1. Yesu a te yini hi lifuwu la matilweni?

SWILO swa lisima ahi leswi voniwaka ntsena. Kuvula ntiyiso swilo swa lisima hintamu ni kuvoneka aswi voneki. Ka djondzo ya yena ya le nhaveni, Yesu a vulavule hi lifuwu la le tilweni lelinga la lisima kutlula male kumbe kuganya. A game a ku: ‘Laha lifuwu la wena linga kona i laha mbilu ya wena na yona yingata va kona’. (Mat. 6:19-21) Loko minchumu yili ya lisima ka hina, hita lwela kuyi kuma. Hi mhaka leyo hi hlengeleta “lifuwu tilweni”. Hi kulwela kuva ni wunghanu ni Xikwembu Yesu a vule swaku lifuwu lelo alinge wonheki hambi kuyiviwa.

2. a) Hikuya hi 2 Vakorinto 4:17, 18, i mpsini leswi mupostolo Pawulo ahi kombelaka swaku hiswi yendla? b) Hita bula hi yini ka nhlokomhaka leyi?

² Mupostolo Pawulo ahi kombela swaku ‘hi kongomisa mahlo ya hina . . . ka leswinga voniwiki’. (Lerha 2 Vakorinto 4:17, 18.) Ka swilo swoleswo swa kukala swinga voneki kupatsiwa ni minkateko leyi hingatava na yona ka misava leyimpsha. Ka nhlokomhaka leyi hita bula hi 4 wa minchumu ya lisima ya kukala yinga voneki, leyihi pfunaka swoswi kunga wunghanu ni xikwembu, kukhongela, moya wa kukwetsima ni kupfuniwwa hi Yehovha, Yesu ni tintsumi loko hi chumayela mahungu ya kutsakisa. Hita tlhela hi bula hi swaku hingayi tlangelisa kuyini minchumu leyo ya lisima.

3. I yini nchumu xa kukala xinga voneki lexinga xa lisima hintamu kutlula hinkwaswu naswona swi kotekisa kuyini kuva na xona?

³ Nchumu xa kukala xinga voneki lexinga xa lisima hintamu kutlula hikwaswu i kuva munghanu wa Yehovha. (Pis. 25:14) Swinga kotekisa kuyini kuva Xikwembu xi va munghanu wa vanhu  lavanga vadjohi kuve xona xa kwetsima? Swa koteka hi mhaka ya leswi Yesu angahi fela akuva ‘kususiwa swidjoho’ swa hina. (Yoh. 1:29) Hambi nkama lowu Yesu aangase fa, Yehovha aaswi tiva leswaku a ata tshembeka anze a fa akuva kuponisiwa vanhu hinkwavu amisaveni. Hi mhaka leyo swi kotekile kuva Yehovha ava ni vanghanu lani misaveni na Yesu angasehi fela. — Rhom. 3:25.

4. Nyikela swikombiso swa vanhu va khale lavanga vanghanu va Xikwembu.

⁴ Pimisa hi vanhu va khale lava vanga va vanghanu va Xikwembu. Abrahamu a ani lipfumelo la kuyiya. Nhambe kuhundze 1.000 wa malembe na Abrahamu a file, Yehovha a tame a ku “munghanu wa mina.” (Esa. 41:8) Leswo swi kombisa swaku nhambe loko vanhu va fa, Yehovha a tama ava vona va li vanghanu va yena. Ka Yehovha swi fana ni loko Abrahamu waha hanya ni namuntlha. (Luk. 20:37, 38) Xikombiso xin’wanyana i Yobo. Yehovha a vulavule kahle hi Yobo phambeni ka tintsumi ta tinyingi amatilweni. Yehovha a vule swaku Yobo i “munhu wa kululama a tlhela a tshembeka, lweyi a chavaka Xikwembu naswona a fambelaka kule ni leswobiha.” (Yobo 1:6-8) Yehovha a titwise kuyini hi Daniyele, lweyi angamu tirhela 80 wa malembe hi kutshembeka atikweni la vahedeni? Tintsumi tiyile kanharhu ka Daniyele tiyamu byela swaku “i munhu wa lisima swinene” ka Xikwembu hambileswi a agugile. (Dan. 9:23; 10:11, 19) Ha tiyiseka swaku Yehovha aswi lava hi mbilu hinkwayu kupfuxa vanghanu va yena lavanga fa. — Yobo 14:15.

5. Kulaveka yini swaku hi va vanghanu va Yehovha?

⁵ I vanhu vangani va kukala kuhetiseka lavanga vanghanu va Yehovha namuntlha? I ma milhões wa vona. Hiswi tivisa kuyini? Hi mhaka kuni vanhu vavanyingi, vavanuna, vavasati ni vana amisaveni hinkwayu lavanga ni mahanyelo ma kombaka swaku i vanghanu va Xikwembu. Yehovha “ani wunghanu lelikulu ni wa kululama.” (Swi. 3:32) Swi za swi koteka kuva munghanu wa Yehovha hi mhaka ya kukombisa lipfumelo ka lifu la Yesu. Hi mhaka leswo Yehovha wahi pfumelela leswaku hi tinyiketela ka yena hi tlhela hi tsakamisiwa. Loko hi tinyiketela hi tlhela hi tsakamisiwa hitava ni Vakreste van’wanyani lavanga ni “wunghanu lelikulu” ni munhu wa lisima kutlula hinkwavu lavanga kona.

6. Hingaxi tlangelisa kuyini Xikwembu hi leswi hinga vanghanu va xona?

⁶ Hingaswi kombisa kuyini swaku i swa lisima kuva vanghanu va Yehovha? Hi fanele hi tshembeka kufana na Abrahamu na Yobo lavanga tirhela Yehovha hi kutshembeka kuringana malembe yamanyingi nhambi se hi ni malembe yamanyigi na hi tirhela Yehovha ka misava leyi. Kufana na Daniyele hi fanele hi teka wunghanu leli hinga na lona na Yehovha lili la lisima kutlula wutomi la hina. (Dan. 6:7, 10, 16, 22) Hi kupfuniwa hi Yehovha, hingaswi kota kutiyisela mindzingo leyi hi kumanaka na yona hi tlhela hi tama hi va vanghanu va yena. — Filp. 4:13.

7. a) Hikuya hi Swivuriso 15:8, Yehovha a titwisa kuyini hi swikhongelo swa hina? b) Yehovha aswi hlamulisa kuyini swikhongelo swa hina?

⁷ Nchumu xin’wanyana xa lisima xa kukala xinga voneki i xikhongelo. Lavanga vanghanu hintamu vaswi rhandza kubula xikan’we. Swa fana ni loko hi li vanghanu va Yehovha. Yehovha a bula na hina hi kutirhisa Bibele, ahi byela leswi a titwisaka xiswona ni leswi aswi pimisaku. Na hina hi bula na yena hi xikhongelo. Himu byela leswi hi titwisaka xiswona ni leswi hiswi pimisaku. Yehovha waswi rhandza kuyingisela swikhongelo swa hina. (Lerha Swivuriso 15:8.) Leswi  Yehovha anga munghanu wa hina a yingisela swikhongelo swa hina a tlhela aswi hlamula. Minkama yin’wanyani a hantla aswi hlamula kasi minkama yin’wananyani swingaha lava hi tama hi phikelela hi khongela. Kambe leswi hiswi tivaka hi swaku hita kuma nhlamulu leyinene hi nkama wa kona. I ntiyiso swaku nhlamulu ya Xikwembu yingaha hambana ni leswi ahiswi nyimela. Hi xikombiso, swinga yendleka Yehovha angahi suseli mindzingo kambe ahi nyika wutlharhi ni “matimba ya kutiyisela”. — 1 Kor. 10:13.

8. Hingaswi kombisa kuyini swaku xikhongelo i xa lisima ka hina?

⁸ Hinga yendla yini akuva hi tlangela nyiko leyi ya lisima ya xikhongelo? Hinga yendla leswo hi kuva hi yingisa leswi Bibele lihi byelaka swona swaku ‘hi khongela minkama hinkwayu.’ (1 Tes. 5:17, NM) Yehovha angahi sindzisi kukhongela kambe a lava hiswi yendla hi kuswi rhandza. Naswona ahi kombela swaku ‘hi hiteka akukhongeleni.’ (Rhom. 12:12) Hinga kombisa kutlangela nyiko ya xikhongelo hi kukhongela nkama ni nkama masiku hinkwawu. Kambe ahi fanelanga hi khohlwa kukhensa ni kudzunisa Yehovha ka swikhongelo swa hina. — Pis. 145:2, 3.

9. Makwerhu mun’wana a titwisa kuyini hi kuyendla xikhongelo naswona wena u titwisa kuyini?

⁹ Loko hi ya hi tirhela Yehovha hi tlhela hi vona leswi a hlamulisaka xiswona swikhongelo swa hina swihi yendla hi tlangela nyiko ya xikhongelo. Pimisa hi xikombiso xa Chris. Makwerhu lweyi a ali ka ntirho wa nkama hinkwawu kuringana 47 wa malembe manga hundza a li: “Naswi rhandza kupfuka nimixo ni khongela na ni vona kusaseka ka ntumbunuku. Ni tsakisiwa hi kuvona masana ni mberha. Leswo swini yendla ni khensa Yehovha hi mhaka minchumu hinkwayu angani nyika kupatsa ni xikhongelo. Naswona loko ni khongela nimadlambu ni yetlela na ni tsakile hi kutiva leswaku ni ni lipfalu la kubasa.”

10. Hi mhaka muni moya wa kukwetsima wu li wa lisima?

¹⁰ Nchumu xin’wanyana xa lisima xa kukala xinga voneki i moya wa kukwetsima. Yesu ahi  byele swaku hi tama hi khongelela moya wa kukwetsima. (Luk. 11:9, 13) Yehovha ahi nyika ntamu hi kutirhisa moya wa kukwetsima naswona angahi nyika ‘matimba lamakulu lama tlulaka hinkwaswu’. (2 Kor. 4:7; Mint. 1:8) Hi kupfuniwa hi moya wa kukwetsima hinga tiyisela mindzingo hinkwayu leyi hi kumanaka na yona.

11. Moya wa kukwetsima wuhi pfunisa kuyini?

¹¹ Moya wa kukwetsima wungahi pfuna kuyendla mintirho ya hina ka nhlengeletanu ya Yehovha. Naswona wungahi pfuna kuyampsisa matirhelo ya hina. Haswi tiva swaku hinkwaswu leswi hiswi yendlaka ka ntirho wa Yehovha hi pfuniwa hi moya wa kukwetsima.

12. Hikuya hi Tipisalema 139:23, 24, hinga kombela moya wa kukwetsima swaku wuhi pfuna kuyendla yini?

¹² Hinga kombisa swaku moya wa kukwetsima i wa lisima ka hina hi kukombela Yehovha ahi pfuna kuvona loko kuni mimpimiso ni kunavela ka kubiha ka timbilu ta hina. (Lerha Tipisalema 139:23, 24.) Loko hi khongela hi kombela leswo ka Yehovha atahi pfuna hi kutirhisa moya wa yena wa kukwetsima kuva hi tivonela ka mimpimiso ni kunavela ka kubiha. Loko hi tsumbula swaku hi navela hi tlhela hi pimisa minchumu ya kubiha hi fanele hi khongela hi kombela Yehovha ahi pfuna hi kutirhisa moya wa yena wa kukwetsima akuva hi lwisana na swona. Loko hi yendla leswo, Yehovha ataswi vona swaku ahi lavi kuyendla nchumu lexingatamu yendla angahi pfuni hi kutirhisa moya wa yena wa kukwetsima. — Efe. 4:30.

13. Hingaswi kombisisa kuyini swaku hawu khensa hintamu moya wa kukwetsima?

¹³ Kuyanakanyisisa hi leswi moya wa kukwetsima wuswi yendlaka ka masiku ya hina, switahi pfuna kuva hiwu tlangela. Na Yesu angase tlhelela matilweni a byele vadjondzisiwa va yena a ku: ‘Kambe mitanyikiwa matimba, siku leli Moya Wokwetsima wungatata henhla ka n’wina; kutani mitava timboni ta mina . . . kuyafika magan’wini ya misava.’ (Mint. 1:8) Leswo hi swona swi yendlekaka namuntlha. Vanhu va kutlula 8.5 milhões amisaveni hinkwayu va gandzela Yehovha. Leswi hinga ni moya wa kukwetsima hi hanya hi kurhula ni  vamakwerhu naswona wuhi pfuna kuva hi tsaka, hiva ni kurhula, hi kota kulehisa mbilu, hiva ni wunene, hi tiva kunyika, hi tshembeka, hiva ni timpsalu ni kutikhoma. Hinkwaswo leswi, i xiyenge xa ‘handzu wa moya’. (Gal. 5:22, 23) Hikakunene moya wa kukwetsima i nyiko ya lisima.

14. I vamani vahi pfunaka na hingaswi voni loko hili kuchumayeleni?

¹⁴ Nchumu xin’wanyana xa lisima xa kukala xinga voneki i ‘kutirhisana’ na Yehovha, Yesu ni tintsumi. (2 Kor. 6:1) Hi yendla leswo nkama hi djondzaka Bibele ni vanhu. Pawulo a vuli swaku yena ni hinkwavu lava chumayelaka ‘i vatirhikulobye ni Xikwembu.’ (1 Kor. 3:9) Loko hi chumayela mahungu ya kutsakisa hi tirhisana na Yesu. Khumbuka swaku ankama Yesu anga byela valandzeli va yena swaku “fambani ka tinxaka hinkwatu, mivayendla vadjondzisiwa va mina” a game a ku “ni na n’wina”. (Mat. 28:19, 20) Se a tintsumi ke? Ha tsaka leswi tihi pfunaka loko hi chumayela “Evhangeli leyingaheliki kumbe mahungu ya kutsakisaka . . . ka vanhu va matiko hinkwawu.” — Nhla. 14:6.

15. Hi xihi xikombiso xa le Bibeleni lexi kombisaka swaku Yehovha wawu seketela ntirho wa hina?

¹⁵ I yini leswi hi kotaka kuswi yendla leswi hi pfuniwaka hi Yehovha, Yesu ni tintsumi? Ankama hi byalaka mbewu kumbe mahungu ya Mfumu, mbewu yin’wana yi wela ka timbilu letinene yi gama yi kula. (Mat. 13:18, 23) I mani lweyi a yendlaka swaku mbewu Mfumu yi kula yi tlhela yi psala? Yesu a te anga kona lweyi a vaka mulandzeli wa yena loko “angatisiwanga ka mina hi Tatana”. (Yoh. 6:44) Leswo swi yendlekile aminkameni ya Bibele. Kuni siku Pawulo anga chumayela vavasati van’wana a kusuhi ni Filipiya. Vona leswi Bibele liswi vulaka hi mun’we wa vona, lweyi vito la yena kunga Lidiya: ‘Hosi [Yehovha] yi pfula mbilu ya yena leswaku a twisisa leswi vuliwaka hi Pawulo.’ (Mint. 16:13-15) Kufana na Lidiya, kuni ma milhões ya vanhu lava Yehovha ava kokelaka ka yena.

16. Hi fanele hi dzunisa mani loko swihi fambela khale antirhweni wa kuchumayela?

¹⁶ I mani lweyi a faneleke a dzunisiwa loko swihi fambela kahle ka ntirho wa kuchumayela? Pawulo a hlamule xivutiso lexo loko a tsalela bandla la Vakorinto a ku: ‘Mina ni byalile, Apolosi a cheletelile; kambe Xikwembu hi xona xi miliseke. Hikolaho, lweyi a byalaka ahi nchumu, hambi lweyi a cheletelaka, kambe i Xikwembu, hikuva hi xona xikulisaka.’ (1 Kor. 3:6, 7) Kufana na Pawulo, minkama hinkwayu hi fanele hi dzunisa Yehovha loko swihi fambela kahle antirhweni wa kuchumayela.

17. Hinga tlangelisisa kuyini hi leswi “hi tirhisanaka” na Yehovha, Yesu ni tintsumi?

¹⁷ Hinga yendla yini akuva hi kombisa swaku ha tlangela hi leswi “hi tirhisanaka” na Yehovha, Yesu ni tintsumi? Hinga yendla leswo hi kuchumayela munhu mun’wana ni mun’wana lweyi himu kumaka. Kuni mayendlela ya ku hambanahambana ya kuchumayelaka ya kufana ni kuchumayela “livaleni ni hi munti ni munti.” (Mint. 20:20, NM) Van’wana vaswi rhandza kuchumayela swa kola na kola. Loko va kumana ni munhu waku avamu tivi, va sungula hi kumu xoweta na vamu hlekela va gama va bula na yena. Loko munhu wa kona aswi tsakela, va sungula kumu chumayela hi lirhandzu.

18-19. a) Hingayi regarisa kuyini mbewu ya ntiyiso? b) Nyikela xikombiso xa munhu lweyi a adjondzeliwa Bibele lweyi anga pfuniwa hi Yehovha.

¹⁸ Leswi hinga ‘vatirhi kuloni ni Xikwembu’ hi fanele hi byala mbewu ya ntiyiso hi tlhela hi  regara. Loko munhu a tsakela hi fanele hi lwela kutlhela himu yendzela kumbe hi kombela munhu mun’wanyana lweyi angatamu yendzela akuva a djondzeliwa Bibele. Ankama hi djondzaka na yena Bibele, ha tsaka loko hi vona Yehovha amu pfuna kucinca mapimisela ni leswi a titwisaka xiswona.

¹⁹ Ahi voneni xikombiso xa Raphalalani, lweyi a ali nyanga atikweni la Djoni. Aaswi rhandza leswi aaswi djondza ka Bibele kambe aswimu karhatela kupfumela leswi Bibele liswi djondzisaka hi mhaka ya kuvulavula ni vanhu va kufa. (Det. 18:10-12) Hi kutsongokutsongo a pfumelele Xikwembu xi cinca mapimiselo ya yena. Hi kufamba ka nkama, a tshikile kuva nyanga hambileswi lowu awu li ntirho lowu a atihanyisa hi wona. Raphalalani, lweyi swoswi anga ni 60 wa malembe, a li: “Niti tlangela hintamu Timboni ta Yehovha hikusa tini pfunile kukuma ntirho wun’wanyana. Kambe nimu tlangela hintamu Yehovha hikusa ani pfunile kucinca wutomi la mina. Swoswi ni Mboni ya Yehovha leyinga tsakamisiwa naswona ni chumayela mahungu ya kutsakisa.”

20. Hi fanele hi lwela kuyendla yini kusukela swoswi?

²⁰ Ka djondzo leyi hi bule hi swilo swa lisima swa kukala swinga voneki. A xa lisima hintamu kutlula hinkwaswu i kuva munghanu wa Yehovha. Loko hi li vanghanu va Yehovha, hinga khongela ka yena, hi tlhela hi pfuniwa hi moya wa kukwetsima. Yehovha, Yesu ni tintsumi vatahi seketela ka ntirho wa kuchumayela. Ahi lweleni kuswi tlangela hintamu swilo leswi swa lisima swa kukala swinga voneki. Naswona minkama hinkwayu ahi tlangeleni Yehovha hileswi anga munghanu wa hina wa mukulu kutlula hinkwavu.