1. Мар вераз Иисус инмысь ваньбур сярысь?

 ВАНЬ сыӵе узырлыкъёс, кудъёссэ адӟыны уг луы. Тужгес но дуно узырлыкъёс адскисьтэмесь. Гурезь йылын тодытыкуз, Иисус вераз инмысь ваньбур сярысь, кудӥз музъем вылысь ваньбурлэсь трослы дуногес луэ. Собере со ватсаз: «Уго кытын тӥляд ваньбурды, отын ик луоз сюлэмды но» (Матф. 6:19—21). Сюлэммы милемыз кыске отчы, мар милемлы дуно потэ. Ми ваньбурмес инме люкаськомы, куке лэсьтӥськомы ваньзэ, мае быгатӥськомы, Инмарлы ярамон луон понна. Кызьы валэктӥз Иисус, сыӵе ваньбур уг быры, озьы ик сое лушканы уг луы.

2. а) Мар карыны милесьтым мылкыдмес ӝутэ Павел, 2 Коринфъёслы 4:17, 18 лыдэ басьтыса? б) Мае ми эскеромы та статьяын?

² Апостол Павел милесьтым мылкыдмес ӝутэ адскисьтэмез шоры учкыны. (Лыдӟе 2 Коринфъёслы 4:17, 18.) Мар сярысь вераз Павел? «Адскисьтэм» пӧлы пыро бакель каронъёс, кудъёссэ ми Инмарлэн выль дуннеяз басьтомы. Та статьяын ми эскеромы ньыль адскисьтэм узырлыкъёсты, кудъёсыз милемлы туннэ ик пайда ваё ини. Соос пӧлын Инмарен эшъяськон, вӧсяськон, святой духлэн юрттэмез, озьы ик юрттэт, кудзэ ми басьтӥськомы Иеговалэсь, Иисуслэсь но кылчинъёслэсь ужан-тыршонмы дыръя. Озьы ик ми эскеромы, кызьы соос понна Иеговалы тау кароно.

3. Кыӵе адскисьтэм узырлык котьмалэсь дуно луэ но малы луыса ми сое басьтыны быгатӥськомы?

³ Тужгес но дуно узырлыкмы, кудӥз милям вань,— со  Иеговаен эшъяськон (Мад. 3:32). Кызьы Инмар быгатэ сьӧлыко адямиосын эшъяськыны но со дыре ик дун-чылкыт кыльыны? Со озьы луыны быгатэ Иисус Христослэн мозмытӥсь курбонэзлы луыса, кудӥз ас вылаз «дуннелэсь сьӧлыксэ басьтэ» (Иоанн 1:29). Иегова тодӥз, Иисус кулытозяз солы оскымон кылёз но адямиосты утёз шуыса. Тӥни малы Инмар эшъяськыны быгатӥз адямиосын, кудъёсыз Христослэн кулэмезлэсь азьло улӥзы (Рим. 3:25).

4. Вералэ Инмарлэн куд-ог ужась-тыршисьёсыз сярысь, кудъёсыз улӥзы Христос музъем вылэ лыктытозь?

⁴ Ойдолэ тодамы ваёмы куд-ог пиосмуртъёсты, кудъёсыз Христос музъем вылэ лыктытозь улӥзы но Инмарен эшъяськизы. Авраамлэн туж юн осконэз вал. Авраамлэн кулэмез бере 1 000 арлэсь но тросгес ортчыса, Иегова сое аслаз эшеныз нимаз (Ис. 41:8). Озьыен, адямиослэн кулэмзы бере но Иегова соосты матысь эшъёсыныз лыдъя. Иегова понна Авраам озьы ик улэп (Лука 20:37, 38). Эшшо одӥгез пиосмурт — со Иов. Одӥг пол Иегова вань кылчинъёс азьын вераз, Иов солы ярамон луэ шуыса. Инмар шуиз: «Со... сьӧлыкасьтэм, шонерлыко, Инмарлэсь кышканэн улӥсь, уродлэсь-леклэсь палэнскылӥсь» (Иов 1:6—8). Нош кызьы Инмар учкиз Даниил шоры, кудӥз Иеговалы оскисьтэм адямиос пӧлын 80 ар ӵоже оскымон ужаз-тыршиз? Кылчинъёс арлыдо Даниилэз куинь пол оскытӥзы, со «Инмарлы яратыны ярамон мурт» луэ шуыса (Дан. 9:23; 10:11, 19). Ми быдэсак оскиськомы: Иегова ӵыдытэк вите со дырез, куке улӟытоз яратоно эшъёссэ (Иов 14:15).

5. Мар кароно, Инмарлэн матысь эшъёсыз луон понна?

⁵ Туннэ трос миллион адямиос Иеговалэн матысь эшъёсыз луо. Кытысь ми сое тодӥськомы? Трос пиосмуртъёс, кышномуртъёс но нылпиос ужъёсынызы возьмато, соос Инмарлэн эшъёсыз луо шуыса. Сыӵе пӧяськисьтэм, шонерлыко адямиосын Иегова матысь кусыпъёс возе (Мад. 3:32). Соос Инмарлэн эшъёсыз луизы, малы ке шуоно Иисуслэн мозмытӥсь курбонэзлы оско. Та курбонлы луыса ми быгатӥськомы Иеговалэн эшъёсыз луыны но улонмес солы сӥзьыны. Та кулэ луись вамышъёсты лэсьтыса, ми трос миллион христианъёс пӧлы пыримы, кудъёсыз шумпото, ваньмызлэсь кужмо Кылдытӥсен эшъяськыса!

6. Кызьы ми возьматыны быгатӥськомы, Иеговаен эшъяськонмес дунъяськомы шуыса?

⁶ Кызьы ми возьматыны быгатӥськомы, Иеговаен эшъяськонмес дунъяськомы шуыса? Авраам но Иов 100 арлэсь но тросгес Инмарлы ужазы-тыршизы. Милемлы но Иеговалы оскымон луоно, кӧня гинэ аръёс ӵоже ми солы медам ужалэ-тырше. Даниил сямен, ми но Инмарен эшъяськонмес улонмылэсь дуноенгес лыдъяны кулэ (Дан. 6:7, 10, 16, 22). Иеговалэн юрттэменыз, ми быгатомы котькыӵе шуг-секытъёс пыр потыны но соин матысь кусыпъёсмес утьыны (Флп. 4:13, ВД).

7. а) Кызьы Иегова учке вӧсяськонъёсмы шоры, Мадёнъёсты 15:8 лыдэ басьтыса? б) Кызьы Иегова вӧсяськонъёсмылы ответ сётэ?

⁷ Эшшо одӥгез адскисьтэм узырлык — со вӧсяськон. Матысь эшъёс ог-огенызы шумпотыса верасько малпанъёссы но шӧдонъёссы сярысь. Нош кызьы ми Иеговаен вераськыны быгатӥськомы? Со вераське милемын аслаз Кылыз пыр, кытысь тодыны луэ солэн малпанъёсыз но шӧдонъёсыз сярысь. Ми быгатӥськомы Инмарен вӧсяськон пыр вераськыны, солы мур малпанъёсмы но шӧдонъёсмы сярысь вераса. Иеговалы туж кельше милесьтым вӧсяськонъёсмес кылзыны. (Лыдӟе Мадёнъёсты 15:8.) Яратӥсь Атай луыса, Иегова вӧсяськонъёсмес кылзэм сяна, соослы ответ но сётэ. Куддыръя Иегова  вӧсяськонмылы соку ик ответ сётэ. Нош куд-ог учыръёсын мар ке сярысь кӧня ке пол вӧсяськоно луэ. Озьы ке но ми оскыны быгатӥськомы, Инмар вӧсяськонмылы дырыз дыръя но самой умой ответ сётоз шуыса. Зэм но, милям возьманъёсынымы ӵошатыса, Инмар мукет сямен ответ сётыны быгатэ. Кылсярысь, Иегова шуг-секытмес уз быдты, нош кужым но визьлык сётоз, ми со пыр потыны мед быгатомы шуыса (1 Кор. 10:13).

8. Кызьы Иеговалы тау кароно вӧсяськыны луонлык понна?

⁸ Кызьы Иеговалы тау кароно вӧсяськыны луонлык понна, кудӥз туж дуно луэ? Одӥгез амал, мар со понна карыны луэ,— со Инмарлэн Кылысьтыз визь-кенешлэсь кылзӥськон. Отын гожтэмын: «Дугдылытэк вӧсяське» (1 Фес. 5:17). Иегова милемыз вӧсяськыны кужмысь уг косы. Инмар бырйыны луонлыкмес гажа но дугдылытэк вӧсяськыны мылкыдмес ӝутэ (Рим. 12:12). Соин ик ойдолэ котькуд нунал ӵем вӧсяськомы но ум вунэтэ Иеговаез тау карыны но данъяны (Пс. 144:2, 3).

9. Кызьы одӥг агай учке вӧсяськыны луонлык шоры но кызьы тӥ со шоры учкиськоды?

⁹ Макем кема ми Иеговалы ужаськомы-тыршиськомы но адӟиськомы, кызьы со куронъёсмылы ответ сётэ, сокем мургес луыны кулэ тау карон мылкыдмы вӧсяськыны луонлык понна. Тани мар вера Крис нимо агай, кудӥз 47 ар ӵоже, вань дырзэ сётыса, Иеговалы ужа-тырше: «Мыным туж кельше вазьгес султыны но дыртытэк Иеговаен вераськыны, куке шундылэн нырысетӥ тылсиосызъя лысвулэн шапыкъёсыз ворекъяло! Мон Инмарез тау карисько вань кузьымъёсыз понна, озьы ик вӧсяськыны луонлык понна. Нуналлэн пумаз но мон вӧсяськисько, соку мынам сюлмы каньыл луэ».

10. Малы милемлы Инмарлэсь святой духсэ дунъяно?

¹⁰ Инмарлэн святой духез — эшшо одӥгез адскисьтэм кузьым, кудзэ милемлы дунъяны кулэ. Иисус дышетскисьёсызлэсь мылкыдзэс ӝутӥз азьланяз но святой дух сярысь вӧсяськыны (Лука 11:9, 13). Святой духез пыр Иегова милемыз юнматэ, озьы ик со «мертантэм  бадӟым кужым» но сётыны быгатэ (2 Кор. 4:7; Ап. уж. 1:8). Солы луыса ми котькыӵе шуг-секыт пыр потыны быгатомы.

11. Кызьы милемлы святой дух юрттыны быгатэ?

¹¹ Святой дух юрттэ милемлы Иеговалы йыбырттонэн герӟаськем ужъёсты быдэсъяны. Со юрттэ милемлы умоятыны быгатонлыкъёсмес, кудъёсыз милям вань ини. Ми валаськомы: ужан-тыршонын азинлыко луыны быгатомы соку гинэ, куке милемлы Иеговалэн святой духез юрттоз.

12. Мар сярысь ми вӧсяськыны быгатӥськомы, Псалтирез 138:23, 24 лыдэ басьтыса?

¹² Кызьы Иеговалы возьматоно, святой духезлэсь юрттэмзэ дунъяськомы шуыса? Со понна вӧсяськоно но куроно, та дух сюлмысьтымы шонертэм малпанъёсмес но мылпотонъёсмес адӟыны мед юрттоз шуыса. (Лыдӟе Псалтирез 138:23, 24.) Ми та сярысь вӧсяськимы ке, Иегова святой духез пыр милемлы соосты возьматыны быгатоз. Сюлмысьтымы шонертэм малпанъёсмес но мылпотонъёсмес адӟыса, ми вӧсяськыны кулэ, Инмарлэн духез милемлы соосын нюръяськыны мед юрттоз шуыса. Озьы ми возьматомы, палэнскиськомы шуыса ваньмызлэсь, маин сэрен Иегова милемлы святой духсэ сётэмысь дугдысал (Еф. 4:30).

13. Мар юрттоз святой дух понна тау каронмес будэтыны?

¹³ Ми быгатомы святой дух понна тау каронмес будэтыны, куке малпаськомы со сярысь, мар каре та дух асьме нуналъёсы. Инме ӝутскемез азьын, Иисус аслаз дышетскисьёсызлы вераз: «Тӥ вылэ Святой Дух васькоз но, тӥ кужым басьтоды. ...Быдэс музъемлэн пумысеныз пумозяз ик Мынам адӟисьёсы-ивортӥсьёсы тӥ луоды» (Ап. уж. 1:8). Та кылъёслэсь быдэсмемзэс ми туннэ адӟиськомы. Святой духлэн юрттэменыз, быдэс дунне вылын Иеговалэн ужась-тыршисьёсыз луизы тямыс но ӝыны миллионлэсь тросгес адямиос. Озьы ик святой дух юрттэ милемлы будэтыны сямъёсты, кудъёсыз духлэн емышез пӧлы пыро: яратонэз, шумпотонэз, тупаса улонэз, чидась луонэз, лякытлыкез, гажась-жалясь луонэз, ог-огедлы оскиськымон луонэз, зӥбыт-востэм луонэз, возиськыны быгатонэз  (Гал. 5:22, 23). Талы луыса ми духовной райын улӥськомы. Озьыен, святой дух — Иеговалэсь зэмос кузьым!

14. Кин юрттэ милемлы, ужан-тыршонэ пыриськыкумы?

¹⁴ Милям вань на мукетыз адскисьтэм узырлыкмы — Иеговаен, Иисусэн но кылчинъёсын ӵош ужаны луонлык (2 Кор. 6:1). Ми соосын ӵош ужаськомы, куке дышетскисьёсты дасян уже пыриськиськомы. Тани кызьы Павел нимаз ассэ но мукет тодытӥсьёсты: «Ми — Инмарлэн ужасьёсыз» (1 Кор. 3:9). Ужан-тыршонэ пыриськыса, ми Иисусэн ӵош ужаськомы. Куке Иисус аслаз пытьы кузяз мынӥсьёссэ косӥз вань калыкъёс пӧлын дышетскисьёсты дасяны, со соосты оскытӥз: «Мон тӥледын огазьын» (Матф. 28:19, 20). Нош кызьы ми кылчинъёсын ӵош ужаськомы? Соос милемын кивалто, куке ми ӟеч иворез вераськомы. Ми талы туж шумпотӥськомы! (Усьт. 14:6).

15. Вералэ Библиын гожтэм учыр сярысь, кудӥз возьматэ, макем бадӟым инты басьтэ Иегова ужан-тыршонамы.

¹⁵ Кыӵе пайда вае инмысь юрттэт? Куке ми кизиськомы Эксэйлык сярысь зэмлыклэсь кидысъёссэ, куд-огъёсыз соос пӧлысь сюро кылзыны дась адямиослэн сюлэмъёсазы но будыны кутско (Матф. 13:18, 23). Нош кин будэтэ та кидысъёсты но кинлы луыса дышетскись емышъёс вайыны кутске? Иисус валэктӥз: нокин солэн дышетскисез луыны уг быгаты, «Атай сое... ӧз ке вайы» (Иоанн 6:44). Библиын гожтэмын учыр, кудӥз та веранлэсь шонер луэмзэ возьматэ. Тодамы ваёмы, мар луиз, куке Павел тодытӥз куд-ог кышномуртъёслы Филиппы кар сьӧрын. Соос пӧлын вал Лидия, кудӥз сярысь Библиын верамын: «Павеллэсь верамзэ кабыл басьтон понна Кузё-Инмар солэсь сюлэмзэ усьтӥз» (Ап. уж. 16:13—15). Та амалэн ик Иегова трос миллион мукет адямиосты ас дораз вайиз.

16. Кинэ данъяны кулэ ужан-тыршонын вань азинсконъёсмы понна?

¹⁶ Кинэ данъяны кулэ ужан-тыршонын азинсконъёс понна? Та юанлы валэктон шедьтыны луэ апостол Павеллэн гожтэтысьтыз, кудзэ со Коринфысь кенешлы ыстӥз. Со гожтӥз: «Мон мерттӥ, Аполлос ву киськаз, нош будэтӥз — Инмар. Мерттӥсь но, ву киськась но — олокинъёс ик ӧвӧл, будэтӥсь Инмар гинэ — ваньмызлэсь вылӥ» (1 Кор. 3:6, 7). Павеллэсь адӟем карыса, ужан-тыршонын вань азинсконъёсмы понна милемлы данъяно Иеговаез.

17. Кызьы возьматоно, Иеговаен, Иисусэн но кылчинъёсын ӵош ужаны луонлыкез ми дунъяськомы шуыса?

¹⁷ Кызьы возьматоно, Иеговаен, Иисусэн но кылчинъёсын ӵош ужаны луонлыкез ми дунъяськомы шуыса? Милемлы котькуд тупась учыре адямиослы ӟеч иворез вераны тыршоно. Сое пӧртэм сямен лэсьтыны луэ, кылсярысь, коркась корка ветлыса но трос калыко интыосын тодытыса (Ап. уж. 20:20). Озьы ик тросэзлы кельше мар ке но карыкузы тодытыны. Кыӵе ке адямиез пумитаса, соос соин ӟечбуръясько но вераськыны тыршо. Адямилэн вераськыны мылкыдыз вань ке, соос лякытэн верало солы Инмарлэн Эксэйлыкез сярысь.

18, 19. а) Кызьы ми зэмлыклэн кидысъёсыз вылэ ву киськаськомы? б) Кызьы Иегова юрттӥз одӥг адямилы, кудӥз Библиез дышетӥз?

¹⁸ «Инмарлэн ужасьёсыз» луыса, милемлы зэмлыклэсь кидысъёссэ кизёно гинэ ӧвӧл, нош озьы ик соос вылэ ву но киськано. Куке ми адӟиськомы, адямилы ивормы тунсыко потӥз шуыса, ми тыршиськомы со доры выльысь лыктыны, соин Библиез дышетыны кутскон понна, яке куриськомы со доры мукет Адӟись-Ивортӥсез лыктыны. Ми туж  шумпотӥськомы, куке адӟиськомы, кызьы Иегова юрттэ дышетскисьлы малпаськон амалзэ но шӧдонъёссэ тупатыны.

¹⁹ Тани Лымшор Африкаысь Рафаэль b нимо пиосмуртлэн учырез, кудӥз азьвыл тунаськыса-пелляськыса улӥз. Солы Иеговалэн Адӟись-Ивортӥсьёсыныз Библиез дышетыны кельше вал. Нош куке со тодӥз, мар вера Библия кулэмъёсын кусып возён сярысь, солы таин соглаш кариськыны секыт луиз (К. Зак. 18:10—12). Кӧня ке дыр ортчыса, та юан шоры со Инмар сямен учкыны кутскиз. Рафаэль тунаськон-пелляськонлы луыса гинэ коньдон поттэ вал ке но, та ужзэ со кельтӥз. Али Рафаэльлы 60 арес. Со вера: «Мон туж тау карисько Иеговалэн Адӟись-Ивортӥсьёсызлы, мыным пӧртэм сямен юрттэмзы понна. Кылсярысь, соос юрттӥзы мыным уж шедьтыны. Нош тужгес но мон тау карисько Иеговаез, улонме тупатыны юрттэмез понна. Табере мон пылатӥськем Адӟись-Ивортӥсь луисько но Иеговалы шумпотыса ужаны-тыршыны быгатӥсько».

20. Мар карыны мылкыддэс ӝутӥз та статья?

²⁰ Та статьяын ми вераськимы ньыль адскисьтэм узырлыкъёс сярысь. Соос пӧлысь нырысетӥез но тужгес но кулэез — Иеговаен матысь эшъяськон. Куке ми Инмарлэн матысь эшъёсыз луиськомы, милемлы пайда вайыны быгато мукет адскисьтэм узырлыкъёс но — вӧсяськон, святой духлэн юрттэмез, озьы ик Инмарен но солы оскымон духовной кылдытэмъёсын ӵош ужаны луонлык. Ойдолэ Иеговалы тау каронмес будэтомы вань та адскисьтэм кузьымъёс понна но котьку тау каромы, милям сыӵе умой Эшмы вань шуыса!