1. UJesu wathini ngenotho yezulwini?

KAYISIZO zonke izipho esingazibona. Iqiniso yikuthi lezo eziqakatheke kakhulu ngesingaziboniyo. ENtshumayelweni Yasentabeni uJesu wakhuluma ngenotho yezulwini engcono kakhulu kulenotho yemhlabeni. Waphinda wathi: “Lapho okulenotho yakho khona, yikho lapho okuzakuba lenhliziyo yakho khona.” (Mat. 6:19-21) Inhliziyo yethu izasifuqa ukuthi sidinge izinto esiziqakathekisa kakhulu. ‘Sibuthelela inotho ezulwini’ ngokwenza konke okusemandleni ethu ukuthi sithokozise uNkulunkulu. UJesu wathi inotho enjalo ngeke itshabalale kumbe intshontshwe.

2. (a) Ngokwalokho okutshiwo ku-2 Khorinte 4:17, 18, uPhawuli usikhuthazani? (b) Sizafunda ngani esihlokweni lesi?

² Umphostoli uPhawuli usikhuthaza ukuthi ‘sithi nhlo amehlo ethu ezintweni esingaziboniyo.’ (Bala u-2 Khorinte 4:17, 18.) Izinto lezi esingaziboniyo ngamagugu agoqela izibusiso esizazithola emhlabeni omutsha. Esihlokweni lesi sizafunda ngamagugu amane esingawaboniyo esingaba lawo khathesi. Amagugu lawo yibungane loNkulunkulu, umthandazo, umoya ongcwele lendlela uJehova, uJesu lezingilosi abasisekela ngayo ekutshumayeleni. Sizabona lokuthi singatshengisa njani ukuthi siyawaqakathekisa amagugu la.

3. Yiliphi igugu esingaliboniyo eliqakatheke kulawo wonke futhi kuyini okwenza sibe lalo?

³ Igugu esingaliboniyo eliqakatheke kulawo wonke yikuba ngabangane bakaJehova uNkulunkulu. (Jak. 2:23) Kodwa  kungenzakala njani ukuthi uJehova abe ngumngane wabantu abalesono asale elokhu engcwele ngendlela epheleleyo? Lokhu kwenziwa yikuthi inhlawulo kaJesu ‘isusa isono somhlaba.’ (Joh. 1:29) UJehova wayekwazi ukuthi inhloso yakhe yokuthi asindise abantu esebenzisa uJesu yayingasoze yehluleke loba sekutheni. Yikho wayengaba ngumngane wabantu abaphila uKhristu engakafi.—Rom. 3:25.

4. Yiwaphi amanye amadoda aphila uJesu engakabuyi emhlabeni ayengabangane bakaNkulunkulu?

⁴ Ake sixoxe ngamanye amadoda aphila uJesu engakabuyi emhlabeni aba ngabangane bakaNkulunkulu. U-Abrahama wayelokholo oluqinileyo. Kwathi sekudlule iminyaka engaphezu kwengu-1 000 efile, uJehova wambiza ngokuthi ‘ungumngane wakhe.’ (Isaya. 41:8) Lokhu kutshengisa ukuthi lanxa abantu bengafa, uJehova uyabe elokhu ebabona bengabangane bakhe abaseduze. U-Abrahama ulokhu ephila enkumbulweni kaJehova. (Luk. 20:37, 38) Omunye nguJobe. Ngesikhathi izingilosi zibuthene ezulwini, uJehova wakhuluma amazwi atshengisa ukuthi uyamthemba uJobe. Wathi ‘kalasici, uqondile, uyindoda emesabayo uNkulunkulu futhi exwaya okubi.’ (Jobe. 1:6-8) UDanyeli wakhonza uNkulunkulu ethembekile okweminyaka engaba ngu-80 eselizweni elalilabantu abangamkhonziyo uJehova. UNkulunkulu wayembona njani uDanyeli? Izingilosi zayiqinisekisa kathathu indoda leyo eyayisigugile ukuthi uNkulunkulu ‘uyayiqakathekisa kakhulu.’ (Dan. 9:23; 10:11, 19) Kasithandabuzi ukuthi uJehova uyakufuna sibili ukuvusa abangane bakhe abathandekayo.—Jobe. 14:15.

5. Kumele senzeni ukuze sibe ngabangane bakaJehova abaseduze?

⁵ Lamuhla kulamamiliyoni abantu angabangane bakaJehova abaseduze. Sitsho njalo ngoba amadoda, labesifazana labantwana abanengi emhlabeni jikelele batshengisa ngendlela abaphila ngayo ukuthi bayafuna sibili ukuba ngabangane bakaNkulunkulu. UJehova ‘ubabeka ekhwapheni lakhe labo abaqotho.’ (Zaga. 3:32) Okwenza abantu laba babe ngabangane bakhe yikuthi balokholo enhlawulweni kaJesu. Siyenelisa ukuba ngabangane bakaJehova lokuzinikela kuye futhi sibhabhathizwe ngenxa yenhlawulo. Nxa singakwenza lokhu sizaba phakathi kwamamiliyoni amaKhristu azinikeleyo njalo abhabhathizwa ‘asekhwapheni’ loMuntu omkhulu kulabo bonke.

6. Singatshengisa njani ukuthi siyakuqakathekisa ukuba ngabangane bakaNkulunkulu?

⁶ Singatshengisa njani ukuthi siyakuqakathekisa ukuba ngabangane bakaNkulunkulu? U-Abrahama loJobe bahlala bethembekile kuNkulunkulu okweminyaka edlula 100. Kumele sibalingisele ngokuhlala sithembekile kuJehova kungelani lokuthi sesimkhonze okweminyaka emingaki emhlabeni lo omdala. Kanti njalo kumele silingisele uDanyeli ngokuqakathekisa ubungane bethu loNkulunkulu ukwedlula impilo yethu. (Dan. 6:7, 10, 16, 22) UJehova uzasincedisa siqinisele kuloba yibuphi ubunzima esihlangana labo ukuze sihlale singabangane bakhe.—Flp. 4:13.

7. (a) Ngokwalokho okutshiwo kuZaga 15:8, uJehova uzwa njani ngemithandazo yethu? (b) UJehova uyiphendula njani imithandazo yethu?

⁷ Elinye igugu esingaliboniyo ngumthandazo. Abangane abaseduze bayakuthanda ukuxoxelana izinto abazicabangayo lendlela abazizwa ngayo. Lokhu yikho okwenzakala phakathi kwethu loJehova. UJehova ukhuluma lathi ngeLizwi lakhe futhi yilo alisebenzisa ukusitshela akucabangayo  lendlela azizwa ngayo. Thina sikhuluma laye ngomthandazo njalo siyenelisa ukumtshela esikucabangayo lendlela esizizwa ngayo. Kuyamthokozisa ukulalela imithandazo yethu. (Bala iZaga 15:8.) UJehova kaphonguyilalela kodwa uyayiphendula ngoba unguMngane osithandayo. Ngezinye izikhathi uyaphangisa ukusiphendula ikanti ngezinye kungadingeka ukuthi siqhubeke sikhuleka ngendaba ethile. Lanxa kunjalo kumele sibe leqiniso lokuthi uzasiphendula ngesikhathi esifaneleyo langendlela engcono kulazo zonke. UNkulunkulu angasiphendula ngendlela esingayikhangelelanga. Ngokwesibonelo, kulokuthi asuse ubunzima angasinika ukuhlakanipha lamandla okuthi ‘siqinisele.’—1 Khor. 10:13.

8. Singatshengisa njani ukuthi siyasiqakathekisa isipho sokuthandaza?

⁸ Singatshengisa njani ukuthi siyasiqakathekisa isipho lesi esiligugu? Enye indlela yikulalela umlayo wokuthi ‘sithandaze kokuphela.’ (1 Thes. 5:17) UJehova kasibambi ngamandla ukuthi sikhuleke kodwa uyayihlonipha inkululeko yethu yokuzikhethela futhi usikhuthaza ukuthi ‘siphikelele ekuthandazeni.’ (Rom. 12:12) Yikho sitshengisa ukuthi siyasiqakathekisa isipho lesi ngokuthandaza kanengi ngelanga. Emthandazweni yethu kakumelanga siyekele ukumbonga lokumdumisa uJehova.—Hubo. 145:2, 3.

9. Omunye umfowethu uthini ngokuthandaza futhi wena uthini?

⁹ Nxa sesikhonze uJehova okweminyaka eminengi futhi sabona indlela aphendula ngayo imithandazo yethu, kumele sikuqakathekise kakhulu ukuthandaza. Ngokwesibonelo, umfowethu okuthiwa nguChris oseleminyaka engu-47 esenkonzweni yesikhathi sonke uthi: “Ngiyakukholisa ukuvuka kusesele ukuze ngikhuleke kuJehova. Kumnandi ukukhuluma loJehova ilanga lisithi chatsha futhi yonke into ikhanya inhle. Lokhu kwenza ngimbonge ngazo zonke izipho asinike zona, okugoqela lesibusiso sokuthandaza. Ekupheleni kwelanga ngithi sengithandazile ngilale umzwangedwa wami ungangithonisisi.”

10. Kungani kumele siwuqakathekise umoya ongcwele?

¹⁰ Umoya ongcwele ngesinye isipho esingasiboniyo okumele sisiqakathekise. UJesu wasikhuthaza ukuthi sihlale sithandaza sicela umoya ongcwele. (Luk. 11:9, 13) UJehova usebenzisa umoya ongcwele ukusinika “amandla amakhulu futhi angajayelekanga.” (2 Khor. 4:7; ImiSeb. 1:8) Umoya ongcwele uyasinceda ukuthi siqinisele kuloba yibuphi ubunzima esingaba phakathi kwabo.

11. Umoya ongcwele usinceda njani?

¹¹ Umoya ongcwele uyathuthukisa iziphiwo esingabe silazo ukuze senelise ukwenza imisebenzi esiyiphiwe nguNkulunkulu. Yikho siyakwazi ukuthi umoya ongcwele yiwo kuphela osinceda ukuthi siphumelele enkonzweni kaNkulunkulu.

12. Ngokwalokho okutshiwo kuHubo 139:23, 24, singathandaza sicela ukuthi umoya ongcwele usincedise senzeni?

¹² Enye indlela esitshengisa ngayo ukuthi siyawuqakathekisa umoya ongcwele yikuthandaza sicela ukuthi usincedise sizihlole ukuze sibone langabe silemicabango loba izifiso ezimbi. (Bala iHubo 139:23, 24.) Nxa singenza njalo, uJehova uzawusebenzisa ukuthi sinanzelele imicabango emibi kumbe izifiso ezimbi esingabe silazo. Singavele sikunanzelele lokhu, kuyabe sekumele sithandaze sicela umoya ongcwele ukuthi usinike amandla okulwisana lakho. Nxa sisenza njalo, uJehova uzabona ukuthi kasifuni ukwenza loba yini ezabangela ukuthi angasincedisi ngomoya wakhe.—Efe. 4:30.

13. Singenzani ukuthi singezelele indlela esiwuqakathekisa ngayo umoya ongcwele?

¹³ Singengezelela indlela esiwuqakathekisa ngayo umoya ongcwele ngokucabangisisa ngalokho umoya lo okwenzayo lamuhla. UJesu engakabuyeli ezulwini, watshela abafundi bakhe wathi: ‘Lizakwamukela amandla nxa umoya ongcwele ufika kini, njalo lizakuba ngofakazi bami kuze kuyefika emaphethelweni omhlaba.’ (ImiSeb. 1:8) Amazwi la agcwaliseka ngendlela emangalisayo lamuhla. Umoya ongcwele  uncedise ekuqoqeni abantu abedlula 8,6 miliyoni emhlabeni wonke ukuthi babe zinceku zikaJehova. Kanti njalo simanyene futhi silokuthula ngoba umoya ongcwele uyasinceda ukuthi sibe lothando, ukuthokoza, ukuthula, ukubekezela, umusa, ubuhle, ukholo, ubumnene kanye lokuzibamba. Ubuntu bonke lobu bubumba “izithelo zomoya.” (Gal. 5:22, 23) Umoya ongcwele uyisipho esilugugu sibili!

14. Ngobani abasincedisayo esingababoniyo nxa sisekutshumayeleni?

¹⁴ Silelinye igugu esingaliboniyo. Igugu leli ‘yikusebenza’ loJehova, loJesu lezingilosi. (2 Khor. 6:1) Sisebenza labo loba nini nxa sisemsebenzini wokwenza abafundi. UPhawuli wakhuluma ngaye lalabo abenza umsebenzi lo wathi: “Thina sisebenza loNkulunkulu.” (1 Khor. 3:9) Siphinda sisebenze loJesu nxa sisekutshumayeleni. Khumbula ukuthi esetshele abalandeli bakhe ukuthi ‘benze abantu bezizwe zonke babe ngabafundi’ wathi: “Ngizabe ngilani.” (Mat. 28:19, 20) Izingilosi zona ke? Kuyisibusiso sibili ukuthi ziyasiqondisa nxa simemezela ‘izindaba ezinhle zaphakade kulabo abahlala emhlabeni.’—Isam. 14:6.

15. Landisa isibonelo esiseBhayibhilini esitshengisa indlela eqakathekileyo uJehova asincedisa ngayo ekutshumayeleni.

¹⁵ Eyinye inhlanyelo esiyihlanyelayo iwela enhliziyweni zabantu abalalelayo futhi ikhule. (Mat. 13:18, 23) Ngubani owenza inhlanyelo le ikhule njalo ithele? UJesu wachasisa ukuthi akulamuntu ongaba ngumlandeli wakhe ngaphandle kokuba ‘edonswe nguBaba.’ (Joh. 6:44) IBhayibhili lilesibonelo salokhu. Usakhumbula uPhawuli aze atshumayeze iqembu labesifazana elalingaphandle kwedolobho laseFiliphi? Zwana ukuthi iBhayibhili lithini ngomunye wabesifazana labo okuthiwa nguLidiya: “UJehova wayivula kakhulu inhliziyo yakhe ukuze emukele okwakutshiwo nguPhawuli.” (ImiSeb. 16:13-15) Kulamamiliyoni abantu uJehova awadonsileyo njengoLidiya.

16. Ngubani okumele adunyiswe ngempumela emihle esiba layo ekutshumayeleni?

¹⁶ Ngubani sibili okumele adunyiswe ngempumela emihle esiba layo ekutshumayeleni? UPhawuli wawuphendula umbuzo lo ngesikhathi ebhala amazwi la ngebandla laseKhorinte: “Mina ngahlanyela, u-Apholo wathelela, uNkulunkulu yena waqhubeka ekhulisa. Yikho ohlanyelayo lalowo othelelayo kabasilutho, kodwa okumele adunyiswe nguNkulunkulu okhulisayo.” (1 Khor. 3:6, 7) Kumele silingisele uPhawuli ngokuhlala sidumisa uJehova ngaloba yiphi impumela emihle esiba layo ekutshumayeleni.

17. Singatshengisa njani ukuthi siyakuqakathekisa ‘ukusebenza’ loJehova, loKhristu lezingilosi?

¹⁷ Singatshengisa njani ukuthi siyakuqakathekisa ‘ukusebenza’ loJehova, loKhristu lezingilosi? Singatshengisa ngokwenza konke okusemandleni ethu ukutshela abanye izindaba ezinhle. Kulendlela ezinengi esingakwenza ngazo lokhu, ezinye zakhona ‘yikufundisa obala lasendlini ngendlu.’ (ImiSeb. 20:20) Abanengi bayakukholisa ukutshumayela nxa kuvela ithuba. Nxa bangahlangana lomuntu abangamaziyo, bayambingelela ngendlela elobungane futhi bazame ukuxoxa laye. Nxa umuntu lowo elesifiso sokuxoxa, bayazama ukumtshela umlayezo ophathelane loMbuso.

18-19. (a) Siyithelela njani inhlanyelo yeqiniso? (b) Landisa indaba etshengisa indlela uJehova ancedisa ngayo umuntu owayefunda iBhayibhili.

¹⁸ Njengoba ‘sisebenza loNkulunkulu’ akumelanga siphonguhlanyela nje iqiniso,  kumele siphinde silithelele. Nxa singathola umuntu olesifiso sokufunda, siyazama ukuphindela kuye kumbe ukuhlela ukuthi othile aphindele elenhloso yokuqalisa isifundo seBhayibhili. Siyathokoza nxa sibona uJehova encedisa umuntu ofunda iBhayibhili ukuthi atshintshe indlela acabanga ngayo labona ngayo izinto.

¹⁹ Ake sixoxe ngoRaphalalani weSouth Africa owayeyinyanga. Wayekuthanda ayekufunda eBhayibhilini kodwa wakuthola kunzima kakhulu ukwamukela lokho iLizwi likaNkulunkulu elikutshoyo ngokukhuluma lamadlozi. (Dute. 18:10-12) Ngokuhamba kwesikhathi wavumela uNkulunkulu ukuthi abumbe indlela ayecabanga ngayo. Ekucineni wayekela ukuba yinyanga lanxa kwakuyiyo yodwa indlela ayeziphilisa ngayo. URaphalalani oseleminyaka engu-60 uthi: “Ngiyababonga kakhulu oFakazi bakaJehova ngokunginceda ngendlela ezinengi okugoqela ukungincedisa ukuthi ngithole umsebenzi. Kodwa engimbonga kakhulu nguJehova ngokunginceda ukuthi ngitshintshe impilo yami ukuze ngenelise ukutshumayela nginguFakazi wakhe obhabhathiziweyo.”

20. Uzimisele ukwenzani?

²⁰ Esihlokweni lesi sifunde ngamagugu amane esingawaboniyo. Eliqakatheke kulawo wonke yikuba ngabangane bakaJehova abaseduze. Ubungane lobo yibo obenza sithole amanye amagugu. Amagugu lawo yikuthandaza, umoya ongcwele lokusebenza loJehova, loJesu lezingilosi ekutshumayeleni. Kasizimiseleni ukuwaqakathekisa kakhulu amagugu la esingawaboniyo. Kanti njalo kasingayekeli ukumbonga uJehova ngokuba nguMngane omuhle kangaka.