LONGO DIA 22
Khala Muhana Mersi Mukunda nu Ima ya Ndando Inyi Tuanago Gumona
‘Hagenu meso enu . . . gu ikumba ishigo mumonewa. Handaga ikumba inyi yana monewa idi ya tangua diazonda, uvi ikumba inyi ishigo mumonewa idi mukhala ivo nu ivo.’—2 KOL. 4:18.
LUNGIMBO 45 “La méditation de mon cœur”
NDAGA JIDI MU LONGO EDI *
1. Ndaga itshi Yesu gazuelele mukunda nu umonyi wa mu dilu?
IMA yagasue ya ndando yana monewa ndo. Ima yabalega diago ndando yanago gumonega gu meso. Mu lumene luenji holu dia mulundu, Yesu wamonesele egi umonyi wa mu dilu udi nu ndando yavula gubalega umonyi wa ha mavu nga falanga. Wazuelele egi: ‘Fundo didi umonyi waye, guene gudi nji mutshima waye.’ (Mat. 6:19-21) Mutshima wetu mbawututuma ha gulandula gukamba ndaga tuana zula nu ndando. Mbatubamba ‘umonyi mu dilu’ gula tudi nu makalegelo abonga gu meso a Nzambi. Yesu wazuelele egi umonyi wene wajiyilego guzangelewa nga gukuyiwa.
2. (a) Ha gutadila 2 Kolinto 4:17, 18, mupostolo Phaula udi gututoga ha guhaga meso gu itshi? (b) Itshi tuza muzuelela mu longo edi?
2 Mupostolo Phaula udi gututoga ha ‘guhaga meso . . . gu ima ishigo mumonewa.’ (Tanga 2 Kolinto 4:17, 18.) Mukatshi dia ima yene ishigo mumonega, tuajiya gutanga ishimbigo yagasue mbatuheta mu mavu ahe-ahe a Nzambi. Mu longo edi, tuza mumona ndaga jia ndando nguana tuajiya guheta sendese mangino: Gukuata ufuta nu Nzambi, gisambu, ukuateshi wa nyuma yabonga nu ukuateshi wa mu dilu tuana heta mu mudimo wa gulongesa. Tuza mumona luko luholo tuajiya gumonesa egi tuana suanguluga nu ima inyi tuanago gumona.
GUKUATA UFUTA NU YEHOWA
3. Gima giabalega ndando ginyi gianago gumonega gidi itshi? Itshi yana gutukuatesa ha gukuata ufuta nu Nzambi?
3 Gima giabalega ndando ginyi gianago gumonega gidi gukuata ufuta nu Yehowa. (Ngi. 25:14) Luholo lutshi Nzambi wa gijila wajiya gukuata ufuta nu athu ashigo atagana? Wajiya gukuata nawo ufuta handaga mulambu wa Yesu ‘wana katula gubola gua athu a ha mavu’. (Yone 1:29) Yehowa wadiangele gujiya egi felela dienji dia guhuluisa athu diajiyilego gubola. Hene gakuatele ufuta nu athu ako gutuama egi Yesu aze ha mavu nu ashiyiwe.—Lomo 3:25.
4. Hana ifezegeselo ya athu anyi akhalele mafuta a Nzambi gutuama egi Yesu aze ha mavu.
4 Tutadile ifezegeselo ya athu akhadile mafuta a Nzambi gutuama egi Yesu aze ha mavu. Abalahama wakhalele nu gutshigina guakola gudi Nzambi. Tangua Abalahama gafuile, ivo yabalegele 1000 nu holu; gungima Yehowa wamutamegele egi “futa diami.” (Yesh. 41:8) Yakotelesa egi gufua guajiyilego gubatula ufuta Yehowa gakhala nawo gudi akombeledi enji. Mu matangi a Yehowa, Abalahama yowu genji nu monyo. (Luka 20:37, 38) Tuzuelelenu giwa Yobo. Yehowa wazuelele ndaga jiatadila Yobo gutuama dia anjelo agasue tangua akhalele agudibungisa. Yehowa wamutamegele egi ‘muthu wabonga, wagujinginyina, wana guvuila Nzambi woma nu wana tuna ndaga jiabola.’ (Yobo 1:6-8) Yehowa wadivuile luholo lutshi mukunda nu Danyele yonu wakhalele gumukombelela mu gifutshi gia aphagano ivo hehi nu 80? Anjelo awambelele Danyele mahugo thathu egi wakhalele ‘muthu wa ndando’ gutuama dia Nzambi. (Dan. 9:23; 10:11, 19) Tudi muhaga mutshima egi Yehowa udi munengena diago lusugu lunu mbalufuzumuna muene mafut’enji anyi afuile gale.—Yobo 14:15.
Mu maluholo atshi tuajiya gumonesa egi tuana suanguluga nu ima ya ndando inyi tuanago gumona? (Tala paragrafe 5) *
5. Ha gukuata ufuta wakola nu Yehowa yana toga itshi?
5 Mangino athu guvula gutshi ana khala nu ufuta wakola nu Yehowa? Avula diago. Tuazuela ngenyi handaga mangino athu avula, mala, akhetu nu ana a ha mavu agasue adi mumonesa mu makalegelo awo egi adi mutshigina gukhala mafuta a Nzambi. Yehowa wana ‘kuata ufuta nu athu abonga.’ (Ish. 3:32) Ha gukuata ufuta wene, athu adi naye guhaga gutshigina gu mulambu wa Yesu. Mukunda nu mulambu wene, tuajiya gudihana gudi Yehowa nu gubatijiwa. Gula tuakalagala ndaga eji, mbatungina mukatshi dia Aklisto anyi adihanele nu abatijiwe gale, adi nu ‘ufuta wakola’ nu Muthu wabalega gukoma gosa nu hashi!
6. Luholo lutshi tuajiya gumonesa egi tuana gusuanguluga nu ufuta tuakhala nawo nu Nzambi?
6 Luholo lutshi tuajiya gumonesa egi tuana zula ufuta wetu nu Nzambi nu ndando? Abalahama nu Yobo akhalele agujinginyina gudi Nzambi ivo yavula. Esue nji tuajiya gusala agujinginyina, ngatshima tuakalagala gale ivo yavula mu mudimo wa Yehowa ha mavu awa a Satana. Tudi naye guzula ufuta wetu nu Nzambi nu ndando gubalega monyo wetu gifua muatshitshile Danyele. (Dan. 6:7, 10, 16, 22) Yehowa mbawutukuatesa ha gukolesela mu malamba agasue tuajiya gutagana nawo, gula tudi nu ufuta wakola n’enji.—Fili. 4:13.
GISAMBU
7. (a) Ha gutadila Ishima 15:8, luholo lutshi Yehowa gana gudivua mukunda nu isambu yetu? (b) Luholo lutshi Yehowa gana hana mvutu gu isambu yetu?
7 Gima giko gia ndando tuanago gumona gidi gisambu. Mafuta abonga ana gudiwambela ndaga jiagasue. Yajiya gukhala ngenyi nu ufuta wetu nu Yehowa ba? Ayi! Yehowa wana guta maga nu esue mu njila ya Mbimbi yenji, nu wana gutuwambela matangi enji nu luholo gadi gudivua. Esue tuana guta n’enji maga mu gisambu, tuana gumuwambela matangi etu nu luholo tuana gudivua. Yehowa wana suanguluga gutegelela isambu yetu. (Tanga Ishima 15:8.) Yehowa wakhala futa wa guzumba, handaga wana gutegelela isambu yetu, nu wana guhana mvutu gu isambu yene. Matangua ako wana hana mvutu muphushi. Uvi matangua ako, tudi naye gulandula gusamba mukunda nu ndaga tudi naye. Tudi naye guhaga mutshima egi mvutu mbayiza mu tangua diabonga nu mu luholo luabonga. Nzambi wajiya guhana mvutu mu luholo tuakhalelego mutangiza. Ha gufezegesa, ha fundo dia gukatula malamba tudi nawo, muene wajiya gutuhana ndunge nu ngolo jia ‘gukolesela malamba’ ene.—1 Kol. 10:13.
(Tala paragrafe 8) *
8. Luholo lutshi tuajiya gumonesa egi tuana suanguluga nu luendu lua gukalagala gisambu?
8 Luholo lutshi tuajiya gumonesa egi tuana suanguluga nu luendu lua gukalagala gisambu? Tuana gumonesa tangua tuana tumagela mbimbi ya Yehowa idi muzuela egi, ‘kombeledienu tangua diagasue.’ (1 Tes. 5:17) Yehowa ganago gutushinjiga ha gusamba. Uvi wana gunemesa luendu luetu lua guditombela ndaga, nu wana gututoga ha “gufubidila mu gukombelela.” (Lomo 12:12) Hene, tuajiya gumonesa egi tuana suanguluga nu gisambu tangua tudi musamba muavula lusugu nu lusugu. Ayi, tudi naye gutumbuisa nu guhana Yehowa mersi mu isambu yetu.—Ngi. 145:2, 3.
9. Luholo lutshi phangi mumoshi gana gudivua mukunda nu gisambu? Uvi aye giwa, wana gudivua gikuatshi?
9 Tangua tudi mukombelela Yehowa nu tudi mumona luholo gadi muhana mvutu gu isambu yetu, mbatusuanguluga muavula nu luendu lua gukalagala gisambu. Tuzangule gifezegeselo gia phangi Chris, yonu wabalegesele gale ivo 47 mu mudimo wa tangua diagasue. Udi muzuela egi: “Ngana gusuanguluga gusendesa lusugu luami nu gisambu ha gutumbuisa Yehowa. Yakhala ndaga yawaha ha guta maga nu Yehowa mu gisambu mu gimenegena, tangua ndaga jiagasue jiakhala jiabonga! Gutshita ngenyi guana gungukuatesa ha gumuhana mersi mukunda nu ima yagasue yanguhanele muene, nu luendu lua gisambu. Mu ngueze yagasue gula ngatshita gisambu, ngana banda nu mutshima wa phelegeta.”
NYUMA YABONGA
10. Mukunda natshi tudi naye guzula nyuma ya Nzambi nu ndando?
10 Gima giko gia ndando tuanago gumona gidi nyuma ya Nzambi. Yesu watuwambelele ha gulandula gusamba ha gutoga nyuma yabonga. (Luka 11:9, 13) Mu njila ya nyuma yabonga, Yehowa wana gutuhana “ngolo jiabalega gukoma.” (2 Kol. 4:7; Makal. 1:8) Nyuma ya Nzambi yajiya gutukuatesa ha gulua nu malamba.
(Tala paragrafe 11) *
11. Mu luhulo lutshi nyuma ya Nzambi yajiya gutukuatesa?
11 Nyuma ya Nzambi yajiya gutukuatesa ha gutagenesa inemo mu mudimo wa Yehowa. Yajiya gutukuatesa ha gukudisa luko ndunge tuakhala najio. Yajiya nji gutukuatesa ha gutagenesa inemo iko mu hungu. Gula tuaheta mbuto jiabonga, tushigo naye guditumbuisa hakhetu uvi tudi naye gutumbuisa Nzambi.
12. Ha gutadila Ngimbo 139:23, 24, tuajiya gutoga nyuma ya Nzambi hagula itukuatese ha gutshita itshi?
12 Luholo luko tuajiya gumonesa egi tuana suanguluga nu nyuma ya Nzambi ludi, guyitoga mu gisambu ha gutukuatesa tujiye matangi nu nzala jiabola jidi mu mutshima wetu. (Tanga Ngimbo 139:23, 24.) Gula tuatoga nyuma yene, Yehowa mbawutukuatesa ha gujiya matangi etu nga nzala jietu jiabola. Gula tuajiya matangi nu nzala jiene, tuajiya gutoga nyuma ya Nzambi ha gutukuatesa ha gubinga matangi ene abola. Gutshita ngenyi gudi mumonesa egi, tuazudi desizio dia gutuna gutshita ndaga imoshi yabola yajiya gutuma Yehowa ha gutuna gutukuatesa nu nyuma yenji yabonga.—Ef. 4:30.
13. Luholo lutshi tuajiya gukudisa khadilo dietu dia guhana mersi mukunda nu nyuma yabonga?
13 Tuajiya gukudisa khadilo dia guhana mersi mukunda nu nyuma yabonga, gula tuatangiza ndaga nyuma yene yana kalagala mu masugu etu. Gutuama egi Yesu avutuge mu dilu, wawambelele alandudi enji egi: ‘Mbamuheta ngolo tangua nyuma yabonga mbayimibulumugila, nu mbamukhala alondolodi ami . . . uu nu gu gisugishilo gia mavu agasue.’ (Makal. 1:8) Mbimbi jiene jidi diago mutaganesewa mangino. Nyuma yabonga yakuatesele gale athu gubalega 8 milio a ha mavu agasue ha gubua Matemue a Yehowa. Luko, tudi mu phaladiso ya mu nyuma, handaga nyuma ya Nzambi yana gutukuatesa ha gukudisa makalegelo abonga gifua: Guzumba, gusuanguluga, guhuima, guhuiminyina, gisemo, mutshima wabonga, gutshigina, gutuluga nu gudikanda. Makalegelo awa ana gutamegewa egi ‘bundu dia nyuma yabonga.’ (Gal. 5:22, 23) Nyuma yabonga idi diago kado gabonga gatuhuile Nzambi!
UKUATESHI WA MU DILU TUANA HETA MU MUDIMO WA GULONGESA
14. Ukuateshi utshi uko tuanago gumona tuakhala nawo tangua tuana longesa lukuma luabonga?
14 Gima giko gia ndando gianago gumonega tudi nagio gidi, ‘gutshita hamoshi’ nu Yehowa nu gitshinyi gia ulondegi wenji wa mu dilu. (2 Kol. 6:1) Tuana gutshita nawo hamoshi tangua tuana kalagala mudimo wa gubuisa athu alandudi. Phaula wazuelele mukunda nu muene nu mukunda nu athu ana gutshita mudimo wene egi: ‘Tudi mafuta a mudimo a Nzambi.’ (1 Kol. 3:9) Tangua tuana guya mu mudimo wa gulongesa, tuana gubua nji mafuta a mudimo a Yesu. Gungima dia gutuma alandudi enji ha ‘gubuisa athu a ifutshi yagasue alandudi,’ Yesu wazuelele egi: ‘Ngudi nu enue.’ (Mat. 28:19, 20) Henyaha anjelo giwa? Tuana khala nu luendu lua gutuamezewa gudi anjelo ha gulongesa ‘lukuma luabonga lua ivo nu ivo . . . gudi athu a ha mavu agasue’!—Yat. 14:6.
15. Hana gifezegeselo gia Biblia gidi mumonesa ginemo gidi nagio Yehowa mu mudimo wa gulongesa.
15 Ukuateshi owu wa mu dilu wana gutukuatesa ha gutshita itshi? Tangua tuana kuna mbuto jia Ufumu, khenyi jiko jiana gubua mu mitshima yabonga nu jiana gukula. (Mat. 13:18, 23) Nanyi giwa wana zola mbuto jiene hagula jihage mabundu? Yesu wazuelele egi gushigo nga muthu wajiya gubua mulandudi wenji gula ‘Tata . . . gamunanenego.’ (Yone 6:44) Biblia idi gutuhana gifezegeselo giabonga gu ndaga eyi. Tangiza ndaga yakalegewe tangua Phaula gakhalele mulongesa thundu ya akhetu hanze ya dimbo dia Filiphi. Biblia idi muzuelela mukhetu mumoshi mu jina dia Lydia egi: ‘Yehowa watuwile mutshima wenji ha guvua ndaga jiakhalele muzuela Phaula.’ (Makal. 16:13-15) Athu avula mangino ana gunanewa gudi Yehowa gifua Lydia.
16. Nanyi tudi naye gutumbuisa gula tuazola mbuto yabonga mu mudimo wa gulongesa?
16 Nanyi tudi naye gutumbuisa gula tuazola mbuto yabonga mu mudimo wa gulongesa? Phaula wahanele mvutu gu muhu owu tangua gasonegele mbimbi eji gu hungu dia gu Kolinto egi: “Ame ngakunyine mbuto, Apholo wambidile meya, uvi Nzambi wayikudishile, ngenyi yago udi mukuna nu udi mumba meya gashigo nu ndaga, khuta Nzambi udi mukudisa.” (1 Kol. 3:6, 7) Gifua Phaula, tudi naye gutumbuisa Yehowa mukunda nu mbuto yabonga tuajiya guheta gu mudimo wa gulongesa.
17. Luholo lutshi tuajiya gumonesa egi tuana suanguluga ‘gutshita hamoshi’ nu Nzambi, nu Klisto nu anjelo?
17 Luholo lutshi tuajiya gumonesa egi tuana suanguluga nu luendu lua ‘gutshita hamoshi’ nu Nzambi, nu Klisto nu anjelo? Tuajiya guyimonesa tangua tudi mukamba ba okazio a gulongesa athu ako nu gikhesa giagasue. Gudi nu maluholo avula a guyitshita, gifua gulongesa ‘ha fundo dia athu avula nu inzo nu inzo.’ (Makal. 20:20) Avula ana suanguluga gulongesa gula atagana nu okazio. Gula atagana nu muthu ashigo mujiya, ana gumumenega nu gisemo giagasue nu ana sendesa guta n’enji maga. Gula muthu muene wasuanguluga, ana kamba luholo lua gumulongesa lukuma luabonga lua Ufumu.
(Tala paragrafe 18) *
18-19. (a) Luholo lutshi tuana mbila khenyi jia giamatshidia meya? (b) Hana gifezegeselo gidi mumonesa luholo Yehowa gakuatesele mulongogi mumoshi wa Biblia.
18 Luholo tudi ‘mafuta a mudimo a Nzambi,’ tushigo naye phamba gukuna mbuto jia giamatshidia, uvi tudi naye nji gujimbila meya. Gula muthu wamonesa nzala, tudi naye gutshita yagasue ha gumuvutugila luko, nga ndo gudivua nu muthu muko ha guya gumutala ha gusendesa gulonguga Biblia. Gula muthu muene walonguga Biblia, tuana suanguluga ha gumona luholo Yehowa gadi gumukuatesa ha gusombegesa matangi nu makalegelo enji abola.
19 Tuzuelelenu gifezegeselo gia Raphalalani, yonu wakhalele nganga-ngombo gu Afrique du sud. Wasuangulugile nu ndaga galongugile mu Biblia. Uvi yakhalele lamba gudi muene ha gutshigina ndaga Biblia yana zuela mukunda nu guta maga nu mvumbi. (Mikh. 18:10-12) Gungima, wabembele egi Nzambi asombegese matangi enji. Wabembele mudimo wenji wa ginganga-ngombo ngatshima wakhalele mudimo wa falanga. Mangino Raphalalani watagenesa gale ivo 60 nu udi muzuela egi: “Ngudi muhana Matemue a Yehowa mersi avula luholo angukuatesele mu maluholo avula, nu luholo angukuatesele ha guheta mudimo uko. Uvi mersi abalega guvula ngudi muhana gudi Yehowa luholo gangukuatesele ha gusombegesa lujingu luami, ha gubua Temue wa Yehowa ha gulongesa athu ako.”
20. Wazula desizio dia gutshita itshi?
20 Mu longo edi tuazuelela ima nguana ya ndando inyi tuanago gumona. Gima giabalega ndando mukatshi dia ima yene gidi, luendu lua gukuata ufuta nu Yehowa. Ufuta wene wana gutukuatesa ha guheta ima iko ya ndando inyi tuanago gumona gifua: Gusuena hehi nu Nzambi mu njila ya gisambu, guheta ukuateshi wa nyuma yabonga, nu guheta ukuateshi wa mu dilu tangua tuana tshita mudimo wa gulogesa. Tuzulenu desizio dia gukolesa khadilo dietu dia guhana mersi mukunda nu ima eyi ya ndando inyi tuanago gumona. Tudi naye guhana Yehowa mersi tangua diagasue luholo gakhala Futa dietu.
LUNGIMBO 145 Dieu nous promet le Paradis
^ par. 5 Mu longo diabalega, tuazuelela ima yavula ya ndando yatuhuile Nzambi inyi tuana mona. Uvi mu longo edi, tuza mumona ima yabalega ndando inyi tuajiyilego gumona nu luholo tuajiya guhana mersi mukunda nu ima yene. Longo edi diza luko gutukuatesa ha gukudisa khadilo dietu dia guhana mersi gudi Yehowa, Nzambi wana gutuhana ima yene.
^ par. 58 UKOTELESHI WA IFUANESA: (1) Phangi mumoshi wa mukhetu udi mutala ima yafugile Yehowa, nu udi mutangigiza ufuta wenji nu Yehowa.
^ par. 60 UKOTELESHI WA IFUANESA: (2) Phangi muene udi mutoga Yehowa ngolo ha gulongesa lukuma luabonga.
^ par. 62 UKOTELESHI WA IFUANESA: (3) Nyuma yabonga yakuatesa phangi muene wa mukhetu ha guheta gikhesa gia gulongesa lukuma luabonga lua Ufumu haheta muene okazio.
^ par. 64 UKOTELESHI WA IFUANESA: (4) Phangi mumoshi wa mukhetu udi mulongesa Biblia gudi muthu atagana n’enji. Phangi muene udi mutshita mudimo wa gulongesa mu njila ya utuameji wa anjelo.
