1. Ngera ngdilu Jesus el kirel a mekreos el klalo el ngar a eanged?

NGDIAK el rokui el sengk a sebeched el mes. E a mera er ngii, aike el kot el mekreos el sengk a diak lemoues. Ngar sel Cheldecheduch el Ngar er a Rois, e a Jesus a milsaod el kirel aike el sengk el ngar a eanged el lmuut lungil er a kerruul. E dilu el kmo: “A rengum a di mo blechoel el ngar sel le ngar ngii a mekreos el kloklem.” (Mt. 6:19-21) A rengud a oremelid el mo osiik a mekreos er a rengud el klalo. Me kede mengudel a ‘mekreos el klokled’ er a eanged sel lungil a delongeled kid me a Dios. A Jesus a milsaod el kmo chouaika el mekreos el klalo, a diak lsebechel metemall me a lechub e lemerechorech.

2. (a) A doltirakl er a 2 Korinth 4:17, 18, e a Paulus ngmengelechel er kid el mo ultaut a osenged er a ngerang? (b) Ngera kede mo mesaod?

² A apostol Paulus a mengelechel er kid me “di de ngellomel a . . . ikel diak le moues.” (Monguiu er a 2 Korinth 4:17, 18.) Aika el diak lemoues el mekreos el sengk a uldimukl er a klengeltengat el bo dengai er a chelsel a beches el beluulechad. Kede mo mesaod a eua el mekreos el diak lemoues el sengk, el sebeched el ngmai a klungioled er ngii er chelechang, el ngii a klausechelei er kid me a Dios, sengk el nglunguuch, ngelsuil a chedaol reng, me a ngeso el kirel a omesiunged el denguu er a Jehovah, Jesus, me a rechanghel. Kede dirrek el mo mesaod a rolel e kede mereng a sulel a Jehovah el kirel aika el sengk.

3. Ngera kot el ngarbab el diak lemoues el sengk? Kede mekerang e nguu ngii el sengk?

³ A kot el ngarbab el diak lemoues el sengk a klausechelei er kid me a Jehovah. (Psa. 25:14) Ngmekera e sebechel a Dios el  mo sechelirir a rediak lemecherrungel el chad e di melemolem el chedaol? Ngokiu a olubet el tengetengel a Jesus e ng “melubet a kngtil a beluulchad!” (Jn. 1:29) A Jehovah a mle medengei el kmo, a moktek er ngii el mo olsobel er a rechad a diak lemeterob. Tiaikid a uchul me a Dios a sebechel mo sechelirir tirke el kiliei er a uchei er a lemad a Kristus.​—Rom 3:25.

4. Mosaod er a rechad er a irechar el mlo sechelil a Dios.

⁴ Ka dolatk er a rechad er a irechar el mlo sechelil a Dios. A Abraham a kmal mle mesisiich a klaumerang er ngii. Kuk betok er a 1,000 el rak er a uriul er a lemad, e a Jehovah a ulemekedong er ngii el ‘sechelil.’ (Isa. 41:8) Ngmo lmuut er a kodall me ngdiak lsebechel choridii a Jehovah er a rekmeed el sechelil. E ngar osengel, e a Abraham a dirk ngar. (Lk. 20:37, 38) A kuk ta er a olechotel a Job. Sera lekldibel er a eanged a rechanghel, e ngkmal mle ulterekokl a tekingel a Jehovah el kirel el kmo, ng “blak a rengul e ungil . . . ng meluu er ngak e kerekikl el diak a ngeral le rellii el mekngit.” (Job 1:6-8) E kuk mle uangera uldesuel er a Daniel, el mle blak a rengul mesiou er Ngii el bekord el 80 el rak er a chelsel a beluu el milengull a klsuul chelid? Ngmle edei el taem el rechanghel a subedii el kmo a “Dios a betik a rengul er kau.” (Dan. 9:23; 10:11, 19) Me ngulterekokl a rengud el kmo a Jehovah a kmal soal mo olekiis er a rebetik er a rengul el sechelil.​—Job 14:15.

5. Kede mekerang e mo kmeed el sechelil a Jehovah?

⁵ Ngtela ildisir a rediak lemecherrungel el chad el dmeu a rengrir er a klausechelei er tir me a Jehovah? Te betok el miliol. Meliuekl er a beluulechad e a rebetok el sechal, redil me a rengalek a olecholt el kmo te mera el sechelil a Dios. A Jehovah a “kmeed er a re melemalt.” (Osi. 3:32) Tia el klausechelei a sebechel meketmokl e le ngklaumerang er tir el kirel a olubet el tengetengel a Jesus a uchul. Me ngokiu tiang, e a Jehovah a kongei er kid el tuib a rengud el mo er ngii e mo metecholb. Me sel deruul aikang, e kede mo teloi er a rebetok el miliol el mla tuib a rengrir e mo metecholb el Kristiano el tir a “kmeed” er ngika el Kot el Ngarbab el Dios!

6. Ngmekera doreng a saul el kirel a klausechelei er kid me a Dios?

⁶ Ngmekera dochotii el kmo kede mengreos er a klausechelei er kid me a Dios? A Abraham me a Job a millemolem el blak a rengrir el betok el dart el rak, me kid me ngkired el melemolem el blak a rengud el diak lultuil er a ildisel a rak el bla dosiou er a Jehovah el ngar tia el mekngit el blekeradel. E kired el oukerebai er a Daniel el nguu a klausechelei er kid me a Dios el mo ruchei er a rokui el tekoi. (Dan. 6:7, 10, 16, 22) Ngoeak a ngelsuil a Jehovah, e ngmo sebeched loutekangel a ngii di el ringel, e lomelemii a klausechelei er kid lobengkel.​—Fil. 4:13.

7. (a) A doltirakl er a Osisechakl 15:8, e ngua ngera uldesuel a Jehovah el kirel a nglunguched? (b) Ngmekera Jehovah a longer a nglunguched?

⁷ A ta er a diak lemoues el sengk a nglunguuch. A rekausechelei el chad a kmal sorir el kauchais er a delongelir aike el ngar a rengrir me a uldesuir. Tiang klemerang el kirel a klausechelei er kid me a Jehovah? Ochoi! A Jehovah a mengedecheduch er kid lokiu a Tekingel, e ngar a tekingel e ngouchais aike el ngar a uldesuel me a rengul. Kede mengedecheduch er ngii lokiu a nglunguuch, e sebeched louchais er ngii a dmolech el uldesued me a ngar a rengud. A Jehovah a dmeu a rengul lorrenges a nglunguched. (Monguiu er a Osisechakl 15:8.) Ngbetik a rengul el Sechelid, me ngdiak di lorrenges a nglunguched, e ngdirrek el longer. A lebebil e kede mereched  el nguu a nger er a nglunguched. E a lebebil e nglocha mo kired el di meluluuch. Me nguaisei, engdi ngsebechel mo ulterekokl a rengud el kmo ngmo onger er kid er sel kot lungil temel loeak a kot lungil rolel. A lebebil e a nger er a Dios a kuk ngodech er a tekoi el dullatk er ngii. El ua tiang, nglocha diak lenguu a ringel el oridii er kid, e ngbai meskid a “klisiich el mtekengelii.”​—1 Ko. 10:13.

8. Ngmekera dochotii a omereng el saul el kirel a sengk el nglunguuch?

⁸ Ngmekera dochotii a omereng el saul er kid el kirel a mekreos el sengk el nglunguuch? Ngokiu sel dolengesenges er a Jehovah el mo ‘meluluuch el di blechoel.’ (1 Th. 5:17) A Jehovah a diak lorrimel er kid el mo meluluuch. Ngbai mengull er a ilmekled el melilt a tekoi, e mengelechel er kid el “di blechoel el meluluuch.” (Rom 12:12) Me ngsebeched lochotii a omereng el saul lokiu sel deblechoel el meluluuch er a bek el sils. Ngdirrek el ngar a nglunguched e lak dobes el mereng a sulel a Jehovah e dodengesii.​—Psa. 145:2, 3.

9. Ngua ngera uldesuel a ta el odam el kirel a nglunguuch, e uangera uldesuem el kirel tiang?

⁹ A klemengetel a taem el dosiou er a Jehovah e deues a rolel e ngonger a nglunguched, e ngmedechel a omereng el saul er kid el kirel a sengk el nglunguuch. Molatk er a odam el Chris, el mla mesiou el mui el taem er aika el mereko el 47 el rak. Ngdmu el kmo “Ngkmal soak lomkokl a letutau el meluluuch el mora Jehovah. Ngkmal melisiich er a renguk sel kungedecheduch er Ngii e kumes er a roech er a sils el melidiich a nguches er a dirk tutau! Tia rullak me ak mereng a sulel er a rokui el sengk er ngii, el uldimukl er a techall er a nglunguuch. E sel kululuuch a lekebesengei, e ngkmal ungil a renguk el mo mechiuaiu el klikiid a ukltkek.”

10. Ngera uchul me ngkired el mengreos er a chedaol reng er a Dios?

¹⁰ A chedaol reng er a Dios a ta er a diak lemoues el sengk. A Jesus a milengelechel er kid el di meluluuch lolengit er a chedaol reng.  (Lk. 11:9, 13) Ngokiu a chedaol reng, e a Jehovah a meskid a “klou el klisiich.” (2 Ko. 4:7; Rel. 1:8) Ngoeak a ngelsuil a chedaol reng, e ngsebeched loutekangel a ngii di lomelsemai el bo dechelebangel.

11. Ngokiu a ngera el rolel e a chedaol reng a ngosukid?

¹¹ A chedaol reng a ngosukid el mo ungil rullii a omesiunged el mora Dios. Ngsebechel rullid el mo klou a duch er kid el meruul a ngerecheled el Kristiano. Kede medengei el kmo a ungil tekoi el meketmokl er a omesiunged, a meketmokl el okiu a ngelsuil a chedaol reng el diak lokiu kid.

12. A doltirakl er a Psalm 139:23, 24, e ngsebeched lolengit er a chedaol reng me lengesukid el mekerang?

¹² A ta er a rolel e kede ochotii el kmo kede mengreos er a chedaol reng, a sel doluluuch lolengit me lengesukid el merriter a mekngit luldesued me a lechub a urunguled. (Monguiu er a Psalm 139:23, 24.) Me a lsekum kede meluluuch lolengit er tiang, e a Jehovah a mo ousbech er a reng er ngii el ngosukid el mo medengei a mekngit luldesued me a urunguled. E sel bo dodengei, e ngkired el meluluuch lolengit er a reng er a Dios me lebeskid a klisiched el mo oltngakl chouaika el tekoi. A doruul uaisei, e a Jehovah a mo medengei el kmo ngdiak el soad el meruul a ngii di el ngerang el mo uchul me ngmo diak lousbech er a reng er ngii lolengeseu er kid.​—Efe. 4:30.

13. Ngmekera e lmuut el mo dmolech a omereng el saul er kid el kirel a chedaol reng?

¹³ Nglmuut el mo dmolech a omereng el saul er kid el kirel a chedaol reng lokiu sel dolatk a tekoi el bla leketmokl er chelechang. A uchei er a lebo er a eanged a Jesus, e ngdilu er a redisaiplo er ngii el kmo: “Ngdi sel le mer kemiu a Chedaol Reng, e ng mor ngii a klisichiu, me kom mo ochotek . . . el mo lmuut er a bek el beluu er a beluulchad.” (Rel. 1:8) Aika el tekoi a toutang er chelechang. Ngokiu a ngelsuil a chedaol reng, e a bekord el eai me a tedobech el miliol el meliuekl er a beluulechad a mla mo mengull er a Jehovah. Te dirrek el kiei el ngar a kltarreng me a budech, e le chedaol reng a ngosuterir el  mo olecholt a ungil blekeradel el ua bltikerreng, deurreng, budech, kllourreng, blekokuii, ungilreng, blakerreng, delemedemek me a ulserechakl el reng. Aika el blekeradel a toketekii a “rodech ra Reng.” (Gal. 5:22, 23, BT) Ngmera el mekreos tia el chedaol reng!

14. Ngera el diak lemoues el ngeso a dobang sel doruul er a omesiunged?

¹⁴ Ngdirrek el ngar ngii a ta er a diak lemoues el sengk er kid, el sel ‘doureor el obengkel’ a Jehovah, Jesus me a rechanghel. (2 Ko. 6:1) Kede meruul er tiang sel doruul er a omesiunged. A Paulus a milsaod er ngii me tirke el ulebengkel el kmo: “Kemam a di kldemel a Dios er a ureor.” (1 Ko. 3:9) Molatk er a Jesus er a uriul er a longelechel er a rultirakl er ngii el kmo “morael el mor a bek el bedengir a re chad er ker me ker e moruul er tir el mo obengkek,” e dirrek el dilu el kmo: “Ngak a mo obengkemiu.” (Mt. 28:19, 20) E a rechanghel a kuk mekerang? Kede kmal mereng a saul e le te omekrael er kid sel domerk er a “klumech er a Ungil Chais . . . el mor tirkel kiei er a beluulchad”!​—Och. 14:6.

15. Mosaod er a kerebai er a Biblia el ochotii a klungel a ultutelel a tekoi el loruul a Jehovah el ngar a omesiunged.

¹⁵ Me ngera ngmla kutmokl aika el ngeso el ngar a eanged? Sel domerk er a klumech er a Renged, e a bebil tane a medalem er a rengrir a rurrenges e mukeroul. (Mt. 13:18, 23) Ngtecha ngike el remuul aike el tane el mukeroul e mo ourodech? A Jesus a milsaod el kmo ngdiak a chad el sebechel mo oltirakl er ngii “a lak le Chedam . . . a mekrolii.” (Jn. 6:44) A Biblia a meskid a olechotel tiang. Molatk er a taem el Paulus a uluusioning el mora cheldellir a redil er a ikrel a mats er a Filipi. Momtab er a omesodel a Biblia el kirel a ta el redil el ngklel a Lydia el kmo a Jehovah a “diledesii a rengul me ng mle blak a rengul el orrenges a ikel lolekoi a Paulus.” (Rel. 16:13-15) A rebetok el miliol a di ua Lydia el Jehovah a mla mo kmeed er tir.

16. Ngtecha rredemelel a chetengakl el mo er ngii lokiu a omesiunged?

¹⁶ Ngtecha rredemelel a chetengakl sel lemeketmokl a ungil tekoi er a omesiunged? A Paulus a uleker er tia el ker er a loluches el kirel a ongdibel er a Korinth el kmo: “Ngak a mlo dolemii a dellomel, e a Apolos a millubs er ngii er a ralm, e ngdi Dios ingii ia uchul e ng merrael ngii el dellomel el mo klou. Me ngikel melalem me ngikel melubs a diak le klou a ultutelir; ng bai di Dios a klou a ultutelel, ele ng ngii ia omekeroul er a dellomel.” (1 Ko. 3:6, 7) Me kede di ua Paulus el kired el msa rokui el chetengakl a Jehovah el kirel a ungil tekoi el duubech er a omesiunged.

17. Ngmekera dochotii a omereng el saul er kid e le kid el “oureor el obengkel a Dios,” me a Kristus me a rechanghel?

¹⁷ Ngmekera dochotii a omereng el saul el kirel tia el techelled el “oureor el obengkel a Dios,” me a Kristus me a rechanghel? Ngsebeched el meruul er ngii lokiu sel bo leblak a rengud losiik a bek el techall el omerk er a ungil chais el mora rechad. Ngar ngii a betok el rolel e kede meruul er tiang, el ua sel dousioning el mora ‘seked ma obliil.’ (Rel. 20:20) A rebetok a dirrek el sorir el omerk er a klumech er a ngii di el taem. Me sel lebetik er a chad el diak lodengelii, e te outkeu er ngii e melasem lomuchel a cheldecheduch lobengkel. Me a lsekum ngkongei el mengedecheduch, e te mechelii a omesodel a klumech er a Renged.

18-19. (a) Ngmekera dolubs er a tane er a klemerang? (b) Msodii a tekoi el dilubech lochotii a rolel e a Jehovah a ngilsuir a chad el mesuub er a Biblia.

¹⁸ Kid el “kldemel a Dios er a ureor” me  ngdiak di dolalem a tane er a klemerang, e ngdirrek el kired el melubs er ngii. Me a lsekum a chad a semeriar, e ngsoad el lmuut el mong e mengedecheduch er ngii me a lechub e kede oterekeklii er a ta er a chad me ngmong e melasem lomuchel a omesubel a Biblia lobengkel. Me sel lolengeriakl er a omesubel, e ngmo dmeu a rengud el mesa rolel e a Jehovah a ngosuir el mo melodech er a uldesuel me a rengul.

¹⁹ Molatk er a Raphalalani, el chad er a olai er a South Africa. Ngkmal mlo soal a tekoi el lesiluub er a omesubel er a Biblia. Engdi ngkmal mle meringel er ngii el kongei a Tekingel a Dios el kirel a dongedecheduch er a remla mad el chedad. (Dut. 18:10-12) Cherengel a taem, e ngmilecherei a Dios me ngmelodech er a uldesuel. E a uriul e ngchilitii tia el urerel, alta e ngdi tiaikid a mle uchul a kerrekerengel. A Raphalalani, el mla mo 60 a rekil er chelechang a kmo: “Ak mereng a sulir a Resioning er a Jehovah el ngilsukak er a betok el rolel, el ua sera lengesukak el sikii a urerek. Engdi a ngaruchei, e ak mereng a sulel a Jehovah el ngilsukak el kikidii a klengar er ngak, me chelechang e ngsebechek el teloi er a omesiou el ta er a Sioning er ngii.”

20. Ngsoam el mo mekerang?

²⁰ Me kede milsaod el kirel a eua el diak lemoues el sengk. E sel kot el ngarbab er ngii el rokui, a techelled el mo kmeed el sechelil a Jehovah. Tia rullid me ngsebeched el ngmai a klungioled er aike el kuk bebil el diak lemoues el sengk, el nglunguuch, me a ngelsuil a chedaol reng, me sel dolechesuar a ngeso er a omesiunged el mla er bab el mei. Me ngsoad el lmuut el mekurulii a omereng el saul el kirel aika el diak lemoues el sengk. E dolemolem el mereng a sulel a Jehovah el ngii a kot lungil Sechelid.