1. ¿Ndáaña ni̱ka̱ʼa̱n ta̱ Jesús xa̱ʼa̱ ña̱ ku̱i̱ká ña̱ íyo chí ndiví?

¿Á ÍYO ña̱ ku̱i̱ká ña̱ va̱ása kívi kuniyó? Íyovaña, chi ña̱ ku̱i̱ká ña̱ va̱ása kívi kuniyó kúú ña̱ ndáyáʼviníka. Tá ni̱ka̱ʼa̱n ta̱ Jesús nu̱ú iin yuku̱, ni̱ka̱ʼa̱nra xa̱ʼa̱ ña̱ ku̱i̱ká ña̱ íyo chí ndiví ña̱ ndáyáʼviníka nu̱ú ña̱ ku̱i̱ká ña̱ íyo nu̱ú ñuyǐví yóʼo. Ta ka̱chira: “Nu̱ú táxiva̱ʼún ña̱ ku̱i̱ká ña̱ kúúmiíún, kán koo níma̱ún” (Mat. 6:19-21). Níma̱yó chindaʼáña miíyó ña̱ nandukúyó ña̱ʼa ña̱ íyo nda̱a̱ táki̱ʼva íyo ña̱ ku̱i̱ká á ña̱ ndáyáʼviní nu̱úyó. Táxiva̱ʼayó ña̱ ku̱i̱ká chí ndiví tá vií íyo ña̱ kéʼéyó nu̱ú Ndióxi̱ ta kúsi̱í-inira xíʼinña. Nda̱a̱ táki̱ʼva ni̱ka̱ʼa̱n ta̱ Jesús, nda̱a̱ ni iinna va̱ása kivi sandíʼi-xa̱ʼa̱ ña̱ ku̱i̱ká yóʼo á ixakuíʼnánaña.

2. a) ¿Ndáaña káʼa̱n ta̱ Pablo xíʼinyó keʼéyó nu̱ú 2 Corintios 4:17, 18? b) ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

² Ta̱ apóstol Pablo chíka̱a̱ra ndee̱ xíʼinyó ña̱ ná koto “káxiyó nu̱ú ña̱ʼa ña̱ va̱ása kívi kuniyó” (kaʼvi 2 Corintios 4:17, 18). * Táʼan ña̱ʼa ña̱ va̱ása kívi kuniyó kúú bendición ña̱ ndakiʼinyó nu̱ú ñuyǐví xa̱á ña̱ ni̱ka̱ʼa̱n Ndióxi̱ taxira ndaʼa̱yó. Nu̱ú ña̱ artículo yóʼo ka̱ʼa̱nyó xa̱ʼa̱ ku̱mí regalo ña̱ va̱ása kívi kuniyó, ña̱ xa̱a̱ ndákiʼinyó vitin: ña̱ kítáʼanyó xíʼin Ndióxi̱, ña̱ oración, ña̱ chíndeétáʼan espíritu santo xíʼinyó, xíʼin ña̱ chíndeétáʼan Jehová, ta̱ Jesús xíʼin na̱ ángel xíʼinyó tá ku̱a̱ʼa̱nyó nátúʼunyó. Ta saátu kotoyó ndáa ki̱ʼva na̱ʼa̱yó ña̱ táxiyó tíxa̱ʼvi xa̱ʼa̱ ña̱yóʼo.

3. ¿Ndáaña kúú ña̱ ku̱i̱ká ña̱ ndáyáʼviní ña̱ va̱ása kívi kuniyó, ta nda̱chun va̱ʼa kúúmiíyóña?

³ Ña̱ ku̱i̱ká ña̱ va̱ása kívi kuniyó kúú ña̱ kítáʼanyó xíʼin Jehová,  ta ña̱yóʼo ndáyáʼviníña (Sal. 25:14). Ni kúú Ndióxi̱ migo na̱ yiví ku̱a̱chi, kúúkavara santo, ¿nda̱chun? Saáchi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó sa̱kútaʼara ku̱a̱chi ña̱ íyo ñuyǐví yóʼo (Juan 1:29). Tá kúma̱níka kuvi ta̱ Jesús, Jehová xi̱kunda̱a̱-inira ña̱ nda̱kúní koo ini se̱ʼera nda̱a̱ ná kuvira ta saá sakǎkura na̱ ñuyǐví. Xa̱ʼa̱ ña̱yóʼo, va̱ʼa xi̱táʼanra xíʼin na̱ yiví na̱ ni̱xi̱yo tá kúma̱níka kuvi ta̱ Cristo (Rom. 3:25).

4. Ka̱ʼa̱n xa̱ʼa̱ sava na̱ xi̱kuu migo Ndióxi̱, na̱ ni̱xi̱yo tá kúma̱níka kuvi ta̱ Jesús.

⁴ Ná ka̱ʼa̱nyó xa̱ʼa̱ sava na̱ xi̱kuu migo Ndióxi̱, na̱ ni̱xi̱yo tá kúma̱níka kuvi ta̱ Jesús. Ta̱ Abrahán ndakúní ni̱xi̱yo ña̱ xi̱kandíxara Ndióxi̱. Tá xa̱a̱ ni̱ya̱ʼa ki̱ʼva mil ku̱i̱ya̱ ña̱ ni̱xi̱ʼi̱ra, Jehová ni̱ka̱ʼa̱nra ña̱ kúúra migora (Is. 41:8). Ni tá ná kuvi na̱ kúú migo Jehová, va̱ása sandákoona ña̱ koona migora. Ña̱kán, Jehová ndákaʼánkavara xa̱ʼa̱ ta̱ Abrahán (Luc. 20:37, 38). Ta̱ Job kúú inka ta̱ va̱ʼaní xi̱kitáʼan xíʼin Ndióxi̱. Iin yichi̱, tá nda̱kutáʼan na̱ ángel chí ndiví, Jehová ni̱ka̱ʼa̱nra xa̱ʼa̱ ña̱ ndákanixi̱níra xa̱ʼa̱ ta̱ Job. Ka̱chira: “Iin ta̱a ta̱ kǒo ku̱a̱chi kúúra, ta nda̱kúní íyo ña̱ kéʼéra, ta ndásakáʼnura Ndióxi̱, ta va̱ása kéʼéra ña̱ kini” (Job 1:6-8). Ta, ¿ndáaña xi̱ndakanixi̱níra xa̱ʼa̱ ta̱ Daniel, ta̱ ka̱chíñu nu̱úra ki̱ʼva 80 ku̱i̱ya̱ iin ñuu nu̱ú ni̱xi̱yo na̱ yiví na̱ xi̱ndasakáʼnu inka ndióxi̱? Tá xa̱a̱ ku̱chée ta̱ Daniel, u̱ni̱ yichi̱ ni̱ka̱ʼa̱n na̱ ángel xíʼinra ña̱ ndáyáʼviníra nu̱ú Ndióxi̱ (Dan. 9:23; 10:11, 19). Kándíxayó ña̱ kúni̱ní Jehová ña̱ ná kixaa̱ ki̱vi̱ ña̱ sandátakura na̱ migora na̱ kúʼvi̱ní-inira xínira (Job 14:15).

5. ¿Ndáaña xíniñúʼu keʼéyó ña̱ va̱ʼa kutáʼanyó xíʼin Jehová?

⁵ Tiempo vitin, ku̱a̱ʼání na̱ yiví ku̱a̱chi va̱ʼaní kítáʼanna xíʼin Jehová. Ku̱a̱ʼání na̱ ta̱a, ná ñaʼá xíʼin na̱ va̱lí na̱ íyo iníísaá ñuyǐví náʼa̱na xíʼin ña̱ kéʼéna ña̱ kúni̱na koona migo Ndióxi̱. Ña̱ Biblia káchiña ña̱ va̱ʼaní kítáʼan Jehová xíʼin na̱ yiví na̱ kéʼé ña̱ nda̱kú (Prov. 3:32). Ta va̱ʼa kítáʼanna xíʼinra saáchi kándíxana ña̱ ni̱xi̱ʼi̱ ta̱ Jesús xa̱ʼa̱na. Tíxa̱ʼvi ña̱ ni̱xi̱ʼi̱ra, kivi ndataxi xíʼin miíyó ndaʼa̱ Jehová ta ndakuchiyó. Tá kéʼéyó ña̱ ndáyáʼviní yóʼo, ndákutáʼanyó xíʼin ku̱a̱ʼání na̱ hermano na̱ nda̱taxi xíʼin mií ndaʼa̱ Ndióxi̱ ta nda̱kuchina, ta va̱ʼaní kítáʼanna xíʼinra.

6. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ kítáʼanyó xíʼin Ndióxi̱?

⁶ ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ kítáʼanyó xíʼin Ndióxi̱? Ña̱ kundiku̱nyó yichi̱ ta̱ Abrahán xíʼin ta̱ Job. Chi na̱yóʼo yáʼaka 100 ku̱i̱ya̱ nda̱kúní ni̱xi̱yo inina xíʼin Ndióxi̱. Saátu xíniñúʼu keʼé miíyó, ni xa̱a̱ nda̱saaka tiempo kúú ña̱ káchíñuyó nu̱ú Jehová. Ta saátu xíniñúʼu kundiku̱nyó yichi̱ ta̱ Daniel, ta chindayáʼvikayó ña̱ kítáʼanyó xíʼin Jehová nu̱úka ña̱ tákuyó (Dan. 6:7, 10, 16, 22). Tá chíndeétáʼan Jehová xíʼinyó kivi ya̱ʼayó nu̱ú nda̱a̱ ndáaka tu̱ndóʼo, ta va̱ása ndiʼi-xa̱ʼa̱ ña̱ kítáʼanyó xíʼinra (Filip. 4:13).

7. a) Nda̱a̱ táki̱ʼva káchi Proverbios 15:8, ¿ndáa ki̱ʼva xíto Jehová oración ña̱ káʼa̱nyó xíʼinra? b) ¿Ndáa ki̱ʼva ndákuiinra ña̱yóʼo?

⁷ Inka ña̱ ku̱i̱ká ña̱ va̱ása kívi kuniyó kúú ña̱ oración. Na̱ va̱ʼaní kítáʼan kútóona ka̱ʼa̱nna xa̱ʼa̱ ña̱ ndákanixi̱nína xíʼin xa̱ʼa̱ ña̱ ndóʼona. Ki̱ʼva saá íyo ña̱ kítáʼanyó xíʼin Jehová. Chi xíniñúʼura tu̱ʼunra ña̱ va̱ʼa ka̱ʼa̱nra xíʼinyó, ta xíʼin ña̱yóʼo va̱ʼa kúnda̱a̱-iniyó xa̱ʼa̱ ña̱ ndákanixi̱níra xíʼin ña̱ ndóʼora. Ta miíyó va̱ʼa káʼa̱nyó xíʼinra ti̱xin ña̱ oración. Tá káʼa̱nyó xíʼinra, kivi natúʼunyó xíʼinra xa̱ʼa̱ ndiʼi ña̱ ndóʼoyó xíʼin ña̱ ndákanixi̱níyó. Jehová kúsi̱íní-inira kuniso̱ʼora ña̱ káʼa̱nyó xíʼinra (kaʼvi Proverbios 15:8). * Kúúra iin migo ta̱ kúʼvi̱ní-ini xíni miíyó, xa̱ʼa̱ ña̱yóʼo su̱ví xíniso̱ʼo kuitíra ña̱ káʼa̱nyó xíʼinra chi saátu ndákuiinraña. Sava yichi̱ kamava ndákuiinra yuʼúyó. Soo savatu xíniñúʼu ndakundeékayó  ka̱ʼa̱nyó xíʼinra. Nda̱a̱ ndáaka ña̱ ná kuu, kiviva kandíxayó ña̱ ndakuiinra yuʼúyó mií tiempo ña̱ xíni̱ miíra ta va̱ʼaní koo ña̱yóʼo. Ña̱ nda̱a̱ kúúña, sana va̱ása ndakuiinra nda̱a̱ táki̱ʼva kúni̱ miíyó. Sana va̱ása sakǎkura miíyó nu̱ú iin tu̱ndóʼo, soo taxivara ña̱ ndíchi xíʼin ndee̱ ndaʼa̱yó ña̱ kundeé-iniyó ya̱ʼayó nu̱ú ña̱yóʼo (1 Cor. 10:13).

8. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ oración?

⁸ ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ oración? Tá ná kundiku̱nyó ña̱ consejo yóʼo: “Ka̱ʼa̱n ni̱ʼindó xíʼin Ndióxi̱” (1 Tes. 5:17). Jehová va̱ása íxandúxara xíʼinyó ña̱ ka̱ʼa̱nyó xíʼinra. Chi táxira ña̱ ná ndaka̱xin miíyó ña̱ keʼéyó, soo ni saá káʼa̱nvara xíʼinyó ña̱ ná ka̱ʼa̱n ni̱ʼiyó xíʼinra (Rom. 12:12). Ña̱kán, kivi na̱ʼa̱yó ña̱ táxiyó tíxa̱ʼvi ndaʼa̱ra tá ku̱a̱ʼá yichi̱ káʼa̱nyó xíʼinra iin tá iin ki̱vi̱. Soo ná va̱ása nandósóyó taxiyó tíxa̱ʼvi ndaʼa̱ra ta ndasakáʼnuyóra (Sal. 145:2, 3).

9. a) ¿Ndáaña ndákanixi̱ní iin ta̱ hermano ta̱ naní Chris xa̱ʼa̱ ña̱ oración? b) Ta miíún, ¿ndáaña ndákanixi̱níún xa̱ʼa̱ ña̱ oración?

⁹ Tá ku̱a̱ʼáka tiempo káchíñuyó nu̱ú Jehová ta xítoyó ndáa ki̱ʼva ndákuiinra ña̱ káʼa̱nyó xíʼinra, kundayáʼvikaña nu̱úyó. Ná kotoyó ña̱ káʼa̱n iin ta̱ hermano ta̱ naní Chris, ta̱ xa̱a̱ káchíñu nu̱ú Jehová ki̱ʼva 47 ku̱i̱ya̱, káchira: “Kúsi̱íní-inii̱ tá ndáko̱i̱ xi̱ta̱a̱n ta káʼi̱n xíʼin Jehová. Iin ña̱ liviní kúúña tá káʼi̱n xíʼinra tá sa̱kán ku̱a̱ʼa̱n kíta ñu̱ʼu. Tá kéʼíi̱ ña̱yóʼo kúni̱i̱ taxii̱ tíxa̱ʼvi ndaʼa̱ Jehová xa̱ʼa̱ ndiʼi ña̱ va̱ʼa ña̱ táxira ndaʼíi̱, ta saátu xa̱ʼa̱ ña̱ ta̱xira ña̱ va̱ʼa káʼi̱n xíʼinra. Tá xa̱a̱ ndi̱ʼi ke̱ʼíi̱ iin oración ña̱ va̱ʼa ku̱ʼi̱n ku̱su̱i̱n, kúsi̱í-inii̱ chi kǒoka ña̱ ndíʼi̱-inii̱ xa̱ʼa̱”.

10. ¿Nda̱chun xíniñúʼu kundayáʼviní espíritu santo Ndióxi̱ nu̱úyó?

¹⁰ Inka ña̱ ku̱i̱ká ña̱ va̱ása kívi kuniyó kúú ndee̱ Ndióxi̱, ta xíniñúʼu kundayáʼvi ña̱yóʼo nu̱úyó. Ta̱ Jesús ni̱ka̱ʼa̱nra ña̱ va̱ása xíniñúʼu sandákooyó ndukúyó espíritu santo (Luc. 11:9, 13). Jehová xíniñúʼura espíritu santo ña̱ va̱ʼa taxira ndee̱ ndaʼa̱yó (2 Cor. 4:7; Hech. 1:8). Tá chíndeétáʼan espíritu santo xíʼinyó, kivi kundeé-iniyó ya̱ʼayó nu̱ú nda̱a̱ ndáaka tu̱ndóʼo.

11. ¿Ndáa ki̱ʼva kivi chindeétáʼan espíritu santo xíʼinyó?

 ¹¹ Ña̱ espíritu santo chíndeétáʼanña xíʼinyó ña̱ kuchiñuyó saxínuyó chiñu ña̱ ndákiʼinyó ti̱xin ñuu Ndióxi̱. Chi kivi chindeétáʼanña xíʼinyó ña̱ va̱ʼaka keʼéyó ña̱ xa̱a̱ xíni̱yó keʼéyó. Ña̱ nda̱a̱ kúúña, tá va̱ʼa kána iin chiñu ña̱ kéʼéyó nu̱ú Jehová, su̱ví xa̱ʼa̱ ndee̱ miíyó kúúña chi xa̱ʼa̱ ña̱ chíndeétáʼan espíritu santo xíʼinyó kúúña.

12. Nda̱a̱ táki̱ʼva káchi Salmo 139:23, 24, ¿ndáaña kivi ndukúyó nu̱ú Ndióxi̱?

¹² Inka ki̱ʼva ña̱ na̱ʼa̱yó ña̱ ndáyáʼvi espíritu santo nu̱úyó, kúú ña̱ ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ kunda̱a̱-iniyó ndáaña kúú ña̱ va̱ása va̱ʼa ndákanixi̱níyó á ña̱ ndíka̱a̱ níma̱yó (kaʼvi Salmo 139:23, 24). * Tá káʼa̱nyó ña̱yóʼo xíʼinra, kivi kuniñúʼura espíritu santora ña̱ chindeétáʼanra xíʼinyó ña̱ kotoyó á íyo iin ña̱ xíniñúʼu nasamayó. Tá ná kuu ña̱yóʼo, ná ka̱ʼa̱nyó xíʼinra ña̱ ná chindeétáʼan espíritu santo xíʼinyó ña̱ sandíʼi-xa̱ʼa̱yó ña̱ va̱ása va̱ʼa ña̱ ndákanixi̱níyó á ña̱ kúni̱yó keʼéyó. Saá kúú ña̱ na̱ʼa̱yó ña̱ kǒo kúni̱yó keʼéyó nda̱a̱ ni iin ña̱ʼa ña̱ kivi kasi nu̱ú Jehová ña̱ ndakundeéra kuniñúʼura espíritu santora ña̱ va̱ʼa chindeétáʼanra xíʼinyó (Efes. 4:30).

13. ¿Ndáa ki̱ʼva kivi kundayáʼvika ña̱ espíritu santo nu̱úyó?

¹³ Kivi kundayáʼvika ña̱ espíritu santo nu̱úyó tá ná ndakanixi̱níyó xa̱ʼa̱ ki̱ʼva ña̱ chíndeétáʼanña xíʼinyó tiempo vitin. Tá kúma̱níka ku̱ʼu̱n ta̱ Jesús chí ndiví, ni̱ka̱ʼa̱nra ña̱yóʼo xíʼin na̱ discípulora: “Ndakiʼinndó ndee̱ tá ná kixaa̱ espíritu santo Ndióxi̱ sa̱tándó. Ta ku̱ʼu̱nndó natúʼunndó xa̱ʼíi̱ [...] iníísaá ñuyǐví” (Hech. 1:8). Ña̱ tu̱ʼun yóʼo xa̱a̱ xínuvaña. Xa̱ʼa̱ ña̱ chíndeétáʼan espíritu santo xíʼinyó, xa̱a̱ yáʼaka u̱na̱ millón sava kúú na̱ ndásakáʼnu Ndióxi̱ na̱ íyo iníísaá ñuyǐví. Saátu va̱ʼaní kítáʼan ndiʼiyó, saáchi espíritu santo chíndeétáʼanña xíʼinyó ña̱ kuumiíyó ku̱a̱ʼání ña̱ va̱ʼa, ña̱ kuʼvi̱-iniyó kunitáʼanyó, ña̱ kusi̱í-iniyó, ña̱ táxi̱n koo iniyó, ña̱ kúee koo iniyó, ña̱ vií koo iniyó, ña̱ va̱ʼa koo iniyó, ña̱ kandíxayó Ndióxi̱, ña̱ vitá koo iniyó xíʼin ña̱ ka̱ʼnu̱-iniyó.  Ña̱yóʼo kúú ña̱ va̱ʼa ña̱ kúúmií ña̱ espíritu santo (Gál. 5:22, 23). Ta iin regalo ña̱ ndáyáʼviní kúú ña̱yóʼo.

14. ¿Ndáana chíndeétáʼan xíʼinyó tá ku̱a̱ʼa̱nyó natúʼunyó xíʼin na̱ yiví?

¹⁴ Kúúmiíyó inka ña̱ ku̱i̱ká ña̱ va̱ása kívi kuniyó: ña̱ káchíñuyó xíʼin Jehová, ta̱ Jesús xíʼin na̱ ángel (2 Cor. 6:1). Chíndeétáʼanna xíʼinyó tá ku̱a̱ʼa̱nyó natúʼunyó xíʼin na̱ yiví. Ta̱ Pablo ni̱ka̱ʼa̱nra ña̱ miíra xíʼin inkakana xi̱kuuna na̱ káchíñu xíʼin Ndióxi̱ (1 Cor. 3:9). Ta saátu tá ku̱a̱ʼa̱nyó natúʼunyó xíʼin na̱ yiví, kúúyó na̱ chíndeétáʼan xíʼin ta̱ Jesús. Ná ndakaʼányó chi tá xa̱ʼnda ta̱ Jesús chiñu nu̱ú na̱ discípulora ña̱ ku̱ʼu̱nna sanáʼa̱na na̱ yiví ña̱ kundiku̱nnara, ni̱ka̱ʼa̱nra xíʼinna: “Koi̱ xíʼinndó” (Mat. 28:19, 20). ¿Á chíndeétáʼan na̱ ángel xíʼinyó? Táxiníyó tíxa̱ʼvi xa̱ʼa̱ ña̱ chíndeétáʼan na̱ ángel xíʼinyó tá ku̱a̱ʼa̱nyó natúʼunyó xíʼin na̱ yiví (Apoc. 14:6).

15. ¿Ndáaña va̱xi nu̱ú Biblia kúú ña̱ náʼa̱ ña̱ chíndeétáʼan Jehová xíʼinyó tá ku̱a̱ʼa̱nyó natúʼunyó xíʼin na̱ yiví?

¹⁵ ¿Ndáaña va̱ʼa ndákiʼinyó xa̱ʼa̱ ña̱ chíndeétáʼan Jehová xíʼinyó? Nda̱a̱ táki̱ʼva íyo na̱ chíʼi saá íyoyó tá ku̱a̱ʼa̱nyó natúʼunyó xíʼin na̱ yiví xa̱ʼa̱ Reino Ndióxi̱, ta sava ña̱ si̱ʼva̱ yóʼo xáa̱ña nda̱a̱ níma̱na ta kíxáʼaña xáʼnuña (Mat. 13:18, 23). Ta, ¿ndáana sákuaʼnu ña̱ si̱ʼva̱ yóʼo ña̱ va̱ʼa taxiña ku̱i̱ʼi? Ta̱ Jesús ni̱ka̱ʼa̱nra ña̱ nda̱a̱ ni iin na̱ yiví va̱ása kivi xa̱a̱na koona discípulora, tá va̱ása níkana yivára na̱yóʼo (Juan 6:44). Nu̱ú Biblia va̱xi iin ña̱ káʼa̱n xa̱ʼa̱ ña̱yóʼo. Iin yichi̱, ta̱ Pablo na̱túʼunra xa̱ʼa̱ Ndióxi̱ xíʼin sava ná ñaʼá ná ndíta chí sa̱tá ña̱ ñuu Filipos. Ná kotoyó ña̱ káʼa̱n Biblia xa̱ʼa̱ iin ñáyóʼo, ñá Lidia: “Jehová nda̱kunára níma̱ñá ña̱ va̱ʼa kuniso̱ʼoñá ña̱ káʼa̱n ta̱ Pablo” (Hech. 16:13-15). Nda̱a̱ táki̱ʼva ke̱ʼé Jehová xíʼin ñá Lidia, saá kéʼéra xíʼin ku̱a̱ʼání na̱ yiví tiempo vitin chi kánarana ña̱ koona táʼan na̱ ñuura.

16. ¿Ndáana xíniñúʼu ndukáʼnu xa̱ʼa̱ ña̱ va̱ʼa xíniso̱ʼo na̱ yiví na̱ nátúʼunyó xíʼin?

¹⁶ ¿Ndáana xíniñúʼu ndukáʼnu xa̱ʼa̱ ña̱ va̱ʼa xíniso̱ʼo na̱ yiví na̱ nátúʼunyó xíʼin? Ta̱ Pablo nda̱kuiinra ña̱ pregunta yóʼo tá ka̱ʼyíra ña̱ va̱xi yóʼo xa̱ʼa̱ na̱ congregación ña̱ Corinto, ka̱chira: “Yi̱ʼi̱ chi̱ʼi, ta̱ Apolos ni̱ko̱so̱, ta Ndióxi̱ kúú ta̱ sa̱kuaʼnuña, xa̱ʼa̱ ña̱yóʼo su̱ví na̱ chíʼiña kúú na̱ ndáyáʼvi, ni na̱ kóso̱ña, chi Ndióxi̱ kúú ta̱ sákuaʼnuña” (1 Cor. 3:6, 7). Tá va̱ʼaní xíniso̱ʼo na̱ yiví na̱ nátúʼunyó xíʼin, Jehová kúú ta̱ xíniñúʼu ndasakáʼnuyó nda̱a̱ táki̱ʼva ke̱ʼé ta̱ Pablo.

17. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ káchíñuyó xíʼin Ndióxi̱, ta̱ Jesús xíʼin na̱ ángel?

¹⁷ ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ káchíñuyó xíʼin Ndióxi̱, ta̱ Jesús xíʼin na̱ ángel? Kéʼéyó ña̱yóʼo tá chíka̱a̱níyó ndee̱ ña̱ natúʼunyó xíʼin ndiʼi na̱ yiví xa̱ʼa̱ tu̱ʼun Ndióxi̱. Ta ku̱a̱ʼá ki̱ʼva kivi keʼéyó ña̱yóʼo, tá kúú ña̱ natúʼunyó nu̱ú íyo ku̱a̱ʼá na̱ yiví á veʼe tá veʼe (Hech. 20:20). Ku̱a̱ʼání na̱ hermano kútóona natúʼunna xa̱ʼa̱ Ndióxi̱ nda̱a̱ ndáaka nu̱ú xíkana. Tá ndákutáʼanna xíʼin iin na̱ yiví na̱ va̱ása xíni̱na viíní chíndeéna na̱yóʼo, ta ndúkúna ki̱ʼva ña̱ va̱ʼa kixáʼana natúʼunna xíʼinna. Tá va̱ʼa xíniso̱ʼo na̱ yiví yóʼo, nátúʼunna xíʼinna xa̱ʼa̱ Reino Ndióxi̱.

18, 19. a) ¿Ndáa ki̱ʼva kóso̱yó ña̱ nda̱a̱ níma̱ na̱ yiví? b) ¿Ndáa ki̱ʼva chi̱ndeétáʼan Jehová xíʼin iin ta̱ naní Raphalalani?

¹⁸ Xa̱ʼa̱ ña̱ kúúyó na̱ káchíñu xíʼin Ndióxi̱ va̱ása xíniñúʼu chiʼi kuitíyó ña̱ nda̱a̱ níma̱ na̱ yiví, chi saátu xíniñúʼu ko̱so̱yó ña̱yóʼo. Tá va̱ʼa xíniso̱ʼo na̱ yiví xa̱ʼa̱ ña̱ nátúʼunyó xíʼinna, kúni̱yó chindeétáʼanyó xíʼinna ña̱ ná ndakundeékana sakuaʼana xa̱ʼa̱ Ndióxi̱, ta saátu kivi ka̱ʼa̱nyó xíʼin inkana ña̱ ná ku̱ʼu̱nna kotona na̱yóʼo ta kixáʼana kaʼvina xíʼinna. Tá iin na̱ káʼviyó xíʼin chíka̱a̱na ndee̱ ña̱ xa̱a̱na koona discípulo ta̱ Jesús, kúsi̱íní-iniyó tá xítoyó ndáa ki̱ʼva chíndeétáʼan Jehová xíʼinna ña̱ nasamana ña̱ ndákanixi̱nína xíʼin ña̱ íyo níma̱na.

 ¹⁹ Ná kotoyó ña̱ ndo̱ʼo iin ta̱ hermano ta̱ ñuu Sudáfrica ta̱ naní Raphalalani, ta̱yóʼo xi̱kuura ta̱ xi̱ndakuati. Tá ki̱xáʼara káʼvira Biblia xi̱kutóoníra ndiʼi ña̱ xi̱sakuaʼara nu̱úña. Soo i̱xayo̱ʼvi̱ña xíʼinra, tá ku̱nda̱a̱-inira ndáaña sánáʼa̱ tu̱ʼun Ndióxi̱ xa̱ʼa̱ ña̱ ka̱ʼa̱nyó xíʼin na̱ ni̱xi̱ʼi̱ (Deut. 18:10-12). Loʼo tá loʼo ta̱xira ña̱ ná nasama Ndióxi̱ ña̱ ndákanixi̱níra. Soo tá ni̱ya̱ʼa tiempo sa̱ndákoora ña̱ keʼéra ña̱ tási, ni xi̱kuuña chiñu ña̱ xi̱keʼéra ña̱ va̱ʼa kiʼinra ña̱ xi̱xiniñúʼura. Vitin xa̱a̱ 60 ku̱i̱ya̱ kúúmiíra, ta káchira: “Táxiníi̱ tíxa̱ʼvi ndaʼa̱ na̱ testigo Jehová chi ku̱a̱ʼání ki̱ʼva chi̱ndeétáʼanna xíʼi̱n, tá kúú ña̱ nda̱ni̱ʼíi̱ iin chiñu. Soo, xíniñúʼu taxiníkai̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼi̱n ña̱ na̱samai̱ ña̱ tákui̱, vitin kúsi̱íní-inii̱ xa̱ʼa̱ ña̱ nda̱kuchii̱ ta nátúʼi̱n xíʼin na̱ yiví xa̱ʼa̱ra”.

20. ¿Ndáaña kúni̱yó keʼéyó?

²⁰ Nu̱ú ña̱ artículo yóʼo ni̱ka̱ʼa̱nyó xa̱ʼa̱ ku̱mí regalo ña̱ va̱ása kívi kuniyó. Ta iin ña̱ ndáyáʼviníka kúú ña̱ va̱ʼa kítáʼanyó xíʼin Jehová. Ta tíxa̱ʼvi ña̱yóʼo ndákiʼinyó inkaka regalo ña̱ va̱ása kívi kuniyó: ña̱ káʼa̱nyó xíʼinra ti̱xin oración, ña̱ xítoyó ndáa ki̱ʼva chíndeétáʼan espíritu santora xíʼinyó, ta saátu ña̱ chíndeétáʼan na̱ íyo chí ndiví xíʼinyó tá ku̱a̱ʼa̱nyó natúʼunyó. Ta kúni̱yó chindayáʼviyó ña̱yóʼo ndiʼi tiempo. Ta nda̱a̱ ni iin yichi̱ va̱ása kúni̱yó sandákooyó ña̱ taxiyó tíxa̱ʼvi ndaʼa̱ Jehová xa̱ʼa̱ ña̱ kúúra iin migo ta̱ va̱ʼaní-ini.