1. Со вакерѓа о Исус башо барвалипе ко небо?

О НАЈСКАПОЦЕНА буќа нашти те дикхен пе јакхенцар. Ки пли Проповед ки гора, о Исус керѓа лафи башо барвалипе ко небо кова сој бут поскапоцено таро било саво материјално барвалипе. Поврзимо акалеа, ов вакерѓа: „Коте тано тло барвалипе, адари ка овел тло вило“ (Мат. 6:19-21). Јавере лафенцар, амаро вило ка поттикнинел амен те рода адава сој аменге најважно, или највредно. Амен кхедаја аменге „барвалипе ко небо“ аѓаар со кераја са со шај те овел амен шукар анав ко Девел. О Исус објаснинѓа кај адава барвалипе нашти никој ни те чорел ле амендар, а ни те уништинел ле.

2. а) Спрема 2. Коринќаните 4:17, 18, ко со поттикнинѓа амен о апостол Павле? б) Со ка дикха ки акаја статија?

² О апостол Павле поттикнинѓа амен те „дикха... адава со на дикхела пе“. (Читин 2. Коринќаните 4:17, 18.) Ко адава барвалипе со на дикхела пе тане вклучиме о шуже буќа со ка овен амен ко е Девлескоро нево свето. Ама, ки акаја статија ка дикха штар скапоцена буќа со нашти те дикхен пе а шај те овен амен панда авдиве — о амалипе е Девлеа, и молитва, и помош таро е Девлескоро свети дух хем и поддршка со добинаја ла ки служба таро Јехова, таро Исус хем таро ангелија. Исто аѓаар, ка дикха сар шај те сикава кај сием благодарна башо са акала буќа.

3. Кова тано о најбаро барвалипе со на дикхела пе, хем со керѓа о Јехова те шај те добина ле?

³ О најбаро барвалипе со на дикхела пе тано о амалипе е Јеховаја (Пс. 25:14). Сар шај о Девел, кова сој свето, те овел амал несовршена манушенцар? Адава шај само адалеске со и откупно жртва е Исусескири „цидела о грево таро свето“ (Јован 1:29). О Јехова сине сигурно кај лескоро Чхаво ка ачховел леске верно џи ко мерибе, хем кај адалеа ка исполнинел пе лескири намера те спасинел е манушен. Адалеске о Девел шај сине те овел амал несаве манушенге кола со живинѓе панда англедер те мерел о Исус (Рим. 3:25).

4. Кола мануша сине амала е Девлеске панда англедер те мерел о Исус?

⁴ Размислин башо несаве мануша со сине е Девлеске амала панда англедер те мерел о Исус. О Авраам сине мануш коле со сине ле бут бари вера. Повише таро 1.000 берша пало лескоро мерибе, о Јехова баши лесте вакерѓа кај тано лескоро амал (Иса. 41:8). Акава сикавела кај ни о мерибе нашти те одвојнел е Јехова таро лескере паше амала. Ко е Девлескере мисле, о Авраам тано џивдо (Лука 20:37, 38). Јавер пример тано о Јов. Ки јекх прилика, кеда са о ангелија сине кхедиме ко небо, о Јехова сикавѓа кај иси ле доверба ко пло слуга о Јов. Ов вакерѓа кај о Јов тано „праведно мануш хем бизи маана, кова со дарала е Девлестар хем цидела пе таро лошнипе“ (Јов 1:6-8). А со мислинела сине о Јехова башо Даниел, кова со верно служинѓа леске околу 80 берш ки паганско пхув? Ов трин пути бичхалѓа ангели кова со уверинѓа лескере пхуре слуга кај тано „е Девлескоро мангло мануш“ (Дан. 9:23; 10:11, 19). Шај те ова сигурна кај о Девел едвај аџикерела те авел о диве кеда ка ваздел пле мангле амален кола со муле (Јов 14:15).

5. Со ваљани те кера те шај те ова паше амала е Јеховаја?

⁵ Дали е Девле иси ле паше амала ки Пхув авдиве да? Оја. Милиоња несовршена мануша таро цело свето — мурша, џувља хем чхаве — сикавена пле постапкенцар кај тане амала е Јеховаске. И Библија вакерела кај о Девел тано паше околенцар сој праведна (Изр. 3:32). Те шај некој те овел амал е Јеховаја, мора те сикавел вера ки откупно жртва е Исусескири. Тегани, ов шај те дел лафи е Јеховаске кај ка служинел леске хем те крстинел пе. Кеда керела акала важна чекорија, ов овела дело таро јавера милиоња христијања кола со више тане паше амала е Јеховаја, и најбари личност ко универзум!

6. Сар шај те сикава кај бут ценинаја амаро амалипе е Девлеа?

⁶ Сар шај те сикава кај бут ценинаја амаро амалипе е Девлеа? Исто сар о Авраам хем о Јов, кола со ачхиле верна е Јеховаске повише таро шел берш, амен да мора те ачхова верна бизи разлика кобор време служинаја леске ко акава пурано свето. Исто сар о Даниел, амен да мора те ценина амаро амалипе е Девлеа повише таро амаро живото (Дан. 6:7, 10, 16, 22). Адалеске со поможинела амен о Јехова, амен шај те издржина са о неволје со ка овен амен, хем аѓаар те ачхова паше амала леа (Фил. 4:13).

7. а) Спрема Изреки 15:8, сар дикхела о Јехова ко амаре молитве? б) Сар о Јехова одговоринела ко амаре молитве?

⁷ И молитва тани панда јекх скапоцено поклон со нашти дикхела пе. О паше амала мангена те керен лафи машкар песте башо адава со мислинена хем сар осетинена пе. Акава важинела хем башо амаро амалипе  е Јеховаја. Ов керела аменцар лафи преку пло Лафи, коте со вакерела аменге со мислинела хем сар осетинела пе. А амен вакераја леске амаре најхор мисле хем најгаравде чувствија кеда молинаја амен леске. О Јехова мангела те шунел амаре молитве. (Читин Изреки 15:8.) Сар јекх амал со грижинела пе, ов на само со шунела амаре молитве него исто аѓаар одговоринела ки ленде. Понекогаш адава керела ле сигате, ама понекогаш ваљани те молина амен повише пути баши исто бути. Сепак, шај те ова увериме кај о Јехова ка одговоринел аменге ко право време хем ко најшукар начин. Џанѓола пе, шај нане те одговоринел аменге сар со аџикераја. На пример, наместо те цидел несави неволја или искушение, шај ка дел амен сила хем мудрост те издржина лен (1. Кор. 10:13).

8. Сар шај те сикава благодарност баши молитва сар поклон таро Девел?

⁸ Сар шај те сикава благодарност баши молитва сар скапоцено поклон таро Девел? Јекх начин тано аѓаар со ка ова послушна ко совет те молина амен секогаш (1. Сол. 5:17). О Јехова на чхивела амен силаја те молина амен леске. Наместо адава, ов поштујнела амари слободно волја хем поттикнинела амен те истрајна ки молитва (Римјаните 12:12). Амен шај те сикава ценење аѓаар со често ка молина амен ко теко е дивескоро. Џанѓола пе, ко амаре молитве ваљани те благодарина леске хем те фалина ле (Пс. 145:2, 3).

9. Со вакерѓа јекх пхрал баши молитва, хем со мислинеа ту башо акава поклон таро Девел?

⁹ Ко берша џикоте служинаја е Јеховаске хем дикхаја сар ов одговоринела ко амаре молитве, оваја са поблагодарна башо акава поклон. На пример, размислин башо Крис, јекх пхрал сој ки полновремено служба 47 берш. Ов вакерела: „Бут сиум бахтало кеда шај рано сабајле повише време те молинав ман е Јеховаске. Уживинава те керав лафи е Јеховаја рано сабајле кеда тано панда тивко хем те дикхав сар икљола о кхам. Адава поттикнинела ман те овав леске благодарно башо са о поклонија со денѓа амен,  машкар коленде тани хем и молитва. А кеда ка пхравав леске мло вило ки молитва ко крајо таро диве, шај те совав мирно хем те овел ман чисто совест“.

10. Соске ваљани те ценина е Девлескоро свети дух?

¹⁰ О свети дух тано панда јекх скапоцено поклон со на дикхела пе. О Исус поттикнинѓа амен секогаш те молина амен башо свети дух (Лука 11:9, 13). Преку пло духо, о Јехова дела амен сила — чак „сила, која со накхавела и нормално“ (2. Кор. 4:7; Дела 1:8). Адалеске со поможинела амен е Девлескоро духо, шај те издржина секоја неволја која со ка овел амен.

11. Сар поможинела амен о свети дух?

¹¹ О свети дух шај те поможинел амен те кера амаре задаче со иси амен ки е Девлескири организација. Ов шај те поможинел амен те ова пошукар ко амаре талентија хем способностија со више иси амен. Свесна сием кај секова успех со иси амен ки служба башо Девел нане адалеске со амен сием бут способна, него адалеске со ов поможинела амен преку пло свети дух.

12. Спрема Псалм 139:23, 24, башо со шај те молина е Јехова?

¹² Сар шај те сикава ценење башо акава поклон? Аѓаар со ка молина амен о свети дух те поможинел аменге те открина секоја погрешно мисла или желба ко амаро вило. (Читин Псалм 139:23, 24.) Ако дикхаја кај иси амен асавке мисле или желбе, тегани ваљани те молина е Девле те користинел пло свети дух те шај те дел амен и сила со ваљани аменге те борина амен ленцар. Аѓаар о Јехова ка дикхел кај сием одлучна те на кера нешто со шај те чхинавел ле те поможинел амен пле свети духоја (Еф. 4:30).

13. Сар шај те ова панда поблагодарна башо свети дух?

¹³ Оваја панда поблагодарна башо свети дух исто аѓаар кеда размислинаја башо са адава со керела пе авдиве преку лесте. Англедер те џал ко небо, о Исус вакерѓа пле учениконге: „Ка приминен сила кеда о свети дух ка авел упри туменде, хем ка овен мле  сведокија... ко најдур тхана ки пхув“ (Дела 1:8). Баш акава случинела пе ко амаро време. Адалеске со поможинела о свети дух, околу офто текваш милиоња мануша тари цели Пхув почминѓе те служинен е Јеховаске. Освен адава, живинаја ко духовно рај адалеске со е Девлескоро духо поможинела амен те развина бут шуже особине, сар сој мангипе, радост, мир, стрпливост, љубезност, шукарипе, вера, те на хољанел пе сигате хем самоконтрола. Акала тане, уствари „особине со авена таро свети дух“ (Гал. 5:22, 23). О свети дух чаче тано скапоцено поклон!

14. Сави поддршка иси амен џикоте сием ки служба?

¹⁴ Јавер скапоцено поклон со на дикхела пе тано адава со шај те соработина е Јеховаја, е Исусеа хем е ангеленцар (2. Кор. 6:1). Акава кераја секогаш кеда џаја ки служба. Баши песте хем башо окола со учествујнена ки проповедничко активност, о апостол Павле вакерѓа: „Амен сием е Девлескере соработникија“ (1. Кор. 3:9). Кеда сием ки служба, амен сием хем е Исусескере соработникија. Откеда денѓа заповед пле учениконге те керен „ученикија таро мануша таро са о народија“, ов вакерѓа: „Ме сиум туменцар“ (Мат. 28:19, 20). А сар соработинаја е ангеленцар? Бут сием благодарна со ола водинена амен џикоте вакераја „о шукар хабери со ка ачхол вечно... околенге со живинена ки пхув“ (Отк. 14:6).

15. Кова пример тари Библија сикавела аменге кај е Јехова иси ле важно улога ки служба со кераја ла?

¹⁵ Со успејнаја те кера адалеске со добинаја помош таро небо? Џикоте сејнаја о хабери башо Царство, несаво семе перела ки „шукар пхув“ хем почминела те бајрол (Мат. 13:18, 23). Кој тано адава со дела о семе е чачипаскоро те бајрол ко ковло вило хем те дел плоди? О Исус објаснинѓа кај никој нашти те овел лескоро ученико „ако на анела ле о Дад“ (Јован 6:44). Ки Библија тано спомнимо јекх конкретно пример башо акава. Ки јекх прилика, о Павле сведочинела сине јекхе група џувленге авријал тари диз Филипи. Приметин со вакерела и Библија баши јекх лендар, која со викинела пе сине Лидија: „О Јехова пхравѓа лакоро вило те прифатинел адава со вакерела сине о Павле“ (Дела 16:13-15). Исто сар и Лидија, о Јехова привлечинѓа ки песте милиоња јавера мануша.

16. Кој заслужинела и чест башо успех со иси амен ки служба?

¹⁶ Кој чаче заслужинела и чест башо успех со иси амен ки служба? О Павле денѓа о одговор ко акава кеда вакерѓа акала лафија е христијаненге ко Коринт: „Ме садинѓум, о Аполо чхивѓа пани, ама о Девел керѓа те бајрол. Адалеске, нане најважно окова со садинела, а ни окова со чхорела пани, него о Девел, кова со керела те бајрол“ (1. Кор. 3:6, 7). Исто сар о Павле, амен да ваљани те да и чест е Јеховаске башо са о шукар резултатија со иси амен ки служба.

17. Сар шај те сикава кај ценинаја и чест те соработина е Девлеа, е Христосеа хем е ангеленцар?

¹⁷ Сар шај те сикава кај ценинаја и чест те соработина е Девлеа, е Христосеа хем е ангеленцар? Аѓаар со ревно ка трудина амен те вакера о шукар хабери е јаверенге. Акава шај те кера ле ко бут начинија, сар на пример, аѓаар со ка сведочина „јавно хем... таро кхер ко кхер“ (Дела 20:20). Бут џене користинена секоја прилика те сведочинен неформално. Кеда аракхена некас со на пенџарена, ола љубезно поздравинена ле хем почминена разговор. Ако о мануш тано спремно те керел лафи, ола тактично почминена те керен лафи башо хабери башо Царство.

18-19. а) Сар чхораја пани ко семе е чачипаскоро? б) Сар о Јехова поможинѓа јекхе манушеске со проучинела сине и Библија?

 ¹⁸ Сар е „Девлескере соработникија“, освен со сејнаја о семе е чачипаскоро, мора хем те чхора леске пани. Кеда некој ка сикавел интерес, мангаја те да са амендар те шај палем те посетина ле или те договорина некој јавер те посетинел ле те шај те почминел библиско курси. Џикоте проучинаја некасаја, бут сием бахтале кеда дикхаја сар о Јехова поможинела леске те менинел пло размислибе хем пле чувствија.

¹⁹ Размислин башо Рафалалани тари Јужноафриканско Република, кова со сасљарела сине е манушен аѓаар со бајнела сине ленге. Бут свиџинела пе сине леске адава со сиклило џикоте проучинела сине и Библија. Ама, сине леске бут пхаро те прифатинел адава со вакерела е Девлескоро Лафи башо комуницирибе е муленцар (5. Мој. 18:10-12). Хари похари ов мукхља о Девел те обликујнел лескоро размислибе. Сар накхела сине о време, ов чхинавѓа те керел бути сар бајачи, иако адаја сине леске единствено бути те заработинел паре. Акава пхрал, коле со акана иси 60 берш, вакерела: „Бут сиум благодарно е Јеховаскере сведоконге со поможинѓе ман ко разна начинија. Ола поможинѓе манге чак те аракхав јавер бути. Ама, највише таро са сиум благодарно е Јеховаске со поможинѓа ман те керав промене ко мло живото те шај те учествујнав ки служба сар лескоро крстимо слуга“.

20. Со сиан одлучно те кере?

²⁰ Ки акаја статија дикхлем штар скапоцена поклонија со нашти те дикха лен јакхенцар. О најбаро поклон лендар тано и чест о Јехова те овел амаро најшукар амал. Кеда сием паше леа, шај те молина амен леске, те добина помош таро лескоро свети дух, хем те добина небесно поддршка ки амари служба. Те ова одлучна те бајрара амаро ценење башо акала скапоцена поклонија. Хем секогаш мангаја те ова благодарна е Јеховаске башо адава сој тано аменге добором бут шукар амал.