: «Chin tele kyukʼile» (Mat. 28:19, 20). Ex ¿tiʼ jaku txi qqʼamaʼn kyiʼj anjel? In xi qqʼoʼn nim chjonte tuʼnju in che onin anjel qiʼj tuʼn t-xi qiʼn tbʼanel tqanil kye kykyaqil «xjal najl twitz txʼotxʼ» (Apoc. 14:6).

15. ¿Alkye tten in nonin Jehová qiʼj toj pakbʼabʼil? Qʼamantza jun techel.

¹⁵ ¿Tiʼ in bʼant quʼn tuʼnju onbʼil in tzaj qʼoʼn qe tzmax toj kyaʼj? Tuʼnju in qo pakbʼan tiʼj tbʼanel tqanil, ateʼ junjun ijaj in che kubʼ tzʼaq toj tbʼanel kyanmi xjal ex in che chʼiy (Mat. 13:18, 23). ¿Alkyetzun in nonin tuʼn kychʼiy ijaj lu ex tuʼn tel kywitz? Tzaj ttzaqʼweʼn Jesús xjel lu tej tqʼama: «Mlay tzul jun xjal wukʼile qa mya tuʼn Nmane sul qʼiʼn» (Juan 6:44). In kanet jun techel tiʼj jlu quʼn toj Tyol Dios. Toj jun maj, pakbʼan apóstol Pablo kye junjun xuʼj ateʼ tiʼjxi tnam Filipos. Qqʼonk qwitz tiʼjju in tzaj tqʼamaʼn Tyol Dios tiʼj jun kyxol qe xuʼj lu, aju Lidia tbʼi: «O tqʼajtza Qajaw tuj tanmi xuʼj tuʼn tok tqʼoʼn tkwent tiʼj ju in tmaʼn Pablo» (Hech. 16:13-15). Ik tzeʼn bʼant tuʼn Jehová tukʼil Lidia, o che tzaj tiʼn nim millón xjal toj ttnam.

16. ¿Alkye bʼaʼn tuʼn tjaw qnimsaʼn qa bʼaʼn in nela qpakbʼabʼil?

¹⁶ ¿Alkye bʼaʼn tuʼn tjaw qnimsaʼn qa bʼaʼn in nela qpakbʼabʼil? Tzaj ttzaqʼweʼn apóstol Pablo xjel lu kyuʼn yol xi tqʼamaʼn kye okslal te Corinto: «Wuʼne kuʼx wawaʼne iyaj, atzunte Apolos ok ten aʼlilte, ex atzunte Dios chʼisal te. Kyjaʼtzun, aju awalte mintiʼ toklen, tukʼix ju aʼlilte mintiʼ toklen; noq oʼkx Dios at toklen; porke atzun chʼisal te» (1 Cor. 3:6, 7). Aj ttzaj tbʼanel qe toj qpakbʼabʼil, bʼaʼn tuʼn tjaw qnimsaʼn Jehová ik tzeʼn bʼant tuʼn apóstol Pablo.

17. ¿Tzeʼn jaku kubʼ qyekʼin qa in xi qqʼoʼn chjonte tiʼj qoklen tuʼn qonin tiʼj Jehová, tiʼj Jesús ex kyiʼj anjel?

¹⁷ ¿Tzeʼn jaku kubʼ qyekʼin qa in xi qqʼoʼn chjonte tiʼj qoklen tuʼn qonin tiʼj Jehová, tiʼj Jesús ex kyiʼj anjel? Jaku kubʼ qyekʼin aj tok tilil quʼn tuʼn t-xi qqʼamaʼn tbʼanel tqanil kye nim xjal. Ex jaku bʼant jlu quʼn toj junxichaq tumel, ik tzeʼn aj qpakbʼan «jatum nnoʼk kychmon kyibʼ xjal» ex ttziyele ja (Hech. 20:20). Ateʼ nim erman kygan tuʼn kypakbʼan toj alkyexku ambʼil. Aj tkanet jun xjal mintiʼ ojtzqiʼn twitz kyuʼn, in nok kyqʼolbʼeʼn ex in xi tzyet tuʼn kyyolin tukʼil. Qa taj jun xjal tuʼn tyolin,  in xi kyqʼamaʼn tbʼanel tqanil tiʼj Tkawbʼil Dios te toj jun tbʼanel tten.

18, 19. a) ¿Alkye tten in kux qqʼoʼn aʼ t-xeʼ ijaj tiʼj axix tok? b) ¿Tzeʼn onin Jehová tiʼj Raphalalani tej t-xnaqʼtzan tiʼj Xjan Uʼj?

¹⁸ Tuʼnju in qo onin tiʼj Dios, nya oʼkx kbʼelex qawaʼn ijaj tiʼj axix tok, sino ax ikx kbʼelex qqʼoʼn aʼ t-xeʼ. Qa taj jun xjal tuʼn tok tbʼiʼn tbʼanel tqanil, kʼokel tilil quʼn tuʼn qmeltzʼaj tukʼil moqa kxel qqʼamaʼn te juntl erman tuʼn t-xiʼ visitarilte tuʼntzun t-xi tqʼoʼn xnaqʼtzbʼil te tiʼj Tyol Dios. Aj tok qqʼoʼn qwitz tiʼj qa in chʼiy jun xjal toj tokslabʼil tuʼn tok te t-xnaqʼtzbʼen Jesús, nim in qo tzalaj tuʼnju in nonin Jehová tiʼj tuʼn tkuʼpin Tyol toj tanmi.

¹⁹ Qo xnaqʼtzan tiʼjju bʼaj tiʼj Raphalalani te Sudáfrica, aju aqʼunan tiʼj kyaqʼun chman. Tgantoq tkyaqilju in nel tnikʼ tiʼj toj Tyol Dios. Pero kwest ela toj twitz tej tjaw tuʼjin toj Xjan Uʼj qa nya bʼaʼn tuʼn qyolin kyukʼil kyimni (Deut. 18:10-12). Chebʼe chebʼe xi tqʼoʼn ambʼil te Dios tuʼn tbʼaj tchʼixpuʼn t-ximbʼetz. Tej tbʼet ambʼil, ya mintiʼ aqʼunan tiʼj kyaqʼun chman maske atoq jlu in tzaj qʼonte twi twa. Ya ma japun Raphalalani twi 60 abʼqʼi ex in tzaj tqʼamaʼn jlu: «In xi nqʼoʼne chjonte kye testigos de Jehová tuʼnju e onin wiʼje toj junxichaq tten, ik tzeʼn tuʼn tkanet waqʼune. Pero mas in xi nqʼoʼne chjonte te Jehová tuʼnju onin wiʼje tuʼn tchʼexpaj wanqʼibʼile. Toj ambʼil jaʼlo, o chin oke te testigo de Jehová ex in chin pakbʼane».

20. ¿Tiʼ qaj tuʼn tbʼant quʼn?

²⁰ Toj xnaqʼtzbʼil lu, ma qo yolin tiʼj kyaje oyaj nya qʼanchaʼl. Kyxol qe jlu, at jun mas nim toklen, aju tbʼanel qamiwbʼil at tukʼil Jehová. Noq tuʼnju qamiwbʼil at tukʼil Jehová, jaku qo tzalaj kyiʼj junjuntl oyaj nya qʼanchaʼl, ik tzeʼn tuʼn qnaʼn Dios, aj tel qnikʼ tiʼj qa in nonin xewbʼaj xjan qiʼj ex aj ttzaj qkʼamoʼn onbʼil tzmax toj kyaʼj tuʼn qpakbʼan. Qaj tuʼn tok qqʼoʼn mas kyoklen oyaj lu. Ex kukx kxel qqʼoʼn chjonte te Jehová tuʼnju in nok te tbʼanel qamiw.