1. Isiyani Yesu yoolumalyaawe ukati woopelaawe mwaha mihakhu coominepani?

CIHAAVO mihakhu cihinoonnya ni miitho. Khweeliini, mihakhu cuulupale cinene cirivo cikhanle citthu cihinoonnya ni miitho. Ukati waawiitthucihaawe atthu wamwaakoni, Yesu ahoopela mwaha mihakhu coominepani ni ahohimya wiira cikhanle cuulupale cinene uvikana maali. Vano, uyo aheera: “Nipuro ninhalaaya ukhala nhakhwaa, vaava phinhalaaya ukhala nrimaa.” (Mat. 6:19-21) Nrimeehu unaaniiriha hiiva utotha citthu cinooneehu ukhala cofayita. Hiiva ‘ninsuka mihakhu wiirimu’ neekurumicaka wiira Nluku anoone ukhala atthu omaana. Yesu hohimya wiira nnyo mihakhunnyo khacimmala awula khacinennyiya.

2. a) Toko cinthoonyeraaya 2 Akorintu 4:17, 18, isiyani Paulu innisovenrihaawe upanka? b) Isiyani ninhaleehu wiitthuca nhina ula mwahoola?

² Apostolu Paulu honisovenriha hiiva ‘uweheeha citthu cihinoonnya.’ (Usome 2 Akorintu 4:17, 18. *) Nnyo citthu coohooniyannyo ciicammo cikhanle citthu cotheene cinhaleehu ulawa upeephoni. Nhina ula mwahoola, ninaahala wiitthuca mihakhu cese coohoonnya cirineehu ilelo—upatthani ni Nluku; ulompa; ukaviheriya ni nnepa wowaarya; ni ukaviheriya ni Nluku, Yesu ni malayikha ukati unvareehu ntekweehu woolalyeera. Ninaahala ciicammo wiitthuca manannani ninlamuliyeehu uthoonyera wiira ninaasukhurweela nnyo mihakhu coohooniyannyo.

3. Nhakhuni utepale ukhala muulupale uhinoonnya, ni unkhitiryaa cani hiiva ukhalana uyo nhakhuuyo?

³ Nhakhu muulupale cinene uhinoonnya ukhanle ukhalana upatthani ni Yehova Nluku. (Isaa. 25:14) Unkhitirya cani Nluku waapatthanana apinaatamu oopahuwa ni uyova uhihiya ukhala owaarya cinene? Uyo nkhitiri upanka iyo kontha wiivaherera wa Yesu ‘unaakumiha itampi watuninyani.’ (Joau 1:29) Hataa Yesu hinaaya ukhwa, Yehova aanaacuwela wiira uyo aanaahala ukhala ookhuluvelya mpaka waahalaawe ukhwa wiira awoopole apinaatamu. Phimaana, hataa ukati Yesu waaryaawe hinakhwa, wahokhitirya Nluku waapatthanana apinaatamu.—Aroo. 3:25.

4. Waahimye atthu yaakhanle apatthani a Nluku khalayi Yesu hinaaya uwa watuninyani.

⁴ Uwuupuwele alopwana yaakhanle apatthani a Nluku khalayi hinaaya Yesu uwa watuninyani. Aparahaamu aari nlopwana aarina waamini woolipa. Uvira waya myaakha 1.000 Aparahaamu nakhwaale, Yehova ahomwiihana “mpwanaaka.” (Isai. 41:8) Iyo inthoonyera wiira hataa ntthuuyo akhwaaka, Yehova nanlelo naamoona ukhala mpatthannyaawe. Yehova khananliyala Aparahaamu. (Luka 20:37, 38) Nlopwana nkiina aari Jó. Uhoolo wo malayikha menci yaathukumanne wiirimu, Yehova ahooluma wiira aanankhuluvela Jó. Yehova aheera wiira Jó aari “nlopwana ookhuluvelya ni neettela isariya, mmoova Nluku ni nnyema yoohiloka.” (Jó 1:6-8) Ni umuupuwele Daniele, aakhanle myaakha 80 answalelaka Yehova nlaponi yaatthu yaaswalela anluku aakhwaawe. Yehova anwehera cani Daniele? Ikwaha tthaaru malayikha yahomwiirela Daniele nooluvanle wiira uyo aari “ntthu ofayita cinene.” (Dan. 9:23; 10:11, 19) Pooti wankupaliihu wiira Yehova noona upica uphiya ukati unhalaawe uwunweleliha asipatthannyaawe akhwaale.—Jó 14:15.

5. Isiyani ninlamuliyeehu upanka wiira nikhalane upatthani ni Yehova?

⁵ Ari akavi atthu oopahuwa arina upatthani woolipa ni Yehova ilelo? Ahaavo imiliyawu cene. Nincuwela iyo kontha ntuninyani motheene khamala alopwana, athiyana ni asinamwane anthoonyera nimeettelwaaya wiira anaapheela ukhala apatthani a Nluku. Yehova “nawaapatthanana cinene atthu ookhuluvelya.” (Miru. 3:32) Ayo ankhitiri ukhalana upatthani ni Yehova kontha anawaamini wiivaherera wa Yesu wiira anoopole. Nlattu wo woopoliya wihu ni Yesu, Yehova naatthuna wiira nivaherere ukumiihu mmatatani wawe ni nipattisiye. Neevahereraka ni napattisiyaka, ninaakhala wamoca ni makristau imiliyawu cene ciicammo avaherenre ukumyaaya mmatatani wa Yehova ni apattisiye. Ayo anampatthanana cinene Ule verihenle wuunuwa ntuninyani motheene!

6. Manannani ninlamuliyeehu uvaha ifayita upatthani nirineehu ni Nluku?

⁶ Manannani ninlamuliyeehu uvaha ifayita upatthani urineehu ni Nluku? Toko Aparahaamu ni Jó caakhanlyaaya myaakha coopwaha 100 woohihiya unswalela Yehova, hiiva ciicammo khaninlamuliya unhiya Yehova—hataa wakhalaka wiira nihoviriha myaakha cinci ninswalelaka ila ituninya yoohinamaaneela. Toko Daniele, nihaana nihooleliheraka ulemeliha upatthaniihu ni Yehova, uvikana mananna cinlemeliheehu ukumiihu. (Dan. 6:7, 10, 16, 22) Nikaviheriyaka ni Yehova, ninaahala ukhitiri uvilela masakha otheene annikhumelela ni uhihiya ukhalana upatthani woolipa nuuyova.—Afili. 4:13.

7. a) Toko cinthoonyeraaya Miruku 15:8, Yehova noonela cani mavekelweehu? b) Yehova naakhula cani mavekelweehu?

⁷ Nhakhu nkiina uhinoonnya ukhanle ulompa. Atthu eeli oopatthanaca venci anawoopa mwaha ni anaahimyerana citthu cinoopuwelaaya ni cinwiira. Iyo phi itthu ninlamuliyeehu upanka ni mpatthaniihu Yehova. Yehova nonuulumana  Nnuulumoni nawe. Mbiiblyani, uyo naanihimyera citthu cinoopuwelaawe ni cinoncivela. Hiiva nimmuulumana nanlompaka, ni nihaana ninhimyeraka citthu cinoopuweleehu ni cinniira wanrimani wihu. Yehova unancivela cinene uviriyana mavekelweehu. (Usome Miruku 15:8. *) Athoonyeraka ukhala Mpatthaniihu, Yehova khanniviriyana paasi, masi ciicammo naanaakhula nanlompaka. Uhaavo ukati unaakuvaawe waakhula. Masi ukati nkiina, hiiva atthunaka nihaana nilompaka imaara cinci hinaaya unaakhula. Hataa ukhalaka commo, nikupali wiira uyo naahala unaakhula waphiyaka ukati woomaana, ni naahala unaakhula ni mananna anoonaawe ureera. Ciicammo, ninaacuwela wiira uyo pooti unaakhula ni mananna yahaaweherereehu. Wootakihera, uyo pooti uhimaliha masakheehu, masi univaha ucuwelaca ni ikuru wiira nikhitiri “uvilela.”—1 Akor. 10:13.

8. Ninlamuliya uthoonyera cani wiira ninaavaha ifayita itthuvo Nluku inivahalyaawe yonlompa?

⁸ Ninlamuliya uthoonyera cani wiira ninaavaha ifayita itthuvo Nluku inivahalyaawe yonlompa? Inanna imoca, ukhanle weettela ikano yo mbiiblyani ineera wiira nihaana ‘nilompaka woohihiyerera.’ (1 Atesal. 5:17) Yehova khannikhanyereriha wiira ninlompe. Uyo naanihiya wiira nilakele naasineeneehu unlompa ni naanisovenriha wiira ‘nihihiye ulompa.’ (Aroo. 12:12) Phimaana, nanlompaka khula nihuku, hiiva ninthoonyera wiira ninaasukhurweela itthuvo inivahalyaawe yoolompa. Khweeliini, ukati woolompa nihaana ciicammo unsukhuru ni unttottopela Yehova.—Isaa. 145:2, 3.

9. Manannani munneehu mmoca cinoonelaawe ulompa, ni weeva unoonela cani?

⁹ Ukati unonswaleleehu Yehova ni ninooneehu mananna uyo cinaakhulaawe mavekelweehu, hiiva ninaatepa usukhuru itthuvo inivahalyaawe yonlompa. Wootakihera, umuupuwele munna mmoca neehaniya Chris, virihale myaakha 47 avaraka nteko wowiivahereriya ukati wotheene. Uyo neera: “Unaakicivela cinene wunwa uwiicisu wiira kinlompe Yehova. Unaareera cinene umuulumana Yehova ukati ncuwa umpaceraaya woonnyeela ni citthu cotheene cinarenre! Iyo inaakiiriha unsukhuru Yehova nlattu wo citthu cotheene, ni nlattu woonivaha itthuvo yonlompa. Kanlompaka Yehova  wuumeleloni nihuku, unaakitteela venci nlattu woorwaa urupa ninrima wootaphuwa.”

10. Nlattuni ninlamuliyeehu uvaha ifayita nnepa wowaarya wa Nluku?

¹⁰ Nnepa wowaarya wa Nluku ikhanle itthuvo ikiina yoohoonnya ninlamuliyeehu uvaha ifayita. Yesu honisovenriha wiira nilompe nilepelaka nnepa wowaarya. (Luka 11:9, 13) Ni nnepaawe wowaarya, Yehova naanivaha ikuru “cuulupale.” (2 Akor. 4:7; Mite.1:8) Nikaviheriyaka ni nnepa wowaarya, hiiva ninaakhitiri uvilela khula masakha annikhumelela.

11. Manannani nnepa wowaarya wa Nluku cinnikaviheraaya?

¹¹ Nnepa wowaarya unaanikavihera uwacera ratta miteko ca Nluku. Nnepa wowaarya wa Nluku pooti wuncerera ucuwelaca wihu wiira nivare ratta miteko cihu ceekristau. Noonaka wiira nihokhitiri uvara ratta ntekweehu, nihuupuwele wiira nikhitinri nlattu wowiikurumica wihu, masi nihaana naaminiki wiira nikhitinri nlattu wookaviheriya ni nnepa wowaarya wa Nluku.

12. Toko cinthoonyeraaya Isaalimu 139:23, 24, nihaana nilepelaka nnepa wowaarya wiira unikavihere upanka isiyani?

¹² Inanna ikhwaawe yoothoonyera wiira ninaavaha ifayita nnepa wowaarya wa Nluku, ukhanle ulompa nilepelaka wiira nnepa wowaarya unikavihere ucuwelela wakhala wiira nihaana moopuwelelo oohiloka wanrimani wihu. (Usome Isaalimu 139:23, 24. *) Nalepelaka iyo, Yehova naahala unimwarusela nnepaawe wowaarya wiira unikavihere woonelela moopuwelelo oohiloka arineehu wanrimani. Ni nacuwelelaka wiira nihaana moopuwelelo oohiloka, nihaana nilepelaka wiira nnepa wowaarya univahe ikuru wiira nikhitiri waanana ayo moopuwelelo oohinamaanaayo. Napankaka commo, ninaahala uthoonyera wiira niholakela usempa khula itthu inhala unhiiha Yehova univaha nnepaawe wowaarya.—Efesu 4:30.

13. Isiyani ninlamuliyeehu upanka wiira nitepe usukhurweela nnepa wowaarya wa Nluku?

¹³ Hiiva nintepa usukhurweela cinene nnepa wowaarya wa Nluku noopuwelaka citthu cinkhitiriya  upankiya mahuku olelo. Yesu hinaaya urwaa wiirimu, uyo ahowiirela attharyaawe co: “Ukati unhaleenyu uveleeliheriya nnepa wowaarya, nnaahala waakhela ikuru ni nnaahala ukhala masaahityaaka . . . mpaka micoko coottayi nviralyaaya ituninya.” (Mite. 1:8) Ni iyo phi itthu khweeliini ineerannya ilelo. Nnepa wowaarya uhokavihera uthukumanihiya atthu ookhalaka 8 milhões ni nuusu anonswalela Yehova ntuninyani motheene. Uhiya iyo, hiiva ciicammo niri wapeephoni yoominepani kontha nnepa wowaarya wa Nluku unaanikavihera uthoonyera makhalelo omaana, toko nifento, utteeliya, nnema, uvilela, maana, unamaana, waamini, umaala ni wiivaraca. Ala akhanle makhalelo o “nhokorokho wo nnepa.” (Akalas. 5:22, 23) Khweeliini nnepa wowaarya wa Nluku ikhanle itthuvo yofayita cinene!

14. Manannani ninkaviheriyeehu wuulalyeerani?

¹⁴ Nihaana itthuvo yoohoonnya ikhanle ‘uvara nteko nkhayi’ ni Yehova, Yesu ni malayikha. (2 Akor. 6:1) Hiiva ninawaavarana nteko khula ukati unkavihereehu nteko wowaapanka eetthuci. Paulu, ayaacaka uyova ni atthu akhwaawe yaakavihera uyo ntekooyo, aheera: “Hiivano naatthu ninvara nteko nkhayi ni Nluku.” (1 Akor. 3:9) Narwaaka wuulalyeerani, ciicammo ninvara nteko nkhayi ni Yesu. Wuupuwele wiira ukati waarumalyaawe attharyaawe wiira arwee ‘yaapanke eetthuci atthu olapo cotheene,’ Yesu aheera “kiri ni nyuuva.” (Mat. 28:19, 20) Vano malayikha? Ninaasukhuru cinene ukhala wiira malayikha anaaneettihera narwaaka waalalyeera ‘ihapari comaana atthu ankhala watuninyani!’—Apoka. 14:6.

15. Uttonke ntakihero no mbiiblyani ninthoonyera mananna Yehova cinkaviheraawe cinene nteko woolalyeera unvareehu.

¹⁵ Isiyani inkhitiriihu upanka nlattu wookaviheriya ni Yehova, Yesu ni malayikha? Namwaruselaka ihapari co Umwene wuulalyeerani, ahaavo atthu akhwaawe arina nrima womaana ni anoonuwa mminepani. (Mat. 13:18, 23) Tipani nwiiriha ayo atthwaayo wuunuwa mminepani ni wiimiha mihokorokho? Yesu hohimya wiira khaavo ntthu nhala ukhala nttharyaawe ‘hiihaniye’ ni Yehova. (Joau 6:44) Ibiiblya inaavaha ntakihero ninthoonyera iyo. Wuupuwele ukati Paulu waalalyenryaawe athiyana vate isittatti yo Filipo. Woone itthu Ibiiblya inhimyaaya imwaacaka nthiyana mmoca aalalyeeriye eehaniya Lidia: “Yehova ahotthukula cinene nrimaawe wiira aviriyane ratta itthu yaahimyaawe Paulu.” (Mite. 16:13-15) Toko Lidia, atthu imiliyawu cene aheehaniya ni Yehova.

16. Nteko woolalyeera ninvareehu wanikhumelaka saana, tipani nlamuliya uttottopeliya?

¹⁶ Tipani khweeliini nlamuliya uttottopeliya nteko woolalyeera ninvareehu wanikhumelaka saana? Paulu haakhula nno nikohonno ukati waawantikhenlyaawe makristau o Korintu ala moolumwaala: “Mi kihaala, Apoolu homicera, masi Nluku phoonuwiha; phimaana ule naala ni ule nomicera khanakhala itthu, masi Nluku phimuulupale ukhala wiira phinoonuwiha.” (1 Akor. 3:6, 7) Toko Paulu, nihaana ninttottopelaka Yehova nlattu wo citthu comaana cotheene cinkhitiriihu wuulalyeerani.

17. Ninthoonyera cani wiira ninaasukhurweela iparakha ivahiyeehu ‘yoovara nteko nkhayi’ ni Nluku, Kristu ni malayikha?

¹⁷ Ninthoonyera cani wiira ninaasukhurweela iparakha ivahiyeehu ‘yoovara nteko nkhayi’ ni Nluku, Kristu ni malayikha? Neekurumica waalalyeera akhwiihu ihapari comaana. Ahaavo mananna menci owiirukumica waalalyeera atthu ihapari comaana, toko ulalyeera “waatthuni ni mmawaani.” (Mite. 20:20) Atthu enci unawaacivela ciicammo ulalyeera khula nipuro ninomphwanyaaya ntthu. Yankumananaka ntthu hinoncuwelaaya, ayo anansalaamiha sana-saana ni anaamananiha umoopana mwaha. Vano ntthuuyo apheelaka woopaniya mwaha, ayo ananlalyeera ihapari co Umwene yamuulumanaka saana.

18-19. a) Nimmicera cani ipyo cinaaleehu wuulalyeerani? b) Uttonke ntakihero ninthoonyera mananna Yehova cinkavihenryaawe ntthu aasomihiya Ibiiblya.

 ¹⁸ Khampa atthu ‘oovara nteko nkhayi ni Nluku,’ khaninlamuliya paahi waala wuulalyeerani, masi ciicammo ninlamuliya umicera ipyo cinaaleehu. Ntthu athoonyeraka wiira naapheela wiitthuca, hiiva ninlamuliya wiikurumica wiira nituruwele umuulumana awula nihaana untotha ntthu nkiina oohala umuulumana wiira ancere unsomiha Ibiiblya. Ukati ntthuuyo unviraawe oonuwaka mminepani, hiiva ninaakhala ootteeliya nlattu wowoona mananna Yehova cinrukunusaawe nrima wa ntthu nsomihiya Ibiiblya wiira akhale ntthari a Kristu.

¹⁹ Wuupuwele ntakihero na Raphalalani, nkulukhano o África do Sul. Ukati wancalyaawe usoma Ibiiblya, uyo cahoncivela cinene citthu ceetthucaawe. Masi uyo yahomphwanya marikariko ukati weetthucalyaawe itthu Ibiiblya inhimyaaya nhina umananiha uwuulumana atthu ookhwa. (Deut. 18:10-12) Vakaani-vakaani, uyo ahohiya wiira Nuulumo na Nluku nirukuse moopuwelelwaawe. Wahoolo, uyo ahohiya ukulukhano, hataa acuwelaka wiira uyo phaari nteko wamphwanyiha ipooso. Raphalalani ilelo rina myaakha 60, ni neera: “Kinawaasukhuru cinene Masaahiti a Yehova nlattu wookikavihera ni mananna menci, toko ukikavihera uphwanya nteko. Uhiya iyo, mi kinansukhuru cinene Yehova nlattu wookikavihera urehererya makhalelwaaka, wiira nna va miiva kilalyeere khampa Saahityaawe oopattisiya.”

20. Isiyani weeva ilakenlyaa upanka?

²⁰ Nhina ula mwahoola, nihooluma mihakhu cese cihinoonnya. Masi nhakhu uverihenle wuunuwa ikhanle iparakha irineehu yompatthanana venci Yehova. Iyo iparakheeyo inaanikavihera ukhalana mihakhu coohoonnya cikhwaawe—unlompa, ukaviheriya ni nnepa wowaarya ni unvarana nteko Nluku, Yesu ni malayikha. Phimaana, nilakele utepa uthoonyera wiira ninaasukhurweela nnyo itthuvonnyo. Ni nihihiye unsukhuru Yehova nlattu wookhala mpatthani omaana.