1. Eaa ta Iesu i tuatua no te au apinga aroa i te rangi?

AKARA koreia tetai au apinga aroa. Pera katoa te au apinga aroa akaperepereia. I tana Ako i te Maunga, taiku a Iesu i te au apinga aroa i te rangi tei meitaki roa atu i te apinganui. Akakite aia i teia tuatua mou: “Te ngai oki i vaioiaʼi to kotou na apinga, ka riro katoa i reira to kotou ngakau.” (Mata. 6:19-21) Ka akakeu te ngakau ia tatou kia arumaki i te au mea ta tatou e inangaro ra. Ka akaputu tatou i ‘te au apinga i te rangi’ me rauka te ingoa e te turanga meitaki ki te Atua. Kare teia au apinga aroa e takoreia e kare e keiaia.

2. (a) Ia 2 Korinetia 4:17, 18, eaa ta Paulo i akamaroiroi ia tatou kia rave? (e) Eaa ta tatou ka uriuri i teia atikara?

² Akamaroiroi maira a Paulo ia tatou kia “akono . . . i to au mea akara koreia ra.” (E tatau ia 2 Korinetia 4:17, 18.) Teia au apinga aroa akara koreia, ko te au akameitakianga i roto i te ao ou a te Atua. I teia atikara, ka akara matatio tatou e a apinga aroa akara koreia, ka puapingaia tatou i teianei—te pirianga oa ki te Atua, te pure, te tauturu a te vaerua tapu, e te tauturu mei te rangi no te angaanga tutu aere. Ka uriuri katoa tatou akapeea me akaperepere i teia au apinga aroa akara koreia.

3. Eaa te apinga aroa akaperepereia, e akapeea e rauka ai?

³ Te apinga aroa akaperepereia ko te pirianga oa ki te Atua ko Iehova. (Sala. 25:14) Akapeea te Atua te akaoaoa  anga i te tangata ara e kia vai tapu? Na roto i te atinga oko o Iesu tei “apai ke atu i te ara a to te ao.” (Ioa. 1:29) Kite meitaki a Iehova e ka tiratiratu a Iesu ei Akaora i te tangata. No reira i rauka ai i te Atua i te akaoaoa i te tangata i mua ake ka mate ei a Karaiti.—Roma 3:25.

4. Oronga mai i te au akaraanga o te aronga tei riro ei oa no te Atua i mua ake i te tuatau Kerititiano.

⁴ Akamanako ana i te tangata tei riro mai ei oa no te Atua i mua ake i te tuatau Kerititiano. Te tangata akarongo ko Aberahama. E 1,000 mataiti i muri ake te mate anga a Aberahama, kapiki a Iehova iaia e ko “toku oa.” (Isa. 41:8) Kare te mate e akatakake ia Iehova mei tona au oa piri mou. Te maara ra ia Iehova a Aberahama. (Luka 20:37, 38) Tetai akaraanga, ko Iobu. Ki mua i te akaputuputuanga angera i te rangi, kua tuatua meitaki a Iehova no Iobu. Kapiki a Iehova iaia e “e tangata apa kore e te tiratiratu, i te mataku anga i te Atua, e te akaruke anga i te kino.” (Iobu 1:6-8) Eaa to Iehova manako ia Daniela, tei tavini tiratiratu i te Atua i te enua ke no tetai 80 mataiti? E toru taime te akamaroiroi anga te au angera i teia tangata pakarikari e “kua akaperepere maataia” e te Atua. (Dani. 9:23; 10:11, 19) Papu ia tatou e te anoano ra a Iehova i te akatuakaou mai i te au oa tana i akaperepere.—Iobu 14:15.

5. Eaa te umuumuia ra kia rauka tetai pirianga oa kia Iehova?

⁵ Eia aronga ara i teia rā e pirianga oa to ratou kia Iehova? E mirioni ua atu. Kite tatou i teia no te mea e maata ua atu te tane, te vaine e te tamariki i teianei ao te akaari ra e te inangaro ra ratou kia riro ei oa no te Atua. “Tei te aronga tuatua-tika ra” a Iehova. (Mase. 3:32) No to ratou akarongo i te atinga oko o Iesu, ka rauka teia pirianga oa. Mareka a Iehova me akatapu tatou ia tatou uaorai kiaia e kia papetitoia. Me rave tatou i teia, ka piri tatou ki te mirioni ua atu Kerititiano, tei akatapuia e tei papetitoia kia piri vaitata ki te Atua ei Oa akaperepereia!

6. Akapeea tatou me akaari e te akaperepere ra tatou i te pirianga oa ki te Atua?

⁶ Akapeea tatou me akaari e te akaperepere ra tatou i te pirianga oa ki te Atua? Mei ia Aberahama e Iobu, tei tiratiratu ki te Atua e tere atu i te anere mataiti, kia tiratiratu rai tatou—noatu te roa te tavini anga ia Iehova i roto i teia akatereanga kino. Mei ia Daniela, e akaperepere tatou i to tatou pirianga oa ki te Atua. (Dani. 6:7, 10, 16, 22) Ma te tauturu a Iehova, ka akakoromaki tatou i tetai ua atu timata anga e ka piri vaitata kiaia.—Phili. 4:13.

7. (a) Ia Maseli 15:8, eaa to Iehova manako i ta tatou pure? (e) Akapeea a Iehova me pau i ta tatou pure?

⁷ Tetai apinga aroa akara koreia, ko te pure. E reka ana te au oa piri mou i te uriuri manako ki tetai e tetai. Pera ainei toou pirianga oa kia Iehova? Ae! Te tuatua maira a Iehova kia tatou na roto i tana Tuatua, e te akakite maira i tona au manako. Ka karangaranga tatou kiaia na roto i te pure, e ka akakite i to tatou au manako ngakau kiaia.  Te mareka ra a Iehova i te akarongo i ta tatou pure. (E tatau ia Maseli 15:8.) Ei Oa aroa, te akarongo maira Iehova e te pau maira i ta tatou pure. Tetai taime ka tae viviki mai te pauanga. Tetai taime ka pure ua atu tatou. Papu ia tatou e ka tae mai te pauanga i te taime tau. E tika, penei ka tuke rai ta te Atua pauanga ki ta tatou i tapapa atu. Ei akaraanga, penei kare aia e akakore i te timata anga, ka oronga mai ra aia i te pakari e te maroiroi kia “akakoromaki” i te reira.—1 Kori. 10:13.

8. Akapeea tatou me akaari e te akaperepere ra tatou i te apinga aroa o te pure?

⁸ Akapeea tatou me akaari e te akaperepere ra tatou i teia apinga aroa, ko te pure? Na te aru anga i ta Iehova ako “auraka e tukutuku i te pure.” (1 Tesa. 5:17) Kare a Iehova e māro ia tatou kia pure? Te akangateitei ra aia ia tatou e te akamaroiroi ra ia tatou kia “tamou marie tikai i te pure.” (Roma 12:12) Ka akaari tatou e te akaperepere ra tatou i teia na te pure putuputu anga i te au rā. E pure tatou i te au pure akameitaki e te akapaapaa ia Iehova.—Sala. 145:2, 3.

9. Eaa te manako o tetai taeake no te pure, e eaa toou manako i te reira?

⁹ Te roa atu ia tatou i te tavini ia Iehova e te kite i tana pau anga ki ta tatou pure, ka akaperepere atu tatou i te pure. Ei akaraanga, ko Chris, e taeake tavini tamou no te 47 mataiti. “Mei teaa atura te reka i te pure kia Iehova i te popongi maiata” i nana ai. “Reka tikai au i te tuatua kia Iehova i te tuatau e iti maira te ra e te manea o te au topata au! Akakeu teia iaku kia akameitaki iaia no tana au apinga aroa, kapiti mai te pure. Me pure au i te openga o te ra, reka taku moe ma te akava ngakau meitaki.”

10. Eaa tatou ka akaperepere ei i te vaerua tapu o te Atua?

¹⁰ Ka akaperepere katoa tatou i te  apinga aroa akara koreia, koia te mana ririnui o te Atua. Akamaroiroi a Iesu ia tatou kia pure no te vaerua tapu. (Luka 11:9, 13) Na roto i tona vaerua, oronga mai a Iehova i te maroiroi no tatou—te “mana maata meitaki nei.” (2 Kori. 4:7; Anga. 1:8) Me tauturu mai to te Atua vaerua, ka rauka ia tatou i te akakoromaki i tetai ua atu timata anga.

11. Akapeea te vaerua tapu me tauturu ia tatou?

¹¹ Ka tauturu te vaerua tapu ia tatou kia rave i te angaanga na te Atua. Ka akameitaki atu to te Atua vaerua i to tatou au tareni e te au tu karape. Ka tauturu ia tatou kia rave i ta tatou apainga Kerititiano. No te vaerua o te Atua i meitaki ei ta tatou angaanga.

12. Ia Salamo 139:23, 24, ka pure tatou no te vaerua tapu kia tauturu ia tatou kia rave i teaa?

¹² Tetai ngai ka akaari tatou e te akaperepere ra tatou i te vaerua tapu o te Atua, na te pure anga kia kite i te manako e te anoano tarevake i roto i te ngakau. (E tatau ia Salamo 139:23, 24.) Na roto i tona vaerua, ka akamatakite mai a Iehova i te anoano tarevake i roto ia tatou. Me kite tatou i te manako e te anoano tarevake, e pure kia oronga mai te vaerua o te Atua i te maroiroi no te kopae i te reira. Ka akaari tatou e te kopae ra tatou i te reira, te openga kare a Iehova e tuku mai i tona vaerua tapu kia tauturu ia tatou.—Ephe. 4:30.

13. Akapeea tatou me akaperepere atu i te vaerua tapu?

¹³ Ka akaperepere atu tatou i te vaerua tapu me akamanako tatou i ta te vaerua i akatupu i teia ra. Mua ake ka aere ei a Iesu ki te rangi, akakite aia ki tana pipi: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku . . . e tae ua atu ki te openga o te enua ra.” (Anga. 1:8) Akatupu meitakiia teia au tuatua i teia ra. Ma te tauturu a te  vaerua tapu, kua akaputuia mai e varu e te apa mirioni aronga akamori ia Iehova mei te ao katoa. Te rekareka katoa ra tatou i tetai parataito pae vaerua no te mea te tauturu nei to te Atua vaerua ia tatou kia taangaanga i te au tu meitaki, mei te inangaro, rekareka, au, akakoromaki, takinga meitaki, meitaki, pikikaa kore, maru, e te akono meitaki. Na “te Vaerua e akatupu” i teia au tu. (Gala. 5:22, 23) E apinga aroa akaperepereia te vaerua tapu!

14. Eaa te tauturu akara koreia me piri tatou ki roto i te angaanga tutu aere?

¹⁴ Tei ia tatou te apinga aroa akara koreia no te “angaanga kapiti” kia Iehova e tana akaaerenga i te rangi. (2 Kori. 6:1) Ka tupu teia me rave tatou i te angaanga tutu aere. Karanga a Paulo nona e te aronga tei rave i teia angaanga: “E oa rave angaanga oki [tatou] no te Atua.” (1 Kori. 3:9) Me piri tatou ki roto i te angaanga Kerititiano, e au oa angaanga katoa tatou no Iesu. Akamaara ana te akaue anga a Iesu i tana pipi kia “akariro i to te pa enua katoa ei pipi,” karanga aia: “Tei vaitata ua ra au ia kotou.” (Mata. 28:19, 20) Akapeea te au angera? Akaperepere tatou i te au angera e arataki nei ia tatou kia tutu aere i te “evangelia mutu kore . . . ki te aronga e noo i te ao nei”!—Apo. 14:6.

15. Akakite mai i tetai akaraanga Pipiria no ta Iehova tuanga puapinga i roto i ta tatou angaanga tutu aere.

¹⁵ Me rauka teia tauturu mei te rangi, eaa te ka akatupuia? Ia tatou e tutu ra i te karere o te Patireia, ka āriki tetai pae ma te ngakau akarongo. (Mata. 13:18, 23) Naai e akatupu ra i teia au tuatua mou kia uua? Akakite a Iesu, kare tetai tangata e riro ei pipi nana mari ra “kia akatae mai te Metua . . . nei iaia.” (Ioa. 6:44) Oronga mai te Pipiria i tetai akaraanga. Akamaara ana ia Paulo e tutu aere ra ki tetai pupu vaine i vao i te oire o Philipi. Akakite te Pipiria i te vaine ko Ludia: “E akamaoraoraia iora tona ngakau e te Atu, kia akono aia i te tuatua i tuatuaia e Paulo ra.” (Anga. 16:13-15) Mei ia Ludia, e mirioni ua atu ta Iehova i akatae kiaia.

16. Koai te ka akangateiteiia no ta tatou angaanga tutu aere?

¹⁶ Koai te akapuapinga ra i ta tatou angaanga tutu aere? Pau a Paulo i teia uianga i tona tata anga i teia tuatua ki te putuputuanga Kerititiano: “Naku oki i tanu, na Apolo i tamauu ki te vai; na te Atua ra i akatupu. E teianei, kare a te tanu, kare oki a te tamauu ki te vai; ko te Atua ra ko tei akatupu.” (1 Kori. 3:6, 7) Mei ia Paulo, ka akangateitei tatou ia Iehova no ta tatou angaanga tutu aere.

17. Akapeea tatou me akaari e te akaperepere ra tatou i te “angaanga kapiti” ki te Atua, Karaiti, e te au angera?

¹⁷ Akapeea tatou me akaari e te akaperepere ra tatou i te akameitakianga kia “angaanga kapiti” ki te Atua, Karaiti, e te au angera? Na te kimi maroiroi anga i te tuatau no te tutu aere i te tuatua meitaki ki tetai ke. Te vaira te au mataara ke ke mei “te apii . . . i te ngai tangata, e i tera are i tera are.” (Anga. 20:20) Te reka katoa ra tetai pae i te tutu aere i tetai ua atu taime. Me aravei  i te tangata, ka akaoaoa e ka pukapuka. Me ariu mai te tangata, ka akakite ratou i te karere o te Patireia.

18-19. (a) Akapeea tatou me pipi i te ua o te tuatua mou? (e) Akakite mai i tetai tupuanga akapeea a Iehova te tauturu anga i tetai tei apii i te Pipiria.

¹⁸ Ei ‘oa rave angaanga no te Atua,’ ka ruru tatou i te ua o te tuatua mou e ka pipi ki te vai. Me inangaro te tangata, ka akamaroiroi tatou iaia, me kare e akakite ki tetai ke kia aravei atu iaia no te akamata i te apii Pipiria. I te apii e tere ra ki mua, mataora tatou i te kite ia Iehova e tauturu ra i te reira tangata kia riro ei pipi nana.

¹⁹ Akamanako ana i te akaraanga o Raphalalani, e taunga i Aperika Tonga. Reka aia i tana apii Pipiria. Inara kua ngata iaia i te āriki i tona tatau anga i te Tuatua a te Atua, no te karangaranga atu ki te ai tupuna tei mate. (Deu. 18:10-12) Aere ua rai, kua tuku aia i te Atua kia akatikatika i tona manako. I muri mai, kua akamutu aia i tana angaanga taunga, e kua akaruke i te reira. Karanga a Raphalalani, e 60 ona mataiti i teianei: “Akameitaki tikai au i te Au Kite o Iehova no tei tauturu iaku, kia kitea te ngai angaanga. Akameitaki tikai au ia Iehova no tei tauturu iaku kia tama i toku oraanga, e i teianei te tutu aere nei au ei Kite no Iehova.”

20. Eaa taau ka titau i te rave?

²⁰ I teia atikara, uriuri tatou i te au apinga aroa akara koreia. Te mea akaperepereia, ko te akameitakianga ei Oa no Iehova. Ka puapingaia tatou mei te au apinga aroa akara koreia—me aere tatou kiaia ma te pure, me rauka te tauturu a te vaerua tapu, e me rauka te tauturu mei te rangi no ta tatou tutu aere. E akaperepere i teia au apinga aroa akara koreia. Eiaa e akamutu i te akameitaki ia Iehova ei Oa akaperepere no tatou.