1. Hadia niwaʼö Yesu sanandrösa ba harato ba zorugo?

LÖ FEFU harato tola taʼila höröda. Sindruhunia, harato fondrege zebua böli yaʼia daʼö harato si lö oroma. Ba Huhuo ba Hili, ifatunö Yesu sanandrösa ba harato ba zorugo, sabölö ebua böli moroi ba harato si so ba gulidanö. Imane göi Yesu, ”Hezo so haratomö, ba daʼö so dödöu.” (Mat. 6:19-21) Na so zebua boli ba wamaigida, hasambalö taforege ba wangokhögö yaʼia. Tola tahöna khöda ”harato ba zorugo” na taforege ba wangokhögö töi si sökhi föna Lowalangi. Iwaʼö Yesu wa tebai tekiko mazui latagö harato simane daʼö.

2. (a) Ba 2 Korindro 4:17, 18, hadia mene-mene nibeʼe Waulo khöda? (b) Hadia nitutunöda ba artikel daʼa?

² Iʼamenesi ita sinenge sotöi Faulo enaʼö ’tafaigi . . . zi lö oroma.’ (Baso 2 Korindro 4:17, 18.) Ba harato si lö oroma andre, farahu ba daʼö howu-howu nitemada dania ba gulidanö si bohou si no ifabuʼu Lowalangi. Hizaʼi ba artikel daʼa, tatutunö öfa harato si lö oroma si tola tatema iadaʼa. Si öfa harato andre, yaʼia daʼö fahuwusa khö Lowalangi, fangandrö, fanolo moroi ba geheha niʼamoniʼö, hegöi fotuhini nitemada moroi khö Yehowa, Yesu, hegöi ira malaʼika. Tatutunö göi hewisa lala ba wangoromaʼö wa taʼameʼegö tödö harato andrö.

3. Hadia harato si lö oroma fondrege zebua böli, ba hana wa tola taʼokhögö daʼö?

³ Harato si lö oroma fondrege zebua böli, yaʼia daʼö fahuwusa khö Lowalangi Yehowa. (Zin. 25:14) Hana wa lö raʼiö Yehowa hewaʼae na fahuwu ia ba niha gulidanö sebua horö? Börö me höli nibeʼe Yesu andrö ’zangeheta horö gulidanö’. (Yoh. 1:29) Fatua lö mate Yesu, no iʼila Yehowa wa hasambalö anau gölö Yesu irugi waʼamatenia irege tola teʼorifi niha gulidanö. Daʼö mbörö wa tola fahuwu Yehowa ba niha gulidanö, sauri fatua lö si mate Keriso.​—Rom. 3:25.

4. Tutunö haniha manö duma-duma niha si fahuwu khö Lowalangi fatua lö tohare Yesu ba gulidanö.

 ⁴ Fatua lö möi Yesu ba gulidanö, so ösa niha si no tobali si fahuwu khö Lowalangi. Duma-dumania, Aberahamo. Yaʼia andrö samösa ndra matua sangokhögö famati saro. Töra 1.000 fakhe me no aefa mate Gaberahamo, iwaʼö Yehowa wa no si fahuwu khönia Gaberahamo. (Yes. 41:8) Andrö, na fahuwu ita khö Lowalangi, lö tebulö tobali ita si fahuwu khönia hewaʼae na no mate ita. Lö irai iʼolifugö Gaberahamo Yehowa. (Luk. 20:37, 38) Tanö böʼönia zi fahuwu khö Lowalangi yaʼia daʼö Yobi. Me owulo ndra malaʼika ba zorugo, omuso sibai dödö Yehowa ba wanutunö sanandrösa khö Yobi. Iwaʼö Yehowa wa Yobi andrö no niha ’satulö, sadölö tödö, sangataʼufi Lowalangi, ba si faʼudu ba zi lö sökhi’. (Yob. 1:6-8) Fahuwu göi Danieli khö Lowalangi. Hewaʼae na toröi ia ba gotalua niha si lö mamosumange Lowalangi mato 80 fakhe faʼara, lö faröi ia ba wamosumange Lowalangi. Hewisa dödö Yehowa khö Danieli? Tölu kali möi malaʼika ba wangondrasi Danieli si no alawa döfi ba wamaduhuʼö ba dödönia wa ’iʼomasiʼö’ ia Lowalangi. (Dan. 9:23; 10:11, 19) Tola faduhu dödöda wa humulu sibai dödö Yehowa ba wanusugi fefu zi fahuwu khönia si no mate.​—Yob. 14:15.

5. Hadia zinangea tafalua enaʼö tola fahuwu ita khö Yehowa?

⁵ Hawaʼato niha si lö moʼahonoa si fahuwu khö Yehowa iadaʼa? So zuta waʼatora. Tola taʼila daʼö börö me ato ndra matua, ira alawe, hegöi iraono ba zi sagörö ulidanö, sangoromaʼö moroi ba mbua-buara wa sindruhu-ndruhu fahuwu ira khö Lowalangi. Yehowa no ’si fahuwu ba zadölö tödö’. (Gamd. 3:32) Tola fahuwu ira khö Yehowa börö me mamati ira ba höli nibeʼe Yesu. Börö höli andrö, tola talulu waʼaurida khö Yehowa ba tebayagö idanö. Ba ginötö tafalua zi dombua lala si tohude andrö, no farahu ita ba niha Keriso si zuta faʼato si no tebayagö idanö, ”si fahuwu” khö Wondrege Zabölö ba mbanua si yawa awö danö!

6. Hewisa wangoromaʼöda wa taʼameʼegö tödö wahuwusada khö Lowalangi?

⁶ Hewisa lalada ba wangoromaʼö wa taʼameʼegö tödö wahuwusada khö Lowalangi? Moguna taʼoʼö duma-duma Gaberahamo hegöi Yobi si lö faröi khö Yehowa ba zi töra otu fakhe. Andrö moguna lö faröi ita khö Yehowa, he na awena mazui na no ara tafosumange ia. Ba simane Danieli, moguna abölö taʼameʼegö tödö wahuwusada khö Lowalangi moroi ba waʼaurida samösa. (Dan. 6:7, 10, 16, 22) Lö tebulö itolo ita Yehowa irege anau gölöda hewaʼae na oya wanandraigö salua khöda. Na tafalua daʼö, itugu aro wahuwusada khönia.​—Fil. 4:13.

7. (a) Moloʼö Gamaedola 15:8, hewisa dödö Yehowa na irongo wangandröda? (b) Hewisa Yehowa ba wameʼe fanema li ba wangandröda?

⁷ Harato tanö böʼö si lö oroma yaʼia daʼö fangandrö. Darua niha si fahuwu, si toʼölönia omasi latutunö khö nawöra zamösana hadia niʼera-erara hegöi nirasoira. Hadia simane daʼö göi wahuwusada khö Yehowa? Yaʼia! Fahuhuo göi khöda Yehowa. Ba Daromalinia Sura Niʼamoniʼö, ifatunö khöda hadia niʼera-erania hegöi nirasoinia. Fahuhuo ita khö Yehowa ba wangandrö. Na mangandrö ita tola tatutunö hadia niʼera-erada hegöi nirasoida. Omasi Yehowa ba wamondrondrongo fangandröda. (Baso Gamaedola 15:8.) Hizaʼi, börö me Si Fahuwu khöda Yehowa, tenga ha ifondrondrongo manö wangandröda, omasi göi ibeʼe wanema li. Itaria alio tatema wanema li moroi ba wangandröda. Hizaʼi itaria, moguna lö aetu-aetu mangandrö ita enaʼö tola tatema wanema linia. Hewaʼae simanö, tola faduhu dödöda wa hasambalö ifondrondrongo wangandröda ba ginötö si tefaudu hegöi ba lala si sökhi. Sindruhu sa wa fanema  li nibeʼe Yehowa itaria tenga simane nitötönada. Duma-dumania, te lö iʼanemaiʼö iheta gabula dödö salua khöda. Hizaʼi, ibeʼe khöda waʼatua-tua ba faʼabölö enaʼö ’anau gölöda ba wanaögö yaʼia’.​—1 Kor. 10:13.

8. Hewisa wangoromaʼöda wa taʼameʼegö tödö wangandrö?

⁸ Hewisa wangoromaʼöda wa taʼameʼegö tödö mbuala fangandrö? Sambua lala si tola tafalua yaʼia daʼö taʼoʼö mene-mene moroi ba Zura Niʼamoniʼö ba lö taböhöli wangandrö. (1 Tes. 5:17) Lö ifaso ita Yehowa enaʼö talau mangandrö khönia. Tobali, iʼameʼegö tödö wangefa niʼokhögöda ba wotatugöi hadia zinangea tafili, ba ifarou ita enaʼö ’lö tafamalö-malö wangandrö’. (Rom. 12:12) Daʼö mbörö wa moguna taʼaseseʼö mangandrö khönia ero maʼökhö. Na tafalua daʼö, no taforomaʼö wa taʼameʼegö tödö mbuala andrö. Ba böi olifu ita ba wangandrö saohagölö khö Yehowa ba tasuno ia ba ginötö talau mangandrö.​—Zin. 145:2, 3.

9. Hewisa dödö zi samösa dalifusöda ira matua sanandrösa ba wangandrö, ba hewisa göi dödömö?

⁹ Börö me tafosumange Yehowa, tola tarasoi samösa hewisa wameʼenia fanema li ba wangandröda. Andrö, na itugu ara tafosumange Yehowa, moguna göi itugu taʼameʼegö tödö mbuala ba wangandrö. Daʼö nirasoi Chris, samösa dalifusöda ira matua si no mangai halöwö safönu inötö ba zi 47 fakhe faʼara. Imane wangumaʼö, ”Omuso sibai dödögu ero na maoso ndraʼo sihulö wongi, ba ulau mangandrö khö Yehowa. Si toʼölönia, fahuhuo ndraʼo khö Yehowa na awena tumbu luo ba ibörögö oroma namo mbanua. No solohe faʼohahau dödö daʼö. Daʼö zamarou tödögu ba wangandrö saohagölö khö Yehowa ba ngawalö mbuala si no ibeʼe khögu, simane töi si sökhi ba wangondrasi yaʼia ba wangandrö. Me no aefa mangandrödo ba zi bongi, ohahau dödögu wemörö börö me uʼokhögö dödö side-ide si lö sinegu.”

10. Hana wa moguna taʼameʼegö tödö geheha niʼamoniʼö moroi khö Lowalangi?

¹⁰ Buala tanö böʼö sinangea taʼameʼegö tödö yaʼia daʼö eheha niʼamoniʼö moroi khö Lowalangi. Iʼamenesi ita Yesu enaʼö lö taböhöli  ba wangandrö eheha niʼamoniʼö khö Lowalangi. (Luk. 11:9, 13) Iʼogunaʼö gehehania Yehowa ba wameʼe khöda faʼabölö ”sahöli-höli dödö”. (2 Kor. 4:7; Hal. 1:8) Börö wanolo geheha niʼamoniʼö, tola anau gölöda ba wanaögö abula dödö salua khöda.

11. Hewisa geheha niʼamoniʼö ba wanolo yaʼita?

¹¹ Itolo ita eheha niʼamoniʼö ba wamalua halöwöda ba wamati. Itolo göi ita ba wondrouʼö faʼatua-tua hegöi nekhe-nekhe danga niʼokhögöda, enaʼö tola tafalua halöwö si so ba organisasi Lowalangi. Börö daʼö, na mofozu ita ba wamalua halöwöda, faduhu dödöda wa tola alua daʼö börö wanolo geheha niʼamoniʼö.

12. Moloʼö Zinunö 139:23, 24, hadia zi tola taʼandrö khö Yehowa?

¹² Lala tanö böʼö nifaluada ba wangoromaʼö wa taʼameʼegö tödö geheha niʼamoniʼö moroi khö Lowalangi, yaʼia daʼö na taʼandrö wanolo moroi khö Yehowa ba wamareso hadia so khöda gera-era si lö sökhi hegöi isö-isö dödö si fasala. (Baso Zinunö 139:23, 24.) Na taʼandrö daʼö, tola iʼogunaʼö gehehania Yehowa, irege tola taʼila hadia so khöda gera-era mazui isö-isö dödö si fasala. Aefa daʼö, na no taʼila wa so khöda gera-era mazui isö-isö dödö si fasala, moguna talau mangandrö enaʼö iʼabölöʼö ita eheha niʼamoniʼö ba wolawa yaʼia. Na tafalua daʼö, no taforomaʼö wa no tahalö gangetula enaʼö lö tafalua gamuata si lö sökhi irege lö saʼae iʼogunaʼö gehehania Yehowa ba wanolo yaʼita.​—Ef. 4:30.

13. Hewisa enaʼö tola itugu taʼameʼegö tödö geheha niʼamoniʼö?

¹³ Tola itugu taʼameʼegö tödö geheha niʼamoniʼö na taʼangeragö hadia zi no ifalua eheha niʼamoniʼö ba götöda iadaʼa. Fatua lö möi Yesu ba zorugo, imane khö ndra nifahaʼönia, ”Mitema dania waʼabölö geheha niʼamoniʼö si möi khömi, ba tobali ami samaduhuʼö khögu . . . irugi wondrege danö.” (Hal. 1:8) Daʼö zalua ba götöda iadaʼa. Börö wanolo geheha niʼamoniʼö, so mato walu zuta amatonga niha ba zi sagörö ulidanö si no tobali samosumange Yehowa. Tarasoi göi waʼafatalifusöta safönu faʼahono dödö, börö me itolo ita eheha niʼamoniʼö ba wangokhögö mbua-bua si sökhi, simane  faʼomasi, faʼomuso dödö, faʼohahau dödö, faʼebolo dödö, faʼasökhi dödö, faʼasökhi, famati, falöʼalio mofönu, ba fanaha tödö. Fefu gamuata andre no ”bua-bua geheha”. (Gal. 5:22, 23) Sindruhu-ndruhu wa no buala sebua böli geheha niʼamoniʼö!

14. Haniha manö zotuhini yaʼita ba ginötö tafalua halöwö ba wombaliʼö nifahaʼö?

¹⁴ Buala sebua böli tanö böʼö niʼokhögöda yaʼia daʼö töi si sökhi tobali si ”falulu fohalöwö” khö Yehowa. (2 Kor. 6:1) Falulu fohalöwö ita khönia ero na tafalua halöwö ba wombaliʼö nifahaʼö. Iwaʼö Faulo wa yaʼia hegöi niha si fao khönia ba wamalua halöwö ba wombaliʼö nifahaʼö, no ’si falulu fohalöwö khö Lowalangi’. (1 Kor. 3:9) Falulu fohalöwö göi ita khö Yesu na tafalua halöwö ba wombaliʼö nifahaʼö. Me no aefa ifaretakö ndra soloʼö yaʼia ba wombaliʼö nifahaʼö fefu niha moroi ba ngawalö soi, ifabuʼu khöra imane, ”Fao khömi ndraʼo.” (Mat. 28:19, 20) Hewisa göi sanandrösa khö ndra malaʼika? Taʼandrö sibai saohagölö börö me laforege ba wondröniaʼö yaʼita na taturiaigö ”duria somuso dödö si lö tebulö . . . ba ngawalö soi, ba ngawalö mado, banua, hegöi li”.​—Fam. 14:6.

15. Tutunö sambua duma-duma moroi ba Zura Niʼamoniʼö sangoromaʼö wa fao khöda Yehowa ba wamalua halöwö ba wombaliʼö nifahaʼö.

¹⁵ Hadia mbuania khöda börö me tatema wanolo moroi ba zorugo? Ba ginötö tafazaewe danömö zindruhu, so danömö saekhu ba dödö niha si sökhi ba tedou. (Mat. 13:18, 23) Haniha zamanöi tanömö andrö irege tola mowua? Itutunö Yesu wa lö hadöi niha si tola tobali soloʼö yaʼia ’na tenga nidöni Namania’. (Yoh. 6:44) So sambua duma-duma ba Zura Niʼamoniʼö sangoromaʼö daʼö. Ba zi samuza inötö, möi manuriaigö Waulo ba ngawawa ndra alawe si so baero mbanua Wilifi. Nehegö hadia niwaʼö Zura Niʼamoniʼö sanandrösa khö ndra alawe sotöi Lidia, ”Ibokai dödönia Yehowa ba wanemaʼö fehede Waulo.” (Hal. 16:13-15) Simane Lidia, so zuta waʼato niha tanö böʼö si no idöni Yehowa.

16. Haniha mbörö wa tola mofozu ita ba wamalua halöwö ba wombaliʼö nifahaʼö?

¹⁶ Haniha mbörö wa tola mofozu ita ba wamalua halöwö fanuriaigö? Ibeʼe wanema li Faulo sanandrösa ba wanofu andrö me isura zura ba mbanua niha Keriso ba Gorindro. Imane, ”Yaʼodo zananö, Afolo zombuwui ba Lowalangi zamanöi. Tobali, faya zananö ba faya zombuwui na tenga Lowalangi zamanöi.” (1 Kor. 3:6, 7) Simane Faulo, moguna tatörö tödöda wa Yehowa mbörö wa tola mofozu halöwö nifaluada ba wombaliʼö nifahaʼö.

17. Hewisa wangoromaʼöda wa taʼameʼegö tödö döi si sökhi niʼokhögöda me tola falulu fohalöwö ita khö Lowalangi, Keriso hegöi khö ndra malaʼika?

¹⁷ Hewisa wangoromaʼöda wa taʼameʼegö tödö döi si sökhi niʼokhögöda me tola falulu fohalöwö ita khö Lowalangi, Keriso hegöi khö ndra malaʼika? Tola tafalua daʼö na taforege ba wamaʼema turia somuso dödö ba niha böʼö. Oya lala si tola tafalua ba wamaʼema turia somuso dödö, duma-dumania manuriaigö ba nahia sato niha hegöi ba nomo-omo. (Hal. 20:20) Ato ndra talifusöda somasi mamalua halöwö fanuriaigö si lö resmi. Na falukha ira ba zi samösa niha, laʼowai niha daʼö si fao faʼafahuwu ba laforege ba wamörögö fahuhuosa. Na adöni dödö niha daʼö, lafaʼema khönia duria somuso dödö sanandrösa ba Wamatörö Lowalangi.

18-19. (a) Hewisa lalada ba wombuwui danömö zindruhu? (b) Tutunö duma-duma sangoromaʼö hewisa Yehowa ba wanolo zi samösa niha nifahaʼö ba Zura Niʼamoniʼö.

¹⁸ Börö me ”si falulu fohalöwö” khö Lowalangi ita, halöwöda tenga ha ba wananö tanömö zindruhu, hizaʼi tawuwui göi ia. Andrö, na adöni dödö zi samösa niha, moguna  taforege enaʼö tafuli tafalukhaisi ia, mazui taʼandrö khö ndra sanuriaigö tanö böʼö enaʼö lafalukhaisi ia. Ohitö dödöda ba wamalukhaisi yaʼia mangawuli, yaʼia daʼö ba wamörögö famahaʼö ba Zura Niʼamoniʼö. Ba na no ibörögö ifahaʼö ia ba Zura Niʼamoniʼö, tola taʼila hewisa Yehowa ba wanolo yaʼia irege tebulö dödönia hegöi fangera-ngerania. Tatu omuso sibai dödöda na simane daʼö zalua.

¹⁹ Nehegö duma-duma Raphalalani, samösa dalifusöda ira matua si toröi ba Afrika Selatan. Me föna yaʼia andrö duku. Me ibörögö ifahaʼö ia ba Zura Niʼamoniʼö, iʼomasiʼö hadia zi no ifahaʼö yaʼia. Hizaʼi, me iʼila hadia niwaʼö Zura Niʼamoniʼö sanandrösa ba wahuhuosa ba niha si no mate, abua khönia ba wanemaʼö daʼö. (5 Moz. 18:10-12) Ba gafuriata, ibörögö ifaudugö lala wangera-ngerania ba zomasi Lowalangi. Buania, iböhöli halöwönia tobali duku, hewaʼae na lö hadöi halöwönia tanö böʼö. Iadaʼa, no 60 fakhe ndröfinia. Imane wangumaʼö, ”Uʼandrö sibai saohagölö börö me oya wanolo si no labeʼe khögu ira Samaduhuʼö Yehowa. Duma-dumania, latolo ndraʼo ba wangalui halöwö. Hizaʼi, sabölö tohudenia, uʼandrö sibai saohagölö khö Yehowa börö me itolo ndraʼo ba wombulöʼö faʼaurigu. Börö wanolonia andrö, tola tebayagö ndraʼo idanö ba tola fao ndraʼo manuriaigö iadaʼa.”

20. Hadia gangetulau?

²⁰ Ba artikel andre, no tatutunö öfa harato si lö oroma. Harato fondrege zebua böli yaʼia daʼö töi si sökhi me tola fahuwu ita khö Yehowa. Börö me fahuwu ita khö Yehowa, taʼokhögö harato tanö böʼö, yaʼia daʼö töi si sökhi ba wangondrasi Yehowa ba wangandrö, tarasoi wanolo moroi ba geheha niʼamoniʼö, ba tatema wotuhini moroi ba zorugo ba wamalua halöwö fombaliʼö nifahaʼö. Tatu tahalö gangetula enaʼö itugu taʼameʼegö tödö fefu harato si lö oroma andre. Ba lö taböhöli wangandrö saohagölö khö Yehowa börö me yaʼia Zi Fahuwu khöda fondrege zi sökhi.