1. Dí gíʼdoo numuu dí rígá mekhuíí, ndiéjunʼ niʼthí Jesús ga̱jma̱a̱ numuu ikhaa rá.

LÁ RÍGÁ dí gíʼdoo numuu rí tsékujmaa rá. Xúʼko̱, ikhaa nindxu̱u̱ dí itháan gíʼdoo numuu. Náa Discurso rí Jesús nixná náa Kúbá, niʼthí dí rígá mekhuíí gíʼdoo itháan numuu ki xó dí rígá náa tsu̱du̱u̱ ku̱ba̱ʼ. Ikhaa niʼthí: “Náa xtaʼdáá rí gíʼdoo numuu, ikhí marigá a̱jkia̱nʼ” (Mat. 6:19-21). A̱jkiu̱lú maxkaxáanʼ mbuʼyáaʼ dí nakumulú rí gíʼdoo numuu o dí nandulú kuʼyáá wéñuʼ. Nuraxi̱i̱ rí ‹gíʼdoo numuu náa mekhuíí› índo̱ nuʼni rí májánʼ náa inuu Dios ga̱jma̱a̱ nu̱ʼni̱ dí ikhaa ma̱ndoo kaʼyulú. Xó má niʼthí Jesús, nda̱wa̱a̱ tsáa gaʼngo̱o̱ gaʼni gámbáa, ni má xúni̱ kuʼwáʼ dí gíʼdoo numuu rígi̱.

2. a) Ndiéjunʼ eʼthúlú muʼni Pablo náa 2 Corintios 4:17, 18 rá. b) Ndiéjunʼ guʼyáá náa artículo rígi̱ rá.

² Apóstol Pablo naʼthúlúʼ rí ‹guyexi má xúʼko̱ rí tsékujmaa› (atraxnuu 2 Corintios 4:17, 18). * Mbá rí ikhaa nindxu̱u̱ dí mundrígulú náa numbaaʼ nuxi̱ʼ rí Dios maxnúlúʼ nda̱wa̱á. Náa artículo rígi̱ mbuʼyáá a̱jkhu̱ rí gíʼdoo numuu dí tsékujmaa dí nandoo naguáʼdáálú mbiʼi xúgi̱: Rí mambaxú gajmiúlú Dios, rí muʼtájkáan, dí nambáyulúʼ xi̱ʼ kaʼwu, ga̱jma̱a̱ xóo embáyuluʼ Jeobá, Jesús gajmíi̱n ángeles náa nuʼtáraʼa. Ma̱ngaa mbuʼyáá xú kaʼnii gándoo muxnáalú núma̱aʼ ga̱jma̱a̱ numuu xúgíʼ rígi̱.

3. a) Ndiéjunʼ nindxu̱u̱ mbá rí gíʼdoo itháan numuu rá. b) Náa numuu rí nandoo nambaxú gajmiúlú Jeobá rá.

³ Mbá rí tsékujmaa dí gíʼdoo itháan numuu nindxu̱u̱ rí nambáxú gajmiúlú Jeobá (Sal. 25:14). Xú káʼnii gándoo mambaxúu  gajmáa nindxu̱lú Dios maski ajndu ikhaa nindxu̱u̱ kaʼwii xá. Numuu rí tsigijñaʼ ndrígóo Jesús “narigu̱u̱ aʼkhá ndrígóo numbaaʼ” (Juan 1:29). Asndu nákha xóo tsékháñuu Jesús, Jeobá ndiʼyoo má dí a̱ʼdióo maguiji jmbu mu xúʼko̱ makáwíin xa̱bu̱ numbaaʼ. Ikhaa rúʼko̱ numuu rí nindoo nimbáxu̱u̱ gajmíi̱n mbaʼin xa̱bu̱ bi̱ nikuwa nákha xóo tsékháñuu Cristo (Rom. 3:25).

4. Arathá ga̱jma̱a̱ numún tikhun bi̱ nimbáxu̱u̱ gajmíi̱n Jeobá nákha xóo tsékháñuu Jesús.

⁴ Guʼyáá ga̱jma̱a̱ numún bi̱ nimbáxu̱u̱n gajmiún Dios bi̱ nikuwa nákha xóo tsékháñuu Jesús. Abrahán nigiʼdoo mbá fe mba̱a̱. Nda̱wa̱á rí nijngoo itháan rí mbá míi tsiguʼ rí nikháñun, Jeobá niʼthí rí nindxu̱u̱ mbáa bi̱ ‹nimbáxu̱u̱ ga̱jma̱a̱› (Is. 41:8). Ni má dí nakhañún xáʼngo̱o̱ gatsínguunʼ náa Jeobá bi̱ nambáxu̱u̱ gajmíi̱n. Asndu mbiʼi xúgi̱, Jeobá gíʼdaa Abrahán náa ku̱ma̱ ndrígóo (Luc. 20:37, 38). Imba̱a̱ dí ikhaa ninindxu̱u̱ Job. Índo̱ xúgínʼ ángeles kúwiin mbá nduʼ mekhuíí, Jeobá niʼthí rígi̱ ga̱jma̱a̱ numuu Job: Nindxu̱u̱ “mbáa xa̱bu̱ jmbii bi̱ nda̱a̱ aʼkhúun, bi̱ ndaʼyamajkhuu Dios ga̱jma̱a̱ tséʼni dí ra̱májánʼ” (Job 1:6-8). Mú ndiéjunʼ niʼthí ga̱jma̱a̱ numuu Daniel bi̱ niʼni ñajuunʼ mbáa 80 tsiguʼ náa xuajen dí nduyamajkhún eʼwíinʼ dioses xá. Índo̱ Daniel niʼni nikhi̱i̱, ángeles nitháán ajtsú nuthu rí nindxu̱u̱ mbáa bi̱ ‹gíʼdoo wéñuʼ numuu› eʼyoo Dios (Dan. 9:23; 10:11, 19). Nduʼyáálú gajkhun rí Jeobá nagiʼthun maʼga̱nú mbiʼi rí makuxi̱ín bi̱ nimbáxu̱u̱ gajmíi̱n (Job 14:15).

5. Ndiéjunʼ gáʼyoo muʼni mu mambaxú májánʼ gajmiúlú Jeobá rá.

⁵ Rí mbiʼi xúgi̱ mbaʼin wéñuʼ xa̱bu̱ aʼkhá nambáxu̱u̱n májánʼ gajmiún Jeobá. Mbaʼin xa̱bekha, gu̱ʼu̱ ga̱jma̱a̱ e̱ji̱n nusngajmá rí nandún mambáxu̱u̱n gajmiún Dios. Náa Biblia naʼthí rí Jeobá “nambáxu̱u̱ gajmíi̱n” xa̱bu̱ bi̱ ni̱ndxu̱ún jmbiin (Prov. 3:32). Nandoo nambáxu̱u̱ gajmiún numuu rí kuaʼdáá fe náa tsigijñaʼ rí nixnáxi Jesús. Ga̱jma̱a̱ numuu rúʼko̱ Jeobá naniñulú rí muxnaxímíjná náa ikhaa ga̱jma̱a̱ majngúlú iyááʼ. Índo̱ nuʼnilú rígi̱, na̱jkua̱ kidxúún náa xúgínʼ xa̱bi̱i̱ bi̱ nixnaximi̱jna̱ ga̱jma̱a̱ nijngún iyááʼ bi̱ ‹nambáxu̱u̱n májánʼ gajmiún› ikhaa.

6. Xú káʼnii gándoo gusngajmá rí nangajulú dí nambaxú gajmiúlú Dios rá.

⁶ Xú káʼnii gándoo gusngajmá rí nuxnáa núma̱aʼ ga̱jma̱a̱ numuu rí nandoo nambaxú gajmiúlú Dios rá. Guʼyaridáá Abrahán ga̱jma̱a̱ Job. Ikhiin niguájun jmbu náa Dios itháan rí 100 tsiguʼ. Xúʼko̱ má gáʼyoo muʼni mangáanʼ, tséʼniuu asndu má nguáthá mbayuuʼ kuwáanʼ ru̱ʼni̱ ñajunʼ Jeobá náa numbaaʼ rígi̱. Ma̱ngaa ndayóoʼ mbuʼyaridáá Daniel gangajulú itháan rí nambáxulúʼ gajmiúlú Jeobá ki xóo vida ndrígúlú (Dan. 6:7, 10, 16, 22). Jeobá má gambáyulú mu maʼngulú muraʼníí asndu xkáʼnii tsáʼkhá ga̱jma̱a̱ xándátigu̱lú rí mambáxulu má xúʼko̱ gajmiúlú (Filip. 4:13).

7. a) Xó má eʼthí náa Proverbios 15:8, xú kaʼnii eʼyoo Jeobá rí nuʼtajkháan rá. b) Xú káʼnii eriʼña̱a̱ dí nuʼtajkháan xá.

⁷ I̱mba̱ rí gíʼdoo numuu rí tsékujmaa nindxu̱u̱ rí muʼtájkáan. Xa̱bu̱ bi̱ nambáxu̱u̱n májánʼ nanigu̱u̱nʼ mutamijná xóo ekumún. Xúʼko̱ má kayuuʼ gajmiúlú Jeobá ma̱ngaa. Náa Ajngá Rawunʼ naʼtulúʼ xóo endxaʼwámi̱na̱ʼ ga̱jma̱a̱ xóo eku̱mu̱u̱. Ikháanʼ nuʼtámíjná gajmiúlú índo̱ nuʼtákáñii. Ma̱ndoo muʼthán dí nundxaʼwamíjná ga̱jma̱a̱ rí gíwanʼ náa a̱jkiu̱lú. Jeobá nanigu̱u̱ʼ maʼdxaun rí nuʼtajkháan (atraxnuu Proverbios 15:8). * Ikhaa  nindxu̱u̱ bi̱ nandoo kaʼyulú numuu dí nariʼña̱a̱ dí nuʼtajkháan. Nguáná nariʼña̱a̱ nacha̱ mú nguáná ndajyúuʼ. Tséʼniuu asndu xkáʼnii má, nduʼyáá gajkhun rí ikhaa mariʼña̱a̱ mbiʼi rí gáʼyóoʼ. Mbáa nguáná nariʼña̱a̱ rí xóo tseguaʼthi̱i̱nʼlú. Mbá xkri̱da, mbáa xarígu̱u̱ tsáʼkhá rí kuaʼdáálu, mú maxnúlúʼ ku̱ma̱ ga̱jma̱a̱ tsiakii mu maʼngulú muraʼníí (1 Cor. 10:13).

8. Xú káʼnii gándoo gangajulú ga̱jma̱a̱ numuu rí nandoo nuʼtajkháan rá.

⁸ Rí muʼtájkáan nindxu̱u̱ rí nimináanʼlú Jeobá, xú kaʼnii gándoo gangajulú rá. Mbá rí ikhaa nindxu̱u̱ rí muʼnimbaníí rí naʼtulúʼ “Gutajkháan má xúʼko̱” (1 Tes. 5:17). Jeobá tsetsudáanʼlú muʼtákáñii. Ikhaa ndaʼyamajkuu dí nuraʼwíí muʼni ga̱jma̱a̱ na̱ndu̱ʼu̱lú rí ‹xúniʼñáanʼ rutajkháan› (Rom. 12:12). Á mu nuʼtákáñii mbaʼa nuthu rí mbá mbiʼi xúʼko̱ gusngajmá rí nangajulú. Índo̱ guʼtháán guʼni mba̱a̱ ga̱jma̱a̱ gúxnáa núma̱aʼ (Sal. 145:2, 3).

9. a) Xú káʼnii eʼyoo rí maʼtájkháan mbáa ndxájulú bi̱ mbiʼyuu Chris rá. b) Xú kaʼnii tayáá ikháán rí nandoo naratájkáan rá.

⁹ Á mu mbayuuʼ má kuwáánʼ ru̱ʼni̱ ñajuunʼ Jeobá ga̱jma̱a̱ nduʼyáá xóo nariʼña̱a̱ rí nuʼtajkháan, rúʼko̱ gáxkaxáan mangajulú kuʼyáá rí muʼtájkáan. Guʼyáá rí niʼthí mbáa ndxájulú bi̱ mbiʼyuu Chris, bi̱ naʼni má 47 tsiguʼ rí xtáa raʼni káxi̱ ñajuunʼ Jeobá. Ikhaa niʼthí: “Naniguʼ magúxu̱nʼ miʼcha̱ ga̱jma̱a̱ matakháñuu mba̱yu̱u̱ʼ Jeobá, ra̱ʼkhá tháán mitsaanʼ maratamíjná ga̱jma̱a̱ ikhaa índo̱ natayáá náa xuaʼjioo iná timbá agiuʼ a̱jkha̱ʼ, índo̱ na̱ni̱ rígi̱ ra̱ʼkhá tháán nandoʼ maxnáá núma̱aʼ Jeobá ga̱jma̱a̱ numuu xúgíʼ rí nimináanʼlú. Nda̱yo̱o̱ rí gíʼdoo wéñuʼ numuu matajkáan. Nda̱wa̱á rí natajkháanʼ índo̱ námbáa mbiʼi, tsímáá eʼni a̱jkiu̱nʼ índo̱ na̱jkhá gígú”.

10. Ndíjkha rí gíʼmaa mbuʼyáá dí gíʼdoo wéñuʼ numuu xi̱ʼ kaʼwu rá.

¹⁰ I̱mba̱ dí gíʼmaa mbuʼyáá rí gíʼdoo wéñuʼ numuu nindxu̱u̱ xi̱ʼ kaʼwu ndrígóo Dios. Jesús niʼthí rí gunda̱ʼa̱a̱ má xúʼko̱ Jeobá xi̱ʼ kaʼwu (Luc. 11:9, 13). Ikhaa najmuu xi̱ʼ kaʼwu mu maxnúlúʼ “tsiakii rí itháan mba̱a̱” (2 Cor. 4:7;  Hech. 1:8). Asndu xkáʼnii tsáʼkhá rí guraʼníí, xi̱ʼ kaʼwu ma̱ndoo mambáyulú mu maʼngulú.

11. Xú káʼnii gándoo gambáyulú xi̱ʼ kaʼwu rá.

¹¹ Xi̱ʼ kaʼwu ma̱ndoo mambáyulú muʼnimbánii ñajunʼ rí nakhánulú náa xuajñuu Dios. Ma̱ndoo maʼni rí majmulú májánʼ dí najmañulúʼ nuʼni. Xúgíʼ rí májánʼ dí nundrígúlú índo̱ nuʼni ñajuunʼ Jeobá raʼkháa ga̱jma̱a̱ numuu tsiakii ndrígúlú ikháanʼ nindxu̱u̱ numuu rí nambáyulúʼ xi̱ʼ kaʼwu.

12. Xó ma naʼthí náa Salmo 139:23, 24, ndiéjunʼ gándoo mundaʼalú índo̱ nuʼtajkháan rá.

¹² I̱mba̱ rí xóo musngajmá rí nduʼyamajkuíí xi̱ʼ kaʼwu nindxu̱u̱ índo̱ nunda̱ʼa̱a̱ Jeobá mambáyulú mbuʼyáá á mu kuwáanʼ rundxaʼwamíjnalú mbá dí raʼkhí o mbá rí nandulú muʼni dí gíwanʼ náa a̱jkiu̱lú (atraxnuu Salmo 139:23, 24). * Índo̱ nariʼña̱a̱ Jeobá dí nuʼtajkháan, ma̱ndoo majmuu xi̱ʼ kaʼwu ndrígóo mu maʼni mbuʼyáá á mu rígá dí ndayóo muʼni. Á mu xúʼko̱, gunda̱ʼa̱a̱ xi̱ʼ kaʼwu mu maxnúlúʼ tsiakii muʼni gáʼdu̱u̱n dí raʼkhí. Xúʼko̱ gusngajmá dí tsíyulú muʼni nimbá dí Jeobá maʼni gaʼduunʼ mambáyulú má xúʼko̱ ga̱jma̱a̱ xi̱ʼ kaʼwu ndrígóo (Efes. 4:30).

13. Xú kaʼnii gándoo gangajulú itháan xi̱ʼ kaʼwu rá.

¹³ Á mu nundxaʼwamíjná ga̱jma̱a̱ numuu dí naʼni xi̱ʼ kaʼwu rí mbiʼi xúgi̱, rúʼko̱ gaʼni rí mangajulú itháan. Nákha xóo tséjkha̱a̱ mekhuíí Jesús niʼthún xa̱bi̱i̱: “Mundrigula tsiakii índo̱ gakhanalá xi̱ʼ kaʼwu, ikhú manindxa̱lá xa̱bi̱i̱ʼ [...] asndu náa wámbari̱go̱o̱ ku̱ba̱ʼ” (Hech. 1:8). Ajngáa rígi̱ nimbánuu. Ga̱jma̱a̱ numuu xi̱ʼ kaʼwu itháan rí mbá ocho millones xa̱bu̱ náa xúgíʼ tsu̱du̱u̱ ku̱ba̱ʼ niraʼwíí muni ñajuunʼ Jeobá. Ma̱ngaa kúwáanʼ náa paraíso rí na̱ʼkha̱ náa Dios numuu rí nambáyulúʼ muguaʼdáá rí na̱ʼkha̱ náa “xi̱ʼ kaʼwu”: Xóo ngajua, gagi, tsímáá, rí maʼngo̱o̱ a̱jkiu̱lúʼ, muʼni rí májánʼ, rí manindxu̱lúʼ xa̱bu̱ májánʼ a̱jkiu̱u̱n, fe, rí xákiʼnáanʼ, rí muñewa̱a̱n rí muʼni (Gál. 5:22, 23). Xi̱ʼ kaʼwu nindxu̱u̱ mbá regalo rí gíʼdoo wéñuʼ numuu.

14. Tsíin embáyuluʼ índo̱ na̱jkua̱ gúʼtaraʼa rá.

¹⁴ Guaʼdáálu imbo̱ʼ rí gíʼdoo numuu dí tsékujmaa: Dí muñajunʼ mbóó gajmiúlú Jeobá ga̱jma̱a̱ Jesús mangiin ángeles (2 Cor. 6:1). Ikhiin numbayúlú índo̱ na̱jkua̱ guʼsngún xa̱bu̱. Pablo niʼthí ga̱jma̱a̱ numuu ikhaa ma̱ngaa ga̱jma̱a̱ numún iʼwíínʼ bi̱ nutaraʼa índo̱ niʼthí rígi̱: “Numuu rí ikháanʼlu numbáyii Dios” (1 Cor. 3:9). Ga̱jma̱a̱ índo̱ na̱jkua̱ gúʼtaraʼa ma̱ngaa nuñajunʼ mbóó gajmiúlú Jesús. Garmáʼáan a̱jkiu̱lú dí nda̱wa̱á dí Jesús niʼthún xa̱bi̱i̱ “guʼgua ga̱jma̱a̱ gusngún xa̱bu̱ bi̱ kúwá náa xúgíʼ xuajin”, Jesús niʼthí: “ikhúúnʼ maxtáá ga̱jma̱á nindxa̱laʼ” (Mat. 28:19, 20). Xú káʼnii eñajunʼ gajmiúlú ángeles rá. Ángeles nuxnulu ikha índo̱ na̱jkua̱ kuʼyúlú ‹ajngáa dí májánʼ náa xa̱bu̱ bi̱ kuwa náa tsu̱du̱u̱ ku̱ba̱ʼ› (Apoc. 14:6).

15. Xú káʼnii xkri̱da nasngájma dí Jeobá naʼni mbá dí gíʼdoo wéñuʼ numuu náa nuʼtáraʼa rá.

¹⁵ Ndiéjunʼ erígá ga̱jma̱a̱ numuu dí numbáyulúʼ wéñuʼ xá. Índo̱ na̱jkua̱ kuʼyúlú ajngáa ga̱jma̱a̱ numuu Reino, tikhu tsígáʼ na̱jkha̱nú náa a̱jkiún xa̱bu̱ bi̱ nanigu̱u̱nʼ mudxawíín ga̱jma̱a̱ naxná xndúu (Mat. 13:18, 23). Tsáa eʼni dí tsígáʼ rígi̱ mamidi ga̱jma̱a̱ maxná xndúu rá. Jesús niʼthí: “Nimbáa xándoo ma̱ʼkha̱ náa ikhúúnʼ á mu raʼkháa Anu̱ʼ bi̱ nikuʼmún gáʼkha̱ kayáa” (Juan 6:44). Náa Biblia nuxkamaa mbá xkri̱da dí nasngájma dí xúʼko̱ nindxu̱u̱. Mbá miʼtsu, Pablo niʼtáruʼun tikhun gu̱ʼu̱ bi̱ kuwa náa rexo̱o̱ xuajen Filipos. Guʼyáá dí naʼthí náa Biblia ga̱jma̱a̱ numuu mbáa dí ikhaa, bi̱ mbiʼyuu Lidia: ‹Jeobá nimbáʼtoo káxi̱ a̱jkiu̱u̱n mu maxnátiʼñami̱na̱ʼ maʼdxaun xúgíʼ dí Pablo xtáa raʼthí› (Hech. 16:13-15). Xó má niʼni ga̱jma̱a̱ Lidia, Jeobá ni̱ʼkha̱ kagui̱i̱n mbaʼin xa̱bu̱ náa xuajñuu.

16. Índo̱ narígá dí májánʼ náa na̱jkua̱ gúʼtaraʼa, tsáa gíʼmaa maʼga̱ gamajkhu inuu rá.

¹⁶ Índo̱ narígá dí májánʼ índo̱ na̱jkua̱ guʼtáraʼa, tsáa gíʼmaa maʼga̱ gamajkhu inuu rá. Pablo nariʼña̱a̱ graxe̱ rígi̱ índo̱ niʼnirámáʼ ajngáa rígi̱ náa congregación ndrígóo Corinto: “Ikhúúnʼ ni̱du, Apolos nixíjyooʼ, mú Dios niʼni mbaja̱a̱; ikha jngó, bi̱ naʼdu na̱nguá má gíʼdoo wéñuʼ numuu ní má bi̱ naxíjyooʼ, bi̱ gíʼdoo itháan numuu nindxu̱u̱ Dios bi̱ naʼni mbaja̱a̱” (1 Cor. 3:6, 7). Mámbá índo̱ narígá dí májánʼ náa na̱jkua̱ guʼtáraʼa gíʼmaa muxnáá gamajkhu Jeobá, xó má niʼni Pablo.   

17. Xú káʼnii gándoo gusngajmá dí nangajulú dí nuñajunʼ mbóó gajmiúlú Dios, Jesús ga̱jma̱a̱ ángeles rá.

¹⁷ Xú káʼnii gándoo gangajulú ga̱jma̱a̱ numuu dí nuñajunʼ mbóó gajmiúlú Dios, Jesús ga̱jma̱a̱ ángeles rá. Dí mbuʼyáaʼ xóo gúʼni mu muʼthúún mbaʼin xa̱bu̱ xó má eʼngo̱o̱ ga̱jma̱a̱ numuu ajngá dí májánʼ. Ma̱ndoo muʼni mixtiʼkhu enii, mbá xkri̱da, índo̱ muʼtáraʼa náa ‹kúwa mbaʼin xa̱bu̱ ga̱jma̱a̱ náa mámbá guʼwá› (Hech. 20:20). Mbaʼin a̱ngiu̱lú nanigu̱u̱nʼ wéñuʼ mutaraʼa asndu náá. Índo̱ nuxkamaa mbáa bi̱ tséniʼnii, nuraxi̱i̱ ga̱jma̱a̱ xnduʼwá ikhú nugi̱ʼdi̱i̱ nutamijná. Á mu xa̱bu̱ naxnátiʼñami̱na̱ʼ maʼdxaun, ikhú ga̱jma̱a̱ tsu̱ma̱ nutaraʼa numuu Reino.

18, 19. a) Xú káʼnii nuxtijyáá tsígáʼ dí gajkhun rá. b) Xú káʼnii nimbáyúu Jeobá mbáa ndxájulú rá.

¹⁸ Numuu dí ‹nuñajunʼ mbóó gajmiúlú Dios›, ra̱ʼkhá i̱ndó ndayóoʼ mu̱ʼda̱ʼ tsígáʼ ma̱ngaa gíʼmaa muxíjyááʼ. Índo̱ nuxkamaa mbáa xa̱bu̱ bi̱ naniguuʼ maʼdxaun, nuʼni xó má eʼngo̱o̱ mu manigu̱u̱nʼ má xúʼko̱ majmañún o ma̱ndoo muʼthán mbáa mu magi̱ʼdu̱u̱ maʼsngóo ga̱jma̱a̱ numuu Biblia. Índo̱ mbáa bi̱ naʼnigajmaa̱ nariʼkuminaʼ mañu mañu mu majngún iyááʼ, nadxulú wéñuʼ índo̱ nduʼyáá  xú káʼnii Jeobá naʼni mariʼkhuu rí nandxaʼwámina̱ʼ ga̱jma̱a̱ dí gíwanʼ náa a̱jkiu̱u̱n.

¹⁹ Guʼyáá ga̱jma̱a̱ numuu mbáa ndxájulú, bi̱ ninindxu̱u̱ xa̱bu̱ xawan náa Sudáfrica. Ninigu̱u̱ʼ xúgíʼ dí xtáa rajmañuu náa Biblia. Mú niʼniuu mingíjyúuʼ índo̱ niguxnuu náa Ajngá rawunʼ Dios náa naʼthí ga̱jma̱a̱ numuu dí raʼkhí maratamíjná gajmiáanʼ bi̱ nikháñun (Deut. 18:10-12). Mañu má xúʼko̱ niniñuuʼ dí Dios mariʼkhu̱u̱ xóo nindxa̱ʼwáminaʼ. Mbayuʼ niʼni dí maniñuuʼ raʼni xawan, maski ajndu rúʼko̱ ninindxu̱u̱ ñajunʼ dí nigiʼdoo mu madaaʼ mbújkha̱a̱. Rí xúgi̱ ndxájulú buʼko̱ gíʼdoo 60 tsiguuʼ, ikhaa naʼthí: “Ra̱ʼkhá tháán naxnín núma̱aʼ bi̱ nutaraʼa numuu Jeobá numuu dí mbaʼa enii xóo nimba̱yúʼ, mbá dí ikhaa nindxu̱u̱ dí maxkamaa mbá ñajunʼ. Mú gíʼmaa maxnáá itháan núma̱aʼ Jeobá numuu dí nimbáyuʼ mani kaʼwii xóo xtáá, rí xúgi̱ ma̱ndoo mataraʼa xóo mbáa bi̱ nijngúun iyááʼ”.   

20. Ndiéjunʼ eyóoʼ muʼni má xúʼko̱ rá.

²⁰ Náa artículo rígi̱ niʼthá ga̱jma̱a̱ numuu a̱jkhu̱ dí gíʼdoo numuu dí tsékujmaa. Dí itháan gíʼdoo numuu nindxu̱u̱ dí Jeobá ma̱ndoo mambaxúu itháan májánʼ gajmiúlú. Ga̱jma̱a̱ numuu rígi̱, ma̱ndoo muguaʼdáá i̱ʼwáʼ dí gíʼdoo numuu dí tsékujmaa: Xóo dí muʼtákáñii, dí nambáyulúʼ xi̱ʼ kaʼwu ndrígóo, dí mumbayulúʼ bi̱ kuwa mekhuíí índo̱ nuʼtáraʼa. Ndayóo mangajulú má xúʼko̱ kuʼyáá xúgíʼ dí gíʼdoo numuu rí tsékujmaa. Ga̱jma̱a̱ nditháan xuniʼñáá ruxnáa núma̱aʼ Jeobá numuu dí nindxu̱u̱ mbáa bi̱ nambáxulúʼ májánʼ gajmiúlú.