1. Ki Zezi ti dir konsernan bann trezor ki dan lesiel?

PA TOU trezor ki nou kapav trouve. An realite, bann pli gran trezor ki ena zot invizib. Dan so Sermon lor Montagn, Zezi ti explike ki bann trezor dan lesiel ena pli boukou valer ki bann dibien materyel. Apre sa, li ti dir: “Kot to trezor ete, to leker osi li lamem.” (Mat. 6:19-21) Kan enn kitsoz ena valer pou nou, nou pou fer zefor pou gagn li. Nou ramas bann ‘trezor dan lesiel’ kan nou ena enn bon repitasion devan Bondie. Zezi ti explike ki pena nanye ni personn ki kapav detrir ouswa kokin sa bann trezor-la.

2. (a) Dapre 2 Korintien 4:17, 18, ki lapot Pol ankouraz nou pou fer? (b) Ki nou pou examine dan sa lartik-la?

² Lapot Pol ankouraz nou pou “port nou latansion . . . lor seki invizib.” (Lir 2 Korintien 4:17, 18.) Parmi sa bann kitsoz invizib la ena bann benediksion ki nou pou gagne dan lemond nouvo. Dan sa lartik-la, nou pou examinn kat trezor invizib ki nou ena depi asterla mem: nou lamitie avek Bondie, lapriyer, led lespri sin Bondie, ek soutien ki nou gagne dan predikasion ar Zeova, Zezi, ek bann anz. Nou pou gete osi kouma nou kapav montre Zeova nou rekonesans pou sa bann trezor-la.

3. Ki pli gran trezor invizib ki ena, ek kouma nou kapav gagn sa trezor-la?

³ Pli gran trezor invizib ki ena se nou lamitie avek  Zeova. (Ps. 25:14) Kouma eski Bondie kapav vinn kamarad avek bann dimounn ki inparfe ek kanmem sa res sin? Li kapav fer sa gras-a sakrifis Zezi ki “tir pese lemonn.” (Zan 1:29) Mem avan lamor Zezi, Zeova ti kone ki Zezi ti pou res fidel ziska so lamor ek ki sa ti pou permet bann dimounn gagn lavi sov. Se koumsa ki Bondie ti kapav vinn kamarad avek bann dimounn ki ti viv avan ki Zezi mor.​—Rom. 3:25, NW.

4. Sit lexanp sertin zom ki ti viv avan ki Zezi vinn lor later ek ki ti bann kamarad Bondie.

⁴ Anou get lexanp sertin zom ki ti viv avan ki Zezi vinn lor later ek ki ti bann kamarad Bondie. Abraam ti ena enn gran lafwa. Plis ki 1,000 an apre lamor Abraam, Zeova ti apel Abraam “mo kamarad.” (Iza. 41:8) Sa montre nou ki mem lamor pa kapav kas lamitie ki Zeova ena pou so bann kamarad. Abraam ankor vivan dan memwar Zeova. (Lik 20:37, 38) Enn lot kamarad Bondie se Zob. Devan tou bann anz ki ti rasanble dan lesiel, Zeova ti dir ki Li ti ena konfians an Zob. Zeova ti dir: “Li enn dimounn drwat ek ki san repros. Li ena lakrint pou Bondie ek li res lwin ar lemal.” (Zob 1:6-8) Pandan apepre 80 an, Daniel ti servi Zeova avek fidelite dan enn pei kot bann dimounn pa ti ador Zeova. Ki Zeova ti panse lor Daniel? Dan so vie zour, trwa fwa bann anz ti dir Daniel ki li “ena enn gran valer” pou Bondie. (Dan. 9:23; 10:11, 19) Nou kapav sir ki Zeova pe atann avek inpasians sa zour kot Li pou resisit so bann kamarad ki Li bien kontan la!​—Zob 14:15.

5. Ki nou bizin fer pou nou ena enn bon lamitie avek Zeova?

⁵ Azordi, plizir milyon dimounn ena enn bon lamitie avek Zeova. Dan lemond antie, boukou zom, fam, ek zanfan pe montre par zot bann aksion ki zot vremem bann kamarad Bondie. Zeova “enn kamarad bien pros avek bann dimounn ki drwat.” (Prov. 3:32) Sa lamitie-la li posib gras-a lafwa ki sa bann dimounn-la ena dan laranson, setadir sakrifis Zezi. Gras-a laranson, nou kapav vinn kamarad Zeova, vwe nou lavi ar Li, ek pran batem. Kan nou fer sa bann kitsoz inportan la, nou form parti enn fami Kretien ki’nn vwe zot lavi ar Zeova, ki’nn pran batem, ek ki ena enn bon lamitie avek pli gran Personaz dan liniver.

6. Kouma nou kapav montre ki nou lamitie avek Zeova ena valer pou nou?

⁶ Kouma nou kapav montre ki nou lamitie avek Zeova ena valer pou nou? Parey kouma Abraam ek Zob ki ti res fidel anver Zeova pandan boukou lane, nou osi nou bizin res fidel anver Zeova mem si sa fer bien lontan ki nou pe servi Li. Parey kouma Daniel, nou lamitie avek Zeova bizin ena plis valer pou nou ki nou prop lavi. (Dan. 6:7, 10, 16, 22) Avek led Zeova, nou kapav andir ninport ki difikilte ek lerla nou pou res touletan pros ar Li.​—Fil. 4:13, NW.

7. (a) Dapre Proverb 15:8, ki Zeova panse lor nou bann lapriyer? (b) Kouma Zeova reponn nou bann lapriyer?

⁷ Enn lot trezor invizib se lapriyer. Bann bon kamarad kontan partaz zot bann panse ek zot bann santiman ant zot. Li parey pou nou lamitie avek Zeova. Zeova koz avek nou atraver Labib ek Li dir nou so bann panse ek so bann santiman. Nou koz avek Li dan lapriyer ek nou partaz avek Li nou bann  santiman ek nou bann panse pli profon. Zeova bien kontan ekout nou bann lapriyer. (Lir Proverb 15:8. *) Zeova enn kamarad ki bien kontan nou. Akoz sa, Li ekout ek reponn nou bann lapriyer. Parfwa, Li reponn nou vit-vit. Me ena fwa, kitfwa nou pou bizin kontign priye. Kanmem sa, nou kapav sir ki Li pou reponn nou dan meyer fason ek dan moman ki bizin. Biensir, parfwa Zeova kapav reponn nou dan enn fason ki nou pa atann. Par exanp, olie ki Li tir enn leprev, Li kapav donn nou sazes ek lafors ki nou bizin pou andire.​—1 Kor. 10:13.

8. Kouma nou kapav montre ki lapriyer ena enn gran valer pou nou?

⁸ Kouma nou kapav montre ki lapriyer ena enn gran valer pou nou? Enn fason ki nou fer sa se kan nou swiv sa konsey Biblik la: “Priye toultan.” (1 Tes. 5:17) Zeova pa obliz nou pou priye Li. Li respekte liberte ki nou ena pou swazir me Li ankouraz nou pou “persevere dan lapriyer.” (Rom. 12:12, NW) Alor, nou kapav montre Li nou rekonesans kan nou priye Li plizir fwa par zour. Biensir, fode pa nou bliye pou loue ek pou remersie Zeova dan nou bann lapriyer.​—Ps. 145:2, 3.

9. Ki santiman enn frer ena konsernan lapriyer, ek ki twa to resanti?

⁹ Si sa fer lontan ki to pe servi Zeova, sirman to’nn trouve kouma Li reponn to bann lapriyer ek sa finn fer twa ena plis rekonesans pou lapriyer. Anou get lexanp Chris enn frer ki dan servis aplintan depi 47 an. Li dir: “Mo kontan lev boner gramatin pou mo kapav priye Zeova. Li vremem extraordiner pou koz ar Zeova kan tou ankor trankil, kan soley leve ek ekler tou bann gout laroze ki ena dan zardin! Sa motiv mwa pou remersie Li pou tou bann kado ki Li donn mwa, sirtou lapriyer. Dan lasware, kan mo fini priye, se vremem enn plezir pou al dormi avek enn konsians kler.”

10. Kifer lespri sin Bondie bizin ena enn gran valer pou nou?

¹⁰ Lespri sin Bondie se enn lot trezor invizib ki bizin ena enn gran valer pou nou. Zezi ti ankouraz nou pou kontign priye pou gagn lespri sin. (Lik 11:9, 13) Gras-a so lespri sin, Zeova donn nou lafors. Li kapav mem donn nou enn “pwisans extraordiner.” (2 Kor. 4:7; Zist. 1:8) Avek led lespri sin, nou kapav andir ninport ki leprev.

11. Kouma lespri sin kapav ed nou?

¹¹ Lespri sin kapav ed nou pou asim bann responsabilite ki Zeova donn nou. Lespri sin kapav ed nou pou amelior nou bann kapasite ek nou bann talan. Nou kone ki se zis gras-a lespri sin ki nou gagn bann bon rezilta dan nou servis pou Zeova.

12. Dapre Psom 139:23, 24, ki kitsoz lespri sin kapav ed nou pou fer?

¹² Enn lot fason ki nou montre ki lespri sin ena valer pou nou se kan nou demann Zeova pou ed nou trouv bann move panse ek bann move dezir ki nou ena dan nou leker. (Lir Psom 139:23, 24.) Si nou fer sa, Zeova kapav servi so lespri sin pou fer nou trouv bann move panse ek bann tandans ki nou ena. Ek kan nou remark bann move panse ek dezir ki nou ena, nou bizin priye Zeova pou ki so lespri sin donn nou lafors pou reziste kont sa bann move kitsoz-la. Si nou fer sa, Zeova pou trouve ki nou anvi fer tou pou kontign gagn led so lespri sin.​—Efe. 4:30.

13. Kouma nou kapav ogmant nou rekonesans pou kado Zeova, setadir lespri sin?

¹³ Kan nou reflesi lor tou seki lespri sin pe fer azordi, sa ogmant nou rekonesans. Avan ki Zezi ti mont dan lesiel, li ti dir so bann disip: “Zot pou gagn enn lafors kan Lespri Sin pou desann lor zot, lerla zot pou vinn mo temwin . . . partou lor later.” (Zist. 1:8) Se samem ki pe arive azordi. Gras-a lespri sin, apepre 8.5 milyon dimounn lor  later antie finn vinn bann serviter Zeova. Anplis, nou pe deza viv dan enn paradi spiritiel parski lespri Bondie ed nou pou kiltiv bann zoli kalite kouma lamour, lazwa, lape, pasians, zantiyes, bonte, lafwa, douser, ek metriz lor noumem. Sa bann kalite-la form parti “frwi lespri.” (Gal. 5:22, 23, NW) Lespri sin vremem enn kado ki ena boukou valer!

14. Ki soutien invizib nou ena kan nou partisip dan travay predikasion?

¹⁴ Enn lot trezor invizib ki nou ena se privilez pou “kolabor” ar Zeova ek parti so lorganizasion ki dan lesiel. (2 Kor. 6:1) Nou fer sa kan nou partisip dan travay predikasion. Kan li ti koz lor limem ek lor bann ki ti partisip dan sa travay-la, Pol ti dir: “Nou pe travay ansam avek Bondie.” (1 Kor. 3:9) Kan nou partisip dan predikasion, nou pe osi travay ansam avek Zezi. Apre ki Zezi ti donn so bann disip lord pou “al dan tou bann pep ki ena e fer zot vinn [so] bann disip,” li ti dir: “Pa bliye, mo avek zot.” (Mat. 28:19, 20) Me ki nou kapav dir lor bann anz? Nou bien kontan ki bann anz pe gid nou pou proklam enn “Bonn Nouvel eternel . . . ar tou bann ki vivan lor later”!​—Rev. 14:6.

15. Servi enn lexanp pou montre rol inportan ki Zeova ena dan nou travay predikasion.

¹⁵ Ki travay nou pe reisi fer gras-a soutien ki nou gagne ar Zeova, Zezi, ek bann anz? Kan nou pres bon nouvel Rwayom Bondie, sertin lagrin tom dan leker bann dimounn ki dispoze pou ekout laverite ek sa bann lagrin-la grandi. (Mat. 13:18, 23) Kisannla fer sa bann lagrin laverite la pouse ek raport bann frwi? Zezi explike ki personn pa kapav vinn so disip amwin ki so “Papa . . . atir li.” (Zan 6:44, NW) Labib donn enn lexanp pou explik sa lide-la. Enn zour, Pol ti pres ar enn group madam andeor lavil Filip. Konsernan Lidia, enn parmi sa bann madam-la, Labib dir ki Zeova “ti prepar so leker pou li ekout Pol avek atansion.” (Zist. 16:13-15) Parey kouma Lidia, Zeova pe atir bann milyon dimounn ver Li.

16. Kisannla bizin gagn loner kan nou gagn bann bon rezilta dan predikasion?

¹⁶ Kisannla bizin gagn loner kan nou gagn bann bon rezilta dan predikasion? Pol ti reponn sa kestion-la kan li ti ekrir lasanble ki trouv dan Korint. Li ti dir: “Mwa mo finn plant lagrin, Apolos finn aroze, me Bondie ki finn fer pouse. Alor dimoun ki finn plante ek dimoun ki finn aroze pena linportans, me zis Bondie ki fer tou kiksoz pouse ki konte.” (1 Kor. 3:6, 7) Parey kouma Pol, nou bizin touletan donn loner Zeova pou tou bann bon rezilta ki nou gagne dan predikasion.

17. Kouma nou kapav montre nou rekonesans pou privilez ki nou ena pou “kolabor” avek Zeova, Zezi, ek bann anz?

¹⁷ Kouma nou kapav montre nou rekonesans pou privilez ki nou ena pou “kolabor” avek Zeova, Zezi, ek bann anz? Nou fer sa kan nou rod tou lokazion pou pres bonn nouvel. Par exanp, nou kapav fer sa “anpiblik” ek “lakaz apre lakaz.” (Zist. 20:20) Ena boukou osi ki kontan pres dan enn fason informel. Kan zot zwenn enn kikenn ki zot pa kone, dan enn fason amikal zot esey koz ar li. Si dimounn-la reazir dan enn bon fason, avek takt zot koz lor Rwayom Bondie.

18-19. (a) Kouma nou aroz bann lagrin laverite? (b) Servi enn lexanp pou montre kouma Zeova inn ed enn etidian Labib.

 ¹⁸ “Antan ki bann travayer ki kolabor avek Bondie,” nou bizin pa zis plant bann lagrin laverite, me nou bizin osi aroz zot. Kan enn kikenn interese ar laverite, nou fer nou maximum pou re-al get sa dimounn-la ouswa fer laranzman pou ki enn lot dimounn al get li pou koumans so letid. Nou bien kontan kan nou trouve kouma Zeova azir lor leker ek lespri bann dimounn ki pe etidie!

¹⁹ Anou get lexanp Raphalalani, ki res l’Afrique du Sud. Li ti bien kontan seki li ti pe aprann dan so letid Labib. Me li ti enn longanis ek li ti trouv sa difisil pou aksepte seki Labib dir lor kominikasion avek bann dimounn mor. (Det. 18:10-12) Me tigit-tigit, li ti les Zeova form so fason panse. Avek letan, li ti aret fer longanis mem si sa ti so metie. Azordi, Raphalalani ena 60 an ek li dir: “Mo bien rekonesan anver bann Temwin Zeova pou tou seki zot inn fer pou mwa, par exanp zot inn ed mwa pou gagn enn travay. Me pli inportan, mo remersie Zeova parski Li’nn ed mwa pou sanz mo lavi. Asterla, mo’nn pran batem ek mo pe kapav partisip dan predikasion.”

20. Ki to bien deside pou fer?

²⁰ Dan sa lartik-la, nou’nn koz lor kat trezor ki nou pa kapav trouve. Pli gran parmi sa bann trezor-la se privilez pou ena enn lamitie avek Zeova. Kan nou vinn kamarad Zeova, nou kapav osi profit sa bann lezot trezor invizib la, setadir lapriyer, led lespri sin Bondie, ek soutien Zeova, Zezi, ek bann anz dan nou minister. Anou bien deside pou ogmant nou rekonesans pou sa bann trezor-la. Ek anou kontign remersie Zeova parski Li enn Kamarad extraordiner!