1. Kasi Yesu wakayowoya vichi vya usambazi wakuchanya?

NI USAMBAZI wose yayi uwo tingawuwona na maso. Nakuti usambazi wakuzirwa chomene ngwambura kuwoneka. Pa Upharazgi wa pa Phiri, Yesu wakayowoya vya usambazi wakuchanya uwo ngwakuzirwa chomene kuluska ndalama. Pamanyuma wakati: “Uko kuli usambazi wako, ndiko mtima wako uŵengeso.” (Mat. 6:19-21) Mtima withu utitumenge kupenja vinthu ivyo tikuwona kuti ni vyakuzirwa chomene. Tikujiŵikira “usambazi kuchanya” para tili na zina liwemi pamaso pa Chiuta panji para tikuŵa ku chigaŵa chake. Usambazi uwo Yesu wakayowoya unganangika yayi panji kwibika.

2. (a) Kuyana na 2 Ŵakorinte 4:17, 18, kasi Paulosi wakutichiska vichi? (b) Kasi tidumbiskanenge vichi mu nkhani iyi?

² Mpositole Paulosi wakutichiska kuti ‘tilaŵiskenge pa vinthu vyambura kuwoneka.’ (Ŵazgani 2 Ŵakorinte 4:17, 18.) Vinthu vyambura kuwoneka ivi vikusazgapo vinthu viwemi vyose ivyo tizamuŵa navyo mu charu chiphya cha Chiuta. Mu nkhani iyi, tisambirenge vinthu vyakuzirwa vinayi vyambura kuwoneka ivyo navyo vingatovwira chomene. Vinthu ivi ni kuŵa paubwezi na Chiuta, lurombo, wovwiri wa mzimu utuŵa wa Chiuta, na wovwiri wakufuma kwa Yehova, Yesu, na ŵangelo para tikupharazga. Tisambirengeso umo tingalongolera kuti tikumuwonga Yehova chifukwa cha usambazi wapadera uwu.

3. Kasi chinthu chapadera chomene chambura kuwoneka ntchivichi, ndipo ntchivichi chawovwira kuti nase tiŵe nacho?

³ Chinthu chapadera chomene chambura kuwoneka nkhuŵa  paubwezi na Yehova Chiuta. (Sal. 25:14) Kasi vingachitika wuli kuti Yehova waŵe paubwezi na ŵanthu ŵakwananga, Mwenecho nakulutilira kuŵa mutuŵa? Vingachitika chifukwa cha sembe yakuwombora ya Yesu iyo ‘yikuwuskapo kwananga kwa ŵanthu pa charu.’ (Yoh. 1:29) Nanga ni apo Yesu wakaŵa kuti wandafwe, Yehova wakamanya kuti Yesu waŵenge wakugomezgeka m’paka nyifwa kuti waponoske ŵanthu. Lekani Chiuta wakaŵa paubwezi na ŵanthu awo ŵakaŵako pambere Khristu wandafwe.—Rom. 3:25.

4. Zunurani ŵanthu ŵakale awo ŵakaŵa paubwezi na Chiuta pambere Yesu wandize.

⁴ Ghanaghanirani vya ŵanthu ŵanyake ŵakale awo ŵakaŵa paubwezi na Chiuta pambere Yesu wandize. Abrahamu wakaŵa munthu uyo wakaŵa na chipulikano chakukhora. Nangauli pakajumpha vyaka 1,000 kufuma apo Abrahamu wakafwira, kweni Yehova wakamuchema kuti “mubwezi wane.” (Yes. 41:8) Ichi chikung’anamura kuti nanga ŵanthu ŵangafwa, Yehova wakuwona kuti ŵachali ŵabwezi ŵake ŵapamtima. Mwakuti kwa Yehova, Abrahamu wachali wamoyo. (Luka 20:37, 38) Munthu munyake ni Yobu. Panthazi pa ŵangelo wose, Yehova wakayowoya vya Yobu. Wakati Yobu “ni munthu wakunyoloka, wambura kafukwa, wakopa Chiuta na kugega icho ntchiheni.” (Yobu 1:6-8) Wuli pakuyowoya za Daniyeli uyo wakateŵetera Chiuta mwakugomezgeka vyaka pafupifupi 80 mu charu icho ŵanthu ŵakasopanga ŵachiuta ŵatesi? Kasi Yehova wakamuwonanga wuli? Maulendo ghakukwana ghatatu ŵangelo ŵakamusimikizgira mwanalume muchekuru uyu kuti ‘ngwakuzirwa chomene’ kwa Chiuta. (Dan. 9:23; 10:11, 19) Tili na chigomezgo chose kuti Yehova ngwakunozgeka kuzakawuska ŵabwezi ŵake ŵakutemweka awo ŵali kufwa.—Yobu 14:15.

5. Kasi chikukhumbikwa ntchivichi kuti tiŵe paubwezi na Yehova?

⁵ Kasi mbanthu ŵalinga ŵambura kufikapo awo ŵali paubwezi na Yehova mazuŵa ghano? Pali ŵanthu mamiliyoni ghanandi. Tikuyowoya nthena chifukwa pali ŵanalume, ŵanakazi, na ŵana ŵanandi awo kwizira mu vyakuchita vyawo ŵakulongora kuti mbabwezi ŵa Chiuta nadi. Yehova ‘wakuŵa paubwezi na ŵanthu ŵakunyoloka.’ (Zinth. 3:32) Ubwezi uwu ulipo chifukwa cha chipulikano chawo mu sembe yakuwombora ya Yesu. Chifukwa cha sembe iyi, tikujipatulira kwa iyo na kubatizika. Para nase tichitenge ivi, tiŵenge mu gulu la ŵanthu mamiliyoni ghanandi awo ŵali kujipatulira kwa Yehova na kubatizika, ndipo ŵakukondwa chifukwa chakuti ŵali paubwezi na Munthu mukuru chomene mu chilengiwa chose.

6. Kasi tingalongora wuli kuti tikuzirwiska ubwezi withu na Chiuta?

⁶ Kasi tingalongora wuli kuti tikuzirwiska ubwezi withu na Chiuta? Nga ni Abrahamu na Yobu, awo ŵakalutilira kugomezgeka kwa Yehova vyaka vyakujumpha 100, nase tikwenera kugomezgeka, kwali tateŵetera Yehova vyaka vinandi panji yayi. Kweniso nga ni Daniyeli, tikwenera kuzirwiska chomene ubwezi withu na Chiuta kuluska umoyo withu. (Dan. 6:7, 10, 16, 22) Na wovwiri wa Yehova, tingazizipizga chiyezgo chilichose na kulutilira kuŵa nayo paubwezi.—Fil. 4:13.

7. (a) Kuyana na Zintharika 15:8, kasi Yehova wakujipulika wuli para tikulomba? (b) Kasi Yehova wakuzgora wuli malurombo ghithu?

⁷ Chawanangwa chinyake chambura kuwoneka ni lurombo. Ŵanthu awo ŵali paubwezi ŵakutemwa kuphalirana maghanoghano na umo ŵakujipulikira. Umu ndimo vikuŵiraso para tili paubwezi na Yehova. Iyo wakuyowoya nase kwizira mu Mazgu ghake,  ndipo wakutiphalira maghanoghano ghake na umo wakujipulikira. Ise tikuyowoya nayo kwizira mu lurombo, ndipo tikumuphalira maghanoghano ghithu na umo tikujipulikira. Yehova wakukondwa para wakutegherezga malurombo ghithu. (Ŵazgani Zintharika 15:8.) Pakuŵa mubwezi withu wachitemwa, Yehova wakupulika waka yayi malurombo ghithu, kweni wakuzgora. Nyengo zinyake wakuzgora luŵiro. Kweni nyengo zinyake tikwenera kulutilira kulomba. Ndipouli, tikuŵa na chigomezgo kuti wazgorenge pa nyengo yakwenelera kweniso munthowa yiwemi. Nakuti Chiuta wangazgora munthowa iyo takhazganga yayi. Mwachiyelezgero, m’malo mwa kuwuskapo chiyezgo, iyo wangatipa waka mahara na nkhongono kuti ‘tizizipizge.’—1 Kor. 10:13.

8. Kasi tingalongora wuli kuti tikuwonga chawanangwa cha lurombo?

⁸ Kasi tingalongora wuli kuti tikuwonga chawanangwa chakuzirwa ichi cha lurombo? Nthowa yimoza nkhupulikira ulongozgi wa Yehova wakuti tilombenge nyengo zose.’ (1 Tes. 5:17) Yehova wakutichichizga yayi kuti tilombenge. M’malo mwake, wakuchindika wanangwa withu ndipo wakutichiska kuti ‘tikosere mu lurombo.’ (Rom. 12:12) Ntheura tingalongora kuti tikuwonga para zuŵa lililose tikulomba. Kweniso mu malurombo ghithu tingaluwanga yayi kumuwonga Yehova na kumulumba.—Sal. 145:2, 3.

9. Kasi mubali munyake wakujipulika wuli chifukwa cha lurombo, ndipo imwe mukujipulika wuli?

⁹ Para titeŵeterenge Yehova nyengo yitali na kuwona umo wakuzgolera malurombo, tiwongenge chomene chawanangwa cha lurombo. Mwachiyelezgero, wonani ivyo wakuyowoya Mubali Chris, uyo waŵa mu uteŵeti wanyengozose vyaka 47. Iyo wakuti: “Nkhukondwa kuwuka mulenjilenji kuti nilombe kwa Yehova. Ntchakukondweska chomene kuyowoya na Yehova apo zuŵa likufuma ndipo charu chikuwoneka chakutowa chifukwa cha malazi. Ivi vikunovwira kuti nimuwongenge pa vyawanangwa vyose ivyo wali kutipa kusazgapo chawanangwa cha lurombo. Chifukwa chakuti mise napo nkhumulomba, nkhugona na njuŵi yituŵa.”

10. Chifukwa wuli tikwenera kuwonga chawanangwa cha mzimu utuŵa wa Chiuta?

¹⁰ Mzimu utuŵa ntchawanangwa chinyake chakufuma kwa Chiuta icho tikwenera kuwonga. Yesu wakatichiska kuti tilutilire kulomba mzimu utuŵa. (Luka 11:9, 13) Yehova wakugwiliskira ntchito mzimu utuŵa kuti watipe “nkhongono zakuluska zakawiro.” (2 Kor. 4:7; Mil. 1:8) Na wovwiri wa mzimu wa Chiuta, tingazizipizga chiyezgo chilichose icho tingakumana nacho.

11. Kasi mzimu utuŵa ungatovwira wuli?

¹¹ Mzimu utuŵa ungatovwira kuti tichitenge makora milimo yithu mu gulu la Chiuta. Kweniso mzimu wa Chiuta ungatovwira kuti tisazgireko luso lwithu. Tikumanya kuti vinthu vikutiyendera makora mu gulu la Chiuta chifukwa chakuti mzimu wake ukutovwira.

12. Kuyana na Salimo 139:23, 24, chifukwa wuli tikwenera kulomba mzimu utuŵa?

¹² Nthowa yinyake iyo tingalongolera kuti mzimu utuŵa wa Chiuta ngwakuzirwa, nkhulomba kuti utovwire kumanya usange tili na maghanoghano panji makhumbiro ghaheni mu mtima withu. (Ŵazgani Salimo 139:23, 24.) Para tichitenge nthena, kwizira mu mzimu wake, Yehova watovwirenge kumanya maghanoghano panji makhumbiro ghaheni mu mtima withu. Nakuti para tamanya kuti tili na maghanoghano panji makhumbiro ghaheni, tikwenera kulomba mzimu wa Chiuta kuti utovwire kughawuskamo. Para tichitenge nthena, Yehova wawonenge kuti tikugega kuchita chilichose icho chingatitondeska kuti mzimu utuŵa utovwire.—Efe. 4:30.

13. Kasi tingachita wuli kuti tiwongenge chomene chawanangwa cha mzimu utuŵa?

¹³ Tingawonga chomene chawanangwa cha mzimu utuŵa para tingawona umo ukutovwilira mazuŵa ghano. Pambere Yesu wandakwelere kuchanya, wakaphalira ŵasambiri ŵake kuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane . . . ku vigaŵa vyakutali chomene vya charu chapasi.” (Mil. 1:8) Mazgu agha ghakufiskika nadi mazuŵa ghano. Chifukwa cha  mzimu utuŵa, ŵanthu pafupifupi 8.5 miliyoni pa charu chose ŵakuteŵetera Yehova. Kweniso tikusangwa na paradiso wauzimu chifukwa chakuti mzimu wa Chiuta ukutovwira kuŵa na mikhaliro yiwemi nga ntchitemwa, chimwemwe, mtende, kuzikira, lusungu, uwemi, chipulikano, kuzika, na kujikora. Mikhaliro iyi ndiyo ni “vipambi vya mzimu.” (Gal. 5:22, 23) Mzimu utuŵa ntchawanangwa chapadera chomene.

14. Kasi mbanjani awo ŵakutovwira para tikupharazga nangauli tikuŵawona yayi?

¹⁴ Tili na chawanangwa chakuzirwa chomene chambura kuwoneka icho ‘nkhugwira ntchito pamoza’ na Yehova, Yesu, na ŵangelo. (2 Kor. 6:1) Tikugwira nawo lumoza para tikuchitako ntchito yakuzgora ŵanthu kuŵa ŵasambiri. Paulosi wakati iyo na awo ŵakuchitako ntchito iyi, ‘mbantchito ŵanyake na Chiuta.’ (1 Kor. 3:9) Para nase tikuchitako mulimo uwu, tiliso ŵantchito ŵanyake na Yesu. Kumbukani kuti Yesu wati waphalira ŵasambiri ŵake kuti ‘ŵakazgore ŵanthu ŵa mitundu yose kuŵa ŵasambiri,’ wakati: “Ine nili namwe.” (Mat. 28:19, 20) Wuli pakuyowoya za ŵangelo? Tikuwonga chomene kuti ŵangelo ŵakutilongozga apo tikupharazga “makani ghawemi ghamuyirayira . . . [ku] awo ŵakukhala pa charu chapasi.”—Chivu. 14:6.

15. Yowoyani chiyelezgero cha mu Baibolo icho chikulongora kuti Yehova ndiyo wakuchita chigaŵa chikuru mu uteŵeti.

¹⁵ Kasi wovwiri uwo tikupokera kufuma kuchanya ukutovwira kufiska vichi? Apo tikuseŵa mbuto za Ufumu, mbuto zinyake zikuseŵeka pa dongo liwemi ndipo zikukura. (Mat. 13:18, 23) Kasi ni njani wakupangiska mbuto zaunenesko izi kukura na kupambika vipambi? Yesu wakalongosora kuti palije munthu wangaŵa mulondezgi wake kwambura ‘Adada ŵake ŵamuguza.’ (Yoh. 6:44) Baibolo likutiphalira chiyelezgero chiwemi pa nkhani iyi. Kumbukani ivyo vikachitika Paulosi wati wapharazgira gulu la ŵanakazi ŵanyake kuwaro kwa msumba wa Filipi. Wonani ivyo Baibolo likuyowoya vya mwanakazi munyake zina lake Lidiya uyo nayo wakaŵa pa gulu ili. Likuti: “Yehova wakajura mtima wake kuti wapulikiske ivyo Paulosi wakayowoyanga.” (Mil. 16:13-15) Nga ni Lidiya, pali ŵanthu mamiliyoni ghanandi awo Yehova wali kuŵaguza.

16. Kasi ni njani wakwenera kulumbika para vinthu vyatiyendera makora mu uteŵeti?

¹⁶ Kasi ni njani wakwenera kulumbika para vinthu vyatiyendera makora mu uteŵeti? Paulosi wakazgora fumbo ili apo wakalembera mpingo wa Korinte mazgu ghakuti: “Ine nkhapanda, Apolo wakathilira, kweni Chiuta ndiyo wakakuzganga. Ntheura uyo wakupanda nkhanthu yayi nesi uyo wakuthilira maji, kweni Chiuta uyo wakukuzga.” (1 Kor. 3:6, 7) Nga ni Paulosi, nyengo zose tikwenera kulumba Yehova para vinthu vyatiyendera makora mu uteŵeti.

17. Kasi tingalongora wuli kuti tikuwonga mwaŵi ‘wakugwira lumoza ntchito’ na Chiuta, Khristu, na ŵangelo?

¹⁷ Kasi tingalongora wuli kuti tikuwonga mwaŵi ‘wakugwira lumoza ntchito’ na Chiuta, Khristu, na ŵangelo? Tingachita nthena para tikulimbikira chomene kupharazgira ŵanthu makani ghawemi pa m’pata uliwose uwo wasangika. Pali nthowa zinandi zakupharazgira, nga nkhupharazga “pakweru na ku nyumba na nyumba.” (Mil. 20:20) Kweniso ŵanandi ŵakutemwa kupharazga mwamwaŵi. Para ŵakumana na munthu, ŵakumutawuzga mwaubwezi na kwamba kudumbiskana nayo. Para munthu wakuzgora makora, ŵakusintha chidumbirano mwaluso, ndipo ŵakwamba kumupharazgira uthenga wa Ufumu.

18-19. (a) Kasi tikuthilira wuli mbuto zaunenesko? (b) Yowoyani chiyelezgero icho chikulongora umo Yehova wakawovwilira munthu munyake.

 ¹⁸ Pakuŵa “ŵantchito ŵanyake na Chiuta,” tikwenera kupanda mbuto zaunenesko na kuthilira. Para munthu ngwakunweka, tikwenera kuyezgayezga kuwelerako panji kuphalira munthu munyake kuti wakambe kusambira nayo Baibolo. Tikukondwa para tikuwona Yehova wakovwira munthu uyo tikusambira nayo Baibolo kusintha nkharo yake.

¹⁹ Wonani chiyelezgero cha Raphalalani wa ku South Africa uyo wakaŵa ng’anga. Wakakondwa na ivyo wakasambira mu Baibolo. Kweni chikaŵa chakusuzga chomene kwa iyo kuzomera ivyo Mazgu gha Chiuta ghakuyowoya pa nkhani ya kuyowoyeskana na ŵasekuru awo ŵali kufwa. (Doto. 18:10-12) Pachoko na pachoko, wakazomerezga Chiuta kuti wamovwire kusintha kaghanaghaniro kake. Nyengo yati yajumphapo wakaleka ung’anga, nangauli ndipo wakasangirangapo mchere. Raphalalani, uyo wali na vyaka 60, wakuti: “Nkhuŵawonga chomene Ŵakaboni ŵa Yehova pakunovwira munthowa zakupambanapambana, nga nkhunisangira ntchito. Chakuluska vyose, nkhuwonga chomene Yehova chifukwa wanovwira kusintha umoyo wane. Sono nili kubatizika ndipo nane nkhuchitako mulimo wakupharazga.”

20. Kasi mwaŵikapo mtima kuchita vichi?

²⁰ Mu nkhani iyi, tasambira za vyawanangwa vinayi vyambura kuwoneka. Chikuru chomene pa vyose, nkhuŵa paubwezi wakukhora na Yehova. Chawanangwa ichi chikutovwira kupindura na vyawanangwa vinyake vyambura kuwoneka nga ni lurombo, wovwiri wa mzimu utuŵa, na wovwiri wakufuma kuchanya para tikupharazga. Mphanyi taŵikapo mtima kuwonga chomene vyawanangwa vyambura kuwoneka ivi. Tingalekanga yayi kumuwonga Yehova pakuŵa Mubwezi withu muwemi chomene.