1. ¿Imaniranmi Jesús janaq pachapi kaq qhapaq kaykunamanta?

¿KANMANCHU mana rikuna qhapaq kaykuna? Arí, aswan allin qhapaq kaykunaqa manan rikukunchu. Jesuspas willaranmi chay mana rikuna kaqkunamantaqa, chaymi niran: “Maypichus qhapaq kayniyki kashan, chayllapitaqmi sonqoykipas kashan”, nispa (Mat. 6:19-21). Llapa runapas sonqonchispa munasqanraykun imatapas ruwanchis. Chhaynaqa, ¿imaynatan “janaq pachapi qhapaq kaykunata” juñusunman? Chaytaqa ruwanchis Jehová Diospa munayninta ñaupaqman churaspan. Chayta ruwasun chayqa manan pipas Diosmantaqa t’aqawasunchu, nitaq chaskisqanchis qhapaq kaykunatapas qechuwasunchu.

2. a) ¿Imata ruwananchispaqmi 2 Corintios 4:17, 18 kallpachawanchis? b) ¿Imakunamantan kay yachachikuypi yachasun?

² Apóstol Pablon kallpachawanchis ‘mana rikukuq kaqkunapi’ yuyayninchista churananchispaq (leey 2 Corintios 4:17, 18). Chay mana rikukuq kaqkunaqa Jehová Diospa bendicionninkunan, chaykunamanta wakintaqa jamuq tiempopin chaskisunchis. Kay yachachikuypin yachasunchis tawa bendicionkunamanta, chaykunan kashan: Jehová Dioswan amigontin kasqanchis, paymanta mañakuy atisqanchis, santo espiritun, jinallataq Jehová Diosmanta,  Jesusmanta, angelninkunamantawan chaskisqanchis yanapay. Chaymantapas yachallasuntaqmi imaynatas agradecido kasqanchista rikuchisunman chayta.

3. ¿Iman aswan valorniyoq regalo? ¿Imaraykun Dioswan amigontin kayta atisunman?

³ Tukuy imamantapas Jehová Dioswan amingontin kaymi aswan valorniyoqqa (Sal. 25:14). Ichaqa, ¿atinmanchu Jehová Dios ch’uya Dios kashaspa juchasapa runakunawan amigontin kayta? Arí, ¿imarayku? Jesús ‘kay pachamanta juchata chinkachisqanrayku’ (Juan 1:29). Jehová Diosqa manaraq Jesús wañushaqtinmi amigontin karan wakin runakunawan, payqa yacharanmi churin Jesús wañuspa runakunata salvananta. Chaymi Jehová Diosqa ch’uya Dios kashaspapas juchasapa runakunawan amigontin karan (Rom. 3:25).

4. ¿Pikunan Diospa amigonkuna karanku manaraq Jesús wañushaqtin?

⁴ Kunanqa yachasunchis Jehová Diospa ñaupa tiempopi amigonkunamanta. Jujninmi karan Abrahán. Payqa allin iñiyniyoqmi karan, chaymi waranqa wata qhepata Jehová Diosqa paymanta niran: Abrahanqa ‘amigoymi’, nispa (Is. 41:8). Jehová Diospa wakin amigonkuna wañuranña chaypas payqa manan qonqanchu aswanmi yuyashallan (Luc. 20:37, 38). Jobpas Diospa amigonmi kallarantaq. Chaymi juj kuti angelninkunawan juñunasqa kashaspa Jobmanta niran: “Payqa tukuy sonqonwanmi serviwan, mana allin ruwaymantapas t’aqakunpunin”, nispa (Job 1:6-8). Danielpas Diospa amigonmi kallarantaq, payqa pusaq chunka watakuna jinan pantasqa dioskunata yupaychasqanku llaqtapi tiyaran. Chaymi Diosqa Daniel kuraqña kashaqtin angelninkunata kacharan kinsa kutita ‘Diosmi anchatapuni munakusunki’ nispa nimunankupaq (Dan. 9:23; 10:11, 19). Jehová Diosqa anchatapunichá munashan amigonkunata kausarichimpuyta (Job 14:15).

5. ¿Imakunatan ruwananchis Jehová Dioswan amigontin kananchispaq?

⁵ Kay tiempokunapiqa millonninpi runakunan Jehová Dioswan amigontin kashanku. Chaymi pachantinpi askha qharikunapas warmikunapas wawakunapas kallpachakushanku Diospa munayninman jina kausanankupaq. Chaymantan Biblia nin: Diosqa ‘chanin runakunawanmi’ amigontin kapun, nispa (Prov. 3:32). Runakunaqa Jesuspin iñinanchis, chaymantapas Diosmanmi qokunanchis jinaspa bautizakunanchis, chaykunata ruwasun chayqa atisunmi Dioswan amigontin kayta. Arí, bautizakuspaqa atisunmanmi millonninpi runakuna jina Dioswan amigontin kayta. Chayqa may kusikunapaqmi.

6. ¿Imakunata ruwaspan Jehová Dioswan amigontin kasqanchismanta agradecekusunman?

⁶ ¿Imakunata ruwaspan Jehová Dioswan amigontin kasqanchismanta agradecekusunman? Chaytaqa ruwasun Abrahán jina Job jina Jehová Diosta kasukuspa, payman junt’aq sonqo kaspa ima. Chhaynaqa, unayña otaq chayllaraq Jehová Diosta servishanchis chayqa junt’aq sonqollapunin kananchis. Chaymantapas Daniel jinan Jehová Diosta kausayninchismantapas astawanqa munakunanchis (Dan. 6:7, 10, 16, 22). Jinaspapas Jehová Diospa yanapayninwanqa ima sasachakuypiña tarikuspapas atisunmi Jehová Dioswan amigontin kashallayta (Filip. 4:13).

7. a) Proverbios 15:8 nisqan jina, ¿imaynatan Jehová Dios qhawarin mañakusqanchista? b) ¿Imaynatan mañakusqanchisman kutichimun?

⁷ Jehová Diosmi qowallanchistaq mañakuy atiyta. Allin amigokunaqa parlarinkun ima piensasqankutapas imayna sientekusqankutapas. Chhaynallataqmi Jehová Dioswan amigontin kaypas. Jehová Diosqa simin qelqawanmi rimapayawanchis, chaypin willawanchis piensasqanta ima sientesqantapas. Noqanchispas mañakuspan paywan rimayta atinchis. Arí, mañakuspaqa willasunmanmi ima piensasqanchistapas imayna sientekusqanchistapas. Jinaspapas Jehová Diosqa anchatan kusikun paymanta mañakuqtinchis (leey Proverbios 15:8). Amigonchis Jehová Diosqa anchatan munakuwanchis, chaymi mañakusqanchisman kutichimun. ¿Imaynatan Jehová Dios mañakusqanchisman kutichimun? Mayninpiqa usqhayllan kutichimun, mayninpitaq suyakunanchisraq kanqa. Jinaspapas Jehová Diosqa yachanmi ima tiempopi mañakuyninchisman kutichimuyta. Chaymantapas Jehová Diosqa manapaschá ima pruebakunamantapas librawasunchu, ichaqa kallpantan qowasun ima sasachakuykunatapas atipananchispaq (1 Cor. 10:13).

8. ¿Imaynatan Jehová Diosta agradecekusunman mañakuy atisqanchismanta?

⁸ ¿Imaynatan agradecekusunman mañakuy atisqanchismanta? Bibliaq nisqan jina, ‘tukuy tiempo Diosmanta mañakuspa’ (1 Tes. 5:17). Jehová Diosqa manan pitapas tanqawanchischu paymanta mañakunanchispaqqa. Aswanpas munanmi tukuy sonqomanta ‘mañakushanallanchista’ (Rom. 12:12). Agradecido kasqanchistan rikuchillasuntaq tukuy tiempo Diosmanta mañakuspa, graciasta qospa, sutintapas jatunchaspa ima (Sal. 145:2, 3).

9. a) ¿Imaynatan Chris iniqmasinchis mañakuyta qhawarin? b) ¿Imaynatan mañakuyta qhawarinanchis?

⁹ Unay tiempoña Jehová Diosta servishanki chayqa, repararankichá imaynata  mañakusqaykiman kutichimusqanta. Yachasun Chris iñiqmasinchismanta, payqa 47 watakuna jinañan tukuy tiemponwan Jehová Diosta servishan, paymi nin: “Maytan gustawan tutallamanta sayarispa Jehová Diosmanta mañakuy. Chayta ruwayqa yanapawanmi agradecido kanaypaq. Chaymi mañakuspaqa Jehová Diosta “gracias” nini tukuy imaymana qowasqanmanta. Puñuq ripunaypaqpas Jehová Diosmanta mañakuspaqa thajmi sientekuni”, nispa.

10. ¿Imaraykun Jehová Diospa qowasqanchis santo espiritunta valorananchis?

¹⁰ Jehová Diosmi qowallanchistaq santo espiritunta, chaymi Jesusqa qatikuqninkunata kallpacharan Diospa santo espiritunta mañakushanallankupaq (Luc. 11:9, 13). Jehová Diosqa santo espiritunwanmi qowanchis ‘runakunaq mana aypay atisqan atiyta’ (2 Cor. 4:7; Hech. 1:8). Jinaspapas Jehová Diospa santo espiritunqa yanapawanchismi ima sasachakuytapas aguantananchispaq, chaymi anchata valorananchis.

11. ¿Imaynatan Jehová Diospa santo espiritun yanapawanchis?

¹¹ Jehová Diosqa santo espirituntan qowanchis paypa munayninta allinta junt’ananchispaq, santo espirituntan qowallanchistaq imatapas allinta entiendenanchispaq. ¡Jehová Diospa yanapayninllawanmi paytaqa serviyta atinchis!

12. Salmos 139:23, 24 nisqan jina, ¿imatan Jehová Diosmanta mañakunanchis?

¹² Jehová Diospa santo espirituntan mañakunanchis ima mana allin piensasqanchistapas sientesqanchistapas reparachiwananchispaq, chayta mañakuspaqa Jehová Diospa santo espirituntan valorashanchis (leey Salmos 139:23, 24). Mañakuqtinchismi Jehová Diosqa santo espiritunwan reparachiwasunchis imapichus cambiananchis kasqanta. Ichaqa mañakunallanchistaqmi santo espiritunta mana allin piensasqanchista mana allin sientesqanchistapas  cambiananchispaq. Chayta ruwasun chayqa Jehová Diosmi santo espiritunwan yanapawashallasun Efes. 4:30).

13. ¿Imatan ruwananchis santo espirituta astawan valorananchispaq?

¹³ Jehová Diosqa imaymanatan ruwashan santo espiritunwan, chaykunapi yuyaymanasun chayqa valorasunmi santo espiritunta. Manaraq Jesús janaq pachaman ripushaqtinmi qatikuqninkunata niran: “Atiytan chaskinkichis santo espíritu qankunaman chayamuqtin, jinan noqamanta willankichis [...] kay pachaq k’uchunkunakamaraq”, nispa (Hech. 1:8). Kaypi nisqanqa junt’akushanmi santo espirituq yanapayninwan. Chaymi pusaq millón más runakuna, llapa nacionkunamanta Jehová Diosta servishanchis. Chaymantapas Diospa llaqtanpiqa paraisopi jinañan kausashanchis. Chaypaqmi Jehová Dios yanapawanchis, munakuspa, kusisqa, thajpi, pacienciakuspa, sumaq sonqowan, allin sonqowan, iñiywan, llamp’u sonqowan, cuerpota kamachispa ima kausananchispaq. Tukuy chaykunataqa ‘santo espiritun ruruchin’ (Gál. 5:22, 23). Santo espirituqa Jehová Diospa regalonmi.

14. ¿Pikunan yanapawanchis Diosmanta willaqtinchis?

¹⁴ Noqanchisqa Jehová Diostan yanapakushanchis (2 Cor. 6:1). Chaymi Jehová Diosqa yanapawanchis paymanta runakunaman willaqtinchis. Chaymanta rimaspan Pablo niran: “Noqaykuqa Diospa llank’aqmasinkunan kayku”, nispa (1 Cor. 3:9). Chaymantapas Diosmanta willaqtinchisqa Jesusmi yanapawallanchistaq. Paymi qatikuqninkunata niran: “Llapa nacionmanta runakunaman riychis, jinaspa yachachimuychis discipuloykuna kanankupaq”, nispa. Nillarantaqmi: ‘Noqaqa [...] qankunawanmi kashasaq’, nispa (Mat. 28:19, 20). Chaymantapas angelkunan yanapawallanchistaq “allin willakuykunata [...] allpa pachapi llapa tiyaqkunaman” willananchispaq (Apo. 14:6).

15. ¿Iman rikuchiwanchis Jehová Dios Diosmanta willasqanchispi yanapawasqanchista?

¹⁵ ¿Imatan ruwashanchis Jehová Diospa yanapayninwan? Diospa gobiernonmantan willashanchis. Chay willasqanchisqa mujukuna jinan wakin runakunaq sonqonman chayan (Mat. 13:18, 23). ¿Pin chay runakunaq sonqonpi mujuta wiñachin? Jehová Diosmi. Chaymi Jesús niran: “Manan pipas noqamanqa jamunmanchu manachus kachamuwaqniy Yaya pusamunman chayqa”, nispa (Juan 6:44). Juj kutinmi Pablo Diosmanta willaran Filipos llaqtaq jawanpi tarikuq warmikunaman, paykunamanta jujninmi karan Lidia. Paymantan Biblian nin: “Jehová Diosqa sonqontan kichariran Pabloq rimasqanta tukuy yuyaywan uyarinanpaq”, nispa (Hech. 16:13-15). Lidiata jinan, Jehová Diosqa kay tiempopipas millonninpi runakunata llaqtanman pusamushan.

16. ¿Pitan jatunchananchis runakuna uyariwaqtinchis?

¹⁶ ¿Pitan jatunchananchis runakuna uyariwaqtinchis? Pablon chaymanta rimaspa Corinto llaqtapi iñiqmasikunata niran: “Noqan plantarani, Apolostaq qarparan, ichaqa Diosmi wiñachiqqa. Chhaynaqa manan plantaqchu ni qarpaqchu imapas, aswanpas wiñachiq Diosmi”, nispa (1 Cor. 3:6, 7). Runakunata Diospa llaqtanman pusamuspaqa, Pablo jinan Jehová Diosllata jatunchanchis.

17. ¿Imaynatan agradecekusunman Jehová Dioswan, Cristowan, angelkunawan ima llank’asqanchismanta?

¹⁷ ¿Imaynatan agradecekusunman Jehová  Dioswan, Cristowan, angelkunawan ima llank’asqanchismanta? Llapa runakunaman Diosmanta willaspa. Chaytan ruwasunman “runa qayllapipas wasin-wasinpipas” otaq maypiña tarikuspapas (Hech. 20:20). Chaytan askha hermanokunapas ruwanku. Wakinqa mana reqsisqanku runawan tupaspan sumaqta napaykuspa imallamantapas rimayta qallarinku, runamasi uyarikuqtintaq Diosmanta willanku.

18, 19. a) ¿Imaynatan Diosmanta willasqanchis runakunata yanapananchis? b) ¿Imaynatan Jehová Dios yanaparan Raphalalani sutiyoq runata?

¹⁸ ‘Diospa llank’aqmasinkunataq’ kanchis chayqa, manan tarpunallanchischu aswanpas qarpananchismi. ¿Imaynatan chayta ruwasunman? Pipas uyariwaqtinchisqa, tukuy atisqanchista ruwananchis jujmanta kutinanchispaq otaq pitapas ninanchis Bibliamanta yachachinanpaq. Chaymi pitapas Jehová Dios llaqtanman pusamuqtinqa anchata kusikunchis.

¹⁹ Sudáfrica ladomanta Raphalalani sutiyoq runamanta yachasun. Payqa layqan karan. Ichaqa Bibliamantan yachayta qallarispan anchata kusikuran. Chaypin yacharan wañusqakunawan rimayqa mana allinchu kasqanta, chayta saqeymi paypaqqa sasa karan (Deut. 18:10-12). Chaywanpas payqa pisi-pisimantan yuyayninta Diospa munayninman jina cambiaran, jinan tiempowanqa layqa kayninta saqepuran. Raphalalaniqa soqta chunka watayoqñan kashan, paymi nin: “Anchatan agradecekuni Jehová Diospa testigonkuna imaymanapi yanapawasqankumanta, paykunan yanapawaranku juj mosoq llank’anata tarinaypaq. Astawanqa Jehová Diostan agradecekuni, paymi yanapawaran kausayniyta ch’uyanchanaypaq, kunanqa Jehová Diospa Testigon jinan Diosmanta willashani”, nispa.

20. ¿Imaraykun valorananchis mana rikukuq qhapaq kaqkunata?

²⁰ Kay yachachikuypin yacharanchis tawa mana rikukuq qhapaq kaykunamanta. Chaykunamanta aswan valorniyoqqa Jehová Dioswan amigontin kasqanchismi. Paywan amigontin kaspallan, Diosmanta mañakuyta atinchis, santo espiritunta chaskiyta atinchis, Diospa yanapaynintapas chaskiyta atinchis. Chhaynaqa, tukuy tiempon Diosta agradecekunanchis paywan amigontin kasqanchismanta.