1. Ne a pati a Iesu ne fai mai e uiga ki koloa i te lagi?

E SE ko koloa tāua katoa e mafai o lavea. A te ‵tonuga loa, a koloa kolā e se lavea ko toe koloa tāua eiloa. I te Lāuga i luga i te Mauga, ne faipati a Iesu ki koloa i te lagi kolā e tāua fakafia atu i lō koloa faka-te-foitino. Kae ne toe faka‵mafa mai ne ia te munatonu tenei: “Ko te koga e tuku i ei otou koloa, ka tuku foki i ei otou loto.” (Mata. 6:19-21) Ka fakamalosi aka tatou ne ‵tou loto ke kausaki atu ki mea kolā e fakatāua io me e tāua ‵ki ki a tatou. E fakaputu ne tatou a “koloa i te lagi” mai te mauaga o se igoa ‵lei, io me se tulaga ‵lei i mua o te Atua. Ne fakamatala mai ne Iesu me i vaegā koloa penā e se mafai o ma‵sei io me kaisoa.

2. (a) E ‵tusa mo te 2 Kolinito 4:17, 18, se a te mea e fakamalosi mai a Paulo ke ‵saga tonu tatou ki ei? (e) Ne a mea ka sau‵tala tatou ki ei i te mataupu tenei?

² E fakamalosi mai te apositolo ko Paulo ke ‘‵kilo faeloa ‵tou mata . . . ki mea e se lavea.’ (Faitau te 2 Kolinito 4:17, 18.) A mea e se lavea konei ko koloa tāua kolā e aofia i ei a fakamanuiaga ka maua ne tatou i te lalolagi fou a te Atua. I te mataupu tenei, ka suke‵suke tatou ki koloa tāua sē lavea e fa kolā e mafai o aoga ki a tatou i te taimi nei—‵tou va fakataugasoa mo te Atua, te meaalofa ko te ‵talo, te fesoasoani o te agaga tapu o te Atua, mo te fesoasoani e maua ne tatou mai i a Ieova, Iesu mo agelu i te galuega talai. Ka sau‵tala foki tatou ki te auala e mafai o fakaasi atu ‵tou loto fakafetai ki koloa tāua konei e se lavea ki mata.

3. Se a te ‵toe koloa tāua telā e se lavea, kae e mafai pefea o maua ne tatou?

³ A te ‵toe koloa tāua telā e se lavea ko te ‵tou va fakataugasoa  mo Ieova te Atua. (Sala. 25:14) E mafai pefea ne te Atua o fai taugasoa mo tino agasala kae katoatoa eiloa tena tulaga tapu? E mafai a ia o fai penā, me i te taulaga togiola a Iesu ne “ave ne ia kea‵tea a agasala a te lalolagi.” (Ioa. 1:29) Ko leva ne iloa ne Ieova me ka fakataunu eiloa a tena fuafuaga ke tuku mai ne ia se Fakaola mō tino. Tenā te pogai ne mafai ei o fai taugasoa te Atua mo tino kolā ne ola mai mua o mate a Keliso.—Loma 3:25.

4. Taku mai a nisi fakaakoakoga o tāgata Kelisiano i aso mua kolā ne fai mo taugasoa o te Atua.

⁴ Mafaufau la ki nisi tāgata Kelisiano i aso mua kolā ne fai mo taugasoa o te Atua. A Apelaamo se tagata telā ne fakaasi mai ne ia te fakatuanaki tu ‵kese. I se 1,000 tupu tausaga mai tua o te matega o Apelaamo, ne taku ne Ieova a ia me ko tena “taugasoa.” (Isa. 41:8) Tela la, e se mafai foki ne te mate o ‵vae kea‵tea a Ieova mai ana taugasoa ‵pili. E ola eiloa a Apelaamo i te mafaufau o Ieova. (Luka 20:37, 38) Te suā fakaakoakoga ko Iopu. I te taimi ne maopoopo ei a agelu katoa i te lagi, ne faipati eiloa a Ieova mo te loto talitonu e uiga ki a Iopu. Ne taku ne Ieova a Iopu me se “tagata fai mea tonu kae fakamaoni, e mataku ki te Atua kae ‵kalo kea‵tea mai mea ma‵sei.” (Iopu 1:6-8) Kae pefea a lagonaga o Ieova e uiga ki a Tanielu, telā ne tavini fakamaoni ki te Atua i se fenua fapaupau kāti i tausaga e 80? E tolu taimi ne fakatalitonu atu ei a agelu ki te toeaina tenā i a ia e “tāua ‵ki” ki te Atua. (Tani. 9:23; 10:11, 19) E mafai o mautinoa i a tatou me e olioli eiloa a Ieova ki te aso telā ka toe faka‵tu mai ei ne ia ana taugasoa pele kolā ko oti ne ‵mate atu.—Iopu 14:15.

5. Ne a mea e manakogina ke fai ne tatou ke maua se va fakataugasoa ‵pili mo Ieova?

⁵ E tokofia a tino sē ‵lei katoatoa i aso nei e maua ne latou se va fakataugasoa ‵pili mo Ieova? E lau i miliona. E iloa ne tatou a te mea tenei me e tokouke a tāgata, fāfine, mo tama‵liki i te lalolagi kātoa e fakaasi mai e auala i olotou amioga, me e ma‵nako latou o fai mo taugasoa o te Atua. A Ieova e “pili Tena va fakataugasoa mo te tino fai mea tonu.” (Faata. 3:32) Ona ko te fakatuanaki ki te taulaga togiola a Iesu, ko mafai ei o fai tatou mo taugasoa o Ieova. E auala i te mea tenā, e talia ne Ieova mo te alofa ke tuku atu tatou ki a ia kae ke papatiso. Kafai e tau‵tali tatou i auala tāua konei, ko ‵kau atu tatou ki te fia miliona o Kelisiano kolā ko oti ne tukugina atu kae papatiso, kae ko maua ne latou se “va fakataugasoa ‵pili” mo te ‵toe Tino tafasili i te tāua i te iunivesi!

6. E mafai pefea o fakaasi atu ‵tou loto fakafetai ki te va fakataugasoa ko maua ne tatou mo te Atua?

⁶ E fakaasi atu pefea me e fakatāua ne tatou a ‵tou va fakataugasoa mo te Atua? Pelā mo Apelaamo mo Iopu, kolā ne tumau i te fakamaoni ki te Atua mō se fia selau tupu tausaga, e ‵tau o tumau tatou i te fakamaoni—faitalia te leva ne tavini atu ei tatou ki a Ieova i te olaga masei tenei. Pelā mo Tanielu, e ‵tau o fakatāua ne tatou a ‵tou va fakataugasoa mo te Atua i lō ‵tou ola. (Tani. 6:7, 10, 16, 22) Mai te fesoasoani o Ieova, ko mafai ne tatou o kufaki i so se fakalavelave e fe‵paki mo tatou, kae fai ei ke tumau te ‵pili o ‵tou va mo ia.—Fili. 4:13.

7. (a) E ‵tusa mo te Faataoto 15:8, e pefea a lagonaga o Ieova e uiga ki ‵tou ‵talo? (e) I auala fea e tali mai ei ne Ieova a ‵tou ‵talo?

⁷ A te suā meaalofa tāua telā e se lavea, ko te ‵talo. A taugasoa ‵pili e sau‵tala fakatasi ki olotou mafaufauga mo lagonaga. E mata, e penā foki ‵tou va fakataugasoa mo Ieova? Ao! A Ieova e faipati mai ki a tatou e auala i tena Muna, kae e fakaasi mai ne ia i loto i ei a ana mafaufauga mo ana lagonaga. E fesokotaki tatou mo ia i ‵talo, kae e mafai o fakaasi atu ne tatou ki a ia a ‵tou mafaufauga mo lagonaga ‵loto. E fiafia eiloa a Ieova o fakalogologo mai ki ‵tou ‵talo. (Faitau te Faataoto 15:8.) Pelā me se Taugasoa alofa, e se  fakalogologo mai fua a Ieova ki ‵tou ‵talo, kae e tali mai foki ne ia. Nisi taimi e maua vave te tali ki ‵tou ‵talo. Kae i nisi taimi, kāti e ‵tau o tumau i te ‵talo atu faeloa e uiga ki se mea. Kae e mafai eiloa o tali‵tonu tatou me i te tali ka sae mai i te taimi tonu mo te auala tonu. E tonu, e mafai o ‵kese te tali a te Atua mai te mea e fakamoe‵moe tatou ki ei. Pelā me se fakaakoakoga, i lō te tapale kea‵tea ne ia se fakalavelave, e mafai o tuku mai ne ia ki a tatou a te poto mo te malosi ke “kufaki.”—1 Koli. 10:13.

8. E mafai pefea o fakaasi atu ‵tou loto fakafetai ki te meaalofa ko te ‵talo?

⁸ E mafai pefea o fakaasi atu ne tatou te loto fakafetai mō te meaalofa tāua tenei ko te ‵talo? Mai te faka‵logo ki pati fakatonutonu a te Atua ke “‵talo faeloa.” (1 Tesa. 5:17) E se faimalo ne Ieova tatou ke ‵talo. Kae e āva a ia ki ‵tou saolotoga kae fakamalosi mai ki a tatou ke “tumau faeloa i te ‵talo.” (Loma 12:12) Tela la, e mafai o fakaasi atu ‵tou loto fakafetai, mai te ‵talo faeloa i aso takitasi. E tonu, e ‵tau o aofia i ‵tou ‵talo a pati fakafetai mo tavaega ki a Ieova.—Sala. 145:2, 3.

9. E pefea a lagonaga o se taina e uiga ki te faiga o ‵talo, kae pefea ou lagonaga e uiga ki ei?

⁹ Ko te leva e tavini ei tatou ki a Ieova kae iloa aka a auala e tali ne ia a ‵tou ‵talo, ko te ‵poko foki o te ‵tou loto fakafetai ki te faiga o ‵talo. Mafaufau aka la ki a Chris, se taina telā ne galue i te taviniga tumau i tausaga e 47 ko ‵teka. “Se mea fakafiafia ki a au ke alausu i tafataeao katoa o faipati ki a Ieova i ‵talo,” ko ana pati. “Mafaga o mea gali ke faipati atu ki a Ieova i te taimi e sae aka ei a te la i te vaveao kae fai ei ke maina mai a te ‵sau o te vaveao! E fai ei ke gasue au o fakafetai atu ki a ia mō ana meaalofa katoa, e aofia i ei a te tauliaga ke ‵talo. Kae kafai ko oti ne fai taku ‵talo i te po, se mea gali eiloa me ko mafai o moe au i te po mo toku loto lagona ‵ma.”

10. Kaia e ‵tau ei o fakatāua ne tatou a te agaga tapu o te Atua?

¹⁰ A te malosi galue o te Atua ko te suā meaalofa sē lavea e ‵tau o fakatāua ne tatou. Ne fakamalosi mai a Iesu ki a tatou ke tumau i te ‵talo atu mō te agaga tapu. (Luka 11:9, 13) E auala i tena agaga tapu, e tuku mai ne Ieova ki a tatou a  te malosi—ke oko foki loa ki te “malosi telā e sili atu i te malosi masani.” (2 Koli. 4:7; Galu. 1:8) Mai te fesoasoani o te agaga o te Atua, e mafai ne tatou o kufaki i so se mea faigata e mafai o fe‵paki mo tatou.

11. I auala fea e mafai o fesoasoani mai te agaga tapu ki a tatou?

¹¹ A te agaga tapu e fesoasoani mai ke mafai ne tatou o fai ‵tou galuega i te taviniga a te Atua. E mafai ne te agaga o te Atua o fai ke momea aka te ‵lei o ‵tou ata‵mai mo ‵tou taleni. E fesoasoani mai ke mafai ne tatou o fai a ‵tou tiute faka-Kelisiano. E iloa ne tatou me e mafai fua o maua ne tatou a ikuga ‵lei i te taviniga a te Atua, ona fua ko te fesoasoani o te agaga o te Atua.

12. E ‵tusa mo te Salamo 139:23, 24, e mafai pefea o fesoasoani mai te agaga tapu ki a tatou?

¹² A te suā auala ke fakaasi atu me e fakatāua ne tatou a te agaga tapu o te Atua, ko te ‵talo atu ke fesoasoani mai ke iloa aka ne tatou so se mafaufauga io me se manakoga ‵se i ‵tou loto. (Faitau te Salamo 139:23, 24.) Kafai e fakamolemole atu tatou penā, e mafai eiloa o fakailoa mai ne Ieova e auala i tena agaga tapu a mafaufauga io me ko manakoga ‵se kolā e ‵tau o fakaeteete tatou i ei. Kae kafai ko iloa ‵lei ne tatou se mafaufauga io me se manakoga ‵se, e ‵tau o ‵talo atu tatou mō te agaga tapu o te Atua ke tuku mai ki a tatou te malosi ke ‵teke atu te mafaufauga io me ko te manakoga ‵se tenā. Kafai e fai ne tatou te mea tenei, ka lavea ne Ieova me e se ma‵nako tatou o fai so se mea telā ka fai ei ke taofi aka ei a ia mai te fesoasoani mai ki a tatou, e auala i tena agaga tapu.—Efe. 4:30.

13. E mafai pefea o momea aka te lasi o ‵tou loto fakafetai mō te agaga tapu?

¹³ E mafai o momea aka te lasi o ‵tou loto fakafetai mō te agaga tapu, mai te mafaufau ‵loto ki mea e fai ne te agaga tapu i ‵tou aso nei. Koi tuai o fanaka a Iesu ki te lagi, ne fai atu a ia ki ana soko: “Ka maua ne koutou a te ‵mana māfai e oko atu te agaga tapu ki luga i a koutou, kae ka fai koutou mo molimau ki a au . . . ki toe koga ‵mao i te lalolagi.” (Galu. 1:8) Tenei eiloa te mea gali ko tupu i ‵tou aso nei. Mai te fesoasoani o te agaga tapu, ko oti ne fakamaopoopo mai te valu mo te āfa miliona o tino tapuaki o Ieova mai feitu e fa o te lalolagi. E se gata i ei, ko aofia  tatou i se palataiso faka-te-agaga, ona ko te fesoasoani o te agaga tapu o te Atua ke ati aka ne tatou a uiga ‵gali e pelā mo te alofa, fiafia, filemu, kufaki, atafai, aga‵lei, fakatuanaki, agamalu, mo te loto pulea. A uiga konei e aofia i “fuataga o te agaga tapu.” (Kala. 5:22, 23) A te agaga tapu se meaalofa tāua ‵ki eiloa!

14. Se a te fesoasoani sē lavea e maua ne tatou i te taimi e fai ei te ‵tou galuega talai?

¹⁴ A te suā koloa tāua telā e se lavea, ko te “ga‵lue fakatasi” mo Ieova mo te vaega faka-te-lagi o tena fakapotopotoga. (2 Koli. 6:1) E fai tatou penā i so se taimi e aofia tatou i te galuega ko te faiga o soko. Ne fai mai a Paulo e uiga ki a ia eiloa mo latou kolā e aofia i te galuega tenei: “[Matou] ko tino ga‵lue a te Atua.” (1 Koli. 3:9) Kafai e ‵kau tatou ki te galuega talai faka-Kelisiano, ko ga‵lue fakatasi foki tatou mo Iesu. Masaua me i te otiga ne fai tena fakatonuga ki ana soko ke olo atu “ki fenua katoa o fai a tino i ei mo fai a soko,” ne fai atu a Iesu: “Au e fakatasi faeloa mo koutou.” (Mata. 28:19, 20) Kae pefea la a agelu? Se fakamanuiaga ke takitakigina tatou ne agelu i te taimi e folafola atu ei ne tatou a te “tala ‵lei se-gata-mai . . . ki a latou kolā e ‵nofo i te lalolagi”!—Faka. 14:6.

15. Taku mai se fakaakoakoga i te Tusi Tapu telā e fakaasi mai i ei te tusaga tāua o Ieova i te ‵tou galuega talai.

¹⁵ Mai te fesoasoani tenā o te kau faka-te-lagi, se a te mea ko fakataunu nei? I te taimi e kamata o ‵toki ne tatou te fekau o te Malo, nisi fuaga e ‵to atu ki laukele ‵lei, kae ola aka. (Mata. 13:18, 23) Ko oi ne fai ne ia ke ola aka a fuaga konā o te munatonu kae ke ‵fua mai? E fakamatala mai a Iesu me e seai se tagata e mafai o fai mo ana soko seiloga “ke aumai a ia ne te Tamana.” (Ioa. 6:44) E tuku mai ne te Tusi Tapu se fakaakoakoga e uiga ki te mea tenei. Mafaufau ki te taimi ne talai atu ei a Paulo ki se potukau o fāfine mai tua o te fakai o Filipi. Onoono ki pati a te Tusi Tapu e uiga ki se tokotasi o latou, telā e igoa ki a Litia: “Ne ‵tala ne Ieova tena loto ko te mea ke saga tonu atu ki mea kolā e faipati mai ne Paulo.” (Galu. 16:13-15) E pelā mo Litia, e lau i miliona o tino ko oti ne ‵taki atu ne Ieova ki a ia.

16. Ko oi e ‵tau o maua ne ia a tavaega mō so se ikuga ‵lei e maua ne tatou i te ‵tou galuega talai?

¹⁶ Ko oi eiloa e ‵tau o maua ne ia a tavaega māfai e maua ne tatou a ikuga ‵lei i te ‵tou galuega talai? Ne tali ne Paulo te fesili tenā i te taimi ne tusi atu ei ne ia a pati konei e uiga ki te fakapotopotoga i Kolinito: “Ne ‵toki ne au, ne fakasiusiu ne Apolo, kae ko te Atua ne fai faeloa ne ia ke ola te lakau, tela la, e se ko te tino ne ‵toki ne ia io me ko te tino ne fakasiusiu ne ia e tāua atu, kae ko te Atua eiloa telā e fai ne ia ke ola te lakau.” (1 Koli. 3:6, 7) E pelā mo Paulo, e ‵tau o avatu faeloa ne tatou a tavaega ki a Ieova mō so se ikuga ‵lei e maua ne tatou i te ‵tou galuega talai.

17. E mafai pefea o fakaasi atu ne tatou te loto fakafetai mō te meaalofa ke “ga‵lue fakatasi” mo te Atua, Keliso mo agelu?

¹⁷ E mafai pefea o fakaasi atu ne tatou a te loto fakafetai mō te tauliaga ke “ga‵lue fakatasi” mo te Atua, Keliso mo agelu? E mafai o fai tatou penā mai te ‵sala atu mo te loto finafinau ki avanoaga ke talai atu te tala ‵lei ki nisi tino. E uke aka a nisi auala ke fai te mea tenei, e pelā mo te talai atu “ki tino e tokouke kae mai fale ki fale.” (Galu. 20:20) E tokouke a tino e fia‵fia foki o talai atu i so se taimi. Kafai e fetaui latou mo se tino fou, e fakatalofa kae fakamisikata atu latou ki a ia kae taumafai ke kamata aka se sau‵talaga. Kafai e saga tonu mai te tino, ko kamata ei o talai atu ne latou te tala ‵lei o te Malo i se auala apo ki te tino.

18-19. (a) E fakasiusiu pefea ne tatou a fuaga o te munatonu? (e) Taku mai se tala telā e fakaasi mai i ei te auala ne fesoasoani atu a Ieova ki se akoga faka-te-Tusi Tapu e tokotasi.

¹⁸ E pelā me ne tino e “ga‵lue fakatasi mo te Atua,” e ‵se tau fua o ‵toki ne tatou a fuaga o te  munatonu kae ke fakasiusiu foki. Kafai e fiafia mai se tino, e ma‵nako tatou o fai te ‵toe mea ke asi atu ki ei io me fai se fakatokaga mō te suā tino ke fesokotaki atu ki a ia ke taumafai o kamata se akoga faka-te-Tusi Tapu. Kafai ko gasolo ki mua te akoga, e fia‵fia eiloa tatou ke lavea atu te auala e galue ei a Ieova ki se akoga faka-te-Tusi Tapu ke ‵fuli ana mafaufauga mo lagonaga.

¹⁹ Mafaufau ki te Raphalalani, se tokita fakataulaitu i Afelika ki Saute. Ne fiafia a ia ki ana mea ne tauloto mai tena akoga faka-te-Tusi Tapu. Kae ne faigata ‵ki ke talia ne ia a pati a te Tusi Tapu e uiga ki te fesokotaki atu ki agaga o ana tupuga kolā ko oti ne ‵mate. (Teu. 18:10-12) Fakamuli loa, ne talia ne ia ke fulifuli malielie ne te Atua ana mafaufauga. Kae i te taimi tonu, ne fakagata ne ia te faifaiga tenā e pelā me se tokita fakataulaitu, faitalia me ne maua mai i ei ana tupe mō tausi a ia. Ne fai mai a Raphalalani, telā ko 60 nei ana tausaga: “E fakafetai au ki Molimau a Ieova mō te fesoasoani mai ki a au i auala e uke, e pelā mo te ‵salaga ne latou a taku galuega ‵togi. Kae sili atu toku fakafetai ki a Ieova mō te fesoasoani mai ke faka‵ma toku olaga, ko te mea ke mafai o kau atu au ki te galuega talai e pelā me se Molimau papatiso.”

20. Se a te fakaikuga ka fai ne koe?

²⁰ I te mataupu tenei, ne sau‵tala loa tatou ki koloa tāua e fa kolā e se lavea. A te ‵toe koloa tāua mai i ei ko te tauliaga ke fai a Ieova mo fai te ‵tou toe Taugasoa pili. Kafai e fai tatou mo taugasoa ‵pili o Ieova, ka maua eiloa ne tatou a mea aoga mai nisi koloa tāua kolā e se lavea ne tatou—ko te fakapilipili atu ki a ia i ‵talo, maua te fesoasoani o tena agaga tapu mo te fesoasoani mai te kau o te lagi i te ‵tou galuega talai. Ke na fakaiku aka ne tatou ke fai ke ‵poko a te ‵tou loto fakafetai mō koloa tāua konei kolā e se lavea. Kae ke mo a ma fakagata a te ‵tou fakafetai atu faeloa ki a Ieova mō te fai o ia e pelā me se Taugasoa gali o tatou.