1. Jesuba tae-e Jehovaba xu hâ ǀkhaegu xa ge mî?

HOA ǀkhaen ge mûhe tama. ǀŌ-aisa ǀkhaeb ge mûhe tama. ǃHommi aib ge mā ǃhoas ǃnâb ge Jesuba ge mî Jehovaba xu hâ ǀkhaegu mari-i tamas ka io ǃkhūsis xa a ǂhâǂhâsa ǃkhaisa. Tsîb ge ǀaro tsî ge mî: “ǁUib âdu hâpa, ǁnāpab kom ǂgaob âdu ona hâo.” (Mat. 6:19-21) Xū-e da ga ǀgapise ǃgôa o, o da ge ǁnāxū-e nî ôa-am. ǃGâi ǀonsa da ga Elob aisi ūhâ o, o da ge “ǁuiba ǀhommi ǃnâ” ra ǀhaoǀhaobasen. Jesub ge ge mî nēti i ǁuib ge dīkākāhe tamas ka io a ǃnarihe ǁoa.

2. (a) 2 Korinteǁîn 4:17, 18 ǃnâb Pauluba tae-e dīsa ra ǂkhâǃnâ da? (b) Nē ǁkhāǁkhāǃâs ǃnâ da tae-e nî ǁkhāǁkhāsen?

² Apostel Paulub ge ra ǂkhâǃnâ da i da sada mûde “mûǁoasa xūn ai” mâi. (Khomai re 2 Korinteǁîn 4:17, 18.) Mûhe ǁoasa ǀkhaegu ge Eloba xu da ra hō xūn hîna da ǀasa ǃhūbaib ǃnâ nî hōn tsîna ǃkhōǂgā hâ. Nē ǁkhāǁkhāǃâs ǃnâ da ge haka mûhe ǁoasa ǀkhaegu xa nî ǁkhāǁkhāsen. Nēn ge Jehovab ǀkha da ūhâ ǀhōsagus, ǀgores di ǀkhaeb, ǃanu gagaba xu da ra hō huib tsî ǀhomsi huib hîna da aoǁnâ sîsenni ǃnâ ra hōb tsîna. Tsî da ge nî ǁkhāǁkhāsen tae-e da nî dīsa nē ǀkhaega ǃgôasiba ǁgaus ǃnâ.

3. Mûhe ǁoasa ǀō-aisa ǀkhaeba a tae tsî nēsa mati ra īǁkhā kaihe?

³ Jehovab ǀkha da ūhâ ǀhōsagusis ge ǀō-aisa ǀkhaeba. (Psa. 25:14) Matib Jehovaba ǀoasa kurusa ūhâ tama  khoen ǀkha ǀhōsagu tsî ǃanuse a hâ ǁkhā? Nēs ge īǁkhā Jesub xoremarib “ǃhūbaib di ǁoreba” ra ūbē amaga. (Jhn. 1:29) Jesub nî ǁō aiǃâb ge Jehovaba ǀnai ge ǂan i ǁōb kōseb nî mâǀgaisa nēs ǃnâ-ūb khoena nî orese. ǁNā amagab ge Jesub aiǃâ ge ǁō khoen ǀkha ge ǀhōsagu ǁkhā i.​—Rom. 3:25.

4. Jesub aiǃâ ge ûi hâ i khoegu hîna ge Elob ǀhōsa i gu aiǁgaude mā re?

⁴ Jesub aiǃâ ge ûihâ i khoegu hîna ge Elob ǀhōsa kaigu ǃoa kō re. Abrahammi ge kaise ǀgaisa ǂgomsa ge ūhâ i. ǀOadisi kurigu Abrahammi ge ǁōs khaoǃgâb ge Jehovaba “ti ǀhōsab” ti ge mî. (Jes. 41:8) Nēs ge ra ǂâibasen Jehovab khoena ǁōn ga xawe ǀgū ǀhōsan ase ra mûsa. Abrahammi ge Jehovab ǂâis ǃnâ a ûitsama. (Luk. 20:37, 38) ǀKhara aiǁgaus ge Joba. ǀHomǃgāgu ǀguiba hâ hînab ge Jehovaba Jobi xa ǃgâise gere ǃhoa. Jehovab ge ǁîb xa ge mî: “Aob hîa ǂhanu-ai tsî ǂhauǃnâ tsî eloǃaoǃgâxa tsî ǂkhababa ra ǂgōsenna”. (Job. 1:6-8) Tsî Jehovaba mati Danieli hîna ge ǁîba ǃoaba tama khoen ǁaegu 80 kuriga hâ ib xa gere tsâ? ǃNona ǃādi kōsegu ge ǀhomǃgāga ǁnā kaira aoba ge mîba Jehovab ǃoa-aib a “ǀnamǀnamsa” aosa. (Dan. 9:23; 10:11, 19) ǂGomǃgâ ǁkhā da ge a Jehovab ǁîb di ǀnamǀnamsa ǀhōsan hîna ge ǁōna khâisa māsa ǃoa ra mûǂuisa.​—Job. 14:15.

5. Tae-e da nî dī i da ǀgū ǀhōsagusisa Jehovab ǀkha ūhâ?

⁵ Nētsēn ge miluindi khoena Jehovab ǀkha ǀhōsagusisa ūhâ. ǂGui aogu, taradi tsî ǀgôan tsîn ge ǁîn dīgu ǃnâ-ū ra ǁgau Elob ǀhōsan a ǃkhaisa. Jehovab ge ǀgū ǀhōsagusisa “ǂhauǃnâb ǀkha” ra ūhâ. (ǂKhm. 3:32) Jesub Xristub xoremarib ǃnân ūhâ ǂgoms ge nēsa ra īǁkhā kai. ǁNā xoremarib ǃaroma da ge ǁîb ǀkha ǀhōsagusisa a ūhâ ǁkhā tsî māǁnâsen tsî a ǁāǁnâ kaisen ǁkhā. Nē mîǁguiga da ga dī o, o da ge miluindi khoen hîna māǁnâsen, ǁāǁnâ kaisen tsî ǀgū ‘ǀhōsagusisa’ Jehovab ǀkha ūhân di ǃâ.

6. Mati da ǃgôasiba Jehovab ǀkha da ūhâ ǀhōsagusisa a ǁgau ǁkhā?

⁶ Mati da a ǁgau ǁkhā Elob ǀkha da ūhâ ǀhōsagusisa da ra ǃgôaǃgâ ǃkhaisa? Abrahammi tsî Jobi hîna ge kaidisi kurin xa ǃnāsa kuriga ǂgomǂgomsase hâ gu khama da ge sida tsîna ǂgomǂgomsase nî hâ—ǂgui kurina da ga Jehovaba ǀnai ǃoaba xawe. Danieli khami da ge Jehovab ǀkha da ūhâ ǀhōsagusisa sida ûib ǃgâ-ai nî ǃgôa. (Dan. 6:7, 10, 16, 22) Jehovab huib ǀkha da ge ǃgomsin hîna da ra hōǃân ǃnâ mâǀgai tsî ǀgū ǀhōsagusisa ǁîb ǀkha nî ūhâ ǀgara.​—Fil. 4:13.

7. (a) ǂKhoamîdi 15:8 ǃoagub Jehovaba mati sada ǀgoredi xa ra tsâ? (b) Jehovaba mati sada ǀgorede ra ǃeream?

⁷ ǀNî hâ mûhe ǁoasa ǀkhaeb ge ǀgoresa. ǀHōsan ge ǁîn di tsâsigu xa ra ǁgam. Nēsa a ama sada ǀhōsagusis hîna da Jehovab ǀkha ūhâs xa? Î, ama a. Jehovab ge sada ǀkha ǁîb mîs ǃnâ-ū ra ǃhoa tsî nēs ǃnâ-ū ǁîb ǂâidi tsî tsâsigu tsîna ra mîba da. ǁÎb ǀkha da ge ǀgores ǃnâ-ū ra ǃhoa tsî ǂhani da ra xūn tsî sada di ǃgam tsâsigu tsîna a mîba bi ǁkhā. Jehovab ge sada ǀgorede ǃoa ǃgâs xa a ǃgâibahe. (Khomai re ǂKhoamîdi 15:8.) ǀNamǀnamsa ǀhōsab aseb ge Jehovaba sada ǀgorede ǃoa ǃgâs ǀguisa hî tama hâ xawe  ra ǃeream. ǀNî ǁaegu aib ge ǀgorede ǃhaese ra ǃeream. Tsî ǁaen ai da ge ǀguis xa ǃnāsa ǃnāde xū-e nî ǀgoreba. Xawe da ge ǂgomǃgâsiba a ūhâ ǁkhā sada ǀgoredi ǂhanu ǁaeb tsî ǀgaub ǃnâ nî ǃereamhe ǃkhaisa. Elob ǃereams ge ǃâubasen tama da hâ ǀgaub ǃnâ a hā ǁkhā. Aiǁgauseb ge ǃgomsiba ūbes xa ǀgaiba a mā da ǁkhā i da nēsa ‘tani ǁkhā.’​—1Kor. 10:13.

8. Mati da sada ǀkhaeb ǀgores diba da ra ǃgôaǃgâ ǃkhaisa a ǁgau ǁkhā?

⁸ Mati da ǃgôasiba nē ǀō-aisa ǀkhaeb ǀgores diba nî ǁgau? ǀGui ǀgaub nēsa da a dī ǁkhāb ge mîmās “ǀûs ose ǀgores” disa saosa. (1Tes. 5:17) Jehovab ge ǁgarida tama hâ i da ǀgore. Xaweb ge aitsama ǁhûibasens ǁkhāsib sida diba ǃgôaǃgâ tsî ra ǂkhâǃnâ da i da “hâhâ ǀgores” ǃnâ. (Rom. 12:12) Sada ǃgôaǃgâsiba da ge mâ tsēs haos ai ǀgores ǃnâ-ū a ǁgau ǁkha. Jehovaba sada di ǀgoredi ǃnâ koa tsî gangansa da ge tā nî ǀuru.​—Psa. 145:2, 3.

9. ǀGui ǃgâsaba mati ǀgores xa ra tsâ tsî sado mati nēs xa ra tsâ?

⁹ Jehovaba da ra ǃoaba tsî sida ǀgoredeb ra ǃeream ǀgausa ra mû khamib ge sida ǃgôaǃgâsib hîna da ǀgoresa ūba hâba nî ǀgai. Chrisi hîna 47 kuriga ǀoasa ǁaeba aoǁnâ sîsen-e ra dīb di aiǁgausa ǃoa kō re. “ǁGoaga khâi tsî ǀgores xa ta ge ǃgâibahe” tib ge ra mî. “Kaise i ge a ǁkhoaxa sores ra ǂoaxa tsîn xūna îsase ra mûsen hîna Jehovab ǀkha ǃhoasa. Nēs ge ra ǁgaride i ta hoa ǀkhaegu ǃgao gangan bi, ǀgores tsîna ǃkhōǂgāse. Tsî ta ge tsēs ǀams ai ǀgore tsî ǃanu ǃgâiǂâis ǀkha a ǁom ǁkhā.”

10. Tae-i ǃaroma da Elob ǃanu gagaba nî ǃgôaǃgâ?

¹⁰ Elob ǃanu gagab ge mûhe ǁoasa ǀkhaegu di ǀgui. Jesub ge ra mîba da i da ǃanu gagaba ǀgores ǃnâ-ū ǂgan. (Luk. 11:9, 13) ǁÎb ǃanu gagab ǃnâ-ūb ge Jehovaba ǀgaiba ra mā da—“ǃnāǂamsasib ǀgaib  diba.” (2Kor. 4:7; ǃNǃkh. 1:8) Elob ǃanu gagab huib ǀkha da ge hâ nî ǃgomsin hoan ǃnâ a mâ ǀgai ǁkhā.

11. Mâ ǀgaugu ǃnâb ǃanu gagaba ra hui da?

¹¹ ǃAnu gagab ge nî hui da i da Elob xa da māhe hâ sîsen-e dī. Elob ǃanu gagab ge ū da hâ ǁkhasiba a ǀāǀā ǁkhā. Tsî nēs ǀkha ū da hâ ǁgui-ais ǀkha ra hui da. Jehovab ǃoabas ǃnâ da ra hō ǀkhaegu ge ǁîb ǃanu gagab huib xa ǀgui ra īǁkhā kaihe.

12. Psalmdi 139:23, 24 ra mîs ǃoagu da tae huib ǃaroma ǃanu gagaba a ǂgan ǁkhā?

¹² ǀNî hâ ǀgaub hîna da Elob ǃanu gagaba da ra ǃgôaǃgâ ǃkhaisa a ǁgau-ū ǁkhāb ge ǀgoresa, î da hui-e sada ǂgaogu ǃnâ hâ ǃgâi tama ǂâidi tsî tsâsigu tsîna mûs ǀkha. (Khomai re Psalmdi 139:23, 24.) Nesa da ga ǀgores ǃnâ ǂgan o, ob ge Jehovaba ǁîb ǃanu gagab ǀkha nî ǁgau da ǃgâi tama ǂâidi tsî tsâsigu tsîna da ga ūhâ o. Tsî da ga ǃgâi tama ǂâi-i tamas ka io tsâsi-e da ūhâsa mûǂan o ,o da ge ǀgore tsî Elob ai ǃanu gagaba nî ǂan îb nē ǂâidi tsî tsâsiga mâǃoas ǀkha hui da. Nēsa da ga dī o, ob ge Jehovaba nî mû ǁîb ǃanu gagaba sida xu nî ūbe xū-e da dī ǂgao tama hâsa.​—Efe. 4:30.

13. Mati da ǃanu gagaba da ūba hâ ǃgôaǃgâsiba a ǀgaiǀgai ǁkhā?

¹³ ǃAnu gagab sida ǁaeb ǃnâ ra dī xūn xa da ga ǂâi o, o da ge nî ganganxa. Jesub ge ǀhomǃabab nîs aiǃâ ǁîb ǁkhāǁkhāsabegu ǃoa ge mî: “Xawe go ge sago ǃAnu Gagab di ǀgaiba nîra hō, sago ǂama nîra hāba; o go ge nî ti ǃkhō-amao . . . ǃhūbaib di ǀams kōse.” (ǃNǃkh. 1:8) Nē mîdi ge nētsē ra dīǀoaǀoahe. ǃAnu gagab huib ǀkhan ge ǁkhaisa miluins xa ǃnāsa khoena ǃhūbaib ǂhabase Jehovaba ra ǃoaba. Gagasi paradais tsîna da ge ūhâ, Elob ǃanu gagab saora ǀgauga ūhâs ǀkha ra hui da amaga: ǀNammi, ǃgâiaǂgaob,ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǃkhō-oasens tsîna. Nē ǀgaugu ge ‘gagab di  ǂûga’ ra kuruǂui. (Gal. 5:22, 23) ǃAnu gagab ge kaise ǀō-aisa ǀkhaeba.

14. Mâ mûhe ǁoasa ǂkhâǃnâsa da ūhâ aoǁnâ sîsenni ǃnâ da ra ǁhao ǁaeb ai?

¹⁴ Jehovab, Jesub tsî ǀhomǃgāgu ǀkha “sîsenǀhao-aose” is aiǂhanuba da ge ūhâ. (2Kor. 6:1) Nēs ǃnâ da ge aoǁnâ sîsen-e da ra dī ǁaeb hoaba ra ǁhao. Paulub ge ǁîb tsî naun ǁîb ǀkha aoǁnâ sîsenni ǃnâ gere ǁhaon xa ge mî: “Elob di ǀhaosîsenao” da ge. (1Kor. 3:9) Xristeǁî aoǁnâ sîsennni ǃnâ da ga ǁhao o, o da ge Jesub ǀkhas tsîna ra sîsen ǀhao. Jesub ge ǁîb saosabenab ge “hoa ǁaede ǁkhāǁkhāsabedī” ti mîbas khaoǃgâ ge mî tita ge sadu “ǀkha nîra hâ.” (Mat. 28:19, 20) O ǀhomǃgāgu? “ǀAmo ǃgâiǂhôasa . . . ǁnān, ǃhūbaib ai ǁan hâna” da ra aoǁnâba hîna ǀhomǃgāgu xa ǂkhâǃnâhesa da ge kaise ra ǃgôaǃgâ.​—J.ǂHa. 14:6.

15. Jehovab sada aoǁnâ sîsenni ǃnâ ra ǀhuru ǂhâǂhâsa ǃâba ra ǁgau Elobmîs aiǁgau-e mā re.

¹⁵ ǀHomma xu da ra hō ǂkhâǃnâsa tae-e ra īǁkhā kai? Gaosib haisi amsa da ra aoǁnâ hîna di ge ǀnî ǃkhōmde ǃgâi ǂgaogu ai ǁnā tsî ra kai. (Mat. 13:18, 23) Ham-e ǁnā ǃkhōmde kai tsî ra ǂûtani kai? Jesub ge ra mî khoen ǁîb ǁkhāǁkhāsabe kai tide ti “ǁGûb ga . . . ǂgaihā” nî tama io. (Jhn. 6:44) Elobmîs ge ǃgāsa aiǁgausa nēs xa ra mā. Paulub ge Filipes ǃās ǃauga ge hâ i kaikhoede gere aoǁnâba ǁaeba ǃoa ǂâi oa re. ǁNā kaikhoedi ǀguis Lidia di ǀon hâs xas Elobmîsa tae-e ra mîsa kō re: “ǁÎsab ge ǃKhūba ǂgaoba ge khowaba, os ge Paulub xa ra mîhesa ge ǃgaoǃgâ.” (ǃNǃkh. 16:13-15) Lidias khamin ge miluindi khoena Jehovab xa ǂgaehe hâ.

16. Ham-e aoǁnâ sîsenni ǃnâ da ra hō ǃgâi ǀamǂoadi amsi koasa nî hō?

¹⁶ Ham-e aoǁnâ sîsenni ǃnâ da ra hō ǃgâi ǀamǂoadi amsi koasa nî hō? Paulub ge ǁnā dîsa ge ǃeream Korinteǁî ǀhaohâba ǃoab ge xoa o: “Tita ge ge ǂgā, tsî Apolob ge ge ǂnâ; xawe Elob ge ǁîsa ge ǀom kai. Ob ge xū tama, ǂgā rab karao, ǂnâ rab karao; xawe Elob, ǀom kai rab ǀguib.” (1Kor. 3:6, 7) ǃGâi ǀamǂoadi hîna da aoǁnâ sîsenni ǃnâ ra hō di ǃgao da ge Jehovaba koasa nî mā.

17. Mati da Elob, Xristub tsî ǀhomǃgāgu ǀkha da a “ǀhaosîsenao” ǃkhaisa da ra ǃgôaǃgâsa nî ǁgau?

¹⁷ Mati da Elob, Xristub tsî ǀhomǃgāgu ǀkha da a “ǀhaosîsenao” ǃkhaisa da ra ǃgôaǃgâsa nî ǁgau? Nēsa da ge ôasase da ga aoǁnâ sîsenni ǃnâ ǁhao o, o nî ǁgau. Nēsa da ge ǃkharagagu ǀgaugu ǃnâ a dī ǁkhā aiǁgause “hoan mûǁae tsî . . . omdi” ǃnâ. (ǃNǃkh. 20:20) ǂGui khoen ge khoena ǀhao-ūn ra ba ǃhoa-us xas tsîna ǃgâibahe. ǀHao-ūn ra khoenan ge ǃgâise ǁgamî tsî ra ǁgam-ū tsâ. Khoe-i ga ǁgam ǂgao o, on ge ǃgâi ǀgaub ǃnâ Gaosib ǃgaiǂhôas xa ra ǁgam tsoatsoa.

18-19. (a) Mati da amab di ǃkhōmna ra ǂnâ? (b) Jehovab ge Elobmîsa ra ǁkhāǁkhāsen khoe-e a hui ǀgauba ra ǁgau aiǁgau-e mā re.

¹⁸ ‘Elob di ǀhaosîsenaon’ ase da ge amab di ǃkhōmde ǃhanas ǀguisa dī tama hâ xawe da ge nî ǂnâ. Khoe-i ga ǃgâiǃgâibasensa ǁgau o, o da ge ǁnā khoe-i tawa nî oasi i da ǁnā khoe-i ǀkha ǃhoa tamas ka io da ge ǀkhara ǃgâsa-e nî mîba i-i ǁnā  khoe-e sari tsî Elobmîs ǁkhāǁkhāsa sī tsoatsoa. Jehovab khoe-i di ǂgaob tsî ǂâiǀgauba ra ǀkharaǀkhara ǀgauba da ra mû o, o da ge kaise ra ǂkhî.

¹⁹ Raphalalanib, Suid Afrikab ǃnâ ra hâ ǃgai-aob di aiǁgausa ǃoa kō re. ǁÎb ge Elobmîsa xub gere ǁkhāǁkhāsen xūn xa kaise ge ǃgâibahe i. Xaweb ge kaise ge ǃgombahe i Elobmîs ǁōǂoa ge kai ǁgûn ǀkha ǃhoas xa ra mî amaba ūǃoasa. (Deu. 18:10-12) Xaweb ge ge mā-am îb Eloba ǂaub ǀkha ǁîb ǂâiǀgauba ǀkharaǀkhara. Egab ge ǃgai-aosisa ge ǀû, ǁnāpaxū ǀguib marisise gere ǂkhâǃnâsen xawe. Raphalalanib hîna nēsisa 60 kurixab ge ra mî: “Kaise ta ge Jehovab di ǀHûǀguitimî-aona ra gangan ǂgui ǀgaugu hînan ge huideb ǃgao, sîsen-e hōs ǃgaos tsîna. Hoan ǂam-ai ta ge Jehovaba ra gangan ti ûiba ǃanuǃanus ǀkhab ge hui te ǃkhais ǃaroma tsî ta nēsi ǁāǁnâ-e tsî ǀHûǀguitimî-ao-i ase aoǁnâ sîsenni ǃnâ a ǁhao ǁkhā ǃkhaisa.”

20. Tae-e du ra mîǁgui dīsa?

²⁰ Nē ǁkhāǁkhāǃâs ǃnâ da ge haka ǀkhaegu hîna da a mû ǁoagu xa goro ǃhoa. Nēn hoan ǃnâs ge Jehovab ǀkha ǀgū ǀhōsagusisa ūhâsa a kai ǀkhae. Jehovab ǀkha da ga ǀgū ǀhōsagusisa ūhâ o da ge nau ǀkhaega xu a ǀama ǁkhā—ǀgores ǃnâ-ū ǁîb ǀkha ǃhoas, ǁîb ǃanu gagab xa hui-es tsî ǀhomsi huiba hōs sida aoǁnâ sîsenni ǃnâ. Nē mûhe ǁoasa ǀkhaega da ūba hâ ǃgôaǃgâsiba da ge ra ǀgaiǀgai ǂgao. Tsî da ge Jehovaba hoaǁae ra gangan ǂgao sida ǂoaǂamsa ǀhōsab a ǃkhais ǃaroma.