1. Yesuusi iimi jiro daafira mayino?

ILLETE leeltannoti baalanta jiro diˈˈikkitino. Isinni, baalantenni roore muxxe jiro illete leeltannokkite. Yesuusi ilaalaho sabbaki yannara, maalaamittete jiro lowo geeshsha roortannota ayyaanaamittete jiro qummi assino. Hakkiinni isi lede, “Jiroˈne noowa wodaniˈneno hakkiicho heeˈranno” yiino. (Mat. 6:19-21) Mitto coye lowo geeshsha banxeemmoha ikkiro, hakko coye afiˈrate baasa laalaanteemmo. Maganu albaanni danchu suˈmi heeˈrannonke gede sharrammeemmoha ikkiro, iima ‘jiro duuˈninanni’ heeˈnoommo. Yesuusi hattoo jiro mooraanchu moorannokkita woy baˈara dandiitannokkita coyiˈrino.

2. (a) Layinki Qorontoosi 4:17, 18 kultanno garinni Phaawuloosi maa illachinsheemmo gede amaalinonke? (b) Konni birxichira maa ronseemmo?

² Soqqamaasinchu Phaawuloosi, “illetenni . . . leellannokkiha illachinsheemmo” gede amaalinonke. (2 Qorontoosi 4:17, 18 nabbawi.) Illete leellannokkire yiniri giddo mitu, Maganu abbannote haaro alamera afiˈneemmo atooteeti. Konni birxichira, xaanni afiˈra dandiineemmota shoole illete leeltannokki jiro daafira ronseemmo; insano: Maganu ledo noonke jaalooma, huuccattote qoosso, Maganu ayyaani kaaˈlonna sabbankeemmo woyite iiminni afiˈneemmo kaaˈlooti. Qoleno kuri illete leeltannokki jiro naandeemmota leellisha dandiineemmohu hiittoonniitiro ronseemmo.

3. Baalanta roortannoti illetenni leeltannokki jiro hiittenneeti? Tenne jiro afiˈneemmo gede kaaˈlannonkeri maati?

³ Illete leeltannokki jiro giddo baalantenni roortinoti, Maganu Yihowa ledo noonke jaaloomaati. (Far. 25:14) Maganu qullaawa ikke heeˈre, cubbaataammu mannira jaala ikka dandaannohu hiittoonniiti? Yesuusiti wodote kakkalo ‘alamete cubbo haadhe  hooltanno’ daafira, mannu ooso Maganoho jaala ikka dandiitanno. (Yoh. 1:29) Yihowa mannu ooso gatisate eino qaali woˈmikki gatannokkita balaxe afino. Yesuusi reyara albaanni heeˈrino manni nafa Maganu jaala ikka dandiinohu iseraati.—Rom. 3:25.

4. Hundi waro Maganu jaala ikkitinori giddo mitu ayeooti?

⁴ Hanni hundi waro Maganu jaala ikkinoha mito manna qaango. Abirahaami kaajja ammana noosi manchooti. Abirahaami reyihunni 1,000 saˈˈanno diri gedensaanni, Yihowa iso “jaaliˈya” yiinosi. (Isa. 41:8) Hakko daafira reyo nafa, Maganu jaalla isiwiinni baddansara didandiitanno. Maganu albaanni Abirahaami direyino. (Luq. 20:37, 38) Wolu Maganu jaali Iyyoobiiti. Sokkaasine iima gamba yitinowa, Yihowa Iyyoobi ammanannota coyiˈrino. Yihowa Iyyoobi, ‘suwashshohonna bushu coyiwiinni fafe ane ayirrisannoho’ yiino. (Iyo. 1:6-8) Daanieeli 80 meddi yaanno diro Magano magansiˈrannokki manni gobbara heeˈre ammaname soqqaminohura, Yihowara mayi macciishshaminosi? Sokkaasine sase higge Maganu Daanieeli lowo geeshsha ‘baxannosita’ kultinosi. (Dan. 9:23; 10:11, 19) Yihowa muxxe jaallasi reyotenni kayisanno yanna quqquxame agadhannota dihuluullammeemmo!—Iyo. 14:15.

5. Yihowa jaala ikkate maa assa hasiissannonke?

⁵ Xaa yannara guuntete xeˈne noonsaha ikkirono, Yihowa jaalla ikkinohu mageeshshi mannaati? Miliyoonetenni kiirranni manni isi jaalla ikkino. Korkaatuno, alamete doyichora batinyu labballinna meenti hattono qaaqquullu assootinsanni Maganu jaalla ikkinota leellishanni no. Yihowa jaala ikkannohu “suwashshu wodani” noonsa manniraati. (Law. 3:32) Insa isi ledo jaalooma dandiitannohu, Yesuusita wodote kakkalo ammantannoha ikkirooti. Yihowa tenne wodo widoonni heeshshonke isira sayinse uyine cuuammeemmo gede fajjinonke. Hatto assineemmoha ikkiro, heeshshonsa Yihowara sayise oye cuuaminohu lowo miliyoone ikkanno Kiristaani widira kiirammeemmo; insa kalqete alame giddo baalunkunni roorino Maganira jaalla ikkitino.

6. Maganu ledo noonke jaalooma naandeemmota leellisha dandiineemmohu hiittoonniiti?

⁶ Maganu ledo noonke jaalooma naandeemmota leellisha dandiineemmohu hiittoonniiti? Abirahaaminna Iyyoobi Maganoho lowo diro ammanante heedhunte gede, ninkeno tenne goofimarchu yannara Yihowara soqqammoommo diri ikki geeshshihano ikkiro woˈmante yannara isira ammanama hasiissannonke. Daanieeli gede ninkeno Maganu ledo noonke jaalooma heeshshonkenni nafa roorsine laˈˈa hasiissannonke. (Dan. 6:7, 10, 16, 22) Yihowa kaaˈlonni ayi geeshshi qarrano dandiine saˈne isi ledo noonke jaaloomi baikkinni heeˈra dandiineemmo.—2 Qor. 4:7.

7. (a) Lawishsha 15:8 kultanno garinni, huuccattonke daafira Yihowara mayi macciishshamannosi? (b) Yihowa huuccattonkera dawaro qolannohu hiittoonniiti?

⁷ Illete leeltannokkiti wole jiro huuccattote. Baxantanno jaalla mimmitoho giddonsata hasaapha baxxanno. Yihowa ledo noonke jaaloomino hattooti. Yihowa Qaalisi widoonni hasaawisannonke, qoleno Qaalisi hedosinna macciishshamannosire anfeemmo gede kaaˈlannonke. Ninkeno huuccattotenni Yihowa hasaawisanna giddonketa isira kuˈla dandiineemmo. Yihowa huuccattonke macciishsha hagiirsiissannosi. (Lawishsha 15:8 nabbawi.) Yihowa baxannonke Jaala ikkino daafira, huuccattonke macciishshe agurannoha calla ikkikkinni dawaro qolannonke. Mito woyite isi huuccattonkera dawaro rahe qolara dandaanno. Mite hajo daafira kayinni marro marro hinge huucciˈra hasiissannonke woyiti heeˈrara dandaanno. Ikkirono Yihowa gara ikkitino  yannara, ninkera maltino dawaro qolannota dihuluullammeemmo. Mito woyite Yihowa huuccattonkera dawaro ninke hendoommokki doogonni qolara dandaanno. Lawishshaho isi iillinonke qarra hoolikkinni, hakko qarra ‘cincine saˈˈa dandiineemmo gede’ hayyonna jawaante aankera dandaanno.—1 Qor. 10:13.

8. Yihowa uyinonketa huuccattote qoosso naandeemmota leellisha dandiineemmohu hiittoonniiti?

⁸ Ikkina muxxe ikkitinota huuccattote qoosso naandeemmota leellisha dandiineemmohu hiittoonniiti? Hatto assa dandiineemmo doogga giddo mitte, Yihowa “Agurtinikkinni huuccidhe!” yee amaalinonke amaale macciishshate. (1 Tes. 5:17) Yihowa huuccatto assiˈneemmo gede digiddeessannonke. Hatteentenni doodhate qoossonke ayirrisanno; hattono ‘jaante huucciˈneemmo’ gede jawaachishinonke. (Rom. 12:12) Konni daafira barru baala duucha hinge huucciˈneemmoha ikkiro, huuccattote qoossonke naandeemmota leellinsheemmo. Huuccatto assiˈneemmo woyite, Yihowa galatanna guwisa hasiissannonketi egennantinote.—Far. 145:2, 3.

9. Mittu rodii huuccattote daafira mayino? Huuccattote qoosso daafira mayi macciishshannohe?

⁹ Yihowara lowo diro soqqammummoro, isi huuccattonkera dawaro qolino gara laˈneemmo daafira, huuccattote qoossonke albinni roore naandeemmo. Lawishshaho, hanni 47 diro woˈma yanna soqqaminohu Kiriisi yinanni rodii lawishsha laˈno. Isi togo yiino: “Soodo gute kae Yihowa huucciˈra lowo geeshsha baxisannoe. Duuˈmo saaqqanno woyite arrishsho lekka abbitanna laˈnanni Yihowa hasaawisa lowo geeshsha hagiirsiissanno! Tini, huuccattote qoossorano ikko isi uyinoete wole elto baalantera galaxxeemmosi gede assitannoe. Hakkiinni hawarro huuccatto assiˈrummo gedensaanni, tashshi yaannae goxe galeemmo.”

10. Qullaawu ayyaani muxxe jirooti yineemmohu mayiraati?

¹⁰ Illete leeltannokkiti wole muxxe jiro, Maganunniho qullaawa ayyaanaati. Yesuusi, qullaawa ayyaana afiˈrate huucciˈneemmo gede amaalinonke. (Luq. 11:9, 13) Yihowa qullaawu  ayyaanisi widoonni “wolqa” aannonke; wole agurina isi mannu wolqara aleenni ikkitino wolqa aankera dandaanno. (2 Qor. 4:7; Soq. 1:8) Maganu ayyaani kaaˈlonni, iillannonkeha aye geeshshi qarra cincine saˈˈa dandiineemmo.

11. Qullaawu ayyaani kaaˈlannonkehu hiittee doogganniiti?

¹¹ Qullaawu ayyaani Maganoho soqqammeemmo gede kaaˈlannonke. Qoleno Maganu ayyaani dandoonke lexxitanno gede assara dandaanno. Soqqanshonkenni dancha guma afiˈra dandiineemmohu, uminke wolqanni ikkikkinni Maganu ayyaani kaaˈlonni callaati.

12. Faarso 139:23, 24 kultanno garinni, qullaawu ayyaani ma assate kaaˈlannonke gede huucciˈra dandiineemmo?

¹² Qullaawa ayyaana naandeemmota leellisha dandiineemmoti wole doogo, kuni ayyaani wodaninkera noota gara ikkitinokki hedonna yorto afiˈneemmo gede kaaˈlankera huucciˈrate. (Faarso 139:23, 24 nabbawi.) Hatto assinummoro, Yihowa ayyaanisi widoonni wodaninkera noota gara ikkitinokki hedonna yorto afiˈneemmo gede kaaˈlannonke. Qoleno wodaninkera gara ikkitinokki hedonna yorto noota afiˈnummoro, qullaawu ayyaani hattoo hedo fushshine hooˈlineemmo gede kaaˈlankera Magano huucciˈra hasiissannonke. Hatto assanke, Yihowa qullaawu ayyaanisinni kaaˈlannonkekki gede assara dandaannoha aye coyeno gargadhate murciˈnoommota leellishshanno.—Efe. 4:30.

13. Qullaawa ayyaana albinni roore naadate maa assa dandiineemmo?

¹³ Qullaawa ayyaana albinni roore naadate, kuni ayyaani xaa yannara maa assanni nooro hiinca dandiineemmo. Yesuusi iimira haˈrara albaanni rosaanosi togo yiino: “Qullaawu ayyaani kiˈne aana dirranno wote wolqa adhitinanni; hakkiinni . . . uullate qacce geeshsha farciˈraasineˈya ikkitinanni.” (Soq. 1:8) Yesuusi coyiˈrinori yannankera dhagge ikkanno garinni woˈmanni no. Qullaawu ayyaani kaaˈlonni, settenna darate miliyoone meddi yaanno manni uullate doyichonni gamba yee Yihowa magansiˈrannoha ikkino. Qoleno Maganu ayyaani, baxillu, hagiirru, keeru, cinca, shooshanqe, danchumma, ammana, joongillunna meessanaa qeeˈlate akati heeˈrannonke gede  kaaˈlinonke daafira, ayyaanaamittete gannatera hagiidhinanni heeˈnoommo. Kuri akatta ‘ayyaanu laalooti.’ (Gal. 5:22, 23) Qullaawu ayyaani muxxe jirooti!

14. Soqqammeemmo woyite kaaˈlitannonkeri illetenni leeltannokkiri ayeooti?

¹⁴ Yihowa, Yesuusinna sokkaasinete ‘ledo mitteenni loosate’ qoossono illete leeltannokki jirooti. (2 Qor. 6:1) Manna rosaano assate looso loonseemmo yanna baalantera ledonsa loonsanni heeˈnoommo. Phaawuloosi isonootonna konne looso loossannore “Ninke Maganu ledo loonseemmoreeti” yiino. (1 Qor. 3:9) Maganoho soqqammeemmo woyite, Yesuusi ledono loonsanni heeˈnoommo. Yesuusi harunsaanosi ‘gosa baala rosaanoˈya asse’ yee hajajinsahu gedensaanni, “goofimarchi geeshsha ani kiˈne ledo noommo” yiinota qaango. (Mat. 28:19, 20) Sokkaasine kaaˈlitannonkehu hiittoonniiti? ‘Baattote aana noo mannira hegereta danchu duduwi sokka’ dudumbeemmo woyite sokkaasine massaggannonketa afanke hagiirsiissannonke!—Aju. 14:6.

15. Soqqammeemmo woyite Yihowa kaaˈlannonketa leellishshannota Qullaawu Maxaafi xagge kuli.

¹⁵ Iiminni afiˈneemmo irko, maa assineemmo gede kaaˈlitanni noonke? Maganu Mangiste sokka winxeemmo woyite, mitu wixi shaqqadu wodanira uwe lophanno. (Mat. 13:18, 23) Kuni halaalu wixi lophe guma laalanno gede assannohu ayeti? Yesuusi, “Anniˈya daanno gede assikkinni anewa daa dandaannohu dino” yiino. (Yoh. 6:44) Qullaawu Maxaafi giddo tini halaale ikkitinota leellishshanno xagge no. Hanni Phaawuloosi Filiphisiyusi katamira gobbaanni gamba yee noo meentira farciˈri yannara mayi ikkinoro qaango. Qullaawu Maxaafi hakko meenti giddonni Liidiya yinanniti, “Maganu wodanase faneenna Phaawuloosi coyiˈranno coye macciishshitu” yaanno. (Soq. 16:13-15) Yihowa Liidiya gedeeha lowo miliyoone ikkanno manna minisira abbino.

16. Soqqanshonkenni dancha guma afiˈneemmo woyite ayirrinyu hasiisannohu ayeraati?

¹⁶ Soqqanshonkenni dancha guma afiˈneemmo woyite ayirrinyu hasiisannohu ayeraati? Phaawuloosi Qorontoosi songora sokka borreessi woyite tenne xaˈmora dawaro qolino; isi togo yiino: “Ani kaasummo; Aphiloosi waa hayikkisi. Lossinohu kayinni Maganoho. Kunnira, loosoho umo ikkinohu, kaansoonnire lossi Maganooti.” (1 Qor. 3:6, 7) Ninkeno Phaawuloosi gede, soqqanshonkenni dancha guma afiˈneemmo yanna baalantera Yihowa galata hasiissannonke.

17. Yihowa, Yesuusinna sokkaasinete ‘ledo mitteenni loosate’ qoosso naandeemmota leellisha dandiineemmohu hiittoonniiti?

¹⁷ Yihowa, Yesuusinna sokkaasinete ‘ledo mitteenni loosate’ qoosso naandeemmota leellisha dandiineemmohu hiittoonniiti? Mannaho dancha duduwo kulleemmo faro diinaggaambe hasiˈratenniiti. Hatto assa dandiineemmoti duucha doogga no; lawishshaho, “Gudumaalehono mine mine” haˈneno farciˈra dandiineemmo. (Soq. 20:20) Lowo roduuwi sabbakate fultinokki woyiteno farciˈra baxxanno. Insa egentinokki manchinni xaaddanno woyite, faasiiqqe keere haadhe hasaawa hanafate woˈnaaltanno. Hakku manchi hasaawa haaˈriro, hayyotenni Maganu Mangiste sokka kultanno.

18-19. (a) Halaalu wixira waa hayikkisa dandiineemmohu hiittoonniiti? (b) Yihowa mitto Qullaawu Maxaafi rosaancho kaaˈlino gara leellishanno woˈnaalsha kuli.

¹⁸ “Maganu ledo loonseemmore” ikkinoommo daafira, halaalu wixa wixe agura calla ikkikkinni, waa hayikkisa hasiissannonke. Mittu manchira hasatto noosita anfummoro, faana ganne hasaawisa woy wolu rodii isiwa mare Qullaawa Maxaafi xiinxallisanno gede assa hasiissannonke.  Hakku manchi hedosinna laosi biddi assiˈranno gede Yihowa kaaˈlannasi laˈneemmo woyite tashshi yaannonke!

¹⁹ Hanni mittu Wodiidi Afirikira heeˈranno rodii woˈnaalsha laˈno; isi bashsho kiilaanchoho. Gedensoonni, Qullaawa Maxaafa xiinxalle rosinore lowo geeshsha baxino. Ikkollana, reyitinore albi annuwa hasaawisate daafira Maganu Qaali mayyaannoro nabbawiti lamete giddo mitte doodha hasiissinosi. (Mar. 18:10-12) Gedensoonni isi Maganu hedosi biddi assannosi gede maahoyye yiino. Hattono heeshshosira hasiisannore afiˈrannohu kiilunni ikkirono, konne looso agurino. Xa 60 diro ikkinosihu kuni rodii togo yiino: “Yihowa Farciˈraasine babbaxxino garinni kaaˈlitinoe daafira lowo geeshsha galateemmonsa; lawishshaho insa wole looso afiˈreemmo gede kaaˈlitinoe. Baalunkunni roore heeshshoˈya biddi yitanno gede kaaˈlinoehura Yihowa galaxxeemmosi; xa ani cuuame Yihowa Farciˈraasincho ikke soqqamanni noommo.”

20. Maa assate murciˈrootto?

²⁰ Konni birxichira, illetenni leeltannokkite shoole jirore ronsoommo. Baalantenni roortanno jiro Yihowa ledo noonke jaaloomaati. Isi ledo jaaloomanke, wole illete leeltannokki jiro yaano huuccattote qoosso, qullaawu ayyaani kaaˈlonna iiminni irko afiˈneemmo gede kaaˈlitannonke. Konnira illete leeltannokki jiro albinni roore naadate murciˈno. Qoleno baxillaancho Jaala ikkinonkehura Yihowa galaxxa agurroonke!