1. Jesu o boletše’ng ka mahumo a legodimong?

GO NA le dimpho tše dingwe tše bohlokwa tšeo re ka se kgonego go di bona. Ge e le gabotse dimpho tša bohlokwahlokwa ke dilo tšeo re sa kgonego go di bona. Ge Jesu a be a ruta batho Thutong ya Thabeng, o ile a bolela gore mahumo a legodimong, a bohlokwa go feta tšhelete. Le gona, o ile a bolela gore: “Moo letlotlo la gago [goba mahumo a gago a] lego gona, ke moo pelo ya gago le yona e tlago go ba gona.” (Mat. 6:19-21) Ge e ba re lebelela selo se itšego se le bohlokwa, re tlo leka gore re se hwetše. Re ipolokela “matlotlo [goba mahumo] legodimong” ka go ba le tswalano e botse le Modimo. Jesu o hlalositše gore mahumo a bjalo a ka se ke a senyega goba a utswiwa.

2. (a) Go ya ka Bakorinthe ba Bobedi 4:17, 18, Paulo o re kgothaleditše go dira eng? (b) Re tlo ithuta eng sehlogong se?

² Moapostola Paulo o re kgothaleditše gore re “[iše] mahlo a rena dilong tšeo di sa bonwego.” (Bala 2 Bakorinthe 4:17, 18.) Dilo tše tšeo di sa bonwego di akaretša le dilo ka moka tše dibotse tšeo re tlago go di hwetša lefaseng le lefsa. Sehlogong se re tlo ithuta ka dimpho tše nne tše di sa bonwego tšeo re ka di hwetšago gona bjale, e lego segwera sa rena le Modimo, thapelo, moya o mokgethwa le thušo yeo Jehofa, Jesu le barongwa ba re neago yona ge re le tšhemong. Le gona re tlo ithuta gore re ka bontšha bjang gore re leboga dimpho tše tšeo di sa bonwego.

3. Mpho e kgolokgolo yeo e sa bonwego yeo re nago le yona ke efe, gona go tla bjang gore re hwetše mpho ye?

³ Mpho e kgolokgolo yeo re nago le yona yeo e sa bonwego ke  segwera sa rena le Jehofa Modimo. (Ps. 25:14) Go tla bjang gore Modimo yo mokgethwa a gwerane le batho bao ba nago le sebe? Se se kgonega ka gobane sehlabelo sa Jesu sa topollo “[se tloša] sebe sa lefase.” (Joh. 1:29) Le pele Jesu a ka hwa, Jehofa o be a tseba gore Jesu o tlo botega go fihlela a ehwa e le gore a phološe batho. Ke ka baka leo Modimo a ilego a kgona go gwerana le batho ba itšego le pele Jesu Kriste a ka hwa.—Baroma 3:25.

4. Nea mehlala ya batho bao ba phetšego pele Jesu a ka tla lefaseng bao e ilego ya ba bagwera ba Modimo.

⁴ Nagana ka mehlala ye ya batho bao ba ilego ba phela pele Jesu a ka tla mo lefaseng bao e ilego ya ba bagwera ba Modimo. Aborahama o be a na le tumelo e kgolo kudu. Ka morago ga mengwaga ya ka godimo ga e 1 000 Aborahama a hwile, Jehofa o ile a mmitša “mogwera wa ka.” (Jes. 41:8) Se se ra gore le ge batho ba hwile, Jehofa o sa ba tšea e le bagwera ba gagwe. Aborahama o sa phela ka kgopolong ya Jehofa. (Luka 20:37, 38) Mohlala o mongwe ke wa Jobo. Ge barongwa ba be ba bokane ka moka legodimong, Jehofa o ile a bolela gabotse ka Jobo. Jehofa o ile a re Jobo ke “monna yo a se nago bosodi le yo a lokilego, yo a boifago Modimo le yo a phemago go dira bobe.” (Jobo 1:6-8) Le gona, Jehofa o ile a ikwa bjang ka Daniele, yo a ilego a fetša mengwaga e ka bago 80 a mo hlankela ka go botega nageng ya batho bao ba bego ba sa hlankele Modimo? Ge a be a šetše a tšofetše, barongwa ba ile ba mmotša gararo gore ke “motho yo a rategago kudu” go Modimo. (Dan. 9:23; 10:11, 19) Ruri ga re na pelaelo ya gore Jehofa o fela pelo ya go tlo tsoša bagwera ba gagwe bao ba hwilego.—Jobo 14:15.

5. Re swanetše go dira’ng gore re be bagwera ba Jehofa?

⁵ Ke batho ba bakae lehono bao e lego bagwera ba Jehofa? Ke ba bantšintši. Re tseba se ka gobane banna, basadi le bana ba bantši lefaseng ka moka ba bontšha ka tsela yeo ba phelago ka yona gore ba nyaka go ba bagwera ba Modimo. Beibele e re: “Modimo o gwerana kgauswi le baloki.” (Die. 3:32) Batho ba ba kgona go gwerana le Modimo ka gobane ba na le tumelo sehlabelong sa Jesu sa topollo. Sehlabelo se sa Jesu sa topollo se dira gore re be bagwera ba Jehofa, re ineele go yena gomme re kolobetšwe. Ge re dirile dilo tše tše bohlokwa, re ba gare ga Bakriste ba dimilione bao ba ineetšego go Modimo gomme ba kolobetšwa, bao gona bjale e lego bagwera ba bagolo ba gagwe!

6. Re ka bontšha bjang gore re leboga segwera sa rena le Modimo?

⁶ Re ka bontšha bjang gore re leboga segwera sa rena le Modimo? Re ka bontšha seo ka go ekiša Aborahama le Jobo bao ba ilego ba hlankela Modimo ka go botega ka mengwaga ya ka godimo ga e lekgolo. Le rena re ka dula re botega go sa šetšwe gore re na le nako e kaakang re hlankela Jehofa. Le gona, re ka ekiša Daniele ka gore re tšee segwera sa rena le Modimo se le bohlokwa go feta maphelo a rena. (Dan. 6:7, 10, 16, 22) Jehofa a ka re thuša gore re kgotlelele mathata le ge e le afe ao a re welago gomme re dule re le bagwera ba gagwe.—Bafil. 4:13.

7. (a) Go ya ka Diema 15:8, Jehofa o ikwa bjang ka dithapelo tša rena? (b) Jehofa o araba bjang dithapelo tša rena?

⁷ Mpho e nngwe ya bohlokwa yeo e sa bonwego ke thapelo. Bagwera ba bagolo ba rata go boledišana le go botšana kamoo ba ikwago ka gona. Segwera sa rena le Jehofa le sona se swanetše go ba bjalo? Jehofa o bolela le rena a diriša lentšu la gagwe e lego Beibele gomme ka go yona o re botša kamoo a ikwago ka gona. Rena re bolela le Jehofa ge re mo rapela, e bile re ka mmotša kamoo re ikwago ka  gona. Jehofa o thabela go theetša dithapelo tša rena. (Bala Diema 15:8.) Ka ge Jehofa e le mogwera wa rena yo a re ratago, o theetša dithapelo tša rena e bile o a di araba. Ka dinako tše dingwe o di araba ka pejana. Eupša ka dinako tše dingwe re ka swanelwa ke go rapela gantši le gantši. Seo re swanetšego go kgodišega ka sona ke gore o tlo re araba ka nako ya maleba le ka tsela e botse kudu. Ke nnete gore Modimo a ka re araba ka tsela yeo re bego re sa e letela. Ka mohlala, go e na le gore a tloše teko yeo re lebeletšanego le yona, a ka re nea bohlale le matla a gore ‘re e kgotlelele.’—1 Bakor. 10:13.

8. Re ka bontšha bjang gore re leboga mpho ya thapelo?

⁸ Re ka bontšha bjang gore re leboga mpho ye e bohlokwa ya thapelo? Tsela e nngwe ke ka go kwa taelo ya Jehofa ya gore “[re rapele] ka mehla.” (1 Bathes. 5:17) Jehofa ga a re gapeletše gore re rapele. Go e na le moo, o nyaka gore re diriše tokologo ya rena ya go ikgethela gomme re “[phegelele] thapelong.” (Baroma 12:12) Ka gona re ka bontšha gore re leboga mpho ye ka go rapela gantši letšatši le lengwe le le lengwe. E bile ga se ra swanela go lebala go leboga Jehofa le go mo tumiša ge re mo rapela.—Ps. 145:2, 3.

9. Ngwanabo rena yo mongwe o ikwa bjang ka thapelo, gona wena o ikwa bjang ka yona?

⁹ Ge re na le nako e telele re hlankela Jehofa gomme re bona kamoo a arabago dithapelo tša rena, re swanetše go mo leboga le go feta. Nagana ka mohlala wa ngwanabo rena Chris yo a nago le mengwaga ya ka godimo ga e 47 a le tirelong ya nako e tletšego. O re: “Ke rata go tsoga mesong e le gore ke kgone go rapela Jehofa. Go kgahliša kudu go bolela le Jehofa ge letšatši le sa hlaba gomme dilo ka moka e le tše dibotse! Se se dira gore ke leboge Jehofa ka dimpho ka moka tšeo a re neago tšona go akaretša le mpho ya thapelo. Ke moka bošego ka morago ga gore ke rapele ke kgona go robala ka pelo e tšhweu.”

10. Ke ka baka la’ng re swanetše go leboga mpho ya moya o mokgethwa?

¹⁰ Moya o mokgethwa ke mpho e nngwe e sa bonwego yeo re swanetšego go e leboga. Jesu  o re kgothaleditše gore re tšwele pele re rapela Modimo gore a re nee moya o mokgethwa. (Luka 11:9, 13) Jehofa o diriša moya woo o mokgethwa go re nea “matla a fetago a tlwaelegilego.” (2 Bakor. 4:7; Dit. 1:8) Le gona moya woo o mokgethwa o ka re thuša go kgotlelela teko le ge e le efe.

11. Moya o mokgethwa o ka re thuša bjang?

¹¹ Moya o mokgethwa o ka re thuša go dira dikabelo tšeo re di neilwego ka mokgatlong wa Modimo, e bile o ka re thuša go kaonefatša bokgoni bjoo re šetšego re na le bjona. O re thuša le go dira dikabelo tšeo re nago le tšona ka phuthegong. Re a tseba gore re kgona go phetha dikabelo tšeo re di newago ka ge re thušwa ke moya o mokgethwa wa Modimo.

12. Psalme 139:23, 24, e re re ka rapelela moya o mokgethwa go re thuša go dira eng?

¹² Tsela e nngwe yeo re ka bontšhago ka yona gore re leboga mpho ye ya moya o mokgethwa, ke ka go kgopela Modimo gore a re nee moya woo wa gagwe go re thuša go bona ge e ba re na le dikgopolo tše di fošagetšego goba dikganyogo tše di fošagetšego ka dipelong tša rena. (Bala Psalme 139:23, 24.) Ge e ba re ka kgopela Jehofa moya wa gagwe gore o re hlahlobe, moya woo o tla re thuša go bona ge e ba re na le dikgopolo tše di fošagetšego. Le gona ge e ba re ka lemoga gore re na le dikgopolo tše di fošagetšego goba gore re na le dikganyogo tše di fošagetšego, re swanetše go rapela moya wa Modimo gore o re thuše go tloša dilo tšeo. Ge re ka dira seo, Jehofa o tla bona gore ga re nyake gore go be le selo seo se re šitišago go hwetša moya wa gagwe o mokgethwa.—Baef. 4:30.

13. Re ka dira’ng gore re leboge mpho ya moya o mokgethwa le go feta?

¹³ Re ka kgona go leboga mpho ye ya moya o mokgethwa le go feta ge e ba re naganišiša ka dilo tšeo o kgonago go di dira mehleng ye ya rena. Pele Jesu a ka rotogela legodimong, o ile a botša barutiwa ba gagwe gore: “Le tla amogela matla ge moya o mokgethwa o fihla godimo ga lena gomme le tla ba dihlatse tša ka . . . go fihla karolong ya kgole ya lefase.” (Dit. 1:8) Mantšu a temaneng ye a a phethagala lehono. Moya o mokgethwa o thušitše batho ba ka  godimo ga dimilione tše seswai le seripa lefaseng ka moka gore e be Dihlatse tša Jehofa. Le gona, re thabela botee ka ge moya wa Modimo o re thuša go ba le dika tše bjalo ka lerato, lethabo, khutšo, go se fele pelo, botho, toko, tumelo, boleta le boitshwaro. Dika tše ke tšeo “di enywago ke moya wa Modimo.” (Bagal. 5:22, 23) Ruri moya o mokgethwa ke mpho e bohlokwahlokwa!

14. Ge re le tšhemong, re hwetša thekgo efe yeo re sa kgonego go e bona?

¹⁴ Re na le mpho e bohlokwa yeo re sa kgonego go e bona ya ‘go šoma gotee’ le Jehofa, Jesu le barongwa. (2 Bakor. 6:1) Re šoma le bona nako e nngwe le e nngwe ge re le tšhemong. Paulo o ile a bolela ka yena le ba bangwe bao ba tšeago karolo modirong wo gore: “Re bašomigotee le Modimo.” (1 Bakor. 3:9) Le gona, ge re eya tšhemong, re šoma gotee le Jesu. Gopola gore ka morago ga gore Jesu a laele balatedi ba gagwe gore ba dire batho ba ditšhaba ka moka barutiwa, o ile a re: “Ke na le lena.” (Mat. 28:19, 20) Barongwa bona ba re thuša bjang? Ba re thuša gore re kgone go bolela ‘ditaba tše dibotse tša ka mo go sa felego go bao ba dulago lefaseng’!—Kut. 14:6.

15. Nea mohlala wa ka Beibeleng woo o bontšhago tema e bohlokwa yeo Jehofa a e kgathago modirong wa rena wa go bolela ditaba tše dibotse.

¹⁵ Thušo ye yeo re e hwetšago go Jehofa, Jesu le barongwa e re thuša go fihlelela eng? Ge re dutše re bjala peu ya Mmušo, peu e nngwe e wela mmung o mobotse gomme ya gola. (Mat. 13:18, 23) Ke mang a dirago gore dipeu tšeo di mele gomme di tšweletše dienywa? Jesu o hlalositše gore ga go na motho yo e ka bago molatedi wa gagwe “ge a sa gogwe ke Tate.” (Joh. 6:44) Beibele e re nea mohlala wa se. Nagana nakong ya ge Paulo a be a botša basadi ba itšego ditaba tše dibotse. Basadi bao ba be ba bokane ka ntle ga motse wa Filipi. Beibele ge e bolela ka yo mongwe wa basadi bao e lego Lidia e re: “Jehofa [o ile] a bula pelo ya gagwe gore a ele hloko dilo tšeo Paulo a bego a di bolela.” (Dit. 16:13-15) Go swana le Lidia, batho ba bangwe ba bantšintši le bona ba ile ba gogwa ke Jehofa.

16. Re swanetše go tumiša mang ge re atlega tšhemong?

¹⁶ Re swanetše go tumiša mang ge re atlega tšhemong? Paulo o ile a araba potšišo yeo ge a be a ngwala mabapi le phuthego ya kua Korinthe gore: “Nna ke bjetše, Apollo a nošetša, eupša Modimo o tšwetše pele a godiša; mo e lego gore yo a bjalago ga se selo gaešita le yo a nošetšago, ge e se Modimo yo a godišago.” (1 Bakor. 3:6, 7) Go swana le Paulo, ka mehla re swanetše go reta goba go tumiša Modimo ge re atlega tšhemong.

17. Re ka bontšha bjang gore re leboga tokelo ya go šoma gotee le Modimo, Jesu Kriste le barongwa?

¹⁷ Re ka bontšha bjang gore re leboga tokelo ya go šoma gotee le Modimo, Jesu Kriste le barongwa? Re ka dira seo ka go dira sohle seo re ka se kgonago gore re botše batho ba bangwe ditaba tše dibotse. Re ka botša batho ditaba tše dibotse ka go ba ruta “phatlalatša le ka ntlo le ntlo.” (Dit. 20:20) Le gona ba bantši ba thabela go botša batho ditaba tše dibotse le ge e le kae. Ge ba kopana le motho yo ba sa mo tsebego, ba a mo dumediša gomme ba thoma go boledišana le yena. Ge go bonagala motho yoo a thabela go boledišana le bona, ka bohlale ba thoma go mmotša ditaba tše dibotse.

18-19. (a) Re nošetša bjang dipeu tšeo re di bjetšego tša Mmušo wa Modimo? (b) Anega phihlelo yeo e bontšhago kamoo Jehofa a ilego a thuša yo mongwe wa barutwana ba Beibele.

¹⁸ Ka ge re le “bašomigotee le Modimo,” ga se ra swanela go no bjala dipeu tša Mmušo eupša re swanetše go di nošetša. Ge e ba motho  a thabela go ithuta ka Beibele, re nyaka go dira sohle seo re ka se kgonago gore re boele go yena goba re kgopele motho yo mongwe gore a ithute Beibele le yena. Re a thaba ge re bona Jehofa a thuša morutwana wa Beibele go fetoša kamoo a phelago ka gona le kamoo a naganago ka gona.

¹⁹ Nagana ka mohlala wa monna yo a bitšwago Raphalalani, yoo e bego e le ngaka ya setšo Afrika Borwa. O ile a rata seo a bego a ithuta sona thutong ya gagwe ya Beibele. Eupša go be go le thata gore a amogele seo Beibele e se bolelago tabeng ya go bolela le bahu. (Doit. 18:10-12) Ganyenyane-ganyenyane o ile a dumelela Modimo gore a mo thuše go fetoša tsela yeo a bego a nagana ka yona. Ge nako e dutše e eya o ile a tlogela bongaka, le ge woo e be e le wona mošomo wa gagwe. Raphalalani yoo gona bjale a nago le mengwaga e 60 o re: “Ke leboga kudu kamoo Dihlatse tša Jehofa di ilego tša nthuša ka gona go swana le go hwetša mošomo. Go feta moo ke leboga Jehofa gore o nthušitše gore ke fetoše bophelo bja ka, gomme gona bjale ke kgona go botša ba bangwe ditaba tše dibotse ka ge ke le yo mongwe wa Dihlatse tša gagwe.”

20. O ikemišeditše go dira’ng?

²⁰ Sehlogong se re boletše ka dimpho tše nne tšeo Modimo a re neago tšona tšeo di sa bonwego. Mpho e kgolokgolo go tšona ka moka, ke go ba bagwera ba Jehofa. Ge re le bagwera ba Jehofa, re kgona go holwa ke dimpho tše dingwe tšeo a re neago tšona tšeo di sa bonwego, tša go swana le go mo rapela, go hwetša moya o mokgethwa, go šoma le yena gotee le Jesu le barongwa ge re le tšhemong. Eka re ka ikemišetša go dula re leboga kudu dimpho tše tšeo di sa bonwego. Le gona, anke le ka mohla re se ke ra tlogela go leboga Jehofa ka ge e le Mogwera wa rena yo mogolo.