1. Wanem nao Jesus talem abaotem riches lo heven?

HARD for iumi lukim evri present. Tru nao, olketa barava spesol present stap wea iumi no savve lukim. Lo Sermon lo Maunten, Jesus storyim samfala spesol present lo heven wea barava winim olketa riches lo earth. Then hem talem disfala tru samting: “Samting wea man tinghae long hem nao bae hem interest for garem.” (Matt. 6:19-21) Taem iumi tinghae lo wanfala samting or ting lo hem olsem hem spesol, iumi bae laek for aftarem. Iumi hipimap “riches long heven” taem iumi garem gudfala nem witim God. Jesus sei kaen spesol samting olsem bae no savve finis and no eniwan savve stealim.

2. (a) Olsem 2 Corinth 4:17, 18 storyim, wanem nao Paul encouragem iumi for tingim? (b) Wat nao bae iumi storyim lo disfala study?

² Aposol Paul encouragem iumi for ‘gohed for tingim olketa samting wea iumi no savve lukim.’ (Readim 2 Corinth 4:17, 18.) Olketa samting hia wea iumi no savve lukim hem olketa spesol present, wea insaed diswan hem olketa blessing wea iumi bae enjoyim lo niu world blo God. Lo disfala study, iumi bae lane abaotem fofala spesol samting wea iumi no savve lukim wea savve helpem iumi distaem. Hem nao for fren witim God, wei for prea, help blo holy spirit, and sapot wea iumi kasem lo ministry from Jehovah, Jesus, and olketa angel. And tu, iumi bae storyim hao iumi savve showimaot iumi tinghae lo olketa spesol samting hia wea iumi no savve lukim.

3. Wanem nao barava spesol present wea iumi no savve lukim, and wanem nao mekem iumi fit for kasem datwan?

³ Barava spesol present wea iumi no savve lukim wea winim evri nara present, hem nao wei wea iumi fren witim Jehovah God. (Sams 25:14) Jehovah barava holy, so wanem nao mekem hem fit for  fren witim olketa man wea sin? Hem fit for duim datwan bikos ransom sakrifaes blo Jesus hem “aotem sin bilong evri pipol long disfala world.” (John 1:29) Jehovah savve finis plan blo hem for provaedem ransom for olketa man bae no fail. Dastawe, Jehovah fit for fren witim olketa man wea laef bifor Jesus hem dae.—Rome 3:25.

4. Storyim example blo samfala man wea kamap fren blo God bifor Jesus kam lo earth.

⁴ Tingim samfala man wea kamap fren blo God bifor Jesus kam lo earth. Abraham hem wanfala man wea showimaot strongfala faith. Winim 1,000 years bihaen Abraham dae, Jehovah still kolem hem ‘fren blo hem.’ (Aesaea 41:8) So diswan minim nomata pipol dae, Jehovah still ting lo olketa olsem fren blo hem. Lo tingting blo Jehovah, Abraham laef nomoa. (Luke 20:37, 38) Nara example hem Job. Wantaem, olketa angel hipap lo heven and Jehovah story abaotem Job lo wei wea showimaot hem barava trustim Job. Jehovah sei: “Hemi wanfala [gud] an stretfala man. An hemi tinghae long mi an hemi les fo duim eni ravis samting.” (Job 1:6-8) And hao nao Jehovah ting lo Daniel, wea faithful for worshipim hem for samting olsem 80 year lo ples wea pipol no worshipim Jehovah? Taem Daniel olo, thrifala taem olketa angel talem hem dat God ‘lovem hem tumas.’ (Daniel 9:23; 10:11, 19) Iumi barava sure Jehovah luk forward for resurrectim olketa fren blo hem wea dae finis.—Job 14:15.

5. Wanem nao iumi mas duim for enjoyim klos wei for fren witim Jehovah?

⁵ Distaem, haomas pipol wea no perfect nao enjoyim klos wei for fren witim Jehovah? Staka million pipol. Iumi savve lo diswan bikos staka man, woman, and pikinini evriwea lo world showimaot lo wanem olketa duim dat olketa laek for fren witim God. Jehovah savve kamap klos fren blo olketa stretfala man. (Provebs 3:32) Olketa savve fren witim Jehovah bikos olketa garem faith lo ransom sakrifaes blo Jesus. Bikos lo ransom, iumi savve dedicatem laef blo iumi lo Jehovah and baptaes. Taem iumi duim olketa important samting hia, iumi joinim staka million Christian wea dedicate and baptaes and enjoyim klos wei for fren witim nambawan Man lo full universe!

6. Hao nao iumi savve showimaot iumi tinghae lo wei wea iumi fren witim God?

⁶ Hao nao iumi savve showimaot iumi tinghae lo wei wea iumi fren witim God? Olsem Abraham and Job, wea gohed faithful lo God for winim wan handred years, iumi tu mas gohed faithful nomata hao long iumi servem Jehovah. Olsem Daniel, wei wea iumi fren gud witim God nao mas important winim laef blo iumi. (Daniel 6:7, 10, 16, 22) Jehovah savve helpem iumi for winim eni hard taem mekem iumi gohed fren gud witim hem.—Phil. 4:13.

7. (a) Olsem Provebs 15:8 storyim, hao nao Jehovah ting lo olketa prea blo iumi? (b) Hao nao Jehovah ansarem olketa prea blo iumi?

⁷ Nara spesol present wea iumi no savve lukim hem prea. Olketa klos fren savve storyim tingting and feeling blo olketa lo each other. Waswe, wei wea iumi fren witim Jehovah hem olsem tu? Barava nao! Jehovah iusim Bible for story lo iumi and for storyim  olketa feeling and tingting blo hem. Iumi story lo hem thru lo prea, and iumi savve talem hem feeling and tingting blo iumi. Jehovah hapi for lisin lo olketa prea blo iumi. (Readim Provebs 15:8.) Olsem wanfala Fren wea lovem iumi, Jehovah no just lisin nomoa lo prea blo iumi bat hem ansarem tu. Samfala taem hem kwiktaem for ansarem. Samfala taem maet iumi mas gohed for prea. Nomata olsem, iumi sure hao hem bae ansarem lo barava taem and lo wei wea barava fitim. Bat hao God ansarem prea blo iumi hem maet difren from wanem iumi expectim. Olsem example, winim wei for finisim wanfala hard taem, hem maet givim iumi wisdom and strong “for winim datwan.”—1 Cor. 10:13.

8. Hao nao iumi savve showimaot iumi tinghae lo wei for prea wea hem barava spesol present?

⁸ Hao nao iumi savve showimaot iumi tinghae lo wei for prea wea hem barava spesol present? Wanfala wei hem for followim disfala kaonsel for “prea evritaem.” (1 Thess. 5:17) Jehovah no forcem iumi for prea. Bat hem respectim wei wea iumi free for chus and hem encouragem iumi for “gohed for prea.” (Rome 12:12) So iumi showimaot iumi tinghae lo diswan taem iumi prea staka taem lo day. And tu, taem iumi prea iumi shud talem thankiu and praisem Jehovah.—Sams 145:2, 3.

9. Hao nao wanfala brata feel abaotem wei for prea, and hao nao iu feel abaotem datwan?

⁹ Taem iumi gohed for servem Jehovah and experiencem hao hem ansarem prea blo iumi, datwan bae mekem iumi for barava tinghae go moa lo wei for prea. Olsem example, Chris, wanfala brata wea stap lo full taem service for 47 years, hem sei: “Mi enjoyim tumas for wekap lo early morning mekem mi garem taem for prea lo Jehovah.” Hem sei tu: “Hem barava naes tumas for story lo Jehovah taem sun start for kamap and evri samting barava luk naes! Diswan muvim mi for sei thankiu for evri gud present wea hem givim, olsem disfala privilege for prea. Then lo end blo each day bihaen mi prea, mi savve go sleep witim klin konsens.”

10. Why nao iumi shud tinghae lo holy spirit blo God?

¹⁰ Holy spirit blo God hem nara spesol present wea iumi no savve lukim and wea iumi shud tinghae lo hem. Jesus encouragem iumi for gohed prea for holy spirit. ( Luke 11:9, 13) Thru lo holy spirit, Jehovah givim iumi paoa, and hem savve givim iumi tu “strong wea winim” wanem iumiseleva garem. (2 Cor. 4:7; Acts 1:8) Holy spirit savve helpem iumi for deal witim eni hard taem wea iumi feisim.

11. Lo wanem wei nao holy spirit savve helpem iumi?

¹¹ Holy spirit savve helpem iumi for duim olketa assignment lo waka blo God. Holy spirit bae mekem savve wea iumi garem kamap gud go moa. Hem helpem iumi for duim olketa Christian responsibility blo iumi. Tru nao, iumi luksavve gud samting wea kamaot from waka blo iumi, hem bikos lo spirit blo God, and no bikos lo savve blo iumiseleva.

12. Olsem Sams 139:23, 24 storyim, wanem nao iumi savve prea and askem holy spirit for duim?

¹² Narafala wei for showimaot iumi tinghae lo holy spirit blo God, hem taem iumi prea and askem holy spirit for helpem iumi luksavve lo eni rong tingting or feeling wea stap lo heart blo iumi. (Readim Sams 139:23, 24.) Sapos iumi duim datwan, Jehovah savve iusim holy spirit for mekem iumi luksavve lo eni rong tingting or feeling wea iumi garem. And taem iumi luksavve, iumi shud askem God for spirit blo hem for strongim iumi for againstim datfala tingting or feeling. Taem olsem, iumi showimaot iumi barava no laek for duim eni samting wea bae mekem Jehovah stop for helpem iumi witim holy spirit.—Eph. 4:30.

13. Hao nao iumi savve tinghae go moa lo holy spirit?

¹³ Iumi savve tinghae go moa lo holy spirit taem iumi ting raonem samting wea holy spirit duim distaem. Bifor Jesus go bak lo heven, hem talem olketa disaepol blo hem: “Taem iufala kasem holy spirit datwan bae strongim iufala, and iufala bae talem pipol abaotem mi . . . long evri farawe ples long earth.” (Acts 1:8) Toktok hia hem gohed for fulfill distaem. Witim help blo holy spirit, samting olsem eit  and haf million pipol evriwea lo world olketa worshipim Jehovah distaem. And tu, iumi stap insaed wanfala spiritual paradaes bikos spirit blo God helpem iumi for garem olketa nambawan fasin olsem love, hapi, peace, patient, kaen, duim gudfala samting, faith, hambol, and kontrolem seleva. Evri fasin hia hem part lo frut blo holy spirit. (Gal. 5:22, 23) Tru nao, holy spirit hem wanfala barava spesol present!

14. Nomata iumi no savve lukim, hu nao sapot iumi taem iumi duim ministry?

¹⁴ Iumi garem spesol present wea iumi no savve lukim wea hem nao wei wea iumi “waka tugeta witim” Jehovah, Jesus, and olketa angel. (2 Cor. 6:1) Iumi duim diswan taem iumi duim ministry. Paul sei olsem abaotem hemseleva and olketa wea share insaed disfala waka: “Mifala waka tugeta witim God.” (1 Cor. 3:9) Taem iumi share lo ministry, iumi waka tugeta witim Jesus tu. Tingim hao bihaen hem givim komand lo olketa follower blo hem for “teachim pipol long evri kantri for kamap disaepol,” Jesus sei: “Bae mi stap witim iufala.” (Matt. 28:19, 20) Waswe lo olketa angel? Hem nambawan blessing for olketa angel leadim iumi taem iumi talemaot “gud nius . . . long evriwan long earth”!—Rev. 14:6.

15. Storyim example lo Bible wea showimaot hao Jehovah nao duim important waka lo ministry blo iumi.

¹⁵ From iumi garem disfala sapot from heven, diswan helpem iumi for duim wanem? Taem iumi plantim Kingdom message, samfala seed foldaon lo gudfala heart and grow. (Matt. 13:18, 23) Hu nao mekem olketa seed hia grow and garem frut? Jesus explainim hao no eni man savve kamap follower blo hem “sapos Dadi . . . no leadim hem kam.” (John 6:44) Bible givim samfala example lo diswan. Tingim taem Paul preach lo wanfala grup blo olketa woman aotsaed lo city blo Philippi. Bible story olsem abaotem wanfala lo olketa woman hia wea nem blo hem Lydia: “Jehovah openem heart bilong hem for bilivim samting wea Paul storyim.” (Acts 16:13-15) Olsem Lydia, Jehovah leadim kam staka million pipol.

16. Hu nao shud kasem praise for eni gud samting wea iumi kasem lo ministry?

¹⁶ Hu nao mekem iumi for win lo ministry blo iumi? Paul ansarem datfala kwestin taem hem raetem olketa toktok hia abaotem kongregeson lo Corinth: “Mi plantim seed, Apollos hem watarem, bat God nao mekem hem for grow. So man wea plantim seed and man wea watarem datwan, tufala no important. God nao important from hem nao mekem datfala seed for grow.” (1 Cor. 3:6, 7) Olsem Paul, iumi shud evritaem givim praise lo Jehovah for eni gud samting wea iumi kasem lo ministry.

17. Hao nao iumi savve showimaot iumi tinghae lo wei for “waka tugeta” witim God, Christ, and olketa angel?

¹⁷ Hao nao iumi showimaot iumi tinghae lo privilege for “waka tugeta” witim God, Christ, and olketa angel? Iumi duim datwan taem iumi duim best for lukaotem chance for sharem gud nius witim narawan. Staka difren wei stap for duim diswan, olsem for preach “long pablik and long haos tu haos.” (Acts 20:20) Staka enjoyim tu enitaem witnessing. Taem olketa meetim wanfala stranger, olketa hello lo hem and trae for startim story. Sapos hem willing for story, lo kaenfala wei olketa bae start for story abaotem message blo Kingdom.

18-19. (a) Hao nao iumi savve watarem olketa seed blo truth? (b) Storyim experience wea showimaot hao Jehovah helpem wanfala Bible student.

¹⁸ From iumi “waka tugeta witim God,” iumi no plantim olketa seed blo truth nomoa bat  iumi mas watarem tu. Taem samwan showimaot interest, iumi laek for duim best for go bak lo hem or arrange for eniwan for startim Bible study witim hem. Taem wanfala Bible study gohed gud, iumi hapi taem iumi lukim hao Jehovah helpem datfala Bible student for changem olketa wei blo hem.

¹⁹ Tingim example blo Raphalalani, wanfala kastom doctor lo South Africa. Hem barava laekem wanem hem lanem from Bible. Bat hem faendem hem hard for acceptim wanem Bible talem abaotem wei for story witim olketa grani wea dae finis. (Diutronomi 18:10-12) Isisi, hem letem God for stretem tingting blo hem. And gogo, hem lusim nao datfala waka olsem kastom doctor, nomata diswan minim hem bae no garem selen for lukaftarem famili blo hem. Raphalalani, wea hem 60 years old distaem, hem sei: “Mi barava thankiu lo olketa Jehovah’s Witness from olketa helpem mi lo staka difren wei, olsem for faendem waka. Winim evri samting hia, mi thankiu lo Jehovah for helpem mi changem laef blo mi, and distaem mi savve share lo ministry olsem wanfala Witness wea baptaes.”

20. Wat nao iu disaed for duim?

²⁰ Lo disfala study, iumi storyim fofala spesol present wea iumi no savve lukim. Nambawan spesol present wea winim eni narawan, hem nao disfala privilege for fren klos witim Jehovah. Datwan mekem iumi for kasem staka nara spesol present wea iumi no savve lukim. Olsem wei for story lo hem lo prea, kasem help from holy spirit, and for kasem sapot from olketa lo heven lo ministry blo iumi. Iumi laek for strongim go moa wei wea iumi tinghae lo olketa spesol present hia wea iumi no savve lukim. And evritaem iumi laek for thankiu lo Jehovah from hem wanfala nambawan Fren.