1. So o Isus phendža ando barvalipe ko nebo?

NA DIČHONA sa o buča kola tane vredna. U stvari, odova soj tano najvredno našti te dikhel pe. Ki Propoved ki gora, o Isus phendža so o barvalipe ko nebo tano povredno ando materijalna buča. Palo odova, ov phendža jekh važno buti: „Kuri tano toklo barvalipe, odothe ka ovel hem to vilo“ (Mat. 6:19-21). Odova so amen smatrinaja soj tano but vredno, odova hem amaro vilo ka podstaknini amen te čera. Amen čedaja „o barvalipe ko nebo“ ked daja sa amendar te ovel amen šukar anav anglo Jehova. O Isus phendža so odova barvalipe niko našti te lel amendar niti te propadini.

2. (a) Premali 2. Korinćanima 4:17, 18, ko so o Pavle podstaknini amen? (b) Sostar ka vačera ko akava članko?

² O apostol Pavle podstaknini amen te dikha „ko odova so na dičhola.“ (Čitin 2. Korinćanima 4:17, 18.) Odova so na dičhola tane sa o blagoslovija kola ka ovel amen ko e Devleso nevo sveto. Ko akava članko ka razmotrina štar buča kola na dičhona, a kola šaj te ovel amen već akana. Odola tane: o amalipe e Devleja, i molitva, i pomoć ando e Devleso sveti duh hem i podrška koja dena amen o Jehova, o Isus hem o anđelija ki amari služba. Isto adžahar, ka dikha sar šaj te mothova so hijam zahvalna e Jehovase aso odola poklonija kola na dičhona.

3. Kova tano najvredno poklon kova na dičhola hem sar šaj te dobina le?

³ O amalipe e Jehovaja tano najvredno poklon kova na dičhola (Ps. 25:14). Sar šaj o Devel te ovel amal e nesavršeno  manušencar hem te ačhol potpuno sveto? Ov šaj te čerel odova sebepi so e Isusesi žrtva „cidela o greh ando sveto“ (Jov. 1:29). Čak hem angleder o Isus te merel, o Jehova džandža so ov ka ačhol verno sa dži o meribe te šaj adžahar te spasini e manušen. Odolese, o Devel šajindža te ovel amal okolencar kola živindže angleder so o Isus mulo (Rimlj. 3:25).

4. Vačer disave primerija ando manuša kola živindže ko purano vreme, a kola hine e Devlese amala.

⁴ Akana ka vačera ando nekobor manuša kola živindže ko purano vreme, a kola hine e Devlese amala. O Avraham hine manuš kova mothovdža so hine le bari vera. Hem 1 000 berš palo oleso meribe, o Jehova vičindža le „mo amal o Avraham“ (Is. 41:8). Odova značini so čak hem ked o manuš merela, o Jehova pana dikhela le sar pe šukar amale. O Avraham tano dživdo ki e Jehovasi godi (Luka 20:37, 38). Aver primer tano o Jov. Ked sa o anđelija čedindže pe ko nebo, o Jehova vačerdža šukar buča ando Jov. Ov phendža so ov tano „pravedno manuš, bizi mana, kova darala ando Devel hem cidela pe ando lošnipe“ (Jov 1:6-8). So o Jehova mislindža ando Danilo kova verno služindža lese oko 80 berš ki phuv kuri o manuša na služindže e Devlese? Trin putija o anđelija uverindže le soj tano ov „but manglo e Devlese“ (Dan. 9:23; 10:11, 19). Amen šaj te ova sigurna so o Jehova jedva adžičeri o dive ked ka vazdel pekle mangle amalen kola mule (Jov 14:15).

5. So valjani neko te čerel te šaj te ovel e Jehovaso amal?

⁵ Avdije ko celo sveto isi nekobor milionja manuša kola tane e Jehovase amala. Odova džanaja sebepi so but murša, džuvlja hem čhave ko celo sveto odoleja so čerena mothovena soj tane čače e Devlese amala. O Jehova tano „paše... okolencar so isi len iskreno vilo“ (Posl. 3:32). Asavko amalipe tano moguće odolese so on mothovena i vera ki e Isusesi otkupno žrtva. Sebepi odija otkupno žrtva, amen šaj te ova e Jehovase amala, te predajina amaro dživdipe olese hem te krstina amen. Ked čeraja akala važna buča, amen ovaja deo ando odola milionja manuša kola predajindže pe hem krstindže pe, a kolendže tano o Jehova, najbari Osoba ko svemir, najpaše amal.

6. Sar šaj te mothova amari zahvalnost aso amaro amalipe e Devleja?

⁶ Sar šaj te mothova so amaro amalipe e Devleja tano but vredno amendže? Sar o Avraham hem o Jov, kola verno služindže e Devlese više ando šel berš, hem amen mora te ačhova verna bizo obzir kobor već služinaja e Jehovase ko akava sveto. Sar o Danilo, hem amen mora te cenina amaro amalipe e Devleja pobuter nego amaro dživdipe (Dan. 6:7, 10, 16, 22). Sebepi e Jehovasi pomoć, amen šaj te izdržina bilo kova pharipe hem adžahar te ačhova paše amala oleja (Fil. 4:13).

7. (a) Premalo Poslovice 15:8, sar o Jehova dikhela ko amare molitve? (b) Sar o Jehova odgovorini ko amare molitve?

⁷ Pana jekh vredno poklon kova na dičhola tani i molitva. O šukar amala mangena jekh jekhese te vačeren sostar razmislinena hem sar osetinena pe. Da li tano asavko hem amaro amalipe e Jehovaja? Ja! O Jehova vačeri amencar prekalo poklo Lafi, hem prekalo oleste, ov mothovi amendže sar razmislini hem sar osetini pe. Amen vačeraja oleja ked molinaja amen hem tegani vačeraja lese amare najhor mislija hem osećanja. O Jehova uživini dži šunela amare molitve. (Čitin Poslovice  15:8.) Sar jekh šukar Amal, o Jehova na samo so šunela amare molitve, nego hem odgovorini koro lende. Disavo puti sigate odgovorini. Ama, disavo puti asi jekh buti valjani but putija te molina amen. Sar god te ovel, amen šaj te ova sigurna so o odgovor ka avel ko pravo vreme hem ko najšukar način. Naravno, e Devleso odgovor ki amari molitva šaj te ovel averčhane ando odova so adžičerdžam. Na primer, umesto te cidel amendar o pharipa, ov šaj te del amen mudrost hem snaga „te šaj te izdržina“ len (1. Kor. 10:13).

8. Sar šaj te mothova zahvalnost asi molitva?

⁸ Sar šaj te mothova zahvalnost aso akava but vredno poklon? Jekh način tano adžahar so ka šuna o savet andi Biblija kova phenela: „Uvek molinen tumen“ (1. Sol. 5:17). O Jehova na čhivela amen zorjeja te molina amen. Ov poštujini amari slobodno volja hem podstaknini amen te istrajina ki molitva (Rimlj. 12:12). Šaj te phena so amen mothovaja zahvalnost adžahar so svako dive molinaja amen but putija. Isto adžahar, na valjani te bistra te zahvalina amen e Jehovase hem te hvalina le ki molitva (Ps. 145:2, 3).

9. Sar jekh phral dikhela ki molitva hem sar tu dikheja ki molitva?

⁹ So duže služinaja e Jehovase hem dikhaja o odgovor ko amare molitve, sa pobuter valjani te cenina i molitva. Amaro phral, o Kris, kova 47 berš hine ki punovremeno služba, phenela: „Kobor tano šukar ked rano sabalje ušteja hem molineja tut e Jehovase. But tano šukar te moline tut e Jehovase dži o kapi andi rosa svetlinena, sose o kham uštela. Odova podstaknini man te zahvalina man olese aso sa o poklonja kuri tani uključimi hem i molitva. Ko krajo e diveso, nane ništa pošukar nego pali molitva te dža te sove, a džaneja so isi tut čisto savest.“

10. Sose valjani te ova zahvalna aso e Devleso sveti duh?

¹⁰ Pana jekh vredno poklon kova na dičhola, a aso kova valjani te ova zahvalna  tano o sveti duh. O Isus podstaknindža amen te molina amen aso sveti duh (Luka 11:9, 13). Prekalo sveti duh o Jehova dela amen „but bari snaga“ (2. Kor. 4:7; Dela 1:8). Sebepi so pomožini amen e Jehovaso sveti duh, amen šaj te izdržina bilo kova pharipe kova akana isi amen.

11. Sar o sveti duh šaj te pomožini amendže?

¹¹ O sveti duh šaj te pomožini amendže te čera šukar amare zaduženja hem odgovornostija ki Jehovasi organizacija. E Devleso sveti duh šaj te pomožini amendže pana pošukar te koristina amare sposobnostija hem talentija. Amen džanaja so o uspeh kova isi amen ki služba nane sebepi amaro, nego sebepi so o sveti duh pomožini amendže.

12. Premalo Psalam 139:23, 24, aso so valjani te molina amen?

¹² Jekh aver način te mothova so ceninaja e Devleso sveti duh tano te molina amen e Devlese te pomožini amen te dikha da li isi amen neispravna mislija ja želje ko amaro vilo. (Čitin Psalam 139:23, 24.) Ako molinaja amen odolese, o Jehova prekalo poklo sveti duh ka pomožini amen te pendžara kola tane amare neispravna mislija hem želje. Tegani ked ka pendžara len, valjani te molina amen e Devleso sveti duh te del amen snaga te borina amen protiv olende. Adžahar ka mothova so na mangaja te čera ništa so ka sprečini e Jehova te del amen poklo sveti duh (Ef. 4:30).

13. Sar šaj te ovel amen pana pobari zahvalnost aso e Devleso sveti duh?

¹³ Pana pobuter ka ova zahvalna aso sveti duh, ako razmislinaja so o sveti duh čerela ko amaro vreme. Angleder te džal ko nebo, o Isus phendža pe učenikonendže: „Ka dobinen i snaga ked o sveti duh ka avel upro tumende hem ka oven me svedokija... sa dži o krajo e phuvjako“ (Dela 1:8). Baš akava ovela avdije. Prekalo sveti duh, pobuter ando ofto tekvaš milionja manuša ko celo sveto služinena e Jehovase. Isto adžahar, amen uživinaja ko duhovno raj, odolese so e Devleso duh  pomožini amendže te razvijina o osobine sar soj tane: mangipe, radost, mir, strpljivost, ljubaznost, šukaripe, vera, blagost hem samokontrola. Akala osobine tane „plod ando duho“ (Gal. 5:22, 23). Čače, o sveti duh tano jekh but vredno poklon!

14. Ko sarađujini amencar dži hijam ki služba?

¹⁴ Pana jekh baro poklon kova na dičhola tano odova so isi amen bari čast te sarađujina e Jehovaja, e Isuseja hem e anđelencar (2. Kor. 6:1). Svako puti ked hijam ki služba, amen sarađujinaja olencar. Ked o Pavle vačerdža pestar hem ando avera hrišćanija, ov phendža: „Amen hijam e Devlese saradnikija“ (1. Kor. 3:9). Ked propovedinaja, amen sarađujinaja hem e Isuseja. Setin tut so palo odova so zapovedindža pe učenikonedže te „čeren učenikonen ando manuša kotar sa o narodija“, o Isus phendža: „Me hijum tumencar“ (Mat. 28:19, 20). So šaj te phena ando anđelija? But hijam zahvalna so o anđelija usmerinena amen ked vačeraja „i večno šukar vest... okolendže so živinena ki phuv“ (Otkr. 14:6).

15. Vačer jekh primer andi Biblija kova mothovi so o Jehova isi le but važno uloga ki amari služba.

¹⁵ So šaj sa te čera sebepi so isi amen asavki podrška kotar nebo? Dži sejinaja i poruka ando Kraljevstvo, disavo seme perela ki šukar phuv hem barjola (Mat. 13:18, 23). Koj tano zaslužno te bi o seme barjola hem te bi anela o plod? O Isus phendža so nijekh manuš našti te ovel oleso učeniko osim ako o Dad „na privucini le“ (Jov. 6:44). Ki Biblija isi jekh primer kova vačeri akalestar. Jekh puti, o Pavle vačerdža i šukar vest disave romnjendže kola hine paše uzi diz Filipi. Zapazin so i Biblija vačeri ando jekh kotar odola romnja, koja vičindža pe Lidija: „Oj šundža odova so o Pavle vačerdža, a o Jehova phravdža olako vilo te prihvatini olese lafija“ (Dela 16:13-15). Sar e Lidija, o Jehova privucindža koro peste milionija avera manuša.

16. Kase valjani te da i čast aso bilo kova uspeh kova isi amen ki služba?

¹⁶ Kase valjani te da i čast ako ki služba isi amen uspeh? O Pavle odgovorindža ko odova pučibe ked pisindža e hrišćanendže ko Korint: „Me sadindžum, o Apolo vadindža, ama o Devel dindža te barjol. Odolese nane zaslužno ni okova kova sadini, ni okova kova vadini, nego o Devel kova dela te barjol“ (1. Kor. 3:6, 7). Sar o Pavle, hem amen valjani uvek te mothova čast e Jehovase aso bilo kova uspeh kova isi amen ki služba.

17. Sar šaj te mothova amari zahvalnost aso odova so sarađujinaja e Jehovaja, e Isuseja hem e anđelencar?

¹⁷ Sar šaj te mothova so hijam zahvalna aso odova so isi amen čast te sarađujina e Jehovaja, e Isuseja hem e anđelencar? Adžahar so ka da sa amendar te vačera sarinendže i šukar vest. Isi nekobor načinja sar šaj te čera odova. Jekh olendar tano te svedočina „javno hem kotar čher dži o čher“ (Dela 20:20). Isto adžahar, but Svedokija uživinena neformalno te svedočinen. Ked resena disave manuše kas na pendžarena, on pozdravinena le hem ljubazno vačerena oleja. Ako odova manuš mangela te vačeri, tegani on taktično usmerinena o razgovor ki šukar vest ando Kraljevstvo.

18-19. (a) Sar vadinaja o seme ando čačipe? (b) Vačer jekh iskustvo kova mothovi sar o Jehova pomožindža nekase ko proučini i Biblija.

¹⁸ Sar „e Devlese saradnikija“, amen na mangaja samo te sejina o seme ando čačipe, nego mora hem te vadina le. Ked jekh  manuš mothovi soj tano zainteresovano, amen mangaja te da sa amendar palem te posetina le ja te arakha nekas ko ka pokušini te počmini oleja e biblijako kurs. Ked jekh manuš napredujini, amen hijam bahtalje te dikha sar o Jehova utičini upro leso vilo hem upro leso način sar razmislini.

¹⁹ Te dikha o primer ando amaro phral kova angleder hine vrač ki Južno Afrika. Olese but sviđindža pe odova so sikljilo andi Biblija. Ama, hine lese but pharo te prihvatini odova so e Devleso Lafi vačeri ando odova te vačeri pe e mulencar (Pon. zak. 18:10-12). Hari po hari, ov dozvolindža e Devleso Lafi te oblikujini oleso način sar razmislini. Sar dželo o vreme, ov čhinavdža te ovel vrač iako odija hine olesi jedino buti. Odova phral, kova akana isi le 60 berš, phenela: „But hijum zahvalno e Jehovase svedokonedže aso sa so pomožindže maje. On pomožindže maje te arakhav buti. Ama, najviše hijum zahvalno e Jehovase. Ov pomožindža man te menjinav mo dživdipe hem odolese akana šaj te propovedinav averendže sar oleso krstimo Svedoko.“

20. So hijan odlučno te čere?

²⁰ Ko akava članko vačerdžam ando štar vredna buča kola na dičhona. Najbari olendar tani odija so isi amen čast o Jehova te ovel amaro Amal. Sebepi so hijam šukar amala e Jehovaja, amen šaj te vačera oleja ki molitva, osetinaja sar tano ked oleso sveti duh pomožini amen hem isi amen nebesko podrška ki služba. Amen mangaja te da sa amendar pobuter te cenina o buča kola na dičhona. Isto adžahar, mangaja uvek te ova zahvalna e Jehovase sose tano but šukar Amal.