1. Jehová Diospa ñaupajpi ali ricurinamandaca ¿imatata Jesusca nirca?

¿IMACUNATALLATA Jehová Diosca carashca? Na ricurinalla cosascunatapashmi Jehová Diosca carashca. Jesusca Jehová Diospa ñaupajpi ali ricurinaca culquitapash yali valishca cashcatami Mateo capítulo 5manda 7​camanga parlarca. Paica nircami: “Maipi imata charishpapash, shungupica chaita yariashpami purinajunguichi” nishpa (Mat. 6:19-21). Imapash valishca cosascunata ricushpaca chai munashcata charingapapachami esforzarinchi. ‘Jahua pachapi charij cangapaj’ nishpaca Jehová Diospa ñaupajpi ali ricurina cashcatami ricuchin. Jesusca nircami, Jehová Diospa ñaupajpi ali ricurinataca nipipash na quichuita, ni shuhuaita na ushangachu nishpa.

2. a) Apóstol Pabloca 2 Corintios 4:17, 18​pica ¿imata rurachunda animajurca? b) ¿Imatata cai temapica yachajupashun?

² Apóstol Pabloca ‘na ricushcacunatami yariashpa causana canguichi’ nishpami animarca (2 Corintios 4:17, 18, liingui). Jehová Diosca paraíso Alpagupipashmi ashtahuan bendiciashpa catinga. Cai temapica cunan punllacunapi Jehová Dios carashca chuscu bendiciongunamandami yachajupashun: Jehová Dioshuan ali amigocuna cana, Jehová Diosta mañana, Jehovapa espíritu santo ayudajta ricuna, shinallata villachinapi Jehová Dios, Jesús, angelcunapash ñucanchita imashina apoyajtami yachajupashun. Cai carashcacunamanda imashina agradicina cashcatapashmi yachajupashun.

3. a) ¿Ima bendiciondata charipanchi? b) ¿Imashpata chai bendiciondaca chasqui ushapanchi?

³ Jehová Dioshuan ali amigocuna canaca shuj jatun bendicionmi can (Sal. 25:14). Jehová Diosca jucha illaj cashpapash ¿imashinata  ñucanchipa ali amigo caita ushan? Jesús huañushpami ‘cai pachapi causajcunapa juchata anchuchirca’. Chaimi Jehovapa ali amigocuna caita ushapanchi (Juan 1:29). Jehová Diosca paipa Churi huañungacaman paita tucuipi sirvina cashcata, mundo enteromanda gentecunata salvana cashcataca alimi yacharca. Chaimi Jesús nara huañujpillata causashca gentecunapash Jehová Dioshuan ali amigocuna cachun saquirca (Rom. 3:25).

4. Jesús cai alpaman nara shamujpillataca ¿picunallata Jehová Diospa ali amigocuna carca?

⁴ Jesús cai Alpaman nara shamujpica Jehová Diosca ali amigocunatami charirca. Paicunamanda yachajupashunchi. Abrahanga shinlli fetami charirca. Pai ña mil huatacunata huañushca cajpimi, Jehová Diosca paimandaca cashna nirca: ‘Ñucapa ali cumba’ o ali amigomi can nishpa (Is. 41:8). Jehová Diospa ali amigocuna huañujpipash, Jehová Diosca yarishpami catin. Abrahán ña huañushca cajpipash Jehová Diospa yuyaipimi can (Luc. 20:37, 38). Cunanga Jobmanda yachajupashunchi. Shuj punlla cielopi angelcuna tandanajushca cajpica, Jehová Diosca Jobmandaca cashnami nirca: “Ima pandatapash na ruraj, aligutalla ruraj. Taita Diostapash manllaj, nalita ruranamanda anchurishca” runagumi can nishpa (Job 1:6-8). Cutin Danielmandaca ¿imatata yuyan carca? Danielca casi 80 huatacunatami Jehová Diosta na adorajcunapurapi causarca. Daniel ña mayorllagu cajpica Jehová Diospa angelcunaca quimsa viajecamanmi cashna nirca, “ninanda juyai tucushcami cangui” nishpa (Dan. 9:23; 10:11, 19). Chaica ricuchinmi, Jehová Diosca paipa huañushca ali amigocuna cutin causarichun munashcata (Job 14:15).

5. Jehová Dioshuan ali amigocuna cangapaca ¿imatata rurana capanchi?

⁵ Cunanbipashmi ashtaca ashtaca gentecunaca juchayucuna cashpapash Jehová Diospa ali amigocuna caita ushan. Jaricuna, huarmicuna, huahuacuna cashpapash ruraicunahuanmi Jehovapa ali amigo cashcata ricuchin. Bibliapica ninmi: Jehová Diosca “imatapash cashcatapacha rurajcunapaca, ali cumbagumi” can nishpa (Prov. 3:32). Jesús huañushcapi feta charimandami Jehová Dioshuan ali amigocuna caita ushapanchi. Jesús huañushcamandami Jehová Dios candallami siempre sirvisha nishpa mañashpa bautizaritapash ushapanchi. Caicunata rurashpami Jehová Diosta sirvijcunahuan mundo enteropi shuj familiashna caita ushapanchi. Shinallata Jehová Dioshuanbash ‘ali cumbagucuna’ tucuita ushapanchi.

6. Jehovapa ali amigo caimanda agradecishcataca ¿imashinata ricuchi ushapanchi?

⁶ Jehovapa ali amigo caimanda agradecido capashunchi. Chaipaca Abrahanba, Jobpa ejemplota catipashunchi. Paicunaca cien yali huatacunatami Jehovataca tucui shunguhuan sirvishpa causarca. Ñucanchicunapash cai nali mundopi causanajushpapash, paicunashnami Jehová Diosta sirvishpa catita ushapanchi. Danielpa causai peligropi cajpipash Jehová Diospa ali amigo canami ashtahuan importante carca. Paipa ejemplotami ñucanchicunapash catina capanchi (Dan. 6:7, 10, 16, 22). Jehová Diospa ayudahuanllami llaquicunata, problemacunatapash aguantaita ushapanchi. Shinallata Jehovapa ali amigo caitapash ushapanchi (Filip. 4:13, NM ).

7. a) Proverbios 15:8​pica ¿imatata nin? b) Ñucanchi mañaicunataca ¿imashinata Jehová Diosca contestan?

⁷ Jehová Diosta mañanaca shuj jatun bendicionmi can. Shuj ali ali amigocunaca paicuna imata pensashcatami randimanda parlarin. Shinallatami Jehová Dioshuanbash cana capanchi. Jehová Diosca ¿imashinata ñucanchihuanga parlaita ushan? Bibliatami paica ñucanchiman cushca. Bibliata liishpami Jehová Dios imata yuyajta, imashina sintirijtapash yachajui ushapanchi. Ñucanchica Jehovata mañashpami paihuanga parlaita ushapanchi. Jehovata mañajushpaca ñucanchi imata pensajushcata, imashina sintirishcatapashmi tucui tucuita villaita ushapanchi. Jehová Diosca ñucanchi mañashcacunataca  tucuitami uyan (Proverbios 15:8, liingui). Ñucanchipaca Jehová Diosca shuj alipacha amigomi can. Ñucanchitaca ninandami juyan. Chaimi ñucanchi mañaicunataca contestan. Huaquinbica ñucanchi mañashcataca jaicatami contestan. Shinapash ñucanchi mañashcashnaca huaquinbica na tigrachinllu. Shina cajpipash mañashpami catina capanchi. Jehová Diosca ñucanchi minishtirishca horaspimi ñucanchi mañaicunataca contestanga. Chaitaca seguromi caita ushapanchi. Por ejemplo, ñucanchi llaquicunata na anchuchishpapash, chai llaquicunata aguantachunmi ali yachaita, fuerzatapash cushpa ayudan (1 Cor. 10:13, NM ).

8. Jehovata mañai ushashcamanda agradecishcataca ¿imashinata ricuchi ushapanchi?

⁸ Jehovata mañai ushashcamandami agradicina capanchi. Chaipaca “Taita Diosta mañanataca, na saquinachu canguichi” nishca consejotami pactachina capanchi (1 Tes. 5:17). Jehová Diosca paita mañachunga ni pita na obliganllu. Shinapash Bibliapica caitami nin: “Diostaca, na cungashpami mañajunalla canguichi” nishpa (Rom. 12:12). Jehovata agradecido cashcata ricuchingapaca, punllapica tauca viajecunatami mañana capanchi. Shinallata mañajushpaca tucui imagumandapash agradicinata, alabanataca na cunganachu capanchi (Sal. 145:2, 3).

9. a) Shuj huauquica ¿imashinata Jehovata agradicishcataca ricuchin? b) Jehovata mañashpaca ¿imashinata sintiripangui?

⁹ Mashna tiempota Jehovata sirvinajushpapash, Jehová Dios ñucanchi mañaita uyashcata yachashpaca cushillami sintiripanchi. Cunanga 47 huatacunata tiempo completopi sirvijushca shuj huauquimanda yachajupashunchi. Paica ninmi: “Tutamandata jatarishpa Jehová Diospa rurashcacunata ricushpami cushilla sintirishpa paita pagui ningapaj tiempota llujchini. Paihuan parlanaca shuj bendicionmi can. Chaimi Jehová Diospa carashcacunamanda agradicingapaj paita mañani. Ña puñuna horasca Jehová Diosta mañashpaca tranquilo, ali sintirishpami puñungapaj rini” nishpa.

10. Jehová Diosca ¿imatata ñucanchimanga carashca?

¹⁰ Jehová Diosca paipa espíritu santotami carashca. Jesusca nircami, Jehovapa espíritu  santota cutin cutin mañanguichi nishpa (Luc. 11:9, 13). Jehová Diosca paipa espíritu santota utilizashpami “ninan ushaita” charichun ayudan (2 Cor. 4:7; Hech. 1:8). Chaimi ima llaquicunata, ima problemacunata charishpapash aguantashpa cati ushapanchi.

11. Jehovapa espíritu santoca ¿imapillata ayudaita ushan?

¹¹ Jehová Diosta sirvijushpa imapash responsabilidadta charishpaca, Jehovapa espíritu santomi chai responsabilidadcunata ali pactachichun ayudan. Imaguta ña yachajpipash ashtahuan ali rurachunmi Jehovapa espirituca ayudan. Ñucanchi ushaihuanllaca imatapash na ruraita ushanchichu. Ashtahuangarin Jehová Diospa espíritu santo ayudajpillami imagutapash aliguta ruraita ushapanchi.

12. Salmo 139:23, 24​pi nishca shinaca ¿imatata mañana capanchi?

¹² Jehová Diospa espíritu santomanda agradicishcata ricuchingapaca Jehovatami imapash nali munaita, nali yuyaita charishcata cuenta japichun ayudahuai nishpa mañana capanchi (Salmo 139:23, 24, liingui). Chaimi Jehová Diosca paipa espíritu santohuan ñucanchi imapi cambiana cashcata cuenta japichun ayudanga. Chai nali yuyaita, nali munaita saquichun ayudahuai nishpami Jehovataca mañana capanchi. Shinami imapash nalicunata na rurashun. Jehová Diospash paipa espíritu santohuan ayudashpa cati ushanga (Efes. 4:30).

13. Jehovapa espíritu santo ayudajushcamanda agradicishcataca ¿imashinata ricuchi ushapanchi?

¹³ Cunan punllacunapi Jehová Diospa espíritu santo imashina ayudajujta ricushpami agradecido sintiripanchi. Jesús jahua cieloman nara rishpallatami paipa catijcunamanga cashna nirca: “Diospaj jucha illaj espíritu cangunapajman shamujpimi, ushaita japinguichi. Chai ushaihuanmi [...] cai pacha tucuri manñacaman ñucamanda villagringuichi” nishpa (Hech. 1:8). Cai shimicuna pactarishcatami ricupanchi. Jehovapa espíritu santopa ayudahuanmi cunanbica 8 millón yali Jehovata sirvijcuna cai mundo enteropi tian. Shinallata mundo enteromanda huauquipanicunahuanbash shuj familiashna tranquilo causapanchi. Jehovapa espíritu santomi juyaita, cushilla canata, casilla aliguta causanata, na ñapash fiñarishpa causanata, llaquishpa causanata, imagutapash carashpa causanata,  aliguta crishpa causanata, na jariyashpa causanata, jarcarishpa causachunbash ayudan. Cai cualidadcunaca Diospa espiritu santo ‘granota fucuchinshna fucuchishca’ cualidadcunami can (Gál. 5:22, 23). Jehová Diospa espíritu santoca shuj jatun bendicionmi can.

14. Villachinajujpica ¿picunata ñucanchitaca apoyan?

¹⁴ Ñucanchicuna villachinajujpica Jehová Dios, Jesús, angelcunapashmi ñucanchitaca apoyan. Chaica shuj jatun bendicionmi can (2 Cor. 6:1). Paicunami ñucanchi villachinajujpi gentecuna Jesuspa ali catijcuna tucuchun ayudanajun. Apóstol Pabloca, paimandallata, shuj huauquicunamandapash parlashpaca nircami, ñucanchica “Taita Diosta ayudajcunallami canchi” nishpa (1 Cor. 3:9). Villachingapaj llujshishpaca Jesustapashmi ayudanajunchi. Jesusca paipa catijcunamanga nircami: “Ñucapaj yachajujcuna tucuchun cai pachapi causanajuj tucuilla gentecunapajman rishpa, villana canguichi” nishpa. Caitapashmi nirca: Ñucami ‘cangunahuan casha’ nishpa (Mat. 28:19, 20). Angelcunapashmi ‘cai pachapi causajcuna causaita causaicaman quishpirichun villachichun’ ayudanajun (Apoc. 14:6).

15. Lidia huarmigumandaca Bibliapica ¿imatata nijun?

¹⁵ Jehovapash, Jesuspash, angelcunapash ñucanchita apoyanajushcamandami Diospa Reinomanda ali villaigucunata villachinajujpica ashtacacuna aliguman chasquinajushca (Mat. 13:18, 23). Shinapash gentecuna cai ali villaigucunata aliguman chasquichunga ¿pita ayudajushca? Jesusca nircami: “Ñucata cachamuj Taita ñucapajman pushamujpillami, pipash shamun” nishpa (Juan 6:44). Caita ashtahuan intindingapaca Lidia huarmigumanda yachajupashun. Shuj punllaca apóstol Pabloca, Filipos llacta ladocunamanda huaquin huarmicunamanmi villachijurca. Paicunapuramanda Lidia shuti huarmigumanda Bibliapi imata nijta ricupashunchi: “Pablo villajujta chai huarmi aliguta uyachunmi Jehová Diosca, chai huarmipaj shunguta pascarca” nishpa (Hech. 16:13-15, NM ). Imashinami Lidia huarmiguta ayudarca, shinallatami cunanbipash Jehová Diosca paipa organizacionman ashtaca millón gentecunata paiman quimirichun ayudajushca.

16. Villachinapi cashpa gentecuna ali uyajpica ¿pitata alabana capanchi?

¹⁶ Villachinapi cashpa gentecuna ali uyajpica ¿pitata alabana capanchi? Jehová Diostami alabana capanchi. Corinto congregacionmanda huauquipanicunamanga apóstol Pabloca nircami: “Apolosca, yacuta churanshnami yachachijurca. Ashtahuangarin Taita Diosmi, viñachinshna mirachijun. Shina cashpaca tarpujpash, yacuta churajpash imapash na canllu. Ashtahuangarin Taita Diosllami viñachijun” nishpa (1 Cor. 3:6, 7). Villachinajujpi gentecuna ali uyajpica apóstol Pabloshnami Jehová Diostalla alicachina, alabana capanchi.

17. Jehovata, Jesusta, angelcunatapash villachinapi apoyanajushcamanda agradicishcataca ¿imashinata ricuchipanchi?

¹⁷ Jehovata, Jesusta, angelcunatapash villachinapi apoyanajushcamanda agradicishcataca ¿imashinata ricuchipanchi? Agradicishcata ricuchingapaca tucui gentecunaman Diospa Reinomanda ali villaigucunata villachingapami esforzarina capanchi. ¿Imashinata tucui gentecunaman villachi ushapanchi? Ashtaca gentecuna tiaj pushtucunapi villachishpa, ‘huasin huasin’ villachishpapash (Hech. 20:20). Ashtaca huauquipanicunaca informalmente villachinatami gushtan. Paicunaca saludashca jipallami, gentecuna uyangapaj munajpica aliguman, respetohuan Diospa Reinomanda villachi callarinlla.

18, 19. a) Villachishca jipaca ¿imatata rurana capanchi? b) Shuj huauquitaca ¿imashinata Jehová Diosca ayudarca?

¹⁸ Ñucanchicunaca ‘Taita Diosta ayudajcunami’ capanchi. Shinapash ñucanchica villachishpallaca na puripanchichu. Ashtahuangarin Bibliamanda yachachingapami munapanchi. Chaimi gentecuna Bibliamanda yachajungapaj munajpica, cutin visitangapaj  tigrapanchi. Na cashpaca pipash paicunata visitachunmi arreglocunata rurapanchi. Bibliamanda yachajujcunata Jehová Dios paicunapa causaipi cambiocunata rurachun ayudajujta ricushpaca ninandami cushijupanchi.

¹⁹ Jehová Diosta nara rijsishpaca shuj huauquica brujomi carca. Paica Sudáfrica llactamandami can. Bibliamanda yachajunataca ninandami gushtarca. Shinapash Bibliapimi huañushcacunahuan parlana nali cashcata yachajurca. Chaita saquinaca paipaca shinllimi carca (Deut. 18:10-12). Shinapash chai huauquica Jehová Diospa ayudahuanmi cambiai usharca. Paica brujo shinami trabajan carca. Masqui trabajo illaj quedana cashpapash tiempohuanga brujo canatami saquirca. Cunanbica chai huauquiguca 60 huatacunatami charin. Paica ninmi: “Testigo de Jehovacunataca ninandami agradicipani. Paicunaca shuj trabajoguta tarichunbashmi ayudahuarca. Ashtahuanbachaca Jehová Diostami agradicipani, paimi ñuca causaita cambiachun ayudahuashca. Cunanbica ña bautizarishcami cani, chaimi ali villaigucunataca cushijushpa villachijupani” nishpa.

20. ¿Imatata rurashpa catingapaj munapanchi?

²⁰ Cai temapica Jehová Dios carashca chuscu bendiciongunamandami yachajupashcanchi. Jehová Diospa ali amigo canami shuj jatun bendición can. Jehovapa ali amigocuna cashcamandami paita mañaita ushanchi. Jehovapash paipa espíritu santohuan ayudan. Shinallata ñucanchicuna villachinajujpica Jehová Dios, Jesús, angelcunapashmi ñucanchitaca apoyan. Ñucanchicunaca caicuna shuj bendición cashcata ricungapami munapanchi. Shinallata Jehová Dios ñucanchipa alipacha amigo cashcamandami paita siempre agradicishpa causangapaj munapanchi. Jehová Dioshuan ali amigocuna canaca shuj jatun bendicionmi can.