1. Andi Jesosi bi taki u gudu di dë a Gadu köndë ala?

NA HII gudu i sa si ku wojo. Dee möön gaan gudu an ta dë u si ku wojo. Di Jesosi bi dë a di kuun liba, hën a bi taki u gudu di dë a liba ala di an dë kuma möni nasö woto gudu di dë a goonliba aki. Bakaten hën a taki taa: „Ka gudu fii dë, nöö naandë di hati fii ta dë tu” (Mat. 6:19-21). Te u ta si wan soni kuma gudu, nöö woo mbei hii möiti fuu sa feni ën. U „ta lai gudu a Masa Gadu köndë”, te u ta mbei möiti fuu ku Gadu dë bunu. Di lö gudu aki, Jesosi bi taki taa sëmbë an sa fuufuu ën, nasö de an sa poi ën kaba a sösö tu.

2. (a) Andi Paulosu ta da u taanga fuu buta pakisei nëën, te u luku 2 Kolenti 4:17, 18? (b) Andi woo luku a di woto aki?

² Apösutu Paulosu bi da u taanga fuu buta pakisei fuu a dee soni dee wojo fuu an ta si. (Lesi 2 Kolenti 4:17, 18.) Dee gudu aki da soni di wa ta si ku wojo, ma de nama ku dee bunu dee woo feni a di njunjun goonliba. A di woto aki woo taki u fö soni di wa ta si ku wojo, di sa mbei u feni wini nöunöu kaa. Dee soni aki da di dë di u ku Gadu dë mati, di begi di u sa begi, di heepi di di santa jeje ta heepi u, ku di heepi di Jehovah, Jesosi, ku dee ëngëli ta heepi u fuu du di diniwooko fuu. Woo si tu unfa u sa ta lei taa u ta tei dee soni dee wa sa si ku wojo aki, u bigi.

3. Andi da di möön gaan gudu di u abi di wa ta si ku wojo, nöö unfa a du ko taa u sa feni di gudu dë?

³ Di möön gaan gudu di u sa abi, hën da di dë di u ku Jehovah dë mati (Ps. 25:14). Unfa Gadu sa du dë mati ku zöndu libisëmbë, nöö a dë limbolimbo go dou? Wë a sa du di soni aki u di Jesosi „paka fu dee hogi du fu hii libisëmbë” (Joh. 1:29). Jehovah bi sabi a fesi taa Jesosi bi o hoi hënseei nëën, u te kuma a dëdë paka di lusupaima u puu libisëmbë a zöndu ku dëdë basu. Di soni aki mbei Gadu bi sa dë mati ku sëmbë di bi libi ufö di ten di Keesitu dëdë.​—Lom. 3:25.

4. Konda unfa wanlö womi fu awooten di bi dë mati u Gadu.

⁴ Pakisei wanlö sëmbë fu awooten di bi ko dë mati u Gadu. Abahamu bi dë wan womi di bi lei taa a abi wan taanga biibi. Baka 1000 jaa di Abahamu bi dëdë, hën Jehovah taki jeti taa Abahamu da hën „mati” (Jes. 41:8). Wë di soni aki ta lei u taa aluwasi wan sëmbë dëdë seei, tökuseei Jehovah ta si ën kuma mati fëën jeti. A Jehovah pakisei, nöö Abahamu dë a libi jeti (Luk. 20:37, 38). Jöpu da wan u dee womi di bi dë gaan mati ku Jehovah tu. Di Jehovah bi hoi wan komakandi ku dee ëngëli a liba ala, hën a bi fan a wan fasi di ta lei taa a bi ta futoou Jöpu. Jehovah bi taki taa a dë „wan bumbuu womi di lobi leti libi, di a’ gaan lesipeki da Gadu, nöö an ta waka a hogi pasi” (Jöpu 1:6-8). Unfa Jehovah bi ta si Daniëli, di bi dini ën 80 jaa longi ku hii hën hati a wan köndë ka sëmbë an bi ta dini Jehovah? Dii pasi ëngëli da di womi aki taanga, u di de bi piki ën taa a dë wan womi di „Gadu lobi gaanfa seei” (Dan. 9:23; 10:11, 19). U sa dë seiki taa Jehovah ta wakiti di daka ka a o weki hii dee mati fëën dee dëdë, ko a libi baka.​—Jöpu 14:15.

5. Andi u musu du fuu ku Jehovah sa ko dë gaan mati?

⁵ Un mëni zöndu libisëmbë a di ten aki dë gaan mati u Jehovah? Wë milionmilion sëmbë ko dë mati u Jehovah a di ten aki. Wë u ko sabi di soni aki u di sömëni womi sëmbë, mujëë sëmbë, ku mii di dë a hii së u goonliba ta lei taa de ku Gadu dë gaan mati. Jehovah ta dë „gaan mati ku dee sëmbë dee ta libi leti” (Nöng. 3:32). Dee sëmbë aki sa dë mati u Gadu u di de ta biibi a di lusupaima di Jesosi paka. Di lusupaima mbei u sa ko dë mati u Jehovah, söseei u sa buta u libi nëën maun, nöö u tei dopu. Te u du dee soni aki, nöö u ku milionmilion woto Keesitu sëmbë di tei dopu, ta ko dë gaan mati u di möön hei Sëmbë u hii di mundu!

6. Unfa u sa lei taa u ta tei di dë di u ku Gadu dë mati, u bigi?

⁶ Unfa u sa lei taa u ta tei di dë di u ku Gadu dë mati, u bigi? Wë leti kumafa Abahamu ku Jöpu bi dini Jehovah pasa höndö jaa ku hii de hati, sö nöö u musu ta dini ën ku hii u hati go dou, aluwasi un longi u ta dini ën kaa. Leti kuma Daniëli, u musu tei di dë di u ku Gadu dë mati u bigi, möön di libi fuu seei (Dan. 6:7, 10, 16, 22). Jehovah sa heepi u fuu hoi dou aluwasi un fuka ta miti u, sö taa hii juu u ku ën sa dë mati.​—Fil. 4:13.

7. (a) Unfa Jehovah ta si dee begi fuu te u luku Nöngö 15:8? (b) Unfa Jehovah ta piki dee begi fuu?

⁷ Wan woto gudu di wa ta si ku wojo, hën da di begi di u sa begi. Te tu sëmbë dë mati, nöö de ta konda da deseei unfa de ta pakisei ku unfa de ta fii. Sö a dë tu ku di dë di u ku Jehovah dë mati ö? Wë aai! Jehovah ta fan ku u ku di Wöutu fëën, söseei a ta lei u a di Wöutu fëën unfa a ta pakisei, ku unfa a ta fii. U ta fan ku Jehovah te u ta begi, söseei te u ta piki ën unfa u ta fii ku unfa u ta pakisei fundu a  u hati. Jehovah ta piizii seei te a ta haika dee begi fuu. (Lesi Nöngö 15:8.) U di u ku Jehovah dë mati, mbei na haika nöö a ta haika dee begi fuu, ma a ta piki de tu. So juu a ta piki u wantewante. Ma so juu u musu ta begi u wan soni sömëni pasi. Hii fa a dë sö, tökuseei u sa dë seiki taa a o piki u a di soifi ten, söseei a o piki u a di möön bunu fasi. A dë sö tuu taa so juu di piki di Gadu o da u sa tooka ku di soni di useei bi mëni. A kan taa Jehovah an o puu wan fuka di ta miti u, ma a sa da u di köni ku di kaakiti fuu sa „hoi dou”.​—1 Kol. 10:13.

8. Unfa u sa lei taa u ta tei di begi di u sa begi, u bigi seei?

⁸ Unfa u sa lei taa u ta tei ën u bigi taa u sa ta begi Jehovah? Wan fasi fa u sa ta du ën, hën da te u ta begi Jehovah „hiniwanten” (1 Tes. 5:17). Jehovah an ta duwengi u fuu begi ën. Ma a ta lesipeki di taki di u sa taki da useei, nöö a ta da u taanga fuu ta ’begi ën nöömö’ (Lom. 12:12). Fëën mbei u sa lei taa u ta tei di soni aki u bigi, u di woo ta begi sömëni pasi hiniwan daka. Ma wa musu ta fëëkëtë u gafa Jehovah, ta dëën tangi a dee begi fuu tu.​—Ps. 145:2, 3.

9. Unfa wan baaa ta si di begi di a sa ta begi, nöö unfa iseei ta si begi tu?

⁹ Möön u ta dini Jehovah, söseei möön u ko ta si unfa Jehovah ta piki dee begi fuu, möön u musu ta tei di begi di u sa ta begi ën, u bigi seei. Boo taki u wan baaa de kai Chris, di ta du di hii-ten diniwooko pasa 47 jaa kaa. Di baaa aki bi taki taa: „Mi lobi seei te mi hopo fuuku mamate u mi sa begi Jehovah. Mi ta fii bunu seei u fan ku Jehovah te di sonu ta hopo, nöö hii soni ta dë waitiwaiti! Di soni aki ta mbei mi ta kë da Jehovah tangi u hii dee gudu dee a da mi, möönmöön da di begi di mi sa ta begi ën. Te mi kaba begi a ndeti ufö mi go kandi, nöö mi ta fii bunu seei.”

10. Faandi mbei u musu ta tei ën u bigi taa Gadu ta da u di santa jeje?

¹⁰ Di santa jeje u Gadu da wan woto gudu di Jehovah ta da u. Jesosi bi da u taanga fuu ta begi Jehovah hakisi ën di santa jeje (Luk. 11:9, 13). Jehovah ta wooko ku di santa jeje fëën u da u di kaakiti di bigi pasa libisëmbë fusutan  (2 Kol. 4:7; Tjab. 1:8). Di santa jeje u Gadu sa mbei u hoi dou aluwasi un fuka ta miti u.

11. Na un fasi di santa jeje ta heepi u?

¹¹ Di santa jeje u Gadu sa heepi u fuu du di wooko di Gadu da u fuu du. Di santa jeje u Gadu ta wooko a di köni di u bi abi kaa, sö taa u sa ko möön sa u du wan soni. A ta heepi u fuu sa tja dee faantiwöutu fuu dee u kisi a di ölganisaasi u Jehovah. U sabi taa di santa jeje u Jehovah hën ta mbei u du dee soni dee u sa ta du a di dini di u ta dini Jehovah.

12. Ku andi u sa begi Jehovah faa heepi u ku di santa jeje fëën, te u luku Psalöm 139:23, 24?

¹² Wan woto fasi fa u sa lei taa u ta tei ën u bigi taa Jehovah ta da u di santa jeje, hën da te u ta begi hakisi Jehovah faa da u di santa jeje u heepi u fuu ko sabi ee u abi föutu pakisei, nasö ee u ta kë soni di an bunu. (Lesi Psalöm 139:23, 24.) Ee u ta begi u di soni aki, nöö Jehovah o wooko ku di santa jeje fëën u mbei u ko sabi andi da dee pakisei ku dee fii dee an bunu. Nöö te u ko sabi de kaa, nöö u musu begi Jehovah faa da u di santa jeje fëën faa heepi u fuu finga futu da dee pakisei ku dee fii dë. Di soni dë o heepi u fuu köni be wa du na wan soni di sa mbei Jehovah an ta heepi u ku di santa jeje fëën möön.​—Ef. 4:30.

13. Unfa u sa lei taa u ta tei ën u bigi taa Gadu ta da u di santa jeje fëën?

¹³ U sa ko ta möön tei ën u bigi taa u abi di santa jeje, te u ta pakisei andi ku andi Jehovah du ku di santa jeje fëën a di ten fuu aki. Ufö Jesosi bi go a Gadu köndë ala, hën a piki dee bakama fëën taa: „Di [santa jeje] o ko a unu liba dë, nöö a o da unu kaakiti fuun sa tei dee soni u mi dee un sabi konda da lanti be de jei. A Jelusalen aki woon seti konda di buka, nöö woon ta . . . kondëën be a paaja a hii dee köndëköndë u goonliba tuu ka sëmbë dë” (Tjab. 1:8). U ta si unfa di soni aki ta pasa a di ten fuu aki. Di santa jeje u Jehovah mbei taa söwan aiti milion ku hafu dinima u Jehovah dë a hii së u goonliba. Söseei u ta libi kuma baaa ku sisa u di di santa jeje u Gadu ta  heepi u fuu ko abi bunu fasi. Dee fasi kuma lobi, piizii, kötöhati, pasensi, tjalihati u sëmbë, bunuhati, biibi, saapifasi, ku di duwengi di u ta duwengi useei (Gal. 5:22, 23). Di santa jeje da wan gaan gudu seei di u feni!

14. Ambë ku ambë ta heepi u te u ta du di peleikiwooko?

¹⁴ U abi wan woto gudu di wa ta si ku wojo. Hën da di wooko di u „ta wooko makandi” ku Jehovah, ku Jesosi ku dee ëngëli (2 Kol. 6:1). U ta wooko makandi ku de te u dë a di peleikiwooko. Paulosu bi taki wan soni fu hën ku dee woto sëmbë dee ta du di wooko aki. A bi taki taa: „U ku ën [Gadu] ta wooko makandi” (1 Kol. 3:9). Te u ta du di peleikiwooko, nöö u ta wooko makandi ku Jesosi tu. Di Jesosi bi piki dee bakama fëën u de heepi hii nasiön sëmbë u de ko dë bakama fëën, a bi taki taa: „Mi o dë ku unu” (Mat. 28:19, 20). Unfa a dë ku dee ëngëli? A dë wan gaandi seei taa dee ëngëli ta tii u fuu paaja „di Bunu Buka di dë u teego . . . da dee peipei sëmbë u goonliba”!​—Ako. 14:6.

15. Konda wan woto u Bëibel di ta lei andi da di fanöudu soni di Jehovah ta du te u ta peleiki.

¹⁵ Andi ta pasa u di Jehovah, Jesosi ku dee ëngëli ta heepi u? Wë te u ta paaja di Könuköndë bosikopu, nöö so juu a ta dou sëmbë hati (Mat. 13:18, 23). Ambë ta mbei taa di bosikopu aki ta dou sëmbë hati? Jesosi bi taki taa na wan sëmbë sa ko dë bakama fëën ee na hën „Tata . . . hai ën ko” (Joh. 6:44). Di Bëibel ta lei u unfa di soni aki dë tuutuu. Buta pakisei a di ten di Paulosu bi peleiki da wanlö mujëë sëmbë di bi dë a döösë u di foto Filipi. Di Bëibel ta taki soni u wan u dee mujëë aki. Di në u di mujëë aki da Lidia. A ta taki taa: „[Jehovah] heepi ën faa tei dee soni dee Paulosu taki dë nëën hati” (Tjab. 16:13-15). Leti kumafa Jehovah bi hai Lidia ko nëën, sö nöö a ta hai milionmilion woto sëmbë ko nëën a di ten aki tu.

16. Ambë musu kisi gafa te soni ta waka bunu da u a di peleikiwooko?

¹⁶ Ambë musu kisi gafa te soni waka bunu da u a di peleikiwooko? Wë Paulosu bi taki di soni aki di a bi sikifi di biifi ka a bi taki soni u di kemeente u Kolenti. A bi taki taa: „Mi paandi di goon. Nöö hën a baka u di dë hën Apolo ko munjan di goon. Ma Gadu hën mbei di buka göö a unu hati. Nöö fëën mbei na wan sëmbë hei möön di otowan, na di sëmbë di paandi, na di sëmbë di munjan di goon. Ma Gadu wanwan, biga hën ta mbei soni ta göö nëën” (1 Kol. 3:6, 7). Hii juu u musu ta lei taa Jehovah hën heepi u te soni waka bunu da u a di peleikiwooko, leti kumafa Paulosu bi ta du ën.

17. Unfa u sa lei taa u ta tei ën u bigi taa u „ta wooko makandi” ku Gadu, Keesitu, ku dee ëngëli?

¹⁷ Unfa u sa lei taa u ta tei ën u bigi taa u sa ta wooko makandi ku Gadu, ku Keesitu, söseei ku dee ëngëli? U sa du di soni aki te u ta suku hiniwan okasi fuu sa paaja di bunu buka da wotowan. Sömëni fasi dë fa u sa du di soni aki. U sa ta du di wooko aki „a lanti fesi”, söseei u nango a sëmbë pisi (Tjab. 20:20). Sömëni baaa ku sisa lobi di peleiki di de ta peleiki da hiniwan sëmbë di de miti. Te de miti wan sëmbë, nöö de ta dëën odi a wan suti fasi, nöö de ta pooba u fan ku di sëmbë go dou. Ee di sëmbë piki a wan bunu fasi, nöö de ta konda di Könuköndë bosikopu da di sëmbë a wan lesipeki fasi.

18-19. (a) Boiti di paaja di u musu ta paaja di bunu buka da dee sëmbë, andi u musu ta du tu? (b) Konda wan woto di ta lei unfa Jehovah bi heepi wan sëmbë di bi ta lei soni u Bëibel.

¹⁸ Na paaja nöö u musu ta paaja di bunu buka da dee sëmbë, ma u musu nango a de  baka fuu lei de soni u Bëibel go dou. Te wan sëmbë lei taa a kë sabi möön soni u di tuutuu lei, nöö u kë mbei hii möiti fuu toona go a di sëmbë go lei ën soni, nasö u sa suku wan woto sëmbë di sa go nëën faa go lei ën soni u Bëibel go dou. Te di sëmbë bigi nango a fesi kaa, nöö u ta wai seei u si unfa Jehovah ta heepi di sëmbë faa tooka di fasi fa a bi ta pakisei.

¹⁹ Buta pakisei a di woto u Raphalalani, wan womi di bi ta du bonuma wooko a Zuid-Afiikan. A bi lobi dee soni dee a bi ta lei te de bi ko lei ën soni u Bëibel. Ma a bi taanga dëën seei di a bi ko fusutan andi di Bëibel ta taki u di fan di wan sëmbë ta fan ku dee gaansëmbë dee dëdë (Deto. 18:10-12). Pikipiki a bi da Gadu pasi faa tooka di fasi fa a bi ta pakisei. Te u kaba fëën an bi ta du di bonu wooko di a bi ta du möön, hii fa di wooko dë nöö a bi abi ta du. Raphalalani abi 60 jaa nöunöu, a ta taki taa: „Mi ta da dee Jehovah Kotoigi tangi u di de bi heepi mi a peipei fasi. De bi heepi mi u mi feni wan wooko tu. Ma möön gaanfa, mi ta da Jehovah tangi u di a heepi mi u mi bia libi. Mi ko toon wan Kotoigi fëën, söseei mi sa ta du di peleikiwooko.”

20. Andi i dë kabakaba u du?

²⁰ A di woto aki, u bi taki u fö gudu di wa ta si ku wojo. Di möön gaanwan u de, hën da di dë di u ku Jehovah dë gaan mati. Di soni aki ta mbei taa u sa ta begi ën, u sa feni di santa jeje fëën, söseei u sa wooko makandi ku di pisi u di ölganisaasi u Jehovah di dë a liba ala. U kë lei möön gaanfa taa u ta tei dee gudu dee wa ta si ku wojo aki, u bigi seei. Söseei boo ta da Jehovah tangi hii juu u di a dë wan bunu mati fuu.