1. Yáʼąąshdi daʼílíinii Jesus haʼátʼíísh ááhyiłní?

DAʼÍLÍINII doo tʼáá ałtso daatʼı̨́į da. Áádóó tsʼídá aláahgo daʼílíinii éí doo daatʼı̨́į da. Dziłghą́ąʼdi naʼneeztą́ą́ʼ yę́ędą́ą́ʼ, yáʼąąshdi daʼílíinii éí naalyeʼé nihee hólóonii biláahdi ílı̨́įgo Jesus yaa chʼíhwííníʼą́. Áádóó tʼáá aaníinii yee haadzííʼ: “Háálá nihinaalyeʼé siláadi tʼáá ákwii ałdóʼ nihijéí hólǫ́ǫ doo.” (Matt. 6:​19-21) Nihijéí biiʼdę́ę́ʼ íiyisíí nihił ílíinii bíká ítʼı̨́į doo. Nihízhiʼ dóó siidzı̨́įgi yáʼátʼéehgo God yee nihééhósingo éí “yáʼąąshdi . . . nihinaalyeʼé” daʼílíinii hashtʼe nihidiyiiʼníił doo. Jesus kóní, díí daʼílíinii tsʼídá doo ádooldįįł da doodaiiʼ doo nihee dínóotʼı̨́įł da.

2. (a) 2 Corinthians 4:​17, 18 binahjįʼ, Paul haʼátʼíí lá bíká dadíníitʼı̨́įʼ doo nihiłní? (b) Haʼátʼíísh baa íhwidiilʼááł?

² Yilʼaadii Paul ánihiłní “doo daatʼíinii baa nitsídeiikees [bíká dadíníitʼı̨́ı̨́ʼ].” (2 Corinthians 4:​17, 18 yíníłtaʼ.) Daʼílíinii doo daatʼíinii éí God kéyah ániidí yee nihikʼijidlíigo bee níʼdiildįįłii yaa halneʼ. Díí naaltsoos bitsʼą́ą́dóó éí daʼílíinii doo daatʼíinii dı̨́ı̨́ʼ ałʼąą átʼéego bídahwiidiilʼááł—God bikʼis niidlı̨́įgi, sodizin bee nihaa hojoosbaʼii, God biníłchʼi diyinii nihíká análwoʼgi, dóó nidahwiilneʼgóó yáʼąąshdę́ę́ʼ nihíká anáʼáwoʼgi. Daʼílíinii doo daatʼíinii baa ahééh niidzingo ííshjání íilʼı̨́įgi baa íhwidiilʼááł.

3. Haʼátʼíísh éí tsʼídá aláahgo daʼílíinii doo daatʼíinii átʼé dóó haash yitʼéego bohónéedzą́?

³ Jiihóvah bikʼis ádlı̨́įgi éí tsʼídá aláahgo daʼílíinii doo daatʼíinii átʼé. (Ps. 25:14) Haash yitʼéego God éí bílaʼashdlaʼii nidaʼiisíihii bikʼis dadooleeł ndi tʼáá diyin doo? Binahjįʼ bohónéedzáanii éí Jesus nihá nááʼádiisniiʼgo nihichʼą́ą́h ííyáhígíí bee bílaʼashdlaʼii “bibąąhági átʼéii yóóʼiidiiʼaahii jílı̨́”. (John 1:29) Náasdi bílaʼashdlaʼii bá Yisdáʼiiníiłii hólǫ́ǫ dooleełgi Jiihóvah bił bééhózin. Díí biniinaa Christ tʼahdoo daatsaah yę́ędą́ą́ʼ bílaʼashdlaʼii łaʼ God bikʼis danilı̨́ı̨́ ńtʼééʼ.—Rom. 3:25.

4. Christ bítséedi diné God bikʼis daazlı̨́įʼii łaʼ baa chʼíhoníʼaah.

⁴ Christ bítséedi łaʼ diné God bikʼis daazlı̨́įʼii dadíníilʼįįł. Éíbraham éí beʼoodląʼ tʼáá íiyisíí bidziilgo ííshjání áyiilaa. Éíbraham ádindóó 1,000dóó baʼaan nááhai, Jiihóvah tʼáá “shikʼis” hałní. (Isa. 41:8) Azhą́ diné ádin yileeh ndi Jiihóvah bikʼis ádlı̨́įgi doo niʼ íidoolíił da. Jiihóvah éí Éíbraham hináago yénálniih. (Luke 20:​37, 38) Job ałdóʼ, diyingo ndaalʼaʼí yáʼąąshdi ahíikaigo dabíínááł, Jiihóvah éí Job baa jííníshłí hałní. “Tʼáá ákogi ááníiłii nilı̨́ áádóó Diyin God yidósin índa bąąhági átʼéii yá doolnihii nilı̨́” ałdóʼ hałní Jiihóvah. (Job 1:​6-8) Áádóó Jiihóvah éí haitʼéego Daniel yaa nitsékees ńtʼééʼ? Pagan danilíinii bitahgi 80 nááhaigóó God bá nijilʼaʼ ńtʼééʼ. Azhą́ náás jizlı̨́įʼ ndi, táadi níłchʼi diyinii “Diyin God ayóóʼánóʼníinii nílíinii” dahałní. (Dan. 9:23; 10:​11, 19) Jiihóvah éí dabikʼis ayóóʼádeiyóʼní yę́ę iiná yaa néidoodleełgo yibaʼ átʼé.—Job 14:15.

5. Jiihóvah áhą́dígo bikʼis ádlı̨́ baa hózhǫ́ǫgi haash yitʼéego chóidííłtʼeeł?

⁵ Dííshjı̨́įdi, haash néelą́ą́ʼ bílaʼashdlaʼii nidaʼiisíihii Jiihóvah áhą́dígo bikʼis danilı̨́? Mííl doo baʼaan ánéelą́ą́ʼ. Hastóí, sáanii, dóó áłchíní bibee ádaʼoolʼįįłii binahjiʼ bééhózingo tʼóó ahayóí God bikʼis dadiidleeł danízin. Jiihóvah éí “tʼáá ákogi ádaatʼéii” bił nilı̨́. (Prov. 3:32) Jesus beʼiinaʼ nihá ninéidiníʼą́ągo yiniidlánígíí biniinaa akʼis ádlı̨́įgi bohónéedzą́. Díí binahjįʼ, Jiihóvah baa ádadeetʼą́ dóó baptize ádanihiʼdiilyaa. Mííl doo baʼaan ánéelą́ąʼgo baptize ádabiʼdilyaaígíí bił tsʼídá Aláahgo Ayóóʼátʼéii “áhą́dígo akʼis” niidlı̨́įgo bee nídaʼdiildįįł. Ląʼí ákótʼéego yaa ádaʼdeestʼą́.

6. Haash yitʼéego God bikʼis nihił ílı̨́įgo ííshjání ádadiilnííł?

⁶ Haash yitʼéego God bikʼis nihił ílı̨́įgo ííshjání ádadiilnííł? Éíbraham dóó Job éí God yoodlą́ągo ląʼí nááhai. Nihí ałdóʼ ákótʼéego niheʼoodląʼ bidziilgo ádeíníilzin doo—ląʼí nááhai Jiihóvah bá nideilʼaʼ ndi. Danielgi átʼéego, niheʼiinaʼ biláahdi God bikʼis ádlı̨́ı̨́jí nihił nilı̨́į doo. (Dan. 6:​7, 10, 16, 22) Jiihóvah nihíkáʼanálwoʼgo naʼíhontaah bichʼįʼ haʼííníilní dóó tʼáá áhą́dígo bił niidlı̨́į doo.—Phil. 4:13.

7. (a) Proverbs 15:8 binahjįʼ, haash yitʼéego Jiihóvah nihisodizin yaa nitsikees? (b) Haash yitʼéego Jiihóvah nihisodizin nihá yeʼoolííł?

⁷ Sodizin éí ílíinii doo yitʼíinii átʼé. Hakʼis hólǫ́ǫgo éí baa nitsídzíkeesii dóó ájítʼéii bee ahił hojilneʼ łeh. Jiihóvah bikʼis niidlı̨́įgiísh ákótʼé? Aooʼ! Jiihóvah  éí Diyin Bizaad choyoołʼı̨́įgo yaa nitsíkeesii dóó átʼéii yee nihił halneʼ. Jiihóvah bichʼįʼ sodiilzingo bee nihinitsíkees dóó nihijéí tsʼídá átʼéegi bee bił hwiilneʼ. Jiihóvah bichʼįʼ sodiilzingo dóó nihíistsʼą́ąʼgo yaa ahééh nízin. (Proverbs 15:8 yíníłtaʼ.) Akʼis ayóóʼóóʼníinii nahalingo, Jiihóvah nihisodizin yiyíistsʼą́ą́ʼ dóó nihá yeʼoolííł. Bíká sodiilzinígíí éí łahdi tsxı̨́įłgo nihá yiʼiiłʼįįh łahda éí tʼáá bíká sozdilzin łeh. Ndi bééhózínígo éí bikʼi hoolzhiizhdi nihichʼįʼ ééhodoosįįł. Łahdi tʼáadoo naólníinii hakʼijįʼ kóyiiłʼįįh. Nanihíhodiʼnitaah ládą́ą́ʼ, hódzą́ dóó adziil nihaidooléełgo “bídanoołʼą́ą doo.”—1 Cor. 10:13.

8. Sodizin bee nihaa hajoosbaʼgi haash yitʼéego baa ahééh daniidzingo ííshjání ádeilʼı̨́į doo?

⁸ Sodizin bee nihaa hajoosbaʼii nihił nilı̨́įgi haash yitʼéego baa ahééh daniidzingo ííshjání ádeilʼı̨́į doo? Diyingo naʼnitin áníigo “t’áá áłahjįʼ sodadołzin leʼ.” (1 Thess. 5:17) Jiihóvah éí sodiilzinígíí doo yínihiniłchéeh da. Ákondi, Jiihóvah bił nilı̨́įgo tʼáá nihí ádeiniidzingo “tʼáá áłahjįʼ sodadołzin” nihiłní. (Rom. 12:12) Ahééh niidzingo éí tʼáá áłahjįʼ sodiilzin doo áádóó Jiihóvah baa dahwiiʼniih doo.—Ps. 145:​2, 3. 

9. Haash yitʼéego nihibrother Chris sodizin yaa nitsíkees? Nishąʼ haitʼéego baa nitsinikees?

⁹ Jiihóvah nízaadgóó bá neiilʼaʼgo dóó nihisodizin nihá yiʼoolíiłgo yéigo sodizin baa ahééh niidzin. Nihibrother Chris éí 47dóó baʼaan nááhai full-time servicegi Jiihóvah bá nijilʼaʼ. Éí ání: “Abínígo nídiishnahgo Jiihóvah bichʼįʼ sodiszin, éí baa ahééh nisin. Haʼaʼaahgo Jiihóvah bichʼįʼ sodiszingo tʼáá íiyisíí hózhóní yeeʼ! Díí yáʼádaatʼéehii baa nitséskeesgo Jiihóvah tʼáá ałtso shá áyiilaaígíí ahéheeʼ bidishní. Áádóó eʼeʼaahgo sodíszįįhgo baa shił hózhǫ́ dóó nizhónígo ííshwosh.”

10. Haʼátʼíí biniyé God biníłchʼi diyinii nihił ílı̨́į doo?

¹⁰ God biníłchʼi diyinii doo deiitʼı̨́į da ndi tʼáá íiyisí ílı̨́. Jesus ánihiłní tʼáá áłahjįʼ níłchʼi diyinii bíká sodadołzin. (Luke 11:​9, 13) Níłchʼi diyinii binahjįʼ, Jiihóvah nihíká análwoʼ—‘aláahdi bidziilgo’ ánihósin. (2 Cor. 4:7; Acts 1:8) God biníłchʼi diyinii nihíká análwoʼgo, nanihíhwiʼdinitaahgo éí bee hadaʼííníilní.

11. Haash yitʼéego níłchʼi diyinii nihíká análwoʼ dooleeł?

¹¹ Níłchʼi diyinii nihíká análwoʼgo éí Jiihóvah naanish nihaidiníʼánígíí hazhóʼoʼ íilʼı̨́į doo. Áádóó hazhóʼó íʼiilʼínígíí tʼáá bíniilʼánígíí átʼéego nihá áyósin. Náásgóó baa áhwiilyą́ągo bineilnish doo. Naanish yáʼátʼéehgo íilʼínígíí doo nihitsʼą́ą́dę́ęʼ da. Jiihóvah biníłchʼi diyinii tʼéiyá binahjįʼ naanish yáʼátʼéehgo ádeilʼı̨́.

12. Psalm 139:​23, 24 bikʼehgo, haʼátʼíísh bíká sodilzin doo?

¹² Jiihóvah biníłchʼi diyinii biiniikeedgo doo yáʼátʼéehii nihijéí biiʼ hólǫ́ǫgo nihá nahjįʼ kwíidoolííł. (Psalm 139:​23, 24 yíníłtaʼ.) Díí bíká sodadiilzingo, Jiihóvah biníłchʼi diyinii choyoołʼı̨́įgo, doo yáʼátʼééhgóó nitsídeikeesii baa ákodaniidzin yee nihíká adoolwoł. Jiihóvah bichʼįʼ sodadiilzingo doo yáʼátʼééhgóó nitsídeikeesii nahjįʼ kwíidoolííł. Ákwíitʼı̨́įgo, Jiihóvah bił bééhózin, bąąhígi átʼéii doo ádiilníił da dóó biníłchʼi diyinii tʼáá yee nihíká adoolwoł doo átʼé.—Eph. 4:30.

13. Níłchʼi diyinii haash yitʼéego baa ahééh niidzin?

¹³ Jiihóvah biníłchʼi diyinii choyoołʼı̨́įgi baa nitsíikeesgo, éí tsʼídá baa ahééh niidzin. Jesus tʼahdoo yáʼąąshgóó dighááh yę́ędą́ą́ʼ, bídahoołʼaahii yił hólneʼ: “Níłchʼi diyinii nihikʼi hooleʼgo bee adziilii nihee dahodooleeł, tʼáá átʼéé nítʼééʼ . . . índa nahasdzáán nidaneesʼą́ą́góó  shá dahołneʼ dooleeł.” (Acts 1:8) Saad yee haadzíʼígíí éí nizhónígo bohoolyaa. Níłchʼi diyinii áká análwoʼgo, kʼad éí Jiihóvah Yá Dahalneʼé 8.6 milliondóó baʼaan ánéelą́ą́ʼ nahasdzáán bikáaʼgi hólǫ́. Áádóó God bidineʼé tʼááłaʼí niidlı̨́įgo dah yiikahgo, biníłchʼi diyinii yee nihíká análwoʼgo díí bee ádaniitʼé: ayóóʼóʼóʼní, ił hózhǫ́, hashtʼehodítʼé, nízaadgóó haʼahóní, ajoobaʼ, yáʼátʼéehii, aʼahódlí, aʼohgo éʼétʼé, ádaa áháyą́. Díí éí “níłchʼi diyinii bineestʼąʼ” átʼé. (Gal. 5:​22, 23) Dooládóʼ baa hózhǫ́ǫgo níłchʼi diyinii nihaiyílá!

14. Nidahwiilneʼgo, háísh bił deíníilníísh?

¹⁴ Jiihóvah dóó yáʼąąshdę́ę́ʼ biorganization ‘bił deíníilníísh.’ (2 Cor. 6:1) Hooghan táahgo nidahwiilneʼgo bił nideilnish. Paul ání: “God bił deíníilníísh.” (1 Cor. 3:9) Hooghan táahgo nidahwiilneʼgo Jesus bił nideilnish. Jesus bídahoołʼaahii ííłní “ałʼąą dineʼé tʼáá ałtso ídahoołʼaahii danilı̨́įgo ádaahłeʼ.” Éí bikééʼdóó Jesus ájíní: “Nihił honishłǫ́.” (Matt. 28:​19, 20) Diyingo ndaalʼaʼí shąʼ? Diyingo ndaalʼaʼí bił deíníilníísh “haneʼ yáʼátʼéehii doo ninítʼiʼii . . . nahasdzáán bikáaʼgi kéédahatʼíinii” bił dahwiilneʼ. Éí baa ahééh hasin.—Rev. 14:6.

15. Diyin Bizaad biiʼdę́ę́ʼ baa chʼídahwiistʼánígíí łaʼ baa hólneʼ.

¹⁵ Jiihóvah yáʼąąshdę́ę́ʼ biorganization nihíká análwoʼ, éísh haʼátʼíí łaʼyoolííł? Haneʼ yáʼátʼéehii baa dahwiilneʼgo, łaʼ diné Jiihóvah baa íhwiideeshʼááł danízin. (Matt. 13:​18, 23) Yíká dadéezʼı̨́įʼii háishąʼ bíká adoolwoł? Jesus ání, éí ‘aTaaʼ . . . yaa honílóóz.’ (John 6:44) Áádóó Diyin Bizaad éí díí yee nihił halneʼ. Fílipaidi, Paul éí sáanii haneʼ yáʼátʼéehii yee yił nahasneʼ. Éí łaʼ asdzą́ą́ Lídiya wolyéego, Diyin Bizaad biiʼ baa chʼíhootʼą́: “Paul yee hahaasdzíʼígíí bee hashtʼeʼnitsízdookos biniyé Bóhólníihii [Jiihóvah] hajéí yidiisnááʼ.” (Acts 16:​13-15) Lídiya nahalingo, tʼóó ahayóí diné Jiihóvah bijéí yidiisnááʼ.

16. Nizhónígo nidahwiilneʼígíí, háísh baa dahwiiʼniih doo?

¹⁶ Nidahwiilneʼgo háí lá tʼáá íiyisíí nihíká análwoʼ? Paul nihił hólneʼ: “Shí Diyin God bizaad kʼidíílá, Apálas éí tó yił niyiizką́, nidi Diyin God tʼéí yidínéesą́. Áko kʼéézhʼdídléhígíí, doodaiiʼ tó ił nijiikaahígíí éí tʼáadoo jílíní da, nidi Diyin God éí tʼáá ákónéehee adíníséii nilı̨́.” (1 Cor. 3:​6, 7) Paul nahalingo, tʼáá átʼé nizhónígo nidahwiilneʼígíí éí Jiihóvah bee baa dahwiiʼniih.

17. God, Jesus, dóó diyingo ndaalʼaʼí “bił neiilnishii,” haash yitʼéego baa ahééh niidzin doo?

¹⁷ Haash yitʼéego God, Jesus, dóó diyingo ndaalʼaʼí “bił nideilnishii” baa ahééh niidzin doo? Diné haneʼ yáʼátʼéehii hazhóʼó bee bił dahwiilneʼ. Ląʼí ałʼąą átʼéego díí ádeilʼı̨́į doo, éí “dahasłą́ą́góó índa danihinághangóó” nidahwiilneʼ. (Acts 20:20) Ląʼígóó bił dahózhǫ́ǫgo tʼáá deiłtséhígíí yił nidahalneʼ. Doo yéédahósinígíí yił kʼé daʼahidiʼní dóó yił ahił nidahalneʼ. Yídaneedlı̨́įgo deidiitsʼaʼgo áádóó índa God biNahatʼaʼ yaa dahalneʼ.

18-19. (a) Haash yitʼéego tʼáá aaníinii diné bił dahwiilneʼ? (b) Haash yitʼéego Jiihóvah íhoołʼaahii yíká eelwod? Łaʼ baa chʼíhoníʼaah.

¹⁸ Álástsiiʼ éí kʼizhdilé dóó tó bił nijiikáah. Tʼáá ákótʼéego “God bił deíníilníísh”  tʼáá aaníinii éí diné bee bił dahwiilneʼ. Háiida tʼáá aaníinii yíneedlı̨́įgo, éí tʼą́ą́ʼ baa náádíídááł doodaiiʼ náánáłaʼda baa náádoodááł, áko éí tʼáá náásgóó íhoołʼaah doo. Baa nihił hózhǫ́ǫgo, Jiihóvah éí nihiBible student łahgo átʼéego nitsíkeesígíí yee yíká análwoʼ.

¹⁹ Raphalalani éí South Africadi naʼiiłdziihgo nahałahí jílı̨́ı̨́ ńtʼééʼ. Diyin Bizaad biyiʼdę́ę́ʼ yíhoołʼaahii yaa ahééh nízin. Ákondi Diyin Bizaad bóhojiiłʼą́ąʼgi ádaadin yę́ę doo bichʼįʼ yájíłtiʼgo éí yéigo há nantłʼa silı̨́ı̨́ʼ. (Deut. 18:​10-12) Tʼáá hazhóʼógo, God éí Raphalalani nitsíjíkees há hashtʼeyiilaa. Áádóó adigąsh nahjįʼ kójiilaa, azhą́ tʼáá éí tʼéí béeso bee ájíłʼı̨́ı̨́ ńtʼééʼ. Raphalalani, 60 binááhai, ájíní: “Jiihóvah Yá Dahalneʼé tʼóó ahayóigo shíká ííjééʼ éí ayóó baa ahééh nisin. Naanish shá hadeineeztą́ą́ʼ. Jiihóvah baa ahééh nisingo hashtʼeʼ nishinilóóz, kʼad Jiihóvah Yá Halneʼé nishłı̨́įgo hooghan tahgóó nahashneʼ.”

20. Haʼátʼíí tʼáá íiyisíí ádíínííł nínízin?

²⁰ Dı̨́įʼgo daʼílínígíí doo daatʼíinii bídahwiilʼą́ą́ʼ. Aláahdi ílínígíí éí Jiihóvah áhą́digo nihikʼis ííníilzin. Díí binahjįʼ, Jiihóvah bichʼįʼ sodiilzin, biníłchʼi diyinii bideíniikeedgo nihíká análwoʼ, dóó nidahwiilneʼgo yáʼąąshdę́ę́ʼ nihíká anájah. Díí daʼílínígíí doo daatʼíinii dooládóʼ baa ahééh daniidzin da. Jiihóvah bichʼįʼ sodiilzingo, ahéheeʼ, tʼáá íiyisíí shikʼis nilı̨́, bidiiʼní.