1. Saida mak Jesus dehan kona-ba rikusoin iha lalehan?

RIKUSOIN neʼebé folin-boot liu, ita labele haree ho matan. Kuandu Jesus hatoʼo diskursu iha foho, nia koʼalia kona-ba rikusoin iha lalehan neʼebé folin-boot liu fali osan no sasán. Tuirmai nia hatutan: “Fatin neʼebé ó rai ó-nia rikusoin, ó-nia fuan mós sei hela iha neʼebá.” (Mt 6:19-21) Bainhira ita hafolin buat ruma, neʼe sei book ita-nia laran atu buka-hetan ida-neʼe. “Rikusoin iha lalehan” neʼebé Jesus temi mak hetan naran diʼak ho Maromak. Jesus esplika katak rikusoin sira-neʼe sei nunka sai aat no lakon.

2. (a) Tuir 2 Korinto 4:17, 18, Paulo anima ita atu tau fokus ba saida? (b) Iha lisaun neʼe, ita sei koʼalia kona-ba saida?

² Apóstolu Paulo anima ita atu “hateke ba . . . buat neʼebé matan labele haree”. (Lee 2 Korinto 4:17, 18.) Rikusoin sira neʼebé ita labele haree inklui bensaun sira neʼebé ita sei simu iha mundu foun. Iha lisaun neʼe, ita sei koʼalia kona-ba rikusoin haat neʼebé lori benefísiu mai ita agora. Rikusoin sira-neʼe mak sai belun ho Maromak, orasaun, ajuda husi espíritu santu no apoiu neʼebé ita simu husi Maromak Jeová, Jesus no anju sira atu halaʼo ita-nia serbisu haklaken. Ita mós sei aprende oinsá atu hatudu agradese ba rikusoin sira neʼebé ita labele haree.

3. Saida mak rikusoin folin-boot liu neʼebé ita labele haree, no oinsá ita bele simu ida-neʼe?

³ Rikusoin folin-boot liu neʼebé ita labele haree mak sai belun ho Maromak Jeová. (Sal 25:14) Oinsá mak Maromak neʼebé santu bele sai belun ho ema neʼebé la perfeitu? Nia bele halo ida-neʼe tanba Jesus nia sakrifísiu neʼebé “hamoos mundu nia sala”. (João 1:29) Jeová hatene  nanis katak Jesus sei laran-metin toʼo mate hodi salva ema. Tan neʼe, Maromak bele sai belun ho ema sira neʼebé moris iha tempu uluk antes Jesus mate.—Rom 3:25.

4. Temi toʼok ezemplu balu husi mane balu neʼebé moris antes Jesus no sai Maromak nia belun.

⁴ Hanoin toʼok kona-ba mane balu neʼebé moris antes Jesus no sai Maromak nia belun. Abraão iha fiar neʼebé metin. Tinan 1.000 liu depois Abraão mate, Jeová bolu Abraão nuʼudar ‘ninia belun’. (Isa 41:8) Neʼe katak, maski ema ida mate, Jeová nafatin haree ema neʼe nuʼudar ninia belun. Jeová nunka haluha Abraão. (Lc 20:37, 38) Ezemplu ida tan mak Job. Kuandu anju sira halibur hamutuk iha lalehan, Jeová fó sai katak nia tau fiar ba Job. Jeová bolu Job nuʼudar “ema neʼebé laran-loos no laran-metin, hamtaʼuk Maromak no hadook an husi buat neʼebé aat”. (Job 1:6-8) Ezemplu seluk mak Daniel. Nia serbí Maromak ho laran-metin durante tinan 80 iha rai neʼebé ninia povu la adora Maromak Jeová. Jeová sente oinsá kona-ba Daniel? Dala tolu, anju sira fó-hatene ba Daniel neʼebé idade ona katak nia folin-boot tebes ba Maromak. (Dan 9:23; 10:11, 19) Ita bele fiar katak Jeová hein namanas atu fó moris-hiʼas ba ninia belun sira.—Job 14:15.

5. Ita presiza halo saida atu sai Jeová nia belun?

⁵ Ohin loron, ema millaun ba millaun sai Jeová nia belun maski la perfeitu. Iha mundu tomak, iha mane, feto no labarik barak neʼebé hatudu liuhusi sira-nia hahalok katak sira hakarak sai Maromak nia belun. Jeová “sai belun . . . ho ema laran-loos”. (Prov 3:32) Sira bele sai belun ho Jeová tanba tau fiar ba Jesus nia sakrifísiu. Liuhusi Jesus nia sakrifísiu mak ita bele dedika an ba nia no hetan batizmu. Hodi halo tuir hakat importante sira-neʼe, ita bele sai parte ba ema Kristaun millaun ba millaun neʼebé dedika an no hetan batizmu. Ita hotu sente kontente tanba bele sai belun ho Ukun-Naʼin Boot Liu Hotu iha universu.

6. Oinsá mak ita bele hatudu katak ita hafolin Jeová nuʼudar ita-nia belun?

⁶ Oinsá mak ita bele hatudu katak ita hafolin Jeová nuʼudar ita-nia belun? Abraão no Job nafatin laran-metin ba Maromak durante tinan 100 liu, nuneʼe mós ita tenke nafatin laran-metin ba Maromak maski foin hetan batizmu ka serbí Jeová kleur ona. Hanesan ho Daniel, ita tenke hafolin ita-nia relasaun belun ho Maromak Jeová nuʼudar buat neʼebé importante liu fali ita-nia moris. (Dan 6:7, 10, 16, 22) Ho Jeová nia ajuda, ita bele tahan hasoru susar oioin no kontinua sai Jeová nia belun.—Flp 4:13.

7. (a) Tuir Provérbios 15:8, Jeová sente oinsá kona-ba ita-nia orasaun? (b) Oinsá mak Jeová hatán ita-nia orasaun?

⁷ Rikusoin ida tan neʼebé ita labele haree mak orasaun. Belun sira gosta atu fó sai sira-nia hanoin no mós sentimentu ba malu. Ita no Jeová mós hanesan neʼe ka lae? Sin. Jeová fó sai ninia hanoin no sentimentu mai ita liuhusi ninia Liafuan. Ita bele koʼalia no fó sai ita-nia hanoin no mós sentimentu ba nia liuhusi orasaun. Jeová kontente atu rona ba ita-nia orasaun. (Lee Provérbios 15:8.) Jeová mak ita-nia Belun neʼebé hadomi ita. Nia rona no mós hatán ita-nia orasaun. Dala ruma nia hatán kedas, maibé dala  ruma ita presiza kontinua husu. Maski nuneʼe, ita bele fiar katak nia sei hatán ita-nia orasaun iha tempu neʼebé loos no iha dalan neʼebé diʼak liu. Dala ruma, Maromak hatán ita-nia orasaun iha dalan neʼebé la hanesan ho ita-nia hanoin rasik. Porezemplu, duké halakon ita-nia terus, karik nia sei fó ita matenek no forsa atu tahan ida-neʼe.—1 Kor 10:13.

8. Oinsá mak ita hatudu katak ita hafolin orasaun?

⁸ Oinsá mak ita bele hatudu katak ita hafolin orasaun? Dalan ida mak hodi halo tuir Bíblia nia matadalan kona-ba “halo orasaun beibeik”. (1 Tes 5:17) Jeová la obriga ita atu halo orasaun ba nia. Nia respeitu ita-nia liberdade atu hili no anima ita atu kontinua halo orasaun. (Rom 12:12) Entaun, ita bele hatudu katak ita hafolin orasaun hodi halo orasaun beibeik iha loron ida-idak. Klaru katak ita labele haluha atu hatoʼo agradese no hahiʼi ba Jeová liuhusi orasaun.—Sal 145:2, 3.

9. Irmaun ida sente oinsá kona-ba orasaun, no Ita rasik sente oinsá kona-ba orasaun?

⁹ Kuandu ita serbí Jeová ba tempu kleur no haree oinsá nia hatán ba ita-nia orasaun, ita sei hafolin liután orasaun. Hanoin toʼok kona-ba irmaun Chris neʼebé serbí tempu-tomak durante tinan 47. Nia hatete: “Haʼu gosta hadeer sedu hodi halo orasaun naruk ba Jeová. Haʼu sente kontente tebes atu halo orasaun ba Jeová iha dadeer bainhira loro-matan saʼe no buat hotu hakmatek. Neʼe book haʼu atu fó obrigadu ba Jeová ba buat hotu neʼebé nia fó mai haʼu, inklui orasaun. Depois halo tiha orasaun iha kalan, haʼu bele toba ho hakmatek.”

10. Tanbasá ita presiza hafolin espíritu santu?

¹⁰ Rikusoin ida tan neʼebé ita labele haree mak Maromak nia espíritu santu. Jesus anima ita atu kontinua halo orasaun hodi husu espíritu santu. (Lc 11:9, 13) Liuhusi espíritu santu, Jeová fó ita “kbiit neʼebé la hanesan baibain”. (2 Kor 4:7;  Após 1:8) Ho ajuda husi espíritu santu, ita bele tahan hasoru susar oioin.

11. Oinsá mak espíritu santu bele ajuda ita?

¹¹ Espíritu santu bele ajuda ita atu aumenta ita-nia talentu no abilidade atu nuneʼe ita bele halaʼo didiʼak ita-nia knaar sira iha Maromak nia organizasaun. Tuir loloos, liuhusi Maromak nia espíritu santu deʼit mak ita bele hetan rezultadu diʼak iha ita-nia serbisu ba Maromak.

12. Tuir Salmo 139:23, 24, ita bele halo orasaun atu husu saida?

¹² Dalan seluk atu hatudu katak ita hafolin Maromak nia espíritu santu mak hodi husu Jeová atu ajuda ita buka-hatene hanoin no hakarak neʼebé sala iha ita-nia laran. (Lee Salmo 139:23, 24.) Se ita halo nuneʼe, Jeová sei uza ninia espíritu santu atu ajuda ita hatene ita-nia hakarak no hanoin neʼebé sala. Bainhira ita hatene ona ita-nia fraku sira, ita presiza halo orasaun hodi husu Maromak nia espíritu santu atu fó ita forsa hodi hadiʼa hanoin no hakarak neʼebé sala. Ho ida-neʼe, ita hatudu katak ita hakarak duni atu hasees an husi buat naran deʼit neʼebé bele halo Jeová la ajuda tan ita ho ninia espíritu santu.—Éf 4:30.

13. Oinsá mak ita bele hafolin liután espíritu santu?

¹³ Ita bele hafolin liután espíritu santu hodi hanoin kona-ba buat neʼebé espíritu santu kumpre daudaun ohin loron. Antes Jesus saʼe ba lalehan, nia hatete ba ninia dixípulu sira: “Kuandu espíritu santu tun ba imi, imi sei simu kbiit, no imi sei sai haʼu-nia testemuña . . . toʼo rai sira neʼebé dook liu iha mundu.” (Após 1:8) Liafuan sira-neʼe sai loos duni ohin loron. Ho espíritu santu nia ajuda, maizumenus ema naʼin-millaun ualu ho balu husi mundu tomak sai Jeová nia atan. Maromak nia povu iha unidade tanba espíritu santu ajuda sira atu haburas hahalok sira hanesan domin, ksolok, dame, pasiénsia, laran-diʼak, hahalok diʼak, fiar, laran-maus no kontrola an. (Gal 5:22, 23) Espíritu santu mak rikusoin neʼebé folin-boot.

14. Sé-sé deʼit mak apoia ita-nia serbisu haklaken maski ita la haree?

¹⁴ Rikusoin seluk neʼebé ita labele haree mak serbisu hamutuk ho Jeová, Jesus no anju sira. (2 Kor 6:1) Ita serbisu hamutuk ho sira bainhira ita haklaken. Paulo koʼalia kona-ba ninia an no mós sira hotu neʼebé hola parte iha serbisu neʼe, hodi dehan: “Ita mak Maromak nia maluk serbisu-naʼin.” (1 Kor 3:9) Kuandu ita hola parte iha serbisu haklaken, ita mós sai nuʼudar Jesus nia maluk serbisu-naʼin. Bainhira Jesus haruka ninia dixípulu sira atu ‘hanorin ema husi nasaun hotu atu sai ninia dixípulu’, Jesus hatete: “Haʼu sei hamutuk nafatin ho imi.” (Mt 28:19, 20) Oinsá ho anju sira? Ita sente agradese tebes tanba anju sira dirije ita atu haklaken “liafuan diʼak . . . ba ema neʼebé hela iha rai”.—Apok 14:6.

15. Temi toʼok ezemplu ida husi Bíblia neʼebé hatudu katak Jeová ajuda serbisu haklaken.

¹⁵ Hodi hetan apoiu husi Jeová, Jesus no anju sira, neʼe ajuda ita atu kumpre saida? Bainhira ita kari fini lia-loos nian, fini balu sei monu iha rai neʼebé diʼak katak ema neʼebé iha laran diʼak. No fini sira-neʼe komesa moris. (Mt 13:18, 23) Sé mak halo fini lia-loos nian moris no fó rezultadu? Jesus esplika katak ema ida labele sai ninia dixípulu se “aman . . . la dada nia”. (João 6:44) Bíblia fó sai ezemplu ida kona-ba neʼe. Loron ida, apóstolu Paulo haklaken ba feto sira iha sidade Filipe nia liʼur. Bíblia esplika kona-ba feto sira-neʼe ida neʼebé naran Lídia hodi hatete: “Jeová loke nia laran atu simu Paulo nia liafuan.” (Após 16:13-15) Hanesan ho Lídia, Jeová mós dada ema millaun ba millaun atu hakbesik ba nia.

16. Sé mak merese atu simu glória kuandu ita hetan susesu iha serbisu haklaken?

¹⁶ Sé mak merese atu simu glória kuandu ita hetan susesu iha serbisu haklaken? Paulo hatán ba pergunta neʼe bainhira nia hakerek karta ba kongregasaun iha Korinto, hodi dehan: “Haʼu kuda, Apolo rega, maibé Maromak mak kontinua halo moris. Entaun laʼós ema neʼebé kuda ka ema neʼebé rega mak simu hahiʼi, maibé Maromak neʼebé halo moris.” (1 Kor 3:6, 7) Hanesan ho Paulo, ita mós presiza fó glória ba Jeová kuandu ita hetan susesu iha serbisu haklaken.

17. Oinsá mak ita bele hatudu katak ita hafolin serbisu hamutuk ho Maromak, Kristu no anju sira?

¹⁷ Oinsá mak ita bele hatudu katak ita hafolin serbisu hamutuk ho Maromak, Kristu no anju sira? Ita halo nuneʼe kuandu ita hatudu laran-manas atu buka oportunidade hodi haklaken ba ema seluk. Ita bele halo nuneʼe iha dalan oioin, hanesan haklaken iha fatin públiku no husi uma ba uma. (Após 20:20) Ema barak mós gosta atu haklaken iha dalan neʼebé la formál. Bainhira hasoru ema oin-foun, sira hasé ema neʼe ho oin-midar no koko atu dada lia ho nia. Se ema neʼe kontente atu koʼalia liután, sira sei fahe liafuan diʼak kona-ba Maromak nia Ukun.

18-19. (a) Oinsá ita rega fini lia-loos nian? (b) Temi toʼok esperiénsia ida neʼebé hatudu oinsá Jeová ajuda estudante Bíblia ida.

¹⁸ Nuʼudar “Maromak nia maluk serbisu-naʼin”, ita presiza kuda fini lia-loos nian no mós rega ida-neʼe. Bainhira ema ida hatudu interese ba lia-loos, ita hakaʼas an  atu vizita fali ema neʼe ka arranja ema seluk atu vizita fali nia ho objetivu atu komesa estuda Bíblia. Ita sente kontente bainhira haree Jeová ajuda estudante Bíblia sira atu troka sira-nia hanoin no sentimentu.

¹⁹ Hanoin toʼok ezemplu ida husi mane matan-dook naran Raphalalani iha rai-Áfrika Súl. Nia gosta buat neʼebé nia aprende husi Bíblia. Maibé nia sente susar atu simu Bíblia nia hanorin kona-ba komunika ho matebian sira. (Deut 18:10-12) Neineik-neineik, Maromak nia Liafuan troka ninia hanoin. Ikusmai nia la sai tan matan-dook, maski neʼe mak ninia serbisu atu sustenta ninia moris. Raphalalani neʼebé agora idade 60 hatete: “Haʼu agradese tebes tanba Testemuña ba Jeová ajuda haʼu iha dalan oioin, hanesan atu hetan serbisu. Maibé haʼu hatoʼo agradese liuliu ba Jeová, tanba nia ajuda ona haʼu atu troka haʼu-nia moris. Tan neʼe, agora haʼu bele haklaken nuʼudar ninia Testemuña ida neʼebé hetan ona batizmu.”

20. Ita rasik hakarak hakaʼas an atu halo saida?

²⁰ Iha lisaun neʼe, ita koʼalia ona kona-ba rikusoin haat neʼebé ita labele haree. Rikusoin neʼebé folin-boot liu hotu mak sai belun ho Maromak Jeová. Bainhira ita sai belun ho Jeová, ita bele hakbesik ba nia liuhusi orasaun, simu ajuda husi ninia espíritu santu no simu apoia husi Jeová, Jesus no anju sira atu halaʼo serbisu haklaken. Mai ita hakaʼas an atu hafolin liután rikusoin sira neʼebé ita labele haree. No ita mós hakarak kontinua atu fó agradese ba Jeová tanba sai ita-nia Belun neʼebé diʼak.