1. Yesu waalandile ki palua bunoonsi bwa ku muulu?

TE BUNOONSI bonse buli bwamoneka. Kakiine, kuli ni bunoonsi bukata saana busiizi kumoneka ku menso a muntu. Mu Nsimiko ya ku Lupili, Yesu waalandile nangue bunoonsi bwa kufuma ku muulu ni bwa pa muulu saana kukila bunoonsi bwa kimubili. Kabili, waaongeziizie eevi: “Palia pali bukonto [ao bunoonsi] bobe i paya paali ni mutima obe.” (Mat. 6:19-21) Kine twamona nangue kintu kampanda ni kya mana saana, tuli twakita maka kukipata keekio kintu. Tuli twaibiikila “bunoonsi ku muulu” kupitila kwikitila lulumbi luweeme ni kuya twali ku lubali lwakue Leeza. Yesu waalandile nangue bobo bunoonsi tebukenoonuapo ata limo ao kwibua.

2. (a) Nga vilandile 2 Bakorinto 4:17, 18, Paulo watusoka tupooze maano ku ki? (b) Tuli kulondoluela ki mu leeli lyasi?

² Mutumua Paulo watusoka ‘tupooze maano [etu] ku bintu bisiizi kumoneka.’ (Soma 2 Bakorinto 4:17, 18.) Bintu bisiizi kumoneka bibiikile mukati mpaalo itwakasekelela mu kyalo kipia kyakue Leeza. Mu leeli lyasi, tuli kusambilila bunoonsi buna busiizi kumoneka butuli nabo atasie leenu. Bobo bunoonsi bubiikile mukati bukibuza pamo ni Leeza, bupe bwa lipepo, kukwasiiwa na mupasi utakatifu wakue Leeza, ni kukwasiiwa na Yehova, Yesu ni bamalaika mu miilo yeetu ya kusimikila. Kabili tuli kumona vya kulangilila nangue tuli twamutasia Yehova palua bobo bunoonsi busiizi kumoneka.

3. Ni bunoonsi ki busiizi kumoneka bukilile bukata, kabili ni kiki kili kyakwasia tuviinde kubupata?

³ Bukibuza pamo ni Yehova Leeza i bunoonsi busiizi kumoneka bukilile bukata. (Malum. 25:14) Ni kiki kili kyalengia Leeza  akite bukibuza pamo ni bantu ba mazaambi ni kusiala walisie mutakatiifu mu nzila ipuililikile? Ali waviinda kukita evio paantu kilubula mulandu kyakue Yesu “kili kyafumia bibalo bya bantu”. (Yoan. 1:29) Yehova waali wamanine ntaanzi nangue mipaango yakue ya kuleeta Mupususi wa bantu teikaanda. Keekio i kyalengele Yehova akite bukibuza pamo ni bantu baali baikeele ntaanzi ya kufua kwakue Kristu.​—Bar. 3:25.

4. Zimbula balalume baaikeele ntaanzi ya Bukristu babanga babibuza bakue Leeza.

⁴ Mona balalume kampanda baaikeele ntaanzi Bukristu tebunabeko baalukile babibuza bakue Leeza. Abrahamu waali mwalalume waali ni kiketekelo kikata saana. Lupaapitile miaka ikilile pa 1000 kisia Abrahamu kufua, Yehova waamukuutile nangue “kibuza wane.” (Is. 41:8) Keekio kyalangilila nangue anzia kine babibuza bakue bafua, bukibuza bwabo pamo ni Yehova tebuizi kuputuka. Yehova amumwene Abrahamu kuya wakosele. (Luk. 20:37, 38) Kyakumuenako kinge ni kyakue Yobu. Musita bamalaika lubakolongheene pamo ku muulu, Yehova waalandile nangue amuswapiile Yobu. Yehova waamukuutile Yobu nangue “muntu alungheeme asyele sinta, ali wamutiina Leeza ni kwitiinia ni bibiipile.” (Yob. 1:6-8) Ale Yehova waaiunvuile siani palwakue Danieli, olia waamubombeele Leeza mu kisinka mu miaka makumi munaane (80) eevi, waali mu kyalo kya bantu bapagaani? Bamalaika bamusininkiziizie mara itatu ozo mwalalume waali wakotele nangue waali muntu “akindeeme saana” ku menso akue Leeza. (Dan. 9:23; 10:11, 19) Tuli ni kisinka nangue Yehova ali ni nkulu ikata ya kutuntumuna babibuza bakue baatonene baafuile kale.​—Yob. 14:15.

5. Ni kiki kili kyatukwasia kukita bukibuza bwa peepi pamo ni Yehova?

⁵ Leenu, ni bantu banga basipuililikile bakitile bukibuza bwa peepi pamo ni Yehova? Ma milioni a bantu. Twalanda evio paantu balalume bengi, banakazi ni baana bekeele pa kyalo, bali mukulangilila kupitila lwendo lwabo nangue batonene kuya baali babibuza bakue Leeza. Yehova “ali wakita bukibuza bwa peepi pamo ni bantu balungheeme.” (Tus Maf. 3:32) Kili kyakwasia bakite bobo bukibuza ni keeki: bali ni kiketekelo mu kilubula mulandu kyakue Yesu. Kupitila kilubula mulandu, kunti twaaluka babibuza bakue Yehova, kwipeela kuli weene ni kubatiziiwa. Kine twakita evio, tuli kwiunga na ma milioni a bantu bepeele kabili Bakristu babatiziiziwe, bali mukusekelela “bukibuza bwa peepi” pamo ni Muntu mukulu saana mu myulu ni kyalo!

6. Kunti twalangilila siani nangue tutweme twafiniizie bukibuza bwetu pamo ni Leeza?

⁶ Kunti twalangilila siani nangue tutweme twafiniizie bukibuza bwetu pamo ni Leeza? Abrahamu ni Yobu baatwaliliile kuya baali ba kisinka kuli Leeza mu miaka ikilile pa mia imo (100). Nga evelia beene, ni fwefue tupalile kutwalilila kuya twali ba kisinka anzia kine twamubombeele kale Yehova musita waleepele ao abe mu keenu kyalo kikote. Tupalile kumona bukibuza bwetu pamo ni Leeza kuya bwali bwa mana saana kukila bukose bwetu nga vyaakitile Danieli. (Dan. 6:7, 10, 16, 22) Kupitila kukwasiiwa na Yehova kunti twasipikizia maavia onse atuli kusaakaana nao ni kutwalilila kuya twali ni bukibuza bwa peepi pamo nakue.​—Baf. 4:13.

7. (a) Nga vilandile Tuswalo ni Mafunde 15:8, Yehova ali waunvua siani palua mapepo etu? (b) Yehova ali waasuka siani mapepo etu?

⁷ Bunoonsi bunge busiizi kumoneka ni lipepo. Babibuza ba peepi bali batona kubuilana malanga ni vibali baiunvua. Eba, i vili ni bukibuza bwetu pamo ni Yehova? Een! Yehova ali walanda ni fwefue kupitila Mulandu wakue, kabili kupitila ozo Mulandu ali  watubuila malanga akue ni vyali waaiunvua. Tuli twalanda nakue kupitila lipepo, kabili kunti twamubuila malanga etu a mukati ni vituli twaiunvua mukati keetu. Yehova ali wasaansamukila kutuilizia mapepo etu. (Soma Tuswalo ni Mafunde 15:8.) Yehova, Kibuza wa ntono, teezi kutuilizia sie mapepo etu, inzi kabili ali waasuka. Musita unge ali watwasuka lubilo. Musita unge kabili tupalile kutwalilila kupepa palua buavia butuli nabo. Inzi tuli ni kisinka nangue wakaba kwasuka pa musita upalile kabili mu nzila iweeme saana. Kakiine, Leeza kunti watwasuka mu nzila iibeleele ni elia ituswapiile. Kwa mufuano, paali pa kupuisia buezio bwetu, kunti watupeela mulangue ni maka a kutukwasia “kubusipikizia.”​—1 Bakor. 10:13.

8. Kunti twalangilila siani nangue tuli mukutasia palua bupe bwa lipepo?

⁸ Kunti twalangilila siani nangue tuli twatasia palua bupe bwa mana bwa lipepo? Tuli twakita evio kupitila kukoonka musoko wakue Yehova wa ‘kupepa musita onse.’ (1 Bat. 5:17) Yehova teezi kutupatikizia kupepa. Inzi ali wakindika buntungua bwetu ni kutuloomba “tutwalilile mu lipepo.” (Bar. 12:12, NWT) Kansi kunti twalangilila nangue tuli mukutasia palua lipepo kupitila kupepa lingi kila busiku. Kakiine, musita utuli twapepa, te tupalile kulaba kumutasia ni kumulumbania Yehova.​—Malum. 145:2, 3.

9. Lupua umo ali waiunvua siani palua lipepo, ale weewe uli waunvua siani?

⁹ Vituli kukokola twamubombela Yehova ni kumona vyali waasuka mapepo etu, i vituli kukila kumutasia Yehova. Mona kyakumuenako kyakue lupua Chris. Waakitile miaka 47 wali mu miilo ya nsita yonse. Walanda eevi: “Ndi natona kubuuka ku makia ni kupepa kuli Yehova. Kili buino saana kulanda ni Yehova koba kali mukutula kabili musita kila kintu lukifwaniine! Keekio kili kyankinkizia kumutasia palua bupe bonse, kubiika mukati ni lisyuko lya kupepa. Kupuako, kisia kupepa mu kyungulo, ndi naya kulaala naali ni kampingu kaswetele.”

10. Juu ya ki mupasi utakatiifu wakue Leeza ni wa mana kuli fwefue?

¹⁰ Mupasi utakatiifu wakue Leeza ni bupe bunge busiizi kumoneka butupalile kutwama  twafiniizie. Yesu waatusokele tutwalilile kuloomba mupasi utakatiifu. (Luk. 11:9, 13) Kupitila mupasi wakue, Yehova ali watupeela “maka akata.” (2 Bakor. 4:7; Miil Bat. 1:8) Kupitila kukwasiiwa na mupasi wakue Leeza, kunti twaviinda kusipikizia buavia bonse butuli kupata.

11. Mupasi utakatiifu kunti watukwasia kukita ki?

¹¹ Mupasi utakatiifu kunti watukwasia kufikilizia bifulo byetu mu miilo yakue Leeza. Mupasi wakue Leeza kunti watukwasia kuwaamia bufundi ni buviinde bwetu. Uli watukwasia kufikilizia miilo ya Kikristu. Tumanine nangue, kine tuli mukuviinda kubomba miilo yakue Leeza, te ku maka etu, inzi mupasi wakue Leeza i uli watukwasia.

12. Nga vilandile Malumbo 139:23, 24, kunti twapepa tupeelue mupasi utakatiifu utukwasie kukita ki?

¹² Nzila inge ya kulangilila nangue tumwene mupasi utakatiifu ni wa mana ni kupepa eevi utukwasie kwinika malanga ni lwinso lonse lubiipile luli mu mutima weetu. (Soma Malumbo 139:23, 24.) Kine twapepa evio, kupitila mupasi utakatiifu Yehova ali kutukwasia kwinika malanga ni lwinso lwetu lubiipile. Kabili kine twamana malanga ni lwinso lwetu lubiipile, tupalile kuloomba mupasi utakatiifu eevi utupeele maka a kuluisia azo malanga ni lwinso. Kine twakita evio, tuli kulangilila nangue tupinguile kutiina kukita kintu kyonse kili kulengia Yehova alekele kutukwasia kupitila mupasi wakue utakatiifu.​—Baef. 4:30.

13. Kunti twakila siani kulangilila nangue tuli twatasia palua mupasi utakatiifu?

¹³ Kunti twakila kulangilila kutasia palua mupasi utakatiifu kupitila kutontonkania bintu bili mukukitua na mupasi mu nsiku yeetu. Ntaanzi ya kuya ku muulu, Yesu waabalandile eevi basambi bakue: “Mwakapata maka musita mupasi utakatiifu luwakamiinua pakati keenu, kabili mwakaaluka bakasininkizia bane . . . mpaka mu nkeende ya kyalo ya kule saana.” (Miil Bat. 1:8, NWT) Ezio milandu ili mukufikiliziiwa mu nzila ya kupapia. Kupitila kukwasiiwa na mupasi utakatiifu, bantu milioni munaane ni nusu kufuma mu nkeende ya kyalo kyonse, bali bamupupa Yehova. Kabili tuli mukusekelela paradiso ya kimupasi, paantu mupasi wakue Leeza uli mukutukwasia kukuzia mibeele iweeme, nga  evelia ntono, nsaansa, mutende, kusipikizia, kuwamiiziana, buwaame, kiketekelo, bufuuke, ni kwitiinia. Ezio mibeele iundile “lizabo lya mupasi.” (Bag. 5:22, 23, NWT) Mupasi utakatiifu ni bupe bwa mana saana kakiine!

14. Ni baani bali batukwasia mu nzila isimonekele mu miilo ya kusimikila?

¹⁴ Tuli ni bunoonsi busiizi kumoneka bwa “kubomba pamo” ni Yehova kabili pamo ni seemu ya ku muulu ya kuteania kwakue. (2 Bakor. 6:1) Tuli twabomba nabo musita onse utuli twakwasia miilo ya kukita basambi. Paulo waalandile eevi palwakue muine ni palua baalia bali bakwasia ezio miilo: “Tuli twabomba pamo ni Leeza.” (1 Bakor. 3:9) Kabili tuli twabomba pamo ni Yesu, musita utuli twakwasia miilo ya Kikristu. Languluka nangue musita Yesu lwaapuile kubalaizia basambi bakue ‘bakite basambi kufuma ku bantu ba ntundu yonse,’ waalandile eevi: “Ndi pamo neenu.” (Mat. 28:19, 20) Ale palua bamalaika? Tuli twatasia kakiine paantu bamalaika bali batutungulula musita utuli twababuila ‘bekala kyalo . . . mpunda iweeme ya muyayaya.’!​—Nfy. 14:6.

15. Leeta kyakumuenako kili mu Bibilia kilangiliile nangue Yehova ali wakwasia saana mu miilo ya kusimikila.

¹⁵ Ni kiki kili kyafikiliziiwa musita utuli twakwasiiwa na Yehova, Yesu ni bamalaika? Musita utuli twabyala mbezu ya mpunda ya Bukolo, inge ili yaponena pa bantu bali ni mutima wa kunvua ni kufikiila kukula. (Mat. 13:18, 23) Naani ali walengia ezio mbezu ifikiile kukula ni kuseeka mazabo? Yesu walanda nangue muntu pa kwaluka musambi wakue mpaka “Baba . . . amukule.” (Yoan. 6:44, NWT) Bibilia yatupeela mufuano umanikile buino ulangiliile nangue Baba ali wakula bantu. Languluka musita Paulo lwasimikiile kikundi kya banakazi babanga bali panze pa muzi wa Filipi. Mona vilandile Bibilia palwakue Lidia, umo pakati ka banakazi baasimikiilue na Paulo: “Mulopue [Yehova, NWT] waamulengele kuti apoozeko maano ku twebo twaali twalanda Paulo.” (Miil Bat. 16:13-15) Ma milioni ange a bantu aakulilue na Yehova nga vyakulilue Lidia.

16. Kine twapata mazabo aweeme mu miilo ya kusimikila, naani apalile kupeelua mukinzi?

¹⁶ Kine twapata mazabo aweeme mu miilo ya kusimikila, naani apalile kupeelua mukinzi? Paulo waasukile keekio kiipuzio musita lwaaleembele eezi milandu ku kilonghaano kya Korinto: ‘Neene naalimbile, ni Apolo waitiliile. Inzi Leeza bunke i ali wakuzia. Kansi, olia ali walimba ni olia ali waitilila, bo te kantu. Inzi Leeza bunke i ali wakuzia.’ (1 Bakor. 3:6, 7) Nga vyakitile Paulo, tupalile kumupeela Yehova bulumba juu ya bintu byonse biweeme bituli twapata mu miilo ya kusimikila.

17. Kunti twalangilila siani nangue tuli twatasia palua lisyuko lyetu lya “kubomba pamo” ni Leeza, Kristu ni bamalaika?

¹⁷ Kunti twalangilila siani nangue tuli twatasia palua lisyuko lyetu lya “kubomba pamo” ni Leeza, Kristu ni bamalaika? Kunti twakita evio kupitila kukeba kwa mute fuasi yonse ili yamoneka eevi kubasimikila bantu bange mpunda iweeme. Kuli nzila ingi ya kutukwasia kukita evio, nga evelia kusimikila ‘pa lyalaala ni nghanda kwa nghanda.’ (Miil Bat. 20:20) Kabili bengi bali batona miilo ya kusimikila kusipangilue. Musita ubali basaakaana ni muntu, bali bamupozia bamusaansamukiile ni kutendeka kulanziana nakue. Kine ni weene atonene kubalanzia, bali batendekezia kwa bufundi kumulondoluela mpunda ya Bukolo.

18-19. (a) Tuli twaitilila siani mbezu ya kisinka? (b) Leeta kyakumuenako kilangiliile Yehova vyaamukwasiizie muntu umo waali wasambilila Bibilia.

¹⁸ Paantu tuli ‘twabomba pamo ni Leeza,’ te tupalilesie kupeleela pa kubyala mbezu ya kisinka inzi kabili tupalile kwitilila. Kine muntu  watona, tuli twakita maka etu onse kumubuelelela eevi kulondolola nakue ao kukwata mupaango eevi kumupeela muntu unge atendeke kusambilila nakue Bibilia. Musita lisambililo lulili lyatwalilila, tuli twasekelelela kumona Yehova vyali wakwasia musambi wa Bibilia kupilibula malanga ni vyali waiunvua.

¹⁹ Mona kyakumuenako kyakue Raphalalani, nghanga wa ku Afrique du Sud. Waatonene bintu byaali wasambilila mu lisambililo lya Bibilia. Inzi waasaangile buavia bukata musita lwaamanine bilandile Mulandu Wakue Leeza palua kulanziana ni bantu bafuile. (Mal Miz. 18:10-12) Bukeebuke, waamulekeleele Leeza alulule malanga akue. Kabili mu musita kampanda, waalekeele bu nghanga, anzia kine bunghanga i miilo yaali yamukwasia mu buikazi bwakue. Loonu, Raphalalani ali ni miaka 60, walanda eevi: “Ndi mukubatasia saana Bakasininkizia Bakue Yehova paantu baankwasiizie saana mu nzila ingi, nga evelia kunkwasia kupata miilo. Kintu kikilile makola, ndi mukumutasia Yehova paantu waakinkwasia kwalulula buikazi bwane, eevi loonu ndi nakwasia miilo ya kusimikila nali umo wa Bakasininkizia babatiziiziwe.”

20. Weewe pa lobe, wapingula kukita ki?

²⁰ Mu leeli lyasi, twamona bunoonsi buna busiizi kumoneka. Pakati ka bobo bunoonsi, bukibuza bwa peepi saana pamo ni Yehova i bunoonsi bukilile bukata. Bobo bukibuza, buli bwatukwasia kunoonkelamo mu bunge bunoonsi busiizi kumoneka​—kumupalamina kupitila lipepo, kwimwena vituli twakwasiiwa na mupasi wakue utakatiifu, ni kukwasiiwa mu miilo yeetu ya kusimikila kufumine ku muulu. Kansi, tupingule kukila kulangilila kutasia palua bobo bunoonsi busiizi kumoneka. Kabili, te kunti tulekele ata kaniini kumutasia Yehova paantu weene i Kibuza weetu aweeme saana.