1. Bika byendekele Yesu ha bufuko bwa mwilu?

KULI byuma bya seho bije kutwasa kumona. Mu ñanda yendi ya ha munkinda, Yesu wendekele byuma bya seho bya mwilu bije bitubakana bufuko. Wendekele ngwendi: “Omwo mbunge yobe simbu yoshe yakala kuje kubwakala bufuko bwobe.” (Mateo 6:19-21) Mbunge yetu ikatushongangeya tushakezeke byuma bije bitumona ngwetu binapu bya seho. Tulitulikila “bufuko bwa mwilu,” nga tukala na lizina lyalibwa kuli Njambi. Yesu wendekele ngwendi wahi asa kubiisa obu bufuko nambe kubwiba.

2. (a) Kwesekesa na 2 Kolinte 4:17, 18, Paulu watushongangeyeye ngwendi tulinge bika? (b) Bika bitusimutwiya muno mu cilongesa?

² Kapositolo Paulu watushongangeyeye ngwendi ‘tukengelele byuma bije kanda tumone.’ (Tandeni 2 Kolinte 4:17, 18.) Byuma bije kanda tumone binambateselela na byuma byabibwa bitukalikuwa mu kaye kakaha ka Njambi. Muno mu cilongesa, tusimutwiya ha byuma bya seho biwana byanatwana Yehova bije kutwasa kumona. Ebi byuma binapu busamba bwetu na Njambi, lilombelo, sipilitu ya Njambi ya kujela na bukwasi bwali na kutwana Yehova na Yesu na tungelo omwo twambulula. Tusimutwiya lalo mutwasa kumwesela kukandelela kuli Yehova ha kutwana ebi byuma bya seho bije kutwasa kumona.

3. Cuma muka ca seho manene cije kutwasa kumona, co bika bilingisa tukale naco?

³ Cuma ca seho manene cije kutwasa kumona cinapu kupwa  babusamba ba Yehova Njambi. (Myaso 25:14) Njambi asa kutwalelelaho bati kupwa wa kujela okuni alikuta busamba netu banu ba kujeneka kulumbunuka? Asa kulinga ngoco mwafwa ndando ya kupatula ya Yesu ‘itundisa bubi bwa baka-kaye.’ (Yowa 1:29) Yehova wazibukile ngwendi Yesu atwalelelaho kupwa wa kulongwa kweta na ku kutsa kwendi mangana obole banu. Mukemwo Njambi walikutile busamba na banu baje bayoyele simbu kanda Yesu akutsile banu hano hasi.—Loma 3:25.

4. Endekeni banu ba Kusañulu baje bapwile babusamba ba Njambi.

⁴ Tusimutwiyeni ha banu ba Kusañulu baje bapwile babusamba ba Njambi. Abilahama wakele na likulahelo lya kukanyama. Mu kwetile myaka 1000, kutunda hatsilililile Abilahama, Yehova wamutumbwile ngwendi ‘kabusamba kange.’ (Isaya 41:8) Oku kumwesa ngwabo nameme baje banatsi, Yehova anga acibamona ngwendi babusamba bendi. Acili na kwanuka Abilahama. (Luka 20:37, 38) Mukwabo napu Yombi. Yehova washangazalele Yombi hakati ka tungelo. Wamutumbwile ngwendi, “muka-busunga na kulongwa na kukomoka Njambi na kulitenga ku bubi.” (Yombi 1:6-8) Yehova wamwene bati Ndanyele uje wamupangelele ha myaka 80 oku ali mu lifuti lya banu baje balemesele binjambi beka? Kangelo walekele Ndanyele ha bisimbu bitatu ngwendi Njambi “wakuzema.” (Ndanye 9:23; 10:11, 19) Tuzibuka ngwetu, Yehova nashungwiya kukasangula babusamba bendi bazema.—Yombi 14:15.

5. Bika bitunapande kulinga mangana tulikute busamba na Yehova?

⁵ Banu bangahi ba kujeneka kulumbunuka baje banapu babusamba ba Yehova matangwa ano? Banapu babangi manene. Twendeka ngoco, mwafwa mu kaye koshe banalume na banakazi na banike babangi bashaka kupwa babusamba bendi. Yehova akalikutu busamba na “baka-kusungama.” (Visi 3:32) Banapu babusamba bendi, mwafwa banakulahela ndando ya kupatula ya Yesu. Ngeci, Yehova natutabesa tulikundike kuli ikeye na kutumbwitika. Nga tulinga ebi byuma bya seho, co tulikwatasana na baka-Kilistu baje banalikundika kuli Njambi na kubambwitika, co lalo banapu babusamba ba Yehova.

6. Tumwesa bati ngwetu twamona busamba bwetu na Njambi kupwa bwa seho?

⁶ Tumwesa bati ngwetu twamona busamba bwetu na Njambi kupwa bwa seho? Tunapande kutwalelelaho kulongwa nameme tunapangela Njambi ha simbu yailaha. Co tutembwinina Abilahama na Yombi baje balongwele kuli Njambi ha myaka yaingi. Co lalo tunapande kumona busamba bwetu na Njambi kupwa bwa seho manene kutubakana buyoye bwetu ngwe mwalingile Ndanyele. (Ndanye 6:7, 10, 16, 22) Yehova atukwasa tukolese mu byeseko byoshe bituliwana nabyo mangana tukanyamese busamba bwetu nendi.—Fili 4:13.

7. (a) Kwesekesa na Visimo 15:8, Yehova akalizibi bati ha malombelo etu? (b) Yehova akakumbulula bati malombelo etu?

⁷ Cuma cikwabo ca seho cije kutwasa kumona cinapu lilombelo. Babusamba bakalileke biyongola byabo nomu mubali na kulizibila. Kuma netu twasa kusimutwiya na Yehova ndi? Eyo. Yehova ali na kupangesa Mbimbiliya mangana atuleke bisinganyeka byendi nomu mwakalizibila. Co twasa kumuleka bisinganyeka byetu nomu mutuli na kulizibila, kwitila mu lilombelo. Yehova akabwahelela kutolilila ku malombelo etu. (Tandeni Visimo 15:8.) Ha kupwa kabusamba ketu uje watuzema, Yehova akatolilila malombelo etu  na kuwakumbulula. Simbu imo, akakumbulula bwasi. Oloni ha bisimbu bimo, kesi kukumbulula bwasi. Nameme ngoco, tuzibuka ngwetu atukumbulula ha simbu inapande na mu ngila yaibwa. Co lalo Njambi nasa kutukumbulula mu ngila ije kutwasinganyekele. Cakumwenako, nasa kutwana lika mana na “nzili ya kukolesa” mu byeseko, oloni kabimanesa.—1 Koli 10:13.

8. Twasa kumwesa bati ngwetu twakandelela kuli Yehova ha kutwana lisesa lya kulombela kuli ikeye?

⁸ Twasa kumwesa bati ngwetu twakandelela kuli Yehova ha kutwana lisesa lya kulomba kuli ikeye? Ngila imo inapu kupangesa byanatuleke Yehova ngwendi “lombeleni simbu yoshe.” (1 Tesa 5:17) Yehova kesi kutusindiya ngwendi tulombele. Oloni akasingimika nzili yetu ya kulyangwila bya kulinga, co ali na kutushongangeya ngwendi “lombeleni simbu yoshe.” (Loma 12:12) Ngeci, twasa kumwesa kukandelela nga tulombela ha litangwa na litangwa. Co lalo mu malombelo etu tunapande kukandelela Yehova na kumushangazala.—Myaso 145:2, 3.

9. Ndolome umo akalizibi bati mwakalombela, co yeni mukalizibi bati?

⁹ Omwo tupangela Yehova simbu yailaha na kulimwena mwali na kukumbulwila malombelo etu, co tumwesa manene kukandelela. Tusimutwiyeni hali ndolome Chris uje napanga mu cipangi ca simbu yoshe ha myaka 47. Wendekele ngwendi: “Njikazibi kubwaha kwinduka mutondo na kulomba kuli Yehova. Kunapu kwakubwa manene kusimutwiya na Yehova omwo litangwa liya na kukya. Oku kukanjishongangeya njikandelele Yehova ha byuma byoshe byananjana, kwambateselela na lisesa lya kulombela. Co lalo njikalombela simbu kanda njiye na kulala, oku kukanjikwasa njilale na mbunge imo.”

10. Bika twendekela ngwetu sipilitu ya kujela inapu ya seho?

¹⁰ Cuma cikwabo lalo ca seho cije kutwasa kumona, cinapu sipilitu ya kujela. Yesu watushongangeyeye ngwendi tutwaleleleho kulomba sipilitu ya kujela. (Luka 11:9, 13)  Yehova ali na kupangesa sipilitu ya kujela mangana atwane nzili ije itubakana nzili ya bunu. (2 Koli 4:7; Vili 1:8) Sipilitu ya Njambi itukwasa tukolese mu byeseko byoshe bituliwana nabyo.

11. Sipilitu ya kujela ili na kutukwasa bati?

¹¹ Sipilitu ya kujela itukwasa tupange bipangi byanatwana Njambi. Co lalo itukwasa tubwezelele ku cashu cetu. Ngeci, tuzibuka ngwetu byuma byoshe bituli na kupanga mu munga ya Njambi, kutwesi na kubipanga mu nzili yetu embwe, oloni sipilitu ya Njambi ikeyo ili na kutukwasa.

12. Kwesekesa na Myaso 139:23, 24, tunapande kulomba sipilitu ya kujela itukwase kulinga bika?

¹² Twasa kumwesa bati ngwetu twamona sipilitu ya kujela kupwa ya seho? Twasa kulinga ngoco, nga tuilomba kuli Yehova mangana itukwase kumona indi tuli na bisinganyeka byabibi na mashungu amabi. (Tandeni Myaso 139:23, 24.) Nga tulinga ngoco, co Yehova apangesa sipilitu yendi mangana itukwase kunanguka buzeye bwetu. Nga tunananguka ngwetu tuli na bisinganyeka byabibi nambe mashungu amabi, co tunapande kulomba sipilitu ya Njambi itwane nzili ya kubyana ebi biyongola. Nga tulinga ngoco, co tumwesa ngwetu kutushaka kulinga byuma byabibi bije bilingisa Yehova alikele kutwana sipilitu yendi ya kujela.—Efeso 4:30.

13. Tumwesa bati kukandelela kuli Yehova ha kutwana sipilitu ya kujela?

¹³ Tukandelela manene kuli Yehova ha kutwana sipilitu ya kujela nga tusinganyekesesa muili na kutukwasela ano matangwa. Yesu washikile bandongesi bendi ngwendi: ‘Omwo sipilitu ya kujela ikaija hali yeni, mukashula na nzili, co mukapwa bakaleho bange kweta na ku mamaneselelo a lifuti.’ (Vili 1:8) Awa majwi ali na kulishulisilila. Sipilitu ya kujela inakwasa mu cipangi ca kukungulula banu ba kutubakana 8.5 milyoni baje bali na kulemesa Yehova mu kaye koshe. Co lalo tuli na kulikuwa kukala mu Paladaisi ya ku sipilitu, mwafwa sipilitu ya Njambi ili na kutukwasa kukala na bifwa byabibwa bya kufwa ngwe cizemo, kujolela, kwoloka, mbunge ya kubandamena, ngozi, bubwa, likulahelo, kuwa mbunge, na  kukwata mbunge. Ebi bifwa binapu ‘bushuka bwa sipilitu.’ (Ngala 5:22, 23) Cili bene, sipilitu ya kujela yapwa ya seho manene.

14. Beya bali na kutukwasa mu cipangi ca kwambulula baje kutwasa kumona?

¹⁴ Cuma cikwabo lalo ca seho cije kutwasa kumona cinapu, ‘kupangela hamo’ na Yehova na Yesu na tungelo. (2 Koli 6:1) Tupangela hamo nabo omwo tupanga cipangi ca kupwisa banu bandongesi. Paulu wendekele ngwendi: ‘Tuli na kupangela hamo na Njambi.’ (1 Koli 3:9) Co lalo omwo twambulula, tupangela hamo na Yesu. Yesu mwashikile bandongesi bendi ngwendi baye “ku miyati yoshe ya banu na kubapwisa bandongesi,” wabalekele lalo ngwendi: “Njikakala neni.” (Mateo 28:19, 20) Tungelo tuli na kupangela hamo nabo bati? Tungelo bali na kututwamenena omwo twambulula “biñanda byabibwa . . . kuli banu ba hano hasi.” Oku kunapu kubezika kwakama manene.—Kujo 14:6.

15. Endekeni ñanda ya mu Mbimbiliya ije imwesa mwali na kutukwaselamo Yehova mu cipangi ca kwambulula.

¹⁵ Kupangela hamo na Yehova na Yesu na tungelo, kutukwasa bati? Mutukai na kukuba mbuto ya Bumwene, bimbuto bimo bikawila mu bimbunge byabibwa, co bikakolo. (Mateo 13:18, 23) Iya akakolesa ebi bimbuto na kubilingisa bime? Yesu wendekele ngwendi wahi asa kupwa ndongesi yendi kubanga Ishe amunene kuli ikeye. (Yowa 6:44) Kuli ñanda imo ya mu Mbimbiliya ije itukwasa kuzibisisa obu busunga. Simbu imo Paulu mwatuhukile mu nganda ya Filipu, wakawanene banakazi bamo, co wakabambulwilile. Mbimbiliya inendeka byuma byalingiwile kuli munakazi wa lizina lya Lindiya ngwayo: ‘Yehova washokolwele mbunge yendi mangana atolilile ku bije byakele na kwendeka Paulu.’ (Vili 16:13-15) Yehova ali na kukoka banu babangi ngwe mwakokele Lindiya.

16. Iya itunapande kushangazala ha byuma byoshe byabibwa bije bitunda mu cipangi ca kwambulula?

¹⁶ Iya itunapande kushangazala ha byuma byoshe byabibwa bije bitunda mu cipangi ca kwambulula? Paulu wakumbulwile eci cihula mwasonekelele baka-Kilistu ba mu cikungulukilo ca Kolinte ngwendi: “Yange njakunine mbuto, Apolo watukumwinine, oloni Njambi ikeye [wakolesele] mbuto. Ngeci bene, uje akuna nambe uje atukumwina kubesi na bulemu bwahi. Oloni bulemu buli kuli Njambi, omwo ikeye muka-kumenesa mbuto.” (1 Koli 3:6, 7) Ngeci, tunapande kushangazala Yehova ha byuma byoshe byabibwa bije bitunda mu cipangi ca kwambulula ngwe mwalingile Paulu.

17. Twasa kumwesa bati kukandelela mwafwa ya ‘kupangela hamo’ na Yehova na Kilistu na tungelo?

¹⁷ Twasa kumwesa bati kukandelela mwafwa ya ‘kupangela hamo’ na Yehova na Kilistu na tungelo? Twasa kulinga ngoco nga tupanga na nzili mu kwambulula muzimbu waubwa ku bakwetu. Kuli bingila byabingi bitwasa kwambulwilamo bya kufwa ngwe, kwambulwila ku mbunga na ku njubo na njubo. (Vili 20:20) Bamo bakalikuwu kwambulula mu kutulukwa. Nga banawana munu lwa kulibanga, bakamumeneka na nzanzu na kushangumuka kusimutwiya nendi. Nga owo munu akumbulula mwamubwa, co bashangumuka kusimutwiya nendi muzimbu wa Bumwene.

18-19. (a) Twasa kutukumwina bati mbuto ya Bumwene? (b) Endekeni ñanda imo ije imwesa Yehova mwakwaselele munu uje wakele na kulilongesa Mbimbiliya.

¹⁸ Omwo ‘tuli na kupangela hamo na Njambi,’ kutwapandele kukuna lika bimbuto, oloni tunapande kubitukumwina. Nga munu nabwahelela, co tulingeni mwoshe mutwasela  kwilukilako. Nga yetu tunonowa, co tulekeni mukwetu ayeko mangana akashangumuke nendi cilongesa ca Mbimbiliya. Co uje munu omwo aya na kukola ku sipilitu, tubwahelela manene mwafwa twalimwena Yehova mwali na kumukwasela kutengulula bisinganyeka byendi na bilinga byendi.

¹⁹ Tusimutweyeni hali Raphalalani wa ku South Africa uje wapwile cimbanda. Wazemene manene byalilongesele mu Mbimbiliya. Oloni kwamukaluwilile kukabangeya bilongesa bya mu Mbimbiliya bije bibindika kwendeka na bakulu. (Kwitu 18:10-12) Mu kwita kwa simbu, watabesele Njambi atengulule bisinganyeka byendi. Ngeci, walikelele kupwa cimbanda, nameme hakeho hakele na kuliyoyesela. Raphalalani uje ali na myaka 60, ngwendi: “Njakandelela manene kuli Bakaleho ba Yehova baje bananjikwasa mu bingila byabingi na kunjikwasa kuwana cipangi. Co lalo njakandelela manene kuli Yehova uje nanjikwasa njitengulule buyoye bwange na kupwa Mukaleho wa kumbwitika uje ali na kwambulula muzimbu waubwa.”

20. Munapande kutwalelelaho kulinga bika?

²⁰ Muno mu cilongesa tunasimutwiya byuma biwana bya seho bije kutwasa kumona. Cuma ca seho manene cije kutwasa kumona cinapu kupwa babusamba ba Yehova. Oku kutukwasa tuwane bukwasi ku byuma bikwabo bya seho bije kutwasa kumona, bya kufwa ngwe, lilombelo, sipilitu ya kujela na kupangela hamo na Yehova na Yesu na tungelo mu cipangi ca kwambulula. Tutwaleleleniho kukandelela kuli Yehova ha kutwana byuma bya seho bije kutwasa kumona. Co lalo simbu yoshe, tukandeleleni Yehova mwafwa wapwa Kabusamba ketu wamubwa.