1. Ano an ginsiring ni Jesus mahitungod ha mga bahandi ha langit?

DIRI ngatanan nga bahandi nakikita. Ngani, an pinakapresyoso nga mga bahandi diri nakikita. Ha Sermon ha Bukid, nag-unabi hi Jesus hin mga bahandi ha langit nga mas labaw gud kay ha materyal nga mga panag-iya. Katapos, ginsiring niya ini nga kamatuoran: “Kon hain an imo bahandi, aadto liwat an imo kasingkasing.” (Mat. 6:19-21) An aton kasingkasing magpapagios ha aton nga mangalimbasog nga makuha an mga butang nga presyoso gud ha aton. Nagtitirok kita hin “mga bahandi ha langit” pinaagi ha pagkaada maopay nga ngaran, o reputasyon, ha Dios. An sugad nga mga bahandi diri gud madadaot o makakawat, sugad han siring ni Jesus.

2. (a) Sumala ha 2 Corinto 4:17, 18, gin-aghat kita ni Pablo nga magpokus ha ano? (b) Ano an aton hihisgotan hini nga artikulo?

² Hi apostol Pablo nag-aghat ha aton nga “[itutok an aton] mga mata . . . ha mga butang nga diri nakikita.” (Basaha an 2 Corinto 4:17, 18.) Ini nga mga butang nga diri nakikita mga bahandi nga nag-uupod han mga bendisyon nga aton mapapahimulsan ha bag-o nga kalibotan han Dios. Hini nga artikulo, uusisahon naton an upat nga diri nakikita nga bahandi nga aton mapapahimulsan yana mismo​—an pakigsangkay ha Dios, an regalo nga pag-ampo, an bulig han baraan nga espiritu han Dios, ngan an suporta tikang ha langit ha aton ministeryo. Aton liwat hihisgotan kon paonan-o naton maipapakita an aton apresasyon hini nga mga bahandi.

3. Ano an pinakapresyoso nga bahandi nga diri nakikita, ngan paonan-o ito nagin posible?

³ An pinakapresyoso nga bahandi nga diri nakikita amo an pakigsangkay kan Jehova nga Dios. (Sal. 25:14) Paonan-o nagin posible ha Dios nga makigsangkay ha makasasala nga mga tawo ngan magpabilin  nga bug-os nga baraan? Nahihimo niya ito kay an halad-lukat ni Jesus “nagkukuha han sala han kalibotan” nga amo an katawohan. (Juan 1:29) Maaram na nga daan hi Jehova nga an iya katuyoan nga magtagana hin Paratalwas ha katawohan diri mapapakyas. Salit an Dios mahimo makigsangkay ha mga tawo nga nabuhi antes mamatay an Kristo.​—Roma 3:25.

4. Paghatag hin mga ehemplo han mga kalalakin-an nga nabuhi antes han Kristo ngan nagin sangkay han Dios.

⁴ Tagda an pipira nga kalalakin-an nga nabuhi antes han Kristo ngan nagin sangkay han Dios. Hi Abraham usa nga tawo nga nagpakita hin marig-on gud nga pagtoo. Paglabay hin sobra 1,000 ka tuig kamatay ni Abraham, gintawag hiya ni Jehova nga “akon sangkay.” (Isa. 41:8) Salit bisan an kamatayon diri makakagbulag kan Jehova tikang ha iya duok nga kasangkayan. Buhi hi Abraham ha memorya ni Jehova. (Luc. 20:37, 38) Usa pa nga ehemplo amo hi Job. Han nagkatirok an tanan nga anghel ha langit, hi Jehova may pagsarig nga nagyakan parte kan Job. Gintawag hiya ni Jehova nga “matadong . . . nga tawo nga may integridad; may kahadlok hiya ha Dios ngan nalikay ha karaotan.” (Job 1:6-8) Ngan ano an inabat ni Jehova kan Daniel, nga matinumanon nga nag-alagad ha iya ha pagano nga nasud ha sulod hin mga 80 ka tuig? Tulo ka beses nga ginpasarig han mga anghel iton lagas na nga lalaki nga “presyoso gud” hiya ha Dios. (Dan. 9:23; 10:11, 19) Makakasiguro kita nga karuyag gud banhawon ni Jehova an iya hinigugma nga kasangkayan nga namatay na.​—Job 14:15.

5. Ano an ginkikinahanglan basi magin duok kita nga sangkay ni Jehova?

⁵ Pira nga diri perpekto nga mga tawo an duok nga kasangkayan ni Jehova yana? Minilyon. Maaram kita hini kay damu gud nga kalalakin-an, kababayin-an, ngan kabataan ha bug-os nga kalibotan an nagpapamatuod pinaagi han ira buhat nga mga sangkay hira han Dios. Hi Jehova “duok . . . nga sangkay han magtadong.” (Prob. 3:32) Nagin posible ini nga pagkamagsangkay tungod han ira pagtoo ha halad-lukat ni Jesus. Tungod han halad-lukat, may pagkabuotan nga gintutugotan kita ni Jehova nga magdedikar han aton kalugaringon ha iya ngan magpabawtismo. Kon ginbubuhat naton inin importante nga mga pitad, nagigin kaapi kita han minilyon nga dedikado ngan bawtismado nga mga Kristiano nga ‘duok nga sangkay’ han pinakaharangdon nga Persona ha uniberso!

6. Paonan-o naton maipapakita nga gin-aapresyar naton an aton pakigsangkay ha Dios?

⁶ Paonan-o naton maipapakita nga importante gud ha aton an aton pakigsangkay ha Dios? Pariho kanda Abraham ngan Job nga nagpabilin nga matinumanon ha Dios hin sobra usa ka gatos ka tuig, kinahanglan magpabilin kita nga matinumanon​—mationan-o man kita kaiha na nga nag-aalagad kan Jehova dinhi hinin daan nga sistema. Pariho kan Daniel, kinahanglan mas importante ha aton an aton pakigsangkay ha Dios kay ha aton kinabuhi. (Dan. 6:7, 10, 16, 22) Ha bulig ni Jehova, makakaya naton an anoman nga kakurian nga aton gin-aatubang ngan sugad nga resulta, matitipigan naton an duok nga pakigsangkay ha iya.​—Fil. 4:13.

7. (a) Sumala ha Proberbios 15:8, ano an inaabat ni Jehova mahitungod ha aton mga pag-ampo? (b) Paonan-o ginbabaton ni Jehova an aton mga pag-ampo?

⁷ An usa pa nga diri nakikita nga bahandi amo an pag-ampo. An duok nga magsangkay nagsusumatay han ira mga panhunahuna ngan inaabat. Sugad ba liwat hito ha aton pakigsangkay kan Jehova? Oo! Nakikiistorya ha aton hi Jehova pinaagi han iya Pulong, ngan dida hito, iginsusumat niya ha aton an iya panhunahuna ngan inaabat. Nakikiistorya kita ha iya pinaagi han pag-ampo, ngan naisusumat naton ha iya an aton gihilarumi nga panhunahuna ngan pag-abat. Nalilipay hi Jehova ha pagpamati ha aton mga pag-ampo. (Basaha an Proberbios 15:8.) Sugad nga mahigugmaon nga Sangkay, diri la kay ginpapamatian ni Jehova an aton mga pag-ampo, kondi  ginbabaton liwat niya ito. Usahay, ginhahatag dayon an baton. Pero may mga panahon nga bangin kinahanglan naton padayon nga ig-ampo an usa nga butang. Bisan pa hito, makakasarig kita nga babatunon ito ha tama nga panahon ngan ha pinakamaopay nga paagi. Syempre, an baton han Dios bangin iba ha aton ginlalaoman. Pananglitan, imbes nga wad-on an aton kakurian, bangin tagan kita niya hin kinaadman ngan kusog “basi makailob hito.”​—1 Cor. 10:13.

8. Paonan-o naton maipapakita nga gin-aapresyar naton an regalo nga pag-ampo?

⁸ Paonan-o naton maipapakita nga gin-aapresyar naton inin presyoso nga regalo nga pag-ampo? Usa nga paagi amo an pagsunod han sagdon ni Jehova nga “padayon nga mag-ampo.” (1 Tes. 5:17) Diri kita ginpipirit ni Jehova nga mag-ampo. Lugod, ginrirespeto niya an aton kagawasan ha pagbuot ngan gin-aaghat kita niya nga “magpadayon ha pag-ampo.” (Roma 12:12) Salit maipapakita naton an aton apresasyon pinaagi ha pag-ampo hin damu ka beses kada adlaw. Syempre, kinahanglan iupod naton ha aton mga pag-ampo an pagpasalamat ngan pagdayaw kan Jehova.​—Sal. 145:2, 3.

9. Ano an inaabat han usa nga brother mahitungod ha pag-ampo, ngan ano liwat an imo inaabat mahitungod hito?

⁹ Samtang mas nagtitikaiha kita nga nag-aalagad kan Jehova ngan nakikita naton kon paonan-o niya ginbabaton an aton mga hangyo, mas naghihilarom an aton apresasyon ha pag-ampo. Pananglitan, tagda an brother nga hi Chris nga nag-alagad hin bug-os-panahon ha naglabay nga 47 ka tuig. “Nalilipay ako ha pagmata hin temprano ha aga basi mag-ampo kan Jehova,” siring niya. “Makarepresko an pakiistorya kan Jehova samtang nasirang an adlaw ngan nag-iinggat an mga turo han tun-og nga nasisirakan! Nagpapagios ini ha akon nga pasalamatan hiya ha ngatanan nga iya regalo, upod na an pribilehiyo nga pag-ampo. Ngan pagkagab-i, kahuman mag-ampo, nakakakaturog ako nga may limpyo nga konsensya.”

10. Kay ano nga kinahanglan magin presyoso gud ha aton an baraan nga espiritu han Dios?

¹⁰ An baraan nga espiritu han Dios usa pa nga diri nakikita nga regalo nga kinahanglan magin presyoso gud ha aton. Gin-aghat kita ni Jesus  nga padayon nga mangaro han baraan nga espiritu. (Luc. 11:9, 13) Pinaagi han iya espiritu, gintatagan kita ni Jehova hin gahum​—bisan pa ngani han “diri ordinaryo nga gahum.” (2 Cor. 4:7; Buh. 1:8) Ha bulig han espiritu han Dios, makakaya naton an bisan ano nga kakurian nga aton gin-aatubang.

11. Ha ano nga paagi makakabulig ha aton an baraan nga espiritu?

¹¹ An baraan nga espiritu makakabulig ha aton nga mabuhat an aton mga toka ha pag-alagad ha Dios. Mahimo mapauswag han espiritu han Dios an aton mga talento ngan abilidad. Nabulig ito ha aton nga matuman an aton mga responsabilidad sugad nga Kristiano. Maaram kita nga nagigin posible la an mag-opay nga resulta ha aton pag-alagad ha Dios tungod han bulig han iya espiritu.

12. Sumala ha Salmo 139:23, 24, mahimo kita mangaro han baraan nga espiritu basi buligan kita nga buhaton an ano?

¹² Usa pa nga paagi nga maipapakita naton nga presyoso ha aton an baraan nga espiritu han Dios amo an pag-ampo nga buligan kita hito nga mahibaroan kon may-ada ba kita sayop nga panhunahuna o hingyap. (Basaha an Salmo 139:23, 24.) Kon ig-aampo naton ito, bubuligan kita ni Jehova pinaagi han iya espiritu nga mahibaroan an aton sayop nga panhunahuna o mga hingyap. Ngan kon mahibaroan na naton ito, kinahanglan mag-ampo kita para han espiritu han Dios basi tagan kita hin kusog nga maatohan ito nga panhunahuna o hingyap. Pinaagi hito, maipapakita naton nga determinado kita nga likayan an bisan ano nga magigin hinungdan nga diri na kita buligan ni Jehova pinaagi han iya baraan nga espiritu.​—Efe. 4:30.

13. Paonan-o naton mapapahilarom an aton apresasyon ha baraan nga espiritu?

¹³ Mapapahilarom naton an aton apresasyon ha baraan nga espiritu pinaagi ha pagpamalandong han nahihimo hito ha aton panahon. Antes sumaka hi Jesus ha langit, nagsiring hiya ha iya mga disipulo: “Makarawat kamo hin gahum kon an baraan nga espiritu kumada na ha iyo, ngan magigin mga saksi ko kamo . . . ngadto ha pinakahirayo nga bahin han tuna.” (Buh. 1:8) Ito gud an nahitatabo yana. Ha bulig han baraan nga espiritu, mga walo ngan tunga ka milyon nga tawo tikang ha iba-iba nga dapit han kalibotan an nagin mga magsiringba ni Jehova. Nakakaeksperyensya  liwat kita hin espirituwal nga paraiso kay an espiritu han Dios nabulig ha aton nga makultibar an mag-opay nga kalidad, sugad han gugma, kalipay, kamurayawan, pagin pasensyoso, pagkabuotan, pagkamaopay, pagtoo, pagkamalumo, ngan pagpugong ha kalugaringon. Ini nga mga kalidad nagkukompwesto han “bunga han espiritu.” (Gal. 5:22, 23) Presyoso gud nga regalo an baraan nga espiritu!

14. Ano nga diri nakikita nga suporta an aton nakakarawat kon nakikigbahin kita ha ministeryo?

¹⁴ May-ada kita han diri nakikita nga bahandi nga ‘magbuhat kaupod’ ni Jehova ngan han langitnon nga bahin han iya organisasyon. (2 Cor. 6:1) Nagbubuhat kita kaupod nira ha kada panahon nga nakikigbahin kita ha panhimo hin disipulo. Hi Pablo nagsiring mahitungod ha iya kalugaringon ngan ha mga nakikigbahin hini nga buruhaton: “[Kita] an mga igkasi-magburuhat han Dios.” (1 Cor. 3:9) Kon nakikigbahin kita ha ministeryo, nagigin igkasi-magburuhat liwat kita ni Jesus. Hinumdumi nga han ginsugo ni Jesus an iya mga sumurunod nga ‘manhimo hin mga disipulo ha mga tawo han ngatanan nga nasud,’ hiya nagsiring: “Kaupod niyo ako.” (Mat. 28:19, 20) Kumusta man an mga anghel? Mapasalamaton gud kita nga gin-gigiyahan kita han mga anghel samtang iginpapasamwak naton an “waray kataposan nga maopay nga sumat . . . ha mga naukoy ha tuna”!​—Pah. 14:6.

15. Pag-unabi hin ehemplo ha Biblia nga nagpapakita han importante nga papel ni Jehova ha aton ministeryo.

¹⁵ Pinaagi hini nga suporta tikang ha langit, ano an resulta? Kon nagsasabwag kita han mensahe han Ginhadian, an iba nga binhi nahuhulog ha makinarawaton nga kasingkasing ngan natubo. (Mat. 13:18, 23) Hin-o an nagpapahinabo nga tumubo ito nga mga binhi han kamatuoran ngan magin mabungahon? Hi Jesus nagsaysay nga waray tawo nga magigin iya sumurunod labot la kon “igpahirani hiya han Amay.” (Juan 6:44) An Biblia naghahatag hin espisipiko nga ehemplo hini. Hinumdumi an higayon han nagsangyaw hi Pablo ha grupo hin kababayin-an ha gawas han syudad han Filipos. Tagda an ginsiring han Biblia mahitungod ha usa ha ira, ha babaye nga Lydia an ngaran: “Gin-abrihan ni Jehova hin bug-os an iya kasingkasing basi maghatag hin atensyon ha mga butang nga iginyayakan ni Pablo.” (Buh. 16:13-15) Pariho kan Lydia, minilyon pa an iginpapahirani ni Jehova.

16. Hin-o an angay kumarawat han kadayawan ha bisan ano nga maopay nga resulta han aton ministeryo?

¹⁶ Hin-o an angay kumarawat han kadayawan kon may-ada mag-opay nga resulta an aton ministeryo? Ginbaton ito ni Pablo han iginsurat niya ini nga mga pulong mahitungod ha kongregasyon ha Corinto: “Ako an nagtanom, hi Apolos an nagsaribo, kondi an Dios an padayon nga nagpapatubo hito, salit diri an nagtatanom han bisan ano ngan diri liwat an nagsasaribo an sadang dayawon, kondi an Dios nga nagpapatubo hito.” (1 Cor. 3:6, 7) Pariho kan Pablo, kinahanglan ihatag naton pirme kan Jehova an kadayawan ha bisan ano nga maopay nga resulta han aton ministeryo.

17. Paonan-o naton maipapakita nga gin-aapresyar naton an “pagbuhat kaupod” han Dios, han Kristo, ngan han mga anghel?

¹⁷ Paonan-o naton maipapakita nga gin-aapresyar naton an pribilehiyo nga ‘magbuhat kaupod’ han Dios, han Kristo, ngan han mga anghel? Pinaagi ha pagin madasigon ha pagpamiling hin oportunidad nga maisangyaw ha iba an maopay nga sumat. Damu an paagi basi mabuhat ini, sugad han pagsangyaw “ha publiko ngan ha tagsa nga balay.” (Buh. 20:20) Damu liwat an nag-i-enjoy ha pagsangyaw ha diri pormal nga paagi. Kon may iginkikita hira nga estranghero, ginkukumusta nira hiya ha makisangkayon nga paagi ngan nangangalimbasog nga makagtikang hin pakiistorya. Kon naruruyag makiistorya ito nga tawo, mataktika nga igin-iistorya nira an mensahe han Ginhadian.

18-19. (a) Paonan-o naton ginsasaribohan an mga binhi han kamatuoran? (b) Pag-unabi hin eksperyensya nga nagpapakita kon paonan-o ginbuligan ni Jehova an usa nga estudyante han Biblia.

 ¹⁸ Sugad nga “mga igkasi-magburuhat han Dios,” kinahanglan diri la kita magtanom hin mga binhi han kamatuoran kondi saribohan liwat ito. Kon nagpapakita hin interes an usa nga indibiduwal, karuyag naton buhaton an aton pinakamaopay basi makaistorya hiya utro o maghikay nga may bumisita ha iya basi matikangan hiya hin pag-aram ha Biblia. Nalilipay kita kon nakikita naton nga ginbubuligan ni Jehova an estudyante han Biblia nga bag-uhon an paagi han iya paghunahuna ngan pag-abat.

¹⁹ Tagda an ehemplo ni Raphalalani nga usa nga tambalan ha South Africa. Naruyagan gud niya an iya mga nahibaroan ha iya pag-aram ha Biblia. Pero nakurian gud hiya pagkarawat han ginsisiring han Pulong han Dios mahitungod ha pakigkomunikar ha patay na nga kaapoy-apoyan. (Deut. 18:10-12) Kondi hinay-hinay nga gintugotan niya an Dios nga moldehon an iya panhunahuna. Ngan ha urhi, ginbayaan niya an pagin tambalan, bisan kon ito la an iya pakabuhi. Hi Raphalalani, nga 60 anyos na yana, nagsiring: “Mapasalamaton gud ako ha mga Saksi ni Jehova ha pagbulig ha akon ha damu gud nga paagi, sugad han pagbulig ha akon nga makabiling hin trabaho. Labaw ha ngatanan, mapasalamaton ako kan Jehova ha pagbulig ha akon nga mabag-o an akon kinabuhi, salit yana mahimo na ako makigbahin ha ministeryo sugad nga usa han iya bawtismado nga mga Saksi.”

20. Ano an imo determinasyon?

²⁰ Hini nga artikulo, ginhisgotan naton an upat nga diri nakikita nga mga bahandi. An pinakapresyoso hito ngatanan amo an pribilehiyo nga magin pinakaduok nga Sangkay hi Jehova. Tungod hito napapahimulosan naton an iba pa nga diri nakikita nga mga bahandi​—pagdaop ha iya ha pag-ampo, pakaeksperyensya han bulig han iya baraan nga espiritu, ngan pakakarawat hin suporta tikang ha langit ha aton ministeryo. Hinaot magin determinado kita nga pahilarumon an aton apresasyon hinin diri nakikita nga mga bahandi. Ngan hinaot padayon nga pasalamatan naton hi Jehova ha iya pagin maopay gud nga Sangkay.