1. Kansi Yesu efotokoza cinji cokhuza cuma cakululu?

NI MPHASO lini zonse zatingakwanishe kuona. Ndipo mphaso zamtengo wapatali zuoneka lini na menso. Pa ulaliki wa palupili, Yesu efotokoza za mphaso zakululu zamene ni zamtengo wapatali kupambana cuma. Eyangizhyilapo kuti: “Pakuti kuli cuma cako, niye kunkhala mtima wako.” (Mat. 6:19-21) Ngati tuona vinthu viyakine kunkhala vofunika ngako, tingayeseyese kuti tinkhale navo. Tuunjika “cuma kululu” mwa kupanga zina iweme kwa Mulungu. Cuma cecifotokoza Yesu cingaonongeke lini olo kuiŵiwa.

2. (a) Molingana na 2 Akorinto 4:17, 18, kansi Paulo otilimbikisha kuika menso ŵasu pa cinji? (b) Kansi tiphunzile cinji m’nkhani ino?

² Mtumwi Paulo otilimbikisha ‘kuika menso ŵasu pa vinthu vosaoneka.’ (Ŵelengani 2 Akorinto 4:17, 18.) Mphaso zosaoneka zuyangizhyilapo madaliso yati tikasangalale nayo m’calo calomba. M’nkhani ino, tiphunzile mphaso 4 zosaoneka zatupindula nazo lomba, zamene ni ushamwali wasu na Mulungu, mwai wa pemphelo, thandizo ya mzimu utuŵa na thandizo yatulondela kufumila kwa Yehova, Yesu na angelo. Tiphunzile soti mwatingaoneshele kuti tuyamikila mphaso zamene izi zosaoneka na menso.

3. Kansi mphaso ikulu yosaoneka ni yotyani, ndipo zukwanishika tyani kunkhala nayo?

³ Mphaso ikulu yosaoneka ni ushamwali na Yehova Mulungu. (Sal. 25:14) Kansi zukwanishika tyani kuti Mulungu  ankhale pa ushamwali na ŵanthu ocimwa nopitilizhya kunkhala mtuŵa? Zukwanishika cifukwa nsembe ya dipo ya Yesu ‘yucosa ucimo wa calo.’ (Yoh. 1:29) Olo Yesu akaliyokufwa, Yehova enzoziŵa kuti akankhale wokhulupilika mpaka imfwa yake kuti apulumuse mtundu wa ŵanthu. Niye cifukwa cake Mulungu enkhala pa ushamwali na ŵanthu enkhalako Yesu akaliyokufwa.​—Aro. 3:25.

4. Fotokozani visanzo va atumiki akale amene enkhala ashamwali a Mulungu.

⁴ Ganizilani za atumiki okhulupilika akale amene enkhala pa ushamwali na Mulungu. Abulahamu enze na cikhulupililo cotang’a. Vyaka vopitilila 1,000 pavuli pa imfwa yake, Yehova emuita kuti “shamwali wangu.” (Yes. 41:8) Izi zuonesha kuti olo munthu angafwe, Yehova omuona kuti ni shamwali wake. Olo kuti Abulahamu ecifwa, Yehova akalumukumbukila. (Luka 20:37, 38) Cisanzo ciyakine ni ca Yobu. Angelo onse pecisonkhana kululu, Yehova elaŵila mwacidalilo za Yobu. Yehova enena kuti “ni munthu wosalakwa, wolungama, woyopa Mulungu koma soti wopewa viipa.” (Yobu 1:6-8) Kansi Yehova enzomuona tyani Danieli wamene etumikila mokhulupilika kwa vyaka pafupifupi 80, m’dela yamene ŵanthu enzolambila lini Yehova? Katatu konse angelo emusimikizhyila kuti enze “munthu wokondeka” kwa Mulungu. (Dan. 9:23; 10:11, 19) Tingankhale osimikizhya kuti Yehova ofunishisha kuyoukisha ashamwali ŵake okondeka amene ecifwa.​—Yobu 14:15.

5. Tufunika kucita cinji kuti tinkhale pa ushamwali na Yehova?

⁵ Masiku ŵano, pali ŵanthu mamiliyoni amene aliye ungwilo ndipo osangalala kunkhala pa ushamwali na Yehova. Pakati pa ŵanthu amene aŵa pali analume, anakazi na ŵana, amene oonesha mwa zocita zao kuti ni ashamwali cendi a Mulungu. Yehova “okonda ŵanthu oongoka mtima.” (Miy. 3:32) Ushamwali wamene uyu ukwanishika cifukwa cokhulupilila nsembe ya dipo ya Yesu. Cifukwa ca nsembe yamene iyi, tingankhale pa ushamwali na Yehova, ndipo tingazitwale kuli yove nobatizika. Ngati tacita mbali izi zofunika, tingankhale pakati pa Akhristu ozitwala koma soti obatizika amene osangalala kunkhala pa “ushamwali uweme” na Yehova.

6. Kansi tingaoneshe tyani kuti tuyamikila ushamwali wasu na Mulungu?

⁶ Kansi tingaoneshe tyani kuti tuyamikila ushamwali wasu na Mulungu? Molingana na Abulahamu na Yobu amene epitilizhya kunkhala okhulupilika kwa Mulungu kwa vyaka vinyinji, nase tufunika kupitilizhya kunkhala okhulupilika mosasamala kanthu kuti tankhala tutumikila Yehova kwa nthawi itali tyani. Molingana na Danieli, tufunika kuona kuti ushamwali wasu ni wofunika ngako kupambana moyo wasu. (Dan. 6:7, 10, 16, 22) Moyavyiwa na Yehova, tingakwanishe kupilila mayeselo yatukumana nayo nopitilizhya kunkhala pa ushamwali na yove.​—Afil. 4:13.

7. (a) Molingana na Miyambo 15:8, kansi Yehova akumvwa tyani ngati tupemphela? (b) Kansi Yove oyankha tyani mapemphelo ŵasu?

⁷ Mphaso iyakine yosaoneka ni pemphelo. Ŵanthu amene ali pa ushamwali okonda kuuzhyana zili mumtima na mwaakumvwila. N’cimozimozi na ushamwali wasu na Yehova. Yehova olaŵila nase kupitila m’Mau  ŵake. Ndipo kupitila m’mau amene aŵa, tuziŵa malingalilo ŵake na mwaakumvwila. Kupitila m’pemphelo, tulaŵila naye ndipo tumuuzhya zili mumtima mwasu na mwatumvwila. Yehova osangalala kumvwishila mapemphelo ŵasu. (Ŵelengani Miyambo 15:8.) Monga Shamwali wacikondi, omvwishila lini tyala mapemphelo ŵasu, koma oyankha. Nthawi ziyakine otiyankha kamangu, koma nthawi ziyakine tingafunike kupitilizhya kupemphelela nkhani yamene iyo. Nangu n’tetyo, tingankhale na cidalilo cakuti akayankhe panthawi yoyenela. Koma nthawi ziyakine Mulungu angayankhe mosiyana na mwatuganizila. Mwacisanzo, m’malo mocosapo mayeselo, angatipase nzelu na mphamvu “kuti tipilile.”​—1 Akor. 10:13.

8. Tingaoneshe tyani kuti tuyamikila mphaso ya pemphelo?

⁸ Tingaoneshe tyani kuti tuyamikila mphaso yamtengo wapatali ya pemphelo? Tingacite izi mwa kumvwila malangizo a Yehova akuti, “mukopemphela mosalekezhya.” (1 Ates. 5:17) Yehova otikakamizhya lini kupemphela. M’malo mwake olemekeza ufulu wasu wosankha ndipo otilimbikisha ‘kupemphela.’ (Aro. 12:12) Tetyo, tingaoneshe kuyamikila mwa kupemphela kanyinji pa siku. Tufunika lini kuluŵa kuyamikila notamanda Yehova m’mapemphelo ŵasu.​—Sal. 145:2, 3.

9. Kansi mkwasu muyakine ouona tyani mwai wa pemphelo, nanga mweo muuona tyani?

⁹ Kutumikila Yehova kwa nthawi itali noona mwakuyankhila mapemphelo ŵasu, kungacitishe kuti tikoyamikila ngako mwai wa pemphelo. Mwacisanzo, mkwasu Chris wamene wankhala mu utumiki wanthawi zonse kwa vyaka 47, elaŵila kuti: “Nusangalala kuuka m’mawa kuti nipemphele kwa Yehova. N’cinthu cosangalasa kulaŵila na Yehova m’pemphelo payufuma zuŵa, yamene yucitisha vinthu vonse kuoneka vokongola. Izi zunicitisha kumuyamikila ngako cifukwa ca mphaso zonse zecinipasa, kuyangizhyilapo  mwai wa pemphelo. Pavuli popemphela m’cingulo, nukumvwa luweme ngako cakuti nulala nili na cikumbumtima cituŵa.”

10. Ndaŵa yanji tufunikila kuyamikila mphaso ya mzimu utuŵa wa Mulungu?

¹⁰ Mzimu utuŵa wa Mulungu ni mphaso iyakine yosaoneka yatufunikila kuyamikila. Yesu etilimbikisha kupitilizhya kuupemphelela. (Luka 11:9, 13) Yehova oseŵenzesha mzimu wake utuŵa kutipasa “mphamvu yopambana yacibadwa.” (2 Akor. 4:7; Mac. 1:8) Moyavyiwa na mzimu wa Mulungu, tingakwanishe kupilila mayeselo yaliyonse yatingakumane nayo.

11. Kansi mzimu utuŵa ungatiyavye tyani?

¹¹ Mzimu utuŵa ungatiyavye kukwanilisha utumiki wasu na kukulisha maluso ŵasu. Tuziŵa kuti zofumapo ziweme zilizonse mu utumiki wasu, zukwanishika cifukwa coyavyiwa na mzimu utuŵa.

12. Molingana na Salimo 139:23, 24, kansi tingasenge mzimu utuŵa kuti utiyavye kucita cinji?

¹² Njila iyakine yatuoneshela kuti tuyamikila mzimu utuŵa, ni kusenga Yehova kuti atiyavye kuziŵa ngati tili na maganizo aipa olo vilakolako viipa. (Ŵelengani Salimo 139:23, 24.) Yehova otiyavya poseŵenzesha mzimu wake utuŵa. Tetyo, tikaziŵa kuti tili na maganizo aipa, tufunika kusenga mzimu utuŵa wa Mulungu kuti utiyavye kuyagonjesa. Tikacita tetyo, tioneshe kuti tufunishisha kupewa ciliconse cingacitishe kuti Yehova aleke kutiyavya na mzimu utuŵa.​—Aef. 4:30.

13. Kansi tingakulishe tyani ciyamikilo casu pa mzimu utuŵa?

¹³ Tingakulishe ciyamikilo casu pa mzimu utuŵa, tikaganizila mwautiyavyila masiku ŵano. Yesu akaliyoluta kululu, euzhya ophunzila ŵake kuti: “Koma mzimu utuŵa ukayofwika pali mweo, mukalondele mphamvu. Pamene apo mukankhale mboni zangu . . . mpaka kosilizhyila kwa calo.”  (Mac. 1:8) Mau aŵa okwanilishika masiku ŵano. Moyavyiwa na mzimu utuŵa, ŵanthu opitilila pa 8 miliyoni ofumila m’madela osiyanasiyana pacalo conse olambila Yehova. Tusangalala soti na paladaiso wauzimu cifukwa mzimu wa Mulungu utiyavya kukulisha minkhalidwe iweme monga cikondi, cimwemwe, mtendele, kuleza mtima, kuwama mtima, ubwino, cikhulupililo, kufasa na kuzilesha. Iyi niye “minkhalidwe ya mzimu.” (Agal. 5:22, 23) Kulaŵila cendi, mzimu utuŵa ni mphaso iweme ngako.

14. Kansi ni thandizo yosaoneka yotyani yatulondela tikankhala mu utumiki?

¹⁴ Tili na mphaso yosaoneka yamene ni ‘kuseŵenzela pamozi’ na Yehova, Yesu koma soti angelo. (2 Akor. 6:1) Tuseŵenza nao nthawi zonse tikankhala mu utumiki. Polaŵila za yove na onse ogwila nchito yamene iyi, Paulo eciti: “Nise anchito ayake a Mulungu.” (1 Akor. 3:9) Ngati tutolamo mbali mu utumiki Wacikhristu, tunkhala soti anchito ayake a Yesu. Kumbukilani kuti pavuli polamula ophunzila ŵake kuti ‘akapange ophunzila kufumila m’mitundu yonse,’ Yesu eciti: “Nili namwe.” (Mat. 28:19, 20) Nanga tyani ponena za angelo? Tuyamikila ngako kuti angelo otisogolela patulalikila “uthenga uweme wosasila . . . ku ŵanthu onkhala pacalo”!​—Chiv. 14:6.

15. Fotokozani cisanzo ca m’Baibo camene cuonesha thandizo yakutipasa Yehova tikankhala mu utumiki?

¹⁵ Kansi thandizo yakululu yutiyavya kukwanilisha kucita cinji? Ngati tukomola mbeu za Ufumu, ziyakine zuponela pa mitima iweme ndipo zukula. (Mat. 13:18, 23) Ni ŵani ocitisha kuti mbeu za cendi zikule nonkhala na votwala? Yesu elaŵila kuti paliye munthu angankhale wophunzila wake ngati “aliyodonsewe na Atata.” (Yoh. 6:44) Baibo yufotokoza cisanzo ciweme pankhani yamene iyi. Kumbukilani zecitika Paulo pecicitila umboni ku gulu ya anakazi kunja kwa mzinda wa Filipi. Onani zayulaŵila Baibo zokhuza munakazi muyakine woitiwa kuti Lidiya, kuti: “Yehova esegula mtima wake kuti amvwishishe zeenzolaŵila Paulo.” (Mac. 16:13-15) Molingana na Lidiya, ŵanthu mamiliyoni adonsewa na Yehova.

16. Kansi ni ŵani ofunika kutamandiwa pakankhala zofumapo ziweme mu utumiki wasu?

¹⁶ Kansi ni ŵani ofunika kutamandiwa ngati pankhala zofumapo ziweme mu utumiki wasu? Paulo eyankha konsho yamene iyi pecilembela mpingo wa ku Korinto kuti: “Neo nekomola, Apolo etilila, koma Mulungu niye ekulisha. Tetyo wokomola na wotilila ni kanthu lini, koma Mulungu wamene okulisha.” (1 Akor. 3:6, 7) Monga Paulo, tufunika kutamanda Yehova nthawi zonse pakankhala zofumapo ziweme mu utumiki wasu.

17. Tingaoneshe tyani kuti tuyamikila mwai “woseŵenzela pamozi” na Mulungu, Khristu koma soti angelo?

¹⁷ Tingaoneshe tyani kuti tuyamikila mwai “woseŵenzela pamozi” na Mulungu, Khristu koma soti angelo? Tingacite zamene izi mwa kucita khama pouzhya ayakine uthenga uweme. Pali njila zinyinji zatingaseŵenzeshe pouzhya ŵanthu uthenga uweme monga kucita ulaliki wa “patuŵa koma soti kung’anda na ng’anda.” (Mac. 20:20) Anyinji osangalala kucita ulaliki wa mwamwai. Akakumana na munthu waasaziŵa, omupasa moni mwaubwenzi noyamba kulaŵizhyana naye. Ngati ni womasuka, mocenjela oyamba kumuuzhya uthenga wa Ufumu.

18-19. (a) Kansi tutilila tyani mbeu za cendi? (b) Fotokozani cisanzo coonesha mwamene Yehova eyavyila wophunzila Baibo muyakine.

 ¹⁸ Monga “anchito ayake a Mulungu,” tufunika lini kukomola tyala mbeu za cendi, koma tufunika soti kutilila. Ngati munthu waonesha cidwi, tuwelelako kwa munthu wamene uyo, kapena kupanga makonzedwe akuti munthu muyakine akophunzila naye Baibo. Ngati phunzilo yupita pasogolo, tusangalala tikaona mwamene Yehova omuyavyila kucinja umoyo wake.

¹⁹ Ganizilani cisanzo ca Raphalalani, wamene enze ng’anga ku South Africa. Ekondwela na zeciphunzila m’Baibo. Koma cenze covuta kuvomelezhya zayulaŵila Baibo pankhani yokhuza kukhulupilila mizimu ya makolo. (Deut. 18:10-12) Pavuli pake elola Mulungu kuti aumbe maganizo ŵake. M’kuluta kwa nthawi, eleka nchito yake yaung’anga yamene yenzomuyavya kupeza zofunikila pa umoyo. Raphalalani, wamene lomba ali na vyaka 60, elaŵila kuti: “Nuyamikila Mboni za Yehova poniyavya m’njila zinyinji monga kuniyavya kupeza nchito.” Koma nuyamikila ngako Yehova poniyavya kucinja umoyo wangu, cakuti lomba nutumikila monga Mboni yobatizika.”

20. Kansi mwasimikizhya mtima kucita cinji?

²⁰ M’nkhani ino, talaŵizhyana mphaso 4 zosaoneka. Koma mphaso ikulu pa zonse, ni kunkhala pa ushamwali uweme na Yehova. Tikankhala pa ushamwali na Yehova, tupindula na mphaso zosaoneka monga kulaŵila naye m’pemphelo, kulondela mzimu utuŵa, na kulondela thandizo yakululu mu utumiki. Tiyeni tipitilizhye kukulisha ciyamikilo casu pa mphaso zosaoneka zamene izi. Tiyeni nthawi zonse tikoyamikila Yehova cifukwa conkhala Shamwali muweme.